لاحظت لجلوسه بثقة على الكرسي الذي .. وضعت فيه قطعة أخرى ليرتفع إلى أعلى حسب الوضع الإفتراضي للكرسى الطبيعي .. انعكاس وجهه على المرآة يدل على عمق تفكيره ونظرته الثاقبة للكون من حوله ويعلن عن شخصية تعرف كيف تدير امورها مستقبلا .. بدبلوماسية .. بحكمة .. بلباقة.. وسامته ملفته للنظر .. اناقته تدل على شخصيته في اختيار وتنقية ما يرتديه من ملابس تتوافق مع مرحلته العمرية .. داهمني احساس خفي .. حرضني على خلق اي حوار في اي شئ بالرغم من الفارق العمري الكبير الذي بيننا .. فهناك شخصيات تغريك على التحدث معها في اي شئ .. احساس ان بيننا عامل مشترك جذبني فجأة له دونما تردد ـ بالرغم من تسليمي التام بأن شفع البلد دي من الصعب ان تخلق معهم حوار لحظي إلا بالكثير من التحايل الذي عادة ما ينتهي بفشلك وعدم مقدرتك على التعامل مع العقليات المختلفة .. كان ذلك في الصالون الدولي بالرياض بشارع غبيرا العام .. الذي يديره صديقنا ( مهـدي ) البارع جدا في فن الكوافير الرجالي والتلاعب بالمقص بمهارة عالية..
02-20-2008, 09:55 AM
طلحة عبدالله طلحة عبدالله
تاريخ التسجيل: 09-14-2007
مجموع المشاركات: 18023
Quote: كان ذلك في الصالون الدولي بالرياض بشارع غبيرا العام .. الذي يديره صديقنا ( مهـدي ) البارع جدا في فن الكوافير الرجالي والتلاعب بالمقص بمهارة عالية..
منتظر باقي القصة عشان أشوف كمية (النجر) حتكون قدر كيف ... يا مان قاعد ليك بالمرصاد في (عرضحالك ده )
02-20-2008, 10:28 AM
tmbis tmbis
تاريخ التسجيل: 10-19-2002
مجموع المشاركات: 24862
أثناء حواري القصير جدا معه .. مرت بخاطري صورة بن اختي الصغير في موقفين فيهم من الطرافة التي تحكي شقاوة الشفع الصغار والكبار في تفكيرهم أو صناعتهم للفرحة دون قصد .. الأول: رفض بن اختي .. أن يتم نقله من الفصل الأول إلى الثاني .. الإبتدائي بعد ان تحجج أن الفصل الثاني .. لا يوجد به ( عش للطير ) في اعلى السقف .. ( فالرجل ) كان يستمتع بحركة الطيور ومشوارها اليومي في اطعام صغارها ., تم هذا طبعا بعد أن قام بمعاينة الفصل الثالث بداية العام الدراسي .. واجهش بالبكاء.. الثانــي: كان بن اختي وهو صديق شخصي جدا لي واراغب دائما حركاته وتصرفاته بهدوء شديد واستخلص من حكمته في التعامل مع ادق التفاصيل استخلص منها الكثير جدا .. كان دائم الانشغال بالامور المعقده التركيب . وكلما يتعلق بالفك والتركيب والاصلاح .. فيه عبقرية بدت صغيرة وكبرت معه .. يعرف كيف يتعامل مع الطيور بمختلف اشكالها .. الحيوانات الاليفة .. وترويض الغير اليفه .. له مهارة خاصة في تدريب وتربية كلاب الصيد وتوجيهها كيفما يشاء .. وهذا طبعا ناتج من البيئة التي يعيش فيها بحكم تواجده في بلدتنا الصغيرة .. كان مشغول بأحدى الامور وفي غاية الاندماج .. عملت على عكننة مزاجه بأن اخلق له فوضى تربكه أو تبعده من التفكير في كيفية معالجة ما يقوم به .. أنــا: اسمع يا معز امشي جيب لي سجاير من الدكان بلاي. هــو : بلاي شوف ليك زول تاني انا حسع ما فاضي ليك ..
02-20-2008, 11:44 AM
tmbis tmbis
تاريخ التسجيل: 10-19-2002
مجموع المشاركات: 24862
كنت اعتقد أن العامل المشترك بيني وهذا الطفل اللذيذ .. هو الثبــات على الكرسي فقد لاحظت كمية الهدوء والانصياع للعمليات الفنية المصاحبة الحلاقة المملة جدا في تفاصيلها من قطعية .. ( وبــخ ) بالماء البارد .. ( وقطعية ) مؤلمة جدا هذا إذا مع الاخذ في الاعتبار كمية الشعر التي تجد لها مكان مناسب للازعاج من خلال الدخول عبر الأنف أو استقرار البعض منها في مكان ما بالوجه وبداية ( التحرش ) بالجسم والنية المبطنة ( لحك ) المنطقة المتاثرة لكن حركة (الحلاق) والتنقل من منطقة إلى أخرى .. ( والفوطة ) المربوطة عادة تحول دون التخلص من (القشعريرة) وذلك بأن يضعك تحت رحمة الحلاق .. ليحلك من هذه الورطـة .. باستعمال الفرشاة الناعمه التي تزيل الساقط من الشعر الصغير .. كان والدي يذهب بثلاثتنا إلى صديقه ( الحلاق ) عم حسن بسوق الموردة شخصي .. وعامر وعمار .. يذهب بنا على انغام بكاء عمار الاصغر وصراخه المستمر.. واستعجال عــامر الاكبر في التخلص من هذا المشوار المزعج .. والهدوء النسبي لشخصي الضعيف المستمد من موقعي في خانة الوسط مما يتيح لي الاستمتاع بصرخات عمار ومعاندته لعم حسن وترجله مرات عديده من الكرسي العالي جدا بحجة ان عم حسن يستعمل يده ( اليسرى ) في الحلاقة ولماذا هو مختلف عن البقية .. ولماذا لا نذهب إلى الصالون الآخر من بين تساؤلات عمار الانصرافية .. انهي مهمتي بهدوء مع عم حسن منصاعا ( لدفراته ) و ( لي ) العنق بعنف والضغط على الراس بعنف في تجاه واحد وتمرير ماكينة الحلاقة التقليدية في تجاه واحده لمدة طويلة ثم .. (سـن) موس الحلاقة على القطعة الجلدية بشكل مرعب جدا .. ما يصبرني على تلك اللحظات هي متابعة عامر في دوره .. وكيفية محاولاته في التخلص من يد عم حسن اليسرى بأن يستعمل قبضتيه في التخلص من قبضة عم حسن التي تستمر لفترة محددة .. ويثرثر مع والدي .. دي آخر مرة احلق هنا دا.. وقتها لم تكن هناك ( أحــلام ) أو مشاريع أو عولمة تحفز على ترتيب الشعر حسب تقليعة محددة كما نراها الآن على رؤوس الاشهاد .. وبعض النجوم المعروفين على صفحات المجلات العالمية كديفيد يبكهام أو كارل لويس .. كل ما هناك ازالة للشعر وقطعية بمؤخرة الراس تغنيك وتكفيك .. وتنجيك من تفتيش الطابور الصباحي في يوم السبت الابتدائي .. اعتقدت ان العامل المشترك بيني وبين صديقي الجالس على الكرسي الآن يتامل بعمق في انعكاسه على المرآة .. هو الهدوء المستفز جدا لماكينة الحلاقة الكهربائية في انتظار أن ينهي الفني ( أحمد ) مهمته بنجاح .. لكن كان هناك عامل مشترك غريب هو ما خلق هذه الطرفة التي جعلتني اضحك في تلقائية هذا الشافع الكبير ..
