|
|
 سيناريوهات : كرسى تمليك
|
صحيفة الرأى العام
عدد الجمعه الموافق 22 فيرائر 2008م
موقع الكاتب www.alfatihgabra.com
فى (قاعة الإجتماعات) الملحقة بمكتب مسئول (هيئة الإستثمار فى وسائل النقل) جلس عدد من المستشارين الإقتصاديين فى إجتماع دعى له المسئول بمناسبة وصول الدفعة الأولى من (بصات شركة النقل العام)
- يا جماعه انا قدمت ليكم الدعوة للإجتماع ده عشان نشوف قصة الباصات الجايه دى ومدى فأئدتها إستثمارياً .. هسه بس معقول الباصات دى جايبنها بالشئ الفلانى وتعبانين جنس التعب ده وفضينا ليها (قلب الخرطوم) نقعد نلقط فيها خمسين قرش ... خمسين قرش الكلام ده بجى؟
- والله أنا ذاتى يا سعادتك شايف القصة دى ما جايه
- أها والحل شنو يا جماعه ؟
- والله أنا بفتكر نعمل ليها نظام (دفع مقدم)
- كيفن يعنى؟
- هسع أى حاجه بقت دفع مقدم .. الكهرباء الموية .. كروت الشحن .. خلاص يعنى بس بقت على المواصلات ؟
- تقصد شنو يا سعادة المستشار ؟
- بقصد إنو مافى حاجه إسمها الزول يركب ويجيهو الكمسارى ويقوم يدفع ليهو حق (التذكرة)
- مال يدفع ليهو شنو يعنى؟
- أيوااا .. خلو بالكم معاى عشان تعرفو (المقاصد) بتاعت (المشروع) ده
- طيب ورينا ليها
- نحنا نعمل فى (الباصات) دى نظام بتاع كروت ممغنطه ذى بتاعت (الموبايلات) دى ، يقوم (المواطن) يشترى (الكرت) ولمن يركب الباص يدخلو فى المكنة تخصم منو تمن التذكرة بدل ما نقعد نلقط فيها خمسين قرش .. خمسين قرش .. نطلع تمن (الباصات) دى من كروت الدفع المقدم دى !!
- والله فكرة أخونا المستشار دى فكرة كويسه وما بطاله لكن ..
- لكن شنو يا دكتور؟
- لكن أنا عندى فكرة أحسن منها وتخلينا نرجع تمن الباصات دى فى يومين !!
- (الجميع فى دهشة) : يومين بس
- أيوه إنتو ناسين إنو الدكتوراة بتاعتى دى فى (العائدات السريعه للإستثمار)
- أها قول لينا فكرتك
- طيب ركزو معاى .. مش فى (عربات تمليك) ؟
- أيوه فى
- مش فى (شقق) تمليك؟
- أيوه فى
- خلاص
- هو شنو الخلاص يا دكتور
- خلاص نعمل (كراسى تمليك)
- كيف يعنى أشرح لينا الحكايه دى
- نحنا نطرح (الكراسى) بتاعت (البصات) دى للتمليك .. أى مواطن يشوف (الباص) المعين فى (الخط) المعين ويشوف (الكرسى) العاوزنا (نملكو) ليهو نطلع ليهو بيهو (شهادة بحث) و(كروكى) يوضح موقعو فى (البص) وين ويبقى الكرسى (حقو) يتصرف فيهو ذى ما عايز !! يأجرو .. يركب فيهو السنه كلها يعمل فيهو العاوزو طبعا بعد ما يدفع حق (التمليك) وبى كده نطلع تمن الباصات دى فى يومين !!
- والله فعلا يا سعادة المستشار الدكتوراة بتاعتك دى فى (العائد السريع) !!
