|
|
 روزا 30 راكب ..قصة مغترب
|
القصة منقوولة..
(سليمان) يعمل محاسباً بإحدى الصرافات بأحد بلدان الخليج ، منذ أن تم التعاقد معه وقام بإستلام عمله كانت خطته واضحة وهى العمل على إدخار أكبر قدر من (الريالات) حتى وإن أدى ذلك لتخفيض المصروفات التى أولها النزول فى إجازات سنوية ، لذلك فقد مكث خمس سنوات متتالية قبل أن يقرر السفر عائدا فى أول إجازة سنوية له يقضيها بين أهله وذويه .
ما أن وصل (سليمان) فى أول إجازة له حتى تقاطر عليه الأقارب والأصدقاء للسلام والتحية وإمتلأ صالون المنزل حتى فاضت جنباته بالزوار الذين كان يقوم بخدمتهم وإحضار البارد والساخن لهم (إسماعيل) شقيق زوجته الذى كان يعمل سائقاً بإحدى المصالح الحكومية قبل أن يتم الإستغناء عنه ، ما أن تناقص عدد الزوار حتى طلب (إسماعيل) من (سليمان) أن ينتحى به جانبا .
--------------------------------------------------------------------------------
روزا 30 راكب :
بعد مقدمة طويلة حاول فيها (إسماعيل) أن يكون حديثه فيها منمقاً ومقنعا قام بتخفيض صوته كمن يود أن يقول سراً خطيرا :
- والله عندى ليك يا (سليمان) مشروع خطير شديد ممكن يربحك (200%)
- مشروع شنو ؟
- روزا .. بس روزا 30 راكب تشغلا الكلاكلة السوق الشعبى .. ثم مواصلا .. تعرف بتجيب ليك فى اليوم كم ؟
- (فى بلاهة) : ... كم؟
- بالميت كده بعد ما تطلع حق الجاز والكمسارى والسواق (اللى هو أنا) ممكن تطلع ليك ميت ألف جنيه!! فى اليوم.
- طيب لو كده الناس دى ما مفروض كلها تشترى (روزات) !!
- ما أصلو إنت ما شفت (الروزات) فى (الشهداء) و(السوق العربي) واقفة بالميات كيف؟
- والروزا دى بى كم ؟
- يعنى حسب حالتا .. ممكن بى 40 أو بى 50 مليون تمنها بيعتمد على حاجات كتيرة.
- زى شنو؟
- يعنى أورنيك واللا مرخصة .. معدلة وإلا جاية عديل !!
- والفرق شنو بين معدلة وجايه عديل ؟
- الفرق إنو مرات الحافلات دى بتكون أصلها دركسون يمين وبعدين بيقلبوها دركسون شمال عشان كده بيقولو عليها (معدلة) وتمنها بيكون أرخص من العديلة !!
- خلاص يا إسماعيل خلينى أفكر فى المشروع ده كم يوم كده وأديك النتيجه !!
عاد (سليمان) للجلوس من جديد مع ضيوفه وزواره بينما تغيرت ملامح (إسماعيل) وبدا على وجهه شئ من التفاؤل والإرتياح وبعد أن توقف سيل الزوار والمهنئين بسلامة العودة الذى إستمر حتى وقت متأخر من الليل نام الأولاد وجلس (سليمان) مع زوجته يتسامران وما لبثت أن إبتدرت (ليلى) النقاش وكأنها على علم بما دار بين (سليمان) وشقيقها (إسماعيل):
- أها مشاريعك شنو؟ لازم الإجازة دى قبل ما ترجع تعمل ليكا حاجة هنا تجيب ليها قروش يعنى نظام إستثمار وكده ... الناس المغتربة دى كلها عندها هنا حاجات ومشغلا قروشا!
- والله ما عارف لكن (إسماعيل) أخوكي قال ليا الحافلات دى كويسة وبتدخل قروش ما بطالة.
- والله قالو كده، هسع (مجدى) راجل (إخلاص) أختى ده فى سنه واحدة بس نزل الحافلة التانية !! وكل يوم شوف عينى دى يجى (السواق) يسلمهم ميت الف !!
