الشقيقة الحبيبة الحنونة سوما، والله قصيدة تتفجر شجون، ولو تُليت على جبلٍ لذاب من النحيب. وأصعب مقطع فيها ياسوما هذا المقطع:
Quote: وبتذكر وداعكم لي .... وكت عتبت باب بيتنا ودموعكم تجرى تصرخ وى..... بحس بجريها في ضلوعى.. وبتعصر في كبيدتى شديــــــد وما هو شوى....
فهذه الصورة تُحاكي وتُذكرني بأول يومٍ لإنطلاق هجرتي، وآخر وداع لشقيقتي الصغرى "إقبال حجازي"، قبل أن أضرب بطول البلاد وعرضها، ولم أكن أعلم يومها بأنه سيكون - لي ولها - آخر وداع وبعده سأتجرع كأسات الفراق، ولو كنتُ أعلم لما هاجر ومن مكاني لما تزحزت، فقد عدتُ للوطن وكان نصيبي لإرواء شوقي منها، هو أن أقف على قبرها منتحباً وتالياً لبعض آيات الكتاب، فالعينُ تدمع والقلب يخشع وإنا لفراقك يا "قبولة" لمحزونون. وقد صارت لحظات الوداع قبل السفر هى هواجس موت أحد أفراد أسرتي والفراق الأبدي، ففي لحظات الوداع قبل السفر أتفرس فى وجوه عائلتي فمن ياتُرى سيكون التالى ل"إقبال" أهو أبي أم أمي أو أيهم من إخوتي؟! حتى لاتتكرر فجوة فراق إقبال والتى أحس بأنني وحتى الآن لم أودعها الوداع الكافي أو الذى يجب أن ينبغي، وتباً لهذه الغربة اللعينة، وعز الله القائل:" إذا كان فراق الأحبة غداً فيا شمس غد لا تشرقي". والتحية لكِ وأنتِ تُدغدغين فينا الحنين لأهلنا وبلدنا، وفى إنتظار سماع صوت الصديق الصدوق والفنان المهذب الرائع مصطفى السني "شماسي أساسي" وبلغيه عني أحر سلامي وزائد أشواقي.
07-13-2007, 07:03 PM
تماضر الخنساء حمزه تماضر الخنساء حمزه
تاريخ التسجيل: 10-13-2006
مجموع المشاركات: 5215
Quote: وأنا البتضارا من عينيها ما تشوفني وتنادى على.. وأنا البتشابا فوق للغيمه كان الغيمه تشفع لي .. كان الغيمه تختفنى.. وتحلق فوق ديارنا العامرة تسرح بي ..
فيصل يا نوبى سلام موشح بى سلام خاص من اهلنا ودعواتهم السمحة ضللت يومى بزهورك النديه وحنينك الدافق ربنا يهنيك ويرضيك و يسعدك يا يابا وين ما تقبل العافيه تفتحلك بابا آمين يا رب العالمين وان شاء الله نرجع كلنا سالمين وتامين لو قدرت الليله دى اوعدكم جميعا انزل العمل ده بعد اذن ود السنى طبعا انزلوا بى صوتو الدافىء الحنون لو غلبنى مدو لى يد المساعده يا اهلنا شكرا يا فيصل شكرا لمة حبان بعد فرقة *** اخوى هاشم احمد خلف الله حبابك وانت جاى من وسط السمحين تبرا يا يابا انت من البكى وقطيع القلب دعوات الام حنيـــــــــــــنه بتدخل الحشا طوالى ربنا يديها الصحة والعافية ويرد غربتك ليها يا رب ويا ريت نسمع من كلامها الحنين ويا ريت تنزلوا لينا هنا عارف يا هاشم اخوى الشعراء من اهلنا الكبار كلامهم بكون صادق ومرهف جدااا امى ايضا تقرض الشعر وبتقول كلام مرات اقيف قدامو كتير واقول من وين بجيبوا اهلنا التعابير الجميله دى ربنا يديهم الصحة والعافيه ان شاء الله ويا ريت اخوى هاشم نقرأ ليك انت برضو وتشاركنا سماحة نضميك الزين شكرا اخوى هاشم شكرا دعوات والدين *** سلااااااام يا النذير الحنين والله الشوق غيمه ومطرتين يا حليلك وحليل ايامك السمحه وين الحى بيك ؟ والف الف مبروك العرس يابا ان شاء الله تتهنا وتسعد ديمه يا ود القبائل المى كتر الف الف رحمه على الشقيقه اقبال ربنا يتولاها برحمته ان شاء الله والله قطعت حشاى بى كلامك وبكيتنى من جوه لها الرحمه ولكم الصبر ويا رب ما تسمع خبر شين تانى بركة رب العالمين ترجع سالم وتام وتلقى اهلك سالمين وتامين آميـــــــــــــــــن والف مبروك من تانى العرس وشكرا النذير الحنين شكرااا عديلة وزين *** تماااااااضر يا انيقه طلتك رشت عبيرك فى كل الساحات المحنة فايتاك انتى وين يمه تبرىىى يا يمه من كل شر تسلمى على الطلة ويا ريت تلحقينا انتى ولو عندك الاغنيه بى صوت مصطفى نزليها لينا ولا اقول ليك تعالى لى فى البال برسلا ليك وانتى نزليها باقى اختك شترا مره واحده فى التكنلوجيا دى على فكره القصيده من الحان مصطفى السنى الشفيف عارفه يا تماضر انا بتبكينى لما اسمعها منو مش انا براى ناس كتااااااار فرشوا عديل لانه جد مصطفى اداها لحن مبااااااااااااالغه فى الحنيه اذكر انه مره حكى لى غناها لى شاعرنا المبدع محجوب شريف فى زيارته الاخيره لى لندن ولم يتمالك الاخر نفسه مصطفى حنين ومحجوب حنين ربنا يحفظهم الاتنين شكرا تماضر شكرا ضل الضحى
Quote: وأنا البتشابا فوق للغيمه كان الغيمه تشفع لي .. كان الغيمه تختفنى.. وتحلق فوق ديارنا العامرة تسرح بي .. ولما الغربة تمشى تفوت.. أجيكم تانى بين ايديكم..
Quote: فراقكم انتو يا أهلي.... دريباً قاسى كلو شوك بطعن في القليب الحي..... وبتذكر وداعكم لي .... وكت عتبت باب بيتنا ودموعكم تجرى تصرخ وى..... بحس بجريها في ضلوعى.. وبتعصر في كبيدتى شديــــــد وما هو شوى....
Quote: وشلت حنانكم الغالي ... وحفظتو معاى بين ايدى.. وكت اشتاق ..افرً ايدى ..... ألاقيك يمه... ألاقى الخالة.... ألاقى العمة بتقول لي .. ودعتك الله ود بطني.. قريب ترجع تانى تضوي متل الضى...
Quote: رضيت بالغربة يا أهلي ....... رضيت بالغربة شان عزة حروفاَ غالية فوق أحلامي تتواري وتقول لي .... ياني راجياك تانى ترجع لي. ولو عارف السنين بتهون كفاى الفات ... وكان اديتك الباقي … وبراك عارف الحنان العندى متل اللبنة صافى نقى....
Quote: وحاتكم انتو يا أهلي ... ما فى احنً من أهلي .. منو الغيركم بعرف البى..... ويقاسمني الزمن لو جاني تارى على...... لكنى خلاص اتيمنت ... واتيقنت .... ما دام الغربة صبحت نغمه… بسمع صوتا فوق أضنى ...
سلام الأخت الاستاذة الشاعرة الرائعة دوما اسماء الجنيد تعرفي يا سوما من هسه حضري المناديل والبشاكير لناس المنبر قبل انزال الاغنية بصوت المبدع مصطفى السنى. الكلمات في غاية الوصف والتعبير لحال المغتربين والمغتربات ومصطفى اضاف ليها لحن في منتهى الروعة والجمال، طبعا انا سمعتها من مصطفى مباشرة في البال توك السنة الماضية ، ويخيل لي بان مستر بال ذاته بيكون مشى شاف ليه منديل ولا بشكير ولا عمل ميوت ... لــول ...... انا لي اكثر من 15 سنة برا السودان، وصيتي لناس ال 20 و30 سنة غربة يمشوا يسمعوا الاغنية في الحوادث حتى يكونوا بالقرب من الاسعافات الاولية.
