السلام عليكم الأخ بكري والأخوة والأخوات البورداب .
أي تضامن يا أخ بكري !!!!
ناس بينظروا ليك كعبد عبد عبد عبد عبد .... إلى آخر الدنيا.
زي ما قال سعادة القنصل البجيبك ليهم شنو ؟؟؟؟؟
بلد ما دايراك البوديك ليها شنو ؟؟؟؟؟؟؟
ما واحدة من اثنين لا ثالث لهما:
إما أن لا تذهب وإن ذهبت تغادر فوراً.
والثانية أن ترضى بالعبودية والذل وما تفتح خشيمك بي كلمة.
يا جماعة نحن دايرين منهم شنو ؟؟؟؟
زي ما احنا عبيد في نظرهم ويشمئزون من لونا، هم أيضاً في نظرنا حلب حماريط وتذكروا أنه في مجتمعنا لنا نظراتنا فداك عبد وده حلبي وأنا شايقي وأنت جعلي والدقلاوي ما برضى بأدروب وأدروب ما بملى عينه أبكر ... وهكذا .
أوعكم واحد ينط يتفلسف لي ويديني محاضرة في المساواة ويقول لي والله إحنا في أمريكا ولا في سجم الرماد عندنا كده وما عندنا كده، حتى في أكبر دول العالم تقدماً وحضارة تجد العنصرية والجهوية وما تغالطوني وتغالطوا نفسكم ، فقط الإختلاف في تفاوت نسب العنصرية إرتفاعاً وهبوطاً وأختلاف نسب المجاملة أيضاً ، لكن عنصر البشر أي واحد فيه شيء من العنصرية ومدي مش تجاه الأجناس الأخرى أو القبائل فقط بل لو كل واحد فتش بتجرد سيجدها أو على الأقل سيجد ظلها حتى داخل البيت الواحد وفي العائلة الواحدة وفي اللة والقرية والمدينة والقطر والقارة، وأقسم أن من يقول بغير ذلك كاذب ومحترف كذب.
طيب ما ما دام الأمر كذلك ماشين نزعل من الناس ليه؟؟
ما كل واحد فينا يقعد في واطاة الله دي وكفانا سودانا والله واسع والخير فيه كثير ووفير ويكفي أنه يجري به أطول أنهار العالم ، ما نتلم في حوشنا المليون ميل مربع ده ونعمره ونعيش فيه بي سوادنا وبياضنا وخدارنا.
في نقطة مهمة قبل ما أختم ، ياريت نحاول نحن السودانيين خاصة التخلص من عقدة أننا أفضل خلق الله على أرضه فهذه إدعاها اليهود وحقوا ما نافسهم فيها.
فالنقبل بلوننا ولهجتنا وعاداتنا وبلدنا فهذا ما يميزنا وأسمنا سودان من السواد وهذا ما يميزنا على غيرنا فالنرضى به ونتعايش معه.
أما مسألة قبولنا في الجامعة العربية وأن السبب أننا أفضل من يتحدثها فهذا هراء ومجرد إدعاء وكل عربي يدعي أن لهجته العربية عي الأصح ولا يوجد أصح من أبو يمن وأهل الجزيرة العربية هم أهلها وإن كنا نأخذ عليهم المآخذ ونتتبع ما نظن أنه أخطاء لأنه لا يوافق لهجتنا فهذا تطاول منا ومنا من يقول (خيط وهيت وكيت).
بالله يا عم بكري خلينا من الكلام ده وبدل ما نجوط ساكت حقوا يكون التضامن بأن ننصح أخوتنا بأن يلموا نفسهم ويحفظوا كرامتهم ويعودوا لأرض الوطن بي حلوه ومُره.
والشغلات القاعدين يشتغلوها بره ويخجلوا منها في السودان لو اشتغلوها في السودان بكرامة لعاشوا بكرامة (والمعنى في بطن الكاتب).
والسلام.
_____________________________________
وامغستي رحل تلوت الليل ،،،،،،
_____________________________________
(عدل بواسطة Al-Shaygi on 11-16-2003, 11:37 AM)