حبيب الشعب لينا معاهو قصة ريد غريبة خلاص وده الفول ياجماعة بالواضح كده يعنى ما خدرة دقاقة ولاعيون براقة ولا قوام فان باستن وحبيبنا الفول ده ياناس حكايتو مع الشعب السودانى حكاية علاقة ابدية من تصبح لامن تمسى فطور وعشا وما احلاهو صحن الفول المدنكل والمصلح ( صاح ) على الطريقة السودانية البحتة وانا زاتى ماعارف الفول ده سموهو فول مصرى ليه صحى اخوانا المصريين بياكلوه لكين مااعتقد بيعزوه ويدلعوه زينا وهاك يازيت السمسم والطحينة والجرجير والجبنة اهم حاجة زمان عبد المنعم عثمان قالا فى محطة التلفزيون الاهلية وكان بيمثل دور زول مسافر بره السودان ولمن جا راجع مشى الدكان وقال لى سيد الدكان عايز لى جبنة اكسرا كده كده طبعا الفول فى ناس ما لاقينو فى الايام العلينا دى لكين زمان برضو كان فى ناس بكجنو الفول وبقولو ليهو ( كل يوم معانا ) بس ما بعرفوا قيمتو وزى ما قال الطيب عبد الله مسكينة المحبة تمشى لى ناس ما بتقدر والفول فى السودان افوال يعنى بتاع الناصية فى اخر الشارع مازى فول عمك ابو العباس والعشرة الكرام ولا فول الحرزاوى فى الصحافة شرق بطعم فول عبد الوهاب فى نمرة تلاتة اما فول الثورة فهو بنكهة خاصة وما بشبه فول الصبابى ولا الشعبية بحرى وياهو ده ياجماعة سر جمال الفول وديمقراطية حبيب الشعب البيرضى الناس كلهم وياخوانا انا هسى ده متعشى فول وبكره اكان الله ادانا عمر ناوى عليهو والحمد لله وياجماعة الفول ده ما ساهل لانوا من عناصر القوة البشرية ومصدر من مصادر الطاقة وبما ان جزء كبير من هذا الفضاء الاسفيرى قد لا يجد اصحابه ( الفول المدنكل ) فان المجال مفتوح لمن يريد التعبير عن مشاعره الحميمة تجاه الفول او حتى زكرياته الاليمة مع ذلك الكائن ابوعين كحيلة بعد ان تحول من كائن فولاوى الى ( ماكدونالدزى ) او بيتزاوى هوت دوجاوى
07-31-2007, 00:15 AM
عامر تيتاوى عامر تيتاوى
تاريخ التسجيل: 01-14-2006
مجموع المشاركات: 3328
زمان فى المدرسة الابتدائية كنا بننتظر ساعة الفطور عشان الفول حبيب الشعب وهوزاتو ماكان فول كان موية فول لكنها تستحق الانتظار وكنا فى مدرسة الامتداد 4 الابتدائية وكانت مصادر الفول جمب المدرسة متوفرة بكثرة والقدر ما تديك الدرب بوخا يلوى ساى ولحدى هسى بتذكر وش سيد الدكان الكنا بنعمل الفتة عندو لكين الاسم راح لى وبقى الفول وكنا لمن نكون مفلسين بنستبدل الجبنة الصريحة بموية جبنة وطبعا موية الجبنة حقت زمان بتعادل جبنة بالف جنيه فى الزمن العلينا ده وما كانت الجبنة براها كمان الطحينة والزيت فوق الفول الحبيب عائم والمنظر زى سطح القمر والايادى الصغيرة ماشاء الله نازلة وطالعة فى دهاليز الصحن زى الركشات اليومين ديل فى شوارع الخرطوم المهم كنا بنضرب الفول زى الما حاصلة حاجة ونتمسح بباقى الزيت ولمن يكون الشتا والغبشة ديك تلاقى الزيت مضوى حولين الافواه الصغيرة زى ثقب الاوزون او الشهب السماوية .. حاجة كده وبعد حصة الفطور زى ما كنا بنسميها وهى عادة كانت بعد حصتين غالبا الحساب او الرياضيات فى المصطلح الحديث كان ناس كتار بينوموا فى حصة التاريخ والجغرافيا ولا المطالعة والدقسة بتحصل اكيد فى الحصة السابعة لانوا حبيب الشعب تقيل وعايز سندة
07-31-2007, 00:30 AM
عامر تيتاوى عامر تيتاوى
تاريخ التسجيل: 01-14-2006
مجموع المشاركات: 3328
الذ حاجة كانت فى زمن الابتدائية انو فى تلاميذ لمن تقرب الفتة تنتهى بجازفوا الصحن زاتو ويطلقوا سيقانم الصغيرة للريح ويقضوا على ما تبقى وهم جاريين يعنى فى حب ياخوانا اكتر من كده وكان فى ناس لقمتم كبيرة ما قدر عمرهم لكين زيت السمسم ولا الفهد ولا البذرة فى اسوا الاحوال بيساعد على انزلاق حبيب الشعب وتوابعه الى داخل تلك الامعاء التى سوف تسال صاحبها ان لم ينعم عليها بالفول فى يوم من الايام ولم يكن كل تلاميذ المدرسة يمارسون فطرتهم الفولوية من ذات القدرة فلكل محبوبته وقدرته المحببة وكان من يمر حولى المدرسة فى تلك الساعة يجد الاجساد الصغيرة وهى تتحلق القرفصاء فى دوائر الحب الابدى للفول فى كل ناصية بها دكان يمانى او بدون والمهم الفول ولا شىء سوى الفول يعنى سلطة الاسود حقت حاجة التومة كانت لاتقوى على مقاومة جيش الفوالة وكان بعض الحناكيش القدامى هم من يتوجهون الى الحاجة ويلتهمون سندوتشات السلطة فى هدوء ودون مشاغبات الفوالة اصحاب الاغلبية وممثلى السواد الاعظم من ابناء الشعب حبيب الفول الى الابد
