في يوم السبت الفاتح من يوليو 1989م اي صبيحة انقلاب الانقاذ الذي كان في يوم الجمعة والامة مجتمعة في 30 يونيو كنا جلوساً في نادي الاساتذة بجامعة الخرطوم «نطقس» ونستبطن كنه التغيير السياسي الذي اجتاح السلطة في البلاد وكانت جريدة القوات المسلحة هي الوحيدة الصادرة وكانت صفحاتها الداخلية مخصصة للسير الذاتية لاعضاء مجلس قيادة الثورة «ولا نقول انقلاباً»، فصاح احد الاساتذة اثناء تصفحه لذلك الموضوع قائلاً: «يا جماعة لا حول ولا قوة الناس ديل - الاشارة للعساكر- كلهم من مواليد (1/1) الشكية لي الله ما فيهم واحد ولدوه في الراهبات ولا في واحد ولدوه في الدايات، خلاص دخلنا العصر الخلوي» فانفجر الحضور ضاحكين وقال احدهم: «يعني جماعة نميري كانوا متقدمين على الجماعة ديل فلو استثنينا النميري الباقين كلهم اولاد خرطوم وعندهم شهادات ميلاد حقيقية» فرد عليه آخر بأن النميري نفسه عنده شهادة ميلاد لانه مولود في ود نوباوي. هذه الرمية تتناسب مع هذا اليوم (1/1) حيث ان جيلنا والجيل السابق له «عساكر الانقاذ» والجيل الذي يلينا من الخلويين كلنا من جماعة داية الحبل وشهادة التسنين التي تسمى شهادة تقدير العمر وتاريخ الميلاد في 1/1، من جانبي بذلت مجهوداً كبيراً لمعرفة تاريخ مولدي بالتحديد «اصلو كانت عندي نية احتفال بعيد ميلادي كما يفعل الناس الراقيين» ولكنني للاسف وحتى هذه اللحظة لم اوفق بل ويئست من الموضوع نهائيا فقد سألت والدتي عما تذكره عن ميلادي فقالت لي انني ولدت في السنة التي حج فيها والدي حجته الثانية اذ تركها واضعة بي ولم «تربعن» اي لم تكمل الاربعين يوما وقد تركني مريضاً في حالة ميئوس منها لدرجة انه عندما حضر من الحج لم يخصني بأية هدية كما فعل مع بقية اطفال الاسرة الممتدة.. فسألت الوالد عن تاريخ حجته الثانية فقال لي انه كان في السنة التي بني فيها الديوان اذ جاء الى قريتنا في تلك السنة اسطى ماهر وبني عدة «ديوانات» بالطوب الاحمر فذهبت الى احد اعمامنا الذي كان قد ابتني ديوانه مع ديواننا فقال لي ان ذلك تم في السنة التي توفي فيها احد اجدادنا فذهبت الى احد ابناء ذلك الجد وسألته عن السنة التي توفي فيها والده فوجدته «تفتيحة» بعض الشئ وقال لي انه يتذكر تماما انه قد جاءهم في مأتم والده سياسيون من الحزب الاتحادي يتقدمهم المرحوم خضر حمد للفاتحة فكانت الايام ايام انتخابات فتأكدت ان الانتخابات المقصودة هي انتخابات العام 1953م فاستطعت معرفة السنة وحصرت الشهر تقريباً وهو شهر ابريل وطمعت في تحديد اليوم فطلبت من الوالدة ان تتذكر اي ايام الاسبوع فاحالتني لعدد من نساء دفعتها في الولادة اي اندادي ولكنني لم اوفق.. وفي النهاية قررت تدليع نفسي واعتبرت نفسي من مواليد برج الثور«حتة واحدة» وبالطبع كل هذه المعلومات ظنية لانني ُمصر على انني نديد للآنسة كوندي وطالما ان الحكاية ظن في ظن فقد قررت ان تكون ساعة ويوم مولدها هو يوم مولدي، اما اليوم فهو عيد ميلادي الرسمي فقررت الاحتفال به في هذه المساحة.. الرجاء عدم السؤال عن السنة التي مُنحت فيها شهادة تقدير العمر فالابتعاد عن الستين داهية «بتاعت» المعاش اصبحت فائدتنا الوحيدة من شهادة تقدير العمر.. عليه انصح جيلي من مواليد 1/1 ان يجتهدوا في معرفة تاريخ ميلادهم الحقيقي ويبقوه سراً وان يختاروا بمحض ارادتهم يوما لميلادهم كما فعلت ويتمسكوا بشهادة التسنين. وكل عام والجميع بخير
01-02-2008, 05:57 AM
ناذر محمد الخليفة ناذر محمد الخليفة
تاريخ التسجيل: 01-28-2005
مجموع المشاركات: 29251
انت زاتك ود بتين؟ يا شافع اقعد فى الواطة دى حبوبتك ما قالت ليك زى كلامى دا؟
ناذر كل سنه وانت طيب وسلام ومحبة للمعاك فى الاوضة قاعدين
وكل سنة وإنتي طيبة ..
