لو بحثتم في قلوب الناس ، فستجدون أن أمزجتهم لشتى .. لكن ما الذي يجعل لهذه الفرقة الموسيقية كل هذا الحضور الجميل على الأفئدة والمزاج ؟
أول معرفتي بفرقة " عقد الجلاد " كان أيام مهرجان الخرطوم للموسيقى ، حيث كان للموسيقى مهرجان على ضفاف مقرن النيل بحفاوة حكومية ترعاها وزارة كان إسمها وزارة الثقافة ..
دالت الأيام ، ولم تعد هنالك للثقافة وزارة ، برغم تضخم كم الحقائب الوزارية ..
المهم .. برغم دولة الأيام ، ظلت " عقد الجلاد " حلقة في آذاننا التي أوجعها خطاب الدولة ، وغياب الخبز وعسف العساكر ..
فرقة من المغنين والعازفين ، أخذت على عاتقها إسعادنا بالممكن .. وساهمت في فتح آذاننا على مراحيب بلدنا لنعرف أن غيرنا موجود : نحن النيليون ، وأبناء الصحراء ، ومواليد الساحل ، والجنوبيون والمصلوبين على غرب البلاد : بلا وجيع .
كانت " عقد الجلاد " أول سكة نرتادها نحو هذه البلاد ، بثقة .. فعن أغانيها تلقينا مفردات الديكشنري السوداني العريض : الحماسة، أغاني الحصاد ، كلمات الحب ، الجذب الصوفي ، شعر الحداثة ، وسمعنا أسماء مثل " النور عنقره " الذي أغفلته التواريخ ، وركزت فينا كلمات شعراء البطاحين من بنات البلاد ..
عقد الجلاد .. سيرة فنية وثقافية عزيزة على أبناء هذا الجيل ..
02-18-2008, 04:07 AM
طلال عفيفي طلال عفيفي
تاريخ التسجيل: 06-20-2004
مجموع المشاركات: 4380
مقام النغم والجمال مشروع فيلم عن عقد الجلاد من اول رحلة ليهم في محاولة للخروج من السودان عن طريق ليبيا ووصولهم للقاهرة عن الأيام الجميلة وهم يتجولون في ريوع بلادي عن الخيبات ووالأمال والأحلام المسافرة لي عوالم جديدة عن فراق الأصدقاء وشجن الأحبة عن البحث لي نغم باهي الطعم وعن موسيقى مدسوسة في قلوب الحبوبات عن المناحات الحزينة واغاني العمل واغاني الحبيبة الحب والسلام والصحبة مقام النغم والجمال ياطلال واحد من احلامي محبتي مودتي وسلام
وأجمل وأحلى ما في " عقد الجلاد " ، أنهم يلمون شمل العاطفيين والشعراء ، ومحبي الموسيقى ، مرتادي الحداثة ، الشاعرين بضنك ، محبي الطرب ، البنات والأولاد ، شعر القدال وشغبة البطحانية ، ومحمد الحسن سالم وهاشم صديق ، ومورالات الجند .
براح طيب ومفتوح على الناس بلا أذى ، وتفاعل جميل يفتح النفس (ولو كان بها سقم، زي حالتنا، والعياذ بالله) .
02-20-2008, 01:12 AM
طلال عفيفي طلال عفيفي
تاريخ التسجيل: 06-20-2004
مجموع المشاركات: 4380
هذه المجموعة أسهمت بشكل كبير فى صياغة وجداننا ... كنا نعرف أفرادها ونحن طلابا" عندما كانوا يشاركون فى بعض الفعاليات الطلابية وتابعنا ميلادها بعد تلك السهرة التلفزيونية التى قدمها د. عاصم والتى عبرها دشنت الفرقة نشاطها بشكل منظم ... عثمان النو .. شمّت .. مجاهد عبد الرحمن.. عوض الله بشير .. أنور عبد الرحمن .. ود.منال بدر الدين .. حواء المنصورى ... بين الخليفة وامونة بت حاج أحمد للقدال .. أحتاج دوزنة لمحمد مدنى .. الخرطوم بالليل للتجانى حاج موسى.. قلبى عليك يمور لحسن بيومى .. ويا ليلى ليلك جن أهزوجة أهلنا السمانية والاهلية كملت لود الرضى ... هكذا كانت البداية .. فسيفساء عجيبة تشى بأن (الشغل سيكون أنضف مايكون).. عقد الجلاد مشروع جمالى رصين ودعوة للإتقان والأصالة والسلام لا تقل عن البرنامج المرحلى (وهو برنامج حكومة الوحدة لوطنية) التى أطاح بها انقلاب الإنقاذ وكانت تشمل كل القوى السياسية بإستثناء الجبهة الإسلامية لذلك انقلبوا عليها (والمقولة للكاتب مرتضى الغالى).....