مؤتمر صحفى لشرح المشروع :
فى قاعة المؤتمرات بأحدى الفنادق الفاخرة قام المسئولون عن مشروع (كرسى تمليك لكل مواطن) بعقد مؤتمر صحفى من أجل تنوير الفئة التى يستهدفها المشروع وهى فئة المواطنين وبعد أن قدم (مدير المشروع) شرحا مستفيضا للمشروع وأهدافه قام بفتح باب الأسئلة للصحفيين ومندوبى وكالات الأنباء والفضائيات :
سؤال : نحنا الحقيقه بنعرف نظام (شقق تمليك) ، (فلل تمليك) لكن (كراسى) تمليك دى ما أدونا ليها ممكن بس تشرحو لينا الموضوع ده
جواب : المشروع فى غاية البساطه والهدف الأساسى منو إنو المواطن يحس بإنو عندو حاجه (بيمتلكها) أكيد معظم المواطنين القاعدين يركبو المواصلات العامة ديل ناس (مساكين) وما عندهم حاجه بيمتلكوها يعنى لا بيت لا عربية .. لا شقه .. فقلنا نخليهم يحسو بالمواطنه وإنهم عندهم حاجه بتاعتهم بيمتلكوها!!
سؤال : هل لهذا المشروع دور إقتصادى؟
جواب : من أهم سمات هذا المشروع هو أنه يلعب دورا إقتصاديا هاما .. يا جماعة إنتو براكم شايفين (الركود الإقتصادى) الفى البلد و(الكساد الحاصل) عشان كده كان لازم يظهر نوع جديد من (السلع) عشان الإقتصاد ينتعش !!
سؤال : هل سبقت هذا المشروع دراسات وافيه؟
جواب : كيف الله أكبر ده كلامك ؟ المشروع ده تم بعد دراسات متأنيه شارك فيها عدد من الخبراء المحليين وكمان الأجانب والدراسة بتاعتو مرت بى ثلاثه مراحل رئيسية كل مرحلة ريئسية مرت بى سبعه مراحل فرعيه ومن المميزات بتاعت المشروع ده إنو ح يساهم فى إنعاش إقتصاد البلد لأنو (سلعه الكراسى) دى ح يكون عليها طلب كبير والشعب محتاج ليها وهى خدمة ضروريه يعنى (ماهياش) سلعه نرفيهية مثلا علشان تكون حكر على (الطبقات العليا) !!
سؤال : دلوقت قول مواطن أخد ليهو كرسى تمليك فى بص (الصحافة ظلط) ح يستفيد منو شنو؟
جواب : أيواا ده سؤال جميل .. أول حاجه الكرسى ده بيبقى ملك ليهو وح نديهو بيهو (شهادة بحث ) و(كروكى) يوضح موقع (الكرسى) داخل البص والرقم بتاعو والخط بتاع البص الموجود فيهو .. وبعد كده المواطن (مخير) لو عاوز يأجرو للشركة (بتاعتنا) ممكن نأجرو منو وأهو يطلع ليهو بى قرش قرشين حلوين كل شهر ولو عوز يأجرو لى زول براهو بى طريقتو ولو كمان عاوز يخليهو فاضى عشان لما يجى يركب ماشى الشغل مثلا يقعد فيهو مستريح حتى لو البص مليان كمان على كيفو !!
سؤال : ممكن تكلمنا لو سمحت عن مسألة إنكم تأجرو الكرسى من (الزول الح يشتريهو) دى؟
جواب : أيواا ده سؤال جميل .. أساسا المشروع ده الهدف بتاعو (دعم الأسر الفقيرة) وتمليكا لوسائل (المواصلات) مش كده وبس وكمان الإستثمار فيها خذ مثلا إحسن كرسى فى باصاتنا دى هو الكرسى الأمامى الناصية القريب من (الباب) وبفتح على (شباكين ) ده مثلا فى الخطوط الطويلة الزى خط (الكلاكلات – الخرطوم) المواطن بيدفع (ألف وميتين جنيه) ونملكو ليهو ونحنا ممكن نأجرو منو بى (أربعميت جنيه فى السنة) يعنى ممكن يطلع تمنو فى (تلاته سنين) وبعد داك البجيهو كلو يكون ربح !!
سؤال : كيف يعنى ممكن المواطن يركب الباص ويلاقى (كرسى) فاضى وما يقدر يقعد علييهو عشان ملك (زول تانى) وفى واحد مشتريهو؟ مش الكلام ده فيهو(إستفزاز) لمشاعر المواطنين الما قادرين يشترو (كراسى تمليك)؟
جواب : شنو الغريب فى الموضوع ؟ مش هسه فى ناس قاعده فى الشارع وما عندها بيوت وفى ناس عندها (شقق تمليك) المشكلة وين ؟ الإستفزاز وين يعنى؟ !!
