نهاية الاحلام : مسلسل من 36 حلقة

نهاية الاحلام : مسلسل من 36 حلقة
نهاية الاحلام: مسلسل من 36 حلقة الشخصيات////// الرئيسة صلاح...........شجن..........أمل..........عوض سيوبر..........حامد........... علي نجده..........راوي...........فرحه........ تمثيل/////// حاج الزين .........حليمه...........سوسن..........ام الخير........ ضيوف الحلقات//////// عمر عبد الله ............. سيد مكاوي ...........وداعه......... التاليف والاخراج******* حسين محمد يوسف*******

10-19-2007, 00:23 AM

Dr. Faisal Mohamed

تاريخ التسجيل: 06-20-2004
مجموع المشاركات: 1180

للتواصل معنا

FaceBook
تويتر Twitter
YouTube

20 عاما من العطاء و الصمود
مكتبة سودانيزاونلاين

Re: نهاية الاحلام : مسلسل من 36 حلقة (Re: Dr. Faisal Mohamed)
الشعار يا مسكين الدنيا وين رايحه يا مسكين وأحلامك بعيده تايهه وأشواقك متين ترسي بين المرافئ تفتش كايسه تساسق في الدروب الما بترجع دايحه والاماني يا مسكين عليك نايحه والسفر مكتوب فوق جبينك تشيل الليل حقيبه والمواني تحكي حنينك والغربه آه يا زول بتحرق في سنينك ونهاية الاحلام بكا زادت انينك **** لا متين يرجع الولد الصباح يا جراح متين تبري متين يا جراح والحبيبه خلاص زمانه عدي وراح عدي ورااااااااااح الجو العام ........... بعض السحب المتفرغة تغطي الافق في الاول من يونيو وتباشير الخريف والنسمات الصباحيه الممزوجه بريحة الدعاش تعطر المكا ن المكان قريه صغيره وادعه وهادءة تصحو كل يوم علي صوت الاذان الكل يصحو باكراً الكل مزارعون والقليل منهم تجار مع الصباح تضج ساحات القريه وازقتها الضيقة بالمارة والحيوانات المباني بسيطه من الطين غالب الحيشان ليس بها ابواب فابوابها مشرعه طول اليوم وتسد الابواب هذه بالليل ببراميل او عيدان توضع علي شكل + كروس وذلك من الحمير التايهه والضاله والتي يخاف اهل القرية من ان تاكل ماوضعوه من علف لبهائمهم.. الطوب الاحمر نادر لا يوجد الا في المدرسة او الشفخانة وبعض بيوت التجار الاهالي يقضون صباحهم بالعمل في مزارعهم ثم المجئ منتصف النهار للمقيل تحت ظلال الرواكيب واشجار النيم الباسقه. كل بيت تجد جزءاً مخصصا لحيواناتهم التي يربونها ويكون الحمار دائماً بعيدا عن بقية الحيوانات كي لا يصيبها بالاذي وتجده يطلق نهيقه وكانه يعترض علي هذه العزلة وعلي ما يلاقيه من تعب وجر لعربة الكارو الصغيره وما ان ياتي النهار حتي يقوم الاطفال بضربه بدون اسباب يجهز المزارع ادواته من طوريه وكوريق وغيرها من متطلبات الزراعه داخل الخرج والذي يضعه علي الحمار المسكين وذلك بعد ان يعطيه كميه من القصب كوجبة فطور له حتي لا تكثر زمجرته ويبدي غضبه بان يقف في منتصف الطريق الي المزرعة. الاب يذهب الي الجزارة لاحضار المتطلبات اليوميه والام تنشغل بنظافة البيت واعداد الشاي والابناء منهم من يذهب الي الدكان لاحضار الشاي والسكر وثمن المشوار قد يبقي من المبلغ بعض الجنهيات لا حضار بسكويت فهذا كل مايطمح فيه. ويذهب آخر لا حضار الذلابية من ست الذلابيه وكله عشم في ان تمنحه الزيادة مقابل شرائه منها. يحيطون بامهم وعيونهم البريئة ترغب النار في حزر ينتظرون الشاي بكل لهفه وكل واحدٍ منهم يمسك بكبايته وكأنها ستهرب منه ووسط كل هذا الترغب تنتظر ايضا القطة الصغيرة والتي تتمرق بينهم تستجدي عطفهم فمنهم من يلوح لها بالضرب فتبتعد عنه علي الفور فتجدها دائماً ما تذهب اليه انه صلاح الذي يحمل لها وداً خاصاً ولا يرضي من اخوته ضربها او اخافتها فصلاح تربي علي الحنية فتجده عطوفا علي كل شيء متفردا في اشيائه وحاجاته ووسط هذه البيئة تربي صلاح. (عدل بواسطة Dr. Faisal Mohamed on 10-19-2007, 00:49 AM)

10-19-2007, 00:29 AM

Dr. Faisal Mohamed

تاريخ التسجيل: 06-20-2004
مجموع المشاركات: 1180

للتواصل معنا

FaceBook
تويتر Twitter
YouTube

20 عاما من العطاء و الصمود
مكتبة سودانيزاونلاين

Re: نهاية الاحلام : مسلسل من 36 حلقة (Re: Dr. Faisal Mohamed)
الحلقة الأولى صلاح ينهض من النوم باكراً يؤدي صلاة الصبح ثم يتوجه الي الراكوبة الصغيره حيث توجد امه وتقوم ايضا باكرا تصلي ثم تقوم بحلب الاغنام لتجهيز شاي الصباح وكالعادة فالجميع حول الام في انتظار الشاي حيث تقابلهم ببشاشة وابتسامة موسمة بعذاب السنين الطويلة وبعض ذكريات الايام الخوالي ورغم محاولتها اخفاء التعب والمرض الا ان صوتها دائماً ما يفضحها وكذلك التجاعيد التي تزين جبينها وتلك الانات التي تخرج وهي تعدل في وضعية النار وصلاح ينظر اليها بين الحين والآخر ويحاول ان يسالها ولكنه حفظ ردودها تماما فدائما ما تنكر ان بها شيئاً وتكاد عيونه تنزل الدموع ولكنه يظل ساكتا ساهيا فيها وتكاد العبرة تخنقه ويشرب صلاح الشاي انه في عجلة من امره يريد ان يذهب الي المدرسة انها اواخر العام الدراسي من المرحلة الثانويه وهو من المبرزين في الدراسة ويهوي الرسم والفنون ورغبته في الالتحاق بالفنون ولكن والده يريده ان يدخل الطب او الهندسة هذه هي عقدتنا هكذا يقول صلاح وهو في الطريق الي المدرسة مع بعض زملائه وهم حامد وعلي الشهير بعلي نجده فضحك علي وقال عندها حامد اها البضحكك شنو يا نجده ياسجمان اهلك قايلنك بتنجدم وترفعم لكن اظهر انك حا تغطس حجرهم لي تحت قال نجده قال والله انت الا نجدة بوليس كفاوي في كفاوي ويرد نجده وهو لا زال ضاحكاً لا خلاص عاجبني انت يا حمدتو يا خريج الخرطوم انت يا خي انت محل ابوك مايوديك مانفعت الزراعه مانافع فيها ودوك لي مكنيكي تتعلم ليك صنعه بوظت الدنيا ..يظهر من علي البعد عوض الشهير بي سيوبر ...وهنا يقاطع صلاح نجده شايفين داك عوض سيوبر ماشي سبعه تمنيه اظهر مصلح من الصباح ..فيرد نجده اها ياحامد والله سيوبر ده انجح منك ..يقاطعه حامد والله الا كان احسن منك انت ياخ ما ماتفكنا برا سيوبر برا جن...والله نفسي اعرف حكاية الزول ده شنو يقول صلاح...يا صلاح ما تسيبك منو يعني حايكون منو انشتاين ولا نيوتن ؟هكذا يقول حامد ويرد نجده شوف شوف الولد شن بقول والله ما عرفتك يا عالم زمانك قوم يا ابو الشباب انت كنت ما بتعرف غير ست الطعميه حوا ولا عمك الزين بتاع الخضار ولا المكانيكي عيسي والله تطور ملحوظ يعني نتوقع نسبتك يا انشتاين حوالي 81% يا بتاع الجربكس والبساتم الليله عامل لينا فيها انشتاين وده انت ياصلاح سمعتوا الكلمتين ديل وداير اقشر علي حكم والله حكم ....حامد لا يقول شئ سوي انه انجذب الي صلاح وهو ينظر باهتمام الي سيوبر والذي اقترب منهم وقال اها يا وليدات علي وين كده بس ما تقولو لي ماشي الزريبه يرد حامد شايفنا نحن سايقين لينا بهايم ؟لا انا قاصد المدرسة العليا للبنات ولا انتو اولاد وانا ما شايف كويس لكن نصيحه من فرده والدنيا دي مقدده اوع البنات يغشوكم يا فارات ما تبقوا داقسين يا بجم واحسن ليكم تشيلو طواريكم وتمرقوا علي الزراعه يا بجم انتو .. يدندن سيوبر العديله لي والسيره جات العديله لي ويظل يدندن الي ان يختفي عن الانظار في احد الزقاقات المتعرجة... يا اخوانه ده بنصح فينا ولا بهين فينا هكذا يقول نجده اما صلاح وحامد لم يعلق احد بل لزموا السكوت ...ثم وصلوا المدرسة وتفرقوا هناك كل الي فصله.........

10-19-2007, 00:35 AM

Dr. Faisal Mohamed

تاريخ التسجيل: 06-20-2004
مجموع المشاركات: 1180

للتواصل معنا

FaceBook
تويتر Twitter
YouTube

20 عاما من العطاء و الصمود
مكتبة سودانيزاونلاين

Re: نهاية الاحلام : مسلسل من 36 حلقة (Re: Dr. Faisal Mohamed)
الحلــــقة الثا نيـــــة وتمر الايام وينتهي العام الدراسي وينجح صلاح في امتحانات الشهاده ويحرز نسبه ممتازه اما حامد فيحرز نسبة نجاح وعلي نجده فلم يمتحن نسبة لظروف والده الصحيه واصبح هو من يعول الاسره ويراعي والده المريض الذي افني عمره في خدمة الارض مزارع من زمن الانجليز من الطراز الاول هكذا يقول حامد ممازحاً علي وصلاح والذي هو ايضا ابوه مزارع وقد كان الاصدقاء الثلاثه جالسين تحت ضل البيت الكبير وتاتي اليه امل وهي اخت صلاح بالحلوي ثم بالشاي فيهتف علي ايوه كده الشغل ولا بلاش من قبيل قاعدين اخوك ده مويه من الزير ما عايز يجيبه فتبتسم امل بسمه بريئه ودافئه يبادلها علي تلك النظرات ويقول انشاء الله عقبالك يا امل فترد امل والخجل يكسو وجنتيها وتلك الشامة التي تغازل الخد الوردي دون حياء انت يا علي لو امتحنت ماكان فرحنا بيك انت واخوي؟؟ وهنا ير د حامد يعني اخوك براه النجح يا امل ونحن ما عاجبنك ولا شنو؟؟ فترد امل بسرعة وتلهف وكان احدا صرخ في اذنها واصابها بالزعر فهي عندما رات علي لم تنتبه حتي لحامد المسكين الموجود بينهم فاعتزرت له والله الفرحه نستني ابارك ليك النجاح فيرد حامد عليها ما مشكله انا ذاته نتيجتي ما بتستاهل فترد امل لا ماتقول كده السنه الجايه بتعوضه انشاء الله ويرد حامد يا بت الناس تاني اعود ده مستحيل عمرنا كه بضيع بورا الشهادات والكتب نشوف لينا شغله ناكل منها عيش وبعدين وين الظروف البتساعد علي كده دي حاله بطاله والوالد خلاص فتر من الحواشه ومن متطلباتنا بعد كده نقري الباقين ديل فترد امل والله ربنا يهون فيقول علي آمين يارب فتنظر اليه امل نظرة اذابت فؤداه معها ويرغبهما حامد وهما يتبادلان نظرات الهوي والتي لا تخفي علي احد وان حاولا ان يتسترا عليها ولكن هذه الاعين تفضح ما بداخلها ..وفجأة ينتبه الجميع لصلاح والذي لم يشاركهم الراي ولا النقاش وبسرعة ينظر الجميع ناحية الباب الخشبي القديم فإذا بها تدخل كنسمة الصبح الجميل الخد كالورده وعليه عرق المشوار كانه الندي والثغر المبتسم ابداً كقطعة العنب الصغيره والتي حان قطافها ولكن من صاحبها؟؟المشية كمر السحاب الضحوي لا تمطر احدا ولا ترويه من حسنها وجمالها والثوب فيها يخجل من لونه رغم جماله ولكن اظن ان جمال الثوب من جمالها هي يكاد يخنق خصرها وياله من محظوظ هذا الثوب ينام علي يداعب خديها تارة ويغازل تلك الخصل التائهة تارة اخري ..فيرد احمد نعم قلتوا شنو ؟فيقول حامد لا ما قلنا حاجه ويرد عاي لا قلنا جات جات !! وتقول امل عن اذنكم انا ماشه لي شجن فيرد علي لا طوالي اذنك معاك ولا شنو يا صلاح ولا عندك النيه تستاذن كمان ويضحك حامد ويقول يا صلاح صارحنا انت البت دي بتموت فيها ومطلعه روحك ويقول علي ومجهجهه كيانك ولا شنو يا ولد ؟؟؟؟ يرد صلاح يا ناس دي ابوها منو وعندو كم معقوله بس دي معادله غير متكافئه ولا بتتوزن ومش كده وبس دي كدي عاينو لي جماله ورقته معقوله تفكر في ناس زينا كده مزارعيه ومش عارف ايه؟؟؟يرد علي ماتجمع انت ما تعترف انت البت دي كاسره فيك ضلعه ويزيد حامد دي مولعه قلبه بي نيران ما بتنطفئ بالساهل والله غالب يا ود يا حبيب انت ولم يتركوا له فرصه للدفاع او حتي ان يقول شيئ لقد حاصروه ورغم ذلك لم يعترف ولكنهم عرفوا انه متيم بها ..... وتنادي امل علي صلاح يا صلاح لو سمحت دقيقه تعال ...ينظر صلاح الي اصحابه وقبل ان يقول شئ يقوا علي امش ياود داير تستاذن كمان اظهر القمر نوي اظهر في ليل ايامك بس ما تنسانا بي شوية ضو نشوف بيها كده ويعني ويقول حامد مقاطعاً يالله يا اخوي سريع النار دي البتطفيها ليك منو نحن والله الا نزيدك حطب اتفكفك يا ابو الشباب فيرد صلاح قائلاً خلاص انتظروني لانو يقاطعه علي يا اخوي امشي نحن عندنا مشوار وبنجي الفطور يقول صلاح خلاص انا في انتظاركم ما تتاخروا فيرد حامد جدا يا باشا ويذهب صلاح وكان الدنيا لا تسعه ويظل علي وحامد ينظران اليه الي يدخل الغرفه الصغيره خاصته والتي اليوم كانها قصر هكذا يقول علي ثم ينظر الي حامد الذي يراغبه باهتمام فيقول علي اها يا اخوي بتعاين لي مالك مشبهني ولا شنو؟ فيقول حامد مبتسما يا حبيبي نحن اتلاقينا مره في خيالي وفي شعوري الف مره ويدندن باغنية اخري بقوله ليك بي كل خجل اسمي.............. ويرد علي حامد مالك علي داير تقول شنو؟ فيرد صلاح يعني عامل مافاهم والله هسي اناديها ليك ..يا حامد ات ّ مجنون ارح ارح بكلمك ونحن ماشين في الطريق وهنا تنادي عليه ام صلاح يا وليداتي ماشين وين الفطور قرّب فيرد علي لا ياحاجه نحن ماشين مشوار كده وبنجي سريع فترد خلاص الا ما تتاخروا العصيده ماتبرد يقول صلاح ان شاء الله ملاحك الليله روب .. فتضحك ام صلاح آي بي روب والداير تقليه برض عاملاها بس لا تتأخروا ...ويخرجا بسرعة من بيت صلاح ويتجها الي الشارع.......... (عدل بواسطة Dr. Faisal Mohamed on 10-21-2007, 11:28 PM)