لا أتذكر متين أول مرة سمعت عقد الجلاد ، و لكأنها ولدت معنا موسيقي و لحناً ، أتذكر أول شريط ليها في بالي أولاد المدارس كنا نتغنى به دائما و نحنا راجعين من المدرسة و نحنا قاعدين نسمع حتى أتذكر لما نغلب أهلنا و ما يقدروا يهدونا كانوا يسمعونا عقد الجلاد أتربينا بالسحر دة ، قدر ما الظلام كان بيحوط بينا نحنا الشفع في الزمن داك و قدر ما حاولوا أولئك الناس ان يلطخوا حياتنا بالونين الرمادي و الأسود قدر ما كنا نصر علي تلوين حياتنا بكل الألوان الوان الفرح و نمزجهم مع بعضهم البعض
أقول ليكم اني حاسداكم ، دي حقيقة إنا حاسداكم حسه ، أنكم مازلتم تستمدوا من ذاك السحر قوتكم كلمة الشكر لعقد الجلاد أظنها ما كافية أبدا
ياطل إذيك.. والتحية ليهم .. والتحية ليك.. عقد الجلاد فعلاً من الفرق .. الممتعة..حد السكون.. وكنت دايماً بسمع وأقلد أصواتم .. واحد واحد.. وبحس في أوقات كتيرة لو نادوني من الجمهور.. حاادخل معاهم طوالي من غير خراب.. جد جميلين.. شكراً هبة
02-18-2008, 08:06 PM
Amjed Amjed
تاريخ التسجيل: 11-04-2002
مجموع المشاركات: 4430
عقد الجلاد؟ أكاد اقسم انها شكًلت وجدان كل جيلنا ولا تزال هناك اصدقاء جمعنا حب "عقد الجلاد" وهناك أحباب جمعتنا بهم اجمل الأشعار وأعذب الألحان التي أهدتنا لها "عقد الجلاد" الربان عثمان النو.. رجل مليان مزيكا وإحساسه عالي بكل ما حوله.. الأصوات التي مرت بالفرقة. كل منها أسطورة والذين لا زالوا يعطرون دنيتنا.. لا تملك إلا أن تقول: سبحان الله
تحية لكل الشعراء الذي امتعونا مع "عقد الجلاد".. لن اذكر إسما حتى لا أظلم أحدا
العزيز جدا طل تحايا وود وبما انك جبتا سيرة البحر الكبير ده اقول ليك امس كانت عقد الجلاد تصدح في كاسيت العربيه ... تغني محبس النفس الرهيف ده ذاتو.... كانت معنا صديقة تعشق عقد الجلاد قالت زمان في مدرسة امدرمان الثانوية للبنات كانت لهم مجموعة من البنات ( جمعية محبي عقد الجلاد ) ولهم جريدة ونشاط الى ان جاء ذلك الناظر الكــــــــــوز وفرتقا ليهم في راسهم بلا غنا بلا حركات معاكم... قائلا دي مسخرة ودمت يا صديقي محضر فــــــرح في هذا البورد الحـــزين ابريل القادم سنكون طرفكم ... دعنا نشوفكـ يا راجل معتصم
02-18-2008, 09:46 PM
عبد الناصر الخطيب عبد الناصر الخطيب
تاريخ التسجيل: 10-25-2005
مجموع المشاركات: 5180
نحنه أهل الفرحة جينا لا المدامع وقفتنا ولا الحكايات الحزينة لما درب الريحة جابنا جابنا في هذي المدينة ياولدي الدروب ...... شقاقه بحر التيه ليك درب ولا دربين مساك الدروب ضهاب ليك قلب ولا بالين سواي القلوب كضاب ليك ضهر ولا سرجين ركاب السروج وقاع شق ياولدي بحر التيه ... بتدردر وتتودر ولما يوم على حكايتنا ديك ترسي نعّزك بالقبيل داخرنو ليك ... الشوق بحر ياولدي بحر التيه قت ليك العليك أدرابوا لاتنغش ولا ترضابوا لاتنغش في الزمن الذميم والكي يسوقوا خلاف
