دعواتكم لزميلنا المفكر د.الباقر العفيف بالشفاء العاجل
|
|
 يا ناس الجمارك اومن له تجربة في استيراد مواد تشطيب لبيته
|
سلامات
قبل كم يوم نشر بوست في الموضوع دا كتبت اسئلة لم اتلقى رد..ولم اجدالبوست الان..
سؤالي هل هناك جمارك على مواد البناء واذا نعم كم وكيف تحسب
وهل هناك نظرة خاصة لو الزول مغترب يدفع كل الاتاوات؟
اذا في زول جاب مواد تشطيب من خارج السودان اريد ان اعرف تجربته..
وهل تستحق ام نشتري من الداخل..
المواد المعنية ابواب ادوات صحية وبلاط..لطابق واحد 200 مترمربع
email
[email protected]
مع التحية
|
|
 
|
|
|
|
|
|
|
 Re: يا ناس الجمارك اومن له تجربة في استيراد مواد تشطيب لبيته (Re: د.نجاة محمود)
|
الاخت نجاة لك التحية وصباح خير
انا الايام دي في نفس الدوشة دي وبالتاكيد هناك جمارك على كل شئ ، بالنسبة للبلاط بما ان كميتك 200 متر انصحك بالشراء مباشرة من السودان لان الجمارك عالية
الاسعار في السودان :
سيراميك راس الخيمة المتر 61 جنيه وسيراميك سالومي 76 جنيه والمصري 50X50 يتراوح بين 120-135 البورسلين الصيني 60X60
اعتقد افضل تشتري من السودان
| |
|
|
|
|
|
|
|
|
|
Re: يا ناس الجمارك اومن له تجربة في استيراد مواد تشطيب لبيته (Re: أيمن محمود)
|
سلام للجميع
اعتقد ان بعض الاخوة اوردوا كثير من الايجابيات مثل:
الجودة وكثرة المواد المعروضة وامكانية توافق الاسعار حسب المقدرة وسهولة الترحيل يعني في خلال شهر يمكن استلام الاغراض ( من دبي ).
السلبيات اوجزها في الجمارك ، من خلال تجربتي اعتبرت المواد تجارية على الرغم من تقديم كافة المستندات من شهادة بحث وتصديق البناء والاوراق التي تثبت الاستعمال الشخصي للاغراض ، كل هذا لم يساعد على الاعفاء من الجمارك.
غايتو الا الاجاويد يدخلوا عشان يحلوا جزء من مشكلة الجمارك لكن كلها الله اعلم...
سلام
| |
|
|
|
|
|
|
|
|
|
Re: يا ناس الجمارك اومن له تجربة في استيراد مواد تشطيب لبيته (Re: سليمان القرشي)
|
تحياتي يادكتورة
تجربتان مع مواد البناء والتصدير من السعودية لغرض الاستعمال الشخصى
الأخيرة
2 برميل برستيك زنة الواحد 75 ك تقريبا بها مواد بناء (8) لفة سلك ، مفاتيح ، أفياش ، بلكات ، 5 مراوح شفط ، شحن بحري ميناء عثمان دقنة دفعت 1800ج ، أراه معقول كان ذلك في رمضان 1434هـ
الأولى
حاوية بها كميات كبيرة من السراميك فوق 400 م م ، أسلاك كهرباء ، مرواح ، لمبات مع اسكسوراتها ، ثلاجة ، مكيفات فريون 2 ، سجاد ، سخانات عدد (4) ، أطقم حمامات كاملة مقاعد افرنجي عربي ، شاور ، ألخ الجمارك كانت 38 ألف ، والمكتب المخلص 5 ألف ... الكلام ده كان في أبريل 2013 م ...
ألحيطة والحذر واجبة لا إعفاء ، لا شهادة بحث ولا خرائط ولا تصاريح بناء نفعت ...
مع العلم تم الشحن بموجب (مقولة) الاستعمال الشخصى وشهادة البحث وتصريح البناء ضروري .. للأسف لا فائدة دفعنا وسكتنا
الشفيع إبراهيم
| |
|
|
|
|
|
|
|
|
|
Re: يا ناس الجمارك اومن له تجربة في استيراد مواد تشطيب لبيته (Re: Alshafea Ibrahim)
|
الأخت نجاة ...سلام
نصيحتي ليك تشتري كل مستلزماتك من السودان ..ماعدا الأشياء ال ممكن تجبيها معاك (صحبة راكب)...للأسباب دي
1/ بعد رفع القيمة الجمركية لكل الواردات ثم رفع قيمة الدولار الجمركي.
أصبحت تكلفة البضاعة مضاعفة ...فمعظم التجار عندهم بضائع في المخازن..
بالقيمة القديمة ...ومافي قوة شرائية تسمح ليهم بالبيع بالاسعار الجديدة ..لذلك
اسعار البضاعة الموجودة في السوق اقل من تكلفتها (الآن)
2/ما في حاجة في الجمارك اسمها استعمال شخصي ..طالما حاجة جات في
حاوية ..التعريفة الجمركية تطبق عليها بالمليم..
3/التجار لأنهم بيشتروا كميات كبيرة ..أسعارهم بتقل من السعر ال حتشتري بيهو
أقل شي ب 20% .
_____________
كل الخيارات متاحة في السوق ...سوق السجانة فيهو المتوسط و الجديد ..
اما اذا عايزة مستوى أعلى ...شركة ميشو في شارع 15 العمارات.....
ربنا يوفقك ان شاء الله ....والمبديّة متمومة...
:
:
:
معاوية و ابو روضة ....
