|
|
 يا اخوانا الحبوبات ديل الحصل ليهم شنو ؟؟؟؟؟؟؟؟
|
طبعا الحبوبة قيمة عالية جدا في مجتمعنا و عندها مكانة
عالية شديد و تربية الحبوبات معروفة زي ما بقولوا اخوانا
المصريين ما تخرش الميه .
لكن الحصل شنو لحبوبات الزمن دا , اول حاجة بقى عدد كبير منهم
من النساء العاملات الماعندهم زمن يراعوا اطفال اولادهم او بناتهم
و الحبوبة بقت مشغولة بالايدولوجيه الفكرية و المنظور الثقافي
و مافاضية تمسك شفع ولا تراعي اطفال .
و بقى بعض الحبوبات يرفضوا رفض بات لقب حبوبة و الواحدة تقول
لحفيدها اوع تقول حبوبة انا ماما ....
و شوية شوية حنفقد الخبرة في التربية الكان دايما بستعين
بيها كل جيل جديد من الجيل القباله ببساطة لانه الحبوبات
ما فاضين عشان يساهموا في تربية احفادهم و مشاغلهم اكبر بكتير
ولا لما يجي الدور على الجيل الجديد دا و يبقوا حبوبات
غايتو دا تصور حاخلي ليكم ...
|
|
 
|
|
|
|
|
|
|
|
Re: يا اخوانا الحبوبات ديل الحصل ليهم شنو ؟؟؟؟؟؟؟؟ (Re: محمد أبوالعزائم أبوالريش)
|
بعدين هسي عادي الحبوبة تقابلها تقوم تقول ليك
والله { مسكلت ليك } مرتين وانت مارديت
يعني عملت ليك مس كووووول
ياحليل حبوباتنا طول وعرض وقامة
سروال حبوبتي كنا بنفتخر بيهو لحد وقت قريب
ماشاء الله مغطي على كل الجسم بكل احترام وأدب
وباقيهو جاري بالواطة
لو فصلوه على بنات الزمن دا
يمكن يعمل ليهو اقل شيء 35 واحد من مقاسات ناس هيفاء وسوزان ورحيق
والباقي مناديل
عندنا واحدة ماعندها كلام غير السممسترات
باقي لينا سمستر واحد
قبل أيام البت ولدت ولدها الرابع
وأمها ولدت برضو
الأثنين كانوا راقدين في بيت واحد
البنية قالت تجي تلد مع امها وبالمرة العيال يلعبوا مع الحبوبة
قامت الحبوبة نفسها ولدت
بالله زمان الحبوبة هيبة وقيمةوحشمة
وتجي تحرس بنتها لحد الأربعين
ديل حبوبات فير آند لفلي
قال الحصل ليهم شنو قال !!!
| |
|
|
|
|
|
|
|
|
|
Re: يا اخوانا الحبوبات ديل الحصل ليهم شنو ؟؟؟؟؟؟؟؟ (Re: ابوحراز)
|
| Quote: الحبوبات كان إساميهم: فاطنة .... آمنة ... بت المنى .... عشة ..... إلخ. |
وما تنسي كمان ناس ستنا والسرة وست البنات و ست النفور وام دولة وام الناس ...الخ..
Quote: سروال حبوبتي كنا بنفتخر بيهو لحد وقت قريب..ماشاء الله مغطي على كل الجسم بكل احترام وأدب
وباقيهو جاري بالواطة..لو فصلوه على بنات الزمن دا يمكن يعمل ليهو اقل شيء 35 واحد من مقاسات ناس هيفاء وسوزان ورحيق والباقي مناديل |
والعجب كما المحفضة بتاعت الجلد البجيبوها من سوق ام درمان و معلقة في الرقبة وجارة مع السروال وبداخاها التعريفة و ابوقرشين والشلن والقرش وحتي كمان الريال ابو عشرة وما ننسي الطرادة "العملة الورقية".. كان زمان والله الحبوبات ديل ليهم شنة ورنة.وأسي ما تسأل
وكل الحبوبات كان لديهم مهنة بالاضافة للاعمال المنزلية وكانت المهن تتمثل في نسج السعف وصناعة البروش والقفف والمقاشيش وأضا" كانت صناعة الغزل بالمترارة والمترارة دي ياجماعة هي التي يلف فيها الخيط الناتج من القطن ويلف الخيط باليد وفخز الحبوبات اي بدون موتور يحمل قوة مقدارها"30 حصان" ؟؟؟ ويصنع الخيط ومنه تصنع الفرات وهي جمع فردة التي كانت بدل البطاطين للوقاية من البرد كما كانت تستخدمها المرأة عندما يموت زوجها "للحد" الايام بدلا"من ثياب التوتل الاصليةهذا بالاضافة للتربية..وياحليل الحبوبات...