10-19-2007, 00:40 AM

Dr. Faisal Mohamed

تاريخ التسجيل: 06-20-2004
مجموع المشاركات: 1180

للتواصل معنا

FaceBook
تويتر Twitter
YouTube

20 عاما من العطاء و الصمود
مكتبة سودانيزاونلاين

Re: نهاية الاحلام : مسلسل من 36 حلقة (Re: Dr. Faisal Mohamed)
الحـلقـــة الثـالثــــة والله يا علي شكلك كده وقعت في حب البنيه دي ويرد علي يا حامد اخوي بنية منو وتعال هنا انا اريد علي شنو شايفني وارث ولا دارس اها حتي القرايه غلبتني اكمله ويقاطعه حامد الكلام ده ماعلي انا انا ما اطرش ولا اعمي واصلو الريد في باين مهما اخفيه ينط يعاين و يطلق حامد ضحكة عريضه تبين فيها اسنانه البيضاء وترتسم تقاسيمه السمراء علي جبينه وهو يطلق ابتساماته ويرمغه علي بنظرة في كثير من الحيره ويبتسم بسمة شاحبة وكان كل هموم الدنيا علي قلبه جاثمة عليه ولكن عينيه المتوهجتين براءة تكاد تخفيان كل هذه الهموم وكل هذا الوجد والهوي ويقاطع حامد علي مرة اخري يقاطع بنات افكاره وهذه الهموم ويقول له بالحرف الواضح يا علي انت بتريد امل صح ولا ما صاح ؟؟؟؟ويرد عليه علي وكانه يئس من اخفاء حبه وبالذات علي حامد يا اخوي الحقيقه وبكل صراحه بريده والله بريده ومن زمان ويبتسم حامد ومن زمان كمان وكنت وين زمنك ده كلو ما كان باين ابدا ريدك ده وبعدين تدسو علي اعز صديق ليك لكن يا.....يقاطعه علي لقيف هنا وخليني احلم ما تقول لي لكن بتاعتك دي خلينا نعيش حتي لو وهم وخيال امكن ننسي شويه همومنا ومشاكلنا.. ويرد حامد شوف ياعلي انا غايتو دربكم الماشين فيه انت صلاح ده ما بقدر عليه لاني ما ناقص وجع قلب كمان والله شنو رايك؟؟ويعني نحن شايفنا خلاص وبعدين يا جاهل الحب ده ماداير ليه مقدمات ولا بتوقفوا ابواب ده بجي كده وبخش طوالي دون استئذان بجي كده زي القدر...فيقول جامد يا ود ياقيس انت .. وهنا يصلا الي دكان وداعه ويسلمان عليه ويبادلهما التحيه اها ياشباب نقول مبروك ولا ويقاطعه حامد ايوه خليك في ولا دي وبس وادينا اتنين بارد كده نبرد بيها جوفنا المحروق دق وعلي اخوي ده شوف ليه واحده تكون من البرد اتجمدت عشان ابرد اعصابه وتكتل قلبه المولع ده ويبتسم وداعه ويقول طيب مانديكم سجاره تنفسوا بيها وعندها يهلل حامد جيبه خلينا نحرق الله غالب ويرد علي اها كمان جابت ليها سجاير يقوم ابوي يجي بي هنا وتبقي مشكله ويرد حامد وانا ماعندي ابو ولا مقطوع من شدره ؟؟؟فيرد علي ابوك قنعان منك وماراجي منك رجي يا اخوي وبينما هم تحت ظل راكوبة دكان وداعه يظهر سيوبر ..اها يا شباب اجزتو وجايين تضايقونا في الضل ده كمان ويا وداعه كمان مقعدهم في كنبتي الخاصه ديل جيب ليهم شوال الفحم الفاضي داك وافرشوا ليهم في ارض الله دي وكدي فكوا النفس ده والله اكلم عليكم ابواتكم يعلقوكم من كرعيكم فك النفس يا فرده...وياخذ سيوبر السجاره ويختفي عن الانظار... ويحتار كل من علي وحامد ويضحط وداعه والله سيوبر ده الله يهديه ساي بعد السكر بقي يفتش للبنقو والمخدرات..فيقول علي الكلام ده جبتو من وين يا وداعه؟؟؟ويرد حامد هو زي وداعه ده بسالوا ده الكلام بجيه حار وكل شمارات الحله دي عنده ولا ماكده يا التاجر؟؟؟ ويبتسم وداعه ونحن ورانا شنو شمارات في شمارات فيرد علي ربنا يهدي الجميع ... يطرق الباب طرقة خفيفه ويده تتصبب عرقاً ثم يدخل الغرفه ويكاد لا يرفع حتي عينيه لينظر اليها فتقابله بتحيه ومبروك يا صلاح النجاح وعقبالنا انشاء الله السنه الجايه ويرد صلاح وتكاد الحروف تهرب من بين شفتيه انشاء الله تنجحي بس شوية اجتهاد ايوه قلت لي اجتهاد والله انا يا صلاح بمل من اي حاجه ولو ما لقيت لي واحد يشجعني ويقيف معاي ما بقدر اسوي اي حاجه ويقاطعها صلاح ويظهر ان عقدة لسانه بدت تنحل.. لازم تعتمدي علي نفسك اكتر لانك انت البتقدري تحددي مسارك لي مستقبلك ولا شنو؟؟ لا انا قاصده انو واحد يقيف معاي يشجعني في الدروس وووويشرح لي وكدي وهنا تهلل وجه صلاح وهو لا يصدق ماقالت معناه انو حاتجيهو للشرح اكيد وتقطع عليه سرحانه وتوهان وتقول له غيرك انت يا صلاح مافي حد بيقدر يساعدني ويقيف معاي ولو عايز ...يقاطعها صلاح عاوز شنو وانا لاقي اقيف معاك وانت جارتنا وعزيزه علينا وتبتسم هنا وكان الدنيا كلها تبتسم لبسمتها فيالرقتها وتلك الوجنة التى ترقد علي خدها الناعم وهذه الحروف التي تخرج كما الرزاز وهذا الثوب الذي يغطي كل هذا الجمال ويكسوه بالعفاف وتشكره علي كلماته وتخرج من الغرفه متوجهة الي امل.................

10-19-2007, 00:47 AM

Dr. Faisal Mohamed

تاريخ التسجيل: 06-20-2004
مجموع المشاركات: 1180

للتواصل معنا

FaceBook
تويتر Twitter
YouTube

20 عاما من العطاء و الصمود
مكتبة سودانيزاونلاين

Re: نهاية الاحلام : مسلسل من 36 حلقة (Re: Dr. Faisal Mohamed)
الحـلـقة الرابعـة يدير صلاح مؤشر الراديو القديم قاصدا دفء الكلمة وصدقها علها تخفف مابه من وجد وهوي فالاذاعة ارتبط بها صلاح منذا الصغر فهي امه الثانيه التي ارضعته كل هذا الدفء وعلمته كل هذا الحب واحتوته بحنان كلماتها وضمته بصوتها العذب فجاء صوت من الاذاعة وكانه يشلرك صلاح مابه انه صوت الرائع الدافئ المملؤ بالحزن النبيل الجميل انه مصطفي ويتغني باحدي اغنياته الرائعة وخاصة هذه الاغنيه والتي لها وقع خاص عند صلاح انها المسافه ويردد صلاح مع الفنان مصطفي والله بيناتنا المسافه والعيون واللهفه والخوف والسكون رنة الحزن البخافه تعدي يالفرحه وتفوت وامشي بالحسره واموت فجاء ت هذه الكلمات وكانها تشاركه ما هو به وما الم به وهو مستلقيا علي عنقريبه الصغير ويطوي المخده تحت راسه شاخصا ببصره نحو السقف البسيط والذي يتكون بعض العيدان التي لا تبعد عن بعضها البعض كثيراً وتحمل هذه العيدان مِرِق كبير يتوسط الاوضه وتغطي هذا السقف بعض اعواد القنا والقش والمرق كانما قلب صلاح والذي يحمل ويتحمل الكثير وتقطع عليه امل بنات افكاره وتنادي عليه وهو سارح بعيد وفجأة ينتبه الي اخته ويقول لها الفطور جاهز خلاص وترد لا خلاص مالك علي ...... علي...... ويقاطعها علي شنو وبعدين احسن ليك تخطيني وتشوفي شغلتك وين وترد عليه والله امي منتظراك وقالت لي اقول ليك تعال سريع..وتخرج امل ويظل صلاح قابعا علي سريره يجول بمخيلته في شجن ويقول معقوله كانت هنا والله انا ما مصدق عيني وبعض من عبيرها يملا الاوضه ويعطرها ويظل صلاح يتنفسه كانه الحياة والروح .... والله ياحامد اخوي الريد ده فعلن نار مولعه جواي الله ياخي الله يهون علينا مايجي واحد كده يتقدم ليها ويضيع اخوك ويمرق ساي والزمن ده المال بقي شي اساسي ونحن لينا الله ويضحك حامد يا اخوي حب شنو وكلام فارغ شنو خليك freeeee والخوف يجي واحد منطلق بي سرعة الافلات وتفلت البنيه من ايدك ويخلي خشمك ملح ملح ويقاطعه علي والله انت الايام دي اتعلمت ليك كليمات وعايز تتجدع بيهم علي وانت عارفني انا كنت تاني الدفعه بعد صلاح طوالي وبعدين يا اخوي انت اصلك ما بتطمن ليك زول ولو بالكضب ما نحن في النهايه الحياة دي عايزه ليها فاليوم كبير عشان تتخدر وتنوم مره واحده امل دي كل املي ياحامد شايف خدوده كيف كاسيها الخجل ولا العيون فيها امل كبير في بكره وانا راجي بكره ده ..ويرد عليه حامد ياود يا متيم انت يا قيس وليلي العامريه وجبنا سيرتو النوم غلبنا ده الشوفتو بتريح قلبنا دي يا استاذ القمر بي جماله ده عندها فيه راي... وينادي صلاح امل ويقول لها انت يا امل شجن فاتت ولا..... وتقاطعه قاعده مع امي وبعدين انت لسع قاعد تسمع في الرادي وامي منتظراك؟؟خلاص خلاص انا جاي وتخرج امل مسرعة وهي تترنم ببعض كلمات اغنية الشجن الاليم وهي تقصد اخوها ببقي بعدك في الاسي وتبقي انت الظالم القاسي النسي والي اللقاء في الحلقة القادمة..........

10-19-2007, 08:38 PM

Dr. Faisal Mohamed

تاريخ التسجيل: 06-20-2004
مجموع المشاركات: 1180

للتواصل معنا

FaceBook
تويتر Twitter
YouTube

20 عاما من العطاء و الصمود
مكتبة سودانيزاونلاين

Re: نهاية الاحلام : مسلسل من 36 حلقة (Re: Dr. Faisal Mohamed)
الحلـــقة الخامسـة اها يا ابو علوه ما نجيب لينا سجارتين تاني ننفس بيها شويه ولا رايك شنو ؟؟ جيب خلينا ننفخ وننسي ويذهب حامد متوجهاً الي وداعه صاحب الدكان ولكنه ياتي سريع ويقول لي علي قوم يا اخوي الحاجه لقيته واقفه مع وداعه وعملت زايق والله كان شافتني كان الليله دي دبيسه بالطريق الصح ويرد علي امك حليمه بي جلالة قدرها جايه الدكان ويقاطعه حامد ودي فيها شنو ما عادي ويرد علي ما قلنا حاجه لكن انت مالك ما تجيب ليهم حاجات البيت اللازمه بدل امك تتشلهت في الدكاكين ...لا خلاص عاجبني انت الولد الهميم وبعدين اجيب من وين انا ابوي عمر عبدالله ولا سيد مكاوي وبالمناسبه ياعلي سيد مكاوي ده عنده بنيه والله عسل اخت راوي الفي الدفعه الورانا وانا ناوي انتحر واطلب ايدها للزواج رايك يافرده .....يا حامد مد كراعك قدر لحافك قدر احلامك وهو وينه الاحلام دي والله الواحد بعد ما يحلم احلام تكون كلها كوابيس حاله نسال الله السلامه ....طيب انت وكت عارف كده بتعاين لي فوق مالك ؟داير تلحق صاحبنا صلاح وصلاح رصيده انو شاطر وحايخش الهندسه امكن دي تديه دفعه معنويه واصارح شجن النار ويا ابو علوه بقولوا عليك نجده لكن اظهر انك عايز تغطس حجر اخونا ابو صلاح وانت ما عارف اخر شمار راوي ده ابقي ليها طبعن ود عمها عمر عبدالله وسيد مكاوي عبد الله يعني الشغلانه مرسومه ومنتهيه يا استاذ ويقاطعه علي انت جبت الكلام ده من وين؟؟ ده موضوع خطير ده لو سمعوا صلاح بروح فيها ...شنو البروح فيها دي شكلكم بتقطعوا فيني يا شباب ولا شنو..ويتمتم علي لا لا اااصلو الحكايه ببببنتكلم عن اللللنتايج وقلنا صلاح معقول مايجيبه والله ده كان راح فيها .. والله كلامك جد لانها دي املي وحلمي الوحيد اللتحقق وربنا يحقق الاحلام وتبقي حقيقه مش خيال ووهم وعن اذنكم اشتري شوية حاجات من الدكان عشان نمشي سوا للفطور .. الحمد لله وبعدها يتنفس علي الصعداء لخروجه من المأزق الذي دخل فيه وهنا يلتفت علي حامد كلو منك ياوش المصايب يا خطيب ..وهي بت سيد مكاوي ده اسمه منو ؟؟؟ والله ياعلي انا اتجهجهت تب وقلت انت وقعت خلاص ولكن اذا دسينا الليله بكره بعرف ويقاطعه علي الليله بكره لكن ما يسمع مننا نحن وثم تانيا ماتتهرب من سؤالي اسمه منو؟؟؟ ويرد حامد واتهرّب ليه اسمه سوسن وزهرة السوسن عطرك الفواح للقلوب مسكن يا مسكين انت ويرد علي والله ما مسكين الا انت وواحد اخونا لكن انت ما بتقدر علي برنامج زي ده روح علي طينك وبنيانك والشقاوه الانت فيها دي ويرد عليه حامد لا خلاص انت ما ورثت الملايين انت حتة مزارع وفرق الزراعه من الشقاوه شنو تزرعوا والحكومه تلحس واخر الموسم تمرقوا من المولد بلا حمص والله انا اخير منكم الزراعه دي من الاول قلت لي ابوي انا مازوله ابعدني منها ...ويقاطع حديثهم صلاح ياشباب ارحكم سريع امي منتظرانا علي نار وقالت العصيده دي لو بردت ما منها فايده..ياصلاح انت شجن دي بتاكل ليك العصيده بتاعتك دي فيرد علي ياجاهل شجن دي مولوده وين ما في البلد دي؟؟؟؟ حامد..يا اٌمِّي انت مامولوده هنا دي والدنها برا السودان لمن كان ابوها مغترب كم سنه وبعد كده استقر هنا في الحله ...والله ياحامد ما عرفناك بتاع استخبارات ولا بتجيب الكلام ده من وين؟؟؟ يا اخوانا خلونا في الفطور وبس وهي موجوده في البيت وبنشوف عصيدتنا بتاكلها بالشوكه ولا السكين ويضحك علي لو غلبته بنسلفه سكاكين حامد اخوي ده والله يا صلاح الليله عصيدتك لو بقت جبل حامد حالف اهدها وشيل شيلتك انت وامك واردموا الكسره دي صح لان معانا آفه وما بتتلافي ويضحك الجميع ويدخلون الي البيت ..............

10-19-2007, 09:45 PM

Dr. Faisal Mohamed

تاريخ التسجيل: 06-20-2004
مجموع المشاركات: 1180

للتواصل معنا

FaceBook
تويتر Twitter
YouTube

20 عاما من العطاء و الصمود
مكتبة سودانيزاونلاين

Re: نهاية الاحلام : مسلسل من 36 حلقة (Re: Dr. Faisal Mohamed)
الحـلقـة السـادسـة ينادي صلاح علي امل يا امل يا امل.... الفطور خلاص جاهز وترد امل جاهز بس انتظروا حبه لانو شجن بتقطع في السلطه ... ويرد حامد في شكل دعابه يقصد بها صلاح والله تعرف يا علي السلطه دي حا تكون بطعم السمن عديل كده وفي ناس حا يموتو في السلطه دي ولا شنو رايك يا حنين ؟؟ السلطه براها يا حامد دي السلطه وست السلطه وبتاع الخضار الباع السلطه ذاتو ....ويدخل سيوبر وبدون سابق انزار شنو يا اخوانه الخيانات دي الليله فيها فطره جامده وما تكلمونه دايرين تعملوا نايمين بيها براكم ولا شنو يعني لكن ده علي عوض سيوبر يا حامد يا مطرطش انت وكمان علي متحكر عادي الحاله واحده بالله شوف ليك جنس كلام زي ده مس كده يا باشمهندس صلاح حاج الزين ؟؟ يا سيوبر انا ولا انت العادي الحاله واحد وجاي بدون عزومه يرد علي؟؟ يا ولد العب بعيد وما تعمل فيها مفتح علي ولا ماكده يا باشا ؟ وهنا يدخل حاج الزين ويتكلم مع سيوبر تعال يا ولدي تعال افطر معاي انا ده خليك من الوليدات ديل انت بتضيع في وسطهم ساي ارح معاي علي الضل داك يا ولدي... ويرد سيوبر شكرا يا عمي وزي ما قلت انا كيف آكل مع الوليدات ديل شفع آخر زمن ويتمتم سيوبر بكلمات غير مفهومه ويخرج مع حاج الزين ويتنفس الصعداء كل من حامد علي و تصيب الحيره صلاح والذي يدور بذهنه ان وراء سيوبر هذا سر كبير وهو في تفكيره هذا يقطع عليه علي التفكير هامساً البنيه جات والله يستر وينتبه صلاح ويسرق النظر اليها فكانها ملاك من السماء مرسل ويا لا تلك الشامة التي ترقد علي الخد الاسيل لا حياء ولا خجل.....وتدخل الي البيت الصغير حيث صلاح واصحابه جالسون في انتظار الفطور وتسلم عليهم جميعاً وتجلس بالقرب من صلاح هامسة اليه بانها هي التي من صنعت السلطه ولازم يضوق منها وقالت لازم رايك فيرد صلاح اكيد حاتكون حلوه وما فيها كلام لان الصنعته م......ويسكت صلاح وترد عليه شجن ماتكمل سكت ليه ؟؟ ولا عايز تنبذني وانت بتجامل وبس ويقاطعها صلاح لا والله ده بالعكس ده انت ال.......احلي وينطقها صلاح و كانه حكم علي نفسه بالاعدام ..فتبتسم له بسمه رقيقه يكاد يذوب فيها قلب صلاح ....... طيب يا صلاح بعد ما تفطر انا في انتظارك ...وتخرج شجن من الغرفه متجهة ناحية المطبخ وينظر صلاح الي حامد وعلي وهم يتصببان عرقاً وكان مطرة صبت عليهم ويضحك صلاح ماكنت كوسين الحصل شنو ...فيرد علي البت دي كلامه جد ويقاطعه حامد دي قطعت ليه السلطه بايدينها وعايزه كمان رايه والله بختك يا صلاح الليله اليوم يومك وكدي قوم جيب لينا الفطور ده نحن ما حرقنا خلااااااااااااااص ..ويذهب صلاح ويا تي بالفطور وعينه علي السلطه ..يفطر الجميع ومن ثم ياتي الشاي وينظر صلاح الي الساعه فيقول علي يا اخوي ان قايم قوم ساكت نحن لسع علينا لو ما شربنا جبنة امك دي تب مانا فايتن اها رايك؟؟ لكن يا علي انتو في بيتي وما... فيقاطعه حامد الليله داير تعمل لينا هيلمانه وتقدير نحن يا اخوي البيت ده بيتنا نقعد نفوت مافي واحد بسالنا ولا ماكدي يا ابو علوه؟؟ ويقول علي كلامك في محلو يا حامد نظريه قوم قوم امش ما تضيع الزمن والفرصه الجهنميه دي ده الملاك نزل من سماه عشان يشوفك انت ويضوقك السلطه العسل دي تصدق يا حامد انا قايل السلطه دي نحلي بيها لانها عملتها ست الكل يا صلاح يا فل ..لم يرد صلاح علي كلام علي بل يخرج مسرعا اليها وما ان يدخل المطبخ فيجد ثوبها تدلي علي كتفيها فيري الموج الاسود وهو يتدلي من عليها يغطي كل رقبتها وبعض الخصل التي ترقد علي جبينها تداعب خديها فكانها لوحه او تحفه فنيه تعرض لاول مره وما ان رات صلاح تهلل وجهها الصبوح وقامت بتعديل ثوبها واخفا ما ظهر من حسنها وردد صلاح في غرارة نفسه .. حاول يخفي نفسه وهل يخفي القمر في سماه ابداً طبعاً لا شفناه شفناه .....ويجلس صلاح بعد ان يسلم عليها في ايدها والتي هي كالحرير غضه لينة ويكاد لا يصدق انه امام شجن وتجلس اليه والت يكم تاق الي هذا اللقاء وكم حلم به كان ينتظر بالقرب من باب بيتها لكي يراها فقط وهاهي اليوم امامه ويده في يدها ويقول لها شجن اني...........