Quote: الأول: رفض بن اختي .. أن يتم نقله من الفصل الأول إلى الثاني .. الإبتدائي بعد ان تحجج أن الفصل الثاني .. لا يوجد به ( عش للطير ) في اعلى السقف .. ( فالرجل ) كان يستمتع بحركة الطيور ومشوارها اليومي في اطعام صغارها ., تم هذا طبعا بعد أن قام بمعاينة الفصل الثالث بداية العام الدراسي .. واجهش بالبكاء..
أها الزول دة لو ( عملوا ليهو رعاية لهوايتو دي ) كان طلع لينا عالم من علماء عالم الطيور ..
المشكلة إنو نحن ما بنهتم بإهتمامات الصغار .. لأنو البدايات بتاعتهم دي هي بوصلة حياتهم و الدفة التي ستسيلر عليها مراكبهم تتهادى نحو المستقبل بهدوء.
أنا لو في محل مدير المدرسة .. كل ما الزول دة يمشي فصل جديد أنقل ليهو عش في السقف ..
بالله يا علاء حسع الولد دة وصل وين و شنو مؤهلاتو ؟ مجرد فضول
دمتم
02-20-2008, 02:15 PM
tmbis tmbis
تاريخ التسجيل: 10-19-2002
مجموع المشاركات: 24862
Quote: أها الزول دة لو ( عملوا ليهو رعاية لهوايتو دي ) كان طلع لينا عالم من علماء عالم الطيور ..
.. والله فعلا تعرف لما امشي البلد هناك .. الشافع دا كان بيجيب لي اشكال طيور غريبة جدا مختلفة الاشكال .. والاحجام .. والالوان .. والحاجة الغريبة جدا برغم صغر سنو في الوقت داك ... كان بيعرف موسم تزاوج الطيور دي بيكون متين ..؟ وين بتضع الاعشاش بتاعته .. وتفاصيل كتيرة جدا عجزت عن اني اجد ليها تفسير .. لدرجة انو احيانا كان بينسج نوعية من الشباك .. بيصطاد بيها فصائل محددة من الطيور .. بيقوم بفحصها.. ويطلقه من جديد .. زي علماء الطيور البنشوفهم في قناة دسكفري .. ياخ دا على الاقل كان يهتمو بيهو كدليل ومرشد سياحي.. ويساعدوهو في تنمية الموهبة بتاعتو دي ..
Quote: أنا لو في محل مدير المدرسة .. كل ما الزول دة يمشي فصل جديد أنقل ليهو عش في السقف ..
.. تخيل اضرب عن المدرسة تلاتة ايام وفي النهاية خضع للامر .. لكن مجرد ما كان بيطلع من المدرسة كان بيدخل الغابة على طول.. يعوض الراح من زمنو بعيد من الطيور دي ..
Quote: بالله يا علاء حسع الولد دة وصل وين و شنو مؤهلاتو ؟
الولد دا يا ريس الآن اصبح زول كبير وبدل ما كان زمان بيدخل الغابة .. الآن دخــل السوق
02-20-2008, 01:55 PM
tmbis tmbis
تاريخ التسجيل: 10-19-2002
مجموع المشاركات: 24862
الريس عبد اللطيف بكري .. يا عريس دي حلوة منك .. تعرف بعد الحصل دا .. بقيت اجي داخل هنا ومخلي اي حاجة في البيت مراره على زايده على لوز .. الواحد بقى شغال بالخبره يا ريس .. تسلم ويديك العافية والصحة.. وفي انتظارك لسه حسب الوعد القديم..
02-20-2008, 10:54 AM
ملكة سبأ ملكة سبأ
تاريخ التسجيل: 06-18-2003
مجموع المشاركات: 3855
لي موقف مشابه مع بنت أختي الصغيرة أثناء إنشغالها بأمر جذب كل انتباهها و تركيزها , كنت أشاكسها بشدها بلطف من شعرها آو بمداعبة أذنها ليخيل لها أنها نملة أو حشرة و أتظاهر بالنوم حين تلتفت و أو تتحسس ما فعلت يداي خصوصاً بعد أن تجاهلت الأمر في أول محاولتين و لكن بعد الثالثة التفتت غاضبة لتقصي ما يدور من خلفها... فلمحت ابتسامة على وجهي المتظاهر بالنوم فما كان منها إلا أن صاحت غاضبة : ( بطِّل العبط بتاعك ده)
02-21-2008, 07:56 AM
tmbis tmbis
تاريخ التسجيل: 10-19-2002
مجموع المشاركات: 24862
طبعا تستاهل يا غباشي .. ياخي الشباب ديل مهما تكون البينك وبينهم عامره في لحظة كدا بتاعت ( معايشة ) الواحد فيهم بيكون ( عايش ) فيها مع نفسو شديد جدا ما بقدر يتنازل عن اي مشروع تاني في الدنيا مالم ينتهي من الحاجة البيعمل فيها دي .. عندي بت خالتي .. ولدت ليها بت بعد ابنها الأول وتلقائيا شعر بي انو انسحب البساط من تحتو والامتيازات في طريقها للتلاشي .. يوم امو وحبوبتو دقسو وخلوها براها في الغرفة .. اتسحب الولد بسرعة ووقع في الشافعة خنق جيت داخل الغرفة بالصدفة وشفت المنظر دا .. ولحقتو في اللحظة الاخيرة وحسمت الأمر بيني وبينو بودية شديدة .. طبعا طرحت عليهو السؤال التقليدي: عملت كدا ليه:؟ قال لي: ياخي عامله لينا ازعاج بتكورك كل يوم زي الكديسة
لاحظ زي الكديسة دي عامله كيف ؟
02-20-2008, 12:24 PM
شول اشوانق دينق شول اشوانق دينق
تاريخ التسجيل: 02-13-2006
مجموع المشاركات: 5332
Quote: انهي مهمتي بهدوء مع عم حسن منصاعا ( لدفراته ) و ( لي ) العنق بعنف والضغط على الراس بعنف في تجاه واحد وتمرير ماكينة الحلاقة التقليدية في تجاه واحده لمدة طويلة ثم .. (سـن) موس الحلاقة على القطعة الجلدية بشكل مرعب جدا
تمبس... أيها العزيز حمد الله على السلامة ولا أرانا الله فيك مكروها أبدا الموضوع شيق جدا وبدأته ولم أشعر إلا وأنا أتم ما خطتة يداك وفي الإنتظار لسماع المزيز والمزيد... لكن في الجزئية الفوق دي، والله حننتني عدييييل كده أنا حالتي متخيلة حلاقة الرجال دي سااااهلة وكنت متخيلة إنكم مرتاحين وبحسدكم كمان غايتو، الجهل (نصيبة) عارف، كنت بقول مشوار الكوافير حق النسوان ده... أسعب حاجة في الدنيا أولا: الرجال شعرهم قصير وسريع سريع بينتهوا وبيقوموا من الكرسي أنا نحن، فأضعاف هذه المدة... ثانيا: الرجال بيكونوا رافعين راسهم لكن النساء بينزلوا رأسهم في فترة لحدي ما الرقبة (ظاااااتها ) تقول الرووووب ثالثا: الشعر أحيانا بيكون نازل على وجه المرأة وبيكون مضايقني في التنفس لكن بتصبر وأقول: الشعر يتحرك أمام أنفاسي، إذن أنا موجودة معليش للثرثرة... لزوم التعويض وكده يعني معزتي
غادة
02-20-2008, 03:02 PM
محمد سنى دفع الله محمد سنى دفع الله
تاريخ التسجيل: 12-10-2005
مجموع المشاركات: 10986
السني .. معقولة تربع ايدينك إنت .. ؟ طيب الافكار الصغيرة دي البروج ليها منو علشان تكبر ..؟ حسع الشافع دا ما شغل مسرح عديل كدا.. بعدين شنو يعني يا السني (الغلاصة) بتاعت شفع المصريين القاعدين يستثمروها كويس في المسلسلات وفي افلامهم .. والخواجات برضو .. والفرق بين شفعنا بي (غلاصتهم) دي وتروح ليهم مجرد ما الكاميرا تقرب ليهم ..؟ تجي ضروري توضح لينا الحاجة دي .. الليلة ما بفكك وما تعمل لي فيها بتاع زوغانات .. حركاتك دي بنعرفه .. .. والصدفة الغريبة جدا اتناقشنا بالصدفة قبل أيام مع دكتورة مها .. حاملة الدكتوراة في علم النفس .. وكان معانا جمع ومن ضمنهم محمد عبد الجليل الطرح موضوع مشابه .. وفعلا كانت جلسة جميلة جدا خلقت نفسها بنفسها .. وكان فيها تنظير جميل جدا عن علم النفس احيي معاك العزيزة غاده عبد العزيز .. وارحب بي حضوره البهي .. وفي انتظارك .. انا الليلة كايسه معاك..