إعلان :
على صفحات الصحف تم نشر إعلان يحمل ترويسة (شركة النقل العام) تعلن عن طرح (كراسى) باصات الشركة للتمليك على أن يكون التمليك بأسبقية الحجز ويكون الحجز بفروع الشركة المختلفة بالعاصمة لكافة المواطنين على أن يفتح باب الحجز إبتداء من تاريخه وحتى إنتهاء كمية (الكراسى) على أن يتقدم المواطن الذى يرغب فى التملك بطلب (تملك كرسى) فى خط رقم (كذا) المتجه إلى (كذا) علما بأن أسعار (الكراسى) تختلف حسب موقعها داخل (البص) فهنالك (كراسى أمامية) وأخرى (خلفية) وأخرى (ناصية) تفتح على (شباك) وأخرى على (باب وشباكين) !!
بعد أن شاهد المواطنون ذلك المؤتمر الصحفى وقاموا بقراءة الإعلان على صفحات الصحف
تدافعوا لى مكاتب (شركة المواصلات) من أجل الحصول على (كرسى تمليك) ونسبة للإقبال الكبير (إستثمار وكده) فقد ظهرت شريحة من (السماسرة) اتقوم بتسهيل (الإجراءآت) بالتعاون مع بعض (الموظفين) بالداخل :
- شوف يا أستاذ إنت بس حدد عاوز (كرسى واحد) ولا (كرسيين لصق بعض) ؟ الموظفين الجوه البيعملو (عقود التمليك) ديل ناسنا هسع بجيب ليك العقد بتاعك !!
- والله يا حاج (الكراسى) بتاعت خط (الدروشاب) دى كلها كملت لكن ممكن أباصر ليك (كرسى) – يلتفت نحو السمسار المعاهو- أخونا (حسن كتاحه) ده عندو كرسى (تانى شباك) فى نفس الخط عاوز يفكو بس إنت يا حاج أديهو (المعقول) !!
عم حسنين يستثمر :
عم حسنين موظف على المعاش قام مؤخراً بإستبدال جزء من معاشة ، فكر فى عمل مشروع يعينه على ظروف الحياة فهداه تفكيره متأثراُ بتلك الحملة الإعلانية الضخمة لشركة (لنقل العام) أن يقوم بشراء (كرسى تمليك) على خط (الخرطوم - الصحافة ظلط) حيث يسكن ،tقام بملئ الإستمارة المعده لذلك كما قام بدفع الرسوم المقررة ومن ثم تم تسليمه شهادة بحث وكروكى (للكرسى) رقم 21 بالبص رقم 3344 خ ت على الخط المذكور .
- أها يا إبنى ممكن تورونى الكرسى ده على الطبيعه؟
- طبيعه شنو يا حاج هو (مخطط سكنى) ؟ من دربك ده تمشى تقيف فى أى محطه (على الخط) ولمن يجى الباص الفوقو ( الكرسى) بتاعك الإشتريتو ده تركب وتطلع (الكروكى) من جيبك وتشوف موقعو من (الكراسى) وين؟
- أها ولو عاوز إستثمروا ؟
- والله شوف يا حاج إنت إشتريت فى )حته( أقصد فى خط (تعبان شويه) وما عليهو إقبال عشان كده لوعاوزين نأجر منك (الكرسى) ده ح يكون إيجار )تعبان( فأحسن تأجرو لى (راكب ساكت) من ناس الحته ديك
- والراكب ده ألقاهو وين؟
- دى ما مشكلة يا حاج بس تعمل ليك إعلان (صغيرونى) فى أى جريده وتخت رقم الموبايل بتاعك !!
