وصل صباح اليوم الاستاذ بكرى ابوبكر مدير وصاحب موقع سودانيزانلاين مطار كالقرى فى زيارة سريعة للمدينة تستغرق 48 ساعة بسبب ظرف عائلى طارئ ..... --------- انتهى الخبر الرسمى,,,,,,
------------ انا سمعت بالخبر قبل 25 دقيقة وقمت بالاتصال به تلفونيا للتنسيق لعمل يوم احتفالى تكريمى له لكن للاسف ولضيق الزمن لم اتمكن من تحقيق ذلك .... فى النهاية استطعت ان احصل على بضع ساعات اليوم السبت وبعد الافطار (حوالى الساعة العاشرة مساء) الفكرة ان نجلس فى احدى المقاهى حتى منتصف الليل ,,,,,, الدعوة مفتوحة للجميع للقاء فى الداونتاون,,,,
يا ألف مرحب بالباشمهندس بكرى أبوبكر بكالقرى قادما إليها من عمق صحراء أريزونا وهجير شمسها الحراقه ليرتاح فى برارى تحرسها الجبال وتتدفق عليها أنهارا وينابيعا وبحيرات وتمنحها جمال الوجه وحلو المذاق.
ألف مرحب بك يا بكرى
منصور
08-12-2012, 01:03 AM
عبدالكريم عبدالله عبدالكريم عبدالله
تاريخ التسجيل: 06-20-2011
مجموع المشاركات: 480
النصري سلامات و رمضان كريم باللاي الزعيم في كالقري ؟ كلامك لو كان نزلتو اُمبارح الجمعة بالضهر ، هسه الواحد تلاقي منتظركم في السيتي سنتر فكرت في الجية بس قدامي ساعتين و شوية و معزوم فطور ، غايتو تحيات ادمنتون ليهو
بتمني ليكم قعدة اخوية في الداون تاون بتاعكم
....... كريمو
08-12-2012, 02:44 AM
هشام هباني هشام هباني
تاريخ التسجيل: 10-31-2003
مجموع المشاركات: 51292
تصدقى أنا الوحيد من كالقرى من لستتك تلك وتراجى تبعد منا بأكثر من أربعه ساعات طيران وكذلك ياسر طيفور أما هنا يوجد النصرى ومحمد النور كبر والدكتور عبدالمنم موسى والدكتور إبراهيم عثمان وبالقرب من هنا معاويه المدير وعبدالعظيم كودى ويوجد أيضا حامد الصاوى وإبن عوف والرزوقى ودكتور أصيل وآخرون ربما لا أدرى بهم وجاءنا محمد عثمان دريج زول مصيبه قادما من مدينة تراجى ولو عندك أى وصيه لا مانع.
ويا هبانى الشطه كانت كاربه
ويا طلعت إفتقدناك حقيقة وياخ وجودك كان مها بكالقرى ولكنها المعايش
لكم جميعا السلام واليوم سنصلى بعد الإفطار مع بكرى وسندعوا لكل الأصدقاء وعلى كل الأعداء بصدق وإخلاص.
النصري سلامات ورمضان ان شاء الله ما بوظ برامجكم الغذائي الكارب داك لمحته في بوستك الشهير اياهو(ههههههههههههه).
ومرحبا بالرفيق الصحراوي بكري ابوبكر منور الديار يا كمرد.
بالله شفته بلدنا دنيا وشفتها الخضرا كيف؟! وأمانه الصحاري ما عندكم يا باشا.
اها يا دندون...تراجي ومالها ومال الضهاري دي معقول هامش سياسي وكمان نبقى في الهامش الكندي(ههههههههههههه)؟! يا حبيبه اديها صنه.....اها وحاتك نحن هنا مركز وناس الهامش ديل يا هم ناس منصور المفتاح ديل الا عاملين لينا فيها و لا ناس ولاية الوحده البترول عندهم (عشان كده كل زول عامل ولا (الكفيل) ما قادرين نقول معاهم بغم(ههههههههههههههه)!