لكل مقام مقال
| |
|
|
|
|
|
|
|
|
|
Re: يا ناس الجمارك اومن له تجربة في استيراد مواد تشطيب لبيته (Re: محمد محمود محمد)
|
ربنا يتم ليك على خير
الجمارك للأسف ليس لهم قوانين ثابتة
كل شيء يمكن ان يتغير في لحظة
مرات يقولوا ليك هذه اشياء مسموح بها
ولكن حينما تكون معهم وجها لوجه يقولوا ليك وين المنشور البقول الكلام دا
مرات تمشي خروج نهائي ويقول ليك في حالة الخروج النهائي السيارة معفاة من الجمارك
لكنك تدفع جماركها حتى تقول الرووووب
وممكن انتي ومعك آخر تشتروا نفس مواد البناء
من شركة واحدة
والكمية واحدة
والمبلغ واحد
ولمن ترجعوا الفندق بعد دفع الجمارك كل واحد فيكم يكون دفع مبلع يختلف من الآخر
2011 أخذت شاشة 40 بوصة طلعت جماركها 300 ريال
2013 أخذت شاشة 40 بوضة وحجزنا 400 ريال للجمارك
تفاجأت بان الضابك يكتب لي 100 ريال جمارك !!!
للأسف الجمارك في الكثير من الأحيان تتوقف على مزاج الضابط
وكلما حاولت أن تستخدم ذكاءك معهم كلما ارتفعت الجمارك الخاصة بك
وان كنت غبيا في الكثير من الأحيان تجد جماركك ضيلة
ومرات لو عملتي شكلة وقعدتي تكوركي وسط الناس
وبدأوا الناس يتفرجوا برضو الجمارك بتاعتك ممكن تنخفض
الجمارك ليس لها لون
| |
|
|
|
|
|
|
|
|
 Re: يا ناس الجمارك اومن له تجربة في استيراد مواد تشطيب لبيته (Re: ابوحراز)
|
Quote:
سؤالي هل هناك جمارك على مواد البناء واذا نعم كم وكيف تحسب
وهل هناك نظرة خاصة لو الزول مغترب يدفع كل الاتاوات؟
اذا في زول جاب مواد تشطيب من خارج السودان اريد ان اعرف تجربته..
وهل تستحق ام نشتري من الداخل..
المواد المعنية ابواب ادوات صحية وبلاط..لطابق واحد 200 مترمربع
|
الأخت د. نجاة
والأخوة المتداخلين
أنا كنت ضابط بالجمارك وخدمت بها حوالى 30 عاما واحلت للتقاعد بالمعاش وحاليا اعمل وكيل تخليص بجمارك الحاويات / سوبا .....
تابعت هذا البوست ولاحظت هجوما على الجمارك وقوانينها وفعلا اللوائح بالجمارك وتحصيل الرسوم الجمركية غير ثابت ويا اخوانا الجمارك ما بتجيب قانون بمزاج الضباط وانما قوانينها ولوائحها تحضع لجهات اخرى مثل بنك السودان ووزارة المالية ووزارة التجارة والرسوم الجمركية متغيرة بسبب تغيير سعر الدولار الجمركى الصادر من بنك السودان ....
اما بخصوص سؤال الدكتورة نجاة ...
كل محطات الجمارك مسمح بها دخول العفش الشخصى فى حدود المعقول دون مطالبة الشخص بأى اجراءات مصرفية او سجل ضريبى ولا حتى فواتير بما في ذلك ادوات المبانى وتفرض مقابل ذلك غرامة تتراوح بين 10 % الى 20% من القيمة الجمركية وذلك بالإضافة للرسوم المفروضة اصلا على السلعة ..... بالنسبة للإعفاء من الرسوم للمغتربين هو اعفاء مشروط بأن يكون المغترب قد عاد نهائيا للبلاد بعد الغاء اقامته ويكون قد اكمل ثلاثة سنوات اغتراب على الأقل وقام بتسديد كل التزاماته الضريبية بابراز خلو طرف والامتعة المعفاة محددة وتجدونها في موقع الجمارك ويمكن البحث في قوقل بكتابة الجمارك السودانية وهنالك اعفاء جزئي للمغتربين لا يشترط فيه انتهاء فترة الاغتراب فقط للأمتعة الشخصية....وعن السيارات لا يوجد اعفاء منها مطلقا للمغتربين وانما استثناء من شرط الموديل علي ان لا يتعدي الموديل ثلاثة سنوات يعنى دي سنة 2014 مسموح حتى سنة 2010 وهذا ما لايتاح لأي مواطن آخر .... والأعفاء فقط للدبلوماسيين السودانيين الذين اكملو فترتهم خارج السودان وفق شروط محددة وطبعا الدبلوماسيين الأجانب العاملين بالسودان بضوابط محددة وصارمة ....
أما عن سؤالك يا دكتورة ارجو مدي بكشف دقيق عن الأشياء التى انتى بصدد استيرادها شاملة النوع والمقاسات والكميات حتى اتمكن من الرد عليك بالنجيضة ...
ان شئتى علي الايميل ayoooby@hotmail com .....