كما كانت الحبوبات يعملن في الزراعة بالسلوكة في الخريف اما الان لا نجد هذا الا في الريف
الانجليزي هذا بالاضافة للتربية ؟؟؟
والاكلام كتير ياندا ... وماتحريقي جوفنا اصلوا محروق...
التحية لكي .. وشكرا علي هذا البوست ياأختي ... وسنلتقي قريبا حتي نشوف الباقي..
| |
|
|
|
|
|
|
|
|
|
Re: يا اخوانا الحبوبات ديل الحصل ليهم شنو ؟؟؟؟؟؟؟؟ (Re: Nada Jamma)
|
و رجعنا للحبوبات ..
كان برضوا بيميزهم حكاية القصص و الاغاني بالذات
للمولود الجديد و الكانت عبارة عن دعوات او فال
بحياة سعيدة
زي مثلا كان عندي خالتي عندها اربعة اولاد و كانت امنيتها انه
يجيها بنت لما جات البت غنت ليها حبوبه:
احمد الله الخاطري انجبر و جات سارة و قلبي استسر
احمد الله الخاطري انجبر وجات سارة و فرحوا الاهل
ياريت لو نشارك بعض غناء الحبوبات و قصصهم.....
| |
|
|
|
|
|
|
|
|
|
Re: يا اخوانا الحبوبات ديل الحصل ليهم شنو ؟؟؟؟؟؟؟؟ (Re: Nada Jamma)
|
سلام ندا
بوست لذيذ
بامناسبة دي أحكي لكم نكته عن حبوبة ذي مخرفة كده
المهم كل عيد بت بتها بتجي مع صاحباته يباركوا ليها العيد
وهي تقول ليهم أها ما عرستن - وهم يقولوا لا لسه إنشاء الله القابلة يعرسوكم
مر في عيد من الأعياد قالت نفس الكلام وردوا ليها نفس الرد
قامت قالت ليهم سمح آ بناتي وكت العرس أبيتنوا!
الولادة دي مالها؟
تحياتي
| |
|
|
|
|
|
|
|
|
|
Re: يا اخوانا الحبوبات ديل الحصل ليهم شنو ؟؟؟؟؟؟؟؟ (Re: نصرالدين بابكر بدرى)
|
Quote: حبوبة دومة شرفت البوست و الله لكن حبوبات زمان برضوا
ربوا اولادهم و اولاد اولادهم لكن انتو يا حبوبات الزمن دا
|
بري يا ندي نحن الحبوبات الفاتنات مالنا ومال تربيه اولا دكن كل زول يشوف مسئوليته . نحن بعد ربيناكم وعرسنا ليكم دايرن نشم الهبوب شويه تاني نبقي في الربايه ؟؟ !!!
انا غايتو دي ابدا ما بتحصل علي ولدي داير يلز لي ولده وحاتك ا تملصت منه قلت ليهو هوي ما بقدر انا عيانه لي روحي . يا بتي دايره انوم اقوم الساعه عشره وعلي كيفي اطبخ ولا اكتب Rest day علي باب المطبخ .
| |
|
|
|
|
|
|
|
|
|
Re: يا اخوانا الحبوبات ديل الحصل ليهم شنو ؟؟؟؟؟؟؟؟ (Re: doma)
|
والله يا حبوبه دوما انا معاك
رغم انى كنت كدى ذى حالة ندى دى ساخطه على الحبوبات الما بمسكن الوليدات ديل
و كت بقول مالن يعنى ما ماتن مسكن لهن يعنى جات علينا بس
الا و الله انا بشوف الزمن ماشى صعب.. وتصوير دور الحبوبات ذمان على انو مثالى غير صحيح بمعطيات العصر الحالى
و مساهمة الحبوبات فى الاسره الممتده اتأثرت اكيد بعكران الجو العام
يعنى اكان الله مد فى عمرى ما ظنيتنى اخش تانى فى لعب اى ادوار رئيسيه فى تربيه اى بشر
ياخ انا بكتب هسه و مخى قاعد يطقطق و دايخه 
يا ندى يا اخيتى الحبوبات الحاليات فتراناااااات و القادمات (نحن) ح نكون اكثر فترا
| |
|
|
|
|
|
|
|
|
|
Re: يا اخوانا الحبوبات ديل الحصل ليهم شنو ؟؟؟؟؟؟؟؟ (Re: Siham Elmugammar)
|
مش كدا يا سهام يا بتي زمان التربيه كانت ساهله والجنا جنا الكل اسه يا يمه ان قلت لي ود ا ختك شقيقتك زح من الدرب يحدر ليك . اها مالي يا بتي مبتليه بولاد اولادي كل زول يا خد جكته نحن اخدنا جكتنا . ندي دا يره تملص مسئوليتها فوق امها الا تلقاه عند الغافل .
