كتب الكاتب الفاتح جبرا المتوفرة بمعرض الدوحة
|
|
 *** مبدعنا الفنان عبد الله البعيو تجرع الأمرين ومن سودانيين وفى الغربة وااااااااا عجبى يا بلدى!
|
شىء مؤسف جدا السمعتو اليوم من اخونا عبدالله البعيو
يعلم الله عبراتو فى حلقو المجروح وصوتو المبحوح
وقلبو معصور الم ونازف دم وهو يحكى بمرارة الشىء المؤسف الاتعرض ليه..
لمتين نحن كل يوم نتنكر لعاداتنا وتقاليدنا
ونتقهقهر للخلف الاف الخطوات ونتنكر لود البلد الحنين
نتغير حسب طقس الغربة الجاف نخلع جبة دراويشناالمعتقةبالجود
والكرم الجينا بيها من اهلنا
ونلبس عباءة الخداع والغش ..
حا احكى ليكم الرواية كاملة على لسان حال اخونا البعيو
الذى طلب تحمل المسؤلية كاملة
ولو دعى الامر سوف يروى ما حدث لاجهزة الاعلام واتحاد الفانيين فى السودان
وذلك ليكون عبره لبقية الاخوة والاخوات ما يقعوا فى مطب زى ده
يحكى البعيو بحرقة
انه مسؤلين من الجالية بصلالة هم المسؤولين
اتصلوا به فى السودان وتم التنسيق على انه يتم استقبالهم فى فندق
هو والعازفين الاتنين المصاحبين له وكل واحد له مبلغ 500 دولار
حضر العازفين قبل البعيو لصلالةالتى لم يزوروها من قبل ..
وبدت الماسأة
لم يكن بانتظارهم احد .. اتصلوا باحد المعارف اصطحبهم للفندق التعيس
حضر البعيو الليلة التانية مساء ونفس الحال لم يستقبلة احد
اتصل باحد الاخوة الكرام لحسن الصدف كان موجود بصلالة
وهو الاخ الكريم الزين ابو نائب
اوصله للفندق ليجد ابنه العازف والاخ العازف الاخر
على لحم بطنهم من لحظة وصولهم البلد اى من ليلة امس
حلف البعيو بالله ثلاثة انه المشهد الشافوا يفرط القلب نصين
لقى الجماعه قاعدين فى الفندق مافى زول عبرهم من وقتها
عندهم باقى فتات أرز من باقى عشاء ليلة امس
خاتينو فى موية البانيو عشان يدفا شويه ويقدروا يسدو بيه جوعهم
تخيلوا المشهد ؟؟؟
حقيقى شىء مؤسف ومؤلم ومنو المسؤول من المهزلة دى ؟
وليه تحصل فى بلد فيه كل سبل الراحة ومافى شىء قاسى ولا صعب ..
على الاقل يدوهم حقهم .ما طلبوا اكتر من كده ؟
وين الكرم والشهامه وين طباعنا الاصيلة السمحه .. والله لو قعدوهم
مع عزابة ما كان حصل ليهم الحصل .. هم 3 ما 300 لو كل زول
جاب ليهم صحن فول ما كان ستروا حالهم ؟؟ لكن ال الله فاضحو بنفضح
وصدق القال السترة والفضيحه متباريات
تحمل الموقف ده البعيو واتصل بافراد الجاليه يشكى لهم سوء المعاملة
حضر له 3 منهم وبدل يعتذروا ويعوضوهم الفات
ادوهم محاضرة فى القيم السودانية والكرم
ونحن ونحن وما بنخليكم و و و الخ
وفى النهاية اتوقع يدقوا صدرهم ويسوقوهم بره ولا يجيبوا ليهم عشاء
طلعوا ودخلوا شايلين ليهم 10 ريال عمانى اقل من 30 دولار ليهم التلاته
سكت البعيو ولاك مغصتو ووجعتو المره ..
وقال سمحه السترة نحن فى بلاد غريبه وما حنخذلهم ..
لانه الحفل فيه اجانب ولازم واجهة السودان تكون مشرقة
قدم 3 عروض و بعدها طلب منهم مسؤل الفندق مغادرته
على فكره كل الوجبات على حسابهم فى الفندق حتى الشاى
لانه الفندق رفض تحمل نفقات الاكل لانه حسب كلام الجالية
انه نزولهم فى الفندق جاييهم هدية يعنى بالبلدى ملح
بعد نهاية الحفلات تم خصم كل شىء حتى التذاكر والفندق الملح
من المبلغ المتفق عليه ..ودى كانت الضربة القويه فى الضهر ..
وكان حصادهم مبلغ 120 ريال قيمة
تذاكر بالجو من صلالة لمسقط فقط
اضطروا للوصول لمسقط برا لتوفير قيمة التذكره
لانه الباص ليهم ال 3 بى 22 ريال وما تبقى يصلوا بيه اهلهم مستورين
وصل البعيو مسقط ممغووووووص
طلبوا منه الاخوة اقامة حفل بالنادى السودانى ليستفيد قليلا على الاقل
ولكنه حلف .. غادرت فرقته صباح اليوم وهو متوجه غدا لقاهرة المعز ..
منو المسؤول عن المهزلة دى ؟ الجالية ام السفارة ..
البعيو بصراحه اتهان اهانة ما ساهلة .. واهانة فنان من بلدنا
دى اهانة للفن السودانى عموما
امسحا لينا فى وشنا ياباوالله ما تستاهل
|
|
 
|
|
|
|
|
|
|
|
Re: *** مبدعنا الفنان عبد الله البعيو تجرع الأمرين ومن سودانيين وفى الغربة وااااااااا عجبى يا ب (Re: أبووجيدة)
|
العزيزة سوما
تحياتي
هذا هو جزاء مبدعي بلادي
من قبل
حدث ذلك للمبد الاستاذ الموسيقار محمد الامين هنا في جدة
حيث اتى وفرقته لاقامة حفل هنا قبل سنوات قليلة
وبعد ان وصل
لم يستطيع منظم الحفل من بيع التذاكر نسبه لأسعارها العالية
ولم يقم الحفل
يعني الحفلة طرشقت
فترك جدة وهرب من الاستاذ محمد الامين وفرقته المكونة من 10 عازفين
ولولا تدخل الاجاويد والخصومات على تكلفة الاقامة في الشقق المفروشة التي وصلت الى ما ياقارب 10 الف دولار لكان ان حدثت كارثة
ولكن حكمة الاستاذ الموسيقار وحسن تصرفه في هذه الظروف هي التي حلت المشكلة ورجعت الفرقة بسلام لأرض الوطن
المطلوب من مبدعينا وخاصة الفنانين ان يتأكدوا جيدا من الجهات المنظمة للحفل وعمل عقودات قانونية تثبت حقوق وواجبات كل طرف حتى لا يضيع الحق بين اخوي واخوك
يعني لو البعيو ده خسر ليهو مليون جنيه ودفعها لمحامي شاطر وعمل عقد قانوني مع منظمي هذه الحفلة ما كان ده كله حصل ليهو
بالمناسبة معروف عن الشاعر نزار قباني انه كان لا يترك حقوقه المالية لدى أي فنان مهما كان اسمه بل كان ياخذ حقه على داير مليم
تحياتي يا سوما
| |
|
|
|
|
|
|
|
|
|
Re: *** مبدعنا الفنان عبد الله البعيو تجرع الأمرين ومن سودانيين وفى الغربة وااااااااا عجبى يا ب (Re: عاطف عمر)