أو لو كانت رغبتك الفائدة للجميع ضمن هذا البوست
وتحياتي للجميع
| |
|
|
|
|
|
|
|
|
|
Re: يا ناس الجمارك اومن له تجربة في استيراد مواد تشطيب لبيته (Re: صلاح الدين ابراهيم الفضل)
|
من الايميل تجربة مشجعة
Quote: بتي لإدخال مواد بناء (تشطيب) ليها تقريبا سنتين
وللتحديد قبل الزيادات الاخيرة في ما يسمي بالدولار الجمركي
وحقيقي كانت ممتازة جدا وكانت تعادل التعب التعبتو فيها
تقريبا وبصورة عامة كنت شحنت 400 م م سراميك|بورسلان
ادوات صحية واطقم حمامات حتي المواسير للصرف الصحي والمياه
شبابيك ابواب زايدا كل ما يلزم الانارة
تقريبا الحاجات دي اتشحنت في 66% من حاوية 40 قدم
والتكلفة كانت في حدود 10 الف ريال للشحن لسوبا الخ...الخ يعني ضريبة مضافة وضريبة ضرب وضريبة طرح...الخ...الخ
مع حوالي 10 مليون جمارك
دلوقتي من تجربة اخ معي هنا شحن هذا الصيف لقي انو الحكاية غالية جدا حسب تقيمو ليها وما اداني تفاصيل
الحاجة الوحيدة الفهمتا منو انو كان ممكن يشتري الحاجات دي بنفس السعر من السودان دون تعب
وان كان انا ما بتفق معاهو في كده لانو عن تجربة مستوي الجودة للمواد في السودان متدني جدا
ويا دكتورة حقيقي القرار صعب لكن ده بيعود للشخص وتقديراتو
التجربة بتاعت أي زول سوداني في المواضيع المتشابه الزي دي
بتكون فريدة وما بتكرر لشخص تاني فربنا يعينك علي نقتنا الكتيرة
واخيرا يادكتورة امنيتي انك توصلي للقرار الصاح سواء كان بالشراء من السودان او خارجه وربنا يوفقك
نصيحة اخيرة ومعليش النصائح في سوداننا ده دايما كتيرة
اذا قررتني تشحني المواد للسودان ومن اجل ان تقللي الجمارك ارفقي الخرط المصدقة للبناء
مع اورنيك التخليص الجمركي. ده بيساعد مع الدفرة طبعا بمعني انو تكوني بتعرفي زول في الجمارك
تحياتي يا دكتورة واتمني لك التوفيق
الامين لعوته |
| |
|
|
|
|
|
|
|
|
|
Re: يا ناس الجمارك اومن له تجربة في استيراد مواد تشطيب لبيته (Re: د.نجاة محمود)
|
يا دكتوره .... سلام ...
والله العماره انا بعتها .. وما عندي صور حاليا
بس اتصلت بالمشتري وطلبت منه تصويرها وارسالها لي
وحال استلامها .. سوف ارسلها لك ..
يا شيخه خُتي الرحمن في قلبك ..
وامشي اشتري من هناك ... و اي حاجه موجوده وباسعار معقوله ...
ولو عندك واحد هناك بعرف السوق وله نفوذ ... بساعدك شديد ...
تحياتي ...
| |
|
|
|
|
|
|
|
|
|
Re: يا ناس الجمارك اومن له تجربة في استيراد مواد تشطيب لبيته (Re: محمد مجيدو)
|
Quote: ...Mohammed Elsadig Ahmed · Sales في International Company for Furniture
الطرابيد إتلمو غايتو الله يعينا في القرف النحنا فيهو دا الواحد يخش يستفيد من موضوع البوست يجوك الهبل والعبطاء ديل يتلمو خلاص صفقنا ليكم إنت ناس ختيرين ومعارضين لايشق لكم غبار حلو عن سما البوستات المفيدة ياخ
رد · أعجبني · متابعة المنشور · منذ 18 ساعة |
سلامات يا محمد
شكرا ليك وانت ترفض العبط في شكل نضال
احترامي
| |
|
|
|
|
|
|
|
|
|
Re: يا ناس الجمارك اومن له تجربة في استيراد مواد تشطيب لبيته (Re: د.نجاة محمود)
|
Quote: m · الأكثر تعليقا · محاسب في محاسب بالسعودية
والله انا اختلف مع الدكتورة 180 درجة لكن يبقى الاحترام مايقوم به البعض هنا مخجل ؛ الاعفاء للمغتربين مع العودة النهائية على حسب علمي من غير تجربة طبعا
رد · أعجبني · متابعة المنشور · منذ 19 ساعة |
شكرا يا امين
لو قريتني صاح ما بتلقى نفسك مختلف معاي حتلقانا في نفس الحلقة ضد امثال الطوربيد ومع الشعب والوطن
| |
|
|
|
|
|
|
|
|
|
Re: يا ناس الجمارك اومن له تجربة في استيراد مواد تشطيب لبيته (Re: محمد مجيدو)
|
يا مجيدو مع إحترامنا لرأيك ..
لكن ما ملاحظ إنك ما أديتنا أي مقارنات ..؟ يعني إنت بتقول إنو أفضل ليها تشتري من السودان ...بس ما وريتنا إنك بنيت على شنو ..
يعني كل الناس متفقين إنو النوعيات الموجودة في السودان رديئة ... وغالية ...
وإنك لو جبت من برة بتكون رخيصة وجيدة ..
إنت بتقول كل شيئ موجود وبسعر معقول ... معقول مقارنة بشنو ؟
سؤال تاني :
رأيك ده بيكون هو نفسو لو كان المبنى أكبر من كده ؟ أربعة طوابق مثلا؟
تشكر مقدماً
| |
|
|
|
|
|
|
|
|
|
Re: يا ناس الجمارك اومن له تجربة في استيراد مواد تشطيب لبيته (Re: عثمان دغيس)
|
Quote: يا مجيدو مع إحترامنا لرأيك ..
لكن ما ملاحظ إنك ما أديتنا أي مقارنات ..؟ يعني إنت بتقول إنو أفضل ليها تشتري من السودان ...بس ما وريتنا إنك بنيت على شنو ..
يعني كل الناس متفقين إنو النوعيات الموجودة في السودان رديئة ... وغالية ...
وإنك لو جبت من برة بتكون رخيصة وجيدة ..
