كتب الكاتب الفاتح جبرا المتوفرة بمعرض الدوحة
|
عوض أحمودي !! عَلِمَنَا كيف نجعل اعوادنا تغني وتبكي وتجادل !!
|
هذا الرائع حد الثمالة الأستاذ الموسيقار عازف المزهر عوض أحمودي والذي صار الأن وفي زمن وجيز نجماً يتلألأ في سماوات السودان ، بحيث أمسى عدواً للقبح والنشاذ ، ومطاردا له أينما حل في ليالي العاصمة وجلساتها وسهراتها !!
عوض أحمودي لم يأت من فراغ ولم يظهر فُجاءة وفجاة كما ظهر الكثيرين من أنصاف المبدعين رغم ان قمة ظهور نجمه وبزوغه كان في زمن ساد فيه القبح والصديد وفُسدت آذان واذواق السودانيين بفعل فاعل ، كان حريصا على إستمرارية بسط هيبة الفن الهابط بينما تمتد يده الاثمة وفي خبث شديد لتبيد جل ما تحتويه مكتبة الإذاعة من جلائل وعظائم الأعمال الخالدة واعظمها لحناً وكلماتٍ ، بينما الكثيرين في غفلة لم ينتبهوا لها إلا بعد فوات الأوان بقليل !!
عندما يمسك عوض احمودي عوده وييبدا بالعزف لا تجد نفسك إلا مسمرا ومستمعا بكل حواسك لهذه العبقرية الفريدة من نوعها والتي لم ينجب السودان الكثير منها حتى وإن إختلفت الاراء في ذلك ..
كثيرا ما اسأل نفسي وانا إستمع لعوض أحمودي .. لماذا معظم فنانينا وموسيقينا العظام حاليا لا يمتلكون خمس مهارة عوض في العزف !!
وأسائل نفسي هل هو خطا في (التكنيك) أم هو خطا في (التنفيذ) !! وإلا ما هو السبب الذي يجعل ألة العود بين أياديه حين يداعبها تخرج الحان ونغمات لا يستطع الكثيرون غيره أن يفعلها ؟!!
في إحدى اللقاءات الصحفية ذكر عوض أحمودي ان الفنان المرحوم العاقب محمد حسن أخبره أن التكنيك الذي يتبعه (أي عوض) في العزف هو ذات التكنيك الذي يدرس في معهد الموسيقى الشرقية في القاهرة .. وهو التكنيك الذي لا يتبعه عزفا الكثير من الفنانين والموسيقيين السودانيين !!..
لدي النقاد والباحثين السودانيين رأيا .. يقولون ان السودان لم ينجب ولن ينجب عبقرية تعزف على العود مثل برعي محمد دفع الله وربما تراجعوا عن تشددهم قليلا حين تسيد الموسيقار محمد الامين الساحة ردحا من الزمن ، تنازعها معه الأستاذ حسن عطية ،، وما بين عهد برعي محمد دفع الله وعهد عوض أحمودي برز الكثيرون في ترويض هذه الألة الساحرة ... ربما يتعصب البعض لأبو عركي البخيت او الجابري أو مصطفى سيد أحمد أو غيرهم .. ولكل منطلقاته ورؤاه وقناعاته ..
أما الان فإن سيد الساحة هو الاستاذ عوض أحمودي دون شك ..
ربما لم يسمع الكثيرون بعوض أحمودي إلا مع ظهور التقنيات الحديثة والتسجيلات الرقمية والشركات الفنية حيث لاحظ وإستمع الكثيرون لإبداعات الاستاذ أحمودي وتنفيذه لكثير من الألبومات المغناءة بواسطة ألة او ألتين يتسيد فيها العود الريادة .. ويظهر ذلك في ألبومات سيف الجامعة وهاشم ميرغني وزيدان إبراهيم والخالدي و حنان النيل و جمال فرفور وعصام محمد نور وعددا مقدرا من الفنانين الشباب ..
كما نلاحظ ان عوض أحمودي صار مرافقا بالعزف منفردا على العود لعدد من كبار المطربين مشهود لهم بمهارة العزف مثل عبد الكريم الكابلي وعبد القادر سالم ومحمد وردي وهذا أن دل إنما يدل على إعترافهم بعبقريته وإمكانياته الهائلة في تطويع الألة ..
لست في وضع يتيح لي تناول أو نقد أعمال وطريقة عزف فنانينا الكبار المخضرمين على الة العود ولكني دوماً إتذكر مقولة سمعناها من اساتذتنا في معهد الموسيقى والمسرح وهي أن طريقة وتكنيك أكثرية مطربينا المخضرمين تعاني من خلل واضح في (العفق) وتخير مواضع الضغط على الاوتار مما تخلق نوعا من النشاذ ، ويظهر ذلك جليا في التسجيلات القديمة والحديثة نوعا ما في الإذاعة والتلفزيون ، أتمنى من ذوي الإختصاص توضيح هذه النقطة لأهميتها وفائدتها للمهتمين والدارسين ..
صنفرة :
هل نطمح ان يؤسس لنا الاستاذ عوض أحمودي (بيت العود السوداني) !! أم هو ضربٌ من الأحلام !!
|
|
|
|
|
|
|
|
Re: عوض أحمودي !! عَلِمَنَا كيف نجعل اعوادنا تغني وتبكي وتجادل !! (Re: ناذر محمد الخليفة)
|
Quote: عوض أحمودي لم يأت من فراغ ولم يظهر فُجاءة وفجاة كما ظهر الكثيرين من أنصاف المبدعين رغم ان قمة ظهور نجمه وبزوغه كان في زمن ساد فيه القبح والصديد وفُسدت آذان واذواق السودانيين بفعل فاعل |
يا سلام يا ناذر الأستاذ أحمودى مبدع متميز وليت "بيت العود السودانى" يصير حقيقة واقعة. ----------- ربنا يلطف بأهلنا الطيبين والفاعل ربنا يدمَروا قول آمييييييييييين
| |
|
|
|
|
|
|
Re: عوض أحمودي !! عَلِمَنَا كيف نجعل اعوادنا تغني وتبكي وتجادل !! (Re: ناذر محمد الخليفة)
|
ناذر يا ود الخليفة .. كعادتي مشاتراً وشايت ضفاري .. تعرف عوض احمودي عزاف مافيها كلام لكن في كتير من الأحيان اعتبر إنو عزفو من النوع المزعج !!! لأنو في غالبية عزف احمودي مع الفنانين تجده يكثر من اللعب على اوتار العود والضغط عليها بشدة فتجده يطغى حتى على صوت المغني وحتى في الفرقة الموسيقية تجد احمودي يحاول إظهار عزفه اكثر من باقي الالات ولا ادري ما السبب.. عوض احمودي لديه عيب اخر وهو إصراره على المشاركة في الغناء مع كل فنان تتم إستضافته هذا إن لم يطلب احمودي من مقدم البرنامج ان يغني اغنية كاملة بنفسه .. نعم العزف والخروج عن اللحن أو اللعب بي العود حاجة جميلة ومطلوبة في العزف حتى تخرجنا من رتابة اللحن لكن للأسف احمود يكثر منها حتى يكاد يفقد اللحن الأساسي رونقه .. تعرف يا ناذر انا بحب جداً عزف الكردفاني على الة العود لأنو عزف واقعي وما مزعج في كثير من الأحيان ( ما عارف حا تفهم لي مزعج دي انا قاصد بيها شنو ولا لأ ) .. حتى ود اللمين ملك العود بقى في معظم اغانيهو كان ما دخل جدعة للعود ما بيرتح وصار عزف ود اللمين يتشابه من اغنية لأخرى مع اختلاف اللحن طبعاً ولكن الفكرة مكررة ..
ما قلت ليك الزول المشاتر جاك !!!