07-31-2007, 00:37 AM
محمد نور أحمد محمد نور أحمد
تاريخ التسجيل: 12-25-2006
مجموع المشاركات: 1220
ازيك يا عامر تيتاوي موضوعك ده في نظري من أهم الموضوعات المطروحة في البورد للنقاش في هذه الأيام لأنه ببساطة بيتناول أهم عنصر في التركيبة النفسية للشعب السوداني. فكم من مواطن اتخذ قرارا وهو تحت تأثير الفول؟ الفول ده يا تيتاوي أنا عشت معاه 3 مراحل بناء عليها بقسم الفول ذاته ل 3 أنواع. المرحلة الأولى والنوع الأول ده بدت علاقتي بيه أول مرة أسافر فيها السودان للجامعة، وده يا تيتاوي يا اخوي الله يكرمك كان فول الداخلية البشدو على حلل وقدور زي البراميل، وهو في عضمه كفول أسوأ أنواع الفول، وبقاياه الما لقوا ليها كيال في الشمالية والجزيرة، شكله زي الحصحاص(الحجارة الصغيرة)، وطعموا زي الما عنده طعم، كنا بناكله غصبا عننا عشان نحيا، ولمن عرفنا الحلة(يكسر الحاء) وبقينا سناير ما بناكله الا ونحنا مفلسين بعد إجراء بعض التصليحات عليه. النوع التاني ده وهو الفول الصاح البتلقاه في مناطق محددة، مستعد تسافر ليه سفر من الخرطوم لأم درمان وبحري أو العكس. وبجانب الجتات المشهورة القلتها دي، في محل بين المعمورة وأركويت نسيت اسمه، كنا بنطلع من داخليات المركز الإسلامي بعد المغرب ونخشى سوق (العزبات) في موقف السلمة نجيب الطماطم والدكوة والشطة الخدراء والليمون والجرجير والدكوة لزوم التظبيتات ونمشي ليه. وفي محل مهم جدا انت ما ذكرته وأنا نسيت إسمه بيقع في شارع الوادي بعد تفوت كلية التربية وانت ماشي على الثورات البي ورا ديل (أنا خليتهم كم وستين ما عارف خسع حصلوا كم؟)، والنوع ده من الفول اتخصصوا فيه أولاد مناطق معينة في الجزيرة والشمالية ويتبادلوا سر المهنة فيه، فول زي البسكويت، بي شوية شمار وزيت سمسم تاكلة وتلعق يدينك والصحن فيما بعد. النوع الثالث والأخير وده أسوأ أنواع الفول، وهو الفول البيرسلوا ليه الشفع يجيبوه بالجك للفطور أوالعشاء من دكان العربي أو المحسي أو البرقاوي وما إلى ذلك من مسميات أصحاب الدكاكين، والنوع ده من الفول خل الأسر السودانية تعيش حياتها زي بيوت العزابة. شوية فول بي 500 وزيت سمسم بي 300 وطعمية بي 200 وجبنة بي 150 ويكون الفطور أو العشاء جهز. وعلاقتي بالنوع ده من الفول السيئ بدت بعد ما اتخرجت من الجامعة وسكنت عزابي ( الله ينعل العزوبية وسنينها ويحلني منها). حكايتي مع الفول لمن رحعت أهلي بحكيه ليك وقت تاني لو ربك شاء وحيينا.
هسع دي وكيتا ليك ماشي أشوف لي ماكدونالد كارب ولا كنتاكي فرايد جكين مزيت ولا ساب وي أملا أم درمانيتي دي وأجيك راجع. صدقني مع كل قرمة فاست فود بتحسر على نعمة الفول الفاقده دي.
تسلم يا عامر تيتاوي الفوال. بالمناسبة دي ما تفتح ليك فوال اسفيري؟
تسلم يا جميل أخوك/ محمدنور التشادي
__________________________________ التعديل لتصحيح بعض الأخطاء الإملائية
كانت مصر هى وجهتى الاولى فى اول عهدى بالسفر الى خارج السودان وكنت وقتها طالبا فى مدرسة الخرطوم الجديدة الثانوية فى الصف الاول ولم يكن وقتها الفول من بين اولوياتى فقد كانت السفرة بغرض الاجازة مع اخى الذى يكبرنى سنا وكان وقتها يدرس بجامعة بيروت العربية بالاسكندرية لم اكن افكر فى الفول ولا فى الكستليتة وانما كنت اتحرق شوقا لكى اعيش تجربة السفر الى خارج السودان الى مصر وكيف ان كل من هم حولى سيكونون مصريين مثل اللذين اشاهدهم فى المسلسلات بتلك الفهلوة والنكتة السريعة ووو المهم اننى سافرت الى القاهرة ووجدت نفسى بين جماهير مصر المؤمنة ولم ينقض يومان الا وكان الكائن الفولوى فى دواخلى يتحرك بحثا فتح فولوى جديد خارج الحدود فكانت مشورة الخبراء بضرورة الذهاب الى كافتيريا نعمة فى العجوزة حيث سندوتشات الفول ولكن كانت النتيجة مخيبة ( للافوال ) ورجعت اجرجر اذيال خيبتى الفولية الا من عصير قصب جعلنى اهرول الى الحمام طوال ليلتى تلك ولم يمر يومان اخران الا وقد هاجت الذكرى فمنيت نفسى امالا بان البى رغباتى الفولوية مهما كان الثمن وكانت النصيحة هذه المرة بالذهاب الى اشهر فوال وقتها فى القاهرة الاوهو محمد احمد فانتعشت فولويتى وقررت ان اغزو قدرة عمنا محمد احمد بكل ما املك من مقدرات وعزائم فولوية وللمرة الثانية خاب ظنى وطاش سهمى على جدار اصغر قدرة عند الفوال المتفولن محمد احمد فلم اجد ما وجدته الدجاجة الصغيرة الحمراء التى هتفت الفول فولى وحدى زرعته وحدى وساحصده وحدى فقد كانت نظرة واحدة الى سندوتشات محمد احمد النتشة كافية لاقناعى بان الفول السودانى العظيم زيو مفيش وحملت افوالى وعدت بها متلفعا بالليل والصمت ودفنت اشواقى الى حبيب الشعب الى حين العودة الى السودان ثم كان انتقام سرتانا الرهيب وكانت اول جلسة كهرومغناطيسية بالفول المعدل عند عمك عبد الوهاب فى نمرة تلاتة ناصية مدرسة الخرطوم الجديدة ذلك الفوال الشهير والذى يعرفه كل من قرا حرفا فى تلك المدرسة الرائعة قلا بد بينهما قدرة فول الحمد لله لقد اشبعت غرورى الفولوى وسكت الكلام ياحلوة فى الفول المباح
