|
|
|
 Re: الفكي اب تلفون...........علي وزن الفكي اب جردل (Re: الزبير صالح الزبير)
|
الزبير اخوي كل سنة وانت طيب , الحقيقة انا دخلت هنا من باب الفضول علماً
ان العنوان فعلاً علي وزن الفكي اب جردل , لكن لو كان غيرتا اسم الموضوع
كان بيكون احسن , لزوم إستقلالية والقصة والله جميلة ومشوقة جداً وانا كنت
ساكن في الحلة الجديدة , يعني موضوعك ده شداني شديد خالس وخاصة شمار
الفلسطيني عرس ولا لسعة !!!!!
طريقة سردك جميلة ومشوقة واصل وإنشاء الله بكرة كل الناس تقراء ليك .
| |
 
|
|
|
|
|
|
|
|
Re: الفكي اب تلفون...........علي وزن الفكي اب جردل (Re: هاشم أحمد خلف الله)
|
هاشم اخوي
شكرا ليك علي الاطراء
انا سكنت فترة طويلة في الحلة الجديدة الشارع الورا ديم سلك جنب دكان عوض الكريم وكنا جيران ناس السني وقريبين من الفرن.
الحقيقة انا ما قدرت انتظر عودة الفلسطيني لانو زوجتي نقلوها بلد تانية واضطريت استقيل وامشي معاها وكان الوقت ضيق ما قدرت انتظرة عشان ادوها ايام بسيطة ولازم تستلم في الموقع الجديد ولمن مشيت الرياض راجع مشيت الشركة ولقيت انو حصلت تصفية للموظفين وكان اخونا الفلسطيني من الراحو فيها ومشيت لية البيت وهو ساكن في عمارة كبيرة جدا فيها يمكن عشرة طوابق ومن النوع الكل طابق فية مائة شقة ديك(العمارة اسمها برج الصالحية علي طريق الملك فهد في الرياض الفيها حراج الكمبيوتر عمارة ضخمة جدا وهي عبارة عن حلة كاملة فيها التقول عشرة اسانسيرات ) المهم مشيت ما عرفت الشقة وسالت قدر ما سالت ما قدرت اعرف الشقة بي وين والله عدة مرات ومرة مشيت سالت عن واحد صاحبة شغال في المطلق للأثاث كنت اتعرفت بية عن طريقة مشيت لقيتة نقلوة المصنع في الدمام. يعني بحثت عنة عشان الشمار كاتلني انا زاتي بس زي الملح وداب. والوقت داك الجوالات كانت عزيزة وما عند اي زول زي هسةوحتي التلفون الثابت كنا بنشترية بقروش كتيرة وما متوفرة
| |
|
|
|
|
|
|
|
|
|
Re: الفكي اب تلفون...........علي وزن الفكي اب جردل (Re: الزبير صالح الزبير)
|
الأخ الزبير مرحب بيك عضو في بورداب الرياض وانشاء الله نتقابل , انا شغال في
وزارة الخارجية السعودية في الرياض وهاك تلفون عملي
4055000 تحويلة 5657/5658 وجوالي 0564155973
يشرفني أتعرف عليك , والحلة الجديدة وقعها كبير في نفسي لاني اتولدت فيها
جنب خلوة الفكي عبيد وعلي فكرة الراجل جدنا بالحسابات المعقدة .
| |
|
|
|
|
|
|
|
|
|
Re: الفكي اب تلفون...........علي وزن الفكي اب جردل (Re: الزبير صالح الزبير)
|
| Quote: المهم الراجل دة قبل يرجع الشغل انا قدمت استقالتي لاني وجدت شغل في مدينة تانية ومن ديك ما عارف عرس البت والفكي شاف شغلة ولا الحصل شنو بالضبط لية ولم اسمع منو او بية بعد داك |
بعد النهاية البايخة دي كمان ليك عين تسأل: | Quote: يا جماعة البوست دة ما في زول هبب لية لي شنو ما عاجبكم ،دة لزوم نرفعة فوق وكدة |
مافي زول هببو ليك!!
ياخي ما تحمد ربك الناس ما طالبت بكري بفصلك!!
شغلك دا ضد البرمجة العقلية والنفسية للناس!!
عندك مثلاُ أخوك أسامة أنور عكاشة في ليالي الحلمية لما فرق بين على البدري وزهرة في الجزء الأول طاردته اللعنات لغاية ما اضطر يرجعهم لي بعض في الجزء الرابع!!