تخريمة : من اجمل اللحظات التي استمتعت فيها بالة العود هي اللحظة التي كنت استمع فيها لتسجيل اغنية ود اللمين (زاد الشجون) حفل لندن عندما تبدأ الموسيقى بالعزف في البداية وقبل ان تبدأ الأغنية ليدخل فجأة ود اللمين صوت الة العود ويعزف عزف (بي تحت تحت ) حاجة قمة الروعة ..اتمنى لو بتكون بتلاحظها ..
| |
|
|
|
|
|
|
Re: عوض أحمودي !! عَلِمَنَا كيف نجعل اعوادنا تغني وتبكي وتجادل !! (Re: عمر الفاروق)
|
Quote: من اجمل اللحظات التي استمتعت فيها بالة العود هي اللحظة التي كنت استمع فيها لتسجيل اغنية ود اللمين (زاد الشجون) حفل لندن عندما تبدأ الموسيقى بالعزف في البداية وقبل ان تبدأ الأغنية ليدخل فجأة ود اللمين صوت الة العود ويعزف عزف (بي تحت تحت ) حاجة قمة الروعة ..اتمنى لو بتكون بتلاحظها |
أها دي المرة التانية في حياتك تقول كلام معقول. بقيت تباري المستنيرين و لا شنو?
| |
|
|
|
|
|
|
Re: عوض أحمودي !! عَلِمَنَا كيف نجعل اعوادنا تغني وتبكي وتجادل !! (Re: ناذر محمد الخليفة)
|
Quote: أها دي المرة التانية في حياتك تقول كلام معقول. بقيت تباري المستنيرين و لا شنو? |
ما دام كلامي بقا معقول بالنسبة ليك فها انا ذا انط من كلامي واقول اجمل ما استمعت له طيلة حياتي هذه الأغنية الجميلة : انا بشربوا الليمون ..انا بدخلو الصالون ..راجل المرا حلو حلا .. انا بدخلوا الصالون انا بجيبو بي القانون .. راجل المرا ده حلو حلا .. وانتو سيبو السيطرة ..راجل المرا ده حلو حلا .. سيبو سيبو الجمجرة ..راجل المرا ده حلو حلا ... وهاااااااااااااا ..فووووووووووق ..ستتتتتتتتتتتتتتتو .. الصفقة وين ؟؟؟؟؟؟ والما بتصفق إنشاااااااااااااااء الله ما يعرسوها .. والمعرسة تتطلق ..
| |
|
|
|
|
|
|
Re: عوض أحمودي !! عَلِمَنَا كيف نجعل اعوادنا تغني وتبكي وتجادل !! (Re: ناذر محمد الخليفة)
|
عبد الله سلامات ..
Quote: يا سلام يا ناذر الأستاذ أحمودى مبدع متميز وليت "بيت العود السودانى" يصير حقيقة واقعة.
|
با ريت والله بس داير أقوليك حاجة انا حزنت ليها ..
تتخيل يوم زيارة كاظم الساهر السودان وإحياءوا لي الحفلة الكانت في قاعة الشارقة ؟!! اليوم داك كاظم الساهر هو الطلب من السودانيين إنو يسعوا لتأسيس بيت العود السوداني .. وكان حاضر الحفل واحد من فطاحلة عازفي العود اللي هو الاستاذ بشير عباس .!!
أها لحدي يوم الليلة دي واحد إستلم المبادرة دي ولا إتبناها مافي !!
| |
|
|
|
|
|
|
Re: عوض أحمودي !! عَلِمَنَا كيف نجعل اعوادنا تغني وتبكي وتجادل !! (Re: ناذر محمد الخليفة)
|
عمر الفاروق يا رايق ..
Quote: ناذر يا ود الخليفة .. كعادتي مشاتراً وشايت ضفاري .. |
لا لا في دي إطمن إتعودنا عليك كدة
Quote: تعرف عوض احمودي عزاف مافيها كلام لكن في كتير من الأحيان اعتبر إنو عزفو من النوع المزعج !!! لأنو في غالبية عزف احمودي مع الفنانين تجده يكثر من اللعب على اوتار العود والضغط عليها بشدة فتجده يطغى حتى على صوت المغني وحتى في الفرقة الموسيقية تجد احمودي يحاول إظهار عزفه اكثر من باقي الالات ولا ادري ما السبب..
|
نحن العوادين ديل بنعرف السبب يا عمر ..
أنا كنت داير البوست دا يكون بوست اكاديمي تحليلي مع استصحاب راي المستمعين والمهتمين يعني زي ما تقول كدي نظام جلسة إستماع ومناقشة .. وأنا كنت عارفك حا تجي ناطي لكن ما قايلك حا تجي قريب كدي
أول حاجة موضوع انو عود يطغى على صوت المغني دي في نظري (لو حصلت) حاجة جميلة جدا خاصة لو جات من فنان مبدع زي عوض دا ..
Quote: عوض احمودي لديه عيب اخر وهو إصراره على المشاركة في الغناء مع كل فنان تتم إستضافته هذا إن لم يطلب احمودي من مقدم البرنامج ان يغني اغنية كاملة بنفسه ..
|
هسي عيوب صوتو دا ما شغلنا هنا ، وبالمناسبة يا عمر عوض دا اول ما انا شفتو كان قبل اكتر من عشرة سنوات في حلقة تلفزيونية وكان بيقلد طريقة عزف وغناء الموسيقار محمد الامين وبالجد صوتو ما بالشي البيخليك تقول إنو فيهو عيب ..
Quote: نعم العزف والخروج عن اللحن أو اللعب بي العود حاجة جميلة ومطلوبة في العزف حتى تخرجنا من رتابة اللحن لكن للأسف احمود يكثر منها حتى يكاد يفقد اللحن الأساسي رونقه .. تعرف يا ناذر انا بحب جداً عزف الكردفاني على الة العود لأنو عزف واقعي وما مزعج في كثير من الأحيان ( ما عارف حا تفهم لي مزعج دي انا قاصد بيها شنو ولا لأ ) ..
|
يا عمر .. دي اجمل حاجة في العود .. ولو بتلاحظ في فرق كبير جدا لمن ود الامين يغني غنية بالعود ويغني نفس الغنية بالاوركسترا لإنو في حالة الأوركسترا إنت بتكون ملزم بي خط معين ونوتة معينة لكن لمن تكون براك إنت بتكون ملزم بي احاسيسك ومشاعرك تجاه الالة بس .. لاحظ إنو احمودي ما بيكرر اللازمة الموسيقية زاتا مرتين حتى لو كان في لحن دائري وإذا ما كان شغال مع اوركسترا وطلع من اللحن الاساسي فدي بيسموها حاجة تانية ..
صنفرة :
ممكن باقي الزملاء يجو يشرحوا ليك الأمور دي بصورة أعمق من كدة من ناحية اكاديمية !!
| |
|
|
|
|
|
|
Re: عوض أحمودي !! عَلِمَنَا كيف نجعل اعوادنا تغني وتبكي وتجادل !! (Re: ناذر محمد الخليفة)
|
كوستاوي ..!!
Quote: أها دي المرة التانية في حياتك تقول كلام معقول. بقيت تباري المستنيرين و لا شنو? |
يا زول ما تروق المنقة !! أنحنا بنتكلم في الفن هسي .. ما تشنج لينا عمر دا ياخ !!
Quote: ما دام كلامي بقا معقول بالنسبة ليك فها انا ذا انط من كلامي واقول اجمل ما استمعت له طيلة حياتي هذه الأغنية الجميلة : انا بشربوا الليمون ..انا بدخلو الصالون ..راجل المرا حلو حلا .. انا بدخلوا الصالون انا بجيبو بي القانون .. راجل المرا ده حلو حلا .. وانتو سيبو السيطرة ..راجل المرا ده حلو حلا .. سيبو سيبو الجمجرة ..راجل المرا ده حلو حلا ... وهاااااااااااااا ..فووووووووووق ..ستتتتتتتتتتتتتتتو .. الصفقة وين ؟؟؟؟؟؟ والما بتصفق إنشاااااااااااااااء الله ما يعرسوها .. والمعرسة تتطلق .. |
عاجبك كدة يا كوستاوي !!!
صنفرة :
عمر ... لوك الصبر وما تنحبط ..!!
| |
|
|
|
|
|
|
Re: عوض أحمودي !! عَلِمَنَا كيف نجعل اعوادنا تغني وتبكي وتجادل !! (Re: ناذر محمد الخليفة)
|
يا سلاااااام عليك يا الامين ياخ !!!
تتصور أنا جبيل دخلت قوقل وقوقلتو حتة حتة عشان الم لي في صورة للرائع دا وما لقيتا .. تسلم كتير ..
طبعا انا متاكد إنو في ناس أول مرة يشوفوا عوض أحمودي ..
صنفرة :
لا حظوا كويس لي طريقة مسك الريشة وطريقة مسك الرقبة بتاعت العود ووضع الاصابع عند الضغط أو ما يسمى (العفق) !!
ما في أي فنان سوداني حسب ما اعتقد بقدر يعزف عود وهو ماسك الريشة بالطريقة دي !! وأمكن دا سر الجمال دا كلو !!
| |
|
|
|
|
|
|
Re: عوض أحمودي !! عَلِمَنَا كيف نجعل اعوادنا تغني وتبكي وتجادل !! (Re: ناذر محمد الخليفة)
|
. شكرا يا ناذر على هذا البوست ، ياخي المنبر هذه الأيام فعلا محتاج ليهو لـ ( واحة ) زي دي نستريح فيها بعد أن وصل لمرحلة من ( الاحتقان ) ما عادية أبدا بفعل ( تشنج ) الكثيرين ..