07-31-2007, 01:15 AM
عامر تيتاوى عامر تيتاوى
تاريخ التسجيل: 01-14-2006
مجموع المشاركات: 3328
اخى محمد حكايتك الفولوية تنبىء عن الكثير من الخبرة فى اضابير هذا الكائن غير المعروف هل هو مدور ام مستطيل المهم انه حبيبنا وكلامك عن الفول يشير الى رحلة عمر وتفاصيل حياة يومية مع حبيب الشعب الذى يدخل ايضا فى جغرافيتنا مثلما هو فى تاريخنا فخريطة الفول لاتعترف بالحدود فمن اركويت والى الثورات التى تركتها كم وستين فهى وصلت الان الى ما بعد المئة وبرضو الفول متحكر فى كل نواصيها ودكاكينا وكناتينا وبماانك الان ذاهب لكى ( تتكنتك او تتمكدلز ) فانى اذكرك ان الانسان يولد فولوى والايام تكنتكانه او تهردزانه الى ان يعود سيرته الاولى ويتفولن ذات يوم امنياتى لك بكنتكة هنية الى حين العودة الى الفول وبعافيتك اخى محمد
07-31-2007, 01:42 AM
عامر تيتاوى عامر تيتاوى
تاريخ التسجيل: 01-14-2006
مجموع المشاركات: 3328
المرة الثانية التى حملت فيها فولويتى الى خارج السودان كانت الى المغرب وكانت الهجرة الثانية هى الاخطر لانها لم تكن مجرد اجازة وكم يوم والعرجا لى قدرتا بل كانت هذه المرة للدراسة يعنى على اقل تقدير سنة كاملة من الحرمان الفولوى المحتمل فالعزم هذه المرة بعيد الى بلاد فاس الما وراها ناس ولاول وهلة لامست فيها قدماى ارض الرباط شعرت بغريزتى الفولوية ان الامر قد لا يسلم هذه المرة وان الحبييب المنتظر قد لايعود وقد صدق حدثى فقد كانت الصدمة الكبرى وقمة الاحباط عندما انبانى خبير بان بينى وبين الفول فراسخا وبحورا وان عهد الفول الحبيب قد ولى وتحطم على اسوار المدن المغربية حيث ان الفول هنا مثل كائن فضائى لا يعيش بين الناس وانما تاكله الحصين هكذا اذن بلا ادنى اعتبار لمشاعرنا وتركيبتنا الفولوية لقد انتهى كل شىء اذن وحال بينى ومحبوبى الف حائل يموت الحب فى نفوسنا موتا والفول تاكله الحصين يالها من صدمة واى صدمة وهل سنبقى طوال الوقت اسرى للكسكسى المغربى يالها من خيبة امل كبرى وفيما نحن ننعى حظنا الفولوى لاحت بارقة امل هناك شىء ياكله فقراء المغرب ومعدميه انه البصارة وهى عبارة عن فول مبشور فيبدوابيضا ثم بعد طهيه يظهر وكانه العدس الواحد ده ويالها من بصارة بت عم الفول وحمدنا الله ان حصين المغرب زهدت فى الفول المبشور لناكله نحن بنهم بينما هم يشربونه لقد تفتقت عبقريتنا الفولوية لكى نحيل طعام الفقراء الى فتة رائعة الحسن والجمال وحاجة كده تذكرنا بحبيب الشعب والايام الخوالى فصار المكان موئل افئدة كل الفوالة المخضرمين واصبح مطعم الكوليرا وهكذا اسميناه ملتقى الجمعان ومهوى عاشقى الفول وغلاة محبيه وللفول بقية
07-31-2007, 07:50 AM
على محمد على بشير على محمد على بشير
تاريخ التسجيل: 08-07-2005
مجموع المشاركات: 8648
عارف ياتيتاوى موضوعك دا عجبنى خلاص .. وذلك لانى عضو فى رابطة اصدقاء الفول وتعرف ايام العزوبيه فى الغربه كان عندنا ولدنا اسمه هشام ودا كان رئيس رابطة اصدقاء الفول فى بيت العزابه ياخ دا كان بيدخل المطبخ فى العشاء وبيظبط لينا فول كدا عجب بس وازكر انو فى يوم جانى واحد سعودى شغال معانا مدير وكدا والراجل جانى فى البيت لامر هام وفى مواعيد العشاء وقاموا العزابه اتمسكوا فيهو بى شده وبى حليفه انو لازم يقعد يتعشى معانا وفعلا الراجل وتحت الحاح الجماعه اتوهط قدام صحن الفول المدنكل ومعاهو سلطه خضراء وشطه خضراء بى دكوه وانا كنت مشفق عليهو لظنى بأن العشاء متواضع وقد لا يقع على هوى الراجل
