كتب الكاتب الفاتح جبرا المتوفرة بمعرض الدوحة
|
|
 الإرهاب البوردي
|
الواحد خايف في البورد ده (يتف) تتهموه بالعنصرية تجاه البيئة والجداد...
----
مشكلة الشعب المثقف هنا أنه في وادي ،، والشعب السوداني (الحقيقي) في عالم تاني خالص،، وأعني بالحقيقي ذاك الشعب الذي يعاني من الحر والكوش والباعوض والبلاعات والخيران وزحمة المواصلات وقلة المورد وقرف الحكومات واكشاك بسط الأمن الشامل وإيقاف ساعات السعادة والأفراح حسب مزاج العسكري ودفع الأتاوات عشان بس تقدر تركب دش في راس بيتك بقروشك ليلتقط فضائيات خارجية الدولة ما دافعة فيها مليم. ذالك الشعب الذي ما زال يعاني ليفهم معنى قانون (الشروع في الزنا) حتى لو كان خالق الخلق ومالك الكون لا يحاسب على التفكير والشروع حتى يصبح فعلاً وواقعاً.
-----------
المشكلة في هذا البورد المثقف، أن الواحد لا بد أن يكون حيادي بوردي (لاني اكتشفت أن معنى الحيادية هنا يختلف عن معناها الذي فهمته من الحياة)
له موقف مع المرأة لو فقط آمن بدموية الختان،،، ليس هذا فحسب بل يجب مع ذلك تجنب الإشارة إلى الموضوع بكلمات جارحة كمصطلح (الغلوفية) ،، يعني لو حبوبتي جات هنا يوم،،، فلا بد أن تشوتوها طوالي بالرصاص،،، إذ هي وجيلها كله وجيل والدتي (وديل بالمناسبة نسوان) ما زلن يؤمن تماما بأن المرأة (الغلفاء) سبة،،، حقو ترموهن كلهن بالرصاص أحسن زاتو من وجع الراس.
أما جدي الذي يؤمن (بأن المرة كان فاس ما بتشق الراس) فده يترجم بالحجارة بدون تفكير.
الغريب أن المرأة السودانية تعاني من أكبر نسبة وفيات في الولادة (بسبب الإهمال والتلوث) ونحن ما زلنا نحصر عقل المرأة في الختان،، كأن راسها مركب هناك.
وهي تعاني من أمراض الفشل الكلوي بسبب الديانا وعقدة اللون والشعور بالدونية الغامقة ،،، وتتحسس من ذكر الختان.
في السودان أكبر نسبة إصابات بالإيدز بالنسبة للدول الأفريقية نسبة لانتشار الدعارة وفتيات الليل ورجال يشتروا البنات المتعلمات المثقفات الما مختونات،،، وما زالت المرأة تتحس من (غلفاء وشايلة موسها تطهر) وكأن ثقافة قرون عديدة مازالت ممتدة إلى الآن يجب رميها في الكوشة والتعامل معها على أنها ما كانت ولن تكون.
نطالب بالنظر إلى المرأة كفكرة وليس كجسد،، ونحن أول من ينظر للأشياء باجسامها المادية البحته،، حتى الأمثال تأخذ منها الظاهر وتترك لبها ومعناها كفكرة.
ندافع عن قضايا أكل عليها الزمن كسرة وأم رقيقة وشرب فيها شربوت وحلومر ،، وتحول إلى قضايا أكثر أهمية وأجدر بالالتفات لها ونحن مازلنا نعاني عقدة (ظلم المرأة) حتى ولو اشترت هذه المرأة المظلومة ملايات الدنيا كلها واتلخبطت بديانات سعد قشرة كلها وخلصت صبغة حجر سوق النسوان كلها ولبست سوق دهب كامل في عرس بت الجيران.
لو استخدمت إحداهن لفظ سوداني يستخدمه كل الشارع السوداني (البيض) ،، للتعبير عن موضوع غربة العيد،، تركوا الموضوع الأساسي والعيد والغربة ،، وتحسسوا من التعبير وتطاقشت المسنجرات و(بالغت في اللفظ والله جد بالغت)
لو تحدث أحدهم عن سلوك فنان ما عاجبه،، يبقى هو أساء للفن السوداني من يوم كرومة لحدي قدورة،،، كيف يتكلم وقد كان الأجدر به أن ينطم ويسكت ولا يتحدث في المسلمات الإلهية.
لو واحد ما عاجبه مذهب من مذاهب الأرض فهو لا بد رعديد خارج عن دين الإسلام ويجب بتره على الفور.
والله ما جايبنا ورا إلا نحنا...
|
|
 
|
|
|
|
|
|
|
 Re: الإرهاب البوردي (Re: بكرى ابوبكر)
|
العزيزه الكريمه بنت قضيم
عيد سعيد
وكل سنه وانتى طيبه
وربنا يكفيك شر الأرهاب والكباب ولا اقول البيض .. حتى لا اتهم بسؤ الألفاظ . هذا ان لم يكن في معجمهم معنى آخر للكباب كما هو حال البيض المظلوم.
ساعود لا حقاً للحوار
سلام
| |
|
|
|
|
|
|
|
|
|
Re: الإرهاب البوردي (Re: بكرى ابوبكر)
|
ازيك يا قضاضيمو ... مشتاقون ... كل سنة وانتي ألف طيبة والحوالينك طيبين .. وأنا طيب
كلامك زي الدهب، عيار كم وأربعين (العيارات دي نعل جودتها ماها عكسية مع أرقامها؟ الله يستر .. لكن أنا بقصد أجود أنواع الدهب).
تسلمي
| |
|
|
|
|
|
|
|
|
|
Re: الإرهاب البوردي (Re: Shinteer)
|
والله يا بت قضيم ما ممكن نقول لانه امثالنا دي شائعه ممكن تكون مقبوله من الامثال التي تحرقني جدا وممكن اسمعك فيها ما لا يرضيك واخليك اقل من حبه سمسمه هي حكايه المراه لو بقت فاس ما بتشق الراس واسمعوني كويس يا رجال في نسوان اخير من رجال والمثل دا عاده يطلق لتسبيط همه امراه اغتاظ منها الرجل لانه قامت بعمل عجز هو عنه وعلي ذلك ممكن تقيسي يا بت قضيم ما كل ما هو مترتبط بتراثنا حميد ابدا ولا مصدر فخر ولا يجب ان نغض عنه الطرف مثلا مثل ما تخاوي العب وما تبول في الشق والخادم ما مره والراكوبه ما ضرا والله امثال مخجله للغايه واكيد بتحكي عن واقع اليم وتؤرخ للرق في سوداننا وما اظن يا بت قضيم في زول واعي يقبلها لانها اشياء سائده ورفضها لا يعتبرارهاب بوردي قط. اما حكايه محب الجاب اسماء الفنانيين وراح يحدثنا عن سكرهم وتحشيشهم والله خطا واكبر من خطا وتعدي سافر علي خصوصيتهم وغيرمقبول البته وانا متاكده اسه لو في زول في البورددا بس نزل معلومات اي زول خاصه من غير رضاءه سيقيم الشخص المعني الدنيا والفيهاوليس في تنبيهه الي خطا سلوكه اي ارهاب كان له ان يناقشها كظاهره لكين ان يجي بالاسماء دا اسمه تشهير .
| |
|
|
|
|
|
|
|
|
|
Re: الإرهاب البوردي (Re: Shinteer)
|
اها يابت قضيم .. دى أنتى ولايكون دكين متخفى فى قلم بت قضيم ...
لكن والله اتلومت مع اخواتك فى البورد .. قلتى لي
الغلفاء مافيها حاجه?? طيب كويس يعنى ممكن أشتمك واقول ليك الكلمه دى "وعادى بالزبادى"...