عليك الدور وتصريف الليالي ولامن دمعه ترمي الدمعة فوق دربك روّح يابا وأبقي قفالك لا تعين لا تعائن على موطالك ولا تندم على خطوا تملى مشيتوا لى قدام وأبقي العاتي زي سنطتنا زي صبرا نلوك فوق مروا زي الزام
ياطلال عفيفي ,,,
يظلون شارة لا تغيب ( لزمن جميل) بالبال وبالخاطر لهم ولك أصدق تحية
أخي الكريم طلال شكرا لك وأنت تحفر في جدران ذكرياتنا الجميلة مع عقد الجلاد... حقا تجربة عقد الجلاد تجربة فريدة لم ولن تتكرر نتمني أن يقدموا كل ماهو جميل كما عودونا... خصوصا تجربة مسدار أبوالسرة اليانكي فهي فلتة من فلتات الزمن الضنين
شكرا ليك كتير
02-19-2008, 12:21 PM
عمرو كمال ابراهيم عمرو كمال ابراهيم
تاريخ التسجيل: 10-09-2007
مجموع المشاركات: 1226
والروح مشتحفة في الدروب الفيها ريحتك للبعود من فزعة الغربة البساسق فيها مو راجع ولا بالحيل قريب..
جائتني الكلمات عبر رسائل SMS من جوال راميا.. ورامية سنسرها تجاته عقد الجلاد عالي جدا.. ولايمكن ان تردد عبارتين تلاتة لعقد الجلاد دون ان تهتز وتسرح.. عرفتها اول ماعرفتها وهي خارجة من امتحان في الاكزام هول في جامعة الخرطوم واظنها قدت فيهو فيما بعد .. وبعد ان بكت يومها من فرط ماجنت يداها في الامتحان قالت (دي الممطورة ما بتبالي من الرش..انبليتا..انبليتا) .. ولا ادري ماعلاقة رامية بالاولياء ولكن بعد عشرة دقايق صبت مطرة وبلت الجميع فاحتمينا بسقف الاكزام هول المايل .. وتمنيا باقي الغنية موية.. هذا ما كان من شان رامية وهي من الحبيبات.. والعقد يتدخل بصورة او باخرى في كل حبيباتي .. مثلما سيتضح لاحقاً وبعد زمان غير يسير اكشتفتا انو محمدطه القدال مكون رئيسي في مشاعرنا تجاه هذه الفرقة.. ولايمكن بحال فصله عن الاحساس العام بعقد الجلاد.. الزول ده ادى الفرقة اجمل ماعنده.. وكانت اجمل ماعند الفرقة واكثرها جرأة .. بين امونة والخليفة والمسدار والطمبارة والغناي هي من اجل اعمال الفرقة .. القدال شاعر بي كلمات متفردة جدا ومميزة جدا .. ولاتكاد تتأتى لشعراء اخرين..المفردات عندو براها ومستقاة مباشرة من بيئاتها.. (اماتي القبيل بي حنهن لجني قرفة وقلدة كيف شوق اللبن رجني.. حزنا جاني في ميع الصبا يكجني امرق مني ياحزنا..الخ..
جيتاوجلدي بينو وبين عضاي الشحمة علا النار بقت قدامي .. جلدي الليلة بينو وبين عضاي المافي.. علا تراني شوال الكبس نفيخ جلاليب الوردم هندامي..