العزيزة جدا خــالتو غــاده حسب التصنيف الاخير على أمل ان نلتقي في مرحلة .. (الحبـونه) بي خرفـه وكدا يعني حبوبة غــاده المهم في الموضوع: حمد الله الف على السلامة ومنوره المكان بي طلتك .. وموضوع الحلاقة دا يا ستي والله يحنن اي زول .. ياخي نحن لما كنا صغار اتعذبنا شديد في الدنيا دي لكن اهو الواحد كان (بطــل) بس .. شي مراسيل .. ( وحمـام ) بالقوة وصابون يدخل ليك في عينك .. وفي النهاية حلاقة معها ارهـاب .. بلاي تنتهي من من مسالة الحلاقة الكلها تلكز ودفير دي .. تدخل في مرحلة ( سنان ) السكين .. (شيطك .. شيطك) فوق راسك لما تنزل من الكرسي وتطلع بره الصالون والجو يضربك .. بلاي الراس زي الكابين فيه بنج .. لحدي ما تمشي البيت تكون ما شاعر بي اي حتة فيهو دا بالاضافة لي وجع الرقبة .. وربما (ابوعديلات) الناتج من جرا الخنق .. وبعد دا مطالب بي بانك .. ما تفرغ شحنات مخلفات الحلاقة دي ولا تعبر عن (شعورك) ..
Quote: الشعر يتحرك أمام أنفاسي، إذن أنا موجودة معليش للثرثرة... لزوم التعويض وكده يعني
. نحن يا غادة ما عندنـا مشكلة . صلعة الامور بتمشي .. نمرة واحد بوصة الامور بتمشي .. لكــن .. تخيلي بلاي جكساية بي صلعة زي بريتني اسبيرس كدا منظره بيكون بلاي بيكون بايخ قدر كيف ..؟ تسعدنا طلتك دائما يا غـاده ..
02-21-2008, 09:52 AM
tmbis tmbis
تاريخ التسجيل: 10-19-2002
مجموع المشاركات: 24862
يا طــارق جبريل .. (الكشفه) الرايحه ليك دي .. ح نقطعه ليك في راسك بعدين ما تقوم تنوم لينا زي الزولة الجات الحصة الصباح قوموها تجاوب قالت ليهم والله انا الاغنية الفاتت دي رقصته مما يسرنا يا طارق مشاركتكم لنا الافراح .. خليك جاهز .. اللاكم بدا يدخل الحوش . عشان ما تجي بعدين تقول ما كلمناك .. . معليش يا طارق اتأخرت عليك في موضوع العنوان دا: yashoogy(at)hotmail.com tmbisco(at)hotmail.com كل واحد في الاتنين ديل بيوصلك .. وتحياتي ليك ولي كاتب الرسالة
02-20-2008, 04:48 PM
عمر الفاروق عمر الفاروق
تاريخ التسجيل: 10-10-2005
مجموع المشاركات: 9669
تعرف يا تمبس وبمناسبة الحلاقة دي .. عندي جدي عليه رحمة الله كان بيقعد في شجرة اللالوبة ويطلع الكرسي مطلّاً على خور أبو عنجة وينادي ولدو(خالي) عشان يحلق ليهو .. أغرب وألذّ شي إنو بعد خالي يخلّص الحلاقة بيقوم يخت لي جدّي المراية ورا راسو عشان يشوف القطعية مع العلم إنو جدي ما بيكون شايل مراية ولا قدامو مرايا ولا يحزنون .. الغريبة جدّي يومئ برأسه إيجاباً نظام : كده تماااااااااااااااااااام تخريمة : يا تمبس ياخ نحن جدّنا كان بيجيب لينا عم إدريس الفلّاتي في البيت ويحلق لقينا حلاقة الكورة !! يخت ليك كورية في راسك وظيييييييييطك يدور ليك القطعية
02-20-2008, 05:11 PM
زوربا زوربا
تاريخ التسجيل: 06-08-2003
مجموع المشاركات: 733
تمبس اللذيذ والشوق الجاري عليك لم أمر من هناحتي اعلق علي حركات الشفع جئت لاهمس مشتاقين يا صديق بنكهة النيل وماتقدم اتمناك بخير مشرقا كما هو حال كل البورداب عندي والريد نيلين
02-25-2008, 11:06 AM
tmbis tmbis
تاريخ التسجيل: 10-19-2002
مجموع المشاركات: 24862
Quote: اتمناك بخير مشرقا كما هو حال كل البورداب عندي والريد نيلين
زوربــا صديقنا العزيز القادم من ازمان جميلة .. الريد نيلين .. غيابك طال يا صديقي .. ومرورك يعيدني إلى ذكرى الايام الخوالي .. اتحسس مكانك هنا .. يا صاحب .. فهو شاغر.