داية الحبل وولادة الجبل والشجر كلها قصص وحكاوي سمعناها من حبوباتنا وشفنا جذء منها في المسلسلات التاريخية العربية ..
النسألك سؤال يا سلمى ..
قبل فترة بسيطة بس إكتشفت إكتشاف ما عارف مغزاو شنو !!
الوالدة قالت لي إني من دون أخواني ما إتولدت في الأوكات المعلومة للولادة !! حيث ذكرت أنني مكثت في بطنها تسعة أشهر وسبع وعشرون يوماً وبعد ذلك جئت للدنيا !!
لم أصدق وظننت أنها تبالغ ولكنها أكدت لي هذه المعلومة وهي قطعا متأكدة منها ..
دا معناتو شنو ؟ ؟
01-02-2008, 01:04 PM
سلمى الشيخ سلامة سلمى الشيخ سلامة
تاريخ التسجيل: 12-14-2003
مجموع المشاركات: 10754
اها يا ناذر كلام والدتك معناهو انه الشلاقة العليك دى ما ساكت انت ما شايف روحك شليق قدر شنو؟ ومن البداية خاتى (راى ) ـ مانى مارق اها شنو ليكم ولمن جيت مارق جيت الشلاااااااااقة ماشة بقدمين دا معناتو والله اعلم زى مابقول شيخنا عبد الله الطيب رحمه الله
الله يخليك ويديك الفى مرادك
01-02-2008, 08:35 AM
ناذر محمد الخليفة ناذر محمد الخليفة
تاريخ التسجيل: 01-28-2005
مجموع المشاركات: 29251
بس أنـــــــــــا كمندان سابقا بالشرطة يعني مدتين خدمة طويلا من عمر الزمان يعني مقدم أستقالة مامرفود خدمة تعسفي ولا حاجة محتفظ بحقي لسه يمكن نحن نرجع من تااااااااااني !!
،،،،أبوقصى،،،،
01-02-2008, 08:47 AM
د.محمد حسن د.محمد حسن
تاريخ التسجيل: 09-06-2006
مجموع المشاركات: 15194
وبما أن النساء عموما لا يبحن بأعمارهن الحقيقية ، فربماكانوا أسعد الجميع قديما بعدم وجود شهادات ميلاد أصلية أو تقديرية لهن !! إذ يمكن حينها أن يصغرن أعمارهن ما شاء لهن التصغير دون أن يجدن من يغالطهن !!
صنفرة :
دا كان زماان .. هسي وييييين مع المستشفيات وتسجيل المواليد الجدد إلكترونياً ..