كلمات بصراحة ماجادت بها قرائح الشعراء السودانيين.. متفردة في اختياراتها ومعانيها.. ولايمكن ابدا تخيلها في غير حال الغناء الجماعي.. وبالتحديد خارج جماعة العقد.. كلمات الطنمبارة: (ليك درب ولا دربين مساك..الخ..)
كلمات تحكي عن ملاحم شعبية خالصة لوجه السودان .. لاتصلح إلا لكي تتنقلك الى سودانوية موغلة في لغتها.. لاتصلح الكلمات إلا لكي تغنى عن طريق عقد الجلاد.. لتكون مكتلمة المعاني وذات دلالات تصلنا في كامل تناغمها
02-19-2008, 03:52 PM
DKEEN DKEEN
تاريخ التسجيل: 11-30-2002
مجموع المشاركات: 6772
قبل فترة كتبت في حضرة الاخت الفاضلة رباح ابو العلا مايلي في شان العقد: مجموعة عقد الجلا د لاشك مجموعة مدركة لماهية افعالها .. وهي تغني بإحساس من يؤدي رسالة قاصدة في دروب الاشواق والكلمات.. واختياراتها للاغاني وللإلحان لايتم هكذا خبط عشواء اوكيفما اتفق.. والشاهد في هذا الأمر محدودية الشعراء والملحنين في أغنيات الفرقة. أعضاء الفرقة نفسهم إحساسهم بي مفردات الأغاني عالي جدا وهم قريبين جدا من المفردة لدرجة انو الواحد لايمكن يتخيل انها يمكن ان تُـغنى من غيرهم .. قصدي الاحتكار البيحصل لي الغنية وللزمان دون قصد عشان تبقى في النهاية مربوطة بي اللون الاخضر والاسود الى مالانهاية.. لدرجة اين بقيت ما اقدر اتخيل ايام الجامعة بدون الفرقة ولا حبيباتي بعيد من مزيكة الفرقة وكلماتم.. و من شدة التصاق الفرقة بي الكلمات التي تم احتكارها سلفا والتصاق الكلمات المنتقاة بعناية بالحبيبات ايام الدراسة الجامعية وحفلات كازينو النيل الازرق .. بقيت في النهاية مابقدر افرز حبيباتي من جو الفرقة من النيل الازرق عموماً.. يعني الفرقة جاتنا بي بما لا قبل لنا به.. ضيعت علينا لذة تخيل الحبيبات منفردات دون شريك.. وضيعت علينا لذة تنسم روائح النيل من على كبري الحديد بتاع بحري بدون مشاركة غنية من اغنياتم.. واصبحت عقد الجلاد الشريك الرسمي لغالب من نحب ولكثير من فضاءات الذاكرة .. خاصة اننا لاقيناها في اوج ايام الجامعة فبقت الفرقة بالاضافة الى كونها مجددة ومواكبة في الغناء جزء من ارشيفنا الجامعي الدايماً كان جميل وما بتكرر..
يعني لامن اسمع مثلا : عيناكي لي سقيا وحلاوة اللقيا.. إن غابت الاحباب..الخ مابتخيل إلا وهناك عقد الجلاد .. ومابقدر اتخيل فضاء خيالي إلا كبري النيل الازرق..
وحالة الحلول البتديها ليك الفرقة بمساحات التخيل الواسعة عشان في النهاية تلقى نفسك بس بتذكر في حبيبتك.. اللذيذة لامكن اسمع ياجمال النيل والخرطوم بالليل . بحس بي انو الخرطوم دي عزيزة شديد.. وباقي الاضواء المشتتة من انوار الهليتون واطراف الجامعة مضوية لي هنا بس(واشار الى فؤاده)
اختيارات الفرقة لاعضائها موفقة الى حد بعيد.. الود شبكة كمثال على اخر منضم او من الاخيرين.. شبكة ده في الجامعة كان عبارة عن زول حبوب.. فرايحي وبه سطلة كده لااعرف لها سبباً.. المهم في هذا الامر انو اينما لاقيتو كان بديني احساس بوازي لقاء مجموعة افراح وحبيبة.. يعني ما حبيبة وبس.. تكمل هذا الامر واحساسي الجميل بي شبكة لامن عرفتا انو ساكن في شمبات.. وانا طبعا شمبات دي عندي بتنتهي عندها الحاجات وبتبدي منها حاجات تانية.. المهم في هذا الامر انو شبكة ده الانسب لهذا العقد بي حساسيتو العالية ومحبتو وفهمو الشبابي المواكب..إضافة الى جمال صوتو..
