|
|
|
 Re: شدرة حنّة.. (Re: تماضر الخنساء حمزه)
|
كل الحِتت ..موجوعة في وطن الحواس
وكل فريق من مشاعرنا الحنينة ..
غَشّيتو همي الليهو داس..
لو تجي في وكتك..
كنتا عرفت حلاوة الشوف
كنتا عرفت إنو الجاي في وكتك ..مابعرف خوف
شاور بس إحساسك..بي حريتك..الناشرة مساحة ومابتضر إحساس الزول الغيرك
وشيل الضي..إن درتا تعيش أمسيتك..وخلّي القمرة ..تضوي..تضوّي الكون..ماالكل هو شريكك
في دنيا.. مقسوم الرزق فيها ..إلا الشين..بيكوّش خيرك
وإنتا الزين ...صدقني ..سماحتك دون الناس مابتضيرك .
مامني..
كان الوكت غمام..
لابس لبساً أشتر
كان الساعةتلاوز
دار تتأخر وما تتأخر
والجية ..تتاوق ..
راجية الزول الأسمر ..
ياسيدي تعال ..سيب السبب الفاتر
من غير ماتقول وإراودك خاطر:
(لو كان النيل ..إتمطّى شوية ..
كانت غرقت فيهو بنية..)
ياخي إتدفّق ..خلّي الوهم الساكن حِسّك إغادر
شايفة السمع الجايِّ إتاوق عِنية
وشايفة الرادي الحاضن غنية
غلبك ترسم ؟؟
تعال يازول أنا عندي دواية
شيلا هديك طرف المخلاية
مابين الريد والجنبو محاية
منتظرنك..
وهمَّكــ سيبو أصلو معايا
يازول أقيف ..
أنا ذي غمام شايلو الغرام البشبهك
محتار ..أفتش لي مكان..كان صدفة إطلع حتتك
لاني ببخل بي خريف كان سيدو جاري وبندهك
ولاني بفتعل المواسم..ولان أسبّب محنتك
لكني بشتاقك أكيد..
صدقني بشتاقك دوام..
وأشتاق ألامس قمتك
حسيتك فيني الغيمة المابية نزولا
صارّي المطرة في قولة ( برضي بريدك )
ومابي تقولا
شايل الحِس الصادق ..
وراسم في جوّاكا ضباب الفكرة
ليه بتقاوم فيكا مواسم
تهوى ..وتعشق ..لون الخضرة
ليه تاعبني ؟؟ وخالّي جفافك
فيني يحنّس ريحة المطرة
يمكن..ذنبي إني هويتك..
وشلتك بين شرياني ولون السمرة
وعشتك ..في دنيايا قدر مكتوب
وإترقيتك..
وإتحسستك ..
وإنتا منابع الفطرة
أنا صارحتك..إني عشقتك
وكم وطّيت بي قولي الجمرة
إلا بريدك ولسه بقولا..
وبيها بعيش لو ترضى الحسرة
وبفرح بيها كتير ..رغم إنك
داسي شعورك..فاقد القدرة
تبقى الزول..الشايل إحساسو
وعارف الروح جوّاهو بتقرا
صدقو ..وكيف الريد..لو عاشو
تسجد ..تحت أحلامو القمرة
برضي سمعتك..
وإنتا بتنده قلبي حِداك
ولمّا لقيتك..
شلتا إحساسي وجيتك..
وإترجيتك..
وإتأخرتا..
قلتا مكاني ..هوّ نساك!
| |
 
|
|
|
|
|
|
|
|
Re: شدرة حنّة.. (Re: تماضر الخنساء حمزه)
|
اختي تماضر
تحياتي
Quote: مابنسدل بعدك ستار..
أصلو بُعدك ..مرهون علي جية مواعيدك زمان
صحيح احساسي بيك..ساكن الروح..والعصب
لكن..بخاف عليك..مِنِّي..لو..بيجيك تعب
بشوييييش..بوصِّلك حد الغيوم.وبكلِّم المطرة توصِّي ليك ريحة الدعاش.
يازول يا باش
قصة ريدك عندي حقيقة وماهي خرافة
قصة زولاً شال الريد جوّاهو فراش
زار الحِلة ودرب البيت البعضك سافر منّو..وبعضك قاعد فيهو وعاش.. |
كلمات رائعه تصلح ان تحفظ علي ظهر قلب
وتحياتي
| |
|
|
|
|
|
|
|
|
|
Re: شدرة حنّة.. (Re: soma)
|
العوض يسعد مساك
شكراً على الطلّة الحلوة..