10-19-2007, 09:49 PM

Dr. Faisal Mohamed

تاريخ التسجيل: 06-20-2004
مجموع المشاركات: 1180

للتواصل معنا

FaceBook
تويتر Twitter
YouTube

20 عاما من العطاء و الصمود
مكتبة سودانيزاونلاين

Re: نهاية الاحلام : مسلسل من 36 حلقة (Re: Dr. Faisal Mohamed)
الحـلقـة السـابعـة شجن اننننا والله ماعارف اقول شنو لاني ما مصدق انك الليله في بيتنا وكمان بتساعدي في امل وامي وانت بنت ال..... وتقاطعه صلاح انت عايزني اقوم امشي من هنا انا معتبره الحاله واحده واظهر انو عندك راي وبعدين تعال انت مكبر الحكايه ليه؟؟؟ ويرد صلاح لا القصه وما فيها انك مش متعوده علي انك تطلعي وصح نحن جيران لكن مافي زيارات وكده لانو ابوك وحقيقه دي بنظر لينا نظرة غني لي فقير لكن ماعلينا بالامور دي خلينا في موضوعنا وانت قلت لي اجيك وانا جيتك اها موضوعك شنو؟؟؟ هو يعني لازم يكون في موضوع بي عينو عشان نتكلم فيه انا حبيت اتونس معاك و....يعني وخلاص ويضحك صلاح يابت عايزاني اسليك ولا شنو ؟؟؟ والله انت يا صلاح اظهر انك بايخ وما.... ويقاطعها صلاح لا ماتفهميني غلط انا اصلو بحب اضحك وبس وبعدين ياست انا اصلاً لحدي الآن ما مصدق انك معاي وما قادر الملم اطرافي وتقاطعه شجن للدرجه دي انا صعبه وما من الساهل اتلقي....ده اكيد انت ما من الساهل الواحد يلقاك وكمان يقعد و يتكلم كمان اظهر الليله انا ما حيجيني نوم حا افضل مساهر للصباح لاني معاي وبتتكلمي معاي وصورتك حا تكون في راسي وما بتطلع ابداً وتبتسم شجن ابتسامة فيه خجل فهي لاول مره تسمع هذا الكلام عن نفسها ومن صلاح وتنظر اليه فتجد عينيه فيهما كل الحب والتقدير والحنان فتردد في نفسها ياربي صلاح يكون والله اكون اسعد واحده لو الفي راسي ده صحيح ويقطع عليها صلاح توهانها ويقول لها يا شجن انا بالجد كده شايلك وخاتيك في مكانه جواي لكن خايف في نفس الوكت منك اذا صارحتك وخايف من الزمن ومن حاجات كتيره وفي اثناء كلامه قام الي الرادي وادار منه مشغل التسجيل وخرج منه صوت الرائع محمد وردي وهو يغني صدفه واجمل صدفه انا يوم لاقيته فيقول لها انا اهديك الغنيه دي ربما تعبر ليك عن شيء او تسهل الطريق للعايز اقولو..... يا علي ما نتخارج الزول ده اون ما جايب لينا خبر اصلو اللقي احبابو بقولوا بنسي اصحابو ويرد علي خلينا شويه كمان يا حامد انت لاحق شنو ؟؟؟ لا ما تقولوا لي انت متفقين علي كل واحد عندوا الا انا اظهر انا لازم اخش المعمعه دي واجرب ... ويرد علي ما بتقدر احسن ليك كده واسالني انا انا للان ماقادر اصارحه الشغلانه كلها تلميح في تلميح وربنا يهون علينا فيا حامد المويه الحاره ما لعب قعونج وضفاضع بالعربي كده..........

10-21-2007, 10:57 PM

Dr. Faisal Mohamed

تاريخ التسجيل: 06-20-2004
مجموع المشاركات: 1180

للتواصل معنا

FaceBook
تويتر Twitter
YouTube

20 عاما من العطاء و الصمود
مكتبة سودانيزاونلاين

Re: نهاية الاحلام : مسلسل من 36 حلقة (Re: Dr. Faisal Mohamed)
الحـلقــة الثامنـة يا علي انا بفوتك ما بقدر انتظر اكتر من كده الشاي وشربنا ولا منتظر القهوه والله انا عارفك جنك تقعد وتجرجر ويرد علي يا حامد انت عليك الله وراك شنو وريني بس خلينا شويه وبعدين ام صلاح دي لو شافتنا ما حترضي وحا تقول لينا لازم تشربوا الجبنه لذلك خلينا نشربها ونتخارج ..والله يا علي انت ما مقعداك الجبنه وانا عارف السبب مقعداك امل ومطلعه روحك وان شاء الله ما تلاقيها الليله اها بتسوي شنو ؟؟ والله يا حامد انت كان سكته بلاقيها لكن تقعد تنقنق لي كدي زي الطرفه البكايه لي يوم القيامه ما بلاقيها اسكت يا خي .. ويبتسم حامد قلته لي طرفه ..طرفه ولا جبهه ويرد علي لا حزب امه.... والله يا شجن السنه الجديده قربت وشدي حيلك كده وحصلينا علي الجامعه وتقاطعه شجن انت ما قاعد حا تساعدني وكده ..وين يا استاذه انا بمشي المعسكر وتاني الترتيبات للجامعه الا اجي خميس وجمعه ان شاء الله ..حيلك ياود خميس وجمعه وامكن بعد كل شهر نحن والله ما بنقدر علي ........تسكت شجن فجأة وينظر اليها صلاح ويقول لها علي شنو يا شجن ياريت تقوليها ولا كتيره علي الكلمه دي؟ لا انا ما قصدت بس لكن والله ماعارفه لكن ... يقطعها صلاح شوفي ياست انا حا قول ليك واريح روحي لاني تعبت والله وصلت الحد ولي كم سنه وانا ما قادر اتكلم اسمعي يا ست وبصراحه كده انا كنت معجب بيك مما عيني وقعت عليك لكن قلت في نفسي ده اعجاب ما اكتر ومرت الايام وكالخيال احلام والاعجاب ماشي يزيد كل لحظه وكل يوم اعدي علي وبقيت لازم اشوفك وادمنت شوفك ويا شجن بقيت ماقادر ابعد عنك او ما افكر فيك واظنك فهمتي انا قاصد شنو ..وشجن تنظر الي الارض وكانها تبحث عن كلمات تدفقت علي الارض وتحاول ان تلملم اشتات افكارها..ويقطع عليها صلاح تبعثرها محاولاً هو ايضاً جمع اشتاته وسكوتها هذا ادخاه في فرح وخوف الاثنين معاً فالسكوت علامة رضا وايضا ربما استخفاف بما قاله لها ...ويدخل الاثنان في صمت رهيب وهي لم تتفاجأ من كلام صلاح ... تنادي ام الخير علي علي ياولدي تعال شيل الجبنه دي علي الضل وتعال انت وصاحبك حامد ونادوا صلاح وتعالوا اشربوها معاي هنا تحت ضل الراكوبه البارد ده تعال يا عشاي تعال ويهمس حامد في اذن علي ديك امل جايه علينا انا بتولي ليك امر الحاجه دي وبلخمه ليك شويه مسافة ما تلقي حل مع البت دي ...والله ما عارف اقول ليك شنو يا حامد لكن خربتها بي القي ليك حل نحن مافي بيناتنا ...يقاطعه حامد ياخي بطل فصاحه واكسب الزمن وفصاحتك دي علي لنا بس يا ابوعلوه وبميزوك وبتآمن هسي يا ولد جات جات اها انا مارق ويتوجه حامد الي ام صلاح والمعروف عن حامد انه ظريف ولكن ثرثار زياده عن اللزوم تدخل امال وتسلم ثانية وتجلس امام علي ويتبادلان النظرات ويقول لها علي كيفك يا امل مع البيت وكده وهنا يدخل حامد حاملا صينية الجبنه ويضعها امام علي وامل ويضرب علي حامد برجله اراده ان يخرج سريعاً ويبتسم حامد ويرد والله يا امل شغلة البيوت دي صعبه خلاص امك جيب ودي والله غالب وتضحك علي كلام حامد وتقل له جربوها شويه واستحمل وهنا يكاد علي ينفجر من الغيظ علي حامد وهنا يضربه علي برجله حتي لا تراه امل ويقول حامد الا ام التلكز دي ما فينا وتقول امل في استغراب قلت شنو يا حامد ويرد علي ما عليك منو خلينا في موضوعنا وفي هذه الاثناء يخرج حامد وهو يكاد ينفجر من الضحك .... والله يا امل بالجد كده انا حبيتك ومن زمان خالص بصراحه كده وعايز رد الان لو ممكن..

10-21-2007, 11:13 PM

Dr. Faisal Mohamed

تاريخ التسجيل: 06-20-2004
مجموع المشاركات: 1180

للتواصل معنا

FaceBook
تويتر Twitter
YouTube

20 عاما من العطاء و الصمود
مكتبة سودانيزاونلاين

Re: نهاية الاحلام : مسلسل من 36 حلقة (Re: Dr. Faisal Mohamed)
الحـلقـة التـاسعـة تنظر اليه امل وفي عينيها شئٌ من الفرح وان حاولت ان تخفيه من عيون علي ويبتسم علي ابتسامة عريضه تظهر ملامحه الافريقية الحادة وهو لا يكاد يصدق علامات الرضاعلي وجه امل صاحبة الوجه الطفولي الجميل والذي تكسوه علامات الخجل اما صوتها كهداة الليل حين يزحف بجيوشه ليحاصر النهار القاسي ومن رقة صوتها تكاد لا تسمعها رقيقة كنسمات الصبح البهي لونها مائل للاصفرار والذي تكسوه سمرة خفيفه وشعرها المتدلي يرقد علي كتفيها هانئاً يتمايل كلما هبت هبوب الصيف المحرقه ياليتني شاعر اجيد صياغة الكلمات هكذا يقول علي بينه وبين نفسه ويقطع عليها صمتها امل اتِّ حياتي والفاضل لي من عمر غيرك اصلا ما بكون ولا حا اكون عشان كده انا عايز اسمع رايك بي صراحه عايز اسمع منك ...وتقاطعه امل بصوتها الهادئ الرقيق افتكر ان عندنا نفس الاحساس انا فعلن ردتك من اول ما شفتك مع اخوي صلاح ارتحت ليك وللبساطه الفيك وللجديه في طباعك مع اني سامعه انك ظريف لكن انا شايفاك جادي يقاطعها والفرحه تكادتغمره وتنسيه هموم الدنيا يا امل انت بعجبك لمن اكون جادي ولا ظريف؟؟ والله احسن الوسط دايماً يعني حبه من هنا وحبه من هنا ويبتسم في وجهها والذي كانه يراه لاول مره بالجد كده يا امل انت كنتي بالنسبه لي امل اتمنيت طول عمري ةيا امل عمري القبيل وياسنين عامرات فصوله واصلي شايلك من زمان فيني وتقاطعه امل ببسمة حلوه يعني شاعر ونحن ما عارفين ويرد علي ياريت يا اغلي شئ في حياتي ولو في حبة شاعريه بس زي العند اخوك كان قلت بالغت فيك يا صدفه احلي من الصدف لكن زي ما بقولوا بنلقط شويه من هنا وشويه من هناك لكن يا امل نتلاقي كيف الليله عزومة اخوك دي لمتنا وانشاء الله انت كمان من الناجحين السنه الجايه آمين يارب انجح لكن يا علي ما عارفه الاقيك كيف. وبالمناسبه انت ما ناوي ترجع تواصل الدراسه ولا خلاص بقيت زول معايش؟؟ والله يا امل امكن تكوني عارفه حبي للدراسه لكن في الوقت الراهن الوالد كبر وبقيت انا الشايل لمسؤليه في راسي وان شاء الله القي طريقه اوفق بين الاتنين لكن الاهم عندي الان انت وبس يا امل ...الله يخليك لي يا علي واوفقك ومسؤليتك كبيره شديد ..ما تخافي ان شاء الله قدره لكن ما قلتي لي كيف الاقيك وابل شوق القلب مافي غير حل واحد يا ست غير اصارح صلاح بالموضوع والشغلانه تبقي معروفه في نطاق البيت ولا رايك شنو؟؟ والله ما عندي مشكله وامكن ابوي يرحب بالفكره وصلاح كمان لكن نخليها شويه كده وبعدين تتكلم مع اخوي صلاح لكن ممكن نتلاقي في بيت خالتك حليمه طبعاً فرحه صاحبتي ودفعتي .. وهو لا يكاد يصدق والله فكره وبيت ناس خالتي ده فايت علي خلاص ماتحلت والحمد لله ..ويدخلان في صمت مفاجئ اصوات اقدام تقترب منهما انه حامد وينظر الي علي وهنا تقوم امل لكي تخرج من الغرفه وتودع علي علي امل اللقا ويدخل حامد اهايا قيس انت ليلي خلاص اتفقتوا ؟؟والله انت يا حامد عارض كبير هسي الجايبك لينا شنو وانت عارف الحاصل يا بايخ وشغل البيت قال ويضحك حامد في واحد عايز يطرح الغرام ويبث الهوي يقول لي واحده عامله كيف في شغل البيت انت ماعامل زي واحد عازم فردتوفي الحدايق وقعدوا في النجيله ولم في النجيله معيط والله النجيله دي في الحواشه مجنناناشديد خلاص كبينا مبيد ما كتله قلعناها بيدينا ما نفع وحب اتفلسف عليها تعرفي بتوقف نمو بذور العيش لان الانسجه الغشائيه لل...انت عارف يا ابو علوه قالت ليهو شنو وقبل ان يرد علي رد بنفسه انت في حواشة ابوك ولا في حديقه عامه ثم ثانياً انت جايبني هنا عشان تلقي علي محاضرتك البايخه دي نحن في حة علوم ولا شنو..ويضحك حامد وينظر اليه علي اها والباقي ..باقي شنو يا علي الباقي تفهموا من خلال النص اي حاجه احكوها ليك؟؟ والله يا حامد انت فعلن بايخ وبعدين ناسك ديل من زمن العلوم نحن في زمن الانسان والكون ولا ديل بالمنهج القديم زيك كده ويضحك الاثنان معاً ويخرجان وتنادي عليهما ام الخير تعالوا يا وليداتي اشربو التني ويحجلس الاثنان لشرب الجبنه (القهوه)..........