Quote: نصرى سلامات ولاقى تراجى ؟؟
وبعدين يا حبيبه انت قايله ابو صعله ده ما قابلاناهو وحاتك زرناهو في دياره (كنت في ورشة عمل بولايتهم العامر اريزونا)وكثر خيره اكرمنا وعزمنا في بيته. اها قولي ما شفتي الصور كمان؟!
وبالله الامم دي كلها في كالقري(ههههههههههههههههه)
Quote: تصدقى أنا الوحيد من كالقرى من لستتك تلك وتراجى تبعد منا بأكثر من أربعه ساعات طيران وكذلك ياسر طيفور أما هنا يوجد النصرى ومحمد النور كبر والدكتور عبدالمنعم موسى والدكتور إبراهيم عثمان وبالقرب من هنا معاويه المدير وعبدالعظيم كودى ويوجد أيضا حامد الصاوى وإبن عوف والرزوقى ودكتور أصيل وآخرون ربما لا أدرى بهم وجاءنا محمد عثمان دريج زول مصيبه قادما منمدينة تراجى ولو عندك أى وصيه لا مانع.
الرزوقي ده منو يعله زميلنا الاختفاء زمان داك من المنبر بالله بلغه سلامنا كان متخصص فيني ومتخصصه فيه(هههههههههههههههههه)
تتجازي يا المفتاح يا اخي هاملتون دي مدينه ما ساهله وعامره بالكفآت السودانيه تمسح الناس دي كلها بجرة قلم وتسميها مدينة تراجي؟! غايتو كان جاءتك عكاكيز اسفيريه انا ما شغلتي(ههههههههههههههههههههه)!
اها قلت لي دريج بطرفكم قربت اكتب لكم طبعا يومها انه اونتاريو رمتكم باذكى رجالها فاستفيدوا من عمله! الا وحاتك ما لاقيه فرقه...كنت اكتب....المهم الزول ده اعملوا ليكم ندوه حتندهشوا من غزارة علمه , وعلى فكره هو زميل بكري ابوبكر برضو ياريت يكونوا اتقابلوا.
اها نحن ولايتنا عامره في العيد يا المفتاح شيء قالوا عمر احساس في بلد ناس ياسر طيفور(تورنتو) ونحن يا اخوي نانسي عجاج في مدينتنا(هاملتون) اها ما تكشكشوا كنجالات البرتا دي وتجوا تشموا هواء اونتاريو احسن لكم.
ويا ريس تكون بالغته لو رجعته قبال رؤية ثروت سوار الدهب بادمنتون!
وبالغته لو ما شفته ولاية اونتاريو .....
عارفنكم ما بتقصروا يا ناس البرتا بقيادة ود اونتاريو الحبوب النصري امين. والكمرد بكري ابوبكر بيستاهل....بركه في النسمات الضربتك يا بكري في نهار رمضان. يمين الله يا دندون ديل عندهم سموم في اريزونا دي بالله التقول الخرطوم في شهر 6!
08-13-2012, 12:19 PM
عبد المنعم موسى عبد المنعم موسى
تاريخ التسجيل: 07-01-2010
مجموع المشاركات: 489
عضو المنبر المختفى تماما محمد عثمان دريج ..هو ايضا فى زيارة عملية لكالقرى قادما اليها من مقاطعة اونتاريو فى شرق كندا,,,, هو زميل دراسة لبكرى ..التقو لاول مرة بعد غياب اكثر من عشرين سنة... وعند اللقاء وكان فى احدى شوارع الاحياء السكنية قلدو بعض لكننى انتبهت انو دريج نادى بكرى يابكرى الطويل .... لاول مرة انتبه انه بكرى زول طويل جدا ..اكثر من 6 قدم....
من الليلة تانى مافى حاجة اسمها بكرى ابصلعة اسمه الجديد بكرى الطويل
جلسة جميلة من اليمين النصرى,,منصور ..بكرى ..دكتور عبدالمنعم.. بكرى غلبو تماما يفك الضحكة ... وحبسها فى اخر ثانية انا غايتو الجيران سمعو صوتى من القرقرة
السلام عليكم يا النصري ياخي ما تختفوا رجلكم و تجيبوا بكري و تجوا تفطروا معانا بكرة. الصور الجنب البحيرة دي وين؟ شكلكم فسحتوا بكري. فكروا جديا في الدعوة دي.
