دعواتكم لزميلنا المفكر د.الباقر العفيف بالشفاء العاجل
|
|
 رحبوا بأكثر الاقلام السودانيه سخرية.. الفاتح جبرا
|
الاستاذ الفاتح يوسف جبرا.. القلم الساخر الذى ينتظره قراء صحيفة السودانى
(العدد الاسبوعى) الذى يصدر يوم الجمعه.شرف البورد عضوا وازدهى البورد به وهو اضافه حقيقيه للمنبر الوطن ... ونشكر البشمهندس بكرى على هذه الهديه .... ولى عوده
|
|
 
|
|
|
|
|
|
|
|
Re: رحبوا بأكثر الاقلام السودانيه سخرية.. الفاتح جبرا (Re: الفاتح يوسف جبرا)
|
الأخ الكاتب الجميل الفاتح
مرحباً بك وبقلمك الساخر.. فمقالاتك الساخرة هي نوع من المقالات القصصية او القصة المقالية التي من أهم خصائصها أنها لقطات عاجلة من واقع مشهود جذبت إنتباه الكاتب في غمرة الحياة الجارية وإستطاع أن ينتزعها ويكشف عن طبيعتها ويقدمها مشفوعة بما يستشعره نحوها بإسلوب تشيع فيه السخرية.. فما قرأته لك وآخرها عن ( مواطن كوكب الإنجاز)فمن ما إحتوى من السخرية والغمز لم تفارقك روح الظرف والمؤانسة.. إنك تستعين بالوصف الفكه والتصوير الساخر لكل شيء تستطيع أن تنتزعه مما تقع عليه عيناك أو يخطر على بالك حتى نتوقف عند النقط وعلامات الإستفهام والتعجب بإعتبارها شخوصاً معنوية لتهيئة الجو الذي تحسه.. لغة ومفردات كتابتك هي مزاج من العامية والفصحي ، فالعبارات العامية رشيقة أخاذة لأنها مفردات يومية الإستعمال كما هو في الدارج المأنوس .. إنك كاتب الكوميديا السوداء .. تضحكنا وتبكينا في ذات الوقت وهذا من مقتضى الحال .. أنا مسرور جداً بإنضمامك لأن هناك سيكون مجال للإبتسام بعد الدموع.. ألف مرحب
أخوك
ابوبكر يوسف
| |
|
|
|
|
|
|
|
|
|
Re: رحبوا بأكثر الاقلام السودانيه سخرية.. الفاتح جبرا (Re: Elmosley)
|
عزيزى الأخ الأستاذ الموصلى تلك العبقرية الموسيقية التى لم يكتشف حجمها الحقيقى بعد .. أول حاجة شكراً ليك على هذا الترحيب بشخصنا الضعيف وتانى حاجة يأخى سلامى الكتير ليك وتالت حاجة ح يكون عندنا إن شاء الله (بوستات) وكلام كتير حول الموسيقى والغناء السودانى وياخى ربنا يخليك ويديك العافية ومرة تانية شكراً على ترحيبكم بنا ..
| |
|
|
|
|
|
|
|
|
|
Re: رحبوا بأكثر الاقلام السودانيه سخرية.. الفاتح جبرا (Re: أحمد طه)
|
أخى وصديقى الصدوق وودالبلد الأصيل الفارع الطول الجنرال أحمد طه
لك منى كل التحايا والود وجزيل الشكر وانت تقدمنى وتمسك بيدى وتعبر بى عبر بوابة الإبداع هذه وتدخلنى إلى هذه الساحة الممتلئة بكل هذا الفكر المنير المستنير المتقد الموبؤ تماما بعشق هذا الوطن والشكر أجزله لإدارة سودانيز أونلاين ممثلة فى شخص الأخ الباشمهندس بكرى لإتاحتها لشخصنا الضعيف الفرصة ليكون عضوا ينضم إلى هذه الكوكبة الرائعة المتألقة من الأعضاء ... شكرا ألف شكر !!
| |
|
|
|
|
|
|
|
|
|
Re: رحبوا بأكثر الاقلام السودانيه سخرية.. الفاتح جبرا (Re: أحمد طه)
|
الفاتح يوسف جبرا ..
مرحبا بك كثيرا ..
نوهت في عدة أمكنة إلى انني سأكتب بوستاً عنك أتحدث فيه عن تجريتك في الكتابة وخاصة الساخرة منها ..
(حكاية في جباية) تلكم الحلقات التي إستمتعنا بها كثيرا تدل على أن أدب الكتابة الساخرة دون إبتذال أو إيحاءات لا اخلاقية لا زال موجودا يمشي بيننا ..