10-21-2007, 11:22 PM

Dr. Faisal Mohamed

تاريخ التسجيل: 06-20-2004
مجموع المشاركات: 1180

للتواصل معنا

FaceBook
تويتر Twitter
YouTube

20 عاما من العطاء و الصمود
مكتبة سودانيزاونلاين

Re: نهاية الاحلام : مسلسل من 36 حلقة (Re: Dr. Faisal Mohamed)
الحـلقـة العـاشـرة يعني يا شجن حاتفضلي ساكته كده طويل ولا كلامي ده عندك عليه ملاحظات او راي المهم انا الليله لازم اعرف النتيجه النهائيه والرد النهائي لاني بامانه كده تعبت من الجري ورا سراب ورا مجهول وامكن انت الشايله من ناحيتي مازي الشايلو انا فعليك الله وارجوك انا عايز اسمع رايك فيني وبدون ضغط وترد شجن وهي تنظر الي صلاح وعلامات الخجل تكسو وجهها الصبوح الوضاح انا يا صلاح حبيتك بصراحه كده بل بالعكس كنت خايفه اكون حبي من طرف واحد وانت تكون عينك علي واحده تانيه وزي ما سمعت ويقاطعها صلاح والفرحة تكاد لاتسعه والدهشة من كلامها الاخير يا شجن انا والله غيرك ما حبيت ولا شفت غيرك ودي منو القالوا انا عايزه وترد فرحه بت خالة صاحبك علي.. ويضحك صلاح والله الناس دي اصلا ما بتريح عشان بمشي مرات مع علي وبنزورم وكده وبعدين ما حصل قعدت معاها كده براها مشياتي في حدود وبكون مع علي طول مانحن قاعدين لكن شايفك مهتمه بالموضوع ده خلاص.. والله يا صلاح كل ما كنت اسمع السيره دي بتنرفز وبتعصب حتي امل اختك لاحظت الحكايه دي وكانت بتضحك علي وتولع فيني وبدون سبب تقول لي امس صلاح كان عند ناس فرحه وانا انفعل وهي تضحك ورغم كده ما صارحتها بيك لانهااختك ويبتسم صلاح وطيب انت وكت كدي ما ظاهره مالك وعامله البت تقيله ...يا صلاح عايزني اجيك واقول ليك وهنا تسكت شجن وما تكملي تقولي شنو يا شجن ...وتبتسم بسمه يكاد صلاح يذوب فيها وجداً عايزه اقول اني تاخرت ولازم امشي .. اه منك ده الكنت عايزه تقولي لكن معليش الايام بيننا لكن ياشجن الخوف من اهلك ابوك وكده الله اعلم حايقتنعوا بي وده اكيد وتاني حاجه الاقيك متين وكيف..اولا ياسيدي موضوع اهلي ده بدري عليه انت في الجامعه وانا ممتحنه البرنامج ده لسع عليهو وثانياً وده الاهم الاقيك هنا بحجة امل وانت بتشرح لينا يا استاذ صلاح واتحلت ..الاول اخدتي بكل بساطه لكن الايام حا تثبت ليك مخاوفي لكن زي ما قلتي خلينا في التاني والاهم فكرتك حلوه لكن انا فعلن حا اشرح ليك ما حتبقي ونسه و .... وكده يعني ..خلاص اتفقنا وانا هسي حا قدمك للباب بتاعنا وتقاطعه شجن من اوله خليك هنا انا بمشي لي امل وبتقدمني هي وريح روحك ... روحي خلاص الريد عزبه والشوق الهبه حيلك حيلك يا شاعر انت وتخرج شجن مسرعة بعد ان تودع صلاح وتذهب الي امل ويودعان ام الخير وتخرجان الي الشارع ... حامد يوزع البسمات يمنة ويسري اها ات عارف يا ابو علي ابو صلاح خلاص وقع في الشرك وينظر اليه علي وهو يشير الي والدة صلاح وعندها يسكت حامد وكانه لم يقل شيئ اها يا والده داك ولدك صلاح كبي ليه قبل ما يجي يلخمنا يطفش كيفنا ده وتضحك ام الخير تلك الضحكة الحنينه والتي تحكي حنيه الريف وطبيعة النفوس الطيبه لاهلنا بالريف رغم قساوة الزمن والحال الحرن ويقطع صلاح عليهم ضحكاتهم شنو يا شباب عديتو الحاله واحده وتشيلو وتشربوا في الجبنه انت قايلين امي دي ما عندها شغله غيركم انت ولا شنو ويرد علي انت اطلع منها ويرد حامد والله يا صلاح امك دي مافي زيها في ملاح التقليه والليله اكشفنا انها ما بتتلاحق في الجبن زمان كل ما نجيك شابكنا شاي شاي ما دايرنا نضوق جبنة امك وداير تنوم بيها براك لكن تاني ده بعدك نجي في اي وكت طوالي جبنه وبنجي بي البن والسكر بتاعنا وتضحك ام الخير يا جنياتي حبابكم في اي وكت صلاح اخوكم وانا في مقام امكم ولا مو كدي يا وليداتي ويرد علي والله انت اكتر من كده يا حاجه اصلاً لو ما انت صلاح ده زاتو نحن ما شغالين بيهو كتير ويقاطعه صلاح الليله لقيتو ليكم سند وضهر دايرين تطلعوني ساي ويضحك الجميع وتلك الراكوبة الصغيره تضمهم بالفرح والحنين يداعبهم رقراق الشمس من خلا ل فتحاتها وهم في فرح وهناء لا يعنيهم من الحياة سوة هذه اللمة البسيطة والتي تنسيهم همومها ويقوم علي وحامد ايذانا بالرحيل ويصرخ صلاح في وجههم معقوله نحن لسع القعدة بقت حلوه وانتظروا اتغدوا معانا وترد ام الخير عاد يا ولادي الوكت ما خلاص بقي وكت غدا كلها شويه والضهر باذن ويقاطعها علي والله اعفونا من الغدا ويا دوب الضهر وانا ماش اجهز عندي مويه في الخلا ولازم امشي بدري ويرد حامد يا ابو صلاح نحن راحلين ما قاعدين والله تاني لمن تكرهونا عديل ويضحك الجميع ويودع صلاح علي وحامد الي الشارع ...تنادي ام الخير علي صلاح يا ولد املا لي ابوك الابريق ووديه ليهو الصلاة خلاص جات ويرد صلاح كويس يما انا جاي............

10-23-2007, 00:26 AM

Dr. Faisal Mohamed

تاريخ التسجيل: 06-20-2004
مجموع المشاركات: 1180

للتواصل معنا

FaceBook
تويتر Twitter
YouTube

20 عاما من العطاء و الصمود
مكتبة سودانيزاونلاين

Re: نهاية الاحلام : مسلسل من 36 حلقة (Re: Dr. Faisal Mohamed)
الحلقــ (11)ـــة وبعد ان يخرج علي وحامد من منزل صلاح يتحدث حامد الي علي ..انت يا علي الموضوع بتاعك الحصل فيه شنو ؟؟ يرد علي ..موضوع شنو ؟؟ بالله شوف ده انا اسالك تجاوبني بسؤال والله امرك عجيب حايكون موضوع منو يعني ما موضوع امل فتاة المستقبل اللسي سنين بعاد.. ماعرفتك والله يا وردي انت ومبعد السنين مالك احتمال الامور تتسهل ويتحقق الحلم وكلو علي الله يا سيدي.. ونعم بالله لكن يانجده الواقع معكوس والامور جايطه وانت عارف الحاصل .. يا حامد خليها علي الله بتتسهل وخلينا نلحق الضهريه بدري بدري وبالمناسبه ماتجي معاي الليله وماتعمل اي حاجه بس ونسني ساي مع ان انا عارف ونستك بايخه وتقيله ويضحك حامد لكن علي قلبك زي السكر يا سكر انت لكن للاسف سكر بي ملح جلكوز يعني ويضحك الاثنان ..يعني حا تجي معاي ونمش الحواشه سوا ..والله شوف اتاكد لو في تمرين ولا ماف اذا في معناه ما ويقاطعه علي خلاص عرفنا يا رونالدينيو وعلم.... يجلس صلاح الي امه وتجلس ايضاً امل ويتحدث صلاح الي امه والله يا امي انا اليومين ديل ما عاجباني صحة ابوي حاسي انو بشكي لكن ما داير يوضح وقلت ليه كم مره اليومين ديل ما تمشي الحواشه انا بشتغل فيها براي وما تتعب نفسك انت وهو مصر يمشي ..وتتدخل امل مباشرة يا امي انت ما تقنعيه خليه يرتاح شويه من الخلا .. وتتحدث الام الي ابنائها يا اولادي ابوكم مافي واحداً بقدر اقنعوا والفي راسو في راسو انا فترت من الكلام معاه كل يوم اقول ليه عاين لي صحتك المدهوره دي وهو ولا بهموا الكلام والحال في حالو ربنا يصبرنا يا ولدي .. يا امي انا قلت نوديه للمستشفي اعمل فحوصات ونشوف الحاله العندو .. وتبتسم ام الخير بسمة مليانه حزن وحسره والله ابوكم الا تجيبو ليه المستشفي هنا هو الحكيم الفي شفخانة الحله مو راضي يمشي ليه يا ولدي الله يهون عليه وعلينا.. يذهب صلاح الي الغرفه الصغيره يقلب في بعض دفاتره القديمه عله ينسي بعض مرارات الحاضر المؤلم عله ينسي او بالاحري يتناسي ويقعد علي كرسيه المتهالك يفكر فياتيه طيفها الجميل وياله من طيف تذكر كل ما حدث اليوم كلامها وصمتها وابتسامها انها شجن نعم شجن اميرة قلبي وعقلي والله بريدها ريده فايته الحد بهذه الكلمات يتمتم صلاح شجن ويدير مفتاح الرادي الصغير ابو حجرين ويحرك المؤشر نحو ام درمان انه الاحد وقد حان موعد برنامج مختارات الاحد عله يخفف عنه قليلاً ما يلاقيه وما يعانيه وعله يذوب ويسافر عبرالشجن والاشواق علي انغام الموسيقي والغناء المتعافي في هذا الزمن الاغبر ولكن الحجار القديمة التي طالت مدتها وهي تمنح الرادي الصغير الطاقه قد تهالكت ونفذ وقودها ولا تقوي علي تشغيل الرادي لقد انهكتها الايام وصوت ام درمان الدافئ والذي لايهدي ولا يكل فيتكدر مزاج صلاح وزمن البرنامج قارب علي البداية فماذا يفعل ؟؟ ويخرج الحجرين من بطن الرادي ويضربهما ببعضهما البعض فهي طريقة لطالما اتبعها في مثل هذه الظروف والتي بخلت عليه حتي بحق الحجرين ويدخل صلاح الحجرين ثانية الي بطن الرادي ويبدا في الطنين وكانه لا يعجبه هذا الحال فلماذا يبخل علي ّ صلاح بحجر جديدافلا استاهل ان يعلو صوتي ويملأ ارجاء الغرفه لماذا يحرمني لماذا ؟؟ ويخرج صلاح الحجر مرة اخري ويضربهما ببعضهما البعض ويضعهما مره اخري في بطن الرادي واخيرا ينضم الرادي وان كان الصوت ضعيفا ولكن صلاح يتمتم كفاي صوتك ده بسمعني ويدير الرادي نحو امدر مان ويجد عثمان حسين وهو يترنم باحد اغنياته الجميله.. لمتين لمتين يلازمك في هواك مر الشجن ويطول عذاب ويجد صلاح نفسه مع الاغنيه ويردد خلفها الي ان تقطع عليه امل خلوته يا صلاح امي بتقول ليك الغدا جاهز تعال شيلو علي الضل وهو لا ينبت ولو بكلمه واحده ويخرج من الغرفه حاملا الرادي بالقرب من اذنه حتي يسمع جيدا ويحمل صينية الغد ويتوجه الي الضل حيث ابوه ويجده جالساً علي التبروقه وامامه السبحه والتي لا تفارقه ابداً ويقف ايضاً ابريق الحديد متاهبا امام التبروقه ويجلس صلاح الي والده وفي ذهن صلاح كلام كتير يريد ان يجد طريقا الي والده ولكن كيف ؟؟ لا يدري...

10-23-2007, 00:32 AM

Dr. Faisal Mohamed

تاريخ التسجيل: 06-20-2004
مجموع المشاركات: 1180

للتواصل معنا

FaceBook
تويتر Twitter
YouTube

20 عاما من العطاء و الصمود
مكتبة سودانيزاونلاين

Re: نهاية الاحلام : مسلسل من 36 حلقة (Re: Dr. Faisal Mohamed)
الحلقــ (12)ـــة ياتي حامد الي علي في منزله ليذهبا معاً الي الحواشه كما وعده ويدخل الي منزل علي ويجده مع ابيه وهما يتناولان الغداء ويعزماه ولكن حامد يرد والله يا جماعه اتغديت وجيت جاهز لكن لو لقينا كباية شاي ما بناباها ..وويذهب علي الي امه ويطلب منها ان تحضر الشاي سريعاً ..يا امي عليك الله سرعه لاني لاحق المويه في الخلا .. وترد عليه يا ولدي الشفقه بطِّله هس كان جبت لينا الغاز الجديد ده مالو قالوا رخيص خلاص وسريع كمان خلاص يا امي اول مانصرف بنفكر فيه طوالي لو هو مريح زي ما ات قلت.. عاد ياولدي ده مو كلام جارتنا علويه قالت اصلو ما بتصدق لمن يشغلوا سرعه شديده اها كدي ناولني الترمسه دي الشاي خلاص فار وخت فيها نعناع ويضحك علي وامه ترد عليه انا عارفه المضحكك شنو كلامي ده مش كدي يا ولد خلاص قوم شوف ليك شغله قوم ودي الشاي علي ناس ابوك وامرق علي الخلا ويحمل علي الشاي والابتسامه تعلو وجهه ومن كلام امه الذي يضحك ولكن تبتسم الام لابنها وهو يحب كلامها البسيط ولو القليل منه فكله حكمه ويشرب علي وحامد الشاي ويتوجها الي الحواشه وفي الطريق يمرا بجانب دكان وداعه لياخذا منه بعض السجاير ولعل في الخلا متسع من الوقت وعدم مضايقة الاخرين لهم ويداعبان وداعه قليلاً والله قالوا يا وداعه ناوي علي العرس وجهزت حالك تب ويبتسم وداعه صاحب القسمات الحاده ولون البشرة الاسود والله يا شباب قريب ..واها يا وداعه دي منو الامها داعيه ليها ورضيانه عنها يقول علي .. ويضحك وداعه قريبه وانت بتعرفوها كويس وباقي كلها ايام وبمش لي اهلها وبخطبه وبتعرفوها وهنا يرد علي ربنا يتم علي خير وبدا الاستياء علي وجهه ظاهراً فيقول يا حامد نمشي لان الوقت تاخر خلاص ونحن دايرين نجي قبل المغرب ان شاء الله ويذهبا من علي دكان وداعه وفي الطريق يسال حامد علي ويقول له والله يا علي انت وداعه مما قال الكلام بتاع العرس ده انت اتغيرت فجاة ممكن اعرف السبب .. والله يا حامد ما عارف جاني احساس غريب وخاصه لما قال نحن بنعرفها وعلي علاقه بيها انا كلام ده بدا يخوفني يا حامد ويقاطعه حامد ياخي ما طوِّر الموضوع يعني انت تقصد انو اكون داير امل ولا ...يقاطعه علي ده الخايف منو انا زاتي والله يستر لحدي الاسم وداعه ما نتاكد من نواياه .. والله شوف ياعلي اولا امل ما بترضي وضع زي ده وما بتقبل بي وداعه بتاع الدكان هو صح عند المال لكن ناقص شوية فهم فعشان كده يا صاحبي ما تشيل هم بتفرج وولع لينا بالمناسبه دي سيجاره خلينا ننفخ وننسي وانا يا علي عندي موضوع لذيذ عن سوسن بس خلينا نخلص من الضهريه بتاعتك دي والله يعين .... يذهب صلاح الي الحواشه راكباً اليوم علي حمار ابيه حيث اقنع والده با لا يذهب اليوم الي الحواشه وناداه ابوه ياولدي الحمار ماينفك منك واملا الخرج قش للبهايم من امس مافي زول اداهن حاجة ياكلنها ويلبي صلاح كلام الوالد ويخرج الي الحواشه ليري ما يمكن القيام به .......