|
الاهل الطيبين حبابكم يا سمحين
يعلم الله كتير بردتو البطن من الوجع الشين
اخونا البعيو بشكركم من الاعماق وبقول ليكم
شاهدالله خففتوا على كتير
ومتاكد تماما انه الاصابع ما زى بعض واولاد البلد الكرام
قاعدين وموجودين والفئه النشاز الله يهديهم
الاخ كمال كرار كتر الف خيرك على المرور يا ملك
وبالله شفت كيف يا كمال يا خوى
صدقت حقيقى انه ديل ماهم اولاد بلد ولا اولاد ناس ابداا
تسلم ياكمال وشكرا لمرورك
***
ابو وجيدة الشاعر الفذ
كلامك لامس وتر حساس
ابكى مطربنا دمعا حارقارغم انه بحاول يضارى
وبقول ليك الله يجبر بى خاطرك
وده حظى رمانى فى ناس زى ديل وحسبى الله ونعم الوكيل
***
الحنين جمال السنوسى
طلتك بردت الجوف الحار
اتالمت جدا للحصل لاستاذنا الموسيقار ود الامين
بقدرما اتألمت لاخونا البعيو الببلع فى العبرات لى هسه
كتر الف خيرك يا جمال يا مرهف
ويا ريت تهدينا نص للفنان البعيو
كلمتو عنك كتير وبقول ليك حبابك وحباب فنك يا راقى
***
الاخ العزيز عاطف عبد الله سعيده بطلتك رغم تعاسة الموقف
والمه لكن والله يا اخ عاطف انا الكتبت الكلام ده وعلى لسان
الفنان عبد الله البعيو ما كنت مصدقة
لو ما التفاصيل الدقيقه الحكاها وبحكوا فيها الناس المعاه
شكرا اخى عاطف على ثقتك البعتز بيها فى كل الاماكن
وشكرا للجميع من اخوكم عبد الله البعيو
| |
|
|
|
|
|
|
|
|
|
Re: *** مبدعنا الفنان عبد الله البعيو تجرع الأمرين ومن سودانيين وفى الغربة وااااااااا عجبى يا ب (Re: soma)
|
تشكر اخت سوما حقيقة شئ مؤسف جدا ..حتي لوحدث لمواطن عادي
ده تصرف لا اخلاقي وغير مقبول علي الاطلاق ..الرجل علم وقامه في وطنه
وله محبيه ومعجبيه والله عيب وعيب كبير ...
( لانه الحفل فيه اجانب ولازم واجهة السودان تكون مشرقة)
ده كلام لا يودي ولا يجيب لوكنت محله لغادرت فورا ولا يستحقوا اكثر من ذلك
وايه دخل السودان في ارتباط فنان بليلة ساهره لجاليته او اهله؟؟
السلوكيات دي ظهرت كتير في بلاد الغربه والسودانيين اصبحوا ما هم السودانيين
الا اللهم قلة
انا اتأسف لهذا التصرف الغير مسؤل واللا اخلاقي ..وهذا لا يغير من قيمة
الفنان عبدالله البعيو له التحيه والتجله
| |
|
|
|
|
|
|
|
|
|
Re: *** مبدعنا الفنان عبد الله البعيو تجرع الأمرين ومن سودانيين وفى الغربة وااااااااا عجبى يا ب (Re: عماد شمت)
|
الاخت / سوما
صباح الخير
| Quote: لانه الحفل فيه اجانب ولازم واجهة السودان تكون مشرقة) |
والله يااخوانا انا الكلام الخائب ده ماقاعد اقتنع بيه مافي حاجة اسمه اجانب وواجهة مشرقة ... البعيو ده قبل ده جاء الدوحة وسافر كتير جدا في رحلات فنية وشاف وسمع عن المقالب القاعدة تتعمل في البعثات الفنية عشان كده مش البعيو بس.... مفروض اي فنان سوداني يحترم نفسه ومايتحرك من الخرطوم الا بعد ما يعمل عقد ويوثقه ويستلم المقدم بتاعه بعد داك يسافر .
التحايا للفنان البعيو والجاتك في مالك سامحتك .
هارون دياب
| |
|
|
|
|
|
|
|
|
|
Re: *** مبدعنا الفنان عبد الله البعيو تجرع الأمرين ومن سودانيين وفى الغربة وااااااااا عجبى يا ب (Re: اسعد الريفى)
|
الاخ عماد شمت سلمت وسلم رايك السديد
والله ده نفس الكلام القالوه ليه الاخوان هنا
منهم زوجى ..قال ليه اصلا ما كنت تورط نفسك كنت تحرجهم عيانا بيانا
وتخليهم يشربوا مقلبهم براهم لانه اثبتوا ما عندهم أى ضمير
لك التحية منى ومن الفنان عبدالله البعيو
بقول ليك شكرا يا شمت يا دوب شميت العافية بعد ردك لى وعرفت
فى ناس ممكن تشيل معاى همى الخف ثقله كثيرا
***
العزيز ترهاقا حبابك يا ود العم
حقيقى اسعدنى مرورك واسعد اخونا البعيو
عارف يا ترهاقا يا خوى اول كلمه قلتها ليه
انت ليه ما اتفقت معاهم من هناك بى عقد
قال لى والله انا شدة ما مرتب لو ماشى الجنيد
برتب نفسى وبعرف روحى نازل مع منو
لكن ما اتخيلت فى بلد الغربه اتبهدل كده
وبقول ليك اخونا البعيو كتر الف خيرك والعترة بتصلح المشى
لكن دى ما عترة قال ليك دى وقعه(( تنكرش)
بضم التاء فى الواطه على قدومى لوووول
***
اخى اسعد الريفى
حبابك معانا شكرا على المرور والمؤازرة
تسلم كتير يا ود البلد
الاخ البعيو طبعا متابع البوست ده
وبتمنى يسمع راى كل قارى هنا فى سودانيز اون لاين
وبقول ليك شكرا يا اسعد وحقيقى صدقت فى كلامك
عشان كده عشمانيين فى انه فعلا الاتغيروا كتيرين
لكن الخير والبركه لسه فى
والحمد لله انه فى ناس لسه زيكم
شكرا اخوى اسعد اوفيت وكفيت
ولك التحيه مخلصه من اخونا البعيو
| |
|
|
|
|
|
|
|
|
|
Re: *** مبدعنا الفنان عبد الله البعيو تجرع الأمرين ومن سودانيين وفى الغربة وااااااااا عجبى يا ب (Re: soma)
|
الغالية سوما.
سلامات ياعزيزيتي.
أول مرة أشوفك زعلانة من زمن ناس أبو عتيق.
الشئ الذي حدث للفنان الكبير عبد الله البعيو شئ مؤسف جدا, وعلى الجالية السودانية أو متعهد الحفلة بتلك المنطقة الوفاء بما ألتزموا به تجاه الفنان والعازفين, وقبل كل ذلك يجب عليهم تقديم أعتزار للفنان البعيو وللعازفين. يجب أن لا نستهين ونحقر ونخدع بالمبدعين بهذا الطريقة المزلة. ورسالتي للفنان البعيو ولبقية الفنانين السودانين هي يجب عليهم توقيع عقد مفصل عن كل مشاراكاتهم في الخارج بواسطة السفارات والسودانية والسلطات المحلية بتلك البلاد وذلك للحفاظ على حقوقهم المادية والفنية الادبية. قصة نحنا سودانين ولازم نثق في بعض لم تعد تجدي.