للأسف انا لا باحث ولا ناقد وما ناقش اي حاجة في علم الموسيقى ..وبالتالي ما حأضيف حاجة ..بس بعتبر نفسي مستمع جيد .. ومشكلتي بكون متطرف لما تعجبني حاجة .. ورأيي في الاستاذ عوض أحمودي من الآراء المتطرفة ... باختصار بعتبرو (أمهر) من عزف آلة العود في السودان على الإطلاق ...ولا يلغي ذلك اعجابي الشديد بالعمالقة : أبو اللمين ، برعي ، بشير عباس... واكتر حاجة محيراني صراحة هي الطريقة البيمسك بيها الريشة.. تحية للاستاذ عوض حمودي .. ويا ريت تتحقق أمنية " بيت العود السوداني " وشكرا مجددا أخي ناذر..
| |
|
|
|
|
|
|
Re: عوض أحمودي !! عَلِمَنَا كيف نجعل اعوادنا تغني وتبكي وتجادل !! (Re: ناذر محمد الخليفة)
|
ناذر الخليفة : اولاص اود التنبيه إني ما قصدت إنو صوت احمودي كعب ولكن قصدت إنو بيحب يغني وبي الوااااااضح كده بيحشر نفسو ويفرض نفسو في كتير من الاحيان .. احمودي عزاف ما قلنا حاجة لكني اصر على حكاية العزف المزعج دي والعود يا ناذر الة حنينة زيها زي الكمنجة ولو داعبتها صاح وروقت المنقة معاها بتديك الحان شجية وحزينة وحنينة في نفس الوقت .. عوض احمودي في كتير من الاحيان يغييب الحنية والحزن من الة العود ليثبت مدى كفاءته في العزف والتي لا يختلف عليها اثنان فلماذا دوماً يتلاعب بالاوتار؟؟؟ افضّل لو ان احمودي بين فترة واخرى ان يتلاعب بالاوتار ولكن ليس على الدوام !!!!!! الموضوع التاني يا ناذر هو تخصيص بيت العود السوداني وهنا انا ما عارف لييه تحديداً بيت العود السوداني دون بقية الالات ؟؟؟ وهل ده حا يفتح لينا بيوت تانية زي بيت البنقز وبيت الكمنجة وبيت البيز وبيت الخرابة ؟؟؟؟ وهل العود من الالت السودانية الأصيلة ام هو الة دخيلة ؟؟؟ وهل يعزف السودانيون العود كما يعزفه العرب؟؟؟؟ استمعت للعراقيين في عزف الة العود فوجدتنا في وادي وهم في وادي اخر وطبعاً واديهم أحنّ ودي للصراحة !!! حتى اخواننا المصريين بيلعبو بالعود بي صورة جميلة خالص وبيطلعوا الالحان بيهو كما ينبقي !!!! في فنان سعودي على ما اظن إسمو عباد الجوهر بيلعب بالعود كأحلى ما يكون .. اعود وأقول ليه نحن عزفنا ما زي عزف الناس ديل وخلوني من حكاية السلالم دي فحتى عندما نعزف خليجي وعربي بنكون فارقين !!!
تخريمة : بيت العود في السعودية زي لمن تقول الطلح والشاف في السودان يا ناذر
| |
|
|
|
|
|
|
Re: عوض أحمودي !! عَلِمَنَا كيف نجعل اعوادنا تغني وتبكي وتجادل !! (Re: ناذر محمد الخليفة)
|
سلامات يا ود الفاروق العود أصلا آلة ( شرقية ) عشان كده نحن ما بنعزف زي اصحابو الحقيقيين ، يعني ( السلالم ) القلت خليك منها دي بعتقد انو هي السبب الرئيسي البخليك تحس بالفرق الكبير بين عزف السودانيين وباقي العرب لهذه الآلة الجميلة ..روعة العود لمن تستخدم الأرباع والانصاص .. ونحن الطاغي على اغنياتنا الدرجة الكاملة .. ونادرا ما نلقى انصاص ( موجودة في أغنيات غرب السودان ) أما الأرباع فاعتقد انها مما موجودة كلو كلو .. شايف ...أخوك بقى ينظر في علم الموسيقى كمان في انتظار أن يطل أحد المتخصصين ..سيما الاستاذ الموصلي ..
تحياتي ..
| |
|
|
|
|
|
|
Re: عوض أحمودي !! عَلِمَنَا كيف نجعل اعوادنا تغني وتبكي وتجادل !! (Re: ناذر محمد الخليفة)
|
سلامات يا حاتم ..
Quote: ومشكلتي بكون متطرف لما تعجبني حاجة .. ورأيي في الاستاذ عوض أحمودي من الآراء المتطرفة ... باختصار بعتبرو (أمهر) من عزف آلة العود في السودان على الإطلاق ...ولا يلغي ذلك اعجابي الشديد بالعمالقة : أبو اللمين ، برعي ، بشير عباس... واكتر حاجة محيراني صراحة هي الطريقة البيمسك بيها الريشة..
|
والله رغم إنو اتطرف في الموسيقى ما حبابو إلا إنو بالجد أنا بوافقك جدا في موضوع تطرفك لي عوض أحمودي دا !!
كان مرة في بوست من البوستات أنا ذكرت وقلت لمن أمشي لي أي محل عشان أشتري شرايط كاسيت بسأل سيد المحل : عندك أي شريط جديد بيعزف فيهو عوض أحمودي !! بعد داك بشتري الشريط ختى لو كان الفنان البيغني فيهو (كباشي العيلفون) !!
صنفرة :
في واحدة من اللقاءات الصحفية تم إتهام عوض أحمودي بي إنو بيتعامل مع أصوات تافهة في بعض الاحيان وعوض ما نكر الحتة دي وطوالي أقر بيها وبرر ليها ..
برر قال شنو !!... دي خليها لي قدام .!!
| |
|
|
|
|
|
|
Re: عوض أحمودي !! عَلِمَنَا كيف نجعل اعوادنا تغني وتبكي وتجادل !! (Re: ناذر محمد الخليفة)
|
عمر ...
Quote: عوض احمودي في كتير من الاحيان يغييب الحنية والحزن من الة العود ليثبت مدى كفاءته في العزف والتي لا يختلف عليها اثنان فلماذا دوماً يتلاعب بالاوتار؟؟؟
|
عارف يا عمر يا ريتك بس لو سمعت شريط لي سيف الجامعة إسمو أحرموني ولا تحرموني بيعزف فيهو عوض دا (الله ورقبتو) !! وحا تعرف الحنية على اصولا !!
Quote: الموضوع التاني يا ناذر هو تخصيص بيت العود السوداني وهنا انا ما عارف لييه تحديداً بيت العود السوداني دون بقية الالات ؟؟؟ وهل ده حا يفتح لينا بيوت تانية زي بيت البنقز وبيت الكمنجة وبيت البيز وبيت الخرابة ؟؟؟؟
|
قبل ما ارد على دي في تصحيح بسيط . الموسيقار العربي الذكر موضوع بيت العود في قاعة الشارقة ما كاظم الساهر .. المقصود هو الموسيقار العراقي نصير شمة ...
Quote: انا ما عارف لييه تحديداً بيت العود السوداني دون بقية الالات ؟؟؟ |
لإنو يا عمر ألة العود هي الالة البتستعمل في تلحين الاعمال الموسيقية لغالبية الفنانين والموسيقيين السودانيين !! عشان كدة بيت العود دا بيكون لي تنمية مهارات العازفين والملحنيين وتوسيع مداركم بتعريفم بي الامكانيات الهائلة جدا البتحتويها ألة العود .. وإذا ما تمكنو من الالة دي بالتأكيد حا ينتجوا لينا ألحان جميلة جدا أساسا طبعا السلم الخماسي لكن حا يستعملوهو بكل إمكانياتو اللسة ما إكتشفوها !!
بالمناسبة عندنا ما يمكن إنك تسميه (بيت الألات الإيقاعية) تحت مسمى (مليجي بيت) تفتكر الغرض منو شنو ؟!!!
Quote: وهل يعزف السودانيون العود كما يعزفه العرب؟؟؟؟ استمعت للعراقيين في عزف الة العود فوجدتنا في وادي وهم في وادي اخر وطبعاً واديهم أحنّ ودي للصراحة !!! حتى اخواننا المصريين بيلعبو بالعود بي صورة جميلة خالص وبيطلعوا الالحان بيهو كما ينبقي !!!! في فنان سعودي على ما اظن إسمو عباد الجوهر بيلعب بالعود كأحلى ما يكون .. اعود وأقول ليه نحن عزفنا ما زي عزف الناس ديل وخلوني من حكاية السلالم دي فحتى عندما نعزف خليجي وعربي بنكون فارقين !!!
|
يلا كدا جيتني في جرح زي ما بيقولو !!..
Quote: وهل يعزف السودانيون العود كما يعزفه العرب؟؟؟؟ |
طبعا لا ..