وعشان ناس المنبر يفرشوا مرة واحدة هاكم دي كمان:
Quote: يوم فى الغربـــة مصطفى عبدالماجد المامور
يوم فى الغربة ماشي براى وشاقي الحّـى لقيت وحيدة زى أمي ترضع فى وليدها صبّي ويعصر فى ضريعها شديد .. يناتل فوقه يصرخ وّى وجيتها قريب ..لقيتو ضريعها ضرع أمي داري غزير أظنو لبّي *** وقفت شوية وأتملت فوقها كتير لقيت فى وشيشها أغرب شئ !! عيــون أمي وقت ما تغوص جفون الليل .. تفتش لي وفى حدقاتو تلقاني .أحفظ فيهو أشعاري ويدمدم بقصيدة لّي وأشــوف فى قمره وش أمي *** وأشوف دمعاتها فى شلاخها جاريات لي بقيت كن شفتو بادي هلال .. تجرى الدمعة فى عيني وأتذكر دمـوع أمي يقالدوني يوادعوني يشابن لي وتنقص دمعة من شلاخها ..ترقد لي فوق خدّي *** مافي أحن من أمي أجيها صغير .. أجيها كبير تفلينى ،، وتقردن لي تحجينى وتوسوس لى : تكبر لى يا ولـدي ,اشوفك ضاوي مثل الضّي تحجيني وتشيل كبري واشوف اولادك يفرحوا بّي احجيهم الوليهم ينوموا العافية فوق إيدّي *** يوم أسمع كلامك داك يوم اسمع كلامك داك أحس العبرة تخنقني وتحسي جوابي فى عينّي واقع فوق حضنك الدافئ .. وأسلم ليكِ فوق رأسك وأضمكِ إنت بين إيدي وأحقق ليك أمنيتك مهما تقسي تصعب لي أوديك مكــة .. ألفين مره ..كن الألف يبقي شوي *** وكن كــبرك!!؟ أساهر الليل اشيلك بين أيدي وتكبر لي ..تحضري عروسي واولادي ويفخروا بيك ..متل ما كنت تفخري بي ولو ما الدنيا فوقها شويه اكاما ما الدنيا فوقها شوية متل أمي أكان القمري يبقي حدّي ويعيش الناس ضلام فى ضلام يفتشـوا شمعة بس للضّي *** شمعة بتفني زى أمي عشان نورها يفضل حي أكان ماجيتها من بطنك ! أكان ما جيتها من بطنك أكان الدنيا حتى الأخرة ضاقت بّي عشانك إنتِ يا أمي وعشان بأبوك متسمي وأبوك العارفو ما زول نّي عشانك أنتِ قلبي كبير وضيو كتير وماخد من شمعتك ضي *** بـنــده الله إنتِ تعيشي يا أمي وكل الباقي خلي علّي عشانك إنتِ وعشان ما إنتِ نور عيني تشيخي تعيشي بيناتنا وأشوفك غيمة ماشه علّي غيمة بتقصد المحتاج ..وفضلة خيرك يبقي هو حيّ وخيرك يغشي كل الناس .. من الماشي بالعكــاز لى عند البيحبي حبّي *** وأشوفك فى عيون الناس عبيراً صافي جاي نقّي أحس نسامه فى جوفي ،، تخش بسهولة فى رئتيي شعري القلتو يمه حزين شعري القلتو يمه حزين وكله مآسـي مرت بّي *** إلا غناك يا أمي زفرة ونبضه نبضه وزفره زفره ونبضه.. فى دمي وبسمه عريضه فى شفتي ..
مع خالص ودي وتقديري ،،،
07-13-2007, 08:24 PM
هند محمد هند محمد
تاريخ التسجيل: 05-30-2007
مجموع المشاركات: 4300
الاخ العزيز دكتور فيصل محمد حبابك يا الرزين طلتك جابت لينا المطر يوماتى وفرهدت النوار بين الفروع متناطى ضللت غيماتك بيوتنا ضهريه فرشت فى بوادينا الخدرة متكية تسلم يا الحنين على الكلام الرصين اسعدتنى يعلم الله مرتين بى طلتك وبى مشاركتك بالقصيده الحنينه عن ارق من فى الوجود (الام ) مافى زيها الله يديهن العافيه العايشات ويرحم من فارقن الدنيا الفانيه يرحمن بقدر تعبن وسهرن وشيل حكرن الاخ المرهف الشاعر مصطفى عبد الماجد المأمور ابدع بحق وحقيقه فى وصف الحالة فى الغربه والشوق للام يا سلاااااااااام عليه وعليك اخى الشفيف د/ فيصل قلت لى نكلم الجماعه يجيبوا ليهم بشاكير .. كر يا يابا والله بتبكى خاصة بصوت مصطفى بركه السمعتها والله ... يا رب ننجح ويسمعها كل الاخوان والاخوات الاعضاء والزوار شكرا اخى د/ فيصل شكرا أردب محنة *** هند الحبيبه الغاليه تسلمى يا ست البنيات لى حدهن مرورك اسعدنى ايما سعادة ربى يسعدك وين ما تقبلى يا هندويه السعاده تبقالك رفيق طول الطريق يمه شكرا هند شكرا دعوات حبوبه
07-13-2007, 09:29 PM
اسعد الريفى اسعد الريفى
تاريخ التسجيل: 01-21-2007
مجموع المشاركات: 6925
( إياكم انتو ما بلدي. .وإياكم انتو ما أهلي.... وإياكم انتو غنوه قديمه في شفتي... بشيلكم آهه في الغربة.. وبشيلكم نغمه في الفرحة.. وحنانكم يا هو نور عيني....)