- خلاص كدى خليني أفكر فى الموضوع اليومين الجايات ديل
لم ينتظر (إسماعيل) اليومين (الجايات) فعندما إستيقظ (سليمان) من النوم فى صباح اليوم التالي متجها نحو (الحمام) رأى (إسماعيل) ينتظره فى الحوش وهو يجلس على السرير وأمامه (كباية) شاى :
- شنو يا سليمان مالك صاحى متأخر كده ؟ البلد دى لسه ما وقعت ليك؟
- بس أمبارح الحقيقة ساهرنا شوية
- أها فكرت فى الموضوع ؟
- أفكر لكن متين يا (إسماعيل) ؟ الكلام ده ما قلتو ليا أمبارح بالليل .. لكن وكت إنت مصر عليهو ومتأكد منو مافى مشكلة نمشى نفتش لينا حافلة نشتريها .
بعد يومين قضاهما سليمان برفقة إسماعيل بين (الكرين) و(الدلالة) ومعارض السيارات تم شراء حافلة روزا 30 راكب أورنيك بمبلغ 45 مليون جنيه دفعهم (سليمان) عدا نقدا بينما كان (إسماعيل) يجلس على مقعد السائق بعد أن قام بوضع شريط (حفلة كارب) على المسجل أحضره معه خصيصا .
نسبة لإنشغاله فقد ترك سليمان لإسماعيل مسألة القيام بإجراءات تجهيز
الحافلة من ترخيص وتأمين وترخيص (خط) وخلافه.. وكذلك القيام بمهمة البحث عن (كمسارى) الذى قام إسماعيل بحلها وذلك بتعيين ابنه (عصام) الذى رسب مؤخرا فى إمتحانات الشهادة السودانية .
خرفان للعيد :
لم تمض أيام قلائل وبينما كان المنزل يعج أيضا بالزوار المهنئين بسلامة الوصول طلب (خليفة) جار سليمان فى الحى ورفيقه منذ الصغر أن ينتحى به جانبا وبعد مقدمة طويلة حاول فيها (خليفة) أن يكون حديثه فيها منمقاً ومقنعا قام بتخفيض صوته كمن يود أن يقول سراً خطيراً :
- والله يا سليمان عندى ليك مشروع سريع وخطير.
- شنو؟
- تعرف أصلو الضحية قربت فحقو نسافر نجيب لينا خرفان (حملان) من ناحية (الضعين) والله قالو ليك هناك الخرفان رخيصة جنس رخصة ونجى نربيهم وللعيد يكونو (إتدوعلو) وبقو تمام التمام !!
- لكن يا (خليفة) أنا إجازتي خلاص قربت تنتهي وما بقدر أسافر
- ما ضروري أنا بقوم ليك بالمهمة دى (من وإلى) أنا ح أمشى أسافر وإشترى ليك البهائم وأختهم ليك فى (قطعتي) الفاضية دي و(أعلفهم) ليك ولحدت ما تجى الضحية يكونو (سمنو) وبقو حاجة تمام أقوم أبيعهم وأديك الربح - مواصلا- ما تشيل أى هم للحكاية دى
- والخروف هناك بى كم كده ؟ أقصد (الحمل) يعنى؟
- والله فى حدود 100 الف كده
- وتفتكر نشترى كم؟
- والله إنت وقدرتك لكن طبعا كل ما كانو (كتار) أحسن عشان الترحيل
اصلو ح ندفعو ح ندفعو !!
- خلاص تعال ليا بكرة بكون مشيت البنك غيرت ليا شويت قريشات.