إنت بتقول كل شيئ موجود وبسعر معقول ... معقول مقارنة بشنو ؟
سؤال تاني :
رأيك ده بيكون هو نفسو لو كان المبنى أكبر من كده ؟ أربعة طوابق مثلا؟
تشكر مقدماً |
الاخ عثمان .... السلام عليكم ...
انا طلبت من المقاول حقي كشف بالمواد التي يحتاجها للبناء
( ما حاقول عمارة عشان اساسي ما يتعقد ) وهي ثلاث طوابق ... وبها 6 شقق ...
ثم حولت هذا الكشف الى احد الاصدقاء وله محل في سوق السجانه وعمل لي تسعيره مفصله على كل بند .... وارسلها لي .
اخدت التسعيره وقارنتها بسوق الدمام بالسعوديه ... لقيت الاسعار قريبه من اسعار السودان ...
طبعا وضعت حساب سعر الصرف والشحن والجمارك ...... لقيت ماافي فرق كبير ... ولا التلتله ...
وبعدين ... توجد ادوات في السوق غير صينيه .... وايضا اسعارها معقوله ....
وممكن د. بيان تعمل نفس الشي .... تحدد ما هي المواد ؟؟ ..
وتجيب تسعيره من السودان ..( وانا ممكن اساعدها )
وبعدين تقارنها باسعارماليزيا .. + الشحن والجمارك ....
ثم تحدد ايهما الاصلح لها ....
تحياتي ...
| |
|
|
|
|
|
|
|
|
|
Re: يا ناس الجمارك اومن له تجربة في استيراد مواد تشطيب لبيته (Re: عبدالمجيد الكونت)
|
والله يا دكتورة الجماركـ دي ما بقدر أفتيكـ فيها
لكن لو قررت تشتري من السودان أبعدي و من سوق السجانة ده ..
أنا زول أهلي مسيطيرين على السوق ده تقريباً بما فيهم أخوي يمتلكـ محل هناكـ
لكن أسعارهم مبالغ فيها
أخوي ده مرة في إجازتي الفاتت زعلان من الولد الشغال معاهو عشان باع ليهو لفة ورق حائط بـ 85 ألف و عمل معاهو مشكلة
سألتو رأس مالها كم اللفة دي ؟ قال لي 30 ألف !!!!
أخوي التاني بحكي لي قال كانو عايزين ليهم رأس درل تقريباً أو ما متذكر الحاجة بالضبط
المهم إنو الحاجة دي لقوها في السجانة بـ 400 ألف و أشتروها من أم درمان بـ 60 ألف !!!!
أو أنت للضمان كده شوفي ناذر الخليفة .. زول كويس و صادق و بديكـ النجيضة في مسألة الأسعار دي
| |
|
|
|
|
|
|
|
|
|
Re: يا ناس الجمارك اومن له تجربة في استيراد مواد تشطيب لبيته (Re: خالد عبد الله محمود)
|
صدق أخونا خالد عبد الله محمود
| Quote: أبعدي و من سوق السجانة |
السجانة لع وألف لع
زولا راجع قبل أسبوع من السودان ولفيت معظم دكاكين السجانة (سعر عالي وبضاعة اي كلام) .... وبعد ذلك مشيت لشركة رأس الخيمة في شارع عبيد ختم بعد مستشفى رويال كير (السعر عالي) وشركة آخرى في بداية شارع عبيد ختم من جهة شارع المينا البري ... ايضا الاسعار عالية .....
المهم مشيت لشركة سالومي في شرق النيل تقع على شارع القذافي في حي النصر بعد صينية كبري المنشية الحمد لله حصلت الحمامات والبلاط صناعة جيدة وسعر أقل ... مثال (طقم الحمام بي 1750ج) وتوصيل حتى البيت (بعد المراجعة وجدنا اغطية المقاعد غير موجودة راجعناهم ادونا ليهم) حتى طريقة العرض جميلة وكل شغلهم عالمي
اما بخصوص الابواب والشبابيك .... شركة تفتح على محطة أبو حمامة شغلهم جيد وسعر مناسب
المهم في شغلانة التشطيب بالذات الحمامات (السباااااااااااااااااااااااااااااااااااك) اذا السباك ما حريف وزولا متغن لي عملو .... حتعيد التركيب مرة تانية وتبدى في مشالك التسريب وفك البلاط وتصليح التوصيلات .... من البداية السباك النجيض (( سباكنا زينة انتظرناهو لمن خلص شغلو في مدني وجاءنا )
وربنا يتم عمل الخير يا دكتورة وبيت سعيد
| |
|
|
|
|
|
|
|
|
 Re: يا ناس الجمارك اومن له تجربة في استيراد مواد تشطيب لبيته (Re: خال فاطمة)
|
Quote:
شكرا ليك كثيرا على المداحلة ان شاء الله ساقوم بكتابة كل الاححتياجات وارسالها لك قريبا
لو حليت لينا رقم تلفون يكون كويس كمان
|
جدا يا دكتورة وبكل سرور تجدى تلفوناتى اسفل هذه المداخلة وانشاء الله اجتهد فى الاجابة على كل استفساراتك ولن ابخل عليك بأي نصيحة فى مجال عملى ...
