|
|
 إذاعة البحر الأحمر : بعد قليل بيان هام من أمانة حكومة الولاية فترقبوه !! والله أنا قلت إنقلبت
|
الساعة 4.30 عصرا اليوم الثلاثاء وانا في العربية وبسمع في اذاعة البحر الاحمر في موسيقى وطنية (بدون مارشات عسكرية) ويتدخل المذيع او المذيعة كل شوية مقاطعا :
(بعد قليل نذيع عليكم بيان هام من أمانة حكومة ولاية البحر الأحمر فترقبوه)
وطبعا لأنني من جيل عجوز شوية كدة بكون حضرت بيانات هامة زي دي كثيرة من زمن أول بيان لهاشم العطا ( بيان نميري الاول ما متذكرو) مرورا بكل البيانات وحتى آخر بيان طوالي راسي مشى بعيد خلاص قلت يا زول الناس ديل يكونو حصلوا ناس كوسوفو واللا شنو لأنو البيان طالع من امانة حكومة الولاية يعني دي حكومة يعني وزراء ومجلس تشريعي ووالي وكده خاصة وان الاغاني الوطنية كانت تمجد في الوطن
المهم قلت الله يستر يكون الشرق انفصل وكده
اها شلت هم الناس المساكين قلت ناس بورتسودان ديل كان جروا من العكة الا يقعوا البحر الاحمر بقيت شيال هم اهلي الغبش ديل حيمشوا وين لو اتلخبطت.
المهم تاني يجي المذيع ( بعد قليل نذيع عيكم بيان ...... الخ)
اها كمان راسي لف كثير عشان ما شفت قناة الجزيرة في الظهر وما عارف الاخبار شنو يا جماعة راسي نتح عديل كده وبقيت احفر واتذكر كل الانقلابات العسكرية هاشم العطا - حسن حسين - حركة يوليو - وغيرهم من الانقلابات التي راح ضحيتها أبناء الوطن الواحد فيما بينهم في سعيهم نحو السلطة تحت مسمى التغيير.
الموضوع يا اخوانا لحدي هسه انا ما فاهمو شنو
لأنو طلع البيان ما بيان انقلاب او اعلان استقلال
بيان طويل عريض يتحدث عن الطلية والداخلية ومنذ سنين وحكومة البحر الاحمر تراقب الامر
ولحدي هسه انا ما فاهم الموضوع شنو
يا ريت زول من ناس بورتسودان يبين لينا البيان ده ( نص البيان لو امكن ويفهمنا المشكلة شنو عشان نكون فاهمين بلدنا كويس
وبعدين سؤال بريء جدا : هل كان لهذا البيان من الاهمية ان يتم اخراجه واذاعته للناس بهذه الطريقة وهذا السيناريو الانقلابي المعروف
وما هو راي الحكومة الاتحادية في مثل هذه التصرفات
|
|
 
|
|
|
|
جمال السنوسي
عبد المنعم سليمان
فيس بوك
تويتر
انستقرام
يوتيوب
بنتيريست