دينق.
| |
|
|
|
|
|
|
|
|
|
Re: *** مبدعنا الفنان عبد الله البعيو تجرع الأمرين ومن سودانيين وفى الغربة وااااااااا عجبى يا ب (Re: soma)
|
الاخت/سوما
سلامات
هذا الفنان الجميل الذى التقيناه فى القاهره وصحبنا فى عدد من الجلسات مع الكثير من الاخوه البورداب او اذا صح التعبير فى مقر حزب الجمال بالقاهره
هذا الرجل قد ابهرنا بادله وظرفه وعمق فهمع للفن ودوره فى المجتمع حتى ان الصحيفيين المصريين الذى كانوا يجالسونا استمتعوا بحديثع وعمق فكره عن الفن ودوره فى المجتمع
من المؤسف حقا ان يتعرض لموقف هكذا ونحن علمنا منه انه متوجه لعمان لتلبية دعوه وبعدها يرد عا\دا الى القاهره
السؤال الذى يفرض نفيه هل خلت هذه العمان من رجل سودانى اصيل يلم هذا الذى حدث؟؟
وعمان معروف ان بها عدد كبير من السودانيين لا اقول السفاره لانه المعلوم ان سفارتنا فى الخارج وخصوصا مستشاريه الثقافيون لايهتمون الا لشخص ذو قربه او علاقه حميمه او ذو نفوذ او جاه
حقا الامر مؤسف وتقف الحروف عاجزه امامه
والبعيو لايستحق عذا لكن نحن بلد اعتادت قتل مواهبها او تشريدها عل دخل ايضا شعبنا فلاى هذا الامر الغير اخلاقى كل دول العالم تحتفى بمبدعيها الا نحن
| |
|
|
|
|
|
|
|
|
|
Re: *** مبدعنا الفنان عبد الله البعيو تجرع الأمرين ومن سودانيين وفى الغربة وااااااااا عجبى يا ب (Re: soma)
|
مع احترامي التام للاستاذ البعيو
ومع استهجاني الكامل لهذا التصرف اللاسوداني من اولئك النفر
ألا ان السؤال البديهي..
كيف يسافر الفنان البعيو لبلد ماوهو لا يملك قيمة وجبة عشاء؟؟
لان السفر لدولة لا تعرفها تبعد مئات الاميال معتمدا علي الطيبة والكرم السوداني من غير ان تضع فى جيبك بعد الدريهمات التي يقمن صلبك هو ضرب من الجنون..
يعني يمكن أزعل مع البعيو من الذين تعاقدوا معه واخلو ببعض او كل شروط التعاقد الشفهي خاصة في كيفية توزيع عائد الحفلات .. ولكن تلك الحالة التي وجد فيها الفنان البعيو عازفيه تحسب عليه وليس لسوداني صلالة
شمس الدين السنوسي
| |
|
|
|
|
|
|
|
|
|
Re: *** مبدعنا الفنان عبد الله البعيو تجرع الأمرين ومن سودانيين وفى الغربة وااااااااا عجبى يا ب (Re: د.محمد حسن)
|
د/ محمد حسن حبابك يا ضى بيوتنا
طلتك سمحه انت عارفها براك من غير نقول ليك
والله يا محمد يا خوى اسئلتك دى كلها فى محلها
وانا معاك بسأل ..بس منو البجاوب لينا
لكن فى حالة اخونا البعيو الجهة المعنية دى
هى معترف بيها من السفارة وجهاز المغتربين فى السودان
اها شنو ليك.. والدليل على كده هم البمثلوامنطقتهم
لو دعت الضرورة ..ان رضيت ام ابيت وده قانون معترف بيه
والله غالب
تحية بحجم الوطن لك اخى د/ محمد من الفنان البعيو
صاحب الظل الخفيف وبقول ليك يا محمد يا خوى
(دى الظروف والغضروف)..لوووول
تخريمه ...
باقى هو موجع بالحيل بجيته بالباص مشوار 12 ساعه
وعنده غضروف .. الله يكون فى عونو ساى
شكرا اخى محمد شكرا غيم كسلا
| |
|
|
|
|
|
|
|
|
|
Re: *** مبدعنا الفنان عبد الله البعيو تجرع الأمرين ومن سودانيين وفى الغربة وااااااااا عجبى يا ب (Re: soma)
|
والله يا أختنا سوما إندهشت جدا لهذا الخبر لمعرفتي بكثير من السودانيين بصلالة بحكم عملي هناك لمدة عام – سنة 2001- و أقيم حاليا بمسقط. في سنة 1992 زرت صلالة في مهمة عمل....وصدف أن صليت الجمعة بأحد المساجد التي يؤمها كثير من السودانيين....وأنا لم أكن أعرف أيا منهم...وبعد الصلاة تقدم مني أحدهم وهو الأخ الرشيد – وهو أحد نشطاء النادي السوداني كما أعلم- وقال لي : باين الأخ جديد في صلالة. وتعارفنا وأخذني لمنزله للغداء وحلف بالطلاق أن أتغدي عنده كل جمعة طوال إقامتي بصلالة التي إمتدت لأربعة أشهر( وقد كان)
صلالة مدينة صغيرة وأغلب السودانيين يعرفون بعضهم.....وأجد من الصعب علي أن أتخيل الأستاذ البعيو وهو يأكل وجبة واحدة في الفتدق مع وجود نوعية السودانيين الذين أعرفهم هناك.....
أقرأ الكثير للأخت سوما هنا...ولاشك لدي في مصداقيتها......لكن سماع القصة من طرف واحد قد يكون مضللا بعض الشئ. علمت قبل قليل أن رئس فرع الجالية هناك حاليا هو الأستاذ محمد الأمين ...وأسعي للحصول علي رقم تلفونو وسأتصل به واّخذ منه الصورة كما يراها هو......ومتواصل معاكم
يا سوما يا أختي ....طرف الصوط لحقنا...واللوم بحصل كل السودانيين في عمان.....في واحد هنا قال أليس هناك رجال(أو سودانيين) في هذه العمان ؟؟؟!!!
| |
|
|
|
|
|
|
|
|
 Re: *** مبدعنا الفنان عبد الله البعيو تجرع الأمرين ومن سودانيين وفى الغربة وااااااااا عجبى يا ب (Re: soma)
|
لم نقصر مع الفنان البعيو قدر أستطاعتنا حينما جاء الى مصر قاصدا حصوله على فيزا لكندا، وقبل سفره لصلاله، وقد كانت الأتصالات بالأخ الزين ابو نائب تتم من مكتبى، وقد ارسل له الأخ الزين التذكره لصلاله على مطار القاهرة، ولا اعرف ما دار بعد ذلك بل كنت اتوقع رحله موفقه للبعيو فهو فنان بمعنى الكلمه .. وسوف لن نقصر معه حينما يصل مرة أخرى القاهرة، بل سوف اسعى لتسليط المزيد من الضوء حول هذه المساله.
صراحة اقولها بكل وضوح الفنان السودانى يعانى فى معظم الدول التى يسافر لها، لأن كثير من السودانيين يشكون مر الشكوى من عدم انتشار الاغنية السودانيه وعدم اتاحة القنوات الفضائيه لظهور تلك الأغنية، لكن الجمهور السودانى فى كثير من الأحوال لا يساهم فى دفع الفنان للأبداع بمساهمات ماليه قليله!!
اقام البعيو حفلة فى مصر قبل سفره لصلاله الغرض منها دعمه ماليا حضرها جمهور كبير، أكثر من 50% منهم لم يسددوا قيمة التذكره ودخلوا (ملح)، وغالبية المحجمين عن السداد هم اصحاب الوضع المالى الممتاز!!