سبحان الله... حسى البوست ده يعنى شنو?? خلاص ياستي لاتزعلى ولاحاجه .. خليهم يقولوا غلفاء .. وخادم .. وسريه وكل انواع الشتائم "التأصيليه" ..السودانيه الجميله .. يا سلام عليها .. وبكده حنكون اثبتنا اصالتنا و صبحنا بنات بلد صحيح ... وعيب عليكم يابنوت تشتموا الرجال .. شوفوا ليكم حله صوطوها ولا شلوفه دقوها .. ولا اقول ليكم .. امشوا اعملوا ليكم شلوخ .. الله .. مش حبوبتى مشلخه .. الفلهمه الفارغه العليكم شنو ??...
| |
|
|
|
|
|
|
|
|
|
Re: الإرهاب البوردي (Re: بكرى ابوبكر)
|
بت قضيم
احييك
فى الوقت الذى تتلاقى فية الحضارات فى وحدة انسانية كاملة
ما زلنا فى مربع حساسية الكلام فى طرحه على الملا لاقتنام فرصة
وجود المراه وكأنما الامر صرخه فى الفضاء لى احاسيس مكبوتة
وكلمات نود ان نقولها واقعيا ونخجل من مداولتها وكان صراخ البورد
ينبئ عن هذا الخجل الذى اصبح جرأة
لماذا لا نقتنم فرصه البرود فى عكس ثقافة كاملة ؟
لماذا نحصر تفكيرنا فى مربعات لا بتودى لا بتجيب ؟
علينا ان نعى دورنا الحضارى وان نكسب انفسنا شفافية القول ونحافظ على مسامع الجميع فى اختيار الفاظ ومواضيع حضارية
لك منى الثقدير
وصراخك فى محله
| |
|
|
|
|
|
|
|
|
|
Re: الإرهاب البوردي (Re: بت قضيم)
|
بت قضيم
كل سنة وانتي طيبة ... وعموم أهل البورد
يسلم فمك ( على راي أخوانا ) ...
ياريت الناس دي تقرا كلامك وتوعاه ...
برجع
| |
|
|
|
|
|
|
|
|
|
Re: الإرهاب البوردي (Re: Zaydoon)
|
يا أبا يارا بن الحسين .. البوست ده حق بت قضيم ما نقوم نسرقوا منها .. لكن لسع يا قريبي ما زالت اتنين أكبر من واحد.
أها بالمرة كدي نسلم على قضاضيمو دي تاني عشان نحلل استغلالنا للبوست بتاعها. يا بت قضيييييييم .. تسلمي ويسلم عقلك وتسلم إيدك الكتبت الكلام ده
| |
|
|
|
|
|
|
|
|
|
Re: الإرهاب البوردي (Re: doma)
|
بت قضيم
كل سنة و انت طيبة
لا فض فوك
كلام ذهبي من عيار تقيل
لقد بلورت الحال في هذا البوست الماكن ،، و وضعتي المكنون في إطاره الصحيح
و لكن برضو الناس حتقرأ و تقول ليك برافو ،، و يستمر نفس المسلسل
أرقدي عافية
| |
|
|
|
|
|
|
|
|
|
Re: الإرهاب البوردي (Re: Shinteer)
|
Quote: وهي تعاني من أمراض الفشل الكلوي بسبب الديانا وعقدة اللون والشعور بالدونية الغامقة ،،، وتتحسس من ذكر الختان.
|
بت قضيم...حبيبتى...
بركه الجبتى...
انا لفحت الجمله دة من كلامك...قلت قبال ما تفكرى ليها وتعملى ليها اديتنق..
ما لاحظتى فيها حاجه غريبه؟؟؟
الناس حساسين تجاه العنصربه والارهاب عشان الكلام القلتيه دة زاااااتو
| |
|
|
|
|
|
|
|
|
|
Re: الإرهاب البوردي (Re: Zaydoon)
|
واله يا زيدون وعيناه تماما لكين هل السكوت عن شجب هذه الامثال الغير جميله سيقوم بتصحيح الاوضاع المعوجه والحال البائس ولا ياهو يبقي الكوم زيدوه ردوم. adding an insult to injury
| |
|
|
|
|
|
|
|
|
|
Re: الإرهاب البوردي (Re: الجندرية)
|
العزيزة بت قضيم
شايفك غيرتي الفستان واهتميتي بالتسريحة
- يا زولة الفستان الاحمر وينو؛ ما قلنا حاجزنو -
مرحبا بعودتك ؛ بس يبدو انو في واحد سرق اسمك والباسوورد بتاعك في البوست دا
عادل
| |
|
|
|
|
|
|
|
|
|
Re: الإرهاب البوردي (Re: doma)
|
الإبنة دومة .. كل سنة وانتي طيبانة
يا بنتي انا لسع علي شوية من الغزلنة. خمسة سنوات على الأقل.
ازيك يا الجندرية مرة تالتة .. وما تصدقي كلام ابنتنا دومة دي. أنا ما زلت في ريعان الشيخوخة المبكرة
| |
|
|
|
|
|
|
|
|
|
Re: الإرهاب البوردي (Re: بت قضيم)
|
دومة
وشانتير سلام
اقطع دراعي لو فهمت حاجة
يكون مخي ما رجع من اجازة العيد لسه
كدي صلوا علي النبي
وقعدوا لي الكلام
بت قضيم وين ؟
البيت محروس وسته تكوس ؟
| |
|
|
|
|
|
|
|
|
|
Re: الإرهاب البوردي (Re: الجندرية)
|
شكرا جدا للاخت بنت قضيم علي فتح هذا الموضوع
اولا يهمني جدا ان اتحدث عن نموذج من البشر قابلته شخصيا، وهم ادعياء النضال الذين خرجوا من السودان واستقروا بالدول الغربية وصاروا مناضلين انيقين، فكرة الرجوع للسودان لا تروادهم ليس لانهم مطلوبين او مطاردين في السودان ولكن لانهم استعذبوا الحياة المريحة فاصبح النضال عبر الانترنت هو غاية جهدهم.
ولنا عودة
| |
|
|
|
|
|
|
|
|
|
Re: الإرهاب البوردي (Re: ASAAD IBRAHIM)
|
ازيك يا أسعد .. وكل سنة وانت طيب. كلامك مظبوط .. وأتمنى من الله أن يأتي اليوم الذي ترفض فيه السلطات السودانية ازدواج الجنسية .. عشان كل الهتش الزي ده يقعد برة في محله هناك. ما دايرين أجانب. مفروض أي واحد متجنس بجنسية أخرى يحترم جنسيته الجديدة دي ويساعدنا بصمته أو بالاستشارة فقط. على الحكومة السودانية الحالية أوالقادمة إلغاء ازدواج الجنسية. مثل هؤلاء المتجنسين سوف يديرون ظهرهم لنا ويهربون في حالة حدوث أي كارثة.
أطالب بإلغاء ازدواج الجنسية. ده حيكون أول مطلب بالنسبة لي في الديمقراطيبة القادمة.
| |
|
|
|
|
|
|
|
|
|
Re: الإرهاب البوردي (Re: Shinteer)
|
اخي شنتير تحياتي
مطلبك عادل وهولاء من حملة الجنسيات الاخري لا يعتمد عليهم وسوف يولون الدبر عند اول لقاء.
يا اخي والله بعضهم يسعي للحصول علي جنسية اخري للهروب من الضرائب وايضا حتي يقف بصف الاجانب عند رجوعه لمطار الخرطوم عقدة والعيذ بالله
بعدين يا ريت لو محترمين في هذه الدول الجديدة حدث ولا حرج
هولاء مناضلي الانترنت يكتب الواحد عدة اسطر شاتما الكل ويكر راجعا الي فرشه الوثير ينام وهو يمتلي ذهوا وعبطا بانه مناضل كبير.
ولنا عودة
| |
|
|
|
|
|
|
|
|
|
Re: الإرهاب البوردي (Re: ASAAD IBRAHIM)
|
اسه الجاب الموضوع دامع موضوع بت قضيم شنو ؟؟ اقروا رد الجندريه قالوا ادواالعيش لي خبازينو ولو ياكلونصه جندريه تعالي بي هناك نشرح ليك الغزلنه الزول دا عنده ام غزيل.