10-23-2007, 00:38 AM

Dr. Faisal Mohamed

تاريخ التسجيل: 06-20-2004
مجموع المشاركات: 1180

للتواصل معنا

FaceBook
تويتر Twitter
YouTube

20 عاما من العطاء و الصمود
مكتبة سودانيزاونلاين

Re: نهاية الاحلام : مسلسل من 36 حلقة (Re: Dr. Faisal Mohamed)
الحلقــ (13)ـــة الزرع جميل واخضر ورائحة الطين وهي تمازج الماء ياله من منظر بديع يكاد الانسان معه ينسي همومه واشجانه هكذا يتمتم صلاح بينه وبين نفسه ويردد شجن لو ما الزمن ببنيلك قصر ريد واعزف ليك اجمل لحن وافرش ليك ورود الكون واملا دنياك فن وازرع الريد واحه في صحرا المحن واجيلك وبيك استظل وانسي هجير الليالي والاحن ما انت عمر ي الباقي لي وانت الزاد يا شجن وآه آه يا زمن وبعد ان يجتر صلاح هذه الاهات يقول في نفسه الليله لازم الاقيها والله اشتقت ليها ..ثم ينصرف صلاح الي عمله بنظافة الحشائش من محصول الذره ويتصبب عرقا نتيجة المجهودالذي يبذله في العمل ولكنه يحس بالرضا التام عما يفعله.. ام الخير تتهيا لصلاة المغرب وتحمل الابريق الي حاج الزين ليتوضأ ليلحق الصلاة بالمسجد وتقابله ام الخير والتعب يطل من عينيها البراقتين ويسالها مالك يا حاجه بتشكي من شي لا الحمد لله بس الليله اشتغلت كتير .. يا وليه انا قلت ليك ريحي روحك شويه وهدي امل ما شاء الله بتساعد وبقت تعرف اي حاجه ..يا حاج ريح روحك انت اول انا شغلتي قادره عليها وامل بت بتين في شان اعتمد عليها وبعدين انا كان ماسويت شغلتي براي ولا برتاح ولا بهدا ولا بقتنع بي شغل زول ..اصلك يا ها حالك البدور تسويه بتسويه ولا بهمك زول اها انا ماش الصلاة باقي المغرب وكتو ضيق النلحق الصلاة ..خلاص وانت جاي جيب معاك السكر والشاي في شان نسويلكم شاي المغرب لا تنسي ياحاج ..كويس ويسرع الخطي الي خارج المنزل ليلحق بالصلاة.. يا علي ما خلص المغرب اذن انت ناوي تنومنا هنا انا ما قلت ليك شغلة الشقاوه دي ما عندها حد ولا بتكمل وعاين لي ابواتنا ديل عمرم راح ساكت في الحواشات دي شايف الليله عرباتهم واقفات بره والله مخازنم فاضيه التقول ما مزارعيه عليك الله دي حاله ؟؟ويبتسم علي لكلام حامد اها انت عايز تغير الوضع ورينا شطارتك ياخي انت شغال لي يوميات يعني عاجبك وضع البنايين ما حتهم زي المزارعيه الكادحين يعني ما عملت شي نحن في النهاية عمال وعايز اقول ليك ويقاطعه حامد يعني شايفني خلاص انا رضيان بالبني ده دي مرحله وحا نشوف الباقي ونقدم للجامعه وربنا يسهله ..خليني يا حامد اتم كلامي اول حاجه انت نتيجتك دي ما بتاكلك عيش وعارفك التربيه ما بتقتنع بيها وبعدين يا اخوي اجمل شي في الزراعه بتاكل من عرق جبينك حلال مافيه كلام واجر ده غير الطير والماشي والغاشي دي نعمه كبيره نحن ما حاسين بيها ولو ان اهل القري آمنوا لفتحنا عليهم بركات من السماء الله يهدينا ويهديك.. يا اخوي انا ما معترض علي الكلام ده لكن الواحد يسعي مش يحرس ليه سراب ويدفق آمال علي الرهاب وبعدين تربية شنو البخشها دي ولو كانت جامعة الخرطوم زاته اجي اشتغل استاذ وماهيه ملاليم ونبيح طول النهاروما اخير الزراعه من وجع التدريس ويقاطعه علي الرسول (ص) قال خيركم من تعلم العلم وعلمه الحديث ده ما لاقاك ولا القرايه سطحيه وبس وعدي عدي..ابقي انت استاذ يا علي ويرد علي انا عايز لكن بعد امتحن ان شاء الله السنه الجايه واجيب شهادتي وهنا في الحله قبلي لان ظروف البيت ما بتسمح وكده وانت عارف صحة ابوي ما ماشه عديل لو ما كده انا كان امتحنت معاكم ويقاطعه حامد كدي هسي فكنا من الموالده وهاك السجاره دي وامرقنا من الخلا ده الدايرنا نبيت فه ده ؟؟خلاص سرابات ونمش نقفل المويه من الترعه وعلي الحله طوالي بس داير اعرف لاحق شنو ؟؟ الليله الكوره نسيت نمش نلحق النادي بدري بدري ونحجز لينا مكان قدام ونعاين بي مزاج والليله مغلوبين يا علي ما تقول لي الهلال واللعيبه المستوردين ديل والله العجب الليله يعمل فيكم العجب وشيلو الشيله ويضحك علي وفي هذه الاثناء يتوجهان لقفل باب الترعه ويردد علي انت من زمن الكوره يا حامد نحن مع الهموم دي بقينا مابهمنا شي ويضحك حامد حتي تظهر اضراسه ده خوف خوف اها بالمناسبه احكي ليك عن سوسن ومنها نقصر المسافه للحله شوف يا صاحبي انا.........

10-23-2007, 00:42 AM

Dr. Faisal Mohamed

تاريخ التسجيل: 06-20-2004
مجموع المشاركات: 1180

للتواصل معنا

FaceBook
تويتر Twitter
YouTube

20 عاما من العطاء و الصمود
مكتبة سودانيزاونلاين

Re: نهاية الاحلام : مسلسل من 36 حلقة (Re: Dr. Faisal Mohamed)
الحلقــ (14)ـــة شوف يا صاحبي انا البت نويت عليها تب وما تقول لي ابوها غنيان الغني في القناعه ولا مش كده يا ابو عالوه ..اول حاجه يا حامد انت حقو ماتتكلم في موضوع القناعه وكده لانك لو مؤمن بالكلام ده ما كان خليت حواشتك ومشيت تكوس ليك شغل تاني ولا القناعه دي في الحاجه الانت عايزه وبس وتاني حاجه سوسن مابترضي بيك انت ولا تتعب بالك وان هي رضت ابوها ما برضي في شان كدي روق روحك وما تعذبه ساكت في الفاضي واخير لك تسمع كلامي وانسي موضوعه ..شوف يا علي انت اصلك مابتشجع علي حاجه ولا حتي الكوره بقيت ما بتشجعه ..يا حامد اخوي الكوره حاجه ودي حاجه تانيه وبعدي قالوا وصل الكضاب لحدي عند الباب والنشوف آخرته معاك امكن تنجح في المهمه دي ةان كان انا علي يقين تب ما بدوك ليها ولا حاجه..خلاص يا علي الايام بينا ولسع جايه وحا تشوف وانا بذكرك الكلام ده وكدي هسي اسرع لينا النلحق الكوره.... يشد صلاح حماره بعد ان يملأ الخرج بالقش اي العلف للبهائم يرفعه علي ظهر الحمار ويتوجه الي الحله وكله امل ان يصادف شجن بالطريق او في البيت المهم اني عايز اشوفه وبس ويصل صلاح الي البيت ويتلفت يمين ويسار عله يعثر علي تلك العيون الدافئة وذلك الصوت الحنين والذي يخرج من تلك الشفاه والتي لايشبهها سوي العنب في النعومة والورد في الجمال انها موجوده انه يسمع صوتها ويتوجه الي غرفته لقد كان قريباً منها ويكاد يسرق السمع ليتاكد من انها بالداخل انها هي نعم شجن انها هنا ياصلاح وهو يتمتم بهذه الكلمات فاذا بها تخرج اليه وكانها احست بشدة الشوق اليه ولم تستطع ان تكون جالسة بالغرفة الصغيره انها تريد ان تراه وتخرج هنا امل ايضاً تاركة المكان اليهما وقبل ان تغادر يطلب منها صلاح ان تاتي له بالابريق والمصلايه وان تسوي الشاي وتجيبو هنا وترد امل هنا وين يعني ؟ يابت ماهنا في الغرفه يعني حا يكون وين يا انت ؟...... يصلي صلاح المغرب ويجلس الي شجن والتي ظلت تنظر اليه وكانها لم تره من قبل ويلتفت اليها والله مشتاقين يا شجن ..مشتاق وانا الصباح ده ما كنت معاكم ..والله الساعات ديل كانهن سنين ..والغريبه الساعه جمبك تبدو اقصر من دقيقه والدقيقه وانت مافي مره ما بنقدر نطيقه .. ياولد يا فنان انت وتبتسم شجن ويبادلها الا بتسامات الصافيه الولهي وهذا البريق الذي يلمع من هذه الاعين البريئة يدل علي شدة الوله والعشق ...ويقول صلاح :اها يا ست الجابك لي الشرح ولا ... وتضحك شجن الاتنين جابني يقاطعها صلاح اختاري واحده بس من الخيارات دي مافي حاجه اسمه الاتنين اها اختاري..تبتسم شجن ولا ترد وعندها يتركها صلاح ويقول لها خلاص راحتك اهم شي واي خيار نحن جاهزين يا... يذهب حامد الي النادي ويلتقي بسيوبر في الطريق اها يا سيوبر انت هلالابي ولا مريخابي انا الفي النص دي ويضحك حامد يا تو نص يا سيوبر انت الليله ما...شوف يا حامد ما تعمل فيها مفتح والفي النص ولا مش في النص ويذهب سيوبر الي حال سبيله ويدخل حامد النادي دون حتي ان يحي اصحابه بالنادي فكلام سيوبر فيه شي من الحقيقه ويسرح حامد في موضوعه الجديد ..ويذهب علي الي منزل خالته عله يجد امل مع فرحه وهذا هو الذي يريده من هذه الزياره ولكنه لم يجدها وتمني ان يلقاها وهنا اخذ فرحه علي جنب لتبلغ محبوبته بانه سوف يعود تاني وينتظرك في نفس المكان... والله يا شجن انا مشكلتي ابوك الخوف يرفضني لما اجي اتقدم ليك ولا نخليها للزمن هي كفيله تلم جراحاتنا وكده وتاتي امل بالشاي وتضعه امام شجن وتخرج خارج الغرفه وعندها يقول صلاح لي شجن والله انا فعلن حبيتك وما بقدر عنك اتخلي لكن يا شجن الخوف من الجاي وانا ما متفائل عديل كده اها رايك ؟ كلو باوان ان شاء الله ......

10-23-2007, 00:50 AM

Dr. Faisal Mohamed

تاريخ التسجيل: 06-20-2004
مجموع المشاركات: 1180

للتواصل معنا

FaceBook
تويتر Twitter
YouTube

20 عاما من العطاء و الصمود
مكتبة سودانيزاونلاين

Re: نهاية الاحلام : مسلسل من 36 حلقة (Re: Dr. Faisal Mohamed)
الحلقــ (15)ـــة يتوجه علي من بيت خالته وكان كله امل ان يلتقي من شغلت الفؤاد امل ولكن لم يلتقيا ولم يبرد نارو بي شوفتها وطلتها البهيه ويسلك الطريق الي النادي وعند الطريق يلتقي بي راوي ويسلم عليه ويرد راوي التحية بفتور وتعالي ويسال علي انت يا علي وين صلاح ويرد علي والغضب يكاد يتطاير منه وذلك لتعالي راوي عليه ويقول في نفسه عشان هو وضع احسن مننا بتعالي كده وبعد امكانياته دي نتيجتو زي الزفت طيب الفلهمه علي شنو ..ويرد علي عليه داير بيهو شنو صلاح لا عايز اهنيه وكده لكن الجامعه الخاشيها دي انا بي قروشي حا أخشها وبالمزيكه يااااا علي رايك شنو ؟ويسكت علي ويصفق بيديه ويلوح براسه دون ان ينطق بكلمة ..وتاني حاجه بت عمي قالوا بتمش ليهم في البيت انا ماعارف العاجبه في بيتهم ده شنو والله عجيبه ويشتعل غضب علي من هذا الكلام ويرد اوصف ليك بيت ناس صلاح عشان ما تروح جمب عمارة عمك طوالي اها يا !!!!! راوي افندي سلام انا وراي مشوار أهم..ويضحك راوي بسخريه ويفترقا .... يجلس صلاح في الغرفه يكتب بعض الكلمات والذي دائما ما يبوح للورق وللقلم ويشكو لهما همومه واشجانه وتقطع امل عليه خلوته شنو يا شاعر انت ما عايز تصارح اختك الصغيره ب.. يقاطعها صلاح اها انت براك قلت صغيره يعني ما حا تفهميني ولا حاجه واحسن تشوفي ليك شغله غيري .. وتهز امل راسها وتضحك صغيره لكن عارفه الشاغله بالك ومالك يا حبيب مشغول بالك واقوله ليك عديل كده شجنننننننننننننن وبعدين شجن صاحبتي يا باشا ومافي بينا اسرار ..واها يا امل وكت عارفه بتسالي مالك ؟ دايره اتاكد وبس ودايره احزرك كمان من ود عمها .. ويتجهم ويتغير وجه صلاح وهو يردد ود عمته!! اوعه تكوني قاصده وتقاطعه وهو في غير راوي الكريه ده والله يا صلاح انا ما قاعده اريده نهائي ويعني انا يا اختي البريدو لكن انا اصلاً ده ما خطر علي بالي وانت جبتي الكلام ده من وين؟؟ انا لاحظته اهتمامه بي شجن وبجيهم طوالي في البيت بي مناسبه او غير مناسبه لكن يا امل البيت بيتو مش بيت عمه؟؟ وقول بيت عمو اعمل الدرب ساساقه ويبتسم صلاح لكلام امل وترد سريعا بتضحك مالك يعني بقيت جامعي خلاص وداير تنسي كلامنا ده. ويبتسم صلاح مره اخري يا بت كلامنا احلي كلام وغرامنا احلي غرام .. آي خمني بالكلام ونسيني الموضوع الجيتك ليه .. ويقاطعها عارفو ..عارف شنو ترد امل والخوف يملؤها وتقول له انت علي كلمك ولا شنو؟؟ وانت مالك هسي اتغيرت انا قلت حاجه وبعدين ياست علي ما كلمني لكن انا حسيت بالموضوع وهو عايز اتكلم بس ..وتقاطعه والله يا صلاح قطعت قلبي عديل كده وعلي داير اكلمك لكن انت عارف انو خجول وكده ..ويضحك صلاح قطعت قلبي دي حلوه يا شافعه انت وتردعليه وقبل ان ترد تسمع صوت امها وهي تناديها وتقف امل يا شافع انت لسع بينا الكلام ويرد والامنيات والتضحيه وامشي لي امي اتوكلي يا شافعه وتخرج امل من الغرفه وهي تبتسم لكلام اخيها وبعد مصارحته بحبها لعلي..... يدخل علي النادي وينظر بين الوجوه التي تجذبها هذه الشاشة الصغيره وهم يقلبون في القنوات التي اصبحت اكتر من الهم علي القلب يبحث عن حامد ومع الظلام لا يستطيع ان يراه فلونه الداكن يخفيه عن عينيه ولكنه يتعرف عليه من ابتسامته العريضه حيث تظهر اسنانه والتي يعرفها علي كما يعرف نفسه تماماً ويضربه علي ضربه خفيفه علي راسه ويلتفت حامد الي الذي يضربه وهو في حيرة من امره ويقول ده منو البايخ ده داير شنو يا زول وعند ما يتبين الملامح جيدا اووووووو ابو علوه يا خي ماتنضم وتتكلم عشان اعرفك هسي لا قدر الله قمت لميت فيك خبت من طرف ويضحك علي قوم قوم كفاك القنوات دي بطشش بيك وين الكوره القلتها ؟؟ اسكت ساي ما منقوله قالوا مشفرنها يعني العندو قروش يشوف والما عندو يتحرق واها الجابك شنو ؟؟ كدي طلعنا من النادي ده اول ونمش الدكان نجيب لينا سجارات ونقعد تحت ضو القمر الجميل ده ونشوف الباقي والحاصل ..