ووالله ياتيتاوى الراجل اكل اكل فى صحن الفول دا حتى انى ظنيت انو ما ضاق طعم الزاد من سنتين واكل الشطه والسلطه مع الفول وتوقف عن الحديث وقام اخر واحد من الصحن وبعد ان خلى الصحانه تلمع وعرق جنس عرق فى الدنيا دى اها بعد ماقام وغسل ايدينه وجاء واتوسط نص السرير وقش عرقه واخد ليهو نفس طويل قال لى ياعلى انا عمرى كله ما اكلت اطعم من صحن الفول دا ياخى انا بمشى مصر وباكل كل يوم والتانى فول وطعميه لكن الليله اكتشفت انو المصريين خراطين * وما بيعرفوا يعملوا فول ومن اليوم دا انا اشهد انو السودانيين اهل الفول الحقيقين وانو المصريين متسلبطين ساكت
وياريت لو الموضوع وقف عند هذا الحد ما جانى سعودى فى المكتب من اهل الراجل او اصدقائه والا وسالنى عن الفول وكيفية اعداده وانو عايز ياكل صحن فول زى الاكله سعيد وسعيد يتجازى لانو بى سببه نصف شباب المدينه اكلوا فول من يد هشام
07-31-2007, 08:26 AM
مجدي عبدالرحيم فضل مجدي عبدالرحيم فضل
تاريخ التسجيل: 03-11-2007
مجموع المشاركات: 8882
تيتـــــــــــا هيجتم أشجــاني بصحن فولكم المدنكل ده وماسانددوتشات أبوالعباس ببعيد ، ولا بزمن الدراسه وصحن البوش بموية المعشوقه الفولانية بآفله عنا أبدا ولك حق الدهشه في الأسم ونحن من نزرعه ونحصده ونسوقه والمصريين يأكلوه بالعافية النيلية وزكرتنا الفول فولي أزرعه وحدي وأحصده وحدي ونأكله جميعا في سودان العزة والخير الفولي العميم ،وهنا ياعامر نزكر أكشاك محطة خمسه ونادي الأمتداد وود الكول وعم أحمد(كوارع) يرحمه الله وفوله أبوجرجير والطعمية والكوارع دي بس يخلوها ليهو براهو وأن ممن تتلمزوا علية يدية التتلفه بحرير ومعزوم ياتيتــأ فتة كوارع بالفول ده كان عشانا المفضل نهاية اليوم وكان من المحظوظين من يصل لنا متأخر ويحظي بالطعم الفائح طيبوا من فتات الفول بالكوارع وهذة مجلدات تكتب عن هذة الشخصية المتفرده بعمر الدرجة التالتة ياأيها الفول المتهادي أنزل صحننا المتواطي مع هذا الفول السخين حرارته والذيت سمسمه والطحينه والجبنه مصادقته والجرجير والبصل الأبيض زينته والجماعة عايدين من الأستاد جلسته المسائية الجميل جمال المصطبه الرياضية بجوار منزلكم العامر ياعامر تلك هي مجرد نقاط تليها حروف وجمل وأسطر بمداد الفول العظيم .
،،،،أبوقصي،،،،
07-31-2007, 11:22 AM
Fadl Karrar Fadl Karrar
تاريخ التسجيل: 12-04-2004
مجموع المشاركات: 1904
قالوا مرة رجل اعمال مغندل غندلة مبالغ فيها يوم ماشي مكتبة شاف عتالي بيظبط فى فتة 4 عيشات بلديات دكوة بصل اخضر وليمونة شمار وزيت سمسم قعد يتفرج عليه من قزاز العربية المظلل العتالي ضرب الفتة بي مزاج وأداها كوزين موية الغندولي قال لي نفسه ( والله مستعد أدفع نص قروشي عشان مرة بس آآكل بي شهية زي حقت أخونا دا)
الكلام دا ما تحيز للفتة من كون إنها فتة يعني لو كان العتالي أكل ليهو عصيدة برضو كان ح يستمتع بيها لكن سيرة الفول خلتني أتذكر الفتة
الجو الايام دي جو فول ( بمنتهي البراءة ) ( وش برئ )
07-31-2007, 12:06 PM
عامر تيتاوى عامر تيتاوى
تاريخ التسجيل: 01-14-2006
مجموع المشاركات: 3328
Quote: العتالي ضرب الفتة بي مزاج وأداها كوزين موية الغندولي قال لي نفسه ( والله مستعد أدفع نص قروشي عشان مرة بس آآكل بي شهية زي حقت أخونا دا)
طبعا لانو الفول يمنح اكله الرضا والقناعة وهو طعام السواد الاعظم من السودانيين اللذين يمكنهم الاختلاف على اشياء كثيرة لكنهم يلتقون على صحن الفول الفول العظيم ممكن يكون واحد من عناصر الوحدة الوطنية الفعالة
07-31-2007, 11:35 AM
عامر تيتاوى عامر تيتاوى
تاريخ التسجيل: 01-14-2006
مجموع المشاركات: 3328
ياخى وصفك الرهيب لتلك الجلسة الفولوية الرائعة تؤكد بما لا يدع مجالا للشك عظمة ذلك الفول السودانى بتوابعه الزلزالية فهو سيد المائدة ومعشوق الجماهير ويبدو ان صديقكم هشام واحد من مبدعى الفول ومروضيه لانو الفول ده ياعلى زى نهر القاش لو ما حددت ليهو مسار ممكن يفلت منك فى اى لحظة ويطلع شبح فول ويكون المزاج راح شمار فى مرقة
Quote: الراجل اكل اكل فى صحن الفول دا حتى انى ظنيت انو ما ضاق طعم الزاد من سنتين واكل الشطه والسلطه مع الفول وتوقف عن الحديث وقام اخر واحد من الصحن وبعد ان خلى الصحانه تلمع وعرق جنس عرق فى الدنيا دى
ودى اجمل اللحظات مع صحن الفول المظبط على الطريقة السودانية المبتكرة تعرف لو قلت لى وحد مصرى فول بالجبنة يقول ليك معووولة ازاى يعنى وعشان تعرف ريادة السودانييين وحقوقهم التاريخية فى الفول لك ان تتخيل فولا دون جبنة الله يرحم ايام دكان شريف
علوة خليك قريب للفول بقية
07-31-2007, 12:16 PM
عامر تيتاوى عامر تيتاوى
تاريخ التسجيل: 01-14-2006