(الكرسى) على الطبيعه :
بعد أن تسلم عم حسنين شهادة البحث والكروكى غادر مبنى الشركه متجها صوب محطه بصات خط (الخرطوم - الصحافه ظلط) وذلك لرؤية (الكرسى رقم 21 ) الخاص به على الطبيعه وحتى يتمكن من ذلك كان عليه إنتظار قدوم البص رقم 3344خ ت ، بعد مرور أكثر من ساعه وقفها عم حسنين فى المحطة وهو ينظر إلى (أرقام البصات) التى تقف على المحطه جاء الباص رقم 3344 خ ت ، عندما ولج (عم حسنين) إلى داخل البص فوجئ بأن الكراسى على الجانبين قد تم رصها ووصلها مع بعضها البعض بحيث لم يعد هنالك مكانا للمرور فقام بسؤال الركاب عن السبب فأخبروه بأن الكمسارى والسواق يقومان بتأجير الكرسى الزائد فى كل صف وعندها نظر (عم حسنين ) إلى الكمسارى بغضب وهو يقول له :
- أنا هسع أوصل للكرسى بتاعى داك كيف هسه؟
- (الكمسارى) : قلت الكرسى ياتو يا حاج
- رقم 21 داك !!
- ورينى (طاقة التمليك) بتاعتك لو سمحت
- دى البطاقة وكمان دى شهادة البحث والكروكى !!
- لا تمام يا حاج .. مافى ما مشكلة نط فوق الكراسى دى - مخاطبا الركاب – يا جماعه زحو للحاج ده شوية عشان يوصل لى كرسيهو !!
وهنا ينظر (عم حسنين) للكمسارى نظرة حنق وغضب ويخاطبه قائلاً :
- البصات دى لمن جينا نشترى الكراسى دى قالو لينا الباص فيهو 40 راكب بس ، هسع عملتوهم أربعميه ؟
- يا حاج إنت مش لقيت كرسيك فاضى وقعدت فيهو؟ خلاص ما تنضم كتير
- (أحد الركاب يخاطب عم حسنين) : كان جات على (كراسى النص) العملوهوها دى هينه .. الظاهر يا حاج إنت ما شفت الناس (المسطحة فوق) !
- فوق وين يا إبنى
- كيف ياحاج إنت ما شفت (الكراسى) المركبه فى (راس البص) دى ولا شنو؟
إضطر (عم حسنين ) إلى القفز فوق الكراسى حتى يصل إلى (كرسيه) وهو يشعر بالغيظ والحنق من السائق والكمسارى المتلاعبين واللذان قاما بتأجير كراسى (الممر) وتركيب عدد من الكراسى على سطح البص فقرر العودة تقديم شكوى لإدارة الشركة .
هيئة الرقابه على الكراسى :
نسبة لوصول عدد كبير من الشكاوى لإدارة الشركة من بينها الشكوى المقدمة من (عم حسنين) بعد أن تفشت ظاهرة فساد السائقين والكماسرة وكثر الحديث عن التلاعب فى (كراسى الباصات) أعلنت (هيئة الإستثمار فى وسائل النقل) عن إنشاء هيئة سميت (بهيئة الرقابه على الكراسى ) تتبع مباشرة لمدير عام (هيئة الإستثمار) وظيفتها ضبط (السواقين والكماسرة) المتلاعبين حيث تم تعيين مفتشين يقومون بعمليات تفتيش مفاجئة للبصات للتأكد من عدم تأجير الكراسى التى لا يجلس عليها مالكيها وكذلك للتأكد من عدم وجود أى كراسى إضافية تم تركيبها بواسطة السائقين والكماسرة . واصبح من المألوف رؤية (مفتش) هيئة الرقابه على الكراسى بزيه (الكاكى) المميز وهو يدخل إلى (البص) المخالف فيقوم (السائق) بإخراج رزمة من المال من جيبه ويسلمها له فيرفع الأخير يده بالتحية وينزل فى اقرب محطة !!