بت قضيم كان جاءت راجعه بتطالبنا بي ارضيه وحقوقها الادبيه وما الي ذلك لانناعملنا هاي جاكينق للبوست اهاانا بقيت مارقه لي بره
| |
|
|
|
|
|
|
|
|
|
Re: الإرهاب البوردي (Re: doma)
|
الإبنة دومة .. بالله ما تلوثي دماغ الإبنة الجندرية بمصطلحات زي أم غزيل وغزلل والغزللة. الكلام البنقول فيها هنا ده ليه علاقة اكتر من مباشرة بكلام بت قضيم .. ولو انتي شايفة مافي علاقة .. يبقى انتي ما فهمتي نحن بنقصد شنو .. ويبقى المغزلل زول تاني. يكون منو يا ربي؟
الكلام ده في صميم موضوع بت قضيم. أي زول أجنبي يساعدنا بالصمت. والله انا لو كنت من حملة الجنسيات الأجنبية لاحترمت نفسي ولذت بالصمت إلا في حالة إسداء النصح. يعني يجينا واحد أمريكي أو كندي أو بريطاني أو استرالي ينظّر لينا هنا ويلعن خاش أبو أهلنا وأخلاقنا وثقافتنا ويعمل فيها سوداني؟
أي أجنبي هنا .. وبالقانون .. ليس له الحق في التطاول على السودانيين. الكلام ده حيتحقق بعد وقت ليس ببعيد .. بعد إلغاء ازدواج الجنسية .. ده موضوع مهم جداً. خلي أي واحد عاوز يبقى هوموسيكشوال أو واحدة تبقى ليزبيان يقعدوا في جنتهم القاعدين فيها دي .. ويخلونا نحن نعوس في عواستنا القرووسطية دي.
الموضوع ده خطير بالمناسبة. في أشخاص، ليسوا بقليلي العدد .. لا همّ لهم في هذه الدنيا ولا في الآخرة غير التبجح والازدراء بأصولهم التي انحدروا منها. في ستين ألف داهية .. وسوف يكونون في أكتر من ستين الف داهية بعد أن يتم تعديل قانون الجنسية في المستقبل القريب .. وإلغاء هذا العبث.
| |
|
|
|
|
|
|
|
|
|
Re: الإرهاب البوردي (Re: ASAAD IBRAHIM)
|
لووووووووول اسعد من نبراسكايربط كفاحه مع شنتير من هيروشيما ويكلمونا عن نضال البوردات غايتو اهلنا زمان بقولوا الجمل ابشوف عوجه رقبتو. اسعديحذر من المندسين الجدد وشنتير يطالب بسحب الجنسيه السودانيه من الصينيين !!!
| |
|
|
|
|
|
|
|
|
|
Re: الإرهاب البوردي (Re: الجندرية)
|
الاخوة الاعزاء
ان ما يمارس في ثقافتنا من انتهاك لحق المراة يجب ان يناقش بهدوء وتركيز واوافق الاخت الجندرية تماما في مدلول اهمية اللغة كاداة لتوصيل ثقافة سائدة، ولا يمكن باي حال من الاحوال تجاهل ان هناك نسبة مقدرة متعلمين وغير متعلمين من الرجال ينظرون الي المراة بشكل مزري، وهذا الوضع يتطلب عمل جاد ومثابر من الجميع لنشر الوعي في الرجال والنساء، وربما لا انفصل من مشاركات سابقة لي في هذا المنبر فاقول ان المراة ايضا تكرس هذا الواقع، فكثير من النساء يتعاملون مع هذا الواقع كارضية ثابتة لهن، وهناك ممارسات كثيرة ليس في الرجل دخل فيها، وهنا اذكر واقعة لاحد اصدقائي الذي طالب بعدم ممارسة الخفاض علي بناته، فتم استغلال وجوده بالخارج وتم خفص بناته بمعاونه جدتهم، فما هو دور صديقي هنا او اليس العب في هذه الحالة يقع علي المراة بشكل اساسي، لكن حقيقي المسالة اعمق من ذلك بكثير، فمثلا في غرب السودان المراة تمارس اعمالاً اكثر من الرجل حيث تشارك بشكل اساسي وفعال في الزراعة، ولكن في الجزيرة مثلا المراة لا تعمل في الاعمال اليدوية ولكن ربما هناك نسبة بسيطة محرومة من فرصة التعليم الجامعي لامتعاض الاسر من ظاهرة الاختلاط بين الرجال والنساء في الجامعات، فاذا اخذنا هذين المثلين نجد ان اوضاع المراة في المنطقتين مختلفتين تماما ولا يمكن ان نتحدث عن ظلم بشكل مطلق في كليهما، فلكل حالة ظروفها وملابساتها، ايضاً في بعض المناطق في غرب السودان مثلاً المراة المطلقة او الشابة لها مسكن منفصل تماما ولها لحد كبير حرية في اقامة علاقات اجتماعية مع الجنس الاخر، ولكن اذا نظرنا الي قبائل الشرق نجد ان المراة لا يحق لها بتاتاً التعامل مع الجنس الاخر الا تحت مظلة الزواج، ولا اتجاوز ان قلت ان بعض القبائل في الشرق تعتقد جازمة انه لا يجوز تحت اي ظرف روية فم المراة حتي اذا ذهبت الي طبيب اسنان، ففي ظل هذا التباين في المعطيات لا يمكن الحديث عن شكل موحد للعمل علي حرية المراة، ولكن هناك تساول منطقي ايضاً هل هناك اي عمل مؤسسي لقمع المراة وعدم اعطاءها حريتها، فمثلاً كل المكاتب الحكومية الان مليئة بالموظفات وفي احسن الدرجان الوظيفية والجامعات السودانية نسبة البنات فيها تتجاوز الاولاد بمراحل.
كل ما اود قوله ان حرية المراة حديث طويل ويحتاج الي عمل جاد من النساء والرجال علي حد سواء والجهل في بلادي صفة لا يمكن استثناء النساء منها ولا الرجال.
وارقدو عافية
| |
|
|
|
|
|
|
|
|
|
Re: الإرهاب البوردي (Re: الجندرية)
|
هي يا الجندريه الباسويرد ما تاني راحت وما قدرت ادخل اوريك الغزاله الصابت زولنا, والله الباسويرد دي الا ادرعها في رقبتي متل محفضتي دي
| |
|
|
|
|
|
|
|
|
|
Re: الإرهاب البوردي (Re: بت قضيم)
|
| Quote: يعني يجينا واحد أمريكي أو كندي أو بريطاني أو استرالي ينظّر لينا هنا ويلعن خاش أبو أهلنا وأخلاقنا وثقافتنا ويعمل فيها سوداني؟ |
والله يا شنتير الكلام ده الدخلوا شنو ماعارفه .. هل تقصد ان الناس الذين استاؤا من ضرب مثل الغلفاء هم اصلا يحملون الجنسيه السودانيه فقط بل أجنبيه أيضا ? انا لاأتفق معك واعلم ان كثيريين منهم سودانين ... ثم أن امتلاك جنسيه مزدوجه لا يعنى الانسلاخ عن الوجدان السودانى اللذى تشكل عليه الفرد ...
أنت مثلا تعيش فى اليابان وتتحدث لغتهم ... ولا تقربك هناك ولا تحوم حول الكوش ..فهل هذا ينزع حقك فى سودانيتك??? انت ربما كنت من المحظوظين اللذين "منت" عليهم مصادر "أجنبة" بمنحة دراسه ...لكن هناك الكثيرون من السودانين الشرفاء اللذين اضطروا للعمل فى الشتاء القارص
في ظروف مظلمه لا يدري عنها أصحاب المنح "الاجنبيه" عنها شيئا ..فقط لان يوفروا لاسرهم فى السودان ما يغنيهم عن التسول والموت بالملاريا ... ولاننسى ان كثير منهم قد قطعت سبل عيشه بالسودان بسبب حكومة الجبهه ولم ير مخرجا الا لتلك البلاد ... والسبيل الوحيد للبقاء هناك والعيش فى سلام مرهون بحصولهم على الجنسية ... لكن طبعا انت مابتعرف حاجة عن كل تلك الهموم والضريبه المثقله اللتى يدفعها هؤلاء .. فأنت لقمة عيشك مؤمنه ...