08-13-2012, 08:25 PM
Shams eldin Alsanosi Shams eldin Alsanosi
تاريخ التسجيل: 12-18-2003
مجموع المشاركات: 2135
ياخي ما تختفوا رجلكم و تجيبوا بكري و تجوا تفطروا معانا بكرة. الصور الجنب البحيرة دي وين؟ شكلكم فسحتوا بكري. فكروا جديا في الدعوة دي.
وانت وكت بتعزم ناس كالقري مالك ابيت تفطر معانا يا العوض؟؟ يعني هسع لو فطرت عندنا ما كان ردينا ليك الدعوة وبي كدا كان حفظنا ليك كرامتك من شحدة ناس كالقري هههههه
واللة مشتاقين وحمدالله على السلامة
08-13-2012, 09:03 PM
Elawad Elawad
تاريخ التسجيل: 01-20-2003
مجموع المشاركات: 7226
الله يسلمك يا شمس الدين... يا زول دي حركات استهبال منكم كان دايرننا نفطر معاكم كان جيتونا في المطار سقتونا. والله كان بالود الواحد يلاقيكم ويتعشى معاكم (طبعا كنا فاطرين اليوم داك) لكن زمن الكونكشن كان ضيق البركة في شوفتكم في المشية كانت لمة جميلة والله. ربنا يجمع الناس في ساعات خير دايما تحياتنا للأولاد وأمهم. والله لو جيتونا في الهامش دا يكون أسعد يوم ياخي و الدعوة مفتوحة لكن عارفنكم التهميش دا ما بتقدروا عليه. أقعدوا لي في المركز دا لمن نثور عليكم إنتوا وناس ياسر طيفور وتراجي وبعد داك نبقى في ما قاصدين ومفاوضات وقصص ما ليها نهاية.
08-13-2012, 10:20 PM
معاوية المدير معاوية المدير
تاريخ التسجيل: 03-24-2009
مجموع المشاركات: 14411
Quote: اها يا دندون...تراجي ومالها ومال الضهاري دي معقول هامش سياسي وكمان نبقى في الهامش الكندي(ههههههههههههه)؟! يا حبيبه اديها صنه.....اها وحاتك نحن هنا مركز وناس الهامش ديل يا هم ناس منصور المفتاح ديل الا عاملين لينا فيها و لا ناس ولاية الوحده البترول عندهم (عشان كده كل زول عامل ولا (الكفيل) ما قادرين نقول معاهم بغم(ههههههههههههههه)!
هههههههههههههههههههههههه، يا تراجي نحن قاعدين في هجليج، ومحتلنها عدييييل كدا، ولو ما منصور المفتاح رسّل ليكي عقد زول بيسعل فيك مافي. والله صحي. لإغاظة أساسي...
08-14-2012, 02:24 AM
سناء عبد السيد سناء عبد السيد
تاريخ التسجيل: 03-29-2008
مجموع المشاركات: 2093
كتر خيرك على العبور بمدينة كالقري..و دايما افضل اللحظات هي التي تأتي عابرة..و كويس انك جيت في الموسم ده بالتحديد.. لأنك لو جيت في نوفمبر أو ديسمبر ..كان ح تحلف تاني ما تعتب عليها..!! فيك يا صديقي شفنا كل شعوب سودانيز اونلاين..و كنا نتمنى انو اقامتك تطول شوية عشان تتفرج اكتر على المدينة..ناسها بيسموها (قلب الغرب الجديد)..و هم طبعا قاصدين الغرب الحضاري بكل زخمه و عنفوانه..و نحن ناس قريعتي راحت ديل بنسميها (عروس الجبال) تيمنا بحلم و طيف سكن الوجدان فينا..طبعا ما ح نجاملك و نقول ليك نورت مدينتنا.. لكن بكل فخر بنقول ليك مدينتنا نورتك يا عم..ياخي كفاية الغيم..و الثلج..و النسمة الباردة و انت زول صحراوي ساكت زي ناس تراجي ديل..