محلات آيسكريم :
لم تمض ايام قلائل بعد سفر (خليفة) لإحضار (الخرفان) وقبل أن يتم ترخيص الحافلة من قبل (إسماعيل) وبينما كان (سليمان) فى زيارة منزل شقيقته (أمونة) ليقوم بوداعها بعد أن قام بالحجز على الطائرة المغادرة بعد يومين إذ بزوجها (كمال) ينتحى به جانبا وبعد مقدمة طويلة حاول فيها (كمال) أن يكون حديثه فيها منمقاً مقنعاً قام بتخفيض صوته كمن يود أن يقول سراً خطيراً :
- والله عندى ليك يا (سليمان) مشروع خطير شديد ممكن يربحك (200%)
- مشروع شنو ؟
- شفت محل (الآيسكريم) الفى الناصية بتاعتنا ده.
- لا ما لاحظت ليهو
- ده فتحو واحد صاحبنا والله قال ليا ببيع فى اليوم بى ميتين الف.
- معقولة؟
- كيف ما معقول المنطقة دى بتاعت مدارس وجامعات والأولاد ديل جنهم آيسكريم.
- لكن طيب وكت هو فتح محلو ده هنا نحنا نفتح وين؟
- برضو هنا ... بس بعيد منو شوية؟ صدقنى الحتة بتستحمل محلين تلاتة كمان عشان الناس كتار.
- وطيب إيجار المحل والمكنات والأثاث.
- أثاث شنو؟ ده (تيك أوى) يعنى لا بيكلفنا ترابيز لا كراسي لا حاجة الزول بس يشيل آسكريمو ويمشي !!
- والحاجات دى كلها بى كم؟ يعنى المشروع بيكلف كم؟
- والله أنا كنت عملت ليهو دراسة جدوى كده لقيتو بى إيجارو ومكناتو فى حدود خمسه وعشرين مليون كده !!
- طيب خلاص عشان أنا مسافر بعد بكرة وما عندى زمن أغشاني نمشي نشترى المكنات بكرة وبعدين إنت أجر المحل وجهزو بى طريقتك.
وافق (سليمان) على تمويل تلك المشاريع التى تم عرضها عليه وذلك ثقة فى أمانة أقربائه وجيرانه ولرغبته بأن يكون لديه مشروعات وعمل خاص بالوطن وكذلك لأنه كان يرى أن فى ذلك مساعدة لهم.. وغادر أرض الوطن بعد أن تأكد له تماما أنه قد ترك ثلاثة مشاريع (خطيرة) وذات عائد (خرافي) تمثلت فى مشروع تربية الخرفان وبيعها قبل عيد الاضحى ومشروع الحافلة الروزا ومشروع (نسيبة) كمال الخاص بمحل (الآيسكريم)
موضوع محرج شوية :
بعد أن عاد (سليمان) إلى موطن إغترابه كان على اتصال دائم بمديري المشاريع الثلاثة لاستطلاع الأخبار فكان صوتهم يأتيه مجللا بالفرح مؤكدين ان الأرباح تجاوزت المخطط بكثير ومضى العام فى لمح البصر . ما أن وصل (سليمان) فى إجازته حتى تقاطر عليه الأقارب والأصدقاء للسلام والتحية وإمتلأ صالون المنزل حتى فاضت جنباته بالزوار الذين كان يقوم بخدمتهم وإحضار البارد والساخن لهم (إسماعيل) ما أن تناقص عدد الزوار حتى طلب (إسماعيل) من سليمان أن ينتحى به جانبا وبعد مقدمة طويلة حاول فيها (إسماعيل) أن يكون حديثه فيها منمقاً ومقنعاً وقد علت وجهه مسحة من الخجل والحزن معاً قام بتخفيض صوته قائلاً :
- هو فى موضوع ..... محرج شوية
- خير إن شاء الله
- والله أصلو الحافلة ...
- مالا ؟ صدمت ؟
- لا ما صدمت لكن ..
- لكن شنو ؟ حصل ليها شنو؟
- أصلو كان مرة أشتريت ليا زيت مكنة مغشوش من السوق قام (صلب) المكنة.
- طيب ما إتصلت فينى ليه عشان أرسل ليك مكنة ؟
- قلت ما أزعجك وإتصرف، قمت إشتريت ليا مكنة جديدة بالدين (شيكات وكده) على أساس أسدد قيمتها كل شهر شيك بى 500 الف.