هؤلاء الناس ذوى الجنسيه المزدوجه كما تقول فا تحين بيوت اسر عديده فى السودان ...بسببهم تعلم اخوان لهم بعد أن رفعت الدوله السودانيه يدها عن تعليمهم ,, ولم يكونوا من اصحاب الحظوظ فى المنح ,, لتأتى أنت وغيرك للاستهزاء بهم وصب جام غضبك عليهم بدلا ان تلعن الحال المايل اللذى اودى بهم فى بلاد الصقيع ,,, لكن يبدوا انهم اصبحوا الحيطة الواطيه لكل من يريد أن يستعرض عضلات وطنيته ويريد ان يستحوذ على مفهوم الاصاله السودانيه ... ويوزع على باقى الغلابه بطاقات الهويه السودانيه ,,,
مع خالص ودى وأحترامى لك
| |
|
|
|
|
|
|
|
|
|
Re: الإرهاب البوردي (Re: بت قضيم)
|
صباحات الفل للجميع
الوراه حاجة من هسه يقوم يسويها إذ أنا اعلنت عليكم البري
اعتذر عن تأخير الرد،،، الحقيقة ليس بيدي ولكن بيد السوق والعواسة والضيوف
بعدين أنا خجلانة عديل كده إني ما قادرة أرد عليكم فرداً فردا على الأقل اليوم
وخجلانة كمان لاني دخلت توووشك في الموضوع لا سلام لا كل سنة وانتوا طيبين لا يحزنون
العتب على العصيدة اللخيتها لخ في رمضان كبست على الكائن الهلامي المدعو مخي،،، مرات بالجد بحس بمخي رغوة صابون سوداني كده غلوه عشرين مرة وابى يبقى صابون بودرة،،، اعذروني جدا
وكل سنة وانتوا احلى واطيب
يا مهاجر يا بكري يا هوبفل يا شنتير يا نزار يا دومةيا حسين يا آوت كاست يا حمزة يا زيدون يا ابو جهينة يا تماضر يا جندرية يا عادل يا أسد يا أم أس دي يا كل البورد
يخليكم ويطرح البركة فيكم يا رب ويلا منتظرة منكم حق العيدية بما اني اتخلفت وجاني شلل اطفال رسمي من خدمة البيت
اسمحوا لي أن اخص بالرد آوت كاست وتماضر وجندرية ودومة
انظروا حماكم الله كيف أن عمتي أحياناً (تتناقش) معي حول موضوع اكون استفزيتها فيه إذ تقول (يا الغبيانة يا السجمانة يا المطرطشة(وانا ما عارفة مطرطشة دي ليها علاقة بالمخلل واللا لأ) يا المطرطشة سدي خشمك ده يسد نفسك إن شاء الله قومي سوي لينا الجبنة تقوم قيامتك خلي الكلام الفارغ ده)
وما اوردته هنا مع عمتي وعلاقته بالموضوع يشابه العلاقة بين ما اورده أسد واثنى عليه شنتير وموضوعي،، بس الفرق أني قلت ما قلت لاني وانا بقراكم انتوا تحديداً كنت بفكر في لطافة اللفظ وحسن استخدام المقولة التي تقول (اختلاف الرأي لا يفسد للود قضية)
ستخربون طبعي،، أجيب من وين طبع حلومي تاني حرام عليكم
سلمتم جميعاً
دوما الحبيبة
انا لم اشر أنني مع أو ضد أي من الأمثال القديمة،،، وإن كنت أؤكد هنا أني بالطبع ضد فكرة الفاس الما بتكسر الراس،،، عملياً ليس نظرياً فحسب، لاني شخصيا اثبت لعالمي الصغير انني امرأة بمائة انسان،، سواء من حيث الأخلاق،، أو العمل،،، أو الإنجاز،،، فكيف يمكن أن اقبل بأن أوصف باني أقل درجة (انسانية) من انسان آخر بغض النظر عن نوعه وجنسه؟؟؟
لكني وددت طرح فكرة بسيطة،،، وهي أن مقابلة مثل هذه الثقافة بالنفور والزجر والحدة والنفي لوجودها دون العمل الفعلي على إزالتها،، لهو عبث وتضييع وقت،، هناك حكمة قديمة تقول ( بدلاً من أن تلعن الظلام أضئ شمعة) واعتقد أن المراة إن ارادت بعض الإنصاف في المجتمع الذي تعيش فيه،، فعلى الأقل يجب عليها أن تنظر لنفسها ككتلة كاملة لا أن تجزأ نفسها،، تارة هي مظلومة بعملية الختان وتارة هي نفسها السطحية المنظرجية المادية المظهرجية وعلى نفس القدر هي المتعملة المثقفة الواعية المدافعة عن حقها
لماذا لا تحارب المرأة في كل الاتجاهات بدلاً من تعقيد الأمور بالنظر لها بحاسسية مفرطة وكأنها فقط جزء لحمي من جسد يجب إزالته؟؟؟
من الذي يظلم المرأة أكثر،،، رجل لا يفهم نفسياتها ويطالب بختانها أو امراة لا تعلم أن مشكلتها الأساسية ليست فقط كونها (غلفاء) أو (مطهرة)؟؟؟
بعدين فيها شنو لو أحدهم قال (غلفاء)؟؟؟
اليس هذا ما تطالب به المرأة من الأساس أن تكون (غلفاء)؟؟؟
وهذه الكلمة كلمة عربية فصحى كما يقول سي دي اللغة الذي بحثت فيه والله اعلم.
لماذا تنظر لهذا الجانب بتركيز مع تجاهلها لكل جوانب الظلم الآخرى في حياتها؟؟؟
المرأة مظلومة في عملها وفي بيتها وفي ابناءها وفي صحتها وفي وفي وفي،،، ليس فقط في ختانها من عدمه.
نفي الثفافات القديمة وإن كانت ظالمة وجائرة وخاطئة لا ينفي وجودها بل أن نفيها قد يؤدي بنا إلى جيل بلا تاريخ ولا اساس يستند عليه،،، فكيف تدرك فتاة من جيل صاعد تاريخ مجتمعها لو لم تدرك وتعي تماماً ماذا يعني (غلفا وشايلة موسها تطهر)؟؟؟ ثم ماذا قدمت المرأة الحديثة (إن جاز التعبير) لتنفي هذه الثقافات البائدة؟؟
وهي هي (بائدة) بالفعل أو في طريقها للإنقراض ومفروض نديها وقتها؟؟؟
هل المرأة المختونة مظلومة أكثر من امرآة تجبر على خلع ثوب العمل الأبيض وارتداء الالوان وتبخير التياب ولبس الدهب وال..نيييييييييييي في بيوت البكيات؟؟؟
هل المرأة عقل أو مجرد قطعة لحمة تتجادل قرون في البت في ازالتها من عدمه؟؟؟
هل ختان المرأة يختن عقلها وحياتها؟؟؟ وهل أنوثتها مرهونة بذلك الجزء اللحمي فقط؟؟؟
لماذا إذن تصر المرأة نفسها على أن الختان يلغي آدميتها طالما هي في نفس الوقت تنادي بأن لا تعامل كجسد مختون من غيره؟؟؟
أنا لا اقول بأن نمجد امثالنا الخاطئة،،، لكني اعترض على طريقة اعتراضنا عليها،،، بالعكس،،، اظن أنه اولى أن نذكر انفسنا بها حتى لا يعيد تاريخ طويل نفسه
ولا اقول أن المراة لم تظلم بعملية الختان،،، لكن الختان ليس بأسوأ حالاً من الشلوخ ولا دق الشلوفة،،، من حيث العذاب والألم من ناحية،، ومن ناحية أن الختان امتهاناً لأخلاقياتها من جهة،،، والشلوخ امتهاناً لنظرة المجتمع لها من جهة أخرى كوجه وجسد فقط يجب تجميله بغض النظر عن مدى العذاب والتسمم والموت البطئ الذي يمكن أن يؤدي له.