10-24-2007, 00:48 AM

Dr. Faisal Mohamed

تاريخ التسجيل: 06-20-2004
مجموع المشاركات: 1180

للتواصل معنا

FaceBook
تويتر Twitter
YouTube

20 عاما من العطاء و الصمود
مكتبة سودانيزاونلاين

Re: نهاية الاحلام : مسلسل من 36 حلقة (Re: Dr. Faisal Mohamed)
الحلقــ (16)ـــة يخرج علي وحامد من النادي ويتوجهان الي دكان وداعه لشراء السجاير وفي الطريق يقول علي والله يا حامد انا وداعه ده بقيت ما بهضمو وبالجد خايف منو في موضوع خطوبته القاله لينا لو تذكر .. يرد حامد يا علي لنت خايف مالك هو هسي قال داير امل ولا مشي ليهم في البيت حتي.. وانا المخوفني حتة البيت دي يقوم امشي وانا قاعد اتفرج عليهم ولحدي ما ياخد مني اغلي حاجه وبعدين اقعد اندم واتحسر والغبينه تكتلني ..يضحك حامد ويرد اندب حظي ام امالي ولا ويقاطعه علي والله انت فايق ورايق انا في شنو وانت في شنو ياسيدي والله انت غريب وتعمل الضغط ويضحك حامد وبارد يا علي دي مالك ما قلتها ..المهم وصلنا الدكان وادينا المال خلينا نشتري السجاير ونتخارج سريع من وداعه الهوا ده ويخرج علي من جيبه بعض الجنيهات ويا حامد جيب معاك بارد خلي جوفنا المولع ده ينطفي ده كان بنطفي.. وانت ما داخل معاي ولا شنو ؟؟القروش واديتك ليها وبعدين انا ما داير اشوف وداعه ويقعد يلمح في الموضوع واقوم افلت في الكلام امش انت براك وانا بتقدم قدامك... ينادي حاج الزين ابنه صلاح يا صلاح تعال يا ولدي ويذهب صلاح الي والده نعم يا ابوي اقعد ياولدي انا بدور اتكلم معاك لان الظروف ما معروفه وين موديانه وربنا ممكن ياخد امانتو في اي وكت ويرد صلاح امانه ..آي امانه يا ولدي الروح الروح دي امانة ما ملكنا ملك الخالق وحدو سبحانه وتعالي متي ما تتم ايامه بياخده وهو القادر علي اي شئ يا ولدي في شان كده انا بدور اوصيك وافهمك وتسمع حديثي ده كويس وتفهمو وتعمل بيهو ولا مو كدي ؟؟ يا ابوي انت بتشكي من حاجه انا قلت لي امي لازم نوديك الدكتور ..ويبتسم حاج الزين ابتسامة انهكها شقاء السنين وتقدم العمر وهموم الدنيا وهذا الشيب الذي يعلو راسه ويكسو لحيته وشاربه دليل علي تقدم العمر وهم السنون الطويله ..يا ولدي ان شكيت ولا ماشكيت اليوم لما يجي ما بدورلو شكوي ولا مرض..لكن يا ابوي في اسباب ولازم ناخد بيها وفي الامل في الله كبير وما بنقطع ورحمته وسعت كل شئ.. بقولوا ياولد تكتر الاسباب والموت واحد لا انا لا انت لا الحكما بوقفوه بابر ولا بي حبوب المهم يا ولدي الاخيتك وامك ديل ماليهم غيرك وعمك الله يسامحو ليه (18) سنه بره البلد وما عارفين عنو شي في شان كده انت راجل البيت لو الله قدر شي وحصل ودايرك تكمل تعليمك مهما حصل واخيتك لا تجبره علي شي هي ما دايراه وامك دي ما بوصوك عليه ورسولنا قال والكلام ده قريتوه في كتبكم امك ثم امك ثم امك حتين ذكر ابوك ورضا الوالدين من رضا الرب ولا كلامي ده مو صحيح يا جني؟؟ صاح يا ابوي وانا ان شاء الله بعمل بي كلامك وده امر علي تنفيذو .. ويضحك حاج الزين ويكح حتي اغرورقت عيناه يا ولدي نحن مو في الديش ولا ها دي اوامر دي وصية ابوك وان عملت بيها ولا ما عملت انا عافي منك ورضيان عليك في شان كدي ربنا يوفقك وانويلك مرادك آمين يارب العالمين ويردد صلاح خلف والده الدعاء .. لكن يا ابوي لازم نمشي الدكتور عشان اكشف عليك..ياولدي ما بفيدني حكيم والمعالج الله وسيبك من الحديث ده وقوم املا لي ابريقي في شان نمش الصلاة سوي ..حاضر يا ابوي.. يذهب علي وحامد الساحه وهي مكان يقع طرف الحله يتجمع فيه وفي بعض المرات الشباب فكل شلة تتخذ مكانا تجلس فيه ويتسامرون منهم من يبث همومه الي الاخر ومنهم من يغني او يدندن فهي متنفس لديهم من عناء يوم طويل وجهد مضني في الارض والزراعه وبعض الاعمال الاخري.. يا حامد الليله الساحه فاضيه الخلق دي فاتت وين؟ يا علي ما شايف النادي مليان كيف قايلين بنقلوا المباراة واها ريحونا زاته من وجع الراس ده والمهم خلينا نقعد في مكانا العالي داك والحمد لله ما لقينا واحد قاعد لينا فيه كان بطردو طوالي والله يا حامد انت الساحه دي من املاكم ونحن ما عارفين ؟؟ ما عندي شغله بالساحه لكن الحته دي بعتبره ملكي ولو جات اللجنه الشعبيه زاته ما بديهم ليها.. يبتسم علي وهي وينا اللجنه دي؟؟ اقعد وخلينا من السياسه دي اخير منها الكوره ولا ما كدي؟؟ اها ياعلي الموضوع شنو؟ الموضوع وباختصار داير افاتح صلاح في موضوع امل قبل ما يقع الخايف منو واطلبه منو رسمي وكان دعت الضروره بكلم حاج الزين واحسم الموضوع ولا رايك شنو يا حامد؟؟ يا علي انت بتخطب بالصح ولا بالكضب وين مالك انت بتصرف علي البيت وما بتقدر تخطو خطوه كبيره زي دي .. يا حامد خطوبه وبس ماعلاس طوالي كبرت لي الموضوع يعني واتفلسفت وعملت فيها ابو العارفين انت هسي ما جاري ورا سوسن انت ليك الطريق ساهل والحال من بعض يا اخوي.. ويطلق حامد ضحكة مجلجلة يا علي شايفني وديت المال ولا الشبكه دي محاوله وتجربه ان صابت نكمل وان فشلت في 60 انا ما خسران حاجه وبعدين ديل ناس غنيانين وملانين قروش امكن ارفعونا معاهم لي فوق نحن نكون كده لي متين يا اخوي؟؟ يبتسم علي بالرغم من ما يعانيه يعني مصلحه يا حامد ممكن نقول تجاره يا تربح يا تخسر انت بتجيب الافكار البايخه دي من وين يا حامد؟؟من الايام والزمن المجهجه العايشنو ده وبعدين الناس اطورت وعايشه الدنيا دي صاح مش حارسه ليها سراب ووهم وحواشات من زمن الانقليز وهسي شوف الخواجات الكانو حاكمننا بقو وين ونحن وين ؟؟ يا حامد ده كلام القنوات البتشوفو ده طمث ليك الحقايق والواقع النحن فيه وداير تطبقو هنا في حلتنا دي يا خي نحن ناس مسور وخلا واتعلمنا ندي مش يدونا زي ارضنا بتدينا الخير اصلها ما ملت ولا كلت وبدون مقابل بس اصدق معاها بتديك وما بتبخل عليك اها الدنيا دي كدي عيش صادق وامش عديل اصلو ما بتجيك عوجه ولا بتهدك الايام وخليني من البتشوفو في القنوات ديل لا هم زينا ولا عاداتم بتشبهنا والغالب فيهم مقلد اعمي للغرب وسيبك منهم ..يا علي ما تخمني بالكلام ساكت هسي شايفني جاري ورا البسوا فيه ده انا داير اغامر بس مغامره صغيره وانط الحاجز القدامي ده واشوف بي هناك في شنو ..يضحك علي في سوسن قاعده منتظراك ويرد حامد انت يا علي ما مصدقني لسع لكن تشوف انا بكره القريبه دي بسوي شنو ان شاء الله .. يا حامد اريت صلاح لو معانا ويسمع احلامك النرجسيه دي.. نرجسيه ولا سوسنيه يا شباب ولا شنو الحاصل يا علي وحامد .. ويضحك حامد وعلي والله يا صلاح كان طرينا كنز ما بجي ويضحك صلاح لانو داك كنز وانا صلاح عندي كرعين بجيبني والكنز داير تعب وجيوب كبيره عشان يجي وده حسب الواقع مستحيل ولا ماكدي..

10-29-2007, 00:32 AM

Dr. Faisal Mohamed

تاريخ التسجيل: 06-20-2004
مجموع المشاركات: 1180

للتواصل معنا

FaceBook
تويتر Twitter
YouTube

20 عاما من العطاء و الصمود
مكتبة سودانيزاونلاين

Re: نهاية الاحلام : مسلسل من 36 حلقة (Re: Dr. Faisal Mohamed)
الحلقــ (17)ـــة يا صلاح بركه الجيت عشان تشوف الليله حامد بقول في شنو قال داير يتقدم لي سوسن سيد مكاوي سوسن اخت راوي بالله شوف ليك جنس محن علي آخر الزمن ويبتسم صلاح والله يا علي انا زاتي مشكلتي عويصه زي حامد ده ومديت كراعي زياده من اللزوم يعني ما قدر لحافي زي مابقول المثل لكن انا بختلف من حامد اني صارحته شجن ومتفقين وبنريد بعض بالواضح كده اما اخونا ده زي الماش السوق وداير ليه بطيخه وقروشوا بسيطه وما معروف البطيخه دي حمره ولا بيضه .. والله يا صلاح امكن كلامك قريب من الواقع لكن دي مغامره اكبر منو ولا شنو يا سوسن انت ساكت مالك؟؟ يا اخوانه انت ما عايزين تفهموا ولا شنو؟انا قلت محاوله وما بخسر شي يا صابت يا خابت اهو تجربة وخلاص .. لا يا حامد تجربة كيف وانت اخترت سوسن دي مافي غيرها ولا عشان هدف قروش ابوها ولا امكن بتريدها ونحن ما عارفين ؟؟؟ والله يا صلاح انا جني وجن زواج مبني علي مصلحه وكده وانا وبصراحه كده الموضوع من اوله ما كنت جادي فيه وبقولو عن طريق الهظار وملي فراغ واحلي بيه الونسه يعني ممكن نقول حلم الواحد بيحلمو ولمن يصحي بروح ويفوت ويطش بعيد ويتنسي.. لكن يا حامد انت صاحي .. ويرد حامد يا علي اخوي انت ما سمعت بي حلم الصاحي او زي ما بقولوا حلم اليقظه واهو خيال ووهم يعني تكسير وكت وونسه لكن بديت احس ان الحلم ده حقيقه لاني كل ما اشوفه اتجهجه واتكبكب وجسمي يترقط ومعليش علي الركاكه في الكلمات ما انا ما شاعر ولا بعرف اجيب الكلام السمح زيك يا صلاح ولا شنو ..ما عليك يا حامد وكلامك زي امل اختي بتموت في الدارجه بتاعتنا الحلوه دي ..اها يا ود يا حبيب انت كمل الحكايه .. يا علي الحكايه ما فضل فيها شي قلنا حلم وبحاول يفتش لي واقع وانا حاولت ابعد نفسي منها لكن يظر قليبي مابي اها اسوي شنو غير ادق الحديد وهو مولع نار يا حرق يا اطفي ..يا حامد كلامك منطقي واتوكل علي الله لكن اتحمل البجيك وابقي قدر العذاب واحتمال الله يهون وتفرح ونفرح معاك .. يا صلاح ما تعشم الزول ده واصدق كما ن في حلم بقي حقيقه او اتحقق يا ناس خليكم علي قدر حالكم وما تنططوا تقوموا تقعوا لينا ونبقي في البلمكم .. يا علي كل شي وارد وما معروف الدنياموديانه وين .. يرد صلاح والله موديانه لي مجهول والله يسترنا واهون القواسي ويطل ويهل علينا الفرح ز بشاير الخريف الهاله علينا الايام دي والله شموا ريحة الدعاش وان شاء الله ايامنا كلها دعاش.. والله يا صلاح الاحلام حلوه وريحة الدعاش احلي لكن الخوف من بكره ومن النهايه ..يا علي نهاية الدوري الممتاز ولا شنو ويرد صلاح نهاية الاحلام يا حامد ...ونهايته انك تصحي من النوم وتلقي ده كلو حلم في حلم وخليه يا علي النومه بتريحو شويه... ويضحك الجميع ..يا اخوانه انا واقع او حاقع في مشكله ومع نسيبك يا حامد ويضحك علي خلاص بقي عندو نسايب وطبعن اكيد ده راوي .. وهو في غيرو يا علي ويضحك حامد يا شباب راعوا لي مشاعري الولد ده في الحلم نسيبي لكن تصدقوا ده الكابوس البصحيني زاتو يا صلاح ونحن فهمنا مشكلتك مع راوي لانو انا وعلي عندنا خلفيه عن الموضوع .. والله بالغتوا عديل كده انت عارفين وانا ما جايب خبر ونايم نوم.. يا صلاح انا وحامد قلنا ما نشغلك من اوله كده ونخليك امكن ده اكون كلام حله واشاعات وكده.. واها الحل شنو ؟؟الحل عند زولتك شجن لو بتريدك صحي ما بترضي بي راوي ده اصلا وبالمناسبه وانا ماشي النادي لاقيته وقربت ادوره معاه ولو ما ساي صبرت علي كلامو كان عملت مشكله معاه وكما ن يا صلاح سالني منك .. اييييك جابت ليها سؤال كمان.. يا صلاح ما يهمك ولا عليك منو انساه وركز علي شجن دي حلك الوحيد يا اخوي. يا علي انت ما تنسوا دي عندها ابوها وما عندها ام امها الله يرحمها يعني وحيده ودي مشكله.. يا حامد امكن ده في صالح صلاح لانو والده ما بقدر ارفض ليها طلب ولا ما كدي.. يا استاذ علي ودي المشكله الاكبر ابوها لازم يامن ليها حياته ويختار ليها عريس يكون من مستواها يا صلاح وما تفهمني غلط وبعدين ود عمها اولي ونحن في الحله مش بره البلد دي وعاداتنا وتقاليدنا لسع البت لي ود عمها ود عمها مرطب وما ناقصه شي وبعدين الاخوان سيد مكاوي وعمر عبدالله بقولوا نلمهم مع بعض والمال ابقي واحد ودقيقنا في طاحونتنا نوديه بره لي شنو..والله ده جاب ليها دقيق وما تجيب لينا زيت واعمل لينا ذلابيه مع القمره الحلوه دي ولا شنو رايك يا حامد؟ يا علي حامد كلامو يخوف لان قريب من الواقع وامكن اكون ده الكابوس البصحيني انا ويا حامد انا وانت كابوسنا واحد اسمو راوي والله غالب ..يسكت علي قليلا ثم.. شوفوا يا شباب خلوها علي الله بتتسهل ان شاء الله وانا يا صلاح داير افاتحك في موضوع كده يعني والله ما عارف اقول شنو لكن يا ويقاطعه حامد يا علي بتهتهت مالك ما تخش في الموضوع دغري .. ويبتسم صلاح يا علي انا عارف وبعدين امل اكدت لي الفي راسي وابشر ان شاء الله يحصل خير .. وتتهلل اسارير وجه علي وهو لا يكاد يصدق ما يسمع ويرد شكرا يا صلاح وما عارف اقول شنو لكن بتمني ان الظروف تتسهل ويحصل كل خير ان شاء الله ..يعني نقول مبروك يا علي ويا صلاح الله يبارك فيك يا حامد وعقبالك انت وصلاح ويضحك الجميع ويرد صلاح يا اخوانه نحن ساهرنا خلاص نمشي بعدكده ويذهب الجميع الي بيوتهم لعل في الغد اللقاء والامل.................

10-29-2007, 00:39 AM

Dr. Faisal Mohamed

تاريخ التسجيل: 06-20-2004
مجموع المشاركات: 1180

للتواصل معنا

FaceBook
تويتر Twitter
YouTube

20 عاما من العطاء و الصمود
مكتبة سودانيزاونلاين

Re: نهاية الاحلام : مسلسل من 36 حلقة (Re: Dr. Faisal Mohamed)
الحلقــ (18)ـــة يصحو صلاح باكرا ليذهب الي الحواشه لاداء بعض المهام وفي الطريق يلتقي بعلي ويقول له اها يا علي الحواشه كيف الايام دي؟ والله يا صلاح خليها ساي جهجهه شديده ربك يعين ويسهل واها يا صلاح انت المعسكر ما ناوي تمش ما خلاص المعسكرات فتحوها والغياب بضرك مع العساكر ديل وبتعبوك احسن تمش سريع.. والله يا علي اول حاجه انت شايف صحة ابوي وما هاين علي اسيبه وامش وتاني حاجه انا المعسكر ده من اساسه ما ركب لي في راسي لان توقيت زي الزفت مفروض بعد الجامعه في داعي للبهدله دي يا علي اخوي؟ تعمل شنو يا صلاح الالزاميه بقت ملزمه ومن اسمه ظاهره والمهم حاول امشي سريع وما تضيع الزمن.. ويصل صلاح الي حواشته ويواصل علي طريقه الي حواشته لانها ابعد من حواشة صلاح .. يلبس حامد ملابس انيقه ويخرج من بيته وقد عزم علي زيارة سيد مكاوئ ليطلب منه بنته سوسن ويصل الي البيت ويطرق الباب ويفتح له باب الحوش ولاول مره يدخل فيها الي بيت سيد مكاوي فبدا يتلفت يمينا ويسارا وقد اصابته الدهشة مما راي فالبيت كالقصر وهذه الاشجار والزهور الجميله التي تملا المكان وبينما هو علي هذه الحال يفاجأ براوي وهو امامه ويسلم حامد علي راوي وراوي يستغرب لدخول حامد الي البيت ولا يردعليه السلام بل يساله اها يا حامد عايز شنو والجابك لينا منو ؟ويرد حامد شوف يا راوي انا داير اقابل ابوك في موضوع ضروري لو ممكن ..طيب يا حامد ممكن اعرف انت عايز بي ابوي شنو ولا الموضوع سر وما من حقي اعرف؟ يا راوي هسي بتعرف بس اشوف ابوك والقاه ويدخله راوي الي داخل المنزل والدهشة تصيب حامد ويتمتم في نفسه معقول البيت ده في حلتنا التعبانه دي والله انا حقو اتراجع من بنت سيد مكاوي دي ورطه الله يحلني منهاويجلس حامد علي الكراسي الفخمة ويتلفت مرة يمينا واخري يسار ياتي سيد مكاوي : نعم ياولد انت قالوا عايزني في امر هام نعم لاني مش فاضي؟ويتلعثم حامد ويتمتم والله يا سيد مكاوي في الحقيقه كدي انا داير بتك سوسن زوجه انشاء الله ..نعم نعم يرد راوي ويتكلم سيد مكاوي يا ولد اجري بعيد نحن ما عندنا بنات للعرس ولو عندنا بنديك ليها انت انت عندك شنو وكمان داير تتزوج بنتي وانت في روحك شغال شنو يا ود العب بعيد بعيد خلاص ولو سمحت اتفضل اطلع لاني مافاضي ياراوي وصلو الباب قال سوسن قال ويسكت حامد وهو لا يستطيع ان يقول شيئاً ويسخر راوي من حامد ويقول له انت يا حامد شارب ليك حاجه ولا بتحلم وحامد لا ينطق بكلمه الي ان يصل الباب ويقول لراوي معليش وكتر خيركم علي الكلام ده وتشكروا ويرد راوي ياخ امشي شوف ليك واحده تتحملك وتتحمل قرفك وفلسك وده الاهم وينظر راوي الي حامد بكل سخريه ويسد الباب في وجهه لقد طرد فكيف الانتقام وكيف ردة الفعل كل هذه الاسئلة بدات تدور في راسه وماذا يفعل والي من يشكي ما يعانيه؟؟؟؟