مدثَّر مرحبتين ..كل الود...
سوما الحنينة ليك ذي شوقك وأكتر
مودتي.
| |
|
|
|
|
|
|
|
|
|
Re: شدرة حنّة.. (Re: محمد عثمان)
|
Quote: رسمت خطاويها المعاك
هانت مشاويري .. إنتشت
قرَّبت منّك كتير ..
خلاس ..
حدودك .. لامست |
قالت حبوبة العجوز .. أم كلاماً يجوز :
البنيّات أخذتهن النشوة بجريرتها ..
فتغنين على رملٍ بحر , و يحجلن " الغُمّيضة " :
( وصلنا .. ؟ شدر الحنة ..
وصلنا ؟ .. شدر الحنة ..
وصلنا ؟ .. شدر الحنة ) ..
عالقٌ غناءهن في عروة الهواء ما يزال ..
و الحنة لا يني شدرها مخضبٌ بنان الذاكرة .
شكراً خناس على المتعة .
| |
|
|
|
|
|
|
|
|
|
Re: شدرة حنّة.. (Re: Emad Abdulla)
|
عماد السمح
شدر الحنّة ميس..وبيت وريحة حبوبة وذكريات حميمة شديد
ماشفت حبوبة مهتمة بي شئ قدر النخيل..وشدر الحنّة
أتذكر الصفق..وكتين تلمو..وتنشفو..وتطحنو..وتبلو..ويستقر في أجمل شعر
تخليو كده يضاهي شفق المغيب..يقول ليو قوم روح بعيد أنا لوني أصفى
شكراً عليكــ انت ده
| |
|
|
|
|
|
|
|
|
|
Re: شدرة حنّة.. (Re: Alsa7afa_30)
|
[كل الحِتت ..موجوعة في وطن الحواس
وكل فريق من مشاعرنا الحنينة ..
غَشّيتو همي الليهو داس..
لو تجي في وكتك..
كنتا عرفت حلاوة الشوف
كنتا عرفت إنو الجاي في وكتك ..مابعرف خوف
شاور بس إحساسك..بي حريتك..الناشرة مساحة ومابتضر إحساس الزول الغيرك
وشيل الضي..إن درتا تعيش أمسيتك..وخلّي القمرة ..تضوي..تضوّي الكون..ماالكل هو شريكك
في دنيا.. مقسوم الرزق فيها ..إلا الشين..بيكوّش خيرك
وإنتا الزين ...صدقني ..سماحتك دون الناس مابتضيرك ].
وأنا أستظل بفيء هذا الوريف أقول :
ستة وثلاثون عاما أجوب مدن الشعر مثل غجري بلا قيثارة، عابر سبيل بلا زاد أو دليل، حالم دونما متكأ يُسقط عليه رأسه المثقل بالأحلام والأوهام علّه يكمل بعض رؤيا، أو كموسى خارجا منها يترقب، ستة وثلاثون عاما وما من شعيب يؤويني أو يقرضني بعض مأوى.
أهي الخطيئة الأولى خطيئة تعاطي الشعر؟ إذا أنا غارق فيها إلى أذني أو أكثر كثيرا، حتى إذا ما مددت يداي متضرعا لم يبن منهما شيئاإلا مثل هذا الدفق الجميل يا أخية..أبحرت في الغوص حتى القعر، ها أنا الامس القعر، جماً ليس هشا تماما كذاكرتي فأستعيد من بوحكم بعض منها ، فتفتحت حباته تحت أقدامي لتحفر لي مثوى أخيرا بعدما تلفظتني مدن الشعر تارة...ثم تعيدني اليها جنيات من عبقر يترنمن من مدن أخرى بدفق جميل.. فيقلن عد أيها الغريب.. تحياتي
| |
|
|
|
|
|
|
|
|
|
Re: شدرة حنّة.. (Re: salma subhi)
|
الصحافة صباحك ورد المداخلات الفاضية دي قصتا شنو..غايتو أنا بملاها براي
أبوبكر..شكراً على الكلمات الحلوة دي مع الصباح
سلمى..دايما بيزورنا نسيمك..
