|
|
 ساخر سبيل : إتخيل معايا !!
|
إتخيل معاى كدا انك بقيت (زول مسئول) ، غمض عينيك كده وأحلم هو الحلم بفلوس ؟
وكنك تكون (مسئول) دى بالمناسبة مش (صعبه آوى) يعنى ممكن تحصل ، ممكن تعمل ليك حركة حركتين (مصلحات) و(ناطق رسمى) ومراسلى القنوات الفضائية ح يتمو الباقى وبعد داك تحضر (بدلة العرس) بتاعتك عشان (المفاوضات) واللازم منو.. وشويتين كده تكون (مسئول) !! ولو إنت مش (بتاع حركات) ممكن كمان تطلع من (الحزب الفلانى) وتدخل (الحزب العلانى) ويمسكوك أى (حاجه) وتكون بقيت مسئول !!
مكتب ومدير مكتب وسكرتير وعربيه تودى الأولاد (المدارس) وبوكس يجيب (الخضار) من (السوق) وعربيه تاانى تودى (المدام) الكوافير ده غير (الكامرى) بتاعت سعادتك !
أول حاجه ح ترتاح من إنك كل دقيقه ح تمشى تشوف (الجمرة) عملت كم ؟ وح تقطع وإلا فضل عليها شويه لأنو مافيش مسئول بيعمل كده هو المسئولين فاضين من المسئوليات علشان كمان يراقبو (الجمرات) !! وكمان ترتاح من حكايت يوم (خمسة) فى الشهر دى
وهو اليوم الذى ينتهى فيهو المصروف وتبدأ فى عمليات (الإستدانه) !! لأنو (مخصصاتك) مع (البدلات) و(السفريات) والشنو ما بعرف داك كفيله بأنها تقعدك لحدت يوم (خمسة) سنة (عشروميت الف) !!
أكل سعادتك أكيد ح يتغير مش رايح من النهار ده تفطر (بوش) وتتغدى (عدس) وتتعشى (فول) لا لا إنت ح تتعلم تاكل حاجات تانية خالص طازجة ودسمة وطريه معدة سيادتك مش متعوده عليها حاجات ذات سعرات حرارية مرتفعه وكمان ح (تحلى) عارف أيه يعنى تحلى؟ يعنى بعد الوجبه (أوعك تقول ليا أيه يعنى وجبه) تاكل ليك (تفاحايات) ، (كمثرايات) ، أناناسايات) أو (فرت سالاد) وده طبعا كلو عشان تعمل ليك لياقه تواجه بيها لزوم القيام بمسئولياتك المتعاظمة ! لا لا إنت تانى مش ح تمشى كل (يوم جمعه) الصباح لفوزى (الجزار) علشان تشترى منو (ربع الكيلو) البقرى (المجلفط) ده إنت ح تاكل (بتلو) و(عجالى لبن) و(فلتو) إنت لو مشيت تانى لفوزى الجزار ح تشرط عين اللى خلفونا شفت ليك مسئول يشترى من ذى لحمت فوزى المجلفطه دى ؟
أبسط يا عم وقول بسم الله أوضاعك ح تتغير تماما أصلو ربنا بيحبك ولو ماكانش بيحبك ما كانش عملك مسئول يعنى من النهار ده ما ليك أى علاقه برسوم المدارس والجامعات والحاجات دى وما تشيل ليها أى هم ح تندفع فى مواعيدا بالظبط ومافيش حد من الأولاد ح يطردوهو أو يمنعوهو من دخول الإمتحان علشان ما دفع (القسط) ثم بعدين أولادك ذاتهم مش ح يتعلموا فى (المدارس الحكومية) مال المدارس الأجنبية دى ح يدخلوها منو لو ما (أولاد المسئولين) الذيك كده ؟
خليك بالله مصحصح معاى شوية لأنو فى حاجه مهمة عاوز أقولا ليك وهى إنو لما تمشى عشان تحلف (اليمين) اوعك تمشى بى بدلت (العرس) لأنها طبعا ح تكون (بدله فضيحه) وضاقت عليك كتير ده غير إنو ح يكون فيها كم (خرم) كده عشان كده حاول (تستعين بصديق) وتشوف ليك بدله (فاخرة) تقضى بيها المناسبه وكمان بالمرة إستلف منو (جزمه) كاربه بدل (مركوب الأصلة) القديم المشيت بيهو أكتر من (الأصله ذاتا ) ده .
ده بس أول يوم بعدين ح تظهر كل يوم ببدلة (فرنسى) جديدة مستورده وأحذيه (إيطاليه) ما تديك الدرب ده غير (الجلاليب الذبده) والعمم و(الشالات) وتشكيلات من (العصى الأبنوسية) اللى هيا ..