ولا دي ما قصدي بيها أنواع السلالم والمقامات وكدا .. لا دي المقصود بيها في طريقة مسك العود وضغط الاوتار وإستخراج الحروف بطريقة صحيحة ذي ما أنا ذكرت فوق .. وممكن الموصلي يحكي ليك لمن الكوريين جو المعهد ولقوا واحد من عازفي العود ضاغط وتر في العود على اساس إنو دا (فا ميجر) قام الكوري إستغرب وقال ليهو : لا دي ما فا ميجر دي فا أمدرمان !! والقصد إنو من الأساس ضغطت العازف داك كانت خطأ عشان كدة طلعت نغمة خطأ ..
صنفرة :
حا ألف واجي أحكي ليك عن معاناتي في المعهد لمن إنجبرت اغير التكنيك الكنت بعزف بيهو من بدري ، والفرق الانا شعرت بيهو لمن إتعلمت التكنيك الجديد ودا أمكن يجاوب علي سؤالك (هل نحنا بنعزف عود زي العرب؟) !!
| |
|
|
|
|
|
|
Re: عوض أحمودي !! عَلِمَنَا كيف نجعل اعوادنا تغني وتبكي وتجادل !! (Re: ناذر محمد الخليفة)
|
حاتم إبراهيم ..
Quote: روعة العود لمن تستخدم الأرباع والانصاص .. |
عليك نوووووووووووووووررر
يلا الروعة دي ما بتتم إلا بإستخدام تكنيك معين في توظيف أصابع اليد الشمال الاربعة في الضغط على الاوتار بطريقة معينة والعازف يكون حافظ المسطرة بالكامل وعارف إنو لو صباعو فرق أو ما ضغط على المكان المطلوب حتى لو كان الفرق أقل من سنتمترين من ، ما بتجبهو النغمة بصورة صحيحة ..
| |
|
|
|
|
|
|
Re: عوض أحمودي !! عَلِمَنَا كيف نجعل اعوادنا تغني وتبكي وتجادل !! (Re: ناذر محمد الخليفة)
|
الأخ نادر طبعا حكاية ( تطرفي ) في الرأي الفني كان القصد منها (المبالغة) ليس إلا ، لكن في الواقع انا من أشد المقتنعين بحكاية الأذواق واختلافها بين الناس ، والحمد لله في كل مجالات الحياة لا انتهج التطرف وانحو للوسطية ..
Quote: أحكي ليك عن معاناتي في المعهد لمن إنجبرت اغير التكنيك الكنت بعزف بيهو من بدري |
الحكاية لو فيها ( معاهد ) معناها لازم أسعى للتواصل معك ماسنجريا ..لأنني أعشق هذه الآلة ، ولدى محاولات .. بس خليني ألم لي في موقع اقدر ارفع فيهو المحاولات عشان أقدك بيها.
ودي ( رشوة ) فوتوشوبية صغيرة ..
.
| |
|
|
|
|
|
|
Re: عوض أحمودي !! عَلِمَنَا كيف نجعل اعوادنا تغني وتبكي وتجادل !! (Re: ناذر محمد الخليفة)
|
ناذر اخوي:
Quote: بالمناسبة عندنا ما يمكن إنك تسميه (بيت الألات الإيقاعية) تحت مسمى (مليجي بيت) تفتكر الغرض منو شنو ؟!!! |
ما عايز أعرّج بي البوست لكن كم تعلم مليجي اخوان ربما انها فرقة للتميز اكتر من انها فرقة لي خدمة الموسيقى بي صورة عامة وإن كان ما يقدمه الملاليج قمة الروعة .. والمقصود هنا إنو الفرقة تكونت بحكم انهم من بيت واحد واسرة واحدة وحتى الاخرون هم اصدقاء الاسرة ..لكن لو كان الليلة فرقة الالات دي فيها مليجي وفيها هريدي وفيها العبيد وفيها ازهري علي وحسن علي وفيها الهادي الصديق العجب و و و و من عازفي الايقاع لكانت هي بيت الايقاعات .. اعرف تحيزك وحبك لالة العود وده البيخليك تفكر في موضوع بيت العود ده وإن كان برضو كلامك عن التلحين فيهو شي من المنطق بس ما كل المنطق البيخلينا نعمل ليهو بيت عدييييل في ظل غلاء الإيجارات (دي اسة خلوها شقة ) ..
Quote: دي المقصود بيها في طريقة مسك العود وضغط الاوتار وإستخراج الحروف بطريقة صحيحة ذي ما أنا ذكرت فوق .. |
يعني أسة يا ناذر عايز تقنعني إنو بشير عباس واحمودي والراحل برعي والكردفاني ديل كلهم بيمسكوا العود غلط !!!! لأنو يا ناذر حتى عملاقتنا ديل عزفهم ما زي عزف العرب والنغمة البتطلع منهم ما زي بتاعت العرب وزي ما قلت ليك انا ما بفهم في موضوع السلالم ده كتير لكن بحس حتى لو ديل عزفوا بي السلم السباعي برضو ما بتظبط معاهم النغمة !!!!!
حاتم ابراهيم: وينك يا منقة ؟؟؟ من ديك وعيييييييييييييك ...
Quote: العود أصلا آلة ( شرقية ) عشان كده نحن ما بنعزف زي اصحابو الحقيقيين ، |
ديالمعلومة العايز اسمعها من ناذر لكن ناذر بيزوغ منها بي مبررات تانية !! تعرف يا مان انا في تلاتة الات بحس إنو نحن السودانيين ديل ما بنديهم حقهم زي باقي العرب واحدة منهم الة العود والتانية الة الأكورديون ودي بالذات بحس نحن فيها شايتين ضفااااااااري وما حصل سمعت لي صولات اكورديون بتشبه حق الناس وإن كانت من الموسيقار ود الحاوي !! مرة واحدة بس في شريط سيب عنادك في اغنية هو الإختار دنيتو اتقوع إنو العازف كننة كان بيعمل شغل سمح في الالة دي مع بداية الأغنية .. الالة التالتة هي الكمنجة وده موضوع ما قصر معانا فيهو الأستاذ الموصلي ..
Quote: روعة العود لمن تستخدم الأرباع والانصاص .. |
انت عارف السودانيين ده ياهو عيبهم من زماااااان حتى في درجات الإمتحان و الإملاء إتعودوا يجبروا النص والربع للواحد الصحيح تخريمة : طولنا ما سمعنا ليك حاجة يا مان حمد لبد ولا شنو ؟؟
| |
|
|
|
|
|
|
Re: عوض أحمودي !! عَلِمَنَا كيف نجعل اعوادنا تغني وتبكي وتجادل !! (Re: ناذر محمد الخليفة)
|
سلامات الموصلي ..
Quote: دي فيها مشكله
هل استمعت أو رايت عادل الصديق المقيم بالسعودية جده؟؟؟ هذا هو (تمبعلو العود) لانه لايخضع لقانون الخوف لبيمول لb او دييز #
|
انا صراحة لا سمعتو ولا قابلتو مع إنو كلامك عنو شوقني ليهو ..
لكن انا لمن قلت عوض أحمودي هو سيد الساحة حاليا قصدي بي وجودو وبي حضورو ومساهماتو لكن لمن يجي عادل الصديق دا ويفرض حضورو أمكن الحال يتغير ..
واضافة لي كلامك في كتيرين جدا مغمورين وبعيدين عن اجهزة الاعلام وهم زي ما تقول (بعاعيت) بتاعين عود وعندهم راي في اكبر أستاذ في الساحة .. لكن هسي كلامي للموجود في الساحة اللي هو عوض احمودي ..
Quote: وبعدين من حيث رقة الريشه ونعومتها أظن بشير عياس في الجيل القديم والسقيد
|
أنا والله ما عارف نسيت علي السقيد دا كيف !!
صنفرة :
عوض أحمودي مؤهل تماما ليكون ملحن ومؤلف موسيقي (بالمناسبة هو برضو عازف )كمان( بدرجة محترف) .. بس كيف الشركات تخليهو مع نفسو شوية لإنو اكيد بي حسو الفني الرفيع عندو افكار جميلة جدا في مسألة التاليف !!
| |
|
|
|
|
|
|
Re: عوض أحمودي !! عَلِمَنَا كيف نجعل اعوادنا تغني وتبكي وتجادل !! (Re: ناذر محمد الخليفة)
|
عمر الفاروق صباح الخير ..
Quote: اعرف تحيزك وحبك لالة العود وده البيخليك تفكر في موضوع بيت العود ده وإن كان برضو كلامك عن التلحين فيهو شي من المنطق بس ما كل المنطق البيخلينا نعمل ليهو بيت عدييييل في ظل غلاء الإيجارات (دي اسة خلوها شقة |
والله لو قام بيت العود (ما بتاع السعودية) حال العزف وترقية إداء السودانيين حا ينصلح كتير لإنو هسي في كتير من الاخطاء وعن فنانين كبار ومحترفين ..
Quote: يعني أسة يا ناذر عايز تقنعني إنو بشير عباس واحمودي والراحل برعي والكردفاني ديل كلهم بيمسكوا العود غلط !!!!
|
أنا ما قلت غلط يا عمر !!! مالك داير تورطني في كلام انا ما قلتو !!