02-25-2008, 09:57 AM
tmbis tmbis
تاريخ التسجيل: 10-19-2002
مجموع المشاركات: 24862
طبعا يا عمر نفس الاستنكاح دا كان بيعملو ابوي ... بلاي بيحلق في الاسبوع خمسين مرة .. يلقاك قدامو كدا يمسك راسو .. يقول ليك تعال احلق لي .. كان جو ضيوف يقول ليهم مافي زول فيكم حــلاق ..؟ بعدين الحلاقة نظام بوصة واحد على قدر البخلي ( الكــاب ) يا البورية يقعد بي مزاج .. تحلق ليهو بلاي وتظبط بي هنا .. وتشيل بي هنا .. وتجتهد بعدما تنتهي .. هو بكون نايم طبعا وماخد راحتو بعدما تنتهي تقول يهو اها الجدعة دي كيف معاك .. والله بالكربون نفس حركة جدك دي .. يحرك ليك راسو وكلمة واحده ما يقوله ليك .. يوم انا عملت اضراب من الحلاقة .. كان بيحلق ليهو عمار الأصغر مني .. والظاهر لي قام جازف ليهو حاجة غير الشعر .. فقام يكورك .. شبكو ليك إنت ما بتعرف تحلق .. حلاقتك زي كورتك قام قال ليهو .. ضوق العذاب حق الحلاقة شوفه حاره كيف زمان شان لقيتونا صغار ..؟
Quote: يا تمبس ياخ نحن جدّنا كان بيجيب لينا عم إدريس الفلّاتي في البيت ويحلق لقينا حلاقة الكورة !! يخت ليك كورية في راسك وظيييييييييطك يدور ليك القطعية
والله يا عمر إنت من المشاهير عديل كدا .. ياخي حلاقة الكورة دي كانت موضه .. زيها وزي الشارلستون .. والماكسي .. والتحرمني منك .. والله انا عندي صورة في استديو كوش وانا في تانية ثانوي .. فيها حلاقة كورة مبالغة .. والابلغ منها القطعية .. زي الصور دي يا عمر بتتشاف لما تجي البيت .. دي ما بتتشاف هنا دا ..
02-21-2008, 07:24 AM
معتصم دفع الله معتصم دفع الله
تاريخ التسجيل: 12-18-2003
مجموع المشاركات: 12684
عارف يا تامبا كان عندنا حلاق صعب خلاس .. عنده حلاقة دورية في المدرسة يجي يخت كرسيهو ويحلق للطلبة .. مدفوعة الأجر طبعاً .. ودا كان متعارف عليهو زمان يعني مافي ليك أي طريقة .. دكانه يتوسط الحلة لا يسع لأكثر من 3 أشخاص وكرسيين خارجه لزوم الونسة الصباحية والعصريات .. أها لما تمشي تحلق عنده يمارس فيك هواية (اللكيز) ياخي الحركة دي غياظه خلاس وفي الوكت داك بكون بتونس مع الشخص الجالس معاهو في الدكان فجأة تلقاهو بحركة لا إرادية أو مقصودة لا أدري أداك لكزه حاره كده .. المهم في نهاية الأمر تمشي البيت تلقى روحك جاتك (فلايت) من اللكيز دا .. شوية شوية جاتنا هواية الحلاقة دي والوكت داك ظهرت حلاقات كارل لويس ومارينز وحاجات كتيرة كده بدينا نحلق لبعض والشغله دي جرت شباب الحلة كله بقى ماسك مقصات ويحلق لبعض خصوصاً أولاد حينا .. صاحبنا الحلاق دا بقى يشتكي ويتزمر من الحاجة دي لأولياء أمورنا .. ياخي الأولاد ديل قطعو رزقنا .. يسب ويلعن .. حتى إنتهى به المقام إلى حلاق متقاعد ..
02-21-2008, 07:33 AM
معتصم دفع الله معتصم دفع الله
تاريخ التسجيل: 12-18-2003
مجموع المشاركات: 12684
عمنا الله يطراهو بالخير كان جنه حلاقة صلع .. يجي نهاية الأسبوع يلقانا ليك قاعدين يمسكنا واحد واحد ويحلق لينا صلع .. أنا الشغلانة دي كانت ما حبابة معاي طوالي بكب ليك الزوغة .. فأصبح عندي عقدة الصلعة دي .. وما كنت أعرف أنها ستصبح موضة في وقت متأخر خصوصاً للاعبي كرة القدم .. عمي دا كان حاسس بالشغلانة دي ونحن كنا ما عارفيه .. خصوصاً أنه عضو في نادي الهلال وكورنجي من الدرجة الأولى ..
متعه الله بالصحة واياك ..
02-26-2008, 08:47 AM
tmbis tmbis
تاريخ التسجيل: 10-19-2002
مجموع المشاركات: 24862
Quote: عارف يا تامبا كان عندنا حلاق صعب خلاس .. عنده حلاقة دورية في المدرسة يجي يخت كرسيهو ويحلق للطلبة .. مدفوعة الأجر طبعاً ..
.. طبعا لاحلاقة كانت بي ( شلـن ) مش كدا ..؟ زيو وزي المصوراتي .. البجي يصور ليك الفصل كلو في لقطة واحده .. ياخي دي امتع أيام في الدنيا. والله يا موو نحن اللكيز الاتلكزناهو في الدنيا دي + العذاب الضقناهو في الطقولة ياخي مفروض يعملو لينا حفل تكريم .. كل شهـر .. الحلاقة دي كانت اخف حالا .. أو على الاقل بتتعذب وتلكز في الشهر مرة واحده بس ..
Quote: شوية شوية جاتنا هواية الحلاقة دي والوكت داك ظهرت حلاقات كارل لويس ومارينز وحاجات كتيرة كده بدينا نحلق لبعض والشغله دي جرت شباب الحلة كله بقى ماسك مقصات ويحلق لبعض خصوصاً أولاد حينا .. صاحبنا الحلاق دا بقى يشتكي ويتزمر من الحاجة دي لأولياء أمورنا .. ياخي الأولاد ديل قطعو رزقنا .. يسب ويلعن .. حتى إنتهى به المقام إلى حلاق متقاعد ..
حلاق بالمعاش يعني ؟؟ ياخي نحن كان عندنا حلة غريبة جدا .. كلنا حلاقين وكلنا بي مقصاتنا .. والله اليوم الما تلقى ليك زول تحلق ليهو .. الدنيا دي تبقى ليك ضيقة خلاص .. اها كيف الحلاقين الرانكرز ديل عايزهم يسترزقوا..
02-21-2008, 07:57 AM
طلحة عبدالله طلحة عبدالله
تاريخ التسجيل: 09-14-2007
مجموع المشاركات: 18023
اما عبد الرحيم العوير فقد حمل عكازا غليضا وإنطلق مكوركا متوعدا بفناء الحوش الكبير فطارت حمامة ونبح الكلب وجفلت غنماية وكلعت حاجة رقية رغم الالام الركبة مهرولة وأغلقت ام مريوم باب حوشها الصغير وتاوقت فاطنة بي فوق الحيطة ضاحكة وانزوي خايفا كل من ود الإمام وصالح أب راسين وآخرين , فيما ظل عبدو العبيط متربصا بالجميع وقد إحمرت عويناتو ومرقت سنيناتو والسبب أن إسماعيل الحبرتجي حلاق الحوش الكبير وأبن خالة عبدو العوير قد كجم شعر هذا الأخير أثناء الحلاقة ما اوجد بقعة صلعاء كبيرة علي راس عبدو الذي يهابه كل ساكني ذلك الحوش .. من يوميات حائم ديمة .
02-27-2008, 09:03 AM
tmbis tmbis
تاريخ التسجيل: 10-19-2002
مجموع المشاركات: 24862
Quote: والسبب أن إسماعيل الحبرتجي حلاق الحوش الكبير وأبن خالة عبدو العوير قد كجم شعر هذا الأخير أثناء الحلاقة ما اوجد بقعة صلعاء كبيرة علي راس عبدو الذي يهابه كل ساكني ذلك الحوش ..