01-02-2008, 10:53 AM
baha eassa baha eassa
تاريخ التسجيل: 07-21-2007
مجموع المشاركات: 6578
عذرا اخي ناذر .. لم اقصد شيء انا اطلعت علي المقال في الراي العام-حاطب ليل- وعدت للمنبر وجدت المقال .. ولكن من ادبيات الاقتباس ولوسطر ان يسبقه اسم صاحب المقال .. حقوق الملكية الفكرية قالت كدة
ولك الود والتقدير .. والمعذرة مرة اخري
01-02-2008, 03:34 PM
ناذر محمد الخليفة ناذر محمد الخليفة
تاريخ التسجيل: 01-28-2005
مجموع المشاركات: 29251
Quote: اها يا ناذر كلام والدتك معناهو انه الشلاقة العليك دى ما ساكت انت ما شايف روحك شليق قدر شنو؟ ومن البداية خاتى (راى ) ـ مانى مارق اها شنو ليكم ولمن جيت مارق جيت الشلاااااااااقة ماشة بقدمين دا معناتو
هي تراها الشغلة شلاقة
أنا كنت مفتكرا عبقرية ولا معدل ذكاء فوق البنفسجي وكدة
01-02-2008, 05:27 PM
Khalid Saeed Khalid Saeed
تاريخ التسجيل: 12-12-2005
مجموع المشاركات: 2605
ود عمي الأرباب ناذر السلام كيمان ليك وللمعاك .. وكل سنة وإنت طيب .. عندنا قريبتنا مشت الدكتور وكان معاها واحد قريبنا حقاني حبتين .. الدكتور سأله عمرك كم ياحاجة ؟ قالت ليه [ كان 40 كان 41 ] .. نطه قريبنا الحقاني : قال للدكتور أنا عمري 46 وأربعين ولمن ولدوني الحاجة دي كانت بتلعب مع البنوت .. يعني بالحساب كدي يكون عمره فوق الـ 50 .. قريبتنا قالت ليهــو : يخمس قيـــــــــــــودك تحياتي ، أخوك/ خالد الأرباب
Quote: عندنا قريبتنا مشت الدكتور وكان معاها واحد قريبنا حقاني حبتين .. الدكتور سأله عمرك كم ياحاجة ؟ قالت ليه [ كان 40 كان 41 ] .. نطه قريبنا الحقاني : قال للدكتور أنا عمري 46 وأربعين ولمن ولدوني الحاجة دي كانت بتلعب مع البنوت .. يعني بالحساب كدي يكون عمره فوق الـ 50 .. قريبتنا قالت ليهــو : يخمس قيـــــــــــــودك
01-02-2008, 11:05 PM
ناذر محمد الخليفة ناذر محمد الخليفة
تاريخ التسجيل: 01-28-2005
مجموع المشاركات: 29251
دكتور البوني من الكتاب الجيدين في الصحافة السودانية، سواء كتب جاداً أم ساخراً، وهو صاحب عمود يومي محبذ لدى السادة القراء، وهو هنا يتناول ظاهرة سودانية مشهورة كانت موجودة في أزمان غابرة وهي ظاهرة الولادة بعيداً عن المستشفيات وعلى أيدي دايات غير مؤهلات (دايات الحبل)، حيث نجد إن معظم السودانيين الذين ليس لديهم شهادات ميلاد تمت ولادتهم على أيدي دايات الحبل، الأمر الذي جعل عيد ميلاد أغلبية الشعب السوداني هو الأول من يناير من كل سنة، لكنني محتار في مسألة أن عيوننا عسلية دي، المدونة في أوراقنا الثبوتية، هل هناك لون عسلي؟ أم أنهم يقصدون أن عيوننا تشبه العسلية؟ ولماذا اختاروا العسلية دون غيرها من بقية المشروبات الروحية البلدية؟ وهل صفة العيون العسلية دي تنطبق حتى على المولانات والشيوخ وأئمة المساجد؟، لأنني أرى أنه من غير اللائق أن نصف رجل دين وقور بأن عيونه عسلية، وكذلك ليس من الدقة بأن نصف رجل عيونه حمراء شرارة بأن عيونه عسلية، لأن في ذلك انتقاص من رجولته التي استمداها من كون أن عيونه حمراء. وبمناسبة الولادة دي أحكي ليك نكتة طريفة: أخوي عندو صاحبو حلفاوي بيكره نميري كراهية عمياء والغريبة سمى ولدو (نميري)، فمرة أخوى سمعو بيشتم في نميري فقال ليهو: يا اخي إنت راجل دجال وبس، طيب لما إنت بتكره نميري سميت ولدك نميري ليه؟ رد عليهو الحلفاوي ببرود وقرفة شديدة: والله تعرف يا نور الدين الولد ده من ولدوهو جيت عاينت في عيونو عرفتو بطلع (دين حجر) عشان كده سميتو نميري..