مجموع المشاركات: 3328
Quote: نزكر أكشاك محطة خمسه ونادي الأمتداد وود الكول وعم أحمد(كوارع) يرحمه الله وفوله أبوجرجير والطعمية والكوارع دي بس يخلوها ليهو براهو
كما ذكرت انت هذه اسماء عملاقة فى ذاكرة الفول الامتدادى الجميل وخاصة ود الكول الذى كان يتمتع بروح الفكاهة والمرح وهو يجهز صحن الفول للزبون وطبعا انت تعرف ذلك جيدا ولا اعى للتفاصيل من حيث البيض والبصل ووو المهم يامجدى كان هناك فوال رهيب فى الامتداد بجوار الجامع الكبير ومكان المستشفى الاكاديمى حاليا وهو ابوشنب وكان اسم المحل كشك ابو شنب هل تتذكره وكان فوالا وكذلك الشاى باللبن وكان فول ابو شنب يتميز بالجرجير والسلطات الخاصة وقد كان وجهة لعشاق ابو عين كحيلة وهناك ايضا فول عمك ادريس وكان ايضا كشكا بجوار ستوديو جاد الله جبارة على شارع الزلط وكان ادريس يتميز الى جانب الفول باالمخلل اما االافوال فى ذلك الزمان فكانت تضرب على البرش يعنى ارضا سلاح وده طبعا العهد الفولوى الاول قبل ان ياتى الجيل الثالث من الفول مع ناس مطعم لذيذ فى شارع واحد بالعمارات
فى الصين كنت على موعد مع تجربة فولوية جديدة ففى بكين كانت البداية مع المعاناة فى ظل انعدام اى بارقة امل تجاه وجود حياة فولوية على سطح سور الصين العظيم وبالمناسبة اسم البوست استشفيتو من فيلم محمد هنيدى فول الصين العظيم ورغم ان الفيلم كان يتحدث عن موضوع اخر تماما الا اننى وجدت فعلا ان فول الصين عظيم لانو ماممتوقع بالمرة وقد قضيت اياما فى بكين دون فول ولم يكن امامى سوى البيتزا والكنتاكى وحتى هذه كانت بتوجس خوفا من زيت الخنزير ولانها بتعمل كوليسترول وووو المهم بعدمرور اسبوع جاء الفرج الفولوى لقد عثرت على بغيتى فى مطعم عربى فى بكين اسمه الف ليلة وليلة يقدم الفول والمشويات وهذه الاخيرة ما علينا منها المهم الفول وبما ان صاحب المطعم لبنانى وشريكه مصرى فلم يكن هناك بد من قبول الحد الادنى من الفول والفول فى بكين غنيت ليهو زينة وعاجبانى واسالوا بورداب بكين نطالب بفول السودان العظيم فوق سور الصين العظيم حديد لاقى حديد
08-01-2007, 03:33 AM
Mutwali Malik Mutwali Malik
تاريخ التسجيل: 12-08-2005
مجموع المشاركات: 2720
الصديق تيتا لك كل التحايا اول مالفت نظري العنوان الذي يطابق سور الصين العظيم وفعلا الفول لايقل روعة عن السور وساحكي عن الفول وقصص الفول واشهر محترفي هذه الصنعة في امدر امان ولكن اجمل فول لفت انتباهي سابقا فول مدينة الحصاحيصا والذي شبهه احد الاخوان بانه فول خالي من المويه ويشبه الدلكة وساعتها لم نكمل العشاء وبتنا القوئ حتي الصباح حا اجيك برواقه بعد ان انعشت ذاكرتنا المعبقة بالفول
08-01-2007, 04:32 PM
عامر تيتاوى عامر تيتاوى
تاريخ التسجيل: 01-14-2006
مجموع المشاركات: 3328
Quote: ولكن اجمل فول لفت انتباهي سابقا فول مدينة الحصاحيصا والذي شبهه احد الاخوان بانه فول خالي من المويه ويشبه الدلكة وساعتها لم نكمل العشاء وبتنا القوئ حتي الصباح
وماذا عن فول بلاد العم سام
08-01-2007, 09:13 PM
Mutwali Malik Mutwali Malik
تاريخ التسجيل: 12-08-2005
مجموع المشاركات: 2720
الصديق تيتا بلاد العم سام فولها لا طعم له ولا رائحة اجارك الله فول معلب وبه كل المواد الحافظة يا اخي ليس هنالك اروع من فول بلادي من القدرة حار بوخو يلوي في احد المرات ايام المدرسة الثانوية وكنا ناكل في اشهر محل للبوش بالثورة الحارة الاولي واذكر صاحبة المحل امراة لطيفة جدا واثناء الاكل وتخيل كنا حوالي العشرة اشخاص وعند ادخالنا ايادينا مرة واحدة شافنا واحد عينو حارة وقال شنو ياشباب بتأدوا في القسم ولا شنو وطبعا طلبة كملنا الاكل حتي اخر لقمة ولم يصيبنا اي شئ
08-01-2007, 09:40 PM
عبدالكريم الامين احمد عبدالكريم الامين احمد
تاريخ التسجيل: 10-06-2005
مجموع المشاركات: 32520
يا الفوال اسرع انا جيت بالملاحة وجيب الزيت من امبارح انا ما اتعشيت كنت في حفلة واتغشيت رايكم ايييه في فول مزبط بوخو يولول زيتو مربط جاتو السلطة زيادة ازبط وجات الجنبة والكل اتربط... .. سلامي يا تيتا ومتولي وكل احباب الفول وعلي النجيلة جلسنا في انتظار الفول التيتاوي الشهي
Quote: يا الفوال اسرع انا جيت بالملاحة وجيب الزيت من امبارح انا ما اتعشيت كنت في حفلة واتغشيت رايكم ايييه في فول مزبط بوخو يولول زيتو مربط جاتو السلطة زيادة ازبط وجات الجنبة والكل اتربط...