يا حايم ديمة المسكين .. كيفك.؟ بلاي حسع الجوطة واللفــه دي كلها علشان الكجمة الصغيرة دي .؟؟ تعرف: كنت في سنة تانية متوسطة .. والود (حبيب) خالص .. وبتاع جنصصة.. عندنا استاذ انقليزي حقــار جدا.. حقـار جدا جدا ... قاعد يدي فينا في الحصة كدا قام قال لي قوم اقيف على طولك .. تتخيل بدون اي سبب.. وقفزت علي طولي قال لي شنو يعني الحركات دي ..؟ إنت عامل شعرك دا بالطريقة دي جاي واللا جاي مدرسة ..؟ الجماعة قعدوا يضحكوا الحبرتجية طبعا .. وقلت دا مشروع برمجه .. يعني ممكن اتمسك بيها لحدي ما ادخل الثانوي .. المهم قال لي يللا اقعد بكره كان جيت بالطريقة دي بعرف اعمل معاك شنـو .؟ المهم قعدته ودورته الكلام بتاعو في راسي .. قلت معقولة نحن من دق الابتدائي لي ارهـاب المتوسطة .. ح نرتاج متين يعني ..؟ قمت طوالي رفعت ليهو يديني الاتنين .. مش اصبعي .. يديني الاتنين عديل كدا شان يعرف حاجة قال لي قوم .. وقفت وقلت ليهو كلمة واحده وقعدته .. قلت ليهو جاي حفلة .. .. وضحك الحبرتجيه تاني مرة .. وبي كدا اخدت حقي يللا عينك ما تشوف إلا النـور .. عملو غرفة طواري .. تتخيل جاب ليهو مقص حلاقــة (جبان جدا) والفصل فيهو نحن كم وتلتين طالب . ابتدامن الأول ..بياخد بمقدار (حفنــة) صغيرة .. بالمعيار البلدي .. (خمشة) من (احسس ) حته يعني المنطقة الحساسة خالص .. بالجمبات كدا .. وطق طق ويرمي ليك الشعر قدامك علشان تتأملوا .. لما وصلني بطني كانت بارده غايتو على الاقل ضمنت انو مافي واحد ح يضحك لاننا كلنا في الهواء سواء .. المهم ركز على الجمبه اليمين ودخل المقص لحدي نهاية الراس .. ورمى الشعر قدامي .. تاني يوم الفصل بقى زي معسكر الجيش .. لكن طبعا الاستاذ دا شاف ليهو فوضى عمرو ما ح ينساها..
واصل يا مسكين .. مقارز الحبرتجيه دي ممتعة
02-21-2008, 08:11 AM
tmbis tmbis
تاريخ التسجيل: 10-19-2002
مجموع المشاركات: 24862
في صفحة المواضيع التوثيقية المميزة .. بوست جميل لتجربة فريدة للاستاذ محمد عبد الجليل جدير جدا بالقراءة في كيفيةالتعامل مع هذه الأفكار تجربة فريدة _ كنت مدرس للأطفال
02-21-2008, 11:05 AM
tmbis tmbis
تاريخ التسجيل: 10-19-2002
مجموع المشاركات: 24862
حكى لي الصديق .. صــلاح شتات عن عذوبة احد الصغار في المسلسل الشهير Beauty And The Beast عندمــا اصطدم بدراجته أثناء اللعب بالممثلة الشهيرة Linda Hamilton التي لعبت دور البطولة في الفيلم بجانب Ron Perlman .. Vincent and Catherine دار لحظتها حوار اعتذر الطفل بهدوء .. وما أخفى احساسه الطفــل: اعتذر بشدة يا سيدتي كاثي: لا عليك اقبل الاعتذار .. الطفــل: ما يزيد من شدة اعتذاري .. إنك جميلة كاثي: شكــرا على الرحب والسعة الطفــل: هل لي ببطاقتك التعريفية .. عليها ارقام تلفوناتك .. كاثي: بكــل سرور .. الطفــل: شكــرا ربما سأتمكن من الاتصال بك فيما بعد..
02-21-2008, 01:33 PM
tmbis tmbis
تاريخ التسجيل: 10-19-2002
مجموع المشاركات: 24862
التفت بنصف إبتسامته.. ثم عاد لوضعه الطبيعي بعد محاولتي الفاشلة .. في خلق حوار سريع ـ لكشف العامل المشترك بيننا في المرة الأولى تجاهل محاولة لفت الانتباه .. بأن واصل في النظر لانعكاسه أمامه.. ومتابعة المقص. استفزاني بروده .. وحرضتني نصف الابتسامة.. للهجوم والمباغته. كيفك يا وجيه ..؟ ( محاولتي ) الاولى زدت من حدة النبرة بشكل عنيف .. يا وجيه إنت عامل فيها ما سامع يعني ..؟ ( محاولتي الثانية ) والرد بنصف الابتسامة.. إنت معاي انــا ..؟ أيوة معاك إنت حسع الصالون دا فيهو أوجه منك ..؟ اكتملت الابتسامة بدوران كامل على الجهة اليمنى تجاهي .. واستعداد لتناول الأمر بعد أن ابتعد ( أحمد ) الحلاق قليلا لمتابعة الحوار .. دحرج ابتسامته تجاهي .. بخبث. تماديت: تعرف أنــا لو وجيه زيك كدا .. كان بعدما اتم حلاقتي دي .. امشي بره الشارع ( أعتــر ) لي اي زولة حلوة هنا الليلة .. ضحك بشدة .. لامس الاطراء الغريزة الطبيعية وهي ما زالت صغيرة .. وما زلت ابحث عن العامل المشترك بيننا .. لم انتبه إلى سؤالي التقليدي الذي كان سيفقدني زمام المبادرة في التمكن من هذا الحوار وتحويله لمصلحتي دون ان يشعر بالتقليدية ويكتشف محاولة خلق الحوار: إسمك منــو:؟ رد ببرود وثقة شديدة .. وبسرعة اربكتني لثواني: ( معقول هذا هو العامل المشترك ..؟ الذي قادني إلى هذا الحوار دون سابق معرفة ..؟ وهل هي الصدفة وحدها التي تجعل من الاشياء متشابهة .. متطابقة .. وهل هذا الجذب الذي شعرت به وقتها له علاقة بهذه الصدفة ..؟ ) إسمــك منــو ..؟ عــلاء الدين رديت بسرعة دون ان افقد تركيزي ويستلم زمام المبادرة هو ويعود لصمته وينتهي السيناريو: أنـا برضو اسمي علاء الدين .. عندك أي اعتراض ..؟ رد بكلمتين وسؤال متهكم.. واستدار إلى وضعه الطبيعي بالكرسي: إنت جــــادي ..؟ ضحكت لاستفزازه وجديته .. وسخريته ..معا نكشت ( المحفظة ) لاثبت له جديتي .. بطاقة الهوية .. الكرت التعريفي وبه ارقام تلفونات العمل وتلفوناتي الخاصة: امسك شــوف بي نفسك. تفحصني بهدوء مكتوب على الورق .. سجل أسمى وبياناتي على ذاكرته الصغيرة وابتسم مرة أخرى وعاد لرسم وجهه في المرآة التي أمامه متابعا حركة المقص .. وارسل نظرة كأنما يأمرني بترك الكارت على التربيزة التي أمامه لربما ينظر في أمر الاتصال بي .. خرجنـا من الصالون بخطوات متساوبة كاصدقاء قدام .. كان الطقس اكثر برودة من الداخــل .. ( دس ) يديه في جيبه الجينز محاكيا لوقفتي بجانبه .. ورفع كتفيه إلى أعلى: أمي وابوي ديل فاتــو وين .. إتاخــرو مش كدا؟ سحبته إلى الداخــل .. لمزيد من الدفء .. وودعت صديقي الشافع الكبير بعد أن صافحني .. بإبتسامته المرسومة بداخلي إلى اللحظـة.. ومازحته: تاني كان لاقيتني خليك جادي شوية ..