.. وما تشيل يا عم هم للعلاج لأنك تانى مش ح تمشى لمستشفى حكومى علشان يقالوا ليك هات قطن وشاش وميكروكروم وصبغة يود ولصقات وحقن فاضية وحقن (مليانه) وكيس دم بعد ما تقطع ليك تذكرة بسته ألف من شباك العلاج المجانى ....
وح تنوم إنت والأولاد تانى على سراير نضيفه عليها مراتب (معتبره) مش ذى (المراتب) (الملبكة) العملت ليك (وجع ضهر) دى .. وح تحلم عليها أحلام نضيفه مش ذى الأحلام المرعبه القاعد كنت تحلم بيها دى .. أبسط يا عم وإتمطى فى السرير الوثير ده وإتغطى من البرد الشديد بالبطانية (الصوف إنجليزى) دى وغمض عينيك ..أيواا غمض عينيك .. ايه ... انت نمت اصحى يا عم ... اصحى ... الباب قاعد يدق .. ناس (النفايات) جاينك ومعاهم (البوليس) عشان ليك 4 شهور ما دفعت .
|
|
 
|
|
|
|
|
|
|
|
Re: ساخر سبيل : إتخيل معايا !! (Re: الفاتح يوسف جبرا)
|
| Quote: إنت تانى مش ح تمشى كل (يوم جمعه) الصباح لفوزى (الجزار) علشان تشترى منو (ربع الكيلو) البقرى (المجلفط) ده إنت ح تاكل (بتلو) و(عجالى لبن) و(فلتو) إنت لو مشيت تانى لفوزى الجزار ح تشرط عين اللى خلفونا شفت ليك مسئول يشترى من ذى لحمت فوزى المجلفطه دى ؟ |
يالفاتح الزول ده ساكن سوق الشجره?...
كان كدى اعمل حسابك ناس فوزى ديل تانى ربع الكيلوالمجلفط ما حيبعوا ليك?اعمل إشتراك مع بتاع الفول لوجبتين غيرالبوش...
تحياتى العطره
| |
|
|
|
|
|
|
|
|
|
Re: ساخر سبيل : إتخيل معايا !! (Re: الفاتح يوسف جبرا)
|
Quote: يالفاتح الزول ده ساكن سوق الشجره?...
|
كمان يا محمد مكى ياخوى شن جاب (لحمت) (جزارات) نمرة 2 والمنشية والرياض (الحديثه) مع (لحمت ناس فوزى وعباس !!) ... وكرشة (برعى) و(كوارع كورينا) وشخت (التوم) و(طايوق تندل) !!
| |
|
|
|
|
|
|
|
|
|
Re: ساخر سبيل : إتخيل معايا !! (Re: الفاتح يوسف جبرا)
|
والاجازات .....اهم شئ..تزاكر السفر جاهزة ومافي زول سألك من الخدمة الوطنية ورسوم الاستيفاء ( الاسم الحركي للتأشيرة بعدلغاها الرئيس)وطبعا رسوم المغادرة مدفوعة ما تشيل همها والمغادرة طبعا عن طريق VIP (ماتنسى انك مسئول )الحافلة توديك لغاية الطيارة وكراسيك انت والاولاد في الدرجة الاولى ما تمشي تكابس مع مع ناس السياحية ولامن ترجع بالسلامة الحافلة منتظراك جنب الطيارة والكامري جنب الصالة وحمدالله على السلامة ما تنسى الخروف جاهز للكرامة والتهنئة في الجرايد على سلامة الوصول على حساب صندوق العاملين عشان وزير المالية مانع المجاملات علي حساب الدولة
تحياتي وودي لك اخي جبراناصر احمد المصطفى
| |
|
|
|
|
|
|
|
|
|
Re: ساخر سبيل : إتخيل معايا !! (Re: الفاتح يوسف جبرا)
|
Quote: بالتبادي يا اخوي النسعلك الزول لو ما دفع حق النفايات في الاخر بيعملوا لية شنو الموضوع بيصل السجن وكدة ولا فيها تسويات.
|
يا الزبير ياخوى (محكمة النفايات) دى المحكمة الوحيده الفى العالم البتحكم لصالح طرف واحد وما مستعده تسمع الطرف التانى !! شفت العدل ده كيف؟ ولو ما دفعت تتسجن ذيك وذى أى (حرامى) غلبان ..(طبعا الحرامية الما غلبانين ما بتسجنو وكده) !!
| |
|
|
|
|
|
|
| |
الفاتح يوسف جبرا
abubakr
اسعد الريفى
محمد مكى محمد
محمد أبوالعزائم أبوالريش
Nasir Ahmed Elmustafa
الزبير صالح الزبير
فيس بوك
تويتر
انستقرام
يوتيوب
بنتيريست