-أها وبعدين؟
- بعدين كنت ماشي السوق الشعبي شايل ليا (فردة) قام دخل فينى (إسعاف) لجن الحافلة من قدام.
- والغلطان منو؟
- غلطان (الإسعاف)
- وما يصلحو ليك (الحافلة)
- لا لأنو قالو أى زول يعمل (حادث) مع إسعاف (الزول) هو الغلطان !!
- وعملت شنو ؟
- قمت شلت تااني كم مليون كده من الزول الشلت منو (المكنة) - برضو بالشيكات- صلحت بيها الحافلة وبديت أشتغل لكن الظاهر (عمود النص) والجربوكس الصدمة بوظتهم.
- طيب ما كان تمشي تشيل من الزول القاعد تشيل منو؟
- أبى يديني عشان ما سددت ليهو
- أها وعملت شنو
- فكيت اللساتك الأربعه والاسبير قلت أقوم أرفعا وأبيعهم أشترى بيهم (عمود نص وجربوكس) وأجهزا ولمن تجي نشتريهم تاني وننزل الزلط .. لكن
- لكن شنو ؟
- ختيتهم فى بوكس عشان أوديهم السوق الشعبي سيد البوكس (زاغ) بيهم.
- وعملت شنو؟
- فتحت بلاغ ضد مجهول وكل يوم طالع ونازل مع ناس (المباحث) لحدت ما شويت القروش العندى القاعد إتحرك بيها كملت.
- وبعدين؟
- وقفتها قدام البيت قام الشماسة بقوا ينوموا فيها وقطعو المقاعد كلها
- وبعدين ؟
- بعتها بى حداشر مليون أديت الزول العشرة مليون الشلتهم منو والمليون الفضل أهو ده !! وده الدفتر فيهو الدخلتو والمنصرف !!
لم تمض أيام قلائل.. وبينما كان المنزل يعج أيضا بالزوار المهنئين بسلامة الوصول حتى طلب (خليفة) جار سليمان فى الحى ورفيقه منذ الصغر أن ينتحى به جانبا وبعد مقدمة طويلة حاول فيها (خليفة) وقد علت وجهه مسحة من الخجل والحزن معاً قام بتخفيض صوته قائلاً :
- هو فى موضوع ..... محرج شوية
- خير إن شاء الله
- إتصور يا (سليمان) إنو نص الخرفان ماتت قبل ما نبيعها بيومين
- إيه ؟! ماتوا كيف يعني؟
- أمر الله..... مرض معدي
- أنفلونزا الخرفان ؟
- لا (نزلات مائية) !!
- طيب والنص الثاني ؟
- الحمد لله لحقتهم قبل ما يموتو ويحصلو ديلك وقمنا بعناهم كلهم بنصف السعر.
- كيف يعنى ما فاهم ؟
- نحنا مش كان إشترينا مية خروف الواحد بى ميت الف ؟ صاح؟
- أيوة صاح
- يعنى يبقى المجموع كان عشرة مليون .. أها والترحيل والعلف والحاجات دى إتنين مليون يبقى المجموع إتناشر مليون؟ صاح؟
- أيوه صاح.
- طيب خمسة مليون ده تمن الخرفان الماتو .. دى خلاص إنتهت ..ومليونين ونص ده تمن الخرفان البعناهم بى نص القيمة لمن نطرح منهم الإتنين مليون بتاعة (العلف) والترحيل يكون فضل ليك الخمسميت ألف دى ... اهو ده الدفتر أنا كاتب فيهو أى حاجة ..