بينما اقام الفنان المصرى محمد منير حفلة قبل البعيو حضرها أكثر من الف 15 شخص فيهم عدد كبير من السودانيين وعلى ارض مكشوفه بدون كراسى، دفع كل شخص 35 جنيها نصريا ولم نلاحظ لأى شخص وقف على الباب ساعيا للدخول ملح لا من السودانيين أو المصريين !!
| |
|
|
|
|
|
|
|
|
|
Re: *** مبدعنا الفنان عبد الله البعيو تجرع الأمرين ومن سودانيين وفى الغربة وااااااااا عجبى يا ب (Re: تاج السر حسن)
|
الاهل الطيبين مساكم الله بكل خير
اعتذر بشدة عن التأخير المابالخاطر
عذرا يا احبة ولكم الشكر كيمان لوقفتكم المشهودة
ومشاركتم فى هذا البوست الذى آلمنى حد الوجع العميق
وعذرا لكانت لهجتى مؤلمه
****
الاخ معتصم عبد الرحيم حبابك يا خوى
والله كلنا مذهولين للحصل وما كنا بنتمنى انه يحصل
وما بنحب نشن اىحملة على ود البلد
لكن احياينا يصعب عليك الموقف ويصعب عليك انك تتجاهلو
خاصة تحت اصرار اخونا البعيو لانه أتألم شديد
وحقيقى مداخلاتكم كان ليها اثر عميق وقفتكم معه
وبشكركم والله من القلب للقلب
وبقول ليك اخونا البعيو شكرا يا اصيل والله يكتر من امثالك
تسلم اخى معتصم وشكرا بلا حدود..
***
الاخ هارون دياب سلامات
وشكلك زعلت زى زعلتى انا عند سماعى الخبر
الحقيقة يا هارون يا خوى ده الكلام القلناه ليه
اخونا البعيو متحمل الغلطه دى وزى ما قلت لى اخونا ترهاقا
قال دى اكبر من عترة وان شاء الله تانى ما تتكرر
وبسلم عليك كتير وبقول ليك كتر الف خيرك يا ملك
شكرا اخى هارون شكرا لمرورك ...
***
اخوى دينق سلامات ومشتاقين
والله ضحكتنى رغم الزعل الشديد
يا حليلك والله لكن زعلتى المره دى اقوى من زعلات ابو عتيق زاتها لووول
الفنان البعيو بحييك وبحى فيك روح الاخاء والصدق وبقول ليك يا ريت
لو جاتنى كلمة اعتذار واحده منهم ..كانت برد الجوف والماده فى اللحظه
دى ما كانت مهمه بقدر التقدير للانسان الجوانا .. والاحراج الحصل لى
مع فرقتى الرجعت السودان حاضنة وجعها
شكرا كتير اخى دينق ومرورك جاب نسمه باردة رطبت الاجواء كثيرا
***
الجميل رافت ميلاد سلام بحنان اهلنا
شكرا ليك يا ذوق على الطلة
بالنسبة للجهه هى رسمية وهى رئاسة جالية المغتربين بصلالة
و حسب كلام اخونا البعيو انه السفارة على علم بكل ما حدث
واتصل شخصيا بالقنصل فى السفارة وشرح له كل شىء
اما رئاسة جالية المغتربين بصلالة هى المنظمه ..
الشىء الاهم انه النادى السودانى بصلالة لا علاقة له بكل ما حدث
وده للمعلومية ..
اخى رافت شكرا لك كثيرا من الاخ البعيو وبحييك تحية خاصة
وانا ايضا سعدت للغاية بتواجدك معنا فى ليلة امس رغم انه ما سمعنا
يعنى طالبنك مداخلة بالصوت .. المرات الجاية ان شاء الله
بس اوع تجى داخل الروم اندر كفر
تحياتى لك والف شكر
***
اخى عبد الغفار عبد المهدى
حبابك يا ود البلد
كتر الف الف خيرك على كل الجميل النابع منك بصدق احاسيس
باينه فى سطورك
حقيقى عمان وغيرها مليئه بأهل الخير ونحمد الله فى مسقط عندنا صفوة
من السودانيين . وصلالة ايضا اكيد فيها اهل الخير ..لكن هذا الموقف هز
احاسيسنا ومشاعرنا وكان لابد من طرح مثل هذة المواقف للجميع
الاخ البعيو بشكرك بعمق وبقول ليك وقفتكم معاى عبر الاثيير
لها اثر عميق جداا
تسلم اخى عبد الغفار وشكرا محنة
***
الاخ شمس الدين السنوسى حبابك
وشكرا لطلتك ومشاركتك للاخ عبد الله البعيو
لو قريت البوست بتمعن بتلقى رد على سؤالك ده يا عزيز
الفرقة الموسيقية حضرت قبل يوم من حضور البعيو
وكان اعتمادها على الاتفاق الحاصل مع الفنان البعيو من السودان
باستقبالهم فى المطار ثم الترتيبات الكاملة من فندق وغيره
وهم الشربوا المقلب .. واخونا البعيو لحق الموقف
الاخ البعيو بشكرك وبقول ليك لولا انى كنت محتاط يا اخى الكريم
لما كان استدركت الموقف الحصل ..
لكن والحمد لله فى اى رحلة لى وده الشىء البديهى بكون محتاط ماديا
وده الكان حاصل...
من القاهرة كان معى شوية دولارات وهى التى انقذت
موقفى تصرفت بها ومن معى ولولا ذلك كنا يا ابن العم قدينا القرعه
شكرا اخى شمس الدين شكرا لمرورك الاسعدنا
***
بت القبائل اختى الحبيبه شادية الطيب
تسلمى يا اصيلة وطلتك اسعدتنى وشرفتنى بالحيل يمه
الاخ البعيو بغريك السلام والاحترام وبقول ليك شكرا يا اصيلة
واعتذارك اشرق جواى شمس الفرح .. تسلمى بت البلد
***
| |
|
|
|
|
|
|
|
|
|
Re: *** مبدعنا الفنان عبد الله البعيو تجرع الأمرين ومن سودانيين وفى الغربة وااااااااا عجبى يا ب (Re: soma)
|
بلسان الاخ المطرب المبدع /عبد الله عبد القادر البعيو يسرنى أن أسجل صوت شكر وتقدير وعرفان لكل الاخوة الاعضاء الذين تفاعلوا مع الموقف الشاذ الذى تعرض له ضيفنا العزيز خلال زيارته لمدينة صلالة ، للمشاركة فى مهرجان خريف صلالة السياحى باسم الجالية السودانية فيها ،، مثمناً فيهم هذه الوقفة الكريمة التى أثبتت أن النخوة السودانية ما زالت بخير ، رغم ما تتعرض له بين فينة والأخرى لبعض العثرات ،،،
وفى مسقط التى وصلها الاخ البعيو أمس قادما من صلالة فى طريقه الى القاهرة غدا باذن الله ، أبت الرجولة والشهامة السودانية إلا أن تعلن وقفتها مع الاخ البعيو ،،، حيث بادر كل من الاخ / ابراهيم السيد ، سكرتير النادى الاجتماعى للجالية السودانية بمسقط ، والاخ/ الطيب شيقوق مسئول الشئون الاجتماعية بالنادى بتسجيل زيارة شخصية له ، والالتقاء به بمنزلنا المتواضع ... وقد كان لهذه الزيارة أثرها العميق فى كسر جبل الجليد الذى جثم على صدر الاخ البعيو ، وبحمد الله فقد أثمر اللقاء عن تدارك كل سلبيات الموقف الذى تعرض له ، والاهم من كل ذلك هو الخروج به من حالة الإكتئاب التى كان يعيشها جراء ذلك .