طبعا ياكيكى كلامك الجميل ده ينطلق من محبة اكيدة للسيد الفول وده شىء طبيعى لانو الفول ( المظبط ) بستاهل يعنى زمان البركس الفول السمح يتهاجروا ليه محل ما فى والزول لو ما ضرب الفولة الصاح ما برتاح كدى احكى ليك الطرفة دى مرة واحد صاحبنا كان معاهو فردتو فى شغل ولما الشغل طرشق قام قال ليهو يازول مع السلامة انا ماشى اضرب الفول .. الفردة رد عليهو بسرعة وقال ليهو اصلو الفول ده تلفون تضربوا براك ما نمشى نضربوا سوا
08-01-2007, 09:45 PM
محمد عبدالرحمن محمد عبدالرحمن
تاريخ التسجيل: 03-15-2004
مجموع المشاركات: 9059
مالك علينا ياخى ..من قريت بوستك دا لى كم يوم شغال فول بس ..الليلة انا وصاحبك صلاح جبنا الفول الماخمج وزيت سمسم جاى من السودان امبارح وجبنة بيضا وطبعا الشطة نحن عندنا اهم من الفول ..وكان عشاء اسكت بس فاقدك ..لكن صدقنى برضو دا ماطعم الفول بتاع هناك داك (طعمو براهو) ..وانا جاى من السودان ودعمى ساقنى فطرت فول عند واحد جنب مشروع الواحة الجديد دا .. المحل دا تقريبا فى القضائية ..فول ياخى مبااالغة .. ياخى كل مااتصل بود عمى بنجيب سيرة بتاع الفول دا ..وانت راجع بالله اغشاهم وحاتدعو لى ..
سجلنى فى قائمة احباب الفول ..فى العشاء لاابدله بغيره ..
سلام
08-01-2007, 09:53 PM
Faisal Al Zubeir Faisal Al Zubeir
تاريخ التسجيل: 10-25-2005
مجموع المشاركات: 9313
Quote: بلاد العم سام فولها لا طعم له ولا رائحة اجارك الله فول معلب وبه كل المواد الحافظة يا اخي ليس هنالك اروع من فول بلادي من القدرة حار بوخو يلوي
فى مرة من المرات ايام العذوبية والهملة فى احد المجمعات التجارية لقيت ليك علبة فول مكتوب عليها بالخلطة السودانية من مزارع كالفورنيا قلت جانا الفرج نجرب الدويتو السودانى الامريكى ده يازول لقيت ليك الحكاية بايظة خالص وفول ما ليهو علاقة بالفول الفى بالى داك ومن يوما تاكدت تماما الا شىء غير الفول سوى الفول بتاع السودان عدييييل كده يبدو ان الفول الاميركى تايوانى وزى ما قلت الا بوخو يلولو
08-01-2007, 10:46 PM
عامر تيتاوى عامر تيتاوى
تاريخ التسجيل: 01-14-2006
مجموع المشاركات: 3328
من عمق إستغراقه فى المائدة السودانية, فالفول عاد من الأجندة الطعامية المقدسة ... بل أراه يتحول إلي إيدلوجيا إجتماعية, ويترفع إلى كونه أحد عناصر الهوية السودانية المعاصرة ... فما سر هذا الحب وكيف ظفر بقلوب الملايين السودانية , إذ لا يكرهه أحد أو لم أسمع بمن يقول بذلك , ربما يشكون من كثرة تكراره لكن لا يشكون من حبهم له ... وتقديرهم لأهميته التاريخية
فهو صحن السودان العظيم ... بحق
شكرا عزيزنا عامر تيتاوي على هذا الموضوع الطيب الفكه, ورغم أنني فطرت اليوم فولا ... لكن حا أتعشي بيهو عشان خاطرك فى هذا البوست .
للفول قصص وحكايات عديدة ،،، والسودان يزخر ( بمدمني ) الفول وعشاقه ومريديه ، وأعتقد جازما بأنه لا يوجد سوداني واحد لم يمر بمرحلة ( التفويل ) الإدماني سواء في مرحلة الدراسة أو مرحلة الإنخراط في العمل خاصة الحكومي منه ،،، حيث تتكون شلليات ومجموعات تتنافس فيما بينها على اكتشاف مواقع ( الفول المدنكل ) وبعد المرحلة الإدمانية أعلاه ممرت شخصياً ومعي صديقي الشاعر صلاح الغول بالمرحلة المرضية جراء الإدمان المزمن على الفول ،، فأصبح بين ليلة وضحاها سببا للآلام والسهر وأضحى عدواً ليليلاً يؤرق منامي ...