تقول لي مافي زول هببو لي!!
في السريع كدا تمشي الرياض، رفح، تل أبيب المهم تلقى لينا الزول دا وتعرف النهاية السعيدة، ولو كانت ما سعيدة تنجر ليك وحدة سعيدة.
في زميل/ة (فضل حجب اسمه) قال لي "الزبير صالح الزبير دا بقيت أشوفو عشرة صالح عشرة
| |
|
|
|
|
|
|
|
|
|
Re: الفكي اب تلفون...........علي وزن الفكي اب جردل (Re: Ashraf el-Halabi)
|
يا حلبي شكرا ليك
والله في البداية كدة شفقتني وقلت الراجل دة عاوز يزرزر فيني مشيت لية وانت انسان رجعي وبتاع فقرا وكدة ولكن ليك علي انا افتش اشوف الحكاية دي انتهت كيف ولو ما كانت نهاية سعيدة ادخل اول منجرة قريبة مني وانجر ليكم واحدة سعيدة.
عارف انا لغاية خمسة ستة سنين كدة كنت كل يوم تقريبا بتذكر الموضوع دة وتاني تب غاب من بالي لغاية ما شفت بوست الفكي اب جردل اتذكرت صاحبي الفكي اب تلفون قلت اشارك زملاء المنبر بالموضوع دة
| |
|
|
|
|
|
|
|
|
|
Re: الفكي اب تلفون...........علي وزن الفكي اب جردل (Re: الزبير صالح الزبير)
|
أخ الزبير تحية طيبة
القصة لطيفةوالسرد شيق و ممتع جدا
لكن اسمحلي بتعليق
ماقام به أب تلفون و دفع المهندس للإسراع بالرحيل يبدو كنوع من السحر الأسود او الإستعانة بالجن السفلي أو شيئ من هذا القبيل
وهذه الأمور من الخطورة بمكان
لن أفتي فيما ليس لي به علم ولكن يا حبذا لو لجأت لأهل العلم و استفتيت عن مدى شرعية الأمر وسلامة موقفك
| |
|
|
|
|
|
|
|
|
|
Re: الفكي اب تلفون...........علي وزن الفكي اب جردل (Re: ALazhary2)
|
alazhary2
سلامات عارف واحدة من الاسباب التي دعتني الي الاتجاة عكس السياسة والكورة وقلت خلينا في الدمبوشي(الفكي باللغة السعودية الدارجة)هو محاولة البعد عن الجرادل والبستلات والكيزان والمفاريك.وهنا بضمن انو ما في واحد بيجيني ناطي ويقول لي ايها العنصري الحقير ولا حاجت زي دي.
ولا رايك شنو
تحياتي
| |
|
|
|
|
|
|
|
|
|
Re: الفكي اب تلفون...........علي وزن الفكي اب جردل (Re: الزبير صالح الزبير)
|
!!!
يا زول أفتيناك وقلنا ليك نهايات (قن وذ ذا ويند) دي حامضة علا راسك قوي وما بتسمع الكلام
حصل شفت ليك مسلسل ولا فيلم (ناجح) البطل ما عرس فيهو البطلة!؟
يا حبيب أخفس ليك يومين من المنبر وتعال راجع وأنجر: "قضيت اليومين الفائتين في البحث عن صديقي الفلسطيني حتى عثرت عليه في المؤسسة التجارية التي يمتلكها، والتي أطلق عليها اسم (أبو عمار للتجارة) وعمار هذا هو أبنه من حبيبته ديك التي كتفها له الفكي أب تلفون، بلا بلا بلا بلا...
وهكذا، تسترزق إنت وبوستاتك تبقى في الوش وبكري يربط ليك مرتب شهري وشيخك أب تلفون كمان يسترزق ويبقى اسمه أب ستلايت وبرشه داك يكون بقى موكيت ولا سجاد عجمي ومن البياض التحته يكون ارتفاعه مترين من الواطـة.