تداعيات إجتماعية :
(1) صفحة الحوادث :
- زوجها يرفض ان يشترى لها (كرسى تمليك) بخط (الفتيحاب - ام بدة بالردمية) فتقتلة ثم تنتحر
- محتال يقوم بتزوير شهادات بحث 56 كرسى (ناصية)
(2) صفحة الإعلانات المبوبة :
- كمبيوتر لاب توب بانتيوم فور شاشة 17 بوصة للبيع أو للبدل بكرسى (سنقل) بخط (الكلاكلة اللفة) المتجه إلى (العزوزاب)
- للبدل مع دفع (الفرق) كرسى خلفى (الكنبه الأخيرة) بخط (أبوسعد – المحطة الوسطى) مع كرسى (شباك أمامى) بخط (الثورة بالوادى) المتجه (للجرافه) – الوسطاء يمتنعون
(3) وقفت (نوسه) أمام والدتها الدموع تتساقط من عينيها وهو تقول لها فى دلع :
- أنا خطيبى (هيثم) ده ما عاوزاهو يا ماما ؟
- مالو مهندس قدر الدنيا ؟ إنتى يا بت غبيانه ولا شنو هو هسه فى عرس ما تحمدى الله
- قلت ليك يا ماما ما عاوزاهو (هيثم) ده زول (تعبان) وما حيلتو حاجه
- ودايرة ياربى تعرسى منو؟
- أنا عاوزة أعرس (كمال) وضعو المالى أحسن
- وكمال ده بيشتغل شنو؟ فى الجمارك
- لا
- فى الضرائب ؟
- لا برضو
- تاجر عمله ؟
- برضو لا
- حيرتينى معاكى يا بتى (كمال) بتاعك ده بيشتغل شنو؟
- كمسارى فى البصات التمليك الجديده !!
(4) فى غرفة صالون بمنزل احدى الأسر المتوسطه يجلس (أسامه) وهو شاب فى مقتبل حياته أمام رب الأسرة (عم خضر) فى خجل :
- والله يا عم (خضر) يشرفنى ويسعدنى إنى اتقدم وأطلب منكم يد بنتك الآنسة (رحاب)
- وإنت يا إبنى بتشتغل وين؟
- والله الحقيقه يا عمى (خضر) أنا رجل أعمال !!
- يعنى عندك بيت أو شقه تسكنو فيها
- لا
- طيب معناتو عندك رصيد فى البنك
- برضو لا
- طيب اكيد عنك عربية
- برضو لا
- (فى زهج) : طيب عندك شنو .. شابكنى رجل أعمال ... رجل أعمال؟
- الحقيقة يا عم خضر أنا ورثت من الحاج الوالد (كرسى) فى خط (الشعبية – المزاد) وممكن أبيعو وبى قروشو أشترى ليا شقه وأجهزها والقروش البتفضل نعمل منها العرس و أشترى بالباقى عربية ونقضى شهر العسل فى (قبرص) !! وهنا تتعالى زغاريد (أم رحاب) التى كانت تستمع للنقاش من خلف الباب !!
لم يجد عم حسنين مستاجراً للكرسى على الرغم من أنه قد قام بعمل عدة إعلانات فى الصحف فهداه تفكيرة إلى أن يقوم يوميا بالذهاب إلى المحطة وإنتظار البص رقم 3344 خ ت والجلوس على (الكرسى رقم 21) خاصته ثم ما أن يجلس على الكرسى الملاصق له (راكب) حتى يبادره بالسؤال :
- الأخ (ملك) ولا حكر (أقصد) ملك ولا ح تدفع تذاكر
- لا ح أدفع تذاكر
- طيب ياخى بدل تدفع تذاكر كل يوم ما تجى أأجر ليك الكرسى ده
- أأجر شنو؟ يا حاج أنحنا قادرين ندفع إيجار البيت كمان نأجر لينا كراسى ... والله الماهيه بتكمل قبل ما نعدها !!
- إنت مش موظف يا أبنى خلاص أنا أاجر ليك (بالصباح) بس .. وأشوف ليا راكب أأجر ليهو بالمساء عشان الإيجار يطلع ليك شويه
- شويه قدر شنو يعنى؟
- شوف ياأبنى أنا إشتريت الكرسى ده تمليك من الشركه بى (ألف وميتين جنيه) ولحدت هسع ما دخلت جيبى تعريفه !
- ناس الشركه ما أجروهو منك ليه؟
- إيجارهم شويه قال أيه الخط تعبان
وهنا جاء الكمسارى فأخرج (الراكب) ثمن التذكرة بينما نظر عم حسنين إلى الكمسارى فى تعال قائلاً :
- تمليك يا إبنى تمليك
- طيب ممكن تورينا (البطاقه)؟
- (يبحث فى جيبوبه فلا يجدها) : ما قلت ليك يا إبنى تمليك أنت ما بتعرفنى يا إبنى أنا ما سيد الكرسى 21 القاعد فيهو ده !