Quote: ديالمعلومة العايز اسمعها من ناذر لكن ناذر بيزوغ منها بي مبررات تانية !!
|
أنا ما زغت منها لكن في تباين واضح وأنا حا اوريك الفرق لي قدام ..
| |
|
|
|
|
|
|
Re: عوض أحمودي !! عَلِمَنَا كيف نجعل اعوادنا تغني وتبكي وتجادل !! (Re: ناذر محمد الخليفة)
|
الله يبارك فيك يا موصلي
Quote: شكرا ياناذر ونحن نحيي كل هؤلاء المبدعين
ونتمني ألا يتوقفوا عن الممارسة والتمرين فالوقوف كارثة
ونتمنى أن نسمع مؤلفات عوض الموسيقية
السقيد واحدة من أنعم الريشات التي سمعتها في حياتي
مع تحياتي لكل المساهمين هنا |
المشكلة إنو عوض احمودي غير متفرغ وغرتباطاتو كتبرة مع الشركات والفنانين ، ولو إتفرغ شوية للتأليف الموسيقي فأنا متأكد إنو حيضاهي لينا نصير شمة وبرعي محمد دفع اللع وبشير عباس !!
| |
|
|
|
|
|
|
Re: عوض أحمودي !! عَلِمَنَا كيف نجعل اعوادنا تغني وتبكي وتجادل !! (Re: ناذر محمد الخليفة)
|
Quote: لدي النقاد والباحثين السودانيين رأيا .. يقولون ان السودان لم ينجب ولن ينجب عبقرية تعزف على العود مثل برعي محمد دفع الله وربما تراجعوا عن تشددهم قليلا حين تسيد الموسيقار محمد الامين الساحة ردحا من الزمن ، تنازعها معه الأستاذ حسن عطية ،، وما بين عهد برعي محمد دفع الله وعهد عوض أحمودي برز الكثيرون في ترويض هذه الألة الساحرة ... ربما يتعصب البعض لأبو عركي البخيت او الجابري أو مصطفى سيد أحمد أو غيرهم .. ولكل منطلقاته ورؤاه وقناعاته .. |
اخى ناذر شكرا كتير لانزالك هذا البوست لانو عوض احمودى هو من كسر قاعدة الديناصورات الامير و القدير و الخطير و اخطر خطير اشهد بأنى موسيقى متخصص و اقولها بكل قوة عازف بمهارة عوض احمودى على آلة العود لم يظهر فى الساحة السودانية حتى الآن هو بس البشبه نفسو مع فائق التقدير هشام كمال
| |
|
|
|
|
|
|
Re: عوض أحمودي !! عَلِمَنَا كيف نجعل اعوادنا تغني وتبكي وتجادل !! (Re: ناذر محمد الخليفة)
|
هشام كمال ..
Quote: اخى ناذر شكرا كتير لانزالك هذا البوست لانو عوض احمودى هو من كسر قاعدة الديناصورات الامير و القدير و الخطير و اخطر خطير اشهد بأنى موسيقى متخصص و اقولها بكل قوة عازف بمهارة عوض احمودى على آلة العود لم يظهر فى الساحة السودانية حتى الآن هو بس البشبه نفسو مع فائق التقدير
|
دي شهادة خطيرة جدا جدا !!!
حا أجي اقول رايي في شهادتك دي بعد ما أسمع راي الشباب ..
شكرا كتير على الصراحة ..
| |
|
|
|
|
|
|
Re: عوض أحمودي !! عَلِمَنَا كيف نجعل اعوادنا تغني وتبكي وتجادل !! (Re: ناذر محمد الخليفة)
|
تعقيبي على شهادة الزميل هشام كمال ..
ظللت وفي هذا المنبر وعبر الكثير من البوستات أدعو للشفافية الفنية بين المبدعين من موسيقيين وشعراء وفنانين وغيره ، حيث أن حال الساحة الفنية في غاية السوء والتخبط وكل ذلك مرجعه المجاملات الشديدة في الاعمال الفنية التي تسود هذا الوسط ..
ولهذا السبب وحده إنتقدت الشاعر التجاني حاج موسى في بوست ناصر خليل وإنتقدت الموسيقار وردي في بوست معلوم كما إنتقدت ايضا الموسيقار عثمان النو لتعاونه مع محمود عبد العزيز في البوم مرت الايام ،
أرجع إلى الوراء قليلا إلى حادثة شروق أبو الناس وعروضها التي قدمتها عند مجيئها للسودان مع دكتور معز عمر بخيت ، حيث أنني قرأت في صحيفة الصحافة ان موسيقارا كبيرا إنتقد أداء الفنانة شروق ووضح ان بها عيوب في صوتها وإدائها ، ولكن ما أحزنني ان هذا الموسيقار رفض كتابة إسمه أمام شهادته ... لماذا ؟!!!!!!!!!
وحيث أنني على علاقة وثيقة جداً بأحد اساتذتي القديرين في معهد الموسيقى والمسرح ، فقد ذهبت إليه لشكي أنه هو من اطلق هذا التصريح وفعلا لم يخب ظني وتناقشت معه في هذا الأمر ، وسألته عن السبب الذي جعله لا يذكر إسمه في الصحيفة فكان ان ادلى لي بعدة إفادات وأقوال وجملة مما يمكن ان يعتري علاقاته والوسط الفني برمته لتشابك وإختلاط الخصوصيات والإجتماعيات مع بعضها البعض إذا ما قد كان ذكر إسمه ، وقد حزنت حقيقة لما ذكره وامسك عن التفاصيل ..
نعود مرة أخرى لعوض أحمودي ..
بما انني من الجيل الجديد ويتهمني البعض إتهاماً (قد يكون صحيحاً) بأني من المتحيزين لجيلي هذا إيما تحيز ، فعندما كتبت هذا البوست لم أشأ أن أذكر أن عوض أحمودي هو ابرع عازف عود أنجبه السودان لعلمي التام ان هنالك ثوابت عند بعض المتعصبين لأبناء جيلهم للدرجة التي جعلت البعض يصرح ويغلق الطريق أمام اي عبقرية موسيقية قد تبرز إلى السطح بقوله (السودان لم ولن ينجب عازفاً على العود بقامة برعي محمد دفع الله) !! وهذا في رأيي ظلم وإضطهاد للكثيرين وإحباطاً لهم من الجد والإجتهاد طالما الحكم قد صدر مسبقاً ..
ليس المجال هنا مجال من هو الافضل أو مقارنة بين أحمودي وبرعي وبشير عباس أو غيرهم ولكن تثبيت أسلوب وطريقة عزف عوض الماهرة على الالة واحاسيسه الفريدة والتي لا يضاهيها أحد في الساحة حاليا ، وللأسف لا امتلك الكثير من التسجيلات لعوض حتى اقوم بعرضها هنا ..
اشكر كثيرا الزميل هشام كمال على إفادته هذه وحتى ان اعتبرها البعض راي فردي او (ذوقي) يخصه فستظل في نظري شهادة من متخصص وموسيقار غير مجروحة أو مشكوك بها ..
صنفرة :
مع ملاجظة أن عوض احمودي ليس من جيلي ولا انا من جيله ..
| |
|
|
|
|
|
|
Re: عوض أحمودي !! عَلِمَنَا كيف نجعل اعوادنا تغني وتبكي وتجادل !! (Re: Elmosley)
|
Quote: عزيزي هشام شنو حكاية ديناصورات دي
هل نسيت انك ستصير يوما ديناصورا وكيف سيكون شعورك حينها تجاه هذا التعبير من الاجيال القادمه
ناذر نحن برضو متخصصين |
استاذى المبجل اذا فقط جيت السودان 48 ساعة و شفت الحاصل حيجيك سكرى و ضغط و ارتفاع فى البولينا لما تصل لحد الاغماء من الذى يجرى فى هذه البلاد الاسمها السودان. اعتزر لك على اللهجة الحاده فى ما يخص الديناصورات لكن بتكون مجبر احيانا انو تكون حاد و الله العظيم تجى تشوف كبار موسيقيينا بيعملوا شنو تطفش من البلد لسبعين سنة. مع خالص التقدير هشام بالمناسبة اتمنى اكون ديناصور يكون عندى الارث الاحترمه و يحترمونى عليهو خالص الاحترام و التقدير متمنينك تكون هنا
| |
|
|
|
|
|
|
Re: عوض أحمودي !! عَلِمَنَا كيف نجعل اعوادنا تغني وتبكي وتجادل !! (Re: ناذر محمد الخليفة)
|
الاستاذ الموصلي ..
Quote: ولاحظت فيك انت الصراحه دي وهسع عند هشام كمال برغم علمي آنه لو سمع عادل الصديق خريج قسم التآليف لاصيب بدهشة كبيرة لبراعته النادرة
|
عندما اسمع شخصيا عادل الصديق فعندها يكون الحكم .. ولكن حاليا وحين إشعار أخر فأحمودي هو سيد الساحة بلا منازع ..