Quote: لو دايرين تبكوا صحى صحى اسمعوا القصيده دى ملحنه ومغناة بصوت الشفيف الحنين مصطفى السنى التحية ليك يا حنين بحاول انزلا ليكم بى صوتو لو قدرت التحية للجميع ورد الله غربتنا جميعا سالمين طيبين بركة رب العالمين
فعلا قصيدة تبكِّي بالقراية ساكت.. وأرجو أن تقومي بعمل إلقاء مسجل للقصيدة بصوتك وتحاولي إنزاله هنا، فمثل هذه القصائد أحب أن أسمعها ملقاة قبل أن تكون مغناة، وطبعا في انتظارها مغناة من مصطفى السني.. قبل يومين سمعت قصيدة من أداء الفنانة رشا شيخ الدين أهديها لك ولزوار البوست بالضغط هنا: http://www.sudani.ws/music/rasha/algorba_talt.html
ياسر
07-14-2007, 07:53 AM
الطيب شيقوق الطيب شيقوق
تاريخ التسجيل: 01-31-2005
مجموع المشاركات: 28804
الاهل الطيبين الشوق نيلين تسلموا كلكم على الطلة نورت بيتنا والحلة *** اخوى اسعد ود الريفى حبابك من تانى اريتك تبقى طيب انت وانا البى كلو هين كل الاحترام والتقدير يا ود البلد الاصيل وشكرا تيراب جدود خيرو ما معدود
*** اخوى محمد خليل يعلم الله طلتك عجبتنى بالحيل واحساسك انت مدفق فى السهلة خير ومهلة يديك قدر السعادة الزرعتها جواى يعظم شانك ويعلا مكانك يا ضى شبابيك القبيلة شكرا لا تكفى اخى محمد شكرا دعوات حبوبه محكرررررره فى مصلايتها
*** الحنين حاتم ابراهيم كيفنك يا العشا يا قمر العشا وجعتنى جوووه كلمتك ( مالك علينا يا سوما ) اعفا لى عليك الله والله حسيتها فى حشاى ربنا يرد غربتك ويلمك بى اهلك سالم وطيب وتلقاهم طيبين بركة رب العالمين شكرا اخى حاتم شكرااا مدمدمه بى طيبة اهلنا القبيل شكراااااضل الضحى يا اصيل
*** الاخ الكريم ياسر الشريف صاحب الحس الرهيف والقلب الشفيف تسلم يا وريف وريف العبارة غزير المعانى اسعدنى مرورك حد الفرح السابح فى السحاب طلبك مجاب اخى ياسر وفعلا انا كنت ناويه انزل القصيده بى الصوت وتاني بى صوت مصطفى السنى ربنا يساعدنى انزل ليكم العمل ده بكره بالصوت ان شاء الله شكرا اخى ياسر شكرا مطامير فرح
07-14-2007, 10:04 PM
Haytham Abdulaziz Haytham Abdulaziz
تاريخ التسجيل: 05-28-2006
مجموع المشاركات: 2899
طعم الغربة ما بنضاق .. حنضل مر ... و هذا ما أقاسيه انا في غربتي منذ التسعينــات ...
Quote: فراقكم انتو يا أهلي.... دريباً قاسى كلو شوك بطعن في القليب الحي..... وبتذكر وداعكم لي .... وكت عتبت باب بيتنا ودموعكم تجرى تصرخ وى..... بحس بجريها في ضلوعى.. وبتعصر في كبيدتى شديــــــد وما هو شوى....
Quote: ورد الله غربتنا جميعا سالمين طيبين بركة رب العالمين
آمييين يارب سالمين و غانمين و لأهلنا راجعين و كلنا تامين ... و سالمين...