والوالدة يا ناذر ما عاوزة تقول ليك القالو الحلفاوي في ولدو لكن المفروض تفهمها طايرة..
01-03-2008, 04:12 PM
ناذر محمد الخليفة ناذر محمد الخليفة
تاريخ التسجيل: 01-28-2005
مجموع المشاركات: 29251
Quote: دكتور البوني من الكتاب الجيدين في الصحافة السودانية، سواء كتب جاداً أم ساخراً، وهو صاحب عمود يومي محبذ لدى السادة القراء، وهو هنا يتناول ظاهرة سودانية مشهورة كانت موجودة في أزمان غابرة وهي ظاهرة الولادة بعيداً عن المستشفيات وعلى أيدي دايات غير مؤهلات (دايات الحبل)، حيث نجد إن معظم السودانيين الذين ليس لديهم شهادات ميلاد تمت ولادتهم على أيدي دايات الحبل، الأمر الذي جعل عيد ميلاد أغلبية الشعب السوداني هو الأول من يناير من كل سنة،
لاحظ يا نصر الدين ذكاء البوني في المقال دا ..
وكأنو داير يلفت نظر المسئولين للإلتفات لقضية مواليد (دايات الحبل) أو الإهتمام بالإحصاء للمواليد الذين ربما لا يزال بعضهم يأتون للدنيا في الأرياف البعيدة دون أن نجد من يتولى تسجيل هؤلاء لغرض ضمهم للإحصاء العام لمواطني السودان ..
مع ملاحظة قرب ميعاد الإحصاء السكاني ..!!
Quote: لكنني محتار في مسألة أن عيوننا عسلية دي، المدونة في أوراقنا الثبوتية، هل هناك لون عسلي؟ أم أنهم يقصدون أن عيوننا تشبه العسلية؟ ولماذا اختاروا العسلية دون غيرها من بقية المشروبات الروحية البلدية؟ وهل صفة العيون العسلية دي تنطبق حتى على المولانات والشيوخ وأئمة المساجد؟، لأنني أرى أنه من غير اللائق أن نصف رجل دين وقور بأن عيونه عسلية، وكذلك ليس من الدقة بأن نصف رجل عيونه حمراء شرارة بأن عيونه عسلية، لأن في ذلك انتقاص من رجولته التي استمداها من كون أن عيونه حمراء.
والله موضوع العيون العسلية دا محير حبتين
ياربي وصف العيون باللون دا حكرا على مضابط توصيفات السودان بس ولا برضو موجود في دول تانية ؟!!
Quote: وبمناسبة الولادة دي أحكي ليك نكتة طريفة: أخوي عندو صاحبو حلفاوي بيكره نميري كراهية عمياء والغريبة سمى ولدو (نميري)، فمرة أخوى سمعو بيشتم في نميري فقال ليهو: يا اخي إنت راجل دجال وبس، طيب لما إنت بتكره نميري سميت ولدك نميري ليه؟ رد عليهو الحلفاوي ببرود وقرفة شديدة: والله تعرف يا نور الدين الولد ده من ولدوهو جيت عاينت في عيونو عرفتو بطلع (دين حجر) عشان كده سميتو نميري..
Quote: والوالدة يا ناذر ما عاوزة تقول ليك القالو الحلفاوي في ولدو لكن المفروض تفهمها طايرة..
والله يا نصر الدين في حاجات كتيرة الزول بيفهما وهي طايرة لكن جنس كلام الوالدة البيخش في العضم دا الزوا أحسن ليو يعمل مجنون ورايح ويحكها حبتين
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة
ناذر محمد الخليفة
عمر الفاروق
سلمى الشيخ سلامة
مجدي عبدالرحيم فضل
د.محمد حسن
baha eassa
Khalid Saeed
Nasruddin Al Basheer
فيس بوك
تويتر
انستقرام
يوتيوب
بنتيريست