02-19-2008, 04:45 PM
عمران حسن صالح عمران حسن صالح
تاريخ التسجيل: 11-26-2004
مجموع المشاركات: 10159
طلال عفيفي إزيك في العام 1988 كانت الملاريا تحصد من غير فرز .. والأمطار تنزل دون حاجة فتفيض وتزيد في فرح البعض وآلام آخرين .. زارتني الملاريا في ذلك الزمن الجميل في شرق السودان وأنا على بعد مائة كيلو من أقرب قرية ... (مائة كيلو يا صديقي بحسابات الأرض الترابية الوعرة تساوي 1000 كيلو مسفلت وثلاثة مسارات ) في معسكر للاجئين ليس فيه غير الذرة والحليب والبيض ... (إستغلت الباعوضة قلة غذائنا ودوائنا ففعلت ما أرادت ...) أهدتني إحدى زميلات ذلك الزمن الضاحك شيئاً من ( الرقاق والأوفالتين ) رأفةً بي ومحاولةً منها لتعويض جسمي ووجهي ما فقد من صحة وماء الحياة ومعهم ًأول شريط لعقد الجلادمسجل بطريقة رديئة .. دون وضوح لمعظم الكلمات ...إلا أن إحساس الشي الجديد وصلني .. وكانت (بطنك حمست) ... وجلدك خرش ما في كلمات مُلحنة ومُغناة بكثير من الأصوات وقليل من الموسيقى شيئاً غريباً في ذلك المكان الموحش ولكنها يا طلال كان (كالدواء ) بالنسبة لي ... حينما سمح لنا الزمان أن نعود للمدينة كان من الأجندة الأٍساسية لي ولمن أعرف أن ندخل في حياة هؤلاء الشباب ... ففعلنا ... أخذ الزمن دورته يا طلال واستقر الحال بي في بلاد جديدة ... المسافات بين مدنها مئات الكيلومترات .. وبمسارات عديدة ... ودوابنا فيها غير حمير ذلك المعسكر ..... ولكن ظلت الأشياء لا تتغير وكان رفيق الطريق :
Quote: والروح مشحتفة في الدروب الفيها ريحتك للبعود من فزعة الغربة البساسق فيها مو راجع ولا بالحيل قريب..
أسمعها مئات المرات وكل جزء فيها يصلني بكل الجمال الموجود في كلماتها أو اللحن أو الأداء من هؤلاء الشباب الأكثر من رائعين ... الموال فيه الكثير من القصص يا طلال وأعذرني لشتارة الحكي وطوله .. شكلي فكيت فيك مللي وضيقي بالنيون والأسفلت والأسمنت الذي حولي ...