لماذا إذن لا ننظر للشلوخ بنفس الحساسية؟؟؟
وعليه،،، حديثاً،،، لماذا لا ننظر لل(تاتو) بنفس النظرة؟؟؟
والدخان من جهة أخرى
وصلبة الحناء اربعة وعشرين ساعة؟؟؟
ووضع المرأة عموماً في إطار (الجيهة) وال(سماحة) وال ( كبرتة)
كيف تصنع الدلكة؟؟؟؟
اليست عملية صنع الدلكة التي قد تستغرق أيام أمام نيران لا يعلم بها إلا الله هي أيضاً عملية تعذيب؟؟؟
أدري أن أحدهم قد يجيبني بأن الفرق أن الختان به ناحية (أخلاقية) فهم يظنون أن ذاك الجزء المستأصل يؤدي إلى فساد المرأة إن لم يستأصل الخ الخ الخ،، حسناً،،، انا اتفق تماماً مع سطحية ووبؤس هذه النظرة لو كان الختان المقصود به هذا المعني وليس التطهير الجسدي الصحي،،، لكن بالنسبة لي،، الشلوخ تساوي الختان تساوي التاتو تساوي امرأة سطحية،،، موضوعة في إطار غرفة النوم حتى ولو كانت وزيرة.
او لتثبت المرأة أنها ليست هذه الفكرة فحسب،، فيجب أن تقلل المرأة من حساسيتها تجاه هذه الأمور لأنها أول من يدرك انها ليست مجرد دمية تكون قوية متحضرة لو ما مختونة ومتخلفة وجاهلة لو مختونة. وأيضاً التفكير بنفس المستوى في كل المظاهر السابقة التي تؤدي بها إلى مجرد انسان لا يهتم لشئ في الحياة إلا (السماحة)
موضوع الأمثال الأخرى الخاصة بالعبودية من غيرها ام أشر لها وأنا اساساً عندي رأي بأننا جميعاً عبيد الله سود على بيض على بنفسجيين،،، لذا لا يحرك فيا ساكناً كوني انتمي لدماء زرقاء أو دماء حنظلية،،، بعدين تاريخ الانسان كله عقد من هذا النوع منذ بدء الخليقة وحتى اللحظة.
الكثير من الأمثال العربية والأجنبية على السواء لا اؤمن بها ،،، سواء إن كانت صحيحة أو غير صحيحة فانا لم اجد (على الأقل حتى الآن) سبباً للاقتناع بها، كمثل حكمة يقول (الباب البجيك منو الريح)
أما يا تماضر ما جاء على لساني عن الديانا،،، فاتمنى أن العربي الصرفته فوق ده (واللاهو هروغليفي ما عارفة) يوضح فكرة أنني لست ضد أو مع،،، انا فقط طرحت فكرة نظرة المرأة لنفسها من هذه الزاوية الضيقة ومطالبة العالم في نفس الوقت من النظر لها من زوايا أخرى،،، حساسية فظيعة تماماً كحساسية الأعور،،، ( يقول للأعور أعور في عينه) يقوم طوالي الأعور يتعقد مع أن كونيته كانسان لا تتوقف حد عينيه فقط.
لو المرأة المتلطخة بالديانا آمنت بانها فكرة وليس (لون) لربما آمن الرجل معها بذلك،، الا يقولون أن (الإيمان بشئ كفيل بهز الجبال؟؟؟)
جندرية الحبيبة
حاشاني أن اتهمك أو اياً كان بالانصرافية،،، اعتذر ان فهمتي ذلك،، واعترف أن الله لم يخلق في الأرض انصرافيا أكتر من إنصرافيتي،،، انا نفسي بنزل السوق وبخم خم الله أكبر،،، وللأسف مرات لا اشتري شيئاً لرغبتي الشخصية،،، بس عشان النسوان يقولوا،،، هذا عيب أنا ادري،،، لكن عدم الإفصاح عنه لا ينفي وجوده
وعموماً لن نختلف،،، ولو اختلفنا،،، انت تظنين أن اللغة مهمة،،، وأنا مقتنعة بأن العمل أبقى. ومقتنعة أن اللغة تحتمل أكثر من تفسير،، يعني انا ممكن افسر ليك المثل التهمة تفسير إيجابي تماما بأن اقول ( تريقة على إحداهن من الغلفاوات المؤمنات بعدم جدوى الختان وفي نفس الوقت تسترزق من هذه المهنة،،، ليس تريقة على غلوفيتها بل على ظلمها لبنات جيلها) مش ممكن افهمه كده؟؟؟
ولا اظن اني صادرت حق بوردي ( والله جنس مصطلحات اخترعناها) أظنني عبرت عن رأي في حدة الطرح ووقوف الواحد لي واحد في حلقه لدرجة الزجر،،واحدة قالت بيض ، مافي نية سلميةهي لا بد رعديدة،،
والله العظيم يا جندرية رسمي كده مرات بخاف اتكلم مع بعض الناس (اخاف) بمعنى اخاف وعبرت عن هذا الخوف بكلمة (إرهاب) ،،، لكن الجميع حر في ما يقول طالما لا يمس نفساويات زول.
المهم ما تشيلي مني ،، وان شاء الله الهندي الكتبته فوق ده يكون وضح ال(نزرية)
بعدين يا آوت كاست أنا المرة دي ما دكين،،،المرة دي انا اللهو الخفي
والنسألكن،، سبتوا الموضوع كلو مسكتوا لي في دي بس؟؟؟؟ ماله البيض وماله الفن؟؟؟ والله حساسية تعقد بالجد.
-----------
ما تقولوا لي نقناقة،،، بالغت بالجد لكن ما اظن أجي قريب أخدت حق تلاتة أيام لي قدام
بالمناسبة استاذي بكري،، انا سعيدة بكلامك،،جداً،، واعلمك اني اول من حيحضر المهرجان،، العايز يشوفني يفتش ليه على كعوجة وشناة ما تدي الدرب
قال بت قضيم قال،،، والله بت لالوبة ما تتم
| |
|
|
|
|
|
|
|
|
|
Re: الإرهاب البوردي (Re: doma)
|
Bit Gudaim.. This time I am talking in English, because I am at work, but I needed to respond anyway.
First: I don't see any contradiction between expressing our digust from using a word (which is by the way is SEXUALLY LOADED
and fighting bad habits and traditions that have contributed to the backwardness of our social and economic status in Sudan.
Second: I see many invaluable discussions and great efforts tackling the same subjects you have mentioned (and more) by both males and female of this board, but unfortunately, I have never seen any SERIOUS contribution by you or any of those who share your views on this post about how to improve the status of women, I think what you are doing with this post is counter-productive (starting with it's name)and not a constructive criticism, this is why I won't accept it, becasue I smell a sent of deception in it.
Third: if you are truely and genuinely concerned about the status of women in Sudan, why don't you open a discussion about all the problems and challenges facing us as women inside and outside Sudan instead of attacking us indiscriminately and giving us the tilte of TERRORISTS>
Finally, just to reiterate what I have already said, your post is unfair, self-destructive (since you are a woman, as I assume), and serves no goal at all, but frustrates women's efforts to be respected and not be used in a sexual context.