أخي صلاح الغول له ديوان شعر اسمه ( إلى ام درمان ) به قصيدة عصماء عن الفول إستأذنه لنشرها عبر هذا البوست التوثيقي الهام لفول السودان العظيم ، فإلى أبيات القصيدة :
Quote: من عمق إستغراقه فى المائدة السودانية, فالفول عاد من الأجندة الطعامية المقدسة ... بل أراه يتحول إلي إيدلوجيا إجتماعية, ويترفع إلى كونه أحد عناصر الهوية السودانية المعاصرة ... فما سر هذا الحب وكيف ظفر بقلوب الملايين السودانية , إذ لا يكرهه أحد أو لم أسمع بمن يقول بذلك , ربما يشكون من كثرة تكراره لكن لا يشكون من حبهم له ... وتقديرهم لأهميته التاريخية
فهو صحن السودان العظيم ... بحق
عزيزى لم اجد بدا من اعادة كلماتك المعبرة بعمق عن احد الامور الحياتية اليومية للسودانيين مثل الفول وتلك هى الاسباب التى دعتنى للكتابة عنه فما وجت شيئا يتفق عليه السودانيون فى غالبهم مثل صحن الفول
08-02-2007, 11:55 AM
عامر تيتاوى عامر تيتاوى
تاريخ التسجيل: 01-14-2006
مجموع المشاركات: 3328
صديقى عادل جبارة شكرا للقصيدة العصماء للاستاذ صلاح والتى تاتى فى سياق الفولوية التى لا فكاك منها وتاكيد على عظمة الفول الذى يشكل جانبا مهما فى الحياة السودانية انظر الى قوة التعبير فى البيت التالى :
اشهر محلات للفول بامدرمان يحتل المرتبة الاولي حاليا محل الواحة لصاحبه بلة وفعلا دي وصية لاي واحد يمر بامدرمان لازم يزور الواحة فول مش معقول محل برعي المريخابي البكائ ويقع في حديقة حي العمدة وتكون محظوظ لو مريت والمريخ منتصر وتعليقات برعي النارية كابو جابو بي ترابو وذلك بعد هزيمة الهلال من الموردة وقدرة الفول بكل ارتياح ممكن تدخل شخص كامل بداخلها ولديها منها اثنان شوف كيف الشغل ساعود مع المزيد من الفول قبل مايدخل علينا رمضان
08-03-2007, 08:29 AM
معتصم عيدروس معتصم عيدروس
تاريخ التسجيل: 12-06-2005
مجموع المشاركات: 515
والله يا ابوالنسب كلام الفول دا سمح بالحيل في مدني طبعاً الفول عنده طعم تاني .. لانو ما بتلقى ليك زول بياكل براه والناس اثنين اثنين وثلاثة ثلاثة وشكل زي ما داير.. عدنا في مدني الما اكل فول في كشك ما مشي مدني.. ناس كشك ديل حالة خاصة .. اتخيل واحد فاتح ليه محل فول بشد اربعة قدر في اليوم .. يديك الفول وما يديك معاه اي حاجة .. النسوان جوار المحل يبيعوا ليك العيش والطعمية .. والدكان يبيع ليك الجبنة والزيت.. الفهم شنو ؟ الفهم انو تقريباً نص مدني بتأكل فول في المحل دا الاتأسس في خمسينيات القرن الماضي .. وتقول فلسفة اصحابه انهم يتركون بيع الزيت والطعمية والعيش للنسوان حتى يزيدوا من رزقهم بحسبان انهن محتاجات لذلك.. عليك الله يا عامر شوف الفهم دا..
مرة عندي صاحبي جاي من الخرطوم مشينا نتعشى فول عند كشك .. قام خش يغسل يدينه لقى ليك الجماعة شادين ليهم اربعة قدر الواحدة قدر البرميل .. جاني جاري جري قال لي تعال شوف دا .. جيت خاشي قعدت اضحك .. قلت ليه يا حبيب مدني كلها الصباح بتلقاها واقفة هنا دايرة فول.. -- تعريجة رحم الله ابراهيم كشك صاحب هذا المطعم الذي توفى قبل شهرين من الان بعد اصابته بمرض الكلى.
08-03-2007, 08:33 AM
معتصم عيدروس معتصم عيدروس
تاريخ التسجيل: 12-06-2005
مجموع المشاركات: 515
مع أشهر فوال في مدني ابراهيم كشك: مدني تغيَّرت والفول أصبح وجبة رئيسية؟! اجراه:معتصم عيدروس وامير عبدالماجد * صاحب اقدم محلات لبيع الفول بمدني وربما بالسودان كله.. ابراهيم كشك.. أشهر فوال في مدني.. تشعر وانت داخل المحل ان مدني كلها اصطفت هنا.. والرجل يجلس وسط المكان.. يقولون إنه دائماً ما يردد عبارة (ماعندك.. تأكل وتمشي).. ويتحدثون ايضاً عن عراقة المكان وكونه من معالم المدينة.. جلسنا معه الى جوار (قدرة فول) كشه الشهيرة. * متى بدأت العمل؟! - انا لم ابدأ العمل بصورة مباشرة، بمعنى انني لست صاحب الفكرة فقد بدأ والدي المشروع في الخمسينات وذاع صيته وورثت العمل حوالى العام 1964 عندما تركت مقاعد الدراسة والتحقت بمحل الفول. * الاسعار كانت رخيصة؟! - الاسعار كانت تعريفة وقرش.. والزبائن اعدادهم كانت اقل من الاعداد الحالية. * ارتفع الطلب إذن؟! - نعم وارتفعت الاسعار ايضاً، فطلب الفول حالياً في محلي الذي تراه أمامك بين الف وخمسمائة جنيه (والماعنده بياكل) وسبب ارتفاع الاسعار في تقديري هو الضرائب والرسوم المفروضة علينا. * ذكرت ان اعداد الزبائن ارتفعت؟! - زمان كانت الفئات التي تتناول الفول كوجبة رئيسية معروفة وغالباً من الوافدين لمدينة ودمدني، إذ كان السكان هنا قديماً يعتقدون أن تناول الفول (تنازلا) او ربما (عيبا) وكانت وجبة الافطار غالباً ما تأتي للموظفين من المنازل لكن لعوامل اقتصادية ربما تحول الفول الى وجبة رئيسية لسكان المدينة. * متى بدأت تلاحظ إقبال الزبائن وتزايد أعدادهم؟! - في الثمانينات (الناس ظروفها صعبة). * طريقة البيع زمان وحالياً واحدة؟! - نعم وان اختلف الزبائن ودخلت شرائح جديدة.. وأنا اعتز جداً بأن هذا المحل كان المكان الذي تناول فيه قادة البلاد وجبة إفطارهم أيام دراستهم في حنتوب كدكتور حسن الترابي وجعفر نميري وغيرهما، واذكر ان نميري عندما جاء الى مدني في زيارة طلب فول مخصوص من محل كشك. * مدني تغيَّرت؟! - نعم اختلفت بصورة واضحة.. * الى اين الافضل أم الاسوأ؟ - للأفضل خاصة في عهد عبد الرحمن سر الختم.. المدينة الآن مضاءة وشوارع جيدة وخدمات.. وقد زارني أخيراً واخبرني انه وضع محلي على موقع مدني في الانترنت كأحد المعالم البارزة في مدينة ود مدني. نقلاً عن الصحافة
08-03-2007, 01:08 PM
Mamoun Ahmed Mamoun Ahmed
تاريخ التسجيل: 11-29-2004
مجموع المشاركات: 922
الطيب عوض ريد اشهر فوالي الدويم راجل نكته وساخر جدا
مره جاهم ضيف في البيت وطلب الضيف مصلاية وما كان عندهم مصلاية عمك ريد قال لي ولدو : ياود شوف ليهو شوال فاضي من المحزن الواد لف وجا وقال لابوه: يابا ما لقيت ليهو غير شوال مقدود
فرد عمك ريد: طيب ماتديه ليه.. يعني حتقع منو ركعة؟
08-03-2007, 04:10 PM
عزيز عيسى عزيز عيسى
تاريخ التسجيل: 09-18-2005
مجموع المشاركات: 1459
شكرا لهذا البوست الجميل عن الفول.. من شمينا ريحة الفول جينا جارين ناخذ لينا لقمة قبل ما يكمل..