00249917383333
00249999239997
00249126010000
| |
|
|
|
|
|
|
|
|
|
Re: يا ناس الجمارك اومن له تجربة في استيراد مواد تشطيب لبيته (Re: د.نجاة محمود)
|
To: [email protected]
Himaid, Elhassan Fouad Amin
السلام عليكم ورحمة الله
بخصوص الموضوع المنشور في سودانيزأون لاين (ما عندي عضوية) خبرتي كانت تشطيب عمارة 6 شقق وفيلا 3 طوابق، وأختصرها لك في المافي شي يسوى التعب لكن فقط نظرا للجودة أنصح بخلاطات (الحنفيات) للحمامات للمطبخ، ولاحواض الغسيل وكذلك النجف والأشياء المرتبطة بالديكور وكلهت تجيبيها معاك صحبة راكب، أما الباقي متوفر في السودان بخيارات معقولة وأسعار نسبيا مقبولة مقارنة بتكلفة إحضارها من ماليزيا
أتمنى لك التوفيق
| |
|
|
|
|
|
|
|
|
|
Re: يا ناس الجمارك اومن له تجربة في استيراد مواد تشطيب لبيته (Re: د.نجاة محمود)
|
تحياتي وسلامات أختنا العزيزة د. نجاة وضيوفها الكرام
تابعت هذا البوست منذ بدايته
به إضاءات جيدة ،
لكني أراها قد زادت حيرتك ولا عجب فالكل هنا أراد تقديم نصيحة وتلك النصيحة مرتبطة بتجربته الشخصية
دعيني أحدثك إذاً من زاوبة مختلفة ....
زاوية التخصص المهني ومن خلال تجارب مباشرة وغير مباشرة كنت طرفاً فيها خدمة لأصدقاء وأقارب وزملاء مهنة
أولاً
مواد التشطيب ذات السمعة الجيدة كلها أوربية المنشأ مثلاً خلاطات المياه ( قروهى ... ألمانية ) و مواسير توصيلات المياه وإكسسواراتها ( PPR ... ألمانية ) ، مضخات المياه ( إيطالية .... إسبانية ) ، أطقم الحمات ( إنجليزية ، ...... ) وهكذا تكون كل أنواع مواد التشطيب .....
مواد التشطيب الأصلية هذه غير موجودة في السودان .... ربما تكون بعض الماركات موجودة على البضائع لكنها صينية ( أو أى دولة أخرى ) لكنها ليست بلد المنشأ الأصلي
ثانياً
95% من مواد التشطيب الموجودة في السودان ( صينية المنشأ ) ... نعم الصين دولة كبيرة في الصناعة لكن المنتجات الصينية التي تأتي للسودان هو أقل درجات الجودة الموجودة في الصين حتى أن أهل الصين أطلقوا عليها الـ Sudanese Standards سوف أرفق لك أدناه رابط بوست تكلمت فيه عن هذا الموضوع ، غير هذا فهى محدودة الخيارات
ثالثاً
في مجال الإنشاءات الهندسية هناك عامل أساسي يجب التأكد منه وتحقيقه وهو ( إستدامة الخدمات ) وتسمى الـ Durability إذ ليس من المقبول أن نقوم بتركيب خلاط مثلاً لنفاجأ بتعطله بعد شهر أو إثنين ونبدأ في رحلة البحث عن سباك لتصليحه أو إستبداله .
هذا العامل مرتبط إرتباطاً أساسياً بنوعية المادة وكفاءة الفني الذي قام بالتركيب
رابعاً
قرار الشراء من الداخل أم الشراء من الخارج يعتمد بصورة أساسية على مكان إقامة الشخص الراغب في الشراء وكذلك كميات المواد المراد شراؤها وظروف إجازته ووجود شخص ثقة يتابع إجراءات الإستلام نيابة عنه
خامساً
العامل الأساسي في موضوع الجمارك هو التوفيق الإلهي لا أكثر ولا أقل... التوفيق الإلهي أن تكون بضاعتك أمام ضابط يخاف الله والتوفيق الإلهي أن توفقي في الوصول لـ ( مخلص جمركي ) يعرف العمل وخفاياه ويمتاز بعلاقات جيدة مع ضباط الجمارك العاملين
بالنسبة لحالتك فإنني أنصح بالشراء من الخارج للأسباب التالية
- تضمنين جودة عالية حيث البضائع الأصلية متاحة
- تختارين ما يناسب ذوقك حيث كل الخيارات متاحة
- مهما كانت الكمية ومهما كانت تقديرات الجمارك والتخليص فإن سعر البضاعة القادمة من الخارج يكون أفضل من البضائع داخل السودان إذا حسبنا عوامل الجودة والإستدامة
- بزيادة الكمية يزداد التوفير لأن تقديرات الجمارك والتخليص لا تتناسب بصورة طردية مباشرة مع الكميات
- لو ظروفك بتسمح يمكن أن تكون تشمل الحاوية إضافة لمواد التشطيب مواد الأثاث من غرف نوم وجلوس ومكيفات وخلافه وبذلك تقفلين الملف نهائياً
_______________
رابط ذي صلة
جمهورية السودان ( الصينية )
| |
|
|
|
|
|
|
|
|
|
Re: يا ناس الجمارك اومن له تجربة في استيراد مواد تشطيب لبيته (Re: عاطف عمر)
|
د. بيان ربنا يوفقك
Quote: ممكن لوعندك تلفونات
|
دا تلفون ... الأخ / راشد تنفيذي مبيعات في شركة كاولين - سالومي شرق النيل 00249154886845
اما بخصوص أخونا وليد السباك لمن تبقي عليه برسل ليك تلفونو
--------------
هسي ما شي احول مبلغ لشراء باقي الحمامات والبانيو والاحواض للطابق التاني من شركة كالوين
وزي ما قال ليك اخونا عاطف عمر ... الصيني ما تعايني ليو نهائي شوفي ( التركي الاسباني الانجليزي المصري) كلو متوفر
بس اهم شي في الشراء في حاجة اسمها فرز أول وفرز تاني ... اقعي الفرز الأول يعني صناعة رقم (1) .... الفرز الأول زي عصر السمسم بديك زيت في العصره الأولى زيت عالي الجودة زيت أخضر ... وفي العصرة التانية قليل الجودة ولونو زي زيت الملاح (ههههه)
واوصيك عند الشراء لازم السباك يكون معاك لديه خبرة في الشراء
والبيت من طوبة ربنا بيتمو
| |
|
|
|
|
|
|
|
|
|
Re: يا ناس الجمارك اومن له تجربة في استيراد مواد تشطيب لبيته (Re: خال فاطمة)
|
سلام يا دكتورة وسلام للضيوف ..