و لك و لزوار البوست ... نار البعد و الغربة .... شوق لإهلي و الصحبة...
الحنين ود الطيبين اخوى ود شيقوق حبابك يا دخرى الاهل حبابك وحباب طلتك من تانى انا زاتى والله يا الطيب يا خوى حنيت فى حال اخونا حاتم وبالحيل نضمو دخل على ان شاء الله ما يشوف يوم شين فى غربته ربنا يرجعوا شديد لى اهلو ويجمعنا كلنا باحبابنا السمحين الغاليين بركة رب العالمين
*** بت امى الحنينه سمية بت ابونا الشيخ الحسن الله يوسده البارده كيفنك واريت حالك زين مشتاقين رغم المسافات القريبه الطيب انا عارفاه بكاى يا سميه ومتضارى فى ناس حاتم ويقول لى يا حليلو حاتم يا سوما ههههه دحن خلى على انا بعرف دواه ود السنى بسلمم عليكم والله تخريمه اها انتو لسه راجين السودانيه فى الكريبه الله يسهل بس لكن التبقى ليكم بى تووووووووووووبه لى حبووووووبه شكرا سمية شكرا بلداتنا القدام
** الاخ هيثم عبد العزيز كيفنك يا الحنين شكلك الغربه مجرساك بالحيل والله ما بتنضاق وماليها طعم فى دى صدقت تب الله لا اطراها الله يتوب علينا منها ويرجعنااهلنا سالمين تامين بركةرب العالمين والف الف شكر على اللحن الرائع زى طلتك فرشت لينا الساحات رياحين رغم وجع الغربه اللعين شكرااا اخى هيثم شكرا خريف الشرق والمطر البرق شكراااا محنة
Quote: فراقكم انتو يا أهلي.... دريباً قاسى كلو شوك بطعن في القليب الحي..... وبتذكر وداعكم لي .... وكت عتبت باب بيتنا ودموعكم تجرى تصرخ وى..... بحس بجريها في ضلوعى.. وبتعصر في كبيدتى شديــــــد وما هو شوى....
حباب اهلى النذير لووووووووووووووووووول والله ضحكتنى يا النذير يا خوى قلت لى داير قروش الدخول انت بالزات دخلت اكتر من مره غايتو انا بدفع الربع والباقى على تماضر عشان هى البتعرف تنزل الاغنيه انا من الاول قلت ليكم يخربنى شيلى شيلتك يا تماضر مع ود عمك حجازى
قمة المشاعر الإنسانية وقد إستعملت فيها كل العبارات والصور التي تعكس معاناة الحالة .. أبدعت وفإن كان طعم الغربة مرير وكريه وعانى منه الرجال فما بال القوارير اللآئي خلقن من مشاعر رهيفة وذوات مرهفة وكذا أحاسيس بنعومة المخمل ‘ لقد أبدعت وشرحت الحالة وعبرت عن المعاناة .. مع الغربة يولد الحنين والحنين هو إستداء الذكريات ولا تفعل ذلك إى روح رقيقة شفيفة دفيقة العبارة .. لقد زلزلتني الكلمات لما تحمله من صدق المشاعر والتعبير عنها ، أبدعتِ
سلام حباب الغاليين ناس الجروف والطين الشوق نيلين ** الاخ ابو بكر تسلم يا الحنين مرورك اسعدنى وملانى فرح من راسى لى كرعينى يعلم الله كتر الف خيرك ابو بكر اخوى وشكرا لا تكفى شكرا شوفة اهل بعد غياب ** بدر الدين الزول الحنين حبابك يا قرة الوالدين اسعدنى المرور يا بدر البدور قلت لى يكتروا ليك من الحنين ما تراكا ماشى ليه يا الرزين الله يسعدك ويلمك فى السمحين شكرا ونسة اتنين امانى وبدر الدين شكرا محنة
يا اهل المحنة وود مدنى الحنينه انا زاتى روحى بتذكرنى بمدنى العتيقه وبريــــــــــــدها وبعشقها حد الثمالة رغم انى بجيها زيارات لكن... مدنى فيها محنة وولف كتااااااال يا celecon شكرا قدر محنة ناس ود مدنى وقدر سماحتها فى القلوب وقدر سماحة طلتك لينا الليله شكرا ممتده بطول بحرنا ومخضرة بخضرة جروفه *** العزيز ابو بكر يوسف ابراهيم سلام بى بحجم الوطن عارف يا ابو بكر يا خوى من ما قريت كلامك ده .. بقيت امشى واجى اتاوق اتاوق فيه مرتين تلاته ومن امس على الحالة دى غلبنى وحات خوتك ارد ليك لملمت كل الحروف ونسجت من احاسيسك تعابير حقيقى اخجلتنى وزلزلتنى من جوة .. وحسيت باحساسك العميق تجاه كلمات القصيده وتجاه غربتك وشوق للاهل ربى يسعدك قدر سعادتك لى بنضميك وهرجك المن الجوف شاحده الله يا ابو بكر يا خوى السعاده تبقالك رفيق طول الطريق والعافيه تبقالك هدم يا ود العم وشكرا مطامير فرح.. *** ود شيقوق الحنين صباحاتك بيضاء يا دووووووب قريت كلامنى لسميه وحات الله انت بكاى برا شمارات ولا قطيعه علا بكاك حنيــــــــــــــــــــن زيك الله يديك السعاده قدر محنتك يا ود الاهل وان شاء الله ما تضوق للغربه يوما مر تسلم ود شيقوق وشكرا حنينه زيك ...