10-29-2007, 00:49 AM

Dr. Faisal Mohamed

تاريخ التسجيل: 06-20-2004
مجموع المشاركات: 1180

للتواصل معنا

FaceBook
تويتر Twitter
YouTube

20 عاما من العطاء و الصمود
مكتبة سودانيزاونلاين

Re: نهاية الاحلام : مسلسل من 36 حلقة (Re: Dr. Faisal Mohamed)
الحلقــ (19)ـــة خرج حامد من منزل سيد مكاوي والحسرة تكاد تقتله وعينيه تدمعان من شدة العذاب واللوعة والحرقه ورغم رفض طلبه فلم رفضاً فقط بل اهانة وتحقير وطرد فاختفت تلك الفرحة التي كانت تعلو تقاسيم وجهه وتلك المعالم الافريقية القاسيه بدت باهتة واصبح كانه مريض لسنين عديده وغابت ابتسامته وواصبح هائماً في الزقاقات الصغيرة بالقرية ولا يدري الي اين يذهب لقد كان في حلم جميل وظن ان الحياة سهلة وان تحقيق الحلم بسيط وممكن ولكن صحي من حلمه علي كابوس رهيب افزع وبدد احلامه الورديه فالي من يلجألا يوجد غيرهم صلاح وعلي نعم مافي غيركم بيقيف معاي ويواسيني انا لازم القاكم الليله ان شاء الله ... صلاح يعود الي البيت ويذهب الي ابيه ليطلعه علي مافعل بالحواشه وتاتي لهم امل بالقهوه يا امل ادي ابوي الجبنه وانا بجي اشربه مع امي بعد شويه كده وتقدم امل الجبنه الي والدها وتذهب ..اها يا ولدي عملت شنو في الحواشه وان شاء الله زرعته الشلابي بالعدس وابو عشرين انا قلت في لوبه معلقه فوق في مرق المخزن ان شاء الله زرعتها باقي بتنفع البهايم والله يا ابوي زرعته الشلابي وابو سته لكن اللوبه بكره ان شاء الله لا خلاص كويس يا ولدي الا لكن القطن احسن تجيب ليك عمال معاك في شان تحشو سريع وتديه الملح انت راجيك معسكر ياولدي قضي عملك سريع خلاص وامش علي قرايتك وانا ان شاء الله باكر بمش علي حواشتي ويقاطعه صلاح يا ابوي انت ما تشيل هم الحواشه انا بخلص شغلي فيها وبعدين بمش المعسكر ان شاء الله بس انت ريح روحك وعاين لي صحتك وبس يا ولدي الجاي ما قدر الفات وان لينا عمر بنتمو وان الله رايد العافيه بتجي وقوم علي امك وشيل معاك الجبنه وخليهم اجيبوا لي البركه.. يجلس صلاح الي امه ويتحدث اليها في شان والده يا امي انت ابوي ده اقنعيه بان الحواشه لو مشي ليها بتعب وصحته ما مستحمله اكتر من كده .. يا ولدي انا تعبت من ناهدة ابوك وقوة راسه ولا في زولاً بقدر عليه في شان كدي خليه بي راحته ..يوما راحة شنو دي والله ابوي حيرنا ... صلاح اسمع كلام امي وابوي خليه بي راحته وانت يا امل اسكتي ساي انت عارفه شنو انت لسع شافعه وما جايبه خبر للدنيا ..انا السنه الجايه ممتحنه تقول لي شافعه والله الا كان شافع انت لانك ما بتشوف وعامل فيها كبير البيت كمان والله امشي لي ابوي واسحب منك البساط وتضحك الام علي كلام ابنائها وتقول لي امل قومي يا بت ودي البركه لي ابوك ويشرب صلاح قهوته ويذهب الي غرفته وما هي الا لحظات ويسمع طرقا علي باب غرفته ويضحك يا امل خشي وبطلي لياقتك دي اها شفتي انت فعلن شافعه ولسع بدري عليك ويتفاجأ صلاح ان من يطرق الباب شجن وليست امل ويقوم صلاح من كرسيه تاركااوراقه المبعثرة علي المنضدة الصغيره يداعبها الهواء الذي يدخل من احدي النوافذ الصغيره ويقول والله يا شجن انا قايلك وهنا تدخل عليهما امل وتضحك علي اخيها والذي بدت عليه علامات الخجل والفرح في آن واحد طوالي داير ترمي فيني الكلام وتبسم لها صلاح يعني ما قاعده تعمليها ما طوالي مجناني وتبتسم شجن وهي تحمل بعض الكتب في يدها وتخرج آمل مدعية بانها سوف تحضر شيئا لشجن وتجلس شجن بجانب السرير وتنظر الي صلاح نظرة ملؤها الشوق والشجن ويبتسم صلاح ابتسامة بريئة جميله وتبادله شجن الابتسام وتلك الوجنتين الجميلتين التين تزينان خديها تحكيان معني الجمال والحب الذي يحمله قلبها الصافي ويتكم صلاح اخبارك يا بت وين من اليوم داك ما تسالي ولا اي حاجه معقوله اهون عليك كده وتقاطعه وانت ما تسال يا صلاح ولا عبرتني ولا جيتني. والله كويس يا بت اجيك وين انا بقدر اخش بيتكم ولا حتي اجي بي عنده؟؟ وتضحك شجن يا خواف انا ما قايلاك خواف للدرجه دي معقوله يا ود ويبتسم صلاح لكلامها ويرد يا ود كمان بالله شوف شفع آخر زمن وشايله كتبك يعني نبدأ الشرح ولا شنو ؟وتنظر اليه بخجل واضح وهي تعلم انها لا تريد ان تشرح الآن ولكنها حجة لكي تخرج من البيت او سبب ومبرر حتي لا يمنعها ابوها من الخروج ولكن هل تظهر الي صلاح هذا الحب الذي جعلها حتي ان تكذب علي ابوها لا لن تظهره فبناتنا وان ماتت سوف تموت وهي كاتمة لمشاعرها ما لم يبادلها هو الاحساس ويبوح لها بكل شئ هكذا حال مجتمعاتنا ..يعني ما رديت لكن انا عارف الجواب ما هو باين من عنوانو وحمرة الخدود دي من شنو وهنا تزداد خجلا فالكلام في هذا المجال يشعر البنت بالخجل وكذلك الاولاد فعلاقاتنا والحمد لله تعتمد علي الاحترام والعفة هكذا تربينا علي الاخلاق فكلامنا وان ذبنا عشقاً ووجدا وهوي يكون في حدود المعقول وهكذا حال القري والريف في بلادي ..ولا تستطيع شجن رغم ما تحمله من وله وحب لصلاح با ن تنطق ولو بحرف واحد ويجلس صلاح مقابلا لها ويهمس بكل شوق وحنيه والله يا شجن بريدك وما كنت بتصور حياتي من غيرك والله كان حا تكون لا ليها طعم ولا اي شئ لكن انت نورتيها وخليتيها تنبض من جديد مع انو ا لدنيا دي مشاكلها كتيره لكن عشانك تهون كل المشاكل وتتسهل كل الصعاب وان شاء الله اواصل في ريدك للنهايه ما انت يا ست شموس الكوم منايا وليك بسافر من قليل الزاد مسافر وبي غنايا ونوصل الشمس البعيده ونبقي عيده للنهايه عشان كدي عايزك تعاهديني نكمل المشوار سوا ونقيف سوا ونعاند الظروف الظالمه دي وتخرج الحروف من فمها بصوت رقيق تعتريه حشرجة الحب ورعشة الفؤاد الذي تزيد ضرباته مع كل دقيقه انا يا صلاح مالي غيرك وبحس اني من غيرك حياتي وهم وعدم وانا بعاهدك علي عهد الريد ان شاء الله ونمشي المشوار مع بعض كل عمرنا ان شاء الله...........

10-29-2007, 00:56 AM

Dr. Faisal Mohamed

تاريخ التسجيل: 06-20-2004
مجموع المشاركات: 1180

للتواصل معنا

FaceBook
تويتر Twitter
YouTube

20 عاما من العطاء و الصمود
مكتبة سودانيزاونلاين

Re: نهاية الاحلام : مسلسل من 36 حلقة (Re: Dr. Faisal Mohamed)
الحلقــ (20)ـــة ان شاء الله يا شجن ما يحصل فراق ما الحياة من غيرك بتقبي عدم انت بهجته وفرحته وبيك بتم السعاده ..حيلك يا شاعر ما تاخدني بالكلام يا صلاح ويقاطعها ياريت اقر اطوع الحروف عشانك لكن والله في عينيك بس حا اقيف وحا تهرب مني لانها اصعب عليها تديك وتوفيك حقك عشان كده كل ما اقول اكتب فيك تهرب وتندس مني صدقيني يا احلي شي في وجودي وكوني وتبتسم له شجن فليس امامها سوي ان تبتسم امام هذا الدفق والوله والحب والعشق المجنون.... يدق الباب وحاله تغني عن سؤال يا علي ياعلي وترد ام علي يا ولدي خش علي ده مافي طلع قبل شويه ..طيب يا حاجه ما قال ماشي وين؟؟ والله يا ولدي ما قال لي لكن امكن مشي لي اصحابه .. ويذهب حامد هائماً علي وجهه ويتجه نحو بيت صلاح عله يجد اصحابه ورفقاء الدرب والاحلام... وتقف شجن مودعة الحبيب وتقول له طيب يا صلاح انا والله بعد كده اتأخرت ولازم امشي البيت .. يا شجن نحن بتين قعدنا مع بعض ويا عالم تاني اشوفك بتين اقعدي كمان شويه واشربي ليك حاجه والله انا نسيت ما جبت ليك اي حاجه ..لا يا صلاح ما مشكله زي الشربته يكفي اني شفتك ..الله عليك وعلي كلماتك والحروف الطالعه منك والله بتنقط عسل والله يخليك لي لكن انا ما شايف امل خالص يا شجن والله غريبه.. غريبه في شنو انا لما جيت قالت لي طالعه مشوار وجايه وبتكون جات هسي المهم انا امشي بعد كده لاني اتاخرت .. خلاص اذا المشي بريحك انا ما بقول ليك لا ..زعلت ولا شنو يا صلاح انت عارف ابوي يا صلاح مفروض تتفهم وضعي ..ويبتسم صلاح والوجه تعلوه مسحة حزن علي فراقها ويرد عليها والله انا فاهم الوضع وخايف منو كمان وخاصه ود عمك وانا سمعت كلام كده ازعجني وخوفني هم في هذه الاثناء خرجاء من الغرفه وترد عليه شجن انا غيرك ما عايزه وان شاء الله احارب الدنيا دي كلها المهم نكون لي بعضيا صلاح وان شاء الله انا قادره اتجاوز الحته دي ويطمئن صلاح لكلامها ولكن يساوره الخوف من المجهول وما يحمله الغد ويفترقا عند الباب وتذهب شجن مباشرة الي بيتها ويقف صلاح في منتصف الطريق والحيرة قد اكلت كل عقله وتفكيره حتي انه لا يدري الي اين يذهب .. مافي غير امشي لي علي واشوف الباقي ويذهب صلاح مباشرة الي علي في بيته ليبثه اشجانه ... وماهي الا لحظات ويصل حامد الي بيت صلاح وعليهلاعياء والهم والتعب ويدخل الي البيت مباشرة ويسلم علي ام الخير يا حاجه وين صلاح ان شاء الله موجود في الاوضه هناك خلاص انا امشي ليه..يا ولدي امهل في الكلم الليله مالك يا عشاي ماك زي عوايدك وشك مختوف وتعبان نعل ماك عيان يا ولدي ؟ لا والله بس اليومين ديل الشغل كتير ومضغوطين شويه والله يا ولدي الله يصلح حالكم ويدكم العافيه والعيشه الهانيه وبت الحلال الطيبه وراضيه ..امين يا حاجه لكن في الزمن الصعب ده يا والده الله يسترنا اها يا ولدي صلاح ده مرق بي شويه من جيتك وكانت معاه بنية عبدالله ود عمر بنية طيبه وعديله ..خلاص لو جا هنا تاني قولي ليه حامد جاك هنا وهو عارف بلقاني وين ومع السلامه .. الله يسلمك يا ولدي لكن ما تخش لي جوه وتشرب معانا الشاي ..لا شكرا اصلي مستعجل شويه ويخرج حامد وهو يضرب كفا بكف ويتمتم انا اليوم الدايرم فيه القاهم مافي وين طفشوا الليله ؟؟ انا امش الساحه كان عرفوني جيتم بجوني هناك........ يصل صلاح الي بيت علي ويدخل ويسلم علي ناس البيت ويسال علي وين يا جماعه ..وترد ام علي هو ما معاك ..لا والله ما جاني ..أجي!! فات وين عاد لان حامد جا يسال منو وانا قلت ليه امكن اكون جا عليك يا صلاح ويرد صلاح والله اتلاقينا قبيل ونحن ماشي علي الحواشه وتاني مالاقيته المهم ان جا قولي ليه صلاح جاك هنا ..خلاص يا ولدي لكن ما شربت معاي الشاي ما بتفوت والله عامله شاي اعجب والقنانه كان بتشم ضاربه البكان ادخل اشربو وبعدين امش علي اصحابك الهاملين ديل ويبتسم صلاح وليس امامه الا ان يشرب كباية الشاي فام علي ان زعلت زعله شين وحامد لم يدخل لذلك زعلانه منو وقالت لي صلاح هو ما اداني فرصه بس سلم وجري في درب صاحبه ... علي يجلس متاملا السماء والنجوم والقمر هذه الايام طلوع والي جانبه تجلس حسناء الحله وزينتها كما تقول لها امها انها امل وحياة علي التي ملات عليه قلبه هياما وحبا وريد ما بعد ريد وشوق ما بعد شوق وبدا الحبيبان ينثرن الكلمات عبير وزهور يبوح كل واحد منهما بحبه ومدي حبه واشواقه ويغرقا في الحلم الجميل والآتي من ايام العادة والهناء فيقول لها علي تعرفي يا امل ريدك محفور جواي ومن بدري جدا لكن كنت خايف منك ما تبادليني الشعور ده وكل ما اقول اقرب منك اخاف وابعد انا وعيت علي ريدك وفتحت بيه وبحلم بيك ليل وصباح والله دايما معاي وما بتفارقي خيالي ولا فت دقيقه يعلم الله ويشهد وترد عليه ببسمة تظهر تلك الفلجة التي تختبئ خلف تلك الشفاه التي ترتجف خجلا وحبا وترتعش معها الاصابع في حنان وترد بصوت فاتر من شدة الخجل وكانها ليست امل تلك التي تناكف صلاح وتقف له في الرايحة والجايه ولكنها امام الحب ومن تحب تتلعثم الكلمات وتخرج من تلك الشفاه الجميله وهي لا تكاد هي نفسها تسمعها انه الحب والوجد اجمل احساس وخاصة عندما يزينه الصدق والوفاء والاخلاص فهذه درجلت الكمال في الحب وكل ما كانت المشاعر رقيقة ومرهفة تدفقت سحرا ونبعا لنهر لا يجف ولبحر لا يرتوي فهذا هو الحب والريده العفيفه والجميله..وترد مل يا علي انا من زمان دايره اقعد معاك وما متخيله في يوم القي بيك او حتي اتكلم معاك انت بتجي لي صلاح وبتقعدوا بعيد يا طلعتوا علي طول وكل ما تجي احس بي قلبي دقاتو تزيد واكون في حاله ما عارفه ليها تفسير لكن برتاح لمن اشوفك وبحس بي سعاده بتنزل علي ولحدي وكت قريب ماعارفه احدد او اعرف ده شنو البحصل لي كل ما اشوفك ..ويبتسم علي ويسالها وطيب هسي عرفت الحاله دي من شنو وهو بكل تاكيد يعرف اجابة السؤال لكنه يريد ان يسمعها وان تصارحه اكتر واكتر فكلمة حب اوريده لا يمل الحبيب سماعها ويتمني ان يسمعها كل لحظه وفي اي وكت فهي زاد القلب والاطمئنان والامان والدفء وموسيقي الروح ..وتحمر خدود امل من الخجل وتنظر الي الارض دون ان تتكلم ويردد عليها علي اها كلامي ما دايره تجاوبيني عليه فترد وهي لا تزال تنظر الي الارض لما يجي الوكت المناسب يا علي لكن تاكد اني ب...وتسكت امل كاد لسانها ان يوقعها ولكن تتدارك الموقف بسرعة وتقف متاهبة لتعلن انتهاء للقاء بين الاحباء وينهض علي ما كنت تكميلها ولا انا ما بستاهله وبعدين بدري علي المشي .. يا علي ما تفهمني غلط انت لو ما بتستاهله انا ما كان قعدت معاك وصارحتك.... بي كل شي في دواخلي وبعدين انا اتاخرت.. خلاص اقدمك لي البيت وترد مقاطعة لا لا يا علي انت داير ناس الحله بكره اتونسوا بينا انا بتقدمني فرحه وانت تصبح علي خير وانت من اهل الخير يا احلي امل يا امل حياتي وتذهب امل مسرعة دن ان ترد عليه لقد امتلات فرحا وخجلا ...........