اكيد ح تسويها درب زرع..و مرحب بيك.. و بكل صديقاتنا و اصدقاءنا ممن يرغبون في زيارة كالقري..طبعا ناسها ، خصوصا السودانيين و السودانيات.. ما قاعدين يتكلموا عنها كتير(نظام كاتلين الجدادة و خامين بيضها)..لكن لو مرة تانية خطفت رجلك.. ممكن تجيها في الصيف..و تحضر المهرجانات فيها.. فهي مدينة التسامح و التنوع..متلما ما فيها ناطحات السحاب.. برضك فيها تفاصيل الشوارع الحميمة..و الناس اللابسة ليها قناع بهاء يفوق الخيال..
هي مدينة ، لو زرت قلبها (الداون تاون) ..ممكن تشوف تحت ناطحة سحاب تماثيل الناس..البقر .. التيران..عندها فريقين في الرياضة.. واحد بتاع هوكي اسم (اللهيب/كالقري فليم,ومش فرق الروابط في السودان بتلقي فيها اسم اللهيب؟!!..و تيب..!!!)..و التاني بتاع كرة قدم امريكية اسمو (كالقري استامبيد)..و برضك عندها مهرجان سنوي اسمو استامبيد (يبدا الأسبوع االثاني من يوليو كل سنة ، السنة دي صادفت الذكرى المئوية للمهرجان ده)..و كلمة استامبيد..قاعد اترجمها لروحي دي ، وفق منظوري الخاص ، و اسميهو (ضعاين دبزن).. الضعائن ياها ظعائن بالعربي الفصيح.. و دبزن..مفردة مشهورة في ثقافة البقارة في السودان ..و هي حركة الأبقار الأشبه بالهرولة..و زمان مناطق كالقري كانت تكثر فيها قائبل الهنود الحمر (اهل الدار كما اسميهم)..و كان بيسعوا الجاموس (البفلو)..و الخواجات قاموا جابوا فكرة شيطانية..فعشان يسطروا على الأرض و اهلها..اكتشفوا صلة اهل الدار بالجاموس و قالوا لازم الجاموس يتمسح من وجه الأرض..و كانوا بيطاردوا الجاموس (لأنو وجه لوجه لا يستطيع الأنسان مواجهة الجاموس ، و في افريقيا دايما البلد الفيها جاموس ما بتلقى فيها اسد..و الله صحي..و ده موضوع تاني)..مطاردة الجاموس بتكون دفعه نحو جرف الوادي أو النهر..فيسقط من الحافة العالية..و هي طريقة رخيصة و غير مكلفة كتلوا بيها الجاموس ، و منها دجنوا اهل الدار..ولاحقا صحى الضمير شوية..و اصبح مهرجان الأستامبيد هو احتفال رمزي يمجد ثقافة البقارة (و الله صحي يا تراجي)..و في ايام الأستامبيد ، خصوصا الباريد (المسيرة)..رأس المال يتنازل من عنفوانه..و تجد البقر و الخيل تجوب شوارع الداون تاون..و اكثر حاجة بتعجبني.. انو الكائنات دي لمن تسوح شوارع الداون تاون في كالقري..دايما بتحبك عليها تفك زنقتها في شوارع نص الداون تاون..يعني تبعر زي الماحاصل شي..و السيتي (المحلية يا ناس السودان) عينها في راسها تقوم تنضف الشوارع..!!!
برضك هناك مهرجان الكاريبي (كاري فيست)..و يوم افريقيا ( افيركا داي)..و التاني ده مافي سوداني بيشارك فيهو اللهم الإ قليلا من ناس دارفور..لكن شعوب افريقيا التانية بياخدو المسالة بجدية كبيرة..و شفنا فيهو فنانين كبار من مالي (سالف كيتا ، حبيب كوتي..الخ) و السنغال (بابا معال)..و النيجر و الكاميرون و جنوب افريقيا..الخ..اما مهرجان الكاريبي.. فهو مهرجان خاص بعرض ثقافات منطقة الكاريبي..و برضك هناك مهرجان اللاتينو بتاع ناس امريكا الجنوبية.. غايتو ديل كن حضرت واحد فيهم ح تقوم تنقل سودانيز اونلاين عندنا هنا..