Quote: آما الاستاذ الزميل فقد آجحف في حق نفسه وحق الجمهور وحق شروق آيضا لانها لابد من آن تعرف بعض الارا للموسيقيين (المتخصصين)
|
صدقني ستعذر الرجل إذا ما إستمعت لاسبابه ومبرراته .. رغم إقتناعي التام بالضرر الذي سيسببه تصريحه للعامة إذا ما كتب إسمه وكما اسلفت نعاني في السودان وفي الوسط الفني من عدم شفافية وخلط العام بالخاص ..
وعلى كل حال فشروق يهمها ان تعرف راي المختصين وقد قرأت راي هذا الاستاذ وليس مهما ان تعرف من هو خاصة وان شهادنته غير مجروحة لانه مختص بحق ..
Quote: ناذر نحن برضو متخصصين |
العفو يا موصلي أنا صراحة اعجبت بالوضوح بتاع هشام كمال وانا زي ما انت عارف بحب الوضوح في الطرح ، ودا ما بينفي إنك كنت واضح وعندك رأي برضو كمختص إنو عادل الصديق ابرع من أحمودي رغم إني وللأمانة ما سمعت بي عادل دا ألا في البوست هنا ..
إحترامي الشديد ليو وليك .
| |
|
|
|
|
|
|
Re: عوض أحمودي !! عَلِمَنَا كيف نجعل اعوادنا تغني وتبكي وتجادل !! (Re: عمر الفاروق)
|
شكرا ليك ياعمر سآحاول الرجوع الي ايميلاته القديمة
لكن لو انت في جده الموسيقيين القدامي هناك بوصلوك ليهو لانو كان بدرس العود والموسيقي في النادي الاهلي بجده لفترة طويله الموسيقيين السودانيين بوصلوك ليهو
آما بخصوص عوض فهو عندو استايلو الخاص الجميل بس ماعايزين نظلم ناس زي محمد الامين بشير عباس والسقيد وعادل الصديق وماخفي اعظم
قطعا السودان بلد ولود جدا وبتنجب المبدعين باستمرار
بالله اعمل فيني خير ياعمر ولمني في عادل ده
خلينا نرجعوا لقطار الفن الرفيع
| |
|
|
|
|
|
|
Re: عوض أحمودي !! عَلِمَنَا كيف نجعل اعوادنا تغني وتبكي وتجادل !! (Re: ناذر محمد الخليفة)
|
الموصلي سلامات ..
Quote: عايزك تقارن بين تكنيك محمد الامين وعوض احمودي وعايز اجابه دوغري |
والله بي صراحة :
الكلام دا اكبر من قدرتي ولا أتشوبر واقول ليك بقدر أعمل حاجة زي دي !! دا المقارنات دي شغل كبير وبتاع مختصين وإنت عارف أنا يا دوب إتخرجت أول أمبارح وما داير أنظر في خبرات اكبر مني بي كتير من ناحية الخبرة او الممارسة ..
وبما انك كتبت عن محمد الامين في (غواص في محيط النغم) فبالتاكيد بتكون خبرة في أسلوبو ..
لكن في سؤال مهم داير اعرفو ...
إنت بتعرف احمودي عن قرب وهل عاينت ليهو وإستمعت ليهو بي عين الخبير المختص و حللت عزفو وشغلو ، ولا إستمعت ليهو على الماش بس !!
| |
|
|
|
|
|
|
Re: عوض أحمودي !! عَلِمَنَا كيف نجعل اعوادنا تغني وتبكي وتجادل !! (Re: ناذر محمد الخليفة)
|
.
Quote: ياخي ده في بداياتو كان بقلد محمد الامين عزفا وغنا |
سلامات استاذنا الموصلي إذن عادل الصديق هو من بقينا نبحث عن اسمه في منتصف التسعينات أو هكذا اعتقد .. في تلك الفترة كنا ونحن طلاب في جامعة حلب يتنقل بين أيدينا شريط كاسيت ( وحيد )... حين تستمع للشريط لأول مرة تظن بأنك تستمع للقامة محمد الأمين ولكن بقليل من التصنت تكتشف بأنه ليس هو أما العزف على العود فتشعر بأنك أمام ( مدرسة) متفردة ... لا تزال عالقة بذاكرتي أغنية " فارقني البريدو .. ما بين يوم وليلة " بأداء مميز وفريد .. في العزف ..وفي الغناء .. ..... ماتؤكده على قدرات الفنان عادل الصديق يجلعني أكاد أجزم بأنه من كنا نستمع إليه دون أن نعرف من هو كم أتوق للاستماع إليه الآن .. فهو ( مدهش ) بالفعل ..
أخي عمر الفاروق الف تحية .. وعذرا ..تأخرت في رد تحيتك لأنني لم أدخل البوست منذ أيام انا طبعا يا عمر ما شغال بالعود كتير بجيني مزاج مرة كده وبقعد اجوط فيهو لساعات وانساهو تاني زي شهر ..شهرين حسع بوست ناذر ده شهاني العزف بس للأسف ما لاقي لي موقع لرفع الأغاني يا ريت أنت واخونا ناذر والأخرون تساعدو أخوكم في الحصول على موقع لرفع الأغاني غير موقع ( حب النيل ) لانو لاكج شديد..
تحياتي أخي ناذر ..وأتمنى أن استمع لعزفك .
| |
|
|
|
|
|
|
Re: عوض أحمودي !! عَلِمَنَا كيف نجعل اعوادنا تغني وتبكي وتجادل !! (Re: ناذر محمد الخليفة)
|
.
Quote: نعم ياحاتم ذاك هو عادل الصديق |
اذن يا استاذ سأقوم بتعليق جملة( على الإطلاق ) الواردة في رأيي المتواضع حول المبدع أحمودي حيث قلت بأنه : أمهر من عزف العود في السودان (على الإطلاق ) وذلك لحين أن تسمح لي الظروف للاستماع للفنان عادل الصديق مرة أخرى فكل ما استحضره الآن هو ( دهشتي ) الكبيرة عندما استمعت إليه في منتصف التسعينيات..
Quote: كان متآثر بطريقتي في غنا الفني في البرهه القليله وانا ذاتي لطشتها من الفنان الطيب عبد الله |
دي كلها معلومات جديدة بالنسبة لي كنتيجة طبيعية لندرة تسجيلاتكم يا استاذ فأنتم( تجحفون ) في حقنا كمستمعين ... ( الهجوم خير وسيلة للدفاع ) ـــــ عذرا استاذنا فالطريقة التي تغنى بها عادل الصديق والتي تختلف كليا عن الحقيبة وعن أداء الراحل المقيم أبوداؤد كما تفضلت لم أسمعها إلا في ذلك الشريط لذلك اعتقدت بأنها ( فريدة ) مثلها مثل الأداء الفريد لأغنية ( قصد عنادي ) للرائع السقيد (( أها دي كمان لو طلع في واحد غناها قبلو بطريقتو ديك تبقى مصيبة ))
ــــــــ
تحياتي أخي ناذر لا بأس سأنتظر قعدة (فجائية ).... اصلوا عمرنا كلو في حالة انتظار وللمرة التالتة بطلب منك موقع لرفع الاغاني انت بخيل ولا شنو .
| |
|
|
|
|
|
|
Re: عوض أحمودي !! عَلِمَنَا كيف نجعل اعوادنا تغني وتبكي وتجادل !! (Re: Elmosley)
|
الأخ ناذر خليفه ... تحيتى و احترامى ... معليش ( للمزاحمه !!! ) و امكن دى أول مره اتداخل معك و ( اصبك !!! ) بدون ( صنفره !!! ) ... فعلا الأستاذ عوض احمودى ظاهره و فلته فنيه متفرده فى عزف الة العود الذى املك بعض ( ابجدياته ) و احب النقرعلى أوتاره لدرجة الإدمان و استطيع أن اجارى أغلب فطاحلة العود من برعى و على مكى و بشير عباس و أبو اللمين لىىىى عركى و مصطفى سيد أحمد فى عزفهم ، الا الزول ده ، عوض احمودى ... غلبنى عديل كدى ... يجب الا ننسى فعوض أحمودى كفيف فبالاضافة لأتقانه العزق على العود فهو يتمتع بروح مرحه و خفة دم ممزوجه بعفوية منقطعة النظير ... حكى لى أحد الأصدقاء أن الأستاذ عوض أحمودى بالرغم من أنه كفيف فهو يستطيع تمييز أصواتكم مهما كبر عددكم فى الجلسة الواحدة و يخاطب كل فرد باسمه بمجرد سماع صوته الذى ربما يكون قد سمعه لأول مره من خلال حفل التعارف !!! الأستاذ عوض احمودى حول الة العود البسيطة الى اوركسترا كامله فهى مرات ، كمان ، اورقون و تارات أخر اكورديون ، جيتار و ( بنقز !!! ) ... فلهذا لا نستغرب أن أغلب ( الألبومات ) االغنائية السودانية هذه الأيام بطلها ال LEGEND عوض أحمودى ...أحييك أخ ناذر لهذا البوست الجميل الذى يمجد و يخلد و يشجع نوابغ و مبدعى شعبنا و هم ما زالوا على قيد الحياة !!! تحياتى عبرك لأستاذنا عوض احمودى متعه الله بالصحة و العافية ...
