|
نيل وآه
|
وقفت هناك سحبت حجر وشلتو وجيت عليك يا نيل بدور احكيلك المصرور قبل يطلع علينا فجر قعدت عليو بديت أشرب نسيم الليل سرحت أجر واعاين للشدر في القيف بيضحك مبتسم مُنشر هو كان فرحان هو كان مالو ! بعاين ليو وشيشو يصُر بديت أغرق واشوف احلام وجمبي النيل كأنو فتر واتاوق للأرض بعدت هناك فاتت ولبست توب خدار ممزوج بلون أسود شدر صفصاف عليها طروب لكزت النيل بدور أرقد فترت من القعاد منصوب وفتّح لي عيونو حُمر وقالي الخير وشن مطلوب وقالي كمان متين نمت فترت عديل وقلت الروب خجلت كمان أبيت أنضم وشايف النوم غشاو يادوب وقفت أشابي للقمرة بدور ألمس وشيشا كمان وضحكت بي خجل بعدت وساقت للنجوم بحنان عرفت السر وكان الغيم بجرجر في الرجول كسلان سرحت معاو سواده عجيب سواد هماً غشانا زمان وعشعش في القليب خيّم وبدّل فرحي بالأحزان هربت بعيد بدور أنسى لقيت الرملة فاردة امان فرشت عليها صنقرت بديت أرسم حلم ممدود مدن أفراح ابت تتلم عجاجاً فرزعك مقصود رسمت قلوب وفيها سهام بتنزف والجرح مقدود ومرة رسيم وشيش مبهم ملان آلام حدود وسدود رسمت سحاب وراه شمس بتوعد فينا لينا تجود مسحت جميع رسوم إيدي رقدت بعيد شريط معيود وتعبت عيني من الشوف وحلفت باليمين بتنوم وهبت فوقي نسمة جميلة زادت فيني حب النوم وفجأة صحيت لقيتو صباح وكان الهم حداي مردوم وشلتو لبست توب الغم ده ما بالكيف مصير محتوم مسكت دريبي راجع ليو وبحلم بكرة أحسن يوم كلام الليل بِجيه نهار بيمسحو بي كلام مسموم
........................
سلام يا ناس
سلام يشمل حدودنا يزيد يعم ارضا حنينة يبيد خلافادار يسوقو بعيد يلم ايدينا فوق الايد عشان سودانا بينا سعيد
وعشان اكون انا زاتي سعيد ياريت لو تقبلوني عضو جديد بينكم
|
|
|
|
|
|
|
|
Re: نيل وآه (Re: مازن الجمّال)
|
Quote: سلام يا ناس
سلام يشمل حدودنا يزيد يعم ارضا حنينة يبيد خلافادار يسوقو بعيد يلم ايدينا فوق الايد عشان سودانا بينا سعيد
وعشان اكون انا زاتي سعيد ياريت لو تقبلوني عضو جديد بينكم |
وسلام مربع ليك يامازن , ولروعة غناك , ومرحب بيك اضافة نظيفة لهذا المنبر
| |
|
|
|
|
|
|
Re: نيل وآه (Re: مازن الجمّال)
|
الف مرحبا شاعرنا مازن صاحب القوافى الجميلة والقضية والروح الانقى ..
سعيدين بانضمامك الينا ونآمل وبانتظار مشاركاتك الجميلة ..
النص جميل ..تسلم خواطرك ..
| |
|
|
|
|
|
|
Re: نيل وآه (Re: هند محمد)
|
Quote: سلام يشمل حدودنا يزيد يعم ارضا حنينة يبيد خلافادار يسوقو بعيد يلم ايدينا فوق الايد عشان سودانا بينا سعيد
|
دخلت باجمل يمين... نتمني لك مكوثا طيبا في المنبر...
| |
|
|
|
|
|
|
Re: نيل وآه (Re: GamarBoBa)
|
قمر بوبا
....................