من ملامح المدينة .. سوق كليو و برنس ايلاند..و دي مواقع مهمة للأطفال.. و برضك هناك شارع استيفان (استيفان افينو)..و ده شارع مهم للغاية لأنو معظم المباني حولو هي من طراز قديم..و بتكثر فيهو المطاعم و الكافيهات..طبعا معظم المطاعم في داون تاون كالقري تحرص على نظام القهاوي (بتاع مصر للناس الشافت مصر)..بمعني بتقوم تخلي فسحة كبيرة خارج المطعم في الشارع و بتقوم تخط فيها كراسي في موسم الصيف..و الناس تقعد في الصقيعة (دي حكاية مهمة لإنسان طول الوكت مكتوم في الشواهق/ناطحات السحاب)..
من الظواهر اللطيفة في داون تاون كالقري.. معبر زائد خمسطاشر (+15)..و الظاهرة دي بتعجبني كتير..و قاعد اشوف فيها حنية رأس المال.. و هي عبارة عن جسور معلقة بتربط بين مبني و التاني..و المعبر ده اهميتو بتظهر في موسم الجليد..الجو يكون بارد للغاية ..عشان كده الناس بتستغلو..و بيربط بين ناطحة سحاب و التانية (بالمناسبة فكرة ناطحات السحاب مخترعها مهندس مسلم من بنغلاديش و كان في شيكاغو.. و فكرة جسور الخمسطاشر اخترعها مهندس من كالقري و اول مرة طبقها في كالقري..عندي مشروع رواية بتناول الطرائف دي)..و في فكرة هذا المعبر دايما قاعد اتذكر ثقافة القانون الدرسناها في السودان عن حق العبور..و الإرتفاق..(دي ناس القانون ح يفهموها..و الداير/ة يعرف حق المرور..يزور كالقري..عشان يفهم الحاصل في حواشات ناس الشمالية في السودان و معنى هذا الحق بالضبط).. في داون تاون كالقري ظاهرة تانية (من بعض حنية رأس المال)..و الظاهرة دي شرحتها للصديقة سامية قسم لمن زارتنا الموسم الفات (2011)..و فرحت لم عرفتها.. لكن زعلت لم عرفت مبرراتها..اها يا اهلنا.. في داون تاون كالقري عندنا قطر محلي (ترماي/ميترو..الخ ، اسم السي ترين)..و في نطاق الداون تاون (زي ا ربعة محطات) بيكون ركوب الترماي مجانا.. يعني ما بتدفع حق التذكرة (تلاتة دولارت الإ ربع)..طبعا صديقتنا سامية اتكيفت و قالت و الله راس المال ده مرات حنين خلاص..و لكن..!..سألت سامية و قلت ليها: منو القاعد في الداون تاون اساسا؟..و لمن اتأملنا مع بعض اكتشفت انو اكتر سكان الداون تاون هم موظفي الراسمال في ناطحات السحاب اياها..و ديل المدورين الشغل المالي..و هم الفرضو على قوانين المحلية (السيتي) انو يكون النطاق ده مجانا.. يعني موظف/ة يكون شغال..و داير يطلع اللنش (الفطور).. مفروض يركب القطر مجانا عشان يتحرك بسرعة و يرجع بسرعة يزيد راس المال..!!! (و الله صحي)..!
من الظواهر الطريفة في مدينة كالقري.. انو عندها مشكلة اساسية مع الإتجاهات الرئيسية.. يعني في القاهرة مثلا ممكن تقول شمال القاهرة أو جنوب القاهرة..كالقري توصيف الإتجاهات فيها يقوم على الإتجاهات الفرعية.. شمال شرق ، شمال غرب.ز جنوب شرق ، جنوب غرب..!!! اهم شارعين في كالقري.. شارع ديرفوت (قاعد اسمهو قدم الغزال)..و شارع كرو شايلد (قاعد اسميهو ود الغراب)..لكن الطريف في تخطيط مدينة كالقري.. انو نادر تلقى ليك شارع مستقيم (كما في الخرطوم أو القاهرة أو غيرها من المدن)..يعني كانما التخطيط بيجيك في بيتك و بيقول ليك جاك شارع.. لو قلت ايوه ممكن .. الشارع بيشق بيتك.. و اذا قلت لأ.. الشارع بيقوم يتجه لإتجاه اخر (يحود بيتك كما نقول في لغتنا اليومية في السودان)..!!