الغريبة انني تحدثت مع الصديق عادل فضل المولى قبل فترة وقلت له انه حرام على الفاتح يوسف جبرا ان يكون كاتبا صحفياً مع إحترامي للمهنة ..
ولكن مثله مكانه المطلوب فيه هو(كاتب سيناريو) في زمن تعاني فيه الدراما السودانية من إشكاليات وصعوبات في مجال الكتابةالراقية للسيناريو بدارجيتنا البسيطة ..
الفاتح جبرا حين تقرأ ما يكتبه لا تشعر أبدأ أنها كتابة .
بل مشاهد سينمائية تتحرك وتعيش وتحيا وتتنفس ..
شكرا لك أستاذ أحمد طه على رفدنا بالأستاذ الفاتح يوسف ..
إستاذنكم للخروج الان ..
فأخشى ان ينفد عدد السوداني الإسبوعي فأضطر لقراءة ما كتبه الفاتح من الإنترنيت ..!
| |
|
|
|
|
|
|
|
|
|
Re: رحبوا بأكثر الاقلام السودانيه سخرية.. الفاتح جبرا (Re: هشام هباني)
|
عزيزى هشام
لك خالص مودتى وعظيم إمتنانى لهذا الإطراء الذى لا أستحقه .. بالأمس طالعت لك (بوست)
موجه للأخ الصديق الغالى مولانا عادل سمير ولأول مرة أعرف (حكاية) إنو (مولانا) كان مؤجر عقار بيخصهم للمدعو (كارلوس) سيد الإسم !! إتصور أصلو مولانا ما كلمنى بالحكاية دى .. هسع المسألة بالنسبة ليا هى ما حكاية (كارلوس والإيجار) المسألة بقت فى إنو مولانا ما ونسنى بالحكاية دى ليه وطبعا هو ( أبو الونسه ) والرجل الذى لا يمل حديثه !! تحياتى ليك يا هشام وحقو مولانا يجاوب على السؤالين .. بتاعى وبتاعك !! هذا مع تحياتى
| |
|
|
|
|
|
|
|
|
|
Re: رحبوا بأكثر الاقلام السودانيه سخرية.. الفاتح جبرا (Re: Adel Sameer Tawfiq)
|
أوووووه يا عادل سمير يا أخى والله مشتاقين كتير وإنت تلفوناتك وقفت ونحنا تلفونات (جوه) ما قادرين عليها !! .. وبعدين يا أخى حرام عليك تدس منى موضوع ذى بتاع (كارلوس) ده .. يعنى هسع أكان ما أخونا (هبانى) نكش الموضوع كان (كارلوس) ده لحدت يوم الدين مافى زولن عرف إتقبض وين !! على العموم حصل روحك يا مولانا وأعمل لينا (بوست) أحكى لينا فيهو القصة كاملة قبل ما أقوم أعمل ليك الموضوع (سيناريوهات) وأنت عارف إنو أنا (هندى) وخيالى واسع وكده !!
تحياتى تحياتى تحياتى وكل أشواقى يا زول يا رائع يا جميل
| |
|
|
|
|
|
|
|
|
|
Re: رحبوا بأكثر الاقلام السودانيه سخرية.. الفاتح جبرا (Re: ناذر محمد الخليفة)
|
لا زلت أبحث عنك منذ ذلك الإيميل .. ياخى والله ما عارف أقول عنك وليك شنو!! والله ده إطراء كبير والحكاية أبسط من كده بى كتير يا ناذر .. غايتو شكراً ليك وحقيقة ذى نوع كتابتكم عننا ده بيلقى على عاتقنا مسئولية كبيرة جداً !!!!وقاعدين نخاف منو عديل !! وأحسن الواحد يشوف ليهو فى الحاله دى (فيزاء) بتاعت (قرد) ويشرد عديل !!
لك حبى يا ناذر وعظيم تقديرى ونلتقى بإذن الله
| |
|
|
|
|
|
|
|
|
|
Re: رحبوا بأكثر الاقلام السودانيه سخرية.. الفاتح جبرا (Re: soma)
|
(الألف) لم يعد رقما كبيرا لذا نقول (مليار) مرحب للأستاذ جبرا، ونقول لصلاح بن الباديه أعمل updation لأغنية ( ودفع "الميه" للمشاطه) لآنو المبلغ ده مابجيب لامخرز لا مسلّه.