*** عبده يا عبده يا حليلك وحليل حلفا الحنينه بى ناسها وينك يا ود امى ..يعلم الله الشوق شلالات جاريه عاش من سمع عنك كل خير طلتك اسعدتنى بعد غيابك الطال شوقى لى حلفا اكبر من المسافات بين الحلفتين واكتر من قصبها الاتحصد واللسه ما اتزرع وقدر المحنة الساكنه جوف اهلها ... شكراااا عبده شكرا دعوات حبوبا..
07-20-2007, 08:56 AM
الطيب شيقوق الطيب شيقوق
تاريخ التسجيل: 01-31-2005
مجموع المشاركات: 28804
ود شيقوق انا كان بعرف ارسلا فى الاميل ما كان نزلتها ليكم هنا دحن ياخوى ما تفضحنى ساى قدام الناس برسلا ليك باكر بالدرب فى سى دى ** تخريمه يا حليل الام ما ديمه حنينه الله لا جاب اليوم البنزل منها دميعه ويخليك ليها ويخليها ليك .. قادر يا كريم لكن بينى وبينك كدى قول لى .. قريتها لى امك ولا لى ام الوليدات الله يديهن العافيه الاتنين يا رب العالمين شرا ود شيقوق شكرا مارقه من الجوف
*** الاخ مدثر حبابك وتسلم انت يا العشا من كل بلا اسعدنى مرورك يا ضى شبابيك الاهل شكرا اخى مدثر قدر سماحة طلتك يا ود اليلد شكرا محنة
07-20-2007, 07:25 PM
الطيب شيقوق الطيب شيقوق
تاريخ التسجيل: 01-31-2005
مجموع المشاركات: 28804
Quote: شيقوق انا كان بعرف ارسلا فى الاميل ما كان نزلتها ليكم هنا دحن ياخوى ما تفضحنى ساى قدام الناس برسلا ليك باكر بالدرب فى سى دى ** تخريمه يا حليل الام ما ديمه حنينه الله لا جاب اليوم البنزل منها دميعه ويخليك ليها ويخليها ليك .. قادر يا كريم لكن بينى وبينك كدى قول لى .. قريتها لى امك ولا لى ام الوليدات الله يديهن العافيه الاتنين يا رب العالمين شرا ود شيقوق شكرا مارقه من الجوف
افضحك شنو انا والله قايلك ناقشة الشغلانية اكثر من السنى ابو العزائم ذاتو - المهم ماشي مشكلة سلميني السي دى خليني طرب ليك ناس هاشم خلف الله المرهفين ديل - اصلهم بدون اغنيتك الا يسندوهم تسند .
Quote: لكن بينى وبينك كدى قول لى .. قريتها لى امك ولا لى ام الوليدات
سوما انت عايزاني ما اطل بهنا تاني ولا شنو ؟ اها قريتها لامي اول وتاني لام عبد الله لكن لام عبد الله ما كملتها رحلت بى لقصائد تانية ؟؟؟؟؟؟؟
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة
فيصل نوبي
هاشم أحمد خلف الله
النذير حجازي
هند محمد
.. كر يا يابا
اسعد الريفى
mohmed khalail
Yasir Elsharif
الطيب شيقوق
Haytham Abdulaziz
abubakr
بدرالدين شنا
فيس بوك
تويتر
انستقرام
يوتيوب
بنتيريست