ــــ التحية لك ولكل أطفال العالم
(عدل بواسطة tmbis on 02-21-2008, 01:38 PM) (عدل بواسطة tmbis on 03-04-2008, 08:35 AM)
02-21-2008, 04:04 PM
Ishraga Mustafa Ishraga Mustafa
تاريخ التسجيل: 09-05-2002
مجموع المشاركات: 11885
اشراقــة العزيزة الله يبارك فيك يا طيبة .. الله يكتر الناس الجميلة والجماهير البتسند قفا الواحد .. والله يقدرني انا ذاتي اعمل اي حاجة بتحافظ لي على مكانتي جوه كل من تواصل معاي بالحميمية دي ..
العدو/تمبس ...أتباع هذا البوس خلسة...وذى سارق الشارع كده فى لغة السواقيين ...وفى البال بوستات سابقة كنا انا وانت قد تناطحنا فيها بكثافة وخرجنا فيها عن النص كثيرا....ولكن للامانة وفى هذا البوست لك لغة رفيعة وذاكرة مرتبة ....وشفرة للتواصل(الليلة افرح شديد)...واصل.....لك ودى
03-04-2008, 08:46 AM
tmbis tmbis
تاريخ التسجيل: 10-19-2002
مجموع المشاركات: 24862
Quote: العدو/تمبس ...أتباع هذا البوس خلسة...وذى سارق الشارع كده فى لغة السواقيين ...وفى البال بوستات سابقة كنا انا وانت قد تناطحنا فيها بكثافة وخرجنا فيها عن النص كثيرا....ولكن للامانة وفى هذا البوست لك لغة رفيعة وذاكرة مرتبة ....وشفرة للتواصل(الليلة افرح شديد)...واصل.....لك ودى
الصديق الما عدو .. بحــــر شكرا على الاطــراء .. (الرقشاتي) دا .. بالنسبة لي لغة السواقين وكدا.. لم نتناطح بكثافة يا صديقي .. إنما (ضغطنـا) وقلنـا (نضغطك) شوية كمان .. ولن تجدني خارج النص .. بل محرضا لبعض (الحواس) من داخل النص ..إنت (اضغط) وانا بشتغل ليك (winrar.exe).. وفي النهاية بنصل آخــر محطة .. برضو بالنسبة لي الرقشات وكدا .. لا يفوتني أن اشكرك لروحك السمحة فمعظمهم يتركون الطبيعي في الاشياء ويعمدون للمقاطعة .. وجودك هنا له مدلول آخــر فما كتبته يسعدني ليس الاطراء فيه .. إنما على الاقل وجود تقدير لما كتبت وما عبرت عنه بشأن اللغة .. (اضغط) يا صديقي .. وأنا بفك .. وكلو في محلـو .. وإذا لقيتك شوف عين .. ح تقلل من شدة عداوة الاستهبال الافتتاحية الفوق دي ..
العزيز عمر احمد .. اولا مليون مرحبا .. وتانيا اعتذار شديد اللهجـة لضياع اليوم الجميل بينك والاخوان زي ما عارف (صداع) الجمعة دا ارث عائلي وما بفرط فيهو بالساهـل كدا، بالاضافة لي انو برد الاربعاء والخميس الفاتو ديلاك دخل العضم عديل كدا .. الجايات اكتر من الرايحات يا صديقي ... وحقك علي، ومن حسع دي عازم نفسي براي.. ويحق لي اعزم معاي اي واحد من الشرامة ديل .. حسب البيعه طبعا تسعدني متابعتك .. هنا ومعرفتي بك هناك..
02-24-2008, 10:19 AM
haroon diyab haroon diyab
تاريخ التسجيل: 06-20-2007
مجموع المشاركات: 23215
العزيز هــارون دياب .. سلامات يا صديقي .. ومرحب بكل الاشياء الجميلة .. ووترحيب خاص جدا بدكتـور كسلا .. شكرا يا هـارون . وفي انتظار حقنــا في العربية على الاقل .. انسخ لينا صورة من المفتاح .. إن شاء الله مفتاح العجــل ..
02-25-2008, 10:01 AM
حمزاوي حمزاوي
تاريخ التسجيل: 10-10-2002
مجموع المشاركات: 11622
طبعاً أنا منتظر نهاية القصه دى بي نفس الشوق والمتعه الحاصله هسي ومع دا عايزك تكلمنى لما تمشى الحلاق الشهر الجاى عسى ولعّل نصادف علاء الدين والمصباح السحرى
ـــــــــــــــــــــ دى حركات ناس كبار
03-08-2008, 10:17 AM
tmbis tmbis
تاريخ التسجيل: 10-19-2002
مجموع المشاركات: 24862
Quote: طبعاً أنا منتظر نهاية القصه دى بي نفس الشوق والمتعه الحاصله هسي ومع دا عايزك تكلمنى لما تمشى الحلاق الشهر الجاى عسى ولعّل نصادف علاء الدين والمصباح السحرى
يا داش : تعرف اللقاء دا ما تم ليهو ربع ساعة .. وإنتهى .. لكن تخيل إنو اداني مساحة قدر كيف اتأمل فيها حاجات كتيرة جدا .. رجع بي لي سنين بعيده جدا .. بدل ما هو اتغمص عمري .. أنا رجعت ليهو لي سنو دي .. وحسيت إني عايز اعيش معاهو نفس التفاصيل ... بتاعت عمرو دي، بي عمري الحالي. يا صاحبي.. انا دقسته .. مفترض كان ابرمج مع الزول دا .. علشان جدول الحلاقة يكون مشترك .. ونسوقك معانا .. والله كان ما كتبت ليك مية قصيدة في الحـال .. انا ما تمبس.. غايتو بحاول اعمل ليك مواعيد مع الزول (السحري) دا كان لقيتو
بالمناسبة انت زول مبدع ومحبوب من كل الناس وبتعرف تكتب كويس الكلام الكاتبوا ده شدني شديد اول مرة اقرا صفحة كاملة دفعة واحدة بدون انشغل بي حاجة تانية ***** يا ريت تقبلني في نادي المعجبين بي موهبتك
لك الود يا (علاء ولا احسن تمبس)
02-25-2008, 05:19 PM
DKEEN DKEEN
تاريخ التسجيل: 11-30-2002
مجموع المشاركات: 6772
دكيــن.. مديدة الحلبة في الحالة دي كويسة معاك أنا لاحظت ليك الفترة الأخيرة دي .. عندك (ضعف) دم .. .. بعدين خفف وزنك (الكرش) الطلعت ليك دي ما كويسة علشان صحتك .. نتيجة (الترسيب) بتاعت المرة الفاتت طلعت كيف ما قلت لي ..؟!