I will translate this later, when I have the time.
| |
|
|
|
|
|
|
|
|
|
Re: الإرهاب البوردي (Re: Outcast)
|
تاح تراح ... أنا ارهابية
أبداك من وين يا بت قضيم ... يللا خليها تجى زى ما تجى أصلى عارفة كتابتى
مكوجنة زى العصيدة ... عارفة الحبوبات ديل مافى شى بشفع ليهم
غير حنيتهم وجهلهم ... ديل ارهابيات عدييييل ... من مايشوفو ليهم
بنية حايمة يدخلو يدهم فى محفضتهم ويمرقو موسهم ... يوم طهروها ويوم
شلخوها ويوم قومو على شلوفتها دقوها ... شفتيهم يا دى
مجرمات كيف ... ارهابيات درجة اولى ممتاز ... شفتى حتى حجاهم ارهابى ... يقعدو يحجوك
بالغول والبعاتى يطيرو النوم من عين الشافع ... الشين فى سواتهم
انهم بمارسو ارهابهم دا على اطفال ... يعنى لو خلو الواحدة كبرت
ووعت واختارت لى نفسها كانن مرقن من اللوم تب ... ودا
الفرق بين الطهروها وبين القعدت فوق حفرت دخان ... وعليهو
كلو تاح تراح ... عارفة يا بت قضيم واحدة صاحبتى كان
غايظها المثل ... غلفا وشايله موسها وتطهر ... وكانت تقول حبوبات
ما بختشن كلهن بت مجدوب ... ويوم صاحبتى حكت راسا ونامت وقامت والمثل
اتحول عندنا من اليوم داك لى ... سادة وشايله
موسا وتشلخ ... وكلو ضبح ... شفتى بنات مجدوب النبى ما
بستحقن نعلن على ارهابهم ارهاب مضاد
ما لازم نردد حجوات البعاعيت شان الاجيال الجديدة تعرف حبوباتن وزمنهم
زى برضو ما لازم نردد امثال بنات مجدوب ... ممكن نلم حق الحبوبات دا كلو
فى كتب للاجيال الجاية
ويا زولة لو دا موضوعك ول ما موضوعك انا غايتو اتفشيت شوية
أها ودعتكم الله
| |
|
|
|
|
|
|
|
|
|
Re: الإرهاب البوردي (Re: noura)
|
العزيزة بت قضيم
وينك؟؟ العيد مبارك عليك
يسلم تمك(على قول ناس الخليج) وفيتى وكفيتى
وردك الاخير وضح بعض النقاط التى اظنها التبست على البعض،يعنى وضعتى النقاط فوق الحروف
يعنى الرسالة-حسب فهمى- البيان بالعمل،لأنه الكلام حتى لو غير محتاجين لقرون عشان نصل لنتيجة،وترتيب الاولويات مهم جدا لسرعة الوصول للاهداف،يعنى التعليم ومحو الامية والعلاج والغذاء اولوية تجى بعدها محاربة الختان وغيرة من العادات الضارة.
والنقطة الاخيرة فى ناس عايزةتتخذ من الحملة ضد بعض العادات والممارسات الخاطئة شماعة لمحاربة التاريخ ولما لا يرغبون هم فيه من الموروث الثقافى السودانى الاصيل حتى حجى الحبوبات على قول الاخت نورة
تحياتى
| |
|
|
|
|
|
|
|
|
|
Re: الإرهاب البوردي (Re: noura)
|
العزيزة بت قضيم
وينك؟؟ العيد مبارك عليك
يسلم تمك(على قول ناس الخليج) وفيتى وكفيتى
وردك الاخير وضح بعض النقاط التى اظنها التبست على البعض،يعنى وضعتى النقاط فوق الحروف
يعنى الرسالة-حسب فهمى- البيان بالعمل،لأنه الكلام حتى لو غير محتاجين لقرون عشان نصل لنتيجة،وترتيب الاولويات مهم جدا لسرعة الوصول للاهداف،يعنى التعليم ومحو الامية والعلاج والغذاء اولوية تجى بعدها محاربة الختان وغيرة من العادات الضارة.
والنقطة الاخيرة فى ناس عايزةتتخذ من الحملة ضد بعض العادات والممارسات الخاطئة شماعة لمحاربة التاريخ ولما لا يرغبون هم فيه من الموروث الثقافى السودانى الاصيل حتى حجى الحبوبات على قول الاخت نورة
تحياتى
| |
|
|
|
|
|
|
|
|
|
Re: الإرهاب البوردي (Re: Shinteer)
|
أتمنى من الله (ومن بوذا ومن الطبيعة؛ للذين لا يؤمنون بالله) .. أتمنى أن يتسرب الختان الفرعوني نفسه (الذي أنا ضده) إلى الثقافة الأمريكية والأوربية .. وتتبناه فتياتهم المجنونات هؤلاء .. وأن يصبح عنصراً من عناصر الجمال الغربي. عندها سوف ترين انقلاب خطاب نساء العالم الثالث مائة وتمانين درجة. تمنياتي هذه ليست ببعيدة .. لأني أعرف أن الفتيات الغربيات مغامرات .. ويحببن كل شيء "إكزوتيك" .. ومن السهل أن يتبنيْن هذه العملية إن توفر المروجون لها.
لكن ياسنتبر انتهيت من " القضيه" نهاية بطل.....
نورا انتى حربيه...
والجندريه اريتها بتى...
اميمه اختى سالت امى الله برجنها فى مسجل عن عذابات المراه...والامواس الحايمه دى قبل عشره سنوات وفى بتزورها فى اسبانيا...قالت والله دايات زمان زلعننا...شايلات امواسن ديل وحايمات, يس ما يلقوا فيك سبب...
الخفاض والشلوخ ودق الشلوفه دة ممارسات ارهابيه...ومش كان المجتمع لمعها وعمل معاها دوبيت وغنا حقيبه ومليون مثل برضها ممارسات حاقده ودمويه...اضرارها اكتر من نفعها...والناس يختاروها مش يجبروا علليها واوشام الغري دى كلها اختيار...ما وراقه ولا تقليد وحسه اطباء الجلد بدوا ينتقدوا فيها وحيخلوها عن وعى...والمجانين فى الدنيا راقديييين...
والجاهل فى ذمة الواعى...لو حبوباتنا كان عندهم سودانيز اون لاين كان الطهور دة وقف قبل مية سنه...يتبعه الشلوخ ودق الشلوفه وبلاش...جزاره
| |
|
|
|
|
|
|
|
|
|
Re: الإرهاب البوردي (Re: Tumadir)
|
إن شاء الله يا تماضر الطهورة تقيف بركة النبي وسيدي الحسن. إن شاء الله نستقل برانا (كعالم ثالث) وما نحتاج زول يقول لينا حقوق الانسان شنو وحقوق الكدايس شنو وحقوق زواج المثليين شنو. تصدقي يا تماضر زي ما في ناس عندهم عقدة ثقافة غربية .. أنا عندي عقدة كيف يكون عندنا حاجة حقتنا برانا. أها ده يحلوه كيف ده .. عشان ما نبوظ الشغلانة تاني؟ وده بالمناسبة ما مقتصر على الطهورة وبس .. كل شيء .. كل شيء بتمنى انو يكون نابع من عندنا (كبنغلاديشيين)
| |
|
|
|
|
|
|
|
|
|
Re: الإرهاب البوردي (Re: Shinteer)
|
انا(كمنجه) بفتكر انه الموضوع دة ليه علاقه لوجودنا فى العالم ، نحن ما برانا...وماجزر معزوله...
فما تزعل منو يا شنتير بوصفك (كدنكة)...مع انى ما اتذكرت الكدنكه دة شنو بس حاجة فى المزارع...وربنا يستر
| |
|
|
|
|
|
|
|
|
|
Re: الإرهاب البوردي (Re: Shinteer)
|
"شانتير" (بس عشان أغيظك) ياخى حرام عليك , مش قبل كده قلنا أنى "أخت" Sister, Sister مش راجل ولا عامل فيها ماشغال بى .. معليش يا سيدى نحن بطبعنا ناس طيبين ..