قمر ابيض جميل خلاب
قمر ساحر بنور جزاب
بذكرني
وبفكرني
ليالي جميلة بالاصحاب
بنسهر فيها يوماتي
نزيح هم الصباح الغاب
.....................
خالص مودتي وامتناني يا قمر
| |
|
|
|
|
|
|
Re: نيل وآه (Re: Rihab Khalifa)
|
مازن الجمال..
الف مرحب ونتمنى يعجبك المقام ويطيب ليك.
وشكلك جاى جاهز ...
المهم النيل براه اه.. والاه براها اهين..
ابقى طيب..
| |
|
|
|
|
|
|
Re: نيل وآه (Re: Amira Elsheikh)
|
اميرة الاميرة
ده شوق للنيل
وشجر نخيل
وشمسا باردة وراه تميل
وارضا طيبة وطينا وحيل
...........
واشكر حضورك الجميل
وعميق مودتي لك
| |
|
|
|
|
|
|
Re: نيل وآه (Re: Rihab Khalifa)
|
الزولة الجميلة رحاب معقولة هنا!!
يا سلام
لما الزول يحس بالغربة
في لحظة
يحس بي نفسو ما موجود
يكابس في ضلامو وحيد
وفجاة يشوف هناك النور
بيبقى سعيد.
| |
|
|
|
|
|
|
Re: نيل وآه (Re: abubakr)
|
هي لكن الاولاد ديلك مزعلني شديد لما جايبين لي الضغط
وبعدين هم مافي زول ديل بيتعولقو في هارموني
عليك الله كان ما شفتهم
.........................
الزول الجميل ابو بكر
على فكرة انت من الناس المتابع كتاباتم باستمتاع من فترة طويلة ومستمرة
| |
|
|
|
|
|
|
Re: نيل وآه (Re: مازن الجمّال)
|
Quote: هي لكن الاولاد ديلك مزعلني شديد لما جايبين لي الضغط |
دييل عملو ضغط للضغط ذاااتو ...اللحظة زول بتغني مصري ولحد الان الولاد ما بينو التقول عارفين اني منتظرم بشان اشوف اخرت البلاوي دي شنو ... بالمناسبة "زول" فيها بلاوي عجيبة .. اول مرة اتابع لفترة طويلة .. زول زلمي !! عجيبة
____________
شكرا .. ارجو ان يكثر المبدعيين امثالك والبنية هند من الحرف الجميل لهزيمة ودحر الخطاب العدواني الذي صار من تساقطات ما يحدث في بلادنا ولبلادنا ...
| |
|
|
|
|
|
|
Re: نيل وآه (Re: مازن الجمّال)
|
Quote: سلام يا ناس
سلام يشمل حدودنا يزيد يعم ارضا حنينة يبيد خلافادار يسوقو بعيد يلم ايدينا فوق الايد عشان سودانا بينا سعيد
وعشان اكون انا زاتي سعيد ياريت لو تقبلوني عضو جديد بينكم
|
مازن الجمال مرحب بيك وانت وحرفك رغم حزنه النبيل لكنه الجمال والحس بعينة
نورت والمنبر وزينته بهذا الحرف الرائع
| |
|
|
|
|
|
|
Re: نيل وآه (Re: هاشم أحمد خلف الله)
|
العزيز هاشم
ده شوق للناس
وطيبة الناس
الصافية قلوبا بدون وسواس
والعامرة قلوبا بحب الناس
والماخدة الطيبة وجوب واساس
......................
على فكرة انا ود هاشم برضو
عميق الودوالتقدير أخي
| |
|
|
|
|
|
|
Re: نيل وآه (Re: منى على الحسن)
|
الاخت الغالية منى
دايما بنوم واحلم
بي كون جميل منعم
يبعدنا من كل غم
أخدر وسيع منجم
وطيوره عاملة نغم
والموية فيه سيول
ممدودة غاسلة الهم
واشجاره في كل ميل
مفرودة عاملة عتم
ندخل عليه عديل
من دون كلام ونضم
................
خالص الشكر والتقدير
| |
|
|
|
|
|
|
|