الجنرال أحمد طه
لك شكر وتقدير على تقديم مثل هؤلاء الرائعين ليزرعوا الأبتسامه ذات المضمون كما قال أخي ناذر
ويا أستاذ جبرا أنا ممن يتفق مع مقولة أن السخرية والتسامح هما أعلى درجات الثقافة ، ولا شك أن المنبر يحتاج لتلك الواحات مقابل الزحف الصحراوي المنداح.
مرحبا بك مرة أخري بين أهلك.
بالمناسبه يافاتح ، أنا باكتب بال Bold معتقدا أني ب (أرفع) صوتي للقارئ.
| |
|
|
|
|
|
|
|
|
|
Re: رحبوا بأكثر الاقلام السودانيه سخرية.. الفاتح جبرا (Re: محمد المرتضى حامد)
|
عزيزى محمد المرتضى
يا أخى لو إنت رحبت بيا (مليار) مرحب أنا برحب بيك بعدد (الدينارات مش الجنيهات كمان) التى تم إختلاسها من المال العام (وكمان الما تمت فيها تسويه!!) وعشان ما تقول ليا بالغت كمان فى فترة (سنه واحده بس) .. أها عليكم الله يا ناس المنبر أنا قصرت ؟؟؟
مش رديت التحية بأحسن (مليار) مره منها !!!!!!!!!!!!!(واحد فيكم يقوم يضرب لينا الشغلانية دى) !!!!!!!!!!
تعليقا على ترحيبك الحار بقول ليك يا المرتضى ده إطراء والله نحنا ما قدرو وربنا يقدرنا غايتو إنو نكون عند حسن الظن ونقدر نساهم معاكم فى إثراء ساحات الحوار والنقاش المثمر والبناء فى هذا المنبر من أجل وطن نحلم به جميعاً !!!! ودمت أخى
| |
|
|
|
|
|
|
|
|
|
Re: رحبوا بأكثر الاقلام السودانيه سخرية.. الفاتح جبرا (Re: soma)
|
تحياتى ليك يا أسماء يا بت الجنيد وصدقينى أنا بتجينى حاله من الفخر والإعتزاز وأنا أقراْ أى نتاج ذهنى وأى حروف يخطها يراع أى حواء سودانية(يكون تخلف يا ربى)
ومن هنا أوجه تحياتى وتقديرى لكل بناتى وإخواتى فى كل أصقاع المعمورة (طبعا أمهاتى وعماتى وخالاتى لحقو أمات طه) !!
تحياتى (أسماء) وشكرا ليكى على الترحيب ونلتقى !!
| |
|
|
|
|
|
|
|
|
|
Re: رحبوا بأكثر الاقلام السودانيه سخرية.. الفاتح جبرا (Re: ناذر محمد الخليفة)
|
Quote:
بالمناسبه يافاتح ، أنا باكتب بال Bold معتقدا أني ب (أرفع) صوتي للقارئ. |
ونحن يا استاذ الفاتح بنكتب بالبولد والعرض !!!!
نرحب بك ترحيبا حارا يليق بما تمتلكه من موهبة رائعة في مناوراتك
الذكية و"محاوراتك (الحريفة) في الزوايا (الضيقة الحادة)
لتمتعنا وتحزننا وتضحكنا- في آن واحد- بمعاناة الغبش من أهلي
واهلك في تلك الجبانة الهايصة وحلبة الصراع من أجل البقاء !!!!
والبقاء هنا ( بالقاف ) المفخمة جدا !!!!! وما البقاء الا لله !!!!
مليار مرحبا كما قال أخونا وحبيبنا محمد المرتضى لأن (الهنايات)
عندكم هناك كلها بقت "بالهنايات" دي !!!!!!!!!!!!!!!!!!!!!!!!!!!!!!!!
مع خالص المحبة وأقصى الود
أحوك/ فاروق حامد (ابوناصر)
| |
|
|
|
|
|
|
|
|
|
Re: رحبوا بأكثر الاقلام السودانيه سخرية.. الفاتح جبرا (Re: Moneim Elhoweris)
|
طه والفاتح والجميع
سلام شامل
حاجة جميلة ومفرحة انو جبرا (ابو النسب) يكون معانا بي جاي
شكرا كثيرا كل الناس الذين ساعدوا في فتح الحساب
وفتح الباب
والترحيب
...
يا ناذر بطّل الشمارات
وارتع مع الجماعة هنا من غير شوشرة
ما خلاس صاحبك ولقيتو..