أنا بستغرب من التاس القاعدة تهاجم سوق السجانة وتصف بضائعه بالرديئة والغير جيدة ..!! هل الكلام دا عن تجربة ولا سماع ؟!!
وزي ما الباشمهندس عاطف عمر اتكلم من ناحية فنية بحجم عملو وزي ما صلاح الفاضل اتكلم عن الجمارك بحكم عملو فيها . أنا داير اتكلم عن سوق السجانة
بحكم عملي وصاحب شركة تعد من اقدم وأعرق الشركات بالسوق منذ الخمسينات والتي اسسها جدي لأبي رحمهما الله ..!
سوق السجانة يا شباب ممكن أصرح غير جازم واقول انو 80 في المية من منازل السودانيين إتبنت من السوق دا سواء في أساساتو الأولية من سيخ وأسمنت أو في تشطيباتو النهائية من مواد كهرباء وسباكة وغيرها ..
سوق السجانة كان ولا زال بصورة نسبية هو المغذي الرئيسي لاسواق مدن الولايات الأخرى بالمواد المختلفة وبه شركات ومكاتب شركات مصانع كبرى ..
سوق السجانة به الجيد وبه المتوسط الجودة يعني يلبي كل الأذواق .. ودا لأنو الموردين اعتادوا يوردوا مواد على حسب مواسم السوق .. جا مثلا موسم عودة المغتربين في الاجازات الموردين بيجيبوا البضاعة الكويسة ويعرضوها .. السوق كمان لو كان في حالة ركود زي الحاصل اليومين ديل وما في قوة شرائية وما في زول داير يصرف قروش كتيرة على البنيان بيوردوا بضائع متوسطة الجودة ...
يعني في سوق السجانة دا ممكن تلقى لفة لسك كهرباء بي 130 وجمبها لفة تانية بي 230 وجمبها كمان بي 400 !!
الناس مستواها ومقدرتا المادية ما واحدة .. بعدين ما في حاجة اسمها بضاعة رديئة .. بنسميها منخفضة الجودة .. لأنو أساسا لو في بضائع رديئة للدرجة دي المورد ما بيجازف يجيبا عشان ما يتعرض للخسارة ..
أنا بنيت وشطبت بيوت كتيرة في السودان وشفت الفرق بين الناس البتجيب تشطيبات من برة والناس البتشتري من هنا وما لقيت زول صراحة شكر البضائع البيجيبا من برة ودايما بنلقى فيها اشكالات وتكون في جزء منها ناقصة واجزاء تانية كتيرة لمن ما تعرف توديها وين ..! دا بالنسبة للناس الشغلها بسيط زي طابق واحد او منزل صغير ..
التشطيب أساسا عبارة عن حوجات مرحلة . يعني الكهربائي يقول ليك جيب لي 80 كوبس و50 بلك 1 خط و20 2 خط وهكذا .. ممكن لمن تجيبم ليهو يحصل تغيير في ذوق صاحب العمل زاتو .. يقوم مثلا يقول . لا لا أنا هنا داير بلك واحد .. وهناك اللمبة دي مفروض تفتح بي البلك الفلاني مش العلاني ..
دا حالتو لو اشتراهم من هنا .. اما لو جابم من برة والبلكات دي نقصت 5 بلكات وهنا ما في زيهم .. تخيل مقدار التعب وتعطيل العمل عشان بس يلقى فرصة يرسل النواقص !!
دا مثال بسيط انا اتعرضت ليو بحكم التجربة ..
الخلاصة يا دكتورة .. طابق واحد ما بيستحق تعب وعناء شحن مواد من الخارج .. وتأكدي السوق هنا فيهو كل المتطلبات وأبدا ما أغلى من برة بعد حساب الجمارك والتعب والتكاليف الغالية للعمالة والترحيل والشحن وخلافو ..
إتوكلي وشطبي من هنا وإنشاء الله لو ربنا هون وأداك لي قدام عمارة من 5 طوابق دايرة تشطيب حا أقول ليك وبي كل ثقة امشي الصين أو دبي واشحني 5 أو ستة حاويات للتشطيبات لأنو كدا الحسابات بتفرق ..
| |
|
|
|
|
|
|
|
|
|
Re: يا ناس الجمارك اومن له تجربة في استيراد مواد تشطيب لبيته (Re: عاطف عمر)
|
هذه الانسة هما كلها في تشطيب بيتها
الناس في شنو واهلنا الشبعوا من اموال اليتامي والبترول البطلع من بلدا ناسوا ماشين عريانين وما لاقين موية يشروبها واموالهم الناس عايزة تشطب بيها عمارات
ولما يسالوهم يقولوا جبناها بعرقنا لكن في الحقيقة اولاد البترول البدرسوا في ماليزيا هم البدفعوا الاتعاب يعني من نهايتها كدا اموال الغلابة وحتي لو تعددت الطرق والمكاسب
شوف الناس ديل بفكروا في شنوا !!!!!!!!!!!!!!!!!!!!
