|
|
 فقدت الذاكرة في السودان / هاشم أحمد خلف الله
|
فقدت الذاكرة في السودان
بقيت تائه بدون عنوان
وفي السودان بتبقي غريب
تشوف الناس عِلب الوان
فقد الذاكرة حقيقة تحير الإنسان
وفي السودان قدر محتوم
وخط مرسوم
وفي واقع حياتنا لزوم
وفي السودان تكابس انتا طول يومك
تساسق لرزق يومك
تنوم تصحي بهموك
ومهما حلمت في يومك
تكون هاني ورزقك زي مطر دافر
وبيتك بألاكل وافر !!
وأطفالك وست بيتك يناموا معاك في حضنك
يداعبوا بحنان شنبك
ويطلعوا ليك في ضهرك
ويتشابوا ويقولوا ليك
بابا هسع نحنا ما قدرك
وسيارتك ملانة بضاعة تتكدس
وصالونك كبير واسع
وبضيفانو يتمدد
وأعمالك كتيرة خلاص
وربحك منو تتبسم
وفجاءة وفي وسط حلمك يدق الباب
ويقولوا ليك في ناس في البيت راجنك
الجزار ... واللبان ... وصاحب الإيجار
وتمرق إنتا من بيتك زي أسد كاسر
لا خائق من صاحب إيجار ولا بُمبان
وتنهر بخشم مليان
اصِبروا شوية يا الحبان
باكر بيفرجا الرحمن
وتمشي عديل علي شغلك
تشاكل في جميع الناس
واللهِ معاك ما فرقت
لا ولداً صغير شافع معاك بيسلم
ولا راجل كبير شايب تقولوا يا عم
ولا بتعرف مُقبل وين !!
ولا بتعرف ترمش العين !!
وتركب إنتا في الحافلة معاك همك
معاك في الحافلة اصناف من جميع الناس
ناساً ... تبكي مغبونة
ناساً ... تحكي في همومة
ناساً ... بالحسرة ممكونة
ويوم ما تمشي للإعراس
تقول واللهِ أسعد ناس
تقول واللهِ محظوظين
رقيص ... وهجيج
موضات كيف ؟؟
ومكياج كيف ؟؟
وجه ابيض شعر أشقر ساق أخضر
ولو في لحظة غمضتا ! تقول دا حِلم
أظني اكون سافرت للبنان !!
وفي السودان ناس لا ضاقت المُرة
ولا زازت فردِ مرة
ولا بتعرف كمان تعرق
ولا بتعرف تصٌر الوش
يشيلو قروش من السودان
يوزعوا فيها في كل مكان
لا بيهتموا للتعبان ولا المرضان
ولا العائش دوام فقران
يحكموا الناس بإسم الدين
يقولوا للعلم تامين!!
ايه وفرتو للغائبين !!
شفطتو دمانا يا باردين
قلعتو حقوقنا حُمرة عين
بدون خدمات بدون تامين
سألت الواحد القهار
الأ نام ولا أكل الطعام
يدوقكم من عذابو كيمان كيمان
يشرد كل زول طغيان
ويعرف كيف نحنا بنعاني بعيد عن الاوطان !!
ويا واحد ويا رحمن تعود الفرحة للسودان
فقدت الذاكرة يا الحبان
بقيت في السكة اتلفت
شارع بيتنا اصبح وين ؟؟
وناس الحلة الكٌتار ومساخ وين قاعدين ؟؟
لا صبحية بيستنوا
ولا ضهرية بيهتموا
ولا عصرية بيتلموا
وفي الأسواق حاجة تحرق الأعصاب
لا تاجر معاك بصِدق وكل تجارتو بالشيكات
وفي بيتك تقول تتلم وما بتسلم
وكهربتك تشفط الدم
جـمـرة خبيثة سموها
وتدفع فيها دم قلبك
وما تفرح تقول كهربتي تضؤي البيت
وحات إسم الله تتبشتن وتشم الدم
وتلاجتك كمان تخرب !!
وتلفازك كمان يحرق !!
|
|
 
|
|
|
|
Ridhaa
فيس بوك
تويتر
انستقرام
يوتيوب
بنتيريست