كسره : ناذر اخوى ما تخلينا نكون رابطة ( العوادين !!! ) بالمنبر ... بس السياسه ما معانا !!! عبدالماجد
| |
|
|
|
|
|
|
Re: عوض أحمودي !! عَلِمَنَا كيف نجعل اعوادنا تغني وتبكي وتجادل !! (Re: ناذر محمد الخليفة)
|
عبد الماجد سلامات .. أخيرا فضيت من السياسة وجيتنا بي هنا مرحب بيك كتير في رحاب عوض أحمودي..
Quote: و استطيع أن اجارى أغلب فطاحلة العود من برعى و على مكى و بشير عباس و أبو اللمين لىىىى عركى و مصطفى سيد أحمد فى عزفهم ، الا الزول ده ، عوض احمودى ... غلبنى عديل كدى ... يجب الا ننسى فعوض أحمودى كفيف فبالاضافة لأتقانه العزق على العود فهو يتمتع بروح مرحه و خفة دم ممزوجه بعفوية منقطعة النظير ... حكى لى أحد الأصدقاء أن الأستاذ عوض أحمودى بالرغم من أنه كفيف فهو يستطيع تمييز أصواتكم مهما كبر عددكم فى الجلسة الواحدة و يخاطب كل فرد باسمه بمجرد سماع صوته الذى ربما يكون قد سمعه لأول مره من خلال حفل التعارف !!! الأستاذ عوض احمودى حول الة العود البسيطة الى اوركسترا كامله فهى مرات ، كمان ، اورقون و تارات أخر اكورديون ، جيتار و ( بنقز !!! ) ... فلهذا لا نستغرب أن أغلب ( الألبومات ) االغنائية السودانية هذه الأيام بطلها ال LEGEND عوض أحمودى |
تأميم كامل على كلامك ..
Quote: ناذر اخوى ما تخلينا نكون رابطة ( العوادين !!! ) بالمنبر ... بس السياسه ما معانا !!!
|
والله السياسة دي ما بنقدر نختاها لكن اهو بنرازي فيها مرة مرة !!
تعرف يا عبد الماجد كان في بوست هنا إسمو (محبي ألة العود) أو حاجة بالشكل دا .. أنا والله قدر ما فتشت ليهو ما لقيتو !!
وصدقني لو عملنا رابطة العوادين حا نكون اغلبية كبير في المنبر (يعني ممكن نشكل مجموعة ضغط وإبتزاز في القضايا المهمة)
| |
|
|
|
|
|
|
Re: عوض أحمودي !! عَلِمَنَا كيف نجعل اعوادنا تغني وتبكي وتجادل !! (Re: ناذر محمد الخليفة)
|
.
Quote: يا زول مالك جريت واطي سريع كدي |
أفووووووووووووووو .. نحن بنجر واطي كمان قمت بـ ( تعليق ) على الإطلاق إلى حين .. ولم (أسحبها) لكن صراحة عادل الصديق رهيب عزفا و( غناء ) كمان .. بس لطول المدة ..أضاني ما بتقدر ( تحسم ) الموضوع إلا اذا اتيح ليها الاستماع مرة تانية لعادل الصديق .. خصوصا وانو متشبعة تماما بالاستثنائي عوض أحمودي في الوقت الحالي .. اتمنى ان تتاح ليك ولينا الفرصة دي قريب ...
| |
|
|
|
|
|
|
Re: عوض أحمودي !! عَلِمَنَا كيف نجعل اعوادنا تغني وتبكي وتجادل !! (Re: hatim ibrahim)
|
العزيز/ نادر شكرا لهذا البوست الرائع. وبرافو ياشباب متعتونا وأثبتوا انو الدنيا لسه بخير. ومنهم لله الكرهونا في هذه الواحة الوارفة.
الأستاذ/الموصلي لك التحية والإعجاب أحببتك منذ الأماني السندسية وكنت حينها في سنة تانيه ثانوي وعامل فيها بغني، وفي الفسحة يتلموا أصحابي المواهيم لأغني لهم تلك الفرماله.كانت أياما جميلة.وحتى اليوم أتهجم علي الغنا مع انني فشلت في تعلم اية آله موسيقيه وكمان أشتر في الحفاظ على الزمن مع عزف الآخرين.يعني لاحول ولاقوة. ورغم ذلك مصر على تطريب نفسي فصوتي يؤهلني لأكون فنان حيرة بامتياز. ولهذا أسأل حضرتكم : لماذا لاتوجد موسيقى اغاني سودانية لممارسة فن الكاراوكي ولو بآلة العود منفردة؟ السؤال لك ولجميع المبدعين والمنتجين الفنيين. خالص مودتي وتقديري وآسف يانادر على التعريج بالبوست إلى شوراع جانبية.مع تحياتي.
| |
|
|
|
|
|
|
Re: عوض أحمودي !! عَلِمَنَا كيف نجعل اعوادنا تغني وتبكي وتجادل !! (Re: ناذر محمد الخليفة)
|
تعقيب هشام كمال جلبته من الأعلى :
Quote: استاذى المبجل اذا فقط جيت السودان 48 ساعة و شفت الحاصل حيجيك سكرى و ضغط و ارتفاع فى البولينا لما تصل لحد الاغماء من الذى يجرى فى هذه البلاد الاسمها السودان. اعتزر لك على اللهجة الحاده فى ما يخص الديناصورات لكن بتكون مجبر احيانا انو تكون حاد و الله العظيم تجى تشوف كبار موسيقيينا بيعملوا شنو تطفش من البلد لسبعين سنة. مع خالص التقدير هشام بالمناسبة اتمنى اكون ديناصور يكون عندى الارث الاحترمه و يحترمونى عليهو خالص الاحترام و التقدير متمنينك تكون هنا |
| |
|
|
|
|
|
|
Re: عوض أحمودي !! عَلِمَنَا كيف نجعل اعوادنا تغني وتبكي وتجادل !! (Re: ناذر محمد الخليفة)
|
بعد جهد جهيد وجري شديد تمكنت بحمد الله من مكالمة الفنان المرهف والزول المتواضع عادل الصديق .. شكراً للاستاذ الموصلي الذي لفت إنتباهنا لهكذا شخصيات .. وشكراً لصديقي قيقز الذي مدني بتلفون الفنان عادل .. تحدثت معه لفترة قصيرة فقد كان الوقت متأخراً وعدني بان يكون متابعاً لمجريات هذا البوست واخذت منه عهدا قاطعاً بتوفير اعمال يمكن ان نستمع اليها من خلال هذا البوست .. وفي الإنتظار .. تخريمة : عادل يبلغك السلام يا موصلي ولو عايز التلفون كل رقم من ارقام التلفون بي 1000 دولار غير قابلة للمفاوضة ولا تسترجع في حال وجدت الرقم مقطوع رمضان كريم لي كل المتداخلين ..
| |
|
|
|
|
|
|
Re: عوض أحمودي !! عَلِمَنَا كيف نجعل اعوادنا تغني وتبكي وتجادل !! (Re: ناذر محمد الخليفة)
|
عمر رمضان كريم ..