- يا حاج ما تأخرنا طلع لينا البطاقه وألا قوم لينا من الكرسى ده هسع (سيدو) يجى يفتكرنا قاعدين نأجرو من (الباطن) !!
عم حسنين يترك الكرسى ويقيف حيلو ماسكاً على (الشماعه) بينما الراكب الملاصق له (مشروع البيع) يتمتم قائلا :
- عالم ما بتختشى (الحاج) كان عاوز يبيع لينا الهواء !!
أقبض مخالفة :
بعد أن تحسس جيبه وتأكد من وجود (بطاقة التمليك) ولمزيد من الحرص وحتى لا يتعرض لما تعرض له فى المرة الأخيرة قام عم حسنين بأخذ (شهادة البحث) و(الكروكى) وخرج منتظراً الباص 3344 خ ت الذى قام بالصعود إليه فور وصوله للمحطة ولكن لدهشته فقد وجد ان الكرسى 21 يجلس عليه (راكب) :
- بالله لو سمحت قوم لينا
- أنت معاى أنا؟
- أيوه معاك إنت .. الكرسى القاعد فيهو ده مش رقم 21
- ويعنى شنو رقم واحد وعشرين ولا رقم واحد وتلتميه
- الكرسى ده (ملك حر) بتاعى يا سيد وأهو دى (بطاقه التمليك) وشهاده البحث والكروكى ذااتو
- يا حاج كروكى شنو وبتاع شنو أنا دفعت (حق التذكرة) وقاعد (بى حقى) لو عندك كلام إتكلم مع (الكمسارى) داك
على أثر الجلبه ياتى (الكمسارى) والذى ما أن يراهو عم حسنين حتى يبادرة :
- أها الليله جيتك بى مستنداتى وقبضتك بالثابته
- ثابتت شنو يا حاج أصلك قبضتنى بى (بنقو) ؟
- والله أخير البنقو من التلاعب والسرقه .. تأجرو فى كراسى الناس وتشيلو القروش تدخلوها جيوبكم !!
- قروش شنو يا حاج مش الخمسين قرش بتاعت الراكب القاعد فى كرسيك دى هاااك ليها
- (يخرج من جيبه مفتاح إنجليزى غير ملتفت لحديث الكمسارى ويبدأ فى فك صواميل الكرسى) : أنا عشان حركات السرقه بتاعتكم دى عامل حسابى وجبت معاى المفتاح ده
- (الركاب) : يا حاج باركا ... الموضوع بسيط خلى البتعمل فيهو ده
- ما بباركا مش (كرسينى) أنا حر فيهو
- (الكمسارى) : طيب يا حاج خلى الزول القاعد فيهو ده ينزل فى المحطه بتاعتو
- ينزل ما ينزل ده موضوعكم إنتو مش قطعتوهو تذكرة .. حرم الكرسى ده ما يقعد الليله فى البص ده !!
وسط ذهول الجميع يقوم عم حسنين بفك الكرسى وحمله وينزل به فى أول محطة !!
حسنين اب كرسى :
إعتاد ركاب خط (الخرطوم – الصحافه ظلط) على رؤيه عم حسنين يوميا وهو يجلس على (الكرسى 21) فى المحطة يطالع فى صحيفته المفضلة منتظراً البص 3344 خ ت الذى ما أن يقف حتى يهرع إليه حاملا كرسيه ومتحسسا جيبه للتأكد من وجود (بطاقه التمليك) وبقية الأوراق الثبوتيه الخاصة بالكرسى ..
- بالله لو سمحتو يا جماعه زحوا لينا من الحته بتاعت الكرسى دى؟
بعد أن يقوم (عم حسنين) بوضع الكرسى فى مكانه الشاغر يلتفت إلى الراكب الملاصق له ليسالة السؤال التقليدى :
- تأجر منى الكرسى ده !!