بالمناسبة يا الفاتح
كلام ناذر الفوق داك (رغم تحامله وحملته المغرضة على الصحافة اليومين ديل)
الا انه كان محل اتفاق بيننا
والحكاية انو الناس بتحب الزول البيونسها بي كلام بتفهمو وبسيط ومعبر ولذيذ زي السيناريوهات
(السهل الممتنع)
لكن عليك الله بلاش سيرة (....)
انتا عارف!
ولو كررتها حتعيّد هناك معاهم وهم بعداك مخيرين
يا ضحوا بي الخرفان..يا ضحوا بيك!
ابو محمود
| |
|
|
|
|
|
|
|
|
|
Re: رحبوا بأكثر الاقلام السودانيه سخرية.. الفاتح جبرا (Re: عادل فضل المولى)
|
شكرا ليك يا (أبو النسب) على الترحيب الحار ده ومسألة الكتابة الدرامية دى حكاية طويلة وهى ممكنه بس ألا بعد الحفلة (تتفرتق) لأنو عشان الواحد يدخلا هسع داير ليهو فيزاء بتاعت أسد (يا ناذر) .. أما بخصوص ..............
يا (عادل) تعرف واحد قال ليا (والله يا أستاذ نحنا ما كنا عارفين الحتة دى إلا بعد مقالك) .. أهو يلا أدونا بعد ده (حق) الشهرة والإعلان (المجانى) وخلو دايما روحكم (رياضية)
| |
|
|
|
|
|
|
|
|
|
Re: رحبوا بأكثر الاقلام السودانيه سخرية.. الفاتح جبرا (Re: فاروق حامد محمد)
|
عزيزنا أستاذنا وود صفحتنا (على وزن ود دفعتنا) فاروق .. يا أخى إنت وين ؟؟ ووين أماليك (الجميلة) الحلت (الآهات) مكانا !! خليتنا نقرأ ليك وقمت (كبيت الزوغه) !! سألت عليك والله (الجنرال) أكتر من مرة .. شكراً ياخى على الترحيب الحار ده والله يقدرنا نشوت ليكم فى (التمانيات) فى زمن التحكيم الفاشل ده !! تحياتى الحارة جـــــــــــــــــــــــــــــــــــــــــــــــــــــــــــــــــــــــــداً
يا أبو ناصر
| |
|
|
|
|
|
|
|
|
|
Re: رحبوا بأكثر الاقلام السودانيه سخرية.. الفاتح جبرا (Re: أحمد طه)
|
أبو محمود ..
Quote: كلام ناذر الفوق داك (رغم تحامله وحملته المغرضة على الصحافة اليومين ديل)
|
لا والله لا مغرضة لا منقرضة لا بطيخ !!
ولا عندي فيها لا كبير غرض لا صغير غرض !!
صنفرة :
لمن اعمل ليك بوست بي اسمك عشان تجي تقول فيهو رايك اوعك تتجرس وتلاوز .. سمح !! 
بس خليني هسي أفضى من العلقت أساميهم جبيل ديلاك !!
| |
|
|
|
|
|
|
|
|
 Re: رحبوا بأكثر الاقلام السودانيه سخرية.. الفاتح جبرا (Re: أحمد طه)
|
الاستاذ الفاتح يوسف جبرا
لا أستطيع التعبير عن مدى سعادتي بتشريفك ووجودك معنا أبو ناجي!
رحبو اخواني بالأستاذ الفاتح فهو اضافة حقيقية ، فهو مدرسة قائمة بذاتها، إنسان عظيم عالم ومتواضع عفيف ، يملك قلما ساخرا رائعا، تتجسد في شخصه واسرته الكريمة أسمى معاني الوحدة الوطنية والتسامح الديني !
شكرآ للأخ أحمد طه الذي سبقنا بهذا التقديم وللأخ الباشمهندس بكرى على هذه الهديه ....