02-19-2008, 04:57 PM
مازن الجمّال مازن الجمّال
تاريخ التسجيل: 02-08-2008
مجموع المشاركات: 797
أول يوم سمعت فيهو عقد الجلاد كان ليل أغبش اللون اللمبة النيون مولّعة وغبار عربات الشارع يسجل حضور في حوشنا الكبير ..السراير مفرقة في الحوش والتلفزيون ماخد موقع الوسط الناس ملموما وانا نايم فصحيت على أنغام يا ليلة ليلك جنّ .. فتّحت عيوني وأول مشهد كان عوض الله يتمايل بي رقبتو ويردد في مداخلة جميييلة مع أنور يااااااااا ليلة ليلك جنّ وياااااااا ليلة ليلك جن يااااااااااا ليلة ليلك نّ .. يومها شدّاني لون زينب وما أدراك ما التركواز والبنطلون الأسود وبتّين واحدة بتعزف وواحدة بتغنّي.. اعتقد غنها كانت سهرة أولى للعقد على الأقل بالنسبة لي انا ومن يومها الصور جوايّة محفورة .. عقد الجلاد إرتبطت في ذهني بتشابك الأيدي أسود وأبيض سمح وشين ود عز ومفلس بت وولد محجبة وبي طرحة وفاكّا الشعر ..بنطلون جينز إدوين وبدلة سفاري وبنطلون طوكيو وجلابية ..واحد قاشر وجاي من البيت وجمبو واحد شايل الدفاتر وجاي من الجامعة .. الناس الورا مستمتعين أكتر من ناس قدام .. وناس قدام في نشوى أحلى وأجمل .. مع عقد الجلاد ماف طريقة تحب وتجكّس إنت وجكسايتك في حضرة عقد الجلاد .. دون أن تشعر تنتقل من مرحلة الوقار لمرحلة الهياج ثم الحضرة .. إتعودنا نصفق عند أول مداخلة لي امال النور في أمونة .. ببكي في الطمبارة والغنّاي زيّ وزي الشافع .. أعشق حد الجنون المقطع البيقول : ميّز ريحة المطرة أو إتخيل بيناتنا رزاز .. ما أظن سمعت أجمل من كده .. نعم أعاني من فهم بعض الكلمات البيرددوها لكن زي ما قال دكين كنا بنتمها موية .. ما أظن في زول رقص زيّي في حاجة امنة ... ويا حاجة ناس الموووووووووووووية جوووووووووووووووووووووووووووو.. ووووووووووووووووووووووووووووووووووووووو... في أوقات المزاج الرايق أردد عذراً حبيبي ..لكن أزهار الشتاء بخيلة ... وتدوووور ثم تدووووور ..ثم تعود في قلبي.. في كل عام كنت ترحل يا حبيبي في دمي .. عذراً حبيبي سالقي بعض أحزاني إليك ..
ما عارف شنو العلاقة بين عقد الجلاد وريحة الدعاش .. لكني أشمّ رائحة عقد الجلاد قبل أن أستمع إليها ..
عقد الجلاد تسقطاً لاخبار المجموعة وانشطتها. والتى احرص حرصاً لا يدانيه حرص علي حضورها والتمتع بها.... علمت انهم بصدد " تدشين" أو انزال كاست "جديد" استوحش السيد وزير الثقافة عبارة " تدشين" هذه في كلمته التى ادلى بها في مفتتح اللقاء المتواضع الذي أقامته الفرقة مع الصحفيين والاعلاميين وكنت احد المحظوظين بحضوره،إذ دعاني لذلك الصديق الكبير دينمو الفرقة "الاستاذ عثمان النو" _ ولقد أتت الفرقة ببادرة توزيع الشريط مع تذاكر الحفل بالمجان تقريباً... أو إدخال الحاضرين بالمجان فلنتيجة واحدة _ عقب قصير الخطب وقليل الكلام .... انتقل الكل الي المحفل ليشهدوا منافع لهم قلّ مثلها ... وسط حضور كثيف لجمهور شقيف درج علي اتيان هذا الفعل انّى سنحت السوانح ... ولاحت الفرص ... كان بجانب هذاحضور مميز أنيق للصحافه والصحفيين ونفر من الشعراء الذين كان شعرهم وقود استمرار هذه الفرقة المتميز....من أمثال احد أميز شعراء العامية المحدثين"محمد طه القدال" وشاعر الشعب بلا منازع محجوب شريف... والأستاذ سعد الدين ابراهيم الذي تغنت له الفرقة للمرة الاولى "اغنية حصار" المضمنة مع اغاني الشريط...