03-11-2008, 08:02 AM
tmbis tmbis
تاريخ التسجيل: 10-19-2002
مجموع المشاركات: 24862
.. العزيزة آمنة عبد الكريم .. تشكري يا ستي على الاطراء البكبر راس الواحد دا .. والله يكتر من محبة الناس .. نادي المعجبين حتة واحده يا أمنـة..؟ طيب ما تسجليني أنا ذاتي عندك .. رايك شنـو..؟
تمبس دي خفيفة جدا يا أمونــة .. ممكن تعتمديها معاي برضو..؟
02-25-2008, 06:02 PM
fadlabi fadlabi
تاريخ التسجيل: 12-13-2004
مجموع المشاركات: 4116
Quote: تمبس الزمان أنا كلو ما تكتب سمح كده بتذكر زمن ببو وصاني أصاحبك
فاضلابي الما زمـان .. كنت كلما تكتب ليك حاجة بجيك جاري .. علشان اقرا حاجات كلموني بيها عنك وكانت من ضمن حكاوي الليل مع الجيتار الكلاسيك ... الكلام دا كان عادة بيكون راس بيني وبين ببو والجيتارات .. المهم .. الفترة الفاتت بقيت تكتب ليك حاجات كدا قاطعه من راسك وبتعرفه براك .. لما اللقاك بتعمل فيها قاعد اطلع واخليك .. طبعا انا ما من النوعية بتاعت اعمل كدا وما تعمل كدا .. أنا نوعية كاتم صوت لكن كان سخنت معاي .. بقول ليك الكلام الزي دا .. ودا الكلام الجد .. جد بتاع الصراحة .. في ناس هنا ما قاعدين يشبهو الواقع ـ ولا الدنيا البنعرفه سواء ان كانو مستنيرين ومقطعنا عديل كدا .. وإن كانو طيور ظلام .. النوعيتين ديل انا بعتبرهم بره الزمن .. لانو ديل ناس ارهابيين .. والأرهابي طبعا زي ما عارف ما الزول البشيل ليهو (قمبله) أو يلبس ليهو حزام (دبل كمر)ويكتل الناس .. الأرهابي هو البفرض حاجاتو غصبا عن دين الناس أو ثقافتهم أو معتقداتهم .. او فنونهم أو ... أووووووو غنت زاتك ارهابي يا فاضلابي لما (تلون) ولما تكتب (شعر) ولما تتكلم عن الحلة .. لكن ما فرضت حاجاتك طلعت الحاجة الجميلة البحس بيها اي واحد ويقول .. يا الله .. أو تدخل فيهو (مود وزنه) كان محتاج ليهو .. انا متأكد لو كتير من الاصحاب شافو حاجاتك الأخيرة الما عجبتني دي .. بيقولو ياربي فاضلابي دا مالو بقى كدا ..؟ مش زمان كان ود الحلة..؟ حسع مالو بقى يلعب مع فريق ما ناس الحلة..؟
Quote: لكن يا تمبس.. ما ترسل الشفع للسجاير.. تستاهل الحرجوك ذاتو
انا اتكيفت من الحرجة دي والله .. بعدين قبلما ابطل السجاير من زمان خالص .. ما كنت بحب مراسيل السجاير دي كتير .. بالذات للشفع .. لانو لما كنت شفع طلعو بيها زيتنا .. اتفضل عازمك الحاجة دي ويشرفني إني اضيفه للبوست دا :
في الشارع سهو و ضو و حمام سارح في السما و الناس في الشارع ناس لو عرفوا بحبك كيف بستغربوا كيف عايش للآن جمب الدكان أولاد الحلة إتمنيتم لو عرفوا بحبك كيف للآن جمب بيتنا طيور و عمود النور واقف سرحان...
بعدين إنت محظوظ .. والله كلامك دا لو كان قلتو زمان قبل فترة قبلما الغربة دي تهد حيلنا كان نقعد كلامك دا .. ليلة واحدة بتاعت جيتارات كدا انا وببو .. وعمار ثم بعض السجاير الأحمر .. والله كان تاني يوم نستدعيك شان تستلمو ما تعرفو زاتو العملناو ليك فيهو شنـو .. بس لقيت مكنتنا خفت
02-25-2008, 06:22 PM
عمر الفاروق عمر الفاروق
تاريخ التسجيل: 10-10-2005
مجموع المشاركات: 9669
عندنا شافع يا شليق خلاص.. كان في سنة أولى إبتدائي ..الأستاذ رسّلو يجيب السوط من سنة خامسة .. دق ّ الباب للأستاذة وقال ليها : أستاذة أستاذة قالوا ليك عايزين الخرطوش الأسود .. بعد ما شال الخرطوش ومشى فجأة كده يا تمبس دقّ ليك خلف وجا راجع جمب باب الفصل وقال للأستاذة : يا أستاذة لكن الدخّان مااااااااااااااا عندك .. وفووووووووووو كبّ الفللينا
03-11-2008, 10:08 AM
tmbis tmbis
تاريخ التسجيل: 10-19-2002
مجموع المشاركات: 24862
Quote: يا أستاذة لكن الدخّان مااااااااااااااا عندك .. وفووووووووووو كبّ الفللينا
.. ياخي دا لذيذ جدا البعبر عن شعورو من بدري دا .. تعرف يا عمر: في واحد من اولاد الحلة الصغار دفعة ناس عوض بطارية (خليني من اسمو) زهجان ليك شديد جدا من المدرسة .. وفي زهجو دا ناس البيت موصيين عليهو الاستاذ .. الاستاذ لاعب ليهو مان تو مان مكرهو ليك العيشة .. كان لقاهو ليك في اي وضع .. يديهو ليك علقة الشافع في سنة تالتة والاستاذ دا عمل ليهو زلعة من المدرسة بي تخوييف زمان داك .. المهم يوم الاستاذ كسو ليك كسرة محترمة في الفصل .. قام الشافع دفنه ليهو .. بعد يومين .. الاستاذ (دقس) فطر ومشى يغسل يدينو في المواسير طبعا بتكون المواسير طووويلة وقريبه للشارع .. وإلا تدنقر ليها .. المهم الاستاذ دنقــر .. وفتح الماسورة .. وصاحبنا متابعو ليك لانو طان قاطرو من ما طلع من المكتب .. اخد الوضع بتاع الدنقره بشكل كويس .. بس الشافع جر ليك الخرطوش بتاع الموية الطويل داك .. وفيهو باقي موية .. (رجم) ليك الاستاذ دا تلاتة محطات سريعات جدا وكان قاعد يبكي .. يعني فرغ حمولة الغضب دي بعد يومين .. ورمى الخرطوش وفتح ليك الباب وركب ليهو مكنة طيارة وكسح البيت .. الاستاذ قبل عليهو وفقعه ليك ضحكة .. انا تابعت الموقف من جوه الفصل .. وصفقت ليهو طوالي .. لانو اخد حقـو بي خرطوشو .. طبعا من وقتها وتم نقل الشافع لي مدرسة تانية ..