عادل سمير
| |
|
|
|
|
|
|
|
|
|
Re: رحبوا بأكثر الاقلام السودانيه سخرية.. الفاتح جبرا (Re: خالد تاج السر)
|
يا عزيزى خالد أول حاجة شكرا على الترحيب ودفء الحفاوة وتانى حاجة والله يا خالد أنا مافى حاجة مزعلانى وحارقانى فى ال 17 سنة الفاتت دى إلا موضوع (جنينة الحيوانات) ده ... يا جماعة بى ذمتكم ده برضو إسمو كلام ؟؟ يا جماعة بس معقول (البنى آدم) ياكل (الجنينة) ويبيع (الحيوانات ) ما قلنا حاجة .. كان (ياكل) الحيوانات بس ما يبيع (الجنينة) وألا شنو؟؟؟ طيب بعتوها وما قلنا حاجة!! طيب كان تعملوا لى أولادنا ديل واحدة بدلا عشان (ناجى) ولدى ده مش كلما يشوف صورة (التمساح) بتاع أمواس (ناسيت) يكورك ليا تعال يا بابا شوف صورة( الضب ) ده
| |
|
|
|
|
|
|
|
|
|
Re: رحبوا بأكثر الاقلام السودانيه سخرية.. الفاتح جبرا (Re: Adel Sameer Tawfiq)
|
ياعادل .. يمكن صاحبك أبوناجي كان قاصد يقول المال (السنه) أنا بعلم الغيب؟
بعدين كازينو حماد ( الهائم) ده أنا مادخلتو ولا كنت بمشي بشارع النيل قدام فندق السودان ولا باشوف ألوان الزينه الحمرا بتاعتو شان أجاوبك منو الكان عايم. لكن، أعتقد انو الكان عايم هو حمّاد لأنو الناس قاعدين يقولو: الرماد كال حماد.
| |
|
|
|
|
|
|
|
|
|
Re: رحبوا بأكثر الاقلام السودانيه سخرية.. الفاتح جبرا (Re: حبيب نورة)
|
حبابك من تانى يا سمح المعانى..
**
تحياتى ليك يا أسماء يا بت الجنيد وصدقينى أنا بتجينى حاله من الفخر والإعتزاز وأنا أقراْ أى نتاج ذهنى وأى حروف يخطها يراع أى حواء سودانية(يكون تخلف يا ربى)
حاشاك يا العشا.. يا قمر العشا .. يا ود بطن الحشا..
النضمى الرصين يفوتك وين
يا سيد الشورة والرأى الرزين
حبابك غيمه ومطرتين
تسلم يا ود الجروف والطين
شكرا نيلين ..
| |
|
|
|
|
|
|
|
|
|
Re: رحبوا بأكثر الاقلام السودانيه سخرية.. الفاتح جبرا (Re: soma)
|
العزيزة بت الجنيد
والله خجلتينى .. معقولة الزول القاعدين يشكروا فيهو فى القصيده دى ده أنا ؟؟ شكرا ليكى يا (أصيلة) .. وكيفن ما تكونى (أصيلة) وإنتى من (بنات بلدى) الأنا عندى ليهم إعزاز خاص جدا ...
طبعا الحته بتاعت (يا ربى يكون تخلف) دى قصدت منها إنو شئ عادى إنو (حواء) تبدع وتكتب و... و... ذى (آدم) تماما ومفروض الزول ما يندهش أو يصاب بأى إحساس غير عادى لا يحسه عندما تكون المسألة بتختص بآدم لكنى كما ذكرت يجتاحنى شعور غريب بالفخر والإعتزاز عندما أقرأ أو أستقبل أى أبداع لحواء السودانية (وليست أى حواء أخرى) التى يستوى إحساسى بها مع (آدم) !!
شكرا ليكى يا أسماء على القصيده وأعملى حسابك (القصايد) دى تلم فيهم (سامية جركانات) والا (عوضية كلاش) بكرة تلاقيهم فى شريط فى السوق !!!
تحياتى
| |
|
|
|
|
|
|
|
|
|
Re: رحبوا بأكثر الاقلام السودانيه سخرية.. الفاتح جبرا (Re: فاروق حامد محمد)
|
أرحب بالأستاذ / الفاتح يوسف جبرا ، و هو فعلاً من أكثر الأقلام السودانية سخرية .. و أنا من المعجبين جداً جداً بكتاباته التي أتابعها عبر عدد الجمعة من صحيفة السوداني ،، و أتمنى لو أن سيناريوهاته الرائعة وجدت طريقها إلى هذا المنبر .. شكراً للجنرال الأستاذ / أحمد طه و مرحباً مجدداً بهذا القلم المبدع ..
| |
|
|
|
|
|
|
| |
أحمد طه
Hussein Mallasi
شهاب الفاتح عثمان
فتحي الصديق
الفاتح يوسف جبرا
Elmosley
ناذر محمد الخليفة
هشام هباني
Adel Sameer Tawfiq
محمد المرتضى حامد
Tumadir
فاروق حامد محمد
Moneim Elhoweris
عادل فضل المولى
تولوس
raheel
رأفت ميلاد
حبيب نورة
gamal elsadig
خالد عبد الله محمود
salma subhi
إسماعيل وراق
خالد العبيد
Ishraga Haimoura
حاتم هاشم
فيس بوك
تويتر
انستقرام
يوتيوب
بنتيريست