11-27-2007, 11:25 PM

Dr. Faisal Mohamed

تاريخ التسجيل: 06-20-2004
مجموع المشاركات: 1180

للتواصل معنا

FaceBook
تويتر Twitter
YouTube

20 عاما من العطاء و الصمود
مكتبة سودانيزاونلاين

Re: نهاية الاحلام : مسلسل من 36 حلقة (Re: Dr. Faisal Mohamed)
الحلقــ (21)ـــة يخرج علي من بيت خالته وبعد ان يود ع امل ويتوجه الي البيت وفي الطريق يصادف عوض سيوبر وينادي سيوبر يا علي تعال دقيقه يا خي لو سمحت ممكن تديني حق السجاره والله من الصباح ما نفست لي نفس واحد وراسي داير يضرب عديل كده ويرد علي خلاص انا ماشي بالدكان تمشي معاي واشتري ليك السجاره كده معقوله وكتر خيرك لكن نصيحتي ليك صاحبك صلاح احسن ينسي البت دي انا شفتها الليله طالعه من بيت حاج الزين ومقدمه لي عندي الباب والله ابوها اشوف امسح بيه الارض واسالني انا من النوعيه دي وما تشوف البهدله الفيها انا دي ده كلو بي سبب العينه دي وحاجه تاني صاحبك حامد انا الليله شايف كمان طالع من ناس سيد مكاوي انت اصحابك ديل جنوا ولا شنو ما تفهمونا الحاصل ؟؟ انت متاكد يا عوض انك شفت حامد وهو طالع من بيت سيد مكاوي ؟؟يعني انا قالوا ليك مطشش ولا مودر والله الراس ده يوزن بلد بي حاله بس البلد دي ضيقه وما بتقدر وسيبنا وصلنا الدكان قول لي الكلب وداعه اديني علبه كامله وعشان تاني ما يطردني انا عوض انطرد طردة الكلاب يا وداعه الكلب انت قايل روحك بتغني بي طريقتك دي وهسي ادينا صندوق كامل سجاير والحساب عند الاخ ده .. ويرد وداعه كلب انا يا ... ويتدخل علي ياوداعه اديه العايزو وده حسابك ويذهب علي مباشرة الي البيت ويترك سيوبر ووداعه وهم يتلاعنون وكل يسئ الي الآخر.... يصل صلاح الي البيت وعند وصوله تحدثه امه بان حامد اتي الي هنا وسال منه ..يا امي بتين جا هنا وما قال اي حاجه؟؟ ما قال شي يا ولدي غير ان قال لي هو عارف بلقاني وين ويخرج صلاح سريعا وتنادي عليه امه يا ولدي الشاي جاهز تعال اشرب وبعدين امش لي صاحبك ويرد بعدين يا امي بعدين ..ويتجه مسرعا الي علي فعله يجده معه .. ويصل علي الي البيت ويسال يا اخوانه حامد جا هنا ولا ما جاني وترد امه جا يا ولدي وشكله مهموم وكمان صلاح برض جاك وحت كمان شرب معانا الشاي ..اذن الموضوع فيه ان واخواتها معناتو كلام سيوبر صاح وتقاطعه امه يا ولدي بتقول في شنو والله حديثك ما فرزته فوقو شي تب ..لا يا امي مافي حاجه انا امشي ليه وامكن اتاخر شويه لا تتاخر يا ولدي بنرجاك بالعشا وات عارف الليله عامله ليكم لقمه بي طماطم وان اتاخرت بتبرد وما بتتاكل ليك ..خلاص يا امي كتريها انا بجيب معاي صلاح وحامد ونتعشي سوي ..خلاص أعشاي سمح تب بكتره .. ويخرج علي من البيت وعند الباب يلتقي صلاح والله الحمد لله اللقيتك ياصلاح انا ماش لي حامد .. يرد صلاح والله انا زاتي ماشي عليه لانو جاني في البيت وانا برض جاني هنا وبعدين سيوبر قال لي كلام خوفني وقلق بي ..سيوبر وكلام الحاصل شنو ياعلي فهمني ؟ انت عارف حامد مشي لي سيد مكاوي واكيد الامور انقلبت عليه وده تحليلي اجيني في البيت وامش ليك انت طوالي مش غريبه؟؟الغريب شنو يا علي نحن ما طوالي مع بعض وبنمش لي بعض وبعدين سيوبر ده مصلح اكون وما جايب خبر ..طيب يا صلاح انت الليله مش كانت معاك شجن وقدمتها للباب ؟؟ ومنو القال ليك ؟؟ سيوبر ..هو انت سيوبر ده اشتغل علينا مراغب ولا شنو؟؟ المهم يا علي نشوف الود حامد ونفهم الحاصل عليه ونمش عشان نكسب الزمن .. طيب نمش عشان الليله يا صلاح راجيانا عشوه كاربه خلاص ومعزومين معاي لقمه بي مويه ولا رايك شنو يا صلاح؟؟ الله يا علي لي منها زمن ما اكلتها والله اشتهيته عديل كده واشتهيته دي ذكرتني الشاعر الجميل ازهري محمد علي : اشتهيت افرد ضفيرتك للمطر واحقن وريدك بالدعاش واكتفيت افضل اريدك اندهاش او الوز بي نفسي عنك يا مدهشه انا وين افوت منك امش ؟؟ يا ولد انت نحن هسي في شنو وانت في شنو يا صلاح؟؟؟ يا علي الشعر والكلمات الحلوه دي هي البتنسينا عذابنا وجراحنا وتخلينا نعيش عشان بكره وبكره بنحكي الشوق للذكري نار الريد الغابت تظهر ونار الريد الغابت تظهر ...بكره يا صلاح مليان خوف وكفانا احلام واهو حامد اكيد صحي من حلم لكن اظن قام مخلوع وطار الحلم بعيد.. يا علي ما تبقي متشائم علي طول كده خلي عندك شوية امل يا امل انت ويبتسم علي لسماع اسمها ومن من اخوها صلاح وهو لا يكاد يصدق ويصلان الساحه واذا بحامد تظهر في ظلمة الليل تلك اسنانه فالقمر هذه الايام طلوه يخرج متاخرا وكانه علي موعد ولا يريد من النجوم ان تفضحه........... (عدل بواسطة Dr. Faisal Mohamed on 11-27-2007, 11:29 PM)

11-27-2007, 11:37 PM

Dr. Faisal Mohamed

تاريخ التسجيل: 06-20-2004
مجموع المشاركات: 1180

للتواصل معنا

FaceBook
تويتر Twitter
YouTube

20 عاما من العطاء و الصمود
مكتبة سودانيزاونلاين

Re: نهاية الاحلام : مسلسل من 36 حلقة (Re: Dr. Faisal Mohamed)
الحلقــ (22)ـــة يجلس علي وصلاح الي جوار حامد والذي تبدو عليه ملامح الاعياء والفتر ويساله صلاح يا حامد الحاصل شنو وصحي الكلام القالو سيوبر انك كنت في بيت سيد مكاوي ؟؟يرد حامد بصوت فاتر اي حاجه سمعتوها صاح ..ويقاطعه علي نحن دايرين تشرح لينا الحصل كلو ولا تنقص منو حرف واحد يا حامد ..القصه بسيطه انا قلت امشي واتقدم للبت دي واشوف البحصل شنو ويقاطعه علي نحن ما قلنا ليك ما تمشي ولا تفكر في الموضوع من اساس لكن انت ويقاطعه صلاح يا علي خليه يكمل القصه وبعدين ده ما وكت المحاسبه والكلام ده ويواصل حامد سرد القصه الدراميه دون حتي ان يعير علي ادني اهتمام وبعد ما وصلت البيت ودقيت علي الباب الناس ديل ما زينا نحن بنخش علي اي بيت لا بندق ولا بننتظر اسمحوا لينا بالدخول واقف اكتر من ربع ساعه واتفتح الباب وشفت النور وحاجات عجيبه زهور وشي اعرفو وشي ما اعرفو وقابلت طوالي الزفت راوي وقلت ليه داير ابوك في موضوع وطبعن استفذاني لكن ما اهتميت لي كلامو ودخلت علي ابوه والتقول قلت ليه داير اشنق بتك ولموا فيني نبذ وطردوني من البيت وراوي كمل علي الباقي فيني ..وانت ما رديت يا حامد ؟؟ والله يا علي ولا كلمه ما قلتها سكت بس واتخارجت ويا رباً تلمني في اي واحد منكم وانت ما شاء الله لقيتكم ويرد صلاح والله نحن متاسفين يا حامد لكن خطوه زي دي علي الاقل تدينا خبر ونحن الليله في الخلا من الصباح ..كلام صلاح يا حامد ميه الميه وانت الركبت راسك في الموضوع ده ونحن قلنا ليك مستحيل لكن نعمل ليك شنو اها في النهايه رجعت لي كلامنا.. يا جماعه افهموني انا في لحظه حلمت الحلم الجميل ده وسرحت معاه زي حمار النوم لما يشيل الواحد لو موديه النار بمشي وراه اها انا كنت زي الشايلني حمارالنوم ده وداني بيتهم وكمان طلبت ايده ..لكن حمار النوم ده بجي للزول الغرقان في النوم انت ما صاحي ونصيح بترمي روحك في النار كيف؟؟وانا فرقي شنو من النايم وغرقان في النوم انا غرقت في حبها فجأة وحسيت ان ممكن اصل ليها رغم الفوارق الكبيره والشوابيرالبيني وبينه .. والله يا حامد بقيت فيلسوف مره بالعربي الفصيح ومره بالدارجي ..نعمل شنو يا صلاح ده كلو عشان اطلع الجواي وافضفض وارتاح والله انهد حيلي وروحي وانا طالع منهم قلت بتطلع هسي والريق ابلع فيه بيا لطيف وحالتي كانت زي الزفت ... ما عليك يا حامد انسي وعيش اصلة دي حال الدنيا وانا وصلاح اهو جمبك وان شاء الله نطلعك من الانت فيه ده .. ويدندن صلاح ما اصلو حال الدنيا تسرق منيه في لحظة عشم ندمان انا ابدا وحاتك عمري ما شلت الندم وانا عندي ليك كان الفرح رغم احتمالي اساك يا جرح الالم كان خوفي منك جاي من لهفة خطاك علي المواعيد الوهم واهو نحن في الاخر سوي باعنا الهوي وماشين علي سكة عدم وبقيت اغني عليك غناوي الحسره والاسف الطويل ويجد صلاح ان حامد وعلي يرددون معه مقاطع الاغنيه في حزن عميق وشديد ونبيل ويقاطع علي الاغنيه ويقف علي حيله يا جماعه ننسي وما في غير الواحد انسي ولا عندكم راي غير الراي ده؟؟ يا علي ننسي دي مستحيل قول نتناسي او نصهين ونضرب طناش لي اي حاجه بتزهج وتعكر الصفاء بتاعنا ده .؟. والله يا صلاح كلامك في محلو ونخلي الايام تسوي الدايره لي نحن نعذب روحنا معاها ومع القدر ؟؟طيب بمناسبة الطناش دي والتناسي ده نمشي بيتنا اصلها الحاجه الليله ظابطه لينا لقمه بي مويه كاربه ومنتظرانا وعامله حسابه اننا نجي كلنا ومافي واحد اتزاوق وانت عارفين امي كان زعلت .يرد صلاح الله لا جاب زعل ورايك شنو يا حامد ؟؟انا ما عندي راي تب في بطني دي وبباريها محل ما تمش الله اكبر عصيده كيف افوته وارحكم طوالي النلحق ويضحك الجميع والي بيت علي لتناول العشاء........

11-27-2007, 11:55 PM

Dr. Faisal Mohamed

تاريخ التسجيل: 06-20-2004
مجموع المشاركات: 1180

للتواصل معنا

FaceBook
تويتر Twitter
YouTube

20 عاما من العطاء و الصمود
مكتبة سودانيزاونلاين

Re: نهاية الاحلام : مسلسل من 36 حلقة (Re: Dr. Faisal Mohamed)
الحلقــ (23)ـــة وبعد ان يتعشي الجميع ويخرجوا الي الشارع لتوديع بعضهم فالساعة تشير الي العاشرة مساء يمازحهم حامد والله الليله عشوة الحاجه دي كاربه وتنسي الواحد همه ويضحك الجميع ايوه يا حامد الدنيا دي ابتسامه بسيطه ليه نعقده ويرد صلاح يا علي ابتسامه صعبه ما بتطلع بالساهل بعد الروح تمرق عديل كده ..يا صلاح ما تشيل هم نحن ما بيدنا نغير حاجه .. لكن ياعلي انا خايف من الجاي وزي حلم حامد ما صحي منو بي كابوس اظهر ده مصيري انا برض وربنا اهون علينا .. يا جماعه تصبحوا علي خير انا راجيني شغل كتير بكره في الحواشه ...طيب ياعلي مع السلامه وانا وحامد بنتقدم شويه اها طيب مع الف سلامه وتصبحوا علي خير.... يصل صلاح الي البيت ويودع حامد بكره ان شاء الله نتلاقي يا حامد ويرد حامد ان شاء الله يا صلاح بكره اللقاء ..ويدخل صلاح الي البيت وينادي علي امل وترد امل في شنو ياصلاح مالك اتاخرت كده الليله ما من عوايدك والعشاء جاهز اجيبو ليك لا يا امل انا اتعشيت مع علي وكان معانا حامد اها ابوي اتعشي ؟ والله يا صلاح ابوي الليله قال ما عايز عشا .. ومالو بس مايكون حس بي حاجه ؟ والله يا صلاح شكل عادي لكن ماعارفه انا ما مرتاحه لي وضع ده ونحن ما عارفين الحاصل عليهو شنو..طيب انا امشي ليه واشوف الحاصل .. يا صلاح تمش وين ده نايم نوم شديد وامي كمان نامت من قبيل ورفعت ليك العشا في المشلعيب وقالت لي لو جا اخوك نزليه ليه وخلي يتعشي وامرقي ليه العنقريب و فرشيه كويس شايف يا سيدي الاهتمام بالباش مهندس كيف..ويبتسم صلاح ويتوجه الي عنقريبه والنسيم يداعب تلك الملاءة برفق وكانه يغازلها ويجلس وتجلس الي جواره امل ..يا امل انت الليله ما ناويه تنومي ولا شنو الحاصل وبعدين انت قبيل رحت وين اكيد لي فرحه والمؤكد انك لاقيتي علي هناك ؟؟ وانا قاعده عشانك انت يا ود ؟؟ ايوه اللقي احباب وتقاطعه امل يا ود انا غيرك انت وامي وابوي ما لي وما ببدلكم بي اي واحد مهما يكون الله عليك انا بضحك معاك وانت عارفه مكانتك يا حنينه انت وتبتسم امل خلاص تصبح علي خير يا حنين انت يا عسل ..شوف البت الكلام بقي ينقط عسل خلاص يا بت خلينا ننوم بكره ان شاء الله راجيني شغل كتير وتذهب امل والفرح يملؤها من كلام اخوها ويرقد صلاح ويتمدد علي العنقريب ويعدل من وضعية المخده ويريد ان ينام ولكن الافكار والهموم تسرق النوم من عينيه وهو يحاول ان يتجاهل ما قلته امل عن ابوها ورفضه للعشاء وبدا الخوف يتسلل فجاة الي صلاح محاولا تجاهله ولكن هيهات وصورة شجن لا تبارح خياله ومشكلة حامد وهي ليست بعيده من واقعه وما سوف ياتي وفجاة يدركه النعاس ويستسلم للنوم... يغرق صلاح في حلم غريب ويصحو فجاة علي صوت امل وهي تبكي والدموع تتلالؤ علي وجنتيها مع ضوع القمر ويقف صلاح مزعوراً ويسال امل في شنو يا امل وتر بصوت اجش تكاد الحروف تموت حين تنطقها وتخرج باكية حائرة وهي تبكي ابو يا صلاح ما عارفه الحاصل ليه شنو في حالة غيبوبه وماعارف حتي الجنبو منو والكلام يطلع وما مفهوم اسرع امي قالت ليك شوف لينا عربيه سريع تودينا المستشفي ويذهب صلاح وكان الدنيا كلها القت بهمومها علي قلبه وينظر الي والده والدموع تنزل كالمطر وينظر اليه والده وكانه يريد ان يقول له شيئا ولكن تقف الكلمات ولا تخرج ويسرع صلاح الي بيت احد السواقين بالقريه ويوقظه ليذهب بوالده الي المستشفي وينهض السواق متفقداً عربته ويخرج هو وصلاح ليحملا حاج الزين الي المستشفي والدنيا تسود اما صلاح والعربه تنهب في الطريق وانوار العربات الاخري التي تظهر بين الفينة والاخري وكانها تنزرهم باشاراتها الحمراء بان يسرعو هيا اسرعوا ...........

[رد على الموضوع]

صفحة 1 „‰ 1: << 1 >>

احدث عناوين سودانيز اون لاين الان

اراء حرة و مقالات	Latest Posts in English Forum
Articles and Views	اخر المواضيع فى المنبر العام
News and Press Releases	اخبار و بيانات

الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة

About Us
Contact Us
About Sudanese Online

اخبار و بيانات
اراء حرة و مقالات
صور سودانيزاونلاين
فيديوهات سودانيزاونلاين
ويكيبيديا سودانيز اون لاين
منتديات سودانيزاونلاين

News and Press Releases
Articles and Views
SudaneseOnline Images
Sudanese Online Videos
Sudanese Online Wikipedia
Sudanese Online Forums

If you're looking to submit News,Video,a Press Release or or Article please feel free to send it to [email protected]