كل الود
| |
|
|
|
|
|
|
|
|
|
Re: شدرة حنّة.. (Re: ابو جهينة)
|
سلامات أبو جهينة..
| Quote: خطوتين مموسقتين في لون حنة ما قبل مرحلة السواد .. |
خلاس تبقى الجيّة لون السواد في الحنة
| |
|
|
|
|
|
|
|
|
|
Re: شدرة حنّة.. (Re: تماضر الخنساء حمزه)
|
شوقى الحذِر
يا مقتدر بالإقتدار
ألهمنى غايات الصبر والإحتمال
أنا ما عزمّتِك
شان تخربشى
فى جِــدار الروح نهار
انا قلت ليك
ياقوس بيشرب فى المطر
يا أيما زخات إذا هتنْ الشــعر
قَدَر الضلام
يتوسد العتمه الشهيق
والمافى فى صدرا لسما
نجمي ال...تــمردْ فى الأفول
مالك بقيتى على عديل
حننْــتي غُصن الحنه
غوصتي المهام
بربحتي افراح الشِــدر
من أي أشواق للخدار
الفوضى لبستى أنْتهت
انا ما نصيح
لو عيني عينك
منهزم
مكسوف
وراضى الإحتلال
| |
|
|
|
|
|
|
|
|
|
Re: شدرة حنّة.. (Re: عبدالله داش)
|
شوقي ليك..كاسرني ..سيلو..وماحذِر..
ماوِقِِف ..حد الجروف..
لا وقّفت..موجو ..السدود
لاصبر جاب غاياتنا منّو..لاقُدرة فيهو بتنقدِر.
عدل منّك؟؟
إحنا نسهر ليلنا كلّو..
وشوقنا ليلو ..ينوم في حضنك؟
عدل برضك..إنّو منك..
كل حكاياتنا الحزينة..وفرحك انتا حكايتو نحنا
فيهو أفراحي..البِجنّكــــ
عدل برضك..عدل منك؟؟
يلا أحكم..وعارفة حكمك..من بدايتو ..ليّ ظالم.
| |
|
|
|
|
|
|
|
|
|
Re: شدرة حنّة.. (Re: تماضر الخنساء حمزه)
|
ســامع وحِــيحِك شــقْ جنح الليل
وجــلجـلْ فى السكون
هبش العصب لامس ضــباب الرؤيـه
فى الحــال البهــيم
يا حــسرة الآهــات وأنــات الصهيل
أســـفى العميق
تبقى المساحات للشجون
أوسَـــع خــيال ... يحلم يفـيق
على سـقيا ما فـتأت على غسل العطش
أنا إحــتكمت على إحــتمالات ما يكون
حاصل نتاج حزنى القديم
كل الإنـاث بـارود ســريع الإشــتعال
يا واحده فينى تْحــكّرت ما بتنهــبش
والسقا كيف تقدرعلى غسل العطش
ما فـــكّرت ... !!
أنا كائن الليل الحزين ..؟!
وبدت شــرخ فى الروح جريح
حال المعادله بالصريح
الســاحه ما ( متكافآ )
من جهة القتال
| |
|
|
|
|
|
|
|
|
|
Re: شدرة حنّة.. (Re: عبدالله داش)
|
أصلو لو عشقك جناية..
معترف ..وحالي بغنيك عن دلايل..
أصلو..زيّك..معترف..
وانتا زيّك...مافي منو..ولو قلايل
يامُنتهى...الأحكام..لو أبقى مكتولك..عمَد..
أو مسجون هواكــ...وشيلو من عمري..الأبَد..
والفات ..خليو حِداكـــ..سمّيهو لو ينفع..مدَد.
وأيه فضل..منِّي بعد الإشتعال؟؟
غير قليب..بين إيديك..مصيرو في كف إحتمال..
ياطرح..حزنك عليو...ومن حنينك..برضو..شال..
ياكمان..
وهنت..إيديك..
ومن بين أصابعك..حالو..مال.
| |
|
|
|
|
|
|
|
|
|
Re: شدرة حنّة.. (Re: تماضر الخنساء حمزه)
|
من أين يتم البدء في ضوءِ هذا المطر الروحي الذي يدندن بأنغام السماح،
وما المقطع الذي بمقدوري اقتباسه لتبيان غبطتي بهذا التمرد الروحي المسترسل دونما سقوط في مطبات غير المستساغ من تكرارٍ وترهلٍ
صدقاً
أغبطك على هكذا روح وخلق
سلمتِ
| |
|
|
|
|
|
|
| |
wd al geran
العوض المسلمي
Emad Abdulla
Alsa7afa_30
salma subhi
ابو جهينة
بله محمد الفاضل
فيس بوك
تويتر
انستقرام
يوتيوب
بنتيريست