والمبدع أزهري محمد علي... وابتدأ الحفل بيا ليلة ليلك جن-معشوقك اوه وانا....تلك الانشودة الصوفية..وتدلت "الانجم السواري" تباعاَ...كان جلوس وسطاً بين الشعراء محجوب شريف وسعد الدين ابراهيم والشاعر القدال والاستاذ شرحبيل وازهري " كنت كخير الامور الشئ الذي أطفئ غناً على ذاك في الحفل ... وغنت الفرقة ... كما لم تغنى من قبل... أو هكذا حسيت من طربي ... وكان عيداً قبل العيد... ولقد تجلت نتائج محاولات التطوير المتزايد والمستمر علي تجويد الاداء واستتبع الغناء رقص جيد نقل المشهد كاملاً غير منقوص... وتميز كله بالحميمية...وانفرط عقد الجلاد بالفعل وفاح عطره وشذاه وعم المكان ... وتمايل الكل طرباً وأهتز، فنحن قوم اذ " طربوا اضطربوا". "" امونه" للقدال واخرى له عشان عيون أطفالنا ما تضوق الهزيمة استخف الطرب بالاستاذ شرحبيل من أين يأتون بهذه الكلمات الرشيقات الغنيات البسيطات...فاكتفى بلابتسام-وقلت في سري من وادي عبقري ـ...غنيت حاجه امنه اصبّري التي يؤدي فيها شريف شرحبيل مع اقرانه"صولات" صوتية غاية في التطريب والانفعال ....فلم يستطع الأستاذ شرحبيل "صبراً" وشارك في هذه الوصلة مشاركة حيّة ومدهشة...ضاعفت فرحة الحضور وحملتهم ذراري من الطرب والمتعة...وتوالى سريان الأنجم ...وانفراط العقد- وانتقال كل ذلك من المكان الذي هو أكثر تركيزاً فيه الى الاماكن التي يقل فيها ذاك التركيز- الى ان تشبع المكان كله- كما يقول اهل العلوم وتوقف الزمان وكانت العيدية التى سبقت العيد بحق ... ونحن ممنونون للفرقة .. ببعض فرحنا بالحياة .. كما قال محمود درويش .. مع التمنى بان نشهد ولا نسمع عنها الا ما يسير...
عزيزنا طلة كما يحلو للبعض وانا منهم ان يطلق عليك كيف انت وكوبر وكل جميل فى الحى ثمانية عشر حولا من عمرى حالت هناك ولم تحول الموانع بينى وحبى لذاك المكان واهله وانت اولهم كيفك وكيف ليالى الخرطوم الدافئة المقمرة وما اتعسنا فى هذا المكان القفر البارد حد التكلس والتكدس المهول للجليد فى الطرقات واسطح البنيات الخشبية وسقوف السيارات المجللة بالبياض ما يضاعف الاحساس به ياصديقى هو غربتنا فى هذا المكان الروحية تحديدا وثقافة اهله القائمة على الوحدانية وانعدام دف الحميمية الانسانية والمؤازرة والتواصل هذا المقال كتبته بعد حضور الحفل لتدشين شريط المسدار بكازينو النيل الارق الذى امتدت اليهالايدى لتسلبه ما كان يمنحنا منذ ايام الطلب بالجامعة حيث نعبر الكبرى من البركس ولقد نشر بصحيفة الصحافة وهانذا اسهم به هنا فى هذا البوست تعبيرا عن اعجابى الشديد الفائق بالفرقة وكل اعمالها ولقد اعاننى الزمن بان طرقوا بابى لاقدم لهم النصح القانونى والمشورة التى سعدت بها صادق امنياتى ان يتواصل تلاحمهم هذا والا يصيبهم ما يصيب الجماعات الابداعية عندنا الصور التى انزلتها اناشيد اخرى واغان ما لعذب عدستك وقدرتك على التصوير لك المودة
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة
طلال عفيفي
محمد سنى دفع الله
ابوبكر الامين يوسف
Alsa7afa_30
حسين محي الدين
محمد عبد الماجد الصايم
Giwey
Sahar Yousif
Amjed
Raja
معتصم ود الجمام
نها محسن أبورأس
عمرو كمال ابراهيم
wd al geran
محمد الطيب حسن
عمران حسن صالح
مازن الجمّال
عمر الفاروق
فيس بوك
تويتر
انستقرام
يوتيوب
بنتيريست