وفى خضم هذه الاحداث لم ينسى الاخ البعيو أن يسجل صوت شكر وعرفان للاخ/ عبد الرحمن يحيى وحرمه المصون ، الذين أكرموا وفادته خلال وجوده بصلالة . ومن هنا يود أن يوجه لهم خالص التحايا والتقدير على كرمهم وروحهم الطيبة ...
وباسمكم جميعا أسمحوا لى أن أحيى هذه الروح الطيبة التى هى عنوان الاخ البعيو دائما ، متمنين له التوفيق والسداد فى حله وترحاله ،،،
/IMG]
الابن مؤيد ـ البعيو
| |
|
|
|
|
|
|
|
|
|
Re: *** مبدعنا الفنان عبد الله البعيو تجرع الأمرين ومن سودانيين وفى الغربة وااااااااا عجبى يا ب (Re: soma)
|
يا بت القبايل فاقد الشىء لا يعطيه ... البعيو ده عالم من الطيبة والرقة المتناهية والكرم الحاتمى ... وانا بخت اللوم على الفنانين مش على المضيف لانه بلدنا بتسمح واتحادنا تحديدا بيسمح باطلاق هذه الكلمة مجانا على من نشاء ... وهنا قمة الكرم مما دعى المضيف يخلط مابين الفنانين وكلو عند العرب صابون ... حقو تعرف وين مكانك قبل ماتصدق ظنونظ .... ياما سبنا الناس عشانك وعشنا افراح فى عيونك حقو تعرف ... الفاتح .... الناس ديل ماكانو كده الحصل شنو؟
| |
|
|
|
|
|
|
|
|
|
Re: *** مبدعنا الفنان عبد الله البعيو تجرع الأمرين ومن سودانيين وفى الغربة وااااااااا عجبى يا ب (Re: الفاتح الجنيد)
|
الاخ كمال سلامات
شكرا ليك يا ذوق على التصحيح
فعلا والله قاصدة الاخ اسامه مرغنى
عذرا اخى اسامه
وشكرا من تانى اخى كمال
ما عارفه من امس بجلط فى الاسماء لووول
امس اخونا عاطف عمر كتبت ليه عاطف عبد الله
طلع زول ظريف وصححنى زيك كده
غايتو لو غلطت فى زول تانى الله يستر
بقولو لى الكبر حصل لووووول
خاصة عاصم البنا عشان صاحبو ود الجنيد
بكون قاعد لى بالمرصاد بس الحمد لله فاتت عليه لوووول
شكرا اخى كمال
والنضحكك زيادة المداخلة دى بعدما كتبتها نزلتها
باسم الفاتح الجنيد لكن كان قبلى اون لاين
جريت جرى صححتها ما شايفنى فوق رفعت البوست 
شكرا اخى كمال
واحب اطمنك انه الاخ البعيو ما زال موجود معنا
ونفسياته احسن بكتير من امس والايام القبل امس
بسلم عليكم كلكم
| |
|
|
|
|
|
|
|
|
|
Re: *** مبدعنا الفنان عبد الله البعيو تجرع الأمرين ومن سودانيين وفى الغربة وااااااااا عجبى يا ب (Re: soma)
|
Quote: والدليل على كده وضحنا الجهة بالاسم
وما حبينا نذكر اسماء تفاديا للاحراج |
الاخت سوما
تحية طيبة
عهدنا (بنا) دائما أن نتفادى الاحراج . و الحرج ..
الاسماء مهمة وواجب عليكم لأن فى قاموس هؤلاء لا إحراج ( و يعنى شنو) ( و حيعمل شنو) هى كلمات يتداولونها كالتنفس (فعل أصبح لا ارادى)
واجبنا أن نذكر اسماءهم (الثلاثتية) جهارا نهار ..
لانهم يفلتون من العقوبة بداعى ( منعا للاحراج).. و لانهم يكررون فعلهم مرارا .. و يلدغ أهل لنا من جحورهم مرارا..
يكفينا خجلا .. فما فعلوه فى حق اخ لهم و مواطن سودانى كبير .. فى أى عرف من الاعراف السائدة بين قبائل و أعراق الدنيا و هم فى عرفنا ( قد خرجوا عن الملة) !!
تحياتى و تقديرى
| |
|
|
|
|
|
|
|
|
|
Re: *** مبدعنا الفنان عبد الله البعيو تجرع الأمرين ومن سودانيين وفى الغربة وااااااااا عجبى يا ب (Re: soma)
|
أخوي الفاتح الجنيد...
شكرا للتنوير,, فيما آل إليه حال الفنان البعيو..
فعلا لو خليت بليت.. زي ما بيقولوا....
تعرف حكاية اللخطبة في الأسماء دي بتذكرني والدي
الله يرحمه كان نادرا ما لا يخطيء في أسمائن أسم أخوي لي وأسمي لأخوي وهكذا
وكنت أستغرب..وأرد ذلك لكبر سنه..
هسع حصلت مع أخوك.. وانا ربنا رزقني بأربعة أولاد وبنت ودائما ما ألخبط
لكن هسع أولادي ما قاعدين يسكتوا لي زي ما كنت بسكت أنا مع أبوي
الله يديك العافية وتحياتي لك ولكل الإخوة في عمان والأخت سوما
ودمتم
| |
|
|
|
|
|
|
|
|
|
Re: *** مبدعنا الفنان عبد الله البعيو تجرع الأمرين ومن سودانيين وفى الغربة وااااااااا عجبى يا ب (Re: soma)
|
الشاعرة الجميله كما سمعنا والعهدة على الراوى .. (سوما)
جنس كلامك السمح ده ياهو ذاتو الببكينا ويفرحنا وينسينا
رغم كل شئ .. واى شئ .. ارمى الودع .. وخلينى اقول البعيو محظوظ كان عاكس الدولار لأن المال عند بخيله والسيف عند جبانه، لأنه تحت كل الظروف يطلع ليهو بى ذهبا مجمر !!
وقمرا موهط فى السماء .. شن داير أكتر من كده ؟؟
والله اتصالكم فى وجود النسمه هى .. هى .. بالصدفة الغريبه وعجيبه، قرب يخلينى اغطس فى البحر من شدة الفرحه والشوق للبعيو محيط رغم انه فارقنا قبل ايام قليله.
اشكرك واشكر البعيو على هذه المشاعر الصادقه ونبيله، وعشان ما تقولى خليتكم دون هديه، هاك منى القصيدة دى لعلها تلطف شويه من غضب العابرين!!
_______________
(سيد الناس وكل الناس)
بتستغرب ....؟؟
وتسأل عن سؤالنا عليك وتستعجب ؟
منو القال ليك ......
بلاك الدنيا ، تصبح دنيا ،
فى عينينا شايله جمالها من عينيك ؟
منو القال ليك ...
حروف كلماتنا تتعطر
وتلبس توبها تتمخطر
وتمشى هوينا تتبختر
تضم الحانها
بى حنيه تتوزن وتصبح غنيه
ترحل ليك؟
منو القال ليك
حلم طول وكان منيه
نشوفو الليله فى الواقع
وزى قمرا توهط فى السما السابع
وحاتك أنت يا رايع
جمال الدنيا فى عينيك
بتستغرب .... ؟
وتسأل عن سؤالنا عليك وتستعجب؟
وأنت هوانا والأنفاس
وأنت الطيبه والأيناس
وروعة رنة الأجراس ؟
منو الأداك عيون حلوات
وللحلوات بقت مقياس ؟
منو الأهداك جمال أحساس؟
بتستغرب وتستعجب
وأنت الناس وسيد الناس وكل الناس؟
| |
|
|
|
|
|
|
|
|
|
Re: *** مبدعنا الفنان عبد الله البعيو تجرع الأمرين ومن سودانيين وفى الغربة وااااااااا عجبى يا ب (Re: Alsa7afa_30)
|
الاخ ترهاقا سلامات
والله رغم الحصل ليه هو بضحكنا بى شماتو فى روحو
لى آخر لحظه ..يا حليلو غادرنا بالسلامه
مرات يقول يا ضهرى يا اب غضروف ظلمتك الظروف لووووووول
مرات يقول من الحصل لى يا اخوانى قربت اطول لووووووووووول
دى انا غايتو ضحكتنى شديد
على وزن قصيدة الراحل المقيم الدوش..