Quote: طبعا يا عمر نفس الاستنكاح دا كان بيعملو ابوي ... بلاي بيحلق في الاسبوع خمسين مرة .. يلقاك قدامو كدا يمسك راسو .. يقول ليك تعال احلق لي .. كان جو ضيوف يقول ليهم مافي زول فيكم حــلاق ..؟
يعني كان خاتي مشط و مقص و مراية في الصالون ؟
03-15-2008, 01:05 PM
tmbis tmbis
تاريخ التسجيل: 10-19-2002
مجموع المشاركات: 24862
Quote: يعني كان خاتي مشط و مقص و مراية في الصالون ؟
في الصالون شنـو يا ريس أحيانا في الجيب بتاع العراقي .. وأحيانا تحت المخده .. يعني جاهز (للتحليق) في كل الاوقـات .. في فترة من الفترات المقصات ومكنات القطعية ياريس والامشاط كانت منتشرة بي صورة مزعجة جدا في البيوت .. المقص كان اهم من شاي الصباح..
03-15-2008, 01:01 PM
tmbis tmbis
تاريخ التسجيل: 10-19-2002
مجموع المشاركات: 24862
Quote: كان والدي يذهب بثلاثتنا إلى صديقه ( الحلاق ) عم حسن بسوق الموردة شخصي .. وعامر وعمار .. يذهب بنا على انغام بكاء عمار الاصغر وصراخه المستمر.. واستعجال عــامر الاكبر في التخلص من هذا المشوار المزعج .. والهدوء النسبي لشخصي الضعيف المستمد من موقعي في خانة الوسط مما يتيح لي الاستمتاع بصرخات عمار ومعاندته لعم حسن وترجله مرات عديده من الكرسي العالي جدا بحجة ان عم حسن يستعمل يده ( اليسرى ) في الحلاقة ولماذا هو مختلف عن البقية
عزيزى الأخ تمبس ،،، بوست جميل ودمه خفيف
ما إقتبسته أعلاه يزكرنى بموقفين جميلين فى حياتى الحلاقية ،،
الموقف الأول : كان فى زماننا ذالك تنتشر موضة تسريحة إبراهيم عوض ، ولكن إحدى جاراتنا كانت لا تعلم بأن تلك تسريحة وليست قَصة، فإصرت أن تسرح لى ولأخيهاوكانت أكبر منننا عمراَ وحجماَ ، فإجلتستنا وأتت بمقص وبدأت فى تسريح أخوها أولاِ ،، فنزلت قصاَ فى رأسه من من عند بداية الجبهة وحتى نهاية الرأس فى نفس مسار شقة التسريحة ،، وعندما رأيت أن رأس صاحبى قد تشوه فقد أطلقت رجلى للريح هرباَ من القص ،، وأصبحنا نتندر فى صاحبى حتى نبت شعره مرة أخرى ليمحو آثار تلك القصة .
الموقف الثانى : كان والدى يأخذنا أنا وإخوانى أمام دكانه وينزل فينا صلعة بماكينة حلاقة أتى بها من مصر ، ومن ثم يأمرنا بدفن شعرنا المقصوص بجانب الدكان حتى ينبت بيضاَ فيما بعد ،، المهم كان يبدأ بأخى الأكبر ومن ثم بعده ويختم بى ،، وكانت إستراتيجية الحلاقة هى أن يترك حبيبات من الشعر فى المقدمة حتى ينظف كافة الرأس وأخيراَ يأتى لهذه المقدمة ( والتى كنا نسميها الشوشة ) فعندما بدأ فى ترك الشوشة لأخى ويعمل ماكينته على بقية الرأس فقد بدأ أخى فى البكاء والنحيب حتى يترك له تلك الشوشة على الأقل ، هنا تدخلت الوالدة وقالت له : بالله الولد بيبكى شديد خلى ليه الشوشة دى ،، فرفع والدى ماكينته من على رأس أخى وتأمل بقية الصلع فى رأسه وكذلك فى رأس أخى الأكبر ثم وضع مقدمة الماكينة عند بداية الشوشة وووووووووو كجيك كجيك كجيك كجيك كجيك كجيك أتى عليها بضربة تماماَ قائلاَ : ممممممممع السسسسسسسسسسسسسسسلامة ، فزاد نحيبه حتى سمعه بقية الخلق فى الحلة.
لك خالص التحية والود ،،،
ماهر َ
02-27-2008, 12:09 PM
تيسير عووضة تيسير عووضة
تاريخ التسجيل: 12-20-2005
مجموع المشاركات: 7136
Quote: فقد لاحظت كمية الهدوء والانصياع للعمليات الفنية المصاحبة الحلاقة المملة جدا في تفاصيلها من قطعية .. ( وبــخ ) بالماء البارد .. ( وقطعية ) مؤلمة جدا هذا إذا مع الاخذ في الاعتبار كمية الشعر التي تجد لها مكان مناسب للازعاج من خلال الدخول عبر الأنف أو استقرار البعض منها في مكان ما بالوجه وبداية ( التحرش ) بالجسم والنية المبطنة ( لحك ) المنطقة المتاثرة لكن حركة (الحلاق) والتنقل من منطقة إلى أخرى .. ( والفوطة ) المربوطة عادة تحول دون التخلص من (القشعريرة) وذلك بأن يضعك تحت رحمة الحلاق .. ليحلك من هذه الورطـة .. باستعمال الفرشاة الناعمه التي تزيل الساقط من الشعر الصغير ..
بالله دا كلو بيحصل عند الحلاق ؟ الحمد لله الما طلعت راجل
تصدق يا تمبس إنو شخصي الماثل أمامك دا كان بيظبط قطعية لمن بيتشاكلوا فيني أخواني الإتنين يحلقوا لي بعض وأنا أجي أعمل ليهم القطعية يعني هم يقصوا وأنا أواسي
ظهرت في السودان قبل فترة موضة إنو الشباب يحلقوا لبعض الأحياء كلها عبارة عن شباب تحت شجرة ومراية وتربيزة وباقي العدة بعد شوية قبلوا على صالونات الحلاقة باسماء القنوات: صالون ART صالون MBC صالون CNN
تاني قاموا في أسماء الفرق صالون مانشستر يونايتد صالون ريال مدريد صالون آرسنال
الحلاقة زمان كانت مهنة ليها مؤهلات ومرات كمان بتاخد طابع (طبي) يعني تلقى حلاق الحلة هو نفسو الزول البيقوم بعملية الختان لأولاد الحلة وبرضو بيقوم بعمل جميع الإسعافات الأولية من تطهير جروح وربط شاش وغيرو
وجاياك لموضوع (الشفع السغار) دا ..
03-11-2008, 11:50 AM
خدر خدر
تاريخ التسجيل: 02-07-2005
مجموع المشاركات: 13188
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة
tmbis
طلحة عبدالله
عمران حسن صالح
ابو جهينة
ملكة سبأ
غباشي
شول اشوانق دينق
محمد الطيب حسن
غادة عبدالعزيز خالد
محمد سنى دفع الله
طارق جبريل
عمر الفاروق
زوربا
معتصم دفع الله
Ishraga Mustafa
خالد خليل محمد بحر
haroon diyab
fadlabi
تيسير عووضة
خدر
فيس بوك
تويتر
انستقرام
يوتيوب
بنتيريست