Quote: بعد جهد جهيد وجري شديد تمكنت بحمد الله من مكالمة الفنان المرهف والزول المتواضع عادل الصديق .. تحدثت معه لفترة قصيرة فقد كان الوقت متأخراً وعدني بان يكون متابعاً لمجريات هذا البوست واخذت منه عهدا قاطعاً بتوفير اعمال يمكن ان نستمع اليها من خلال هذا البوست ..
|
يا ريت يا عمر .. أنا جد متشوق جدا لسماع ريشة عادل الصديق .. مشكور علىالجهد ..
| |
|
|
|
|
|
|
Re: عوض أحمودي !! عَلِمَنَا كيف نجعل اعوادنا تغني وتبكي وتجادل !! (Re: ناذر محمد الخليفة)
|
ناذر رمضان كريم ... السنة دى قالو منستر معاهو لحد هسع .. لو ركزت الاسبوع الاول ده ماعندك عوجة تاني .. كلنا اتعلمناه شوية شوية ...!! قلت لى عوض احمودي ..؟؟ طيب يا اخوي نكلمك عنو شوية .. صحي يمكن نحن ماناس مزازيك وكدة لكن يمين الله لو نغمة منها جات دخلت اضانا دي ركبنا بتسيح و راسنا بيلف و بنعيش في عالم تاني لو نزلت منه ذرة لاهل الارض لغمرتهم بالحب و الحنان والسكرة الحلال .. عوض ده يا حبيبنا زمان لمن الدنيا كانت بخيرا و لمن الاستماع للعود كان محتكر للاذان الشفافة و الاذواق الذواقة لمتنا بيهو مدرسة المرين بالهلالية و نحن يادوب الوكت داك بنتحسس الخطى و نميز خبيث اللحن من الطيب .. احمودى كان في اولى ابوبكر ونحن كنا فى اولى على .. و مابين الفصلين كان مسرح المدرسة هو نوارة الهلالية .. حصل سمعت ليك ياناذر بمسرح مزروع في ارضيتو - خشبتو - اشجار وازهار و محيط من كل الجوانب بغابة من البان ..؟؟ في المسرح المظلل ده كنا بندس عوض احمودي بعدما نسرقو من الفصل بين الحصتين ، ونقعد نبكي ونتنحنح لمن يدندن ( زاد الشجون ) و اخواتها .. قصتنا مع عوض احمودى ده ياحبيبنا طويلة اهم ما فيها انو الراجل قدر يكبح جموح مراهقتنا و يحولها لهيام للاوتار .. وبعد ما نبل الجوف نوريك عوض ده - رغم فقدان البصر - كان بيقفل المواد كيف في الامتحانات .. والعود ده كان ليهو دور كبير في القفيل !!
| |
|
|
|
|
|
|
Re: عوض أحمودي !! عَلِمَنَا كيف نجعل اعوادنا تغني وتبكي وتجادل !! (Re: ناذر محمد الخليفة)
|
الطاهر سلامات ورمضان كريم ..
Quote: رمضان كريم ... السنة دى قالو منستر معاهو لحد هسع .. لو ركزت الاسبوع الاول ده ماعندك عوجة تاني .. كلنا اتعلمناه شوية شوية ...!! قلت لى عوض احمودي ..؟؟
|
والله ياخ !! هو المنستر معاي وربنا يقدروا على مجاراتي
Quote: عوض ده يا حبيبنا زمان لمن الدنيا كانت بخيرا و لمن الاستماع للعود كان محتكر للاذان الشفافة و الاذواق الذواقة لمتنا بيهو مدرسة المرين بالهلالية و نحن يادوب الوكت داك بنتحسس الخطى و نميز خبيث اللحن من الطيب .. احمودى كان في اولى ابوبكر ونحن كنا فى اولى على .. و مابين الفصلين كان مسرح المدرسة هو نوارة الهلالية .. حصل سمعت ليك ياناذر بمسرح مزروع في ارضيتو - خشبتو - اشجار وازهار و محيط من كل الجوانب بغابة من البان ..؟؟ في المسرح المظلل ده كنا بندس عوض احمودي بعدما نسرقو من الفصل بين الحصتين ، ونقعد نبكي ونتنحنح لمن يدندن ( زاد الشجون ) و اخواتها ..
|
دي معلومة جديدة !! بالله عوض دا من الثانوي مبدع للدرجة دي !! يعني ماشاء الله يكون بدا يعزف العود وعمرو كم سنة !!
Quote: وبعد ما نبل الجوف نوريك عوض ده - رغم فقدان البصر - كان بيقفل المواد كيف في الامتحانات .. والعود ده كان ليهو دور كبير في القفيل !! |
الطاهر ..!!
هسي الساعة قريب تمانية وإتخايلي جوفك إنبلْ !! أرح إنسل لا برا وتم لينا الحكي !!
صنفرة :
أنا من بدا البوست دا كايس لي زول عاصر أحمودي لكن أصو ما متخيلك تكون إنت
| |
|
|
|
|
|
|
Re: عوض أحمودي !! عَلِمَنَا كيف نجعل اعوادنا تغني وتبكي وتجادل !! (Re: ناذر محمد الخليفة)
|
Quote: أنا من بدا البوست دا كايس لي زول عاصر أحمودي لكن أصو ما متخيلك تكون إنت |
اها .. دى الحقارات البتخليناما نبوح بحاجاتنا الخاصة .. ودى الحركات البتخلينا ندس ريدتنا لاشياء معينة .. !! وانت كدة باستعجالك ده و حقاراتك حتجبرنى اتكلم ليك عن احمودى بطريقة ضيوف عوض بابكر في ( حقيبة الفن ) لمن الواحد فيهم يجي يشدك طول الليل بكلام من شاكلة ( زمان انا وكرومة في حي البوستة و...و...... تلقى نفسك نعست في نص الحلقة و حلمت قبل نهايتا...!!
احمودى ده يا حبيبنا ماالزول البيتكلم عنو زول عشطان و جعان و روحو مارقة .. الشاب ده الحكى عنو داير ليهو قعدة في طرف برش فى نص الحوش و فناجين القهوة تكاكى في الصينية و جك العرديب قدامك يبقبق فوقو التلج .. لكن اااخ حظو كده احمودى ، سيرتو جات نص النهار !! احمودى ده اتعلم العود في المتوسطة لانو لمن جاء المرين و طلع المسرح في الدورة الثقافية الاولى و هو في سنة اولى هيج الحضور لمن غنى ( السودان الوطن الواحد ) و بعدها دخل طوالى في ( البنت الحديقة ) ... شوف شافع في سنة اولى لمن يطلع بيك لحنا من ود الامين لمصطفى سيد احمد تفتكر بيكون اتعلم العود متين ..؟؟ و بذكر اليوم داك المفروض احمودى يغنى اغنيتين ، لكن معلم الاحياء ( ابراهيم خلف الله ) طلع المسرح و حلف طلاق انو احمودى يجر الحفلة لامن تجيهو توجيهات منو هو شخصيا .. اها بعد ده تعال شوف العجب ,, عليك امان الله المدرسين كلهم بى ناظرم ( الهادى ) فقدوا وقارم لمن الزول ده خلى العود يتكلم براهو ساعة كاملة تقريبابدون ما يدى فرصة للتاس ياخدو نفسم .. شفت مع القفلة المعلم داك ذاتو طلع المسرح وقال ليهو يا احمودى انا بعد ده متبرع ليك للاحياء بخمسين درجة ثابتة .. وبعد ده عينك مايشوف الا النور بتاع الكيمياء خمسين الرياضيات تلاتين و و اى استاذ حضر الحفلة كشح ليك احمودى بكم درجة كدة صاحبنا بقى يقفل المواد !!
شفت عود احمودي كان بيسوي شنو ؟؟
............ و نبل الجوف ونواصل نحكى ليك حاجات تانية عن احمودى
| |
|
|
|
|
|
|
Re: عوض أحمودي !! عَلِمَنَا كيف نجعل اعوادنا تغني وتبكي وتجادل !! (Re: ناذر محمد الخليفة)
|
Quote: يقولون ان السودان لم ينجب ولن ينجب عبقرية تعزف على العود مثل برعي محمد دفع الله |
رمضان كريم يا ناذر
يا ناذر برعي العود لامن يمسكو مابكون عارف عايز يعزف شنو.. بقعد ليهو كم دقيقة كده وبتمرق مقطوعة يتنادى بها الركبان.. برعي الله يرحمو كان الوتر ده خليلو مو مجرد عازف..
المقارنة تعابنة بين احمودي وبرعي ومع ذلك عوض احمودي في العود استاذ وبخلي العود فعلا يبكي..
صورتك وانتا بتعزف فوق شديدة .. والكراسي عندكم..
| |
|
|
|
|
|
|
Re: عوض أحمودي !! عَلِمَنَا كيف نجعل اعوادنا تغني وتبكي وتجادل !! (Re: ناذر محمد الخليفة)
|
الطاهر إزيك !!
Quote: وانت كدة باستعجالك ده و حقاراتك حتجبرنى اتكلم ليك عن احمودى بطريقة ضيوف عوض بابكر في ( حقيبة الفن ) لمن الواحد فيهم يجي يشدك طول الليل بكلام من شاكلة ( زمان انا وكرومة في حي البوستة و...و...... تلقى نفسك نعست في نص الحلقة و حلمت قبل نهايتا...!! |
لا لا كلو ولا طريقة حقيبة الفن دي !! ما كفاية علينا عمر الجزلي !!
Quote: الشاب ده الحكى عنو داير ليهو قعدة في طرف برش فى نص الحوش و فناجين القهوة تكاكى في الصينية و جك العرديب قدامك يبقبق فوقو التلج .. لكن اااخ حظو كده احمودى ، سيرتو جات نص النهار !! |
ما مشكلة جهز البرش والقهوة و حدد متين اجي أفطر معاك عشان تحكي لي بي مزاج
Quote: شوف شافع في سنة اولى لمن يطلع بيك لحنا من ود الامين لمصطفى سيد احمد