كبرت كراعى من الفرح.. نص فى الارض نص فى النعال
مع الفرق الشاهق بين الحالتين
حالة شاعرنا هنا فرح وحالة بعيونا هنا زعلة بى مغيصة
***
الاخ كمال كيف اصبحت يابا
اخير ما اناديك بى اسمك مش ؟
ضحكتنى طبعا لقيتك يا ودعمى موكر فى لخبطة الاسماء اكتر منى
بعدين يا العشا انا الرديت عليك مو ود الجنيد
صاح دخلت بالغلط بى اسمو لكن جريت لحقت روحى
ورفعت البوست ورجعت دخلت بى سوما
حالة صعبة خلاص .. لكن جد ضحكت شديد
عارف ..دى بتكون النعسة وضحك البعيو لينا
انا غايتو امس ضحكت كما لم اضحك من قبل
تسلم كتير وربنا يخلى ليك وليداتك ان شاء الله
ويخليك ليهم ..ويكبروا وينادوا وليداتهم بالغلط
وانت تصرها ليهم تذكرهم وتضحك فيهم آميــــــن
شكرا محنة ..
***
الاخ اسعد الريفى تسلم والله على متابعتك
وانا معاك فى كل القلتو ..
بالعكس كنت بتمنى انه واحد منهم
حتى لوما عضو فى حوش بكرى .. على الاقل يتصل بى احد
الاعضاء وينفى ما حصل ..وده ما شىء صعب
معروفين البورداب من عمان مجموعه حتى لو من مسقط
وتقريبا مداخلة الاخ اسامه ميرغنى وردى عليها
بالتفصيل رغم انه ذكر اسم رئيس الجالية
اوضح الكثير من الامور .. نحن فى انتظاره يتصل بالطرف الاخر
وياتينا بما يفيد الجميع ..
عشان برضو الكلام ما يكون من طرف واحد
ومن ناحيتى كتبت رقم اتصال الاخ البعيو امام الجميع هنا
لمزيدا من دقة المعلومه ..
وفعلا ما قصروا بعض الشباب
اتصلوا به وواسوه كثيرا وكان لاتصالهم صدى جميل فى نفسه
شكرا اخى الريفى مره اخرى وشكرا لك بلا حدود
وعليك الله ما تزعل .. البعيو زاتو طيبنا خاطره
ويا حليلو الليله سافر وربنا يعوضه ان شاء الله
واكيد عوضه بى ناس زيكم كده .. تسلم يا ود البلد
***
الاخ الشاعر القامه اخوى تاج السر
والله والله وما طالبنى حليفة على قول حبوبه
انا كنت الاسعد يعلم الله ..
لما سمعنا صوتك امس وفآجأتنا بى الزولة البهية
وطرت من الفرح لما اتكلمت معاها ( هى هى ..الزهرة الندية)
وحسيت انى بعرفا من سنين ..
وشوقتونى للقاء ..ان شاء الله نلتقى قريبا
شكرا مارقه من الجوف
والهدية الاحلا القصيدة الرائعه منك
انت سيد الناس يعلم الله ..
يااااااه
والله تانى مانخليك تكمل الكلام كلومع الهلال رغم عشقنا له
لكن يا خوى ده براه وده براه وداااااااااك براهو برضو
وعشان سماحة كلامك ده البرد لينا البوست من الحراية الفيه
وعشان سماحة نضميك يا الحنين بهديك والاخوة والاخوات المتداخلين
بهديكم سلااااااااااام
****
بهديك سلام
****
بهديك سلام شوقا لهب ..
شايل معاه ريدى الغلب..
بهديك كلام ..منضوم غنى ..
لحنا طرب...
يرقص مع النجم ..
البشع وسط الشهب..
يناضم النيل الموالف ..
لى بسيمات السحب ..
يجمع شتات قلباً تعب ..
بهديـــك حنـان
يقا لد النخل المهدل فى القيوف..
زى سواد ليلا مجدع فى الكتوف ..
يحكى قصة ريد ولوف ..
قاعد يفتش فى الصفوف ..
تقعد اولوف .. وتقوم اولوف..
تتشابا للقمر البطوف ..
الضاوى فى رمل الجروف ..
بهديك قليب….
ينبض عشق .. يهتف صدق
حانى وعطوف ..
وبراك تشوف ..
كيفن بعزك .. وكيف بلاك بنسا الحروف..
كيفن معاك بتحدى قاموس الكلام ..
واتحدى بيك كل الظروف..
وفيك افوق حد الوصف ..
ما انت رمانه ..تشتاق للقطوف
بهديك عمر .. بهديك امل…
الوانو من كل الطيوف...
الوانو من كل الطيوف...
اسماء الجنيد/ مسقط
***
الصحافة حبابك بقلدة الطيبين
تسلم يا ود قبائل النيل
لو كل زول بقول كلامك ده
يقتدىبى نضم شاعرنا الفحل
كان حالنا غير ده
لكن الحمد لله فى الزيك وكتيرين بالتأكيد
شكرا ملونه بسماحة نضميك يا الصحافة يا اصيل
| |
|
|
|
|
|
|
|
|
|
Re: *** مبدعنا الفنان عبد الله البعيو تجرع الأمرين ومن سودانيين وفى الغربة وااااااااا عجبى يا ب (Re: soma)
|
سوما بت عمي حبابك مليون
والله فعلا الظاهر دخل فيني المابيداوى..
لكن ياها حال الدنيا..
شكرا لدعوتك لي بطولة العمر والله أسأل
أن يعطيك من مثلها نصيب الأسد
صدقيني طالما في السودان ناس قلوبهم كبيرة
زيكم... إذن المسافة بينا وبين الشر بعيدة
بعد ما عرفتك من الخيط ده قلت ياريت لو كنت عارف
لقائك ببورداب الرياض ...أكان جيتكم من الدمام
لكن الجايات أكثر من الرايحات
وربنا يديك وزوجك الكريم وأبنائك العافية
ونسمع عنك كل خير.. وكل جديد وجميل في عوالم القصيد
مع اطيب تحياتي
| |
|
|
|
|
|
|
|
|
|
Re: *** مبدعنا الفنان عبد الله البعيو تجرع الأمرين ومن سودانيين وفى الغربة وااااااااا عجبى يا ب (Re: soma)
|
للتو وصل الى ديارنا فى قاهرة المعز الفنان والأخ الظريف عبدالله البعيو، لسانه يلهج بالثناء والتقدير على الكرماء من الرجال والكريمات من النساء، رغم ما صادفه من قبح فى بداية ايام وصوله الى صلالاله.
البعيو .. كما عرفته .. مال الدنيا لا يساوى عنده التقدير والمعزة وجمال اللحظة وعذوبة الكلمه.
البعيو كما عرفت من زملائه الفنانين .. ما محتاج يطلع من السودان لو الموضوع مال وقروش و(كنجالات) كما كان يسمبها المرحوم عبد العظيم حركه رحمه الله ورحم كل المبدعين الذين انتقلوا الى الدارة الآخرى وأخرهم المرحوم خليل اسماعيل ، واذا لم يغن خليل لكفته "الأمانى العذبه" .