لسؤ حظ عم حسنين فإن جميع الذين يقوم بسؤالهم كان معظمهم (أصحاب ملك) وعندهم (كراسى) أما القلة القليلة المتبقيه فهم ركاب يستخدمون ذلك (الخط) نادراً إلا الحظ قد إبتسم لعم حسنين ذات صباح وهو يضع الكرسى فى مكانه الشاغر ويلتفت إلى الراكب الملاصق له والذى تجاوز الستين من العمر قائلاً :
- تأجر منى الكرسى ده !
- أيواا أأجرو يا حاج والله إنت وقعت ليا فى جرح
- كيف؟
- تعرف يا حاج أنا عشان أصرف ( معاشى الشهرى ) بركب البص ده امشى المعاشات فى الشهر تسعين مره .. أمشى وتعال .. أمشى وتعال .. المعاش كلو (ميت جنيه) أنا بقطع تذاكر منو بى (تسعين جنيه ) وبيفضلو ليا (عشرة) بس !!
- طيب خلاص أنا بأجرو ليك بى (سبعين جنيه) فى الشهر عشان يفضلو ليك من المعاش (تلاتين) !!
قبل أن يقوم (الراكب) بالنزول فى محطته إتفق معه (حسنين) أن يلتقيا فى تمام الساعه العاشرة فى اليوم التالى أمام محطة (أبوحمامة) وذلك للذهاب إلى (المحامى) لعمل عقد الإيجار وإستلام مقدم شهر ..
فى الميعاد :
فى صباح اليوم التالى حمل عم حسنين كل أوراق الكرسى (الثبوتيه) إضافه إلى بطاقته الشخصية وإتجه إلى المحطة فى إنتظار البص 3344خ ت ليقوم بمقابلة المشترى عند محطة أبوحمامة وهو فى غاية الإنتشاء أخيرا سوف (يضوق طعم الكرسى) ويبدأ فى عملية إستثماره .. طال إنتظاره ولكن البص 3344 لم لم يات .. كما لم يأت أى باص آخر من بصات (الشركة) ... فكر عم حسنين قليلا ثم قرر أن يذهب لمبانى (الشركة) للإستفسار .. عند وصوله إلى مبانى الشركه وجد حشوداً من المواطنين الغاضبين الذين يستفسرون عن إختفاء البصات ، تعالى هياج المواطنين مما إضطر أحد المسئولين فى الشركه للخروج إليهم :
- شوفو يا جماعه بالواضح كده الشركة إحتاجت لى قروش وقامت باعت (مكنات البصات) دى .. وأهو ديييك الكراسى بتاعتكم فكيناها ليكم كل زول يمشى يشيل كرسيهو .. وأمشو أقرو العقد العملناهو معاكم شوفو نحنا بعنا ليكم (كراسى) ولا بعنا ليكم (مكنات) !!
كسرة :
لا زال عم حسنين يشاهد صباح كل يوم وهو يضع الكرسى رقم 21 أمام محطه (السبيل) خط (الخرطوم - الصحافه ظلط) فى إنتظار البص 3344 خ ت !!
|
|
 
|
|
|
|
|
|
|
|
Re: سيناريوهات : كرسى تمليك (Re: الفاتح يوسف جبرا)
|
| Quote: خاطرة خطرة: لما قريت العنوان كنت قايلو (كرسى الوزارة) |
الفرق يا اسعد بين (كرسى الوزارة) و(كرسى البص ده) إنو الكرسى بتاع البص (المكنة) ما معاهو وداك بى (مكنتو) وإنت أقعد أعمل ليا فى (الحركات) دى لمن تجيب لينا (الهواء)!!
| |
|
|
|
|
|
|
|
|
|
Re: سيناريوهات : كرسى تمليك (Re: الفاتح يوسف جبرا)
|
Quote: أتمني ان تنتقل عدوى تاجير كراسى الباصات
الى كراسى الحكم احتمال نجد فرصة فى كرسى
وزارة
|
لو قاصد تنتقل عدوى (تمليك) كراسى الباصات .. إلى كراسى الحكم تكون اكيد غلطان لانو كراسى الحكم والوزارات (ملك حر) من قبل ما يخترعو الباصات ذاتا ؟ إنت وين يا عصام ؟
| |
|
|
|
|
|
|
| |
الفاتح يوسف جبرا
عصام علي أحمد
اسعد الريفى
فيس بوك
تويتر
انستقرام
يوتيوب
بنتيريست