اللهم احفظ نفطنا في باطن الارض
| |
|
|
|
|
|
|
|
|
|
Re: يا ناس الجمارك اومن له تجربة في استيراد مواد تشطيب لبيته (Re: saidahmed shami)
|
مجيدو الهبنقة نهارك سعيد انت وخاتمك
اها كنت متأكد انك زول سطحي جدا من حاجاتك الوصفتها فيك ديك .. شايفك بلا وعي بتهددني شبكتني خاف علي اكل عيشك او نحو ذلك قبل ما تعدل مداخلتك وتظهر فيها باقي سطحيتك .. والله يا مجيدو النصيحة ما كنت محتاج لتعديل المداخلة عشان تظهر كل السطحية الجواك ... من البداية كانت ظاااهرة .. المهم يا خال
انت لو بتفهم كويس كلامي من البداية كان انه ماف زول محتاج يعرف املاكك وارزاقك الوهبها ليك الله .. يعني المسألة ما شطارة منك لو نططتا .. دي ارزاق بسطرها الله في سماهو وبوزعها بمعرفتو .. يعني ما حرفنة منك ولا حاجة بقشرو بيها ويتبوبرو بيها .. ما بعملوا كدا الا الناس السطحيين الظلنطحيين البعتقدوا انه المسألة دي اجتهاد شخصي وحرفنة .. ودا ظهر جليا في ردك المافي فرق بينه وبين رد اي مراة قاعدة في زواج وبتكشكش في غويشاتها وترفع في يدها بي سبب وبدون سبب .. ياخ قول عندك ناطحة سحاب وكنت شغال مدير البنك الدولي ..سو واط حنستفيد شنو ولا حيحسدوك علي شنو ... ما بينا حمار ميت انحنا ولا ورثة ولا بنعرفك زاتو ولا نسعي لذلك زاتو .. بس لكن العوارة بتعمل حيرقان وما بنقدر نمررها
اها بالله في عرس ولدك وديتو الشيلة كم كم ؟ ... والشعيرية وديت قندران ولا زت واي ؟
بالمناسبة انا جايك تاني لسع ما بدينا
بس قلت اقول ليك انا مشغول شوية لكن راجع ليك
| |
|
|
|
|
|
|
|
|
|
Re: يا ناس الجمارك اومن له تجربة في استيراد مواد تشطيب لبيته (Re: اساسي)
|
يا اساسي يا صديق
أعرض عن هذا خصمتك بمعزة من تعز...فالرجل مشطب ليك العمارة ....بلون المريخ
والمريخ لعب مع بايرن ميونخ واصبح عالميا....فخليك مشجع عالمي ولا عليك من
خاتم مجيدو....الربنا بريدو....ويزيدو من فضله كمان وكمان...
يا دكتورة اسمعي كلام ناذر دا ولن تندمي ولن تصابي بسكري ولا ضغط
بعد ان تقفلي باب ناس الجمارك ديل خالص.
| |
|
|
|
|
|
|
|
|
|
Re: يا ناس الجمارك اومن له تجربة في استيراد مواد تشطيب لبيته (Re: انور التكينة)
|
بدري يا خال ... انا لسع ما رديت عليك انا رديت علي جزء من مداخلتك الاولي
لكن راجع ليك تاني باذن الله ... يا راعي الشعيرية
عليك دينك يا مجيدو الشيلة وديتوها كم كم ؟
...يا ابو النيز مشتاقين يعلم الله
كل القصة انه طلبت من ربنا ان يبني لي بيت في الجنة القصة دي اكلت مع مجيدو وقال لي بقطع رزقك ... المسكين ما عارف انه الارزاق دي حقت ربنا
ياخي الزول دا من سطحيته بضحك في كوني موظف صغير او عامل يومية
دا يناقشوهو كيف عمو هبنقة دا ؟
| |
|
|
|
|
|
|
|
|
|
Re: يا ناس الجمارك اومن له تجربة في استيراد مواد تشطيب لبيته (Re: د.نجاة محمود)
|
اساسي ... يا نفسيات ...
ما تفتكر انا انسحبت من البوست دا ... خائف منك ..
بالعكس .. انا خائف من نفسي انزلق واجاريك في قلة الادب ...
وبعدين نبقى متساوين ... ودي ما برضاها على نفسي ....
ثم لا تنسى انو اسهل حاجة الواحد يتخفى وراء الكي بورد
ويقل في ادبو زي ما عاوز.. وينبز خلق الله قدر ما الله يقدرو ...
والحكاية دي بتكون مترسبه في حياتو وتعكس التربية والنشأه حقتو..
عشان كدا .. يا زول ... الله يسهلها عليك ....
وتاكد انو ما حاجاريك ولا حارد عليك بعد دا ..... عشان ما تفرح ...
لاني زي ما قلت ليك ... مؤدب ....وود ناس .. ومن اسرة كريمه
اها اخليك تاخد راحتك بالكامل ....
واوصيك ما تقصر في اختيار الالفاظ الماكنه التقيله ...
عشان الناس تصفق ليك بحراره ....
وانا في النهايه ......ما عااافي ليك......
| |
|
|
|
|
|
|
|
|
|
Re: يا ناس الجمارك اومن له تجربة في استيراد مواد تشطيب لبيته (Re: عمر الفاروق)
|
| Quote: لاني زي ما قلت ليك ... مؤدب ....وود ناس .. ومن اسرة كريمه |
لا اشكك يا مجيدو فى ماذهبت اليه .. فقط خلى الناس هى التقول عليك كدا ..
أساسى أيضا تنطبق عليه اوصاف المقتبس اعلاه بعد أضافة صفتى الاحترام وممارسة الرياضة الصباحية ..
دكتورة نجاة ..
ال لوكال ماركت فيه أية شىء وبى أية جودة .. المحك الكميات .. لانو كميتك بسيطة احسن ليكى تشترى من السودان ..
ده عن تجربة وممارسة ...
وناذر مفيد للغاية فى الموضوع ده .. حتى لو ما لقيتى عندو الشىء العاوزاهو بالتحديد بيوريكى وييين ..