يا سوما البعيو عندكم "آل الجنيد" الأخ الفاتح وسوما وباقى افراد الأسرة فى دواخله مكانه خاصة، لا استطيع أن اصف ذلك لا شعرا ولا نثرا!!
اما القصيدة فتعليقى عليها :-
(عايزه تعقدينا تانى ما نكتب شعر) ؟؟
وهنا اتذكر أغنية الكابلى التى تقول:-
الزول السمح الفات الكبار والقدرو
كان شافوهو ناس عبدالله كان يعقرو
.
.
بس ديل ما ناس عبدالله (البعيو)!!
| |
|
|
|
|
|
|
|
|
|
Re: *** مبدعنا الفنان عبد الله البعيو تجرع الأمرين ومن سودانيين وفى الغربة وااااااااا عجبى يا ب (Re: تاج السر حسن)
|
Quote: اما القصيدة فتعليقى عليها :-
(عايزه تعقدينا تانى ما نكتب شعر) ؟؟
وهنا اتذكر أغنية الكابلى التى تقول:-
الزول السمح الفات الكبار والقدرو
كان شافوهو ناس عبدالله كان يعقرو
..
بس ديل ما ناس عبدالله (البعيو)!! |
اخوى تاج المحنة كيفنك ياود أهلنا
حبابك يا تاج راسنا وفخرنا من ساسنا لى راسنا
معقولة بس !!
انت سيد النضم الزين
والشعرالمحكم و الرصين
بتمرق الهرج زى قدل وزين
معروف بالوطنيةو شايلها جوه العين
البلاغه خاتياك تمش لا وين
ودالجودوالكرم ياغرةالوالدين
***
فى الحارة معروف بالطبع مو بالقول
فرحك بالهلال معروف بالعرض والطول
كـــــــــــــع
تسلم يا اصيل يا ود كلوك النيل
شكرا مطامير فرح
وشكرا للمقنع محنة اخوى عبد الله البعيو
قولى الليله دارنا قاحلة وجافة بى سفرك
الله يعدلا عليك وين ما تقبل
وتحايا خاصة للغالية هى هى
| |
|
|
|
|
|
|
|
|
|
Re: *** مبدعنا الفنان عبد الله البعيو تجرع الأمرين ومن سودانيين وفى الغربة وااااااااا عجبى يا ب (Re: soma)
|
أستاذه سوما.....ومن يهمهم الأمر
كما وعدتكم إتصلت ببعض مسؤلي الجالية في صلالة..ومنهم رئيسها المهندس محمد الأمين.....والذي حولني للشخص المسؤؤل عن برنامج الفنان البعيو....وهو الأخ حامد أبكر.....وكثيرون هما يعرفونه لمشاركاته في مهرجان مسقط
هم لديهم رؤية ورواية تفسر الذي حدث مع البعيو كما يرونه هم.......إبتداء من طريقة الإتفاق معه ( شفهيا) مرورا بموضوع العشاء مع التوقف قليلا برايهم في مستوي أدائه في صلالة ( كما قالوا لأنو كان مريض ومعه عازف أورغ غير متمرس هو إبنه) ......وإنتهاء بمبلغ خمسمائة ريال ( كما يقولون) إستلمها منهم غير ال ريال 120 للتذاكر.
علي العموم ....الموضوع عامل شوية دوشة الاّن في صلالة......وقد طلبت من الأستاذ حامد أن يقوموا بالرد مباشرة أو الإتصال بك...لأني والله شايف الموضوع فيهو أخذ ورد.....ولا أريد أن أكون متحدثا بإسم أحد.....................فقط نريد الحقيقة
سوما....تلفوني 92254445
| |
|
|
|
|
|
|
|
|
|
Re: *** مبدعنا الفنان عبد الله البعيو تجرع الأمرين ومن سودانيين وفى الغربة وااااااااا عجبى يا ب (Re: julia shawqi hamza)
|
الاخوة المتداخلين
مساء الخير
Quote: ***
الاخ هارون دياب سلامات
وشكلك زعلت زى زعلتى انا عند سماعى الخبر
الحقيقة يا هارون يا خوى ده الكلام القلناه ليه
اخونا البعيو متحمل الغلطه دى وزى ما قلت لى اخونا ترهاقا
قال دى اكبر من عترة وان شاء الله تانى ما تتكرر
وبسلم عليك كتير وبقول ليك كتر الف خيرك يا ملك
شكرا اخى هارون شكرا لمرورك ... |
حقيقة بقدر مازعلت من الشخص العمل المقلب وده شئ يرجع لاصله وفصله .. زعلت اكتر من الاخ الفنان البعيو وذي ماقلت سابقا انو المواضيع دي اهم حاجة فيها اني اعرف حقوقي وواجباتي .. ويحضرني هنا موقف كنت شاهد عيان عليه في الدوحة عندما تم اعلان اسم الفنان الشاب في ذلك الوقت محمود عبد العزيز لاحياء الفاصل الاول ولما تاخر في الصعود الي المسرح اتضح انو مااستلم قروشه كامله ورفض انو يطلع المسرح فتم الاتصال بمنظم الحفله والراجل لقي نفسه مورط اذا دفع ومورط اذا مادفع فحضر وسلم محمود قروشه كامله وبعد داك طلع وكمل الحفله ويادار مادخلك شر .
مره اخري الفنان البعيو الجايات اكتر من الرايحات .
تخريمة : سؤال بسيط .. هل يعقل ان تسافر بعثة فنية مهما كان عدد افرادها خارج السودان وماعندهم حتي مصاريف جيب ................!!!!!!!!
هارون دياب
| |
|
|
|
|
|
|
|
|
|
Re: *** مبدعنا الفنان عبد الله البعيو تجرع الأمرين ومن سودانيين وفى الغربة وااااااااا عجبى يا ب (Re: soma)
|
الأخ الفنان/ عبدالله البعيو
اطلع على ما دار هنا وأجاب على بعض المداخلات بالمعلومات التاليه:-
- حينما وصل الى صلاله تم ابلاغه بأن المجموعه القادمه من السودان للمشاركه فى المهرجان والمكونه من 8 جهات مختلفه (مطرب، فنان تشكيلى، عارض فلكور.. وحنانه ... الخ) خصص لهم مبلغ 2000 ريال عمانى، اى لكل جهة 250 ريال عمانى خصم منها قيمة تذكرة الفنان عبدالله من القاهرة لصلاله، بدلا عن الخرطوم / صلاله وقد كلفت لوحدها حوالى 400 دولار !!
- مبلغ ال 500 ريال عمانى التى ورد الحديث عنها قال الفنان / عبدالله البعيو، كانت عبارة عن نصيبه فى حفلتين حضرهما جمهور كبير فهل يعقل هذا ؟؟
- بخصوص الأدعاء الكاذب عن مرضه فقد قال الفنان عبدالله البعيو، هل حدث أن جلس فى اى حفلة من الحفلات التى أقيمت على كرسى أم كان واقفا طول الوقت؟؟
"ومن جانبنا نشهد أن البعيو غادر مصر فى احسن حال وقدم حفله رائعه للغايه."
يواصل البعيو ويقول:-
- الذين حكموا على ابنه نادر بأنه لا يجيد العزف على آلة الأورغن، هل هم جهة مؤهلة للحكم على الشخص بأنه موسيقى أم لا؟؟
ويقول:-
اذا ارادوا تحرى الدقه فعليهم أن يرجعوا لأرشيف التلفزيون فى تاريخ 25/ 6/ 2007 الماضى فسوف يجدوا ابنه نادر مشارك ضمن الأوركسترا فى برنامج "ليالى النغم" كعازف اورغ وهو موسيقى محترف!