سميت كالقري (بيني و بين نفسي طبعا) بمدينة عروس الجبال.. لأن المدينة تقوم على عدد اطناشر تلة (جبل صغير يا حناكيش الخرتوم) و في نفس الوكت بتقع على حافة سلسلة جبال روكي الشهيرة..!!! شباب سودانيين قادمين جدد.. لاقيتهم في افطار منظمة التماس (قبل ساعتين من مقابلة صديقنا بكري ابوبكر)..و ليهم اسبوعين في المدينة.. و اول تعليق .. انو المدينة مافيها عمارات طويلة كتيرة..!!! الشباب ديل صادقين جدا..و ده المحك في المدن الكندية..المباني الشاهقة (ناطحات السحاب و كده) بتكون في وسط المدينة /داون تاون.. اما باقي المباني فهي عادية للغاية..و الناس البتحب التأمل الفلسفي.. ممكن تتأمل حكاية هروب الإنسان و المقاومة في نفس الوكت لأحابيل الراس مال..!!
المدينة في الليل.. مثلها و مثل كل المدن الكندية ..تغلب عليها الأضواء البرتقالية (شبه ذهبية)..و دي فلسفة مشهورة في نطاق العمران الكندي.. و عندي نية اقترحها على ناس التخطيط العمراني في السودان..!! في المدينة نهرين.. نهر البو..و نهر بو..(الغريب في جنوب السودان ، سابقا طبعا ، نهر باسم البو)..و هما اكتر نهرين ملولوين على وجه الأرض..!!! في شارع سبعطاشر جنوب شرق ( سفنتين افينو ساوث ايست يا ناس كالقري)..بتلقى دكاكين عرب و افارقة.. اشهرها دكان جوبا (مالكته زليخة من الصومال)..دكان سلام (مالكه الشاب الإريتري خالد)..و دكان دينق..ده يا بكري كنت مفكر اوديك ليهو عشان تشتري ليك ويكة و ابري احمر و كول..!!!
مرحب بيك يا بكري في مدينة كالقري..و زي ما شفنا فيك جموع جمهورية سودانيز اونلاين.. كنا نتمنى انو ناس سودانيز اونلاين يشوفوا من عبرك مدينة كالقري..! و نحي صديقنا عضو المنبر الفنان عمر منصور (شقيق اخونا و صديقنا تمبس) و هو من اخر القادمين للمدينة.. لكن يبدو انو لسع غاطس..!!! و دمتم جميعا.. كبر
08-15-2012, 08:12 AM
Kabar Kabar
تاريخ التسجيل: 11-26-2002
مجموع المشاركات: 18547
الى الصديقات و الأصدقاء هنا.. خصوصا صديقتنا الرايحة دينا..!!
دي مسيرة مهرجان الكاريبي للسنة دي..و كان في ايام حضور صديقنا بكري ابوبكر .. و من ضمن المارش الصديقة تريسي من جامايكا (يا دينا الزولة دي جارتي..و قاعدين نركب بص واحد من الحلة.. و الله صحي..!!)..
و دي بعض من المدينة.. و حبابكم جميعا..الداير/ة يجازف يجينا حبابو عشرة بلا كشرة..
هي مدينة جمالها يتبدى بالمواسم..و زي ما قلنا لصديقنا بكرى.. اختوا شهور مثل نوفمبر..ديسمبر..يناير.. لأنو شكلها ح يكون وحش خلاص..!!! اهدي مداخلاتي هنا الى الصديق دكين..و كتر خيرك على الثقة.. برضك بنشوف ليك يا حبيب..!!! كل سنة و الجميع بخير..
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة
munswor almophtah
عبدالكريم عبدالله
هشام هباني
دينا خالد
طلعت الطيب
Tragie Mustafa
عبد المنعم موسى
lana mahdi
خضر الطيب
Elawad
Shams eldin Alsanosi
معاوية المدير
سناء عبد السيد
Hamid Elsawi
Kabar
بكرى ابوبكر
إبراهيم عبد الحليم
فيس بوك
تويتر
انستقرام
يوتيوب
بنتيريست