تحياتى ..
| |
|
|
|
|
|
|
|
|
|
Re: يا ناس الجمارك اومن له تجربة في استيراد مواد تشطيب لبيته (Re: الشاذلى خيرى عبد الله)
|
يا مجيدو غشوك والله لو قالوا ليك البتعمل فيهو دا تربية كويسة .. الناس ديل ما تعبوا فيك كفاية واعتمدوا علي انه الحصل ليك دا حاجة كويسة .. لكن نقول شنو دي قدرتهم ودا انت وطبعك يعملوا فيك شنو ؟
لكن لو ختيت الرحمن في قلبك وقعدت لينا في الـواطـة دي بنرمم ليك كل الشروخ الجواك .. وليك علي اتعب معاك لحدي ما تطلع انسان جديد صالح للتواجد في مجتمعات عامة .. وقبل دا كله تاخد ليك دروس مجانية في الكلام عشان لما تفتح خشمك وتتكلم تاني تطلع جمل مرتبة ومحترمة ومفيدة ما زي الجمل الاستعراضية الخاوية المضمون البتتجشأ بيها قدامنا دي .. ولو شايف روحك كبرت علي الحكاية دي انصحك انك تقعد تقرأ هنا وتتعلم من الحولك في المنبر دا .. دي فرصة كبيرة جاتك في مرحلة عمرية متقدمة لكن لو محلك مفروض تستغلها تماما وتستفيد منها وتقعد تتعلم من الناس الحولك مافي زول كبير علي التعلم.. لانه واضح انه تجربتك الحياتية كانت ما مفيدة ابدا وانه الحولك من الناس كانوا سطحيين جدا عشان كدا كنت انعكاس واقعي ليهم ...
طيب وقت طنشت الشعيرية .. المهر الوديتو كان كم .؟
شايف انا بديك فرص استعراضية بتلائمك مفروض تستغلها .. ياخ دا باب كبير للقشرات ... استثمره
ــــــــــــــــــ
بعدين ياخ مافي زول خايف بيقول انه خايف .. الخوف دا حاجة ظااااهرة ما بتدسا
| |
|
|
|
|
|
|
|
|
|
Re: يا ناس الجمارك اومن له تجربة في استيراد مواد تشطيب لبيته (Re: saidahmed shami)
|
يا بيان مافي زول سالك وجاب سيرتك
انت فتحتي بوست عن موضوع وطلب معين ..والناس هنا العندها معرفة ادتك وجهات نظرها
باقي كلام الناس هنا ما بخصك كل زول مسؤل من مشاركته .. فمافي داعي لوصايتك علي مجيدو ... مجيدو زول كبير وراجل بالغ ومكلف ومسؤل من كلامه ومشاركاته وما قد تجلبه له من ردود علي مشاركاته
فشنو بطلي الوصاية علي مجيدو مع انه النصيحة لله محتاج وصاية وتاهيل
ـــــــــ
لا عليكم يا شباب عمر وشاشلي وسيد احمد
مجيدو زول طيبان وياهو بتعلم شوية شوية
| |
|
|
|
|
|
|
|
|
|
Re: يا ناس الجمارك اومن له تجربة في استيراد مواد تشطيب لبيته (Re: اساسي)
|
تشكر يا اسئس يا غالي
انا غايتو شهادتي في حق عمنا مجيدو بحسب معرفتي ليهو، راجل بسيط جداً. وانا متأكد بأنو جا قال كلامو بكل بساطة وشتارة وبدون اي مقصد للاستفزاز
ولو انو اتحامل على حبيبنا الماسورة اساسي
___________
بالله البورسلين المتر بقى بـ 120 جنيه!
صدق يا اساسي انا سعت اشتريت البورسلين وشطبت بيهو شقتي دا كان بـ 32 جنيه من المحاميد (معاها خاتم ترباس كدا كاااااااااااااك )
| |
|
|
|
|
|
|
|
|
|
Re: يا ناس الجمارك اومن له تجربة في استيراد مواد تشطيب لبيته (Re: محمد يوسف الزين)
|
Quote: الصفصاف السراريه · الأكثر تعليقا · مدرسه البحر الاحمر الثانويه-بورتسودان
هسع فى زوووول نصصيح يفتح مثل هذا البوست لو ماعنده سشفرينيا ال ايه الجماررررررك كم والطوابق كم التقول عاوووووزة تبنى عمارة فى سان فرنسيسكو دة كل هين المصيبة فى بقية الجوقة دى انا عندى عمارة بى 6 طوابق انا عندى عمارة بى 7 طوابق حولالالالالالا بوباررررررررررر اففففففففففف ناس المفرووووض يودوهم التجانى الماحى بوباررررررررررررررررررررررررر |
اوووووووووواه الدكتور ولا شريكو العاطل؟
البناء في سان فرانسسكو اسهل وارخص من السودان لمعلوميتك.
| |
|
|
|
|
|
|
| |
Shawgi Sulaiman
Mohd Ibrahim
فرح الطاهر ابو روضة
أيمن محمود
معاوية عبيد الصائم
سليمان القرشي
محمد مجيدو
محمد محمود محمد
ابوحراز
صلاح الدين ابراهيم الفضل
اساسي
عمار عبدالله عبدالرحمن
خالد عبد الله محمود
خال فاطمة
الدومة ادريس حنظل
عاطف عمر
ناذر محمد الخليفة
معاوية عوض الكريم
انور التكينة
Idris Logma
saidahmed shami
عمر الفاروق
الشاذلى خيرى عبد الله
محمد يوسف الزين
فيس بوك
تويتر
انستقرام
يوتيوب
بنتيريست