Quote: بلاد العم سام فولها لا طعم له ولا رائحة اجارك الله فول معلب وبه كل المواد الحافظة
الأخ متولي متوكل،
يا حليلكم البتاكلوا فول العلب.. الظاهر عليك عايش في منطقة دي سي أو نيويورك.. يا خي إنتو الظاهر ما ناقشين حاجة.. في نوع فول ناشف بيجي من كاليفورنيا ولو مشيت المحلات العربية أكيد حتجده.. تعالوا عندنا هنا في تكساس نعلمكم كيف (تشدوا) الفول الناشف.. أها نديك الفكرة دي وأمشي طبقها وتعال ورينا الفول كيف؟.. بس ما تكلم الجماعة هناك يقوموا يخلصوا لينا الفول الناشف في المحلات.
شوف يا الحبيب.. أول حاجة تعملها (بل) الفول قبل يوم.. الأدوات المطلوبة أهم حاجة تكون عندك حلة بريستو فقط.. ضع الفول في حلة البريستو وصب عليها موية بكمية معقولة تغطيها حسب كمية الفول. بعض السودانيين بقولوا ممكن تضع عليها تمرتين أو كربونات.. لكن في رأيي هذا كله غير ضروري.. ما تضع مع الفول بتاع كاليفورنا أي حاجة ثانية.. (شد) الفول في النار لمدة 45 دقيقة.. وبعد داك شوف نوع الفول كيف؟! الشهر الماضي كنت مع بعض الأخوان في منزل الأخ الدكتور أحمد الصائم.. العشاء كان فيه سمك وزقني وحاجات تانية لذيذة.. قلت للدكتور أحمد من ضمن الأكل جبت معاي فول قدرة.. وعندي اليوم مزاج إني أزبط الفولة.. بس إن شاء الله يكون عندك جبنة وزيت سمسم وبصلة.. وجدت المقومات المطلوبة وظبط فولة محترمة جدا.. وكنت جايب معاي مخصوص رغيف (توست).. وضعت الرغيف في الفرن لمدة خمسة دقائق وأصبح (كرسبي).. أها الجماعة وقعوا في الفول وتركوا باقي الأكل.. وكل واحد فيهم يقول لي الفول دا جبتو من وين؟.. ياخي فولة ذي دي ما أكلناها إلا في السودان.. قلت ليهم أكلوا وأدعوا لي.
الأخ عيدروس،
Quote: عندنا في مدني الما اكل فول في كشك ما مشي مدني..
يا زول هيجت أشجانا بذكر فول كشك..
Quote: (ماعندك.. تأكل وتمشي)..
بالله شوف الناس دي كانت جميلة كيف؟.. الله يرحم العم ابراهيم كشك ويغفر له.
08-03-2007, 05:36 PM
طارق جبريل طارق جبريل
تاريخ التسجيل: 10-11-2005
مجموع المشاركات: 22556
بالله عليك الله دي تاني تلقاها وين لو ما في مدني؟؟؟؟ لكن بس يا عمنا كشك عرف سر اللعبة في انو يتصدق كتير يبيع كتير وانت براك شفت الناس دي التقول مربوطة بي حبل على المحل من كل انحاء مدني والقرى المجاورة ليها لازم يجوا يأكلوا فول في كشك.. جعل الله كل اعماله الصالحات في ميزان حسناته وأحل البركة في اولاده وجعل الجنة مثواه
08-03-2007, 06:41 PM
عزيز عيسى عزيز عيسى
تاريخ التسجيل: 09-18-2005
مجموع المشاركات: 1459
إنت عارف يا عيدروس.. جربت فول ودالعباس وفول محطة سبعة في الإمتداد ومحلات أخرى في بحري وأم درمان.. لكن أقول ليك حاجة لحدي الآن ما لاقاني زي فول كشك.. ياخي دا فول فريد في نوعه.. أها هسع يجوا واحدين يقولوا دي عنصرية ساكت! والما مصدق يمشي مدني ويجرب بنفسه!
08-04-2007, 10:44 AM
عامر تيتاوى عامر تيتاوى
تاريخ التسجيل: 01-14-2006
مجموع المشاركات: 3328
Quote: والرجل يجلس وسط المكان.. يقولون إنه دائماً ما يردد عبارة (ماعندك.. تأكل وتمشي)..
استوقفتنى كثيرا هذه الجملة فقد كانت مثل هذه المواقف واخلاق الرجال تميز الكثير من التجار وقد كانوا فى السودان ظاهرة وهم يقدرون ظروف الفقراء والمساكين تخيل يامعتصم كانى ارى وجه هذا السودانى الطيب فقد كان مثله كثيرون وحفظ الله امثالهم من يرى الفقراء بعين العطف
08-04-2007, 10:50 AM
خالد علي محجوب المنسي خالد علي محجوب المنسي
تاريخ التسجيل: 04-10-2006
مجموع المشاركات: 15968
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة
عامر تيتاوى
محمد نور أحمد
على محمد على بشير
مجدي عبدالرحيم فضل
Fadl Karrar
Mutwali Malik
عبدالكريم الامين احمد
محمد عبدالرحمن
Faisal Al Zubeir
Mamoun Ahmed
HAYDER GASIM
معتصم عيدروس
عزيز عيسى
طارق جبريل
خالد علي محجوب المنسي
فيس بوك
تويتر
انستقرام
يوتيوب
بنتيريست