الحين .. السيارة .. أدق عليك .. يا مغتربين شنو ؟

Quote: From : Gurashi khair Sent : Sunday, June 19, 2005 9:51 PM To : [email protected] Subject : امنياتى لك بعاجل الشفاء | | | Inbox الاخت عبير لك التحايا ارجو قراءة هذه المساهمة ونشرها ضمن مداخلات الاخوة مع امنياتى لك بالشفاء العاجل الاستلاب الثقافى سافرت مره لجمهورية مصر العربية فى مهمة لمدة اسبوع واحد عن طريق ميناء بورتسودان بالباخره وتطلب الامر انى اصطحب احد الزملاء معاى وكانت دى اول رحله له خارج السودان... ومنذ ان وطئت قدمانا سطح الباخره حتى تعرفنا على مجموعة من الاخوة المصريين ومن لحظتها اخونا ده لسانو اتعوج وبقى مصرى اكتر من المصريين انفسهم واستمر معوج اللسان حتى يومنا هذا.... قدانى والله. انا مقيم فى الدوحة لى سبع سنوات ويزيد واعمل فى مؤسسة متعددة الجنسيات ( ما يزيد عن الثلاثين جنسية ) و القاسم المشترك فى التعامل بيننا باللغة الخليجية واللغة الانجليزية... وفى بداية حضورى الى قطر كنت مستاء جدا من السودانيين البتكلمو خليجى.... ولكن مع تقدم الايام وجدت نفسى مضطر للتعامل مع الاخوة القطريين بنفس لغتهم واحترام كتير من عاداتهم الخاصة بل انا الان من المعجبين جدا بالغناء الخليجى. وبالمناسبة لغتنا فيها صعوبة كبيره بالنسبة للعرب عموما نستثنى منهم الاخوة السوريين ... لذلك لا ارى غضاضه فى ان نتعامل معهم بى لغتهم البيفهموها ... ولكن ان ننسى لغتنا وننصهر كلينا فى ثقافة الاخرين دى مسالة غير مقبوله خاصة فى التعامل فيما بيننا كسودانيين او لما نرجع فى الاجازات ... ولكن عندما تطلع كلمة او كلمتين فى نص الكلام ما اعتقد انه فيها شى وده نوع من التماذج والانصهار بالثقافات الاخرى ... ونوع من التاثير والتاثر... ونحن فى النهاية بشر لا بد ان نؤثر ونتاثر بالاخرين. وفى النهاية نأمل ان تكون لغتنا ولهجاتنا المحلية السودانية خيار جاذب للاخوة العرب وغيرهم من الجنسيات الاخرى وان نتعامل بها فى نطاق كبير ... ولا يتاتى ذلك الا من خلال التماذج ومن خلال الاعلام المرئى بصفة خاصة وما انتشار اللهجة المصرية الا نتاج للاعمال الاعلامية الناجحة التى جذبت الناس اليها وبالتالى الناس أحبو لغتهم وحتى أحبو مصر والمصريين وهم اهل لذلك....

Quote: (ناس فلانة، وناس فلان) جعفر محمد عثمان لست أعرف لهجة دارجية عربية تقول كما يقول أهل السودان ناس فاطمة، وناس أمّي، وناس أبوي) وهم لايقصدون الا من ذكروه بعينه، دون ناسه وأهله. ولم أزل ممّن يغلب على ظنهم ان هذا التعبير أثر من آثار الترجمة عن اللغة النوبية - وما أكثرها في اللهجة العامية السودانية- مثل قول النساء خاصة أنا شاحدة الله) بمعنى الدعاء والسؤال والطلب من الله، ومثل هذين التعبيرين المصطلحين (بيت العرس) و(بيت البكا) وغير ذلك كثير. ونعود الى (ناس فاطمة وعاشة، وناس ابوي) لنجد نظائر ذلك في اللهجة النوبية: (عاشو قو/ أبو قو/..الخ) والمقطع (قو) - بنطق القاف كالجيم القاهرية - هو علامات الجمع في اللغة النوبية، وهو يؤدي كذلك معنى (ناس) في تعبير (ناس أبوي) وهو تعبير قد يكون له في الحالتين ظلال وارفة من الأدب الرفيع، وذلك في إشارته بصيغة الجمع الى المتحدث عنه المفرد توقيراً واحتراماً. ونحن نجد نظيراً لذلك في مخاطبة المفرد في اللغة الفرنسية بضمير الجمع تأدباً وتهذباً. أما بعد، فقد قلنا ما قلناه، من تغليب الظن أو الميل الى الترجيح لانتقال التعبير الذي نتحدث عنه من اللغة النوبية الى العامية السودانية، بقرينة أنه غير مسموح في سائر اللهجات العربية المحكية في مبلغ علمنا.