واضاف البعيو:-
اذا كنت فنانا اغنى منذ عام 1963 هل يعقل أن اجامل أبنى فى عام 2007 وهو لا يجيد العزف؟
ولماذا لم احضر زوجتى معى بدلا عن أبنى اذا كنت اريد أن احضر شخصا لا علاقة له بالفن أو الموسيقى؟؟
وهل ابنى هو الوحيد الذى يمارس مهنة الفن أو الموسيقى من ابناء الفنانين؟؟
الا يعزف للفنان الكبير ابو عركى البخيت 2 من ابنائه؟؟
| |
|
|
|
|
|
|
|
|
|
Re: *** مبدعنا الفنان عبد الله البعيو تجرع الأمرين ومن سودانيين وفى الغربة وااااااااا عجبى يا ب (Re: soma)
|
الفنان يجب ان يحترم اين ما حل طالما سفير وحامل الحب والخير والجمال
علي الاقل يعامل معاملة سودانيه فيها حسن الاستقبال والكرم حتي لو بالقليل
لكن اهانته واذلاله غير مقبوله ...
واما ابنه العازف علي حسب معلوماتي من اصدقاء لي في الوسط الفني
لا غبار عليه ..
ثم رجل قامه مثل الفنان عبدالله البعيو مستحيل يجامل بسمعته عشان خاطر ابنه
فهو صاحب مدرسه خاصه وله خبرته الطويله في المجال الفني ...
واقولها مره تانيه عيب وعيب كبير ...
سلام سوما
| |
|
|
|
|
|
|
|
|
|
Re: *** مبدعنا الفنان عبد الله البعيو تجرع الأمرين ومن سودانيين وفى الغربة وااااااااا عجبى يا ب (Re: عماد شمت)
|
الاخ اسحق سلام يا ود الاهل ان شاء الله طيب
ربنا يديك الصحه والعافية يا ذوق
وشكرا ليك كتير على كلامك الجميل
وتحية خاصة ليك من البعيو
بشكرك على وقفتك معاه يا ود القبائل
شكرا اخى اسحق شكرا محنة
***
الاخ الزاكى عبد الحميد
الف حمد الله على السلامة
وان شاء الله كل الاهل بخير
واجازتك كانت ممتعه مع الاهل
والله يالزاكى يا خوى الكلام ده على قول اخونا ابراهيم السيد
داير قعده ..لكن الاخ ابراهيم ما قصر هو والاخ الطيب شيقوق
وقاموا بالواجب نيابة عن الجميع وما قصروا تب
ما تقصر ايامهم ان شاء الله
كل التفاصيل بتلقاها مع الاخوان
لانهم قابلوا الاخ البعيو وحكى ليهم بعضم لسانه
والباقى باين ليك من خلال المداخلات
كتر الف خيرك على الشعور النبيل
ولك كل الامنيات الطيبه والشكر الجزيل من الاخ البعيو
طبعا هو لسه متابع البوست من القاهرة
ومواصل معانا بالتلفون..
والوصية امانه بشكر كل الاحبة
**
اخوى تاج السر
حبابك يا تاج المحنه المحكره فوق كل الهامات
وفيت وكفيت يعلم الله ..وكلامك ما بنعقب تب
عجبنى ردك جدااا على الطرف الآخر ورد الحنين البعيو
وده كلام ما بنعقب زى ما قلت ليك ..تسلموا يا ضل الاهل
برجع ليك بى رواقة
شكرا بقدر طيبتك يا ملك
| |
|
|
|
|
|
|
|
|
|
Re: *** مبدعنا الفنان عبد الله البعيو تجرع الأمرين ومن سودانيين وفى الغربة وااااااااا عجبى يا ب (Re: عماد شمت)
|
الإخت سوما المحترمة
تحياتي لكم
وللأخ الفنان الكبير / عبد الله البعيو
تأخرت كثراً في الكتابة في هذا الموضوع
زاملت الاستاذ البعيو في المجال الفني سنوات طوال وما هو معروف عنه أنه رجل كريم خلوق وآخر ما يفكر فيه العائد المادي - كان يغني من أجل الغناء وكان يشارك في العديد من الحفلات مجاناً ولكنه كان يحرص على حقوق الفرقة ولا ينام إلا بعد أن يعطي كل ذي حق حقه .
ولكن هذا لا يعفيه من ترتيب أموره في السودان قبل أي سفرية - وأسمحوا لي بأن أذكره بأن ما حدث لم يحدث للمرة الأولى في مشواره الفني بل حدث مرات وتكرر . ولا يلدغ المؤمن من جحر مرتين .
لا أود أن أدين اللجنة في عمان دون سماع رأيها ولكن يبدو أن الأمور تمت بصورة حبية وشفوية (بأخوي وأخوك) ويا زول ما تشيل هم . وهنا خطأ أخي الفنان البعيو (أرجو أن يسمح لي بذلك) برغم أنكم تسبقني في هذا المجال بسنوات .
طبعاً أنا عارف تماماً الظروف في السودان وأذكر تماماً عندما كان البعيو بيغني في الشهر 38 حفله أقصد يوم الجمعة حفلتين صباح ومساء .
اليوم اختلفت الأوضاع فصار الغناء في الأفراح نادراً مما جعل الفنانين يسافرون في شهور الكساد ذهاباً وإياباً إلى الخليج وبعض الدول العربية التي يتواجد بها بعض الاصدقاء فمنهم من يرجع ظافراً بعائد القعدات ومنهم من يرجع آسفاً . وأهي تجربة خلال شهر (فقراير) زي ما بقولوا بدلاً عن فبراير لأنه شهر نايم .
بالنسبة لإبن الفنان عبد الله فقد استمعت إليه فهو عازف يمكن الاعتماد عليه وإن كان في بداية حياته الفنية ولكنه أيضاً نشأ في بيت فني وبيعزف منذ الصغر .
المهم المسؤولية كلها حتى الآن لا يمكنني أن أحملها لأي من الطرفين فإذا كان الاتفاق شفاهة فعلى صديقي البعيو أن يسردب ويبلع الموضوع - وإذا كان مكتوباً فالعقد سيد الأحكام .
وأرجو من جميع الزملاء الفنانين إقامة المواثيق والعهود كتابة ثم الخروج من السودان .
كما أرجو ألا أكون قد خرجت من الموضوع كثيراً .
فقط أود أن أسوق معلومة مؤكدة لجميع الفنانين على مختلف مستوياتهم ودرجاتهم الفنية أنه لم تعد بلاد الغربة في الخليج أو غيره مرتعاً خصباً لتسويق الأغنية - حيث أن معظم المغتربين لا ينتظرون حضور أي فنان لأنهم غير مستعدين لدخول أي حفلات فيها (دفع) اللهم إلا إذا كانت (ملح) وهذا على سبيل المثال لا الحصر والمسألة بقت (شختك بختك).
لكم التقدير .
عادل التجاني
الدوحة
| |
|
|
|
|
|
|
| |
Kamal Karrar
جمال السنوسي
عاطف عمر
عماد شمت
ترهاقا
معتصم عبدالرحيم
haroon diyab
اسعد الريفى
Deng
رأفت ميلاد
Shams eldin Alsanosi
د.محمد حسن
Osama Mirghani
الفاتح الجنيد
Alsa7afa_30
)
julia shawqi hamza
إسحاق بله الأمين
الزاكى عبد الحميد
jini
عادل التجانى
فيس بوك
تويتر
انستقرام
يوتيوب
بنتيريست