لكن حكاية | Quote: المهم الراجل دة قبل يرجع الشغل انا قدمت استقالتي لاني وجدت شغل في مدينة تانية ومن ديك ما عارف عرس البت والفكي شاف شغلة ولا الحصل شنو بالضبط لية ولم اسمع منو او بية بعد داك |
دي بتجيب أجلك ككاتب منبري.
| |
|
|
|
|
|
|
|
|
|
Re: الفكي اب تلفون...........علي وزن الفكي اب جردل (Re: MOHAMED EL-BEELI)
|
| Quote: صاحبك اب تلفون ده يكون بعد شركات الأتصالات الكتيرة دى عمل ليهو موبايل |
محمد البيلي سلامات معليش للتاخير كنت مشغول وبرة المدينة اليومين الفاتو ديل
سمعت من تحت تحت انو واحد من المستثمرين الجداد ديل سمع عن ابو تلفون دة ومشي ليهو الدمازين واقنعوا انو يتشارك معاة ويعملو شركة المستثمر بقروشو والفكي بمجهودة وقالو ليك فتحو شركة كبيرة كدي واعلاناتها قالو ليك اكتر من اعلانات سوداتل زاتها وبقي الدفع بالعملات الحرة والحجز لتلاتة شهور لقدام ما بتلقي ، وقالو ليك الحجبات يدوهم ليك في علب زي علب الغويشات البدوك ليهم في محلات الصياغ اما المحايات في قزازات مخصوصة كدة زي حقات الكريستال
وعارف عملو قسم خاص لخدمات ما بعد البيع يعني بعد كم يوم كدة من تشيل محايتك وبخراتك تتصل عليك واحدة صوتها ناعم كدة تقول ليك
- الو كيفنكم
- الحمد لله معاي منو
- هنا شركة الفكي ابو تلفون انت مش فلان الكنت عندنا يوم الخميس الفات
- اي انا زتي في حاجة
- لا بس الشيخ عاوز يعرف الحجاب الاداك لية خلص ليك موضوعك ولا لا
- والله لغاية هسي ما شايف حاجة
- انت الظاهر لي نظرك ضعيف
- قلتي شنو
- لا ما في حاجة قصدي انت عملت القالو ليك بالضبط يمكن غلطت في حاجة
- لا ما غلطت هو قال لي قبل ما ادخل البيت اقول الكلام الحفظني لية وبعدين اخت الحجاب تحت المخدة وانوم عليها يومين وبعد دا بشوف نتيجة كويسة ولكن لغاية هسي ما في نتيجة.
- انت وريني دخلت بيتكم كيف
- يعني شنو ما فاهم
-يعني كيف دخلت بيتكم .
- والله فتحت الباب ومشيت لا جوة زي العادة
- لا يا اخي ما دة الغلط الانت عملتو كان لازم تدخل بكرعيك الاتنين وتكون في اللحظة ديك في نملة كراعا مقطوعة تكون بتعاين ليك .
هسي يا محمد انت تشوف الاعلانات الفي الشوارع دي وتشيل رقم التلفون وتتصل تحجز ليك مواعيد ولو لقيت ليك عرقلة ولا حاجة عترت ليك كلمني اتوصت ليك عشان انا زبون قديم بيعملوا لي خاطر.
بعدين منبر شنو البيكون ابو تلفون مشترك فية دة عمل لية صفحة ويب خاصة بية وبيدي باصويرد لهدية لزبائنة عشان يتواصلوا معاة وكمان عشان يشوفو التطور الحاصل في المجال دة والجديد شنو.
| |
|
|
|
|
|
|
|
|
|
Re: الفكي اب تلفون...........علي وزن الفكي اب جردل (Re: Ashraf el-Halabi)
|
اشرف اخوي كيفنك
نهايات ذهب مع الريح دي ما لينا يد فيها هسة شوف معاي المثل الضربتة بتاع زهرة وعلي البدري لمن انتبة عكاشة لكلام الناس وانو زعلانيين منو عشان خلاهم في سكتين مختلفتين وحبة يلمهم تاني لقاهم اتغيروا زهرة نمبر ون الحباها علي البدري ما هي زهرة العرسها لان القلم في يدو لصقهم لبعض رغم انهم ما هم نفسهم (عاوز اقول ليك دي قصة من وحي الخيال الكاتب ممكن يوديها شمال ويمين زي ما هو عاوز لكن انا حكيت ما حصل دون تدخل من جانبي في ناحية الوقائع) عشان كدة جات النهاية كدة.
اتاخرت عليك بسبب المشاغل اسفين.
| |
|
|
|
|
|
|
| |
الزبير صالح الزبير
هاشم أحمد خلف الله
فيصل محمد خليل
Ashraf el-Halabi
سلمى الشيخ سلامة
حيدر حسن ميرغني
محمد البشرى الخضر
ALazhary2
MOHAMED EL-BEELI
فيس بوك
تويتر
انستقرام
يوتيوب
بنتيريست