أنا والله (وما عليك على حليفه) فاهماك فهم يمكن أنت ذاتك ما فاهمه عن نفسك ( وأبدا لا أقصد الاساءه لك او الادعاء لى) لكن زى ما بقولوا الخواجات .."I know where you are comming from"
لكن أرجوك أرجوك .. ماتخلى زمرة ناس متاجرين بالقضيه أو غير مستوعبين للحاصل .. تخليك تكفر بعدالة قضيتنا .. ما تخلى حنقك على أسلوب بعض لمراهقين يعميك عن التمعن فى الموضوع بجديه .. أنا أتفق معاك تماما ..فى ناس كتيرين من حملة الوية تحرير المرأه هم فى الواقع اول أعدائها بمماساتهم الصبيانيه ر و ضعف انتمائهم لذاتهم, وانبهارههم الطفولي بكل ماهو ليس شرقى , مثلا, عندى واحده صاحبتى (من هذه النوعيه ..رغم انها بالمناسبه تعلمت وتربت فى جو ريفى خالص) سألتها عندما تزوجت لماذا لم "تتحنن" فأجابتنى بحدة ..الحنه دى تخلف .. وهى كل يوم تشيل وتعمل فى المكياج ..مره احمر ومره أخضر ..فقلت لها بهدوء .. وماهو الفرق بين ما تفعلينه والحنه , فكلاهما للزينه ..وبرطمت بكلمات وتعليلات واهيه .. هذا فقط مثال واحد وغيره عشرات .. لكن ديل ناس أصلا فهمهم تعبان يا شنتير
والاشتطات والفهم المقلوب للاشياء فى رأى وتجربتى هى خصله فى البعض بغض النظر عما يحملونه من فكر جزء من كيانهم وليس له علاقه بانحيازهم لقضايا المرأه او غيروا والزوله القلت ليك عليها دى ذاتها كانت قبل كم سنه كده من أكثر المنظرين لوجوب التزام المرأه منزلها وعدم العمل تماما عندما تتخرج ,, والله دى حقيقه وليست مبالغه منى, عشان كده لازم تتجاوزهم مماما لانه أذا هم نجحوا فى استفزازك لدرجة ان تقفل أذنيك عن سماع اى شخص يتحدث عن المرأه والوضع الاجتماعى المتدنى لها .. ح تكون حرمت نفسك من اضافات كان يمكن ان تكون ممتعه وثاقبه لك ..
وحاجه تانيه يا شنتير أود ان أهمسها فى أذنك وأرجو ان تقبلها .. الانغلاق الشديييييد داخل خيمة الحاردلو ده بالله وعليك الله سيبوا "ماقلت خليهوا مره واحده) لكن والله فى خيم كتيره تستحق زيارتك .. ومشاركتك ...وحاجه جميله ونادره فى هذا الزمن , )من العولمه) تلقى انسان من عالمنا نحن بيحب نفسه كما هو ويتباهى بفنه وتراثه .. لكن فى هناك خيط رفييييع بين الاحتفاء بالموروث والاحتفال بالاصاله وبين التعصب للذات والانا المفرطه .. ان شاء الله كلامي ده يكون وقع موقعه الصح .. لانى شاااايفه فيك حاجات كثيره تنبئ بمشروع .....اممممم ما عارفه والله ..لكن اى حاجه متوقعه ..
وبرضو ..سلامى وودى الشديدين لك ..وبالله ابقى اتذكرنى وبطل حركات "شيوخ العرب" دي .. ولما تلاقينى "بهناك" ما تقول لى أخ أوتكاست .. ولأ .. ما ناويه اغير اسمى ..
| |
|
|
|
|
|
|
|
|
|
Re: الإرهاب البوردي (Re: بت قضيم)
|
بت قضيم
والله ده الكلام لخصت لينا مشكلة كبيرة نعانى منها وخاصة هذه الايام وتتمثل فى بوستات الاستغاثه ومن ثم تتحول الى استقالة ولمن نجىء نرجع نشوف اسباب هذا البوستات نجدها لا تتستاهل كل هذا الحيز والشىء البحير انو مثل هذه المفردات والتعابير التى تعصف بالبورداحيانا نجدها متداولة فى المجتمع السودانى بكل تقافاته
وفى النهاية بقول ليك شكرا على البوست بنكهة القضيم
تحياتى
| |
|
|
|
|
|
|
|
|
|
Re: الإرهاب البوردي (Re: بت قضيم)
|
مساء السعادة على الجميع
اليوم ده مالو طويل كده أبى ينتهي روحي بالجد اتسلت
مهيرة النجدة
اشكرك على هذا التفسير المريح لطلاسمي اللغوية ، لا ادري لماذا لا
استطيع أن أكفي وأوفي في كلمات موجزة كما فعلتي أنت،، العتب على النقنقة المتوارثة حيناً من الزمان،، عندي حبوبتي كان بدت ليك قصة موضوع يوم الضحية بتخلصها الحج الجاي والعجب لما تغسل الكمونية
ما علينا
نورا ذكرت نقطة مهمة جداً وهي الفرق بين الإجبار وإتيان الشئ برغبة خالصة،، والحقيقة ما زلت لا أرى فرقاً بين الخفاض (يا محب نطيت لي تماضر في حلقها) وبين الدخان،، فالطفلة بالطبع لم تخيير في موضوع الخفاض،، وأيضاً الأم كذلك،، أجبرها مجتمع مغلق راسه طوبة،، الأم تخاف على ابنتها من (الشتيمة) وال(شتيمة) هذه لفظ استعرته من آوت كاست التي تنادي بعدم الخفاض ، وتعتبر في نفس الوقت أن كلمة (غلفاء) شتيمة،، (ده تناقض استصعب عليا فهمه)
وهو نفس المجتمع (النسائي) المغلق الذي يجبرها على افتراش حفر النار ،، لأنها لو لم تفعل لقوبلت بعواصف هوجاء تقودها للأسف (نساء)
لعمري ما رأيت أباً أو زوجاً أو أخاً يزجر زوجته (يشاكلها) بأن (مالك ما مدخنة متل الدكر تقدلي) أو (وووووب عليا قال عروس وريحتها تنزل الصقر كر يا يما)
هو نوع آخر من أنواع الإرهاب الإجتماعي وإن اختلفت درجاته.
هذا هو الفرق عندي يا نورا،، وبالنسبة لقصص الحبوبات،، فمرة أخرى أقول أن لكل زمان ومكان أحداثه وأشيائه الخاصة به،، يعني أخوي الصغير،، صاحب السنيين،،، الذي يجلس يومياً ليشاهد (تلي تبيز) ويختمها بالبوكمان،،، ويجيد لعب البلاي استيشن،، واقتحامات الفضاء،، ويعلم تماماً ان هناك شئ في الكون يسمى النظرية النسبية (وإن لم يفهمها)،، ذاك الصبي الذي يشاهد عائلة السيد آدم (واللا اسمها شنو ما بعرفوا) ،، والذي كل يوم يشاهد مناظر الدماء وقتل الأطفال وسلب النساء في قنوات تجوب ما خلف البحار،، ممكن هذه العقلية الإنترنتية الحديثة،، التي بكبسة زر كي بوردية تشاهد عمها المقيم في سقط لقط وهو المقيم في أم صفق،، ممكن تخاف من الغلاوية والسعادين وتحلم (الفتيات منهن) بود النمير؟؟؟
أشك كثيرا في أنه سيعتبر هذا نوعاً من العبط الفكري مع الاعتذار لجيل كامل كان ينام الساعة الثامنة ليلاً،، ويستمع لعويل الكلاب،، في ظلام دامس لا ينيره إلا قمراً يتوسط سماء ساكنة يشوبها صوت الصراصير وكواريك الضفادع، ولا يعلم شيئاً عن (بحري) التي كانوا يذهبون إليها (سفراً) في المراكب
بدون تعقيد من أهل الطب النفسي والفلسفيات،، الزمن اتغير،، وما كان مخيفاً زمان،، اصبح مضحكا ومثيراً للحنين،، فلماذا نقتل الحنين؟؟
وعودة إلى الضفادع يا جندرية،، أنا لم اقل أبداً أن الاهتمام بالكوش لهو دليل على (النضال) أنا اساسا لست مناضلة لاتفلسف،، وكلمة أتفلسف التي ذكرها شنتير وسرقتها منه طوالي،،، هي ما كنت أقصد،، يعني لما اقرا بيانات الحركة النسوية (الرائدة) حول موضوع العنوسة ونبذ الكلمة (الشينة) دي،، ثم أذهب لإجازة في البلد،، لتصحى بنت خالتي ومعها لفيف من بنات الحلة والجيران والأهل،، من دغش الرحمن لزيارة الفكي البفك البورة والبعالج السكري بي (تمرة واحدة) والبمحي المعالم الذكورية بلسمة يد،، أجد فعلاً أن مثقفينا في وادي ،، والشعب السوداني الحقيقي في وادي تاني خالص،، وليس للأمر علاقة أبداً بالنضال أو بالثورة أو بالاهتمامات المختلفة،، ولو لم تختلف الإهتمامات يعني كان أنا نضفت الكوشة وقعدت في السهلة دون ما تتبني؟؟!!