____________ التوقيع _____________
من لــــــي بإنســــان إذا أغضبته**** وجهلتُ كان الحلمُ ردَ جوابه
وتراه يصغي للحـــــــــديث**** بطرفه وبقلبه ، ولعـــــله أدرى به
أطلب قلبك عند ثلاث مواضع
عند قراءة القرآن وفي مجالس الذكر
وعند خلوتك بينك وبين الله
فإن لم تجده
فاسأل الله أن يمنحك قلباً
۩ اللهـــــــــــــم صلي وسلم على سيدنا محمد وعلى آله وصحبه أجمعين ۩
|
|
 
|
|
|
|
|
|
|
|
Re: روزا 30 راكب ..قصة مغترب (Re: Mohammed Ibrahim Othman)
|
فى اليوم التالي دق باب الشارع ليجده (كمال) شريكه فى محلات الآيسكريم والذى بعد أن جلس لمده دقائق بين ضيوف المنزل الذين أتوا مهنئين (كمال) بسلامة العودة حتى طلب (كمال) من سليمان أن ينتحي به جانبا ... إنقبض قلب (سليمان) بشدة وهو يحس ان (القصة) تتكرر مرة أخرى وبعد مقدمة طويلة حاول فيها (كمال) أن يكون حديثه فيها منمقاً ومقنعا وقد علت وجهه مسحة من الخجل والحزن معاً قام بتخفيض صوته قائلاً :
- هو فى موضوع ..... محرج شوية
صرخ (سليمان) وهو يتوقع الكارثة الجديدة :
- موضوع شنو كمان !!! الحكومة منعت أكل الآيسكريم؟
- الحقيقه لا .. بس
- بس شنو؟ خير إن شاء الله
- إنا قفلت المحل
- ليه
- والله لمن بدينا كنا قاعدين نبيع كويس لكن بعد شوية ...
- بعد شوية حصل شنو؟
- الشارع كلو فتح محلات (آيسكريم)
- وإنت ما قلت الشارع بستحمل محلين تلاتة والناس كتار والطلبة والمدارس وشنو ما بعرف !!
- أيوه مع الناس الفتحت دى لكن برضو كنا بنربح.
- طيب قفلتو ليه؟
- ما أصلو ما كنا عملنا الرخصة وما دفعنا الضرائب، وكمان ناس الزكاة طالبونا، ورسوم النفايات إتراكمت علينا وكمان الكهرباء والموية والإيجار كان لازم نسدد الحاجات دى كلها
- وسددتها من وين؟
- ما كان فى طريقة إلا نقوم نبيع المكنات والجنريتر والديكور - مواصلا- إنت كنت أديتني خمسطاشر مليون ونص صاح؟
- أيوه صاح
- ( وهو يناوله الدفتر) كل حاجة مكتوبة بالمليم... الحاجات السددناها كلها من إيجار وضرائب وشنو وشنو سبعة وعشرين مليون ونص يعنى كده أكون عاوز منك إتنين مليون ونص بس انا ح أتحملهم لأني السبب.
كسرة :
وأنت تسير فى برندات (شارع الجمهورية) سوف يتجه نحوك شخص نظيف لا تبدو عليه أى علامات غير طبيعية سوف يستوقفك قائلاً :
- هو فى موضوع ..... محرج شوية
لا تعتقد أنه يود ان يتسول ......... إنه (سليمان).
...
منقووول ...
| |
|
|
|
|
|
|
|
|
|
سيناريوهات : موضوع محرج شوية (Re: Abdelmuhsin Said)
|
سيناريوهات : موضوع محرج شوية
رمضان كريم ...
وكل عام وانت بخير
الأخ الفاتح يوسف جبرا كاتب هذا السيناريو الجميل أحد اعضاء هذاالمنبر
فلك وله التحية ....
وشكرا لنقلك هذا السيناريو الرائع والذي يعكس تمسك الكثير من المغتربين بما تبقى من أصول السودان القديم والثقة في كل فرد...
استودعك الله واتمنى أن تسامحني ان بدر مني ماكدر صفوك ... فأنا لا اقصد ... غير الإشارة للكاتب وأنه جزء منا بهذا المنابر ... وربما أنت لم تلتفت لمقالته هذه من قبل
فلك الشكر
| |
|
|
|
|
|
|
| |
Mohammed Ibrahim Othman
Abdelmuhsin Said
othman mohmmadien
عمار يس النور
Mohammed Haroun
فيس بوك
تويتر
انستقرام
يوتيوب
بنتيريست