النبي يا سهام زولك اب سنينات دا جبتيه من وين ؟؟؟
حالتك قلتي مستجده الا بشوفك الصلاه علي النبي فوتي ناس تمبس غادي
| |
|
|
|
|
|
|
|
|
|
Re: يا اخوانا الحبوبات ديل الحصل ليهم شنو ؟؟؟؟؟؟؟؟ (Re: doma)
|
سلامات يا ندى
أنا القدامك دي تربية حبوبات..
الوالدة كانت لا تزال بجامعة الخرطوم
وتسكن الداخلية كمان.. (شفتي كيف)
وتجي تشوفني أنا بنيتها ده كل (ويك إند)
وعندي خالتي تاني سافرت لندن.. (أيوه لندن عديييل كده)
وتركت بنتها ذات الأربعة أشهر مع حبوبتي لمدة أربعة أشهر ايضا
أها شفتي الحبوبات زمان كيف..
كانت حبوبتي، الله يرحمها، تخيط لي الملابس
وتأكلني قالوا كل خمسة دقائق.. كنت طفلة كلبوووظة
-طبعا أنا ما لايماها على وزني حسه  -
في يوم ودتني تطعمني، فسألها التمرجي
-دي بتك؟
فأجابته..
-دي أنا حبوبتها
فاقل لها هاتفا
-أمشي عفيت منك
لكن الليلة أنا عافية للوالدة.. بتحب كلمة حبوبة جدا
ومصرة على إنو أولادي يقولوا ليها يا حبوبة
لكنها بتشتغل من الصباح الباكر وحتى المساء
أها دي يحلوها كيف؟ إحتياجات الحياة المالية تغيرت
وصارت الحبوبة تعمل من إجل الإنفاق ايضا حتى بعد التقدم في العمر
أما الأخطر، فأنو الحبوبة صارت في مكان وبقية الأسرة في مكان آخر
يا ندوية ده كلام كتير
ودعتك بالله
معزتي
غادة
| |
|
|
|
|
|
|
|
|
|
Re: يا اخوانا الحبوبات ديل الحصل ليهم شنو ؟؟؟؟؟؟؟؟ (Re: Nada Jamma)
|
ندوية العسل
ازيك - مشتاقة ليك كتير
بوست فعلا بناقش موضوع مهم لكن الحبوبات ديل يسووا شنو يا ندى زمان الواحدة كل مهمتا انها تاخد بالا من البيت و الاولاد و اكيد الاحفاد لكن اليوم ايقاع الحياة المتسارع و متطلباتا الكتيرة بفرض على المراة انها تشتغل و تشارك فى منصرفات البيت الا من رحم ربى و زى ما بقولوا صاحب بالين كضاب و بعدين زمان لافى بنات بقروا جامعة ولا فى بنات بشتغلوا يبقى التغيير الفكرى ده حينعكس على حاجات كتيرة و زى ما بقولوا الجايين ناس مامى و دادى ديل الله يحضرنا زمنم و نشوف العجايب
| |
|
|
|
|
|
|
|
|
|
Re: يا اخوانا الحبوبات ديل الحصل ليهم شنو ؟؟؟؟؟؟؟؟ (Re: نهلة عمر)
|
الاخت سهام شكرا على اضافتك الجميلة و سعيدة بمرورك على الحبوبات
لكن يا قولك حبوبات الزمن دا الله يعينهم و ياقولك الفتر بقى شديد
حبوبة دوماو الله البوست منور بيك , اها التربية و مسك الشفع خليناه
اها القصص و الغنى حق الحبوبات دا كيف ما وريتنا رايك شنو
العزيزة غادة الله يدي الوالدة الصحة و العافية و يديمها
زي الوالدة دي نوع الحبوبات البتكلم عنه الماسك في القديم
و مواكب مع الجديد و ليك تحياتي
الحبيبة نهولة و الله الشوق بالاكتر و شكرا على انضمامك للحبوبات
و ساعديني اكان عندك غنية او قصة حقت حبوبة نزليها بالله
| |
|
|
|
|
|
|
| |
محمد أبوالعزائم أبوالريش
ابوحراز
doma
Mustafa Doleeb
Siham Elmugammar
غادة عبدالعزيز خالد
نهلة عمر
فيس بوك
تويتر
انستقرام
يوتيوب
بنتيريست