دق الشلوفة كان يقام بمحض الإرادة،، تماماً كأن تقول لأحدهم،، يا تسوي كده ياانفيك بره البلد،، ثم يتمها منتشياً (انت حر غايتو)
شنتير أشكرك كثيراً على ما كتبت من (غبن) حول هذه الفئة ال(المتنضلة)،، دي دايرة ليها بوست براها،، لكن اسمحني اقول لك معلومة،، اكيده أنا أنني إذ اذكرها إنما افتح عليا النيران الصديقة،، والشك في كونيتي (كأنثى) رغم اني لا افعل شيئاً إلا استخدام حقي الذي كفلته لي (إنسانيتي) بغض النظر عن (أسيمت) البعض في أنا واحد واللا واحدة.
في الفلبين،، توجد عملية خفاض،، والله انا لا اعرف كيف اسميها،، لكنها عملية عكسية لعملية خفاض،، فكما كانت تخفض الفتاة السودانية (بطريقة فرعونية) تقلل فيها الشهوة الجنسية،، فالفتاة الفلبينية لا تخفض لكنهم يقومون لها بعملية تكفل لها زيادة شهوتها الجنسية،، واعذرني أني ما عندي الوقت الكافي ابحث لك عن هذا الموضوع في الإنترنت،، لكني قرأته في دورية طبية عالمية اتمنى ارجع البيت والقاها ليك والموضوع ده في انتشار من الفلبين للعالم الأمريكي والأوروبي،، وبكرة تقول بت قضيم قالت.
العمليتان عكسيتان،، لكنهما في النهاية تنصبان في مجرى واحد،، ظلم المرأة ومعاملتها كعنصر شهوة حيواني فقط،، ومع ذلك أكاد أكون أكيده،، أنها لو انتشرت ك(موضة) لتدفق عليها جمع هائل من النساء المظلومات ظلم الحسن والحسين بالخفاض.
وأقول لبلدي يا حبوب،، شكراً على شكرك على البوست،، أنت دايرني اصدق يفتحوا لي راسي المقودس ده واللا شنو؟؟؟
وأخيراً يا الحبيبة آوت كاست
أول ما اشتركت في البورد،، كتبت عدة بوستات حول موضوع (المرأة السودانية) أذكر منه واحد بعنوان ( نظرة نقدية حول سلوكيات المرأة السودانية)
و(جس وااات) يا قول الخواجات،،
لم تشاركني فيها ولااااااا (واحدة) سودانية من أهل البورد،، والكلام ده انا ما مسؤولة منه لاني حقيقي خرفانة،، بس الأغلبية ما شاركت،، و
ذهب البوست غير مأسوفاً عليه
كان لقيت لي فرقة بجي تاني ارد على الجميع ولو اني كملت البري كلو
| |
|
|
|
|
|
|
|
|
|
Re: الإرهاب البوردي (Re: بت قضيم)
|
لسه فعلا ما اتعلمنا نحترم الرأي الاخر
وما اتعملنا عدم الاستعجال والتريث في الاحكام
وعدم افتراض سوء النية اولا
واصدار القرارات المسيئة والتحليل السي لنفسية
الطرف الثاني من كلمة قالها او عبارة لفظها
لا تكفي لنتعرف بعضنا على الاخر
بوست جميل
وحيكون اجمل اذا اتحقق
تمنياتي
| |
|
|
|
|
|
|
|
|
|
Re: الإرهاب البوردي (Re: Hozy)
|
سلم لسانك يا هوزي
أوفيت وكفيت
فالحكمة الصينية تقول
صبراً يبل الآبري مافي؟؟؟؟
وانا أؤيدك في نقطة
(المهم يتحقق)
بس كيف؟؟؟!!!
يخليك
| |
|
|
|
|
|
|
|
|
|
Re: الإرهاب البوردي (Re: بت قضيم)
|
..
.
بالله دى من متين ؟؟؟
2/12/2003 والله ليهو طولا
الظاهر من البوستات المصعدة للدرجة الاولى
كدى كملى لينا الارهاب الاجتماعى فى العالم الرابع بتاعنا دا ؟؟
على بال من ارجع من الارهاب الوظيفى المحيط بينا دا ..
دمت
| |
|
|
|
|
|
|
|
|
|
Re: الإرهاب البوردي (Re: Tabaldina)
|
من زمان يا تبلدينا
على قول صاحبنا السأله الدكتور عمرك كم سنة ،، قال ليه والله ما آآآرف لكن تووووولت
متهيأ لي الإرهاب الإجتماعي مقدور عليه
المشكلة الإرهاب الوظيفي ده.
يديك العافية ويهدي سر المدير،، بس ما تكون انت زاتك المدير؟؟!!
| |
|
|
|
|
|
|
|
|
|
Re: الإرهاب البوردي (Re: بت قضيم)
|
يا بت قضم يا أنيقة
تحية وتحيات
ولسة ما رديتي علي ... في الموضوع داااااااك
المهم كلامك كلوووو زي العسل
بس زحي بعيد من الدلكة والكبرتة.
وأنا حقيقة اقدس جدًا جداً الطقوس السودانية بأنواعها مع التحفظ على رأي في بعض الأشياء لحدي ما أشوف رد الجماعة كلهم وشايف الموضوع مرة ينط كده ومرة ينط كده بقى كورة تنس بس.
| |
|
|
|
|
|
|
|
|
|
Re: الإرهاب البوردي (Re: كبسيبة)
|
العزيز كبسيبة
انا ايضاً اقدر كل عاداتنا الإجتماعية،، ولا أكره اهتمام المرأة بنفسها،،، بل بالعكس أشجعه جداً،، على أن لا يكون هذا الاهتمام مجرد اهتمام مكروهه عليه تفادياً للإرهاب الإجتماعي الذي ستواجهه إن لم تهتم بنفسها وفقط بالطريقة التي يفرضها جنس النساء ولا يعترفون بغيرها.
عموما موضوع الدلكة وغيره موضوع يطول، قد تتشجع إحداهن يوما لمناقشته علانية،، ولو اني ما اظن،،، مرة الصديقة والزميلة سماح،، هنا في البورد،، حكت عن تجربة الدخان،، وكان أول رد تلقته حسب ما أذكر،، من واحدة،،، سؤال بأنها (ما خجلانة بجدك بتتكلمي) ، أو شئ من هذا القبيل،، وبقية الردود تنوعت بين سخرية وتهكم،، كرهوا معاه البنية وكل البنيات أنهن يتحدثن ككائنات إنسانية بغض النظر عن نوعهن.
ما هو بقى الموضوع الذي ما رديت عليه؟؟؟
معليش الخرف حاصل
يخليك يا كبسيبة وفي انتظار رأي الجماعة
| |
|
|
|
|
|
|
| |
بت قضيم
مهاجر
بكرى ابوبكر
HOPEFUL
Shinteer
nazar hussien
doma
Hussein Mallasi
Outcast
HAMZA SULIMAN
ابو جهينة
Tumadir
الجندرية
Abdel Aati
ASAAD IBRAHIM
مهيرة
Muhib
بلدى يا حبوب
فيس بوك
تويتر
انستقرام
يوتيوب
بنتيريست