Quote: النحت ما عليك شئ : معليش على شأن: عشان وعلشان لأي شئ هو : ليشنو هذه الساعة : هسع بلا شئ : بلاش أي شئ هو : شنو الزيادة تشبط : تشعبط سلطّ : تسلبط سمّر : سمكر عنق : عنقرة لوح : لولح طوح : طوطح القلب ضج : جضّ زواج : جواز نضج : نجض ملعقة : معلقة الحذف ولد : ود بنت : بت امرأة : مرة نصف : نص انت : ات قلت : قتّ كنت : كتّ فرد :فد إبدال الحروف جعيص : جعيس كظم : كضم جأر : جعر سأل : سعل فقأ : فقع أين : وين أديته : وديته آمين : يامين منبر : بنبر ثلاثة : تلاته حديث : حديس جحش: دحش جيش : ديش حمزة : همزة وجه : وش خديجة:خجيجة دجاجة : جدادة حطّ : خت زغرد : زغرت ضنب : ذنب زهري : ظهري سرّة : صرّة ذكر : زكر ذمّه : زمه شمس : شمش رخيص : رخيس سبق : صبق ظل : ضل ظهر : ضهر وقت : وكت قتل : كتل فاطمة: فاطنة والأمثال كثيرة مثل الأسد : اللسد كتابه : كتابو وقت : وكت لعن : نعل ارتمى : اترمى غطس : غتس نأتى للمعاني الدارجية اجي: لفظ تستعمله النساء تعبيرا عن الدهشة أ’مبوح : صوت البقر اندراوه : انجذاب واضطراب أهيف : الجنيه وفى الأصل الدينار أها : لفظ قبطي بمعنى نعم -حرف- جواب همبريب : نسمة من الريح منعشة جاط : ازعج واحدث فوضى والجوطة بمعنى الازعاج ولعلها من جاظ خجّ : هزّه وحركه من جنب إلى جنب خمج : بمعنى فسد شطح : جاوز الحد دنقر : انحنى وطأطأ راسه - يقولون في العراق دنكر بنفس المعنى

Quote: وبعدين لو ما حكيناهم بلهجتن كيف بدن يفهموا؟ نحن لهجتنا كتيـــــــر صعبة يا اما بنعملهم دروس في السوداني والقناة الفضائية تبعتنا تشد حالا شوي

Quote: Sent : Saturday, July 9, 2005 9:45 AM To : [email protected] Subject : تعليق علي موضوعك فى البورد بتاريخ 17/6 الأستاذة/ عبير خيري الموضوع / الحين .. السيارة .. ادق عليك يامغتربين شنو ؟؟؟ سودانيز اون لاين 17/6/2005 تحية طيبة وبعد,,, لسانك هويتك ولهجتنا الغنية من أسهل اللهجات فهم وقرب من الفصحي ولكن الموضوع مافي لهجتنا في شخصيتنا ومابستغرب من الاخوان القلبو لسانهم مع انهم لو استهدوا بالله كلامهم العادي ده مفهوم وواضح وعدم الفم ما من المفردات ممكن يجي من سرعت الكلام وعدم وضوح مخارجوا ؟؟؟ فما نظلم لهجتنا لي زميل وصديق سعودي هسه فنانوا أحمد المصطفي في جهازوا في المكتب في عربيتوا وبنسبه ليهوا الحته دى اكتشاف وسط الهيصه والغناء السطحي المنتشر طيب كيف الزول ده اتفاعل مع احمد المصطفي لو لهجتنا ما مفهومة ولا صعبة بالجد الكلام ده ماحاصل والحته مافي لهجتنا زى ما قلت ليك في شخصياتنا نحنه البنعوج لسانا ونغير هويتنا وكل مايقابلني هنا سوداني من عينة يارجال والسيارة واتروش ومره والحين وووو من جواي بتغاظ وبمر بخاطري قصة الغراب اللون نفسوا عوز يبقي طاووس لا بقي ولا فضل غراب زى ماهو تجربة ذاتية وفي شغلي انا السوداني الوحيد وسط مصريين وشوام وسعوديين مع كده لابعوج لساني ولاظن تحصل لانو زى مابجتهد افهم القدامي مفروض كمان يجتهد يفهمني هسه بقوا سعوديين علي مصريين على شوام فاهمين لهجتي جدا رغم انها سودانية صميمة مع انو في سودانيين تكلمهم سوداني الواحد منهم يقوليك ( أيش ) ماعارف ابكي على حالهم ولا اضحك الناس ديل مالهم الحاصل ليهم شنو لو كانو اتولدوا واتربوا هنا بعزرهم لكين الواحد بجي كبير الممكن يقلب تاني لسانو شنو وعلي فكرة برضوا بعرف ناس والدهم مولودين ومربين هنا مع كده الولاد ديل لسانهم سوداني صميم زى امهم وابوهم يعني تاني برجع واكد ليك الحته مافي كلامنا الحته في شخصيتنا اخوك عبد الناصر الخطيب ملحوظه حته برضو ناقشيها في البورد قبل كم يوم اتعزمته مناسبة سودانية استغربته في الجلاليب البقت ملونة زمان البيضاء او السمنيه ممكن هسه سمك لبن تمر هندي للأسف بقينا نلبس زى الغجر الحاصل شنو ولاكمان الظاهرة دى هناك في السودان ؟؟؟؟؟؟؟؟ البعرفوا زمان النسوان البلبسوا التياب ملونة لكين الراجل جلابيتوا الثابتة بيضاء ؟؟؟ ولا شنو هنا النسوان الموحدين الزى عبايات سود بس الرجال الجلاليبهم بقت ملونة يعني الحته ماعوجت لسان وبس عوجت لبس ولسان وعوجاتنا كترت ياستاذة مع خالص التقدير,, والاعتذار لكتابتي ليك في ميلك الخاص ياستاذة بس ناس بكري قفلوا اشتراكاتهم وبقت بتذكيات وواسطات ومعارف فما عندي طريقة اعلق غير كده ولك العتبي لأجل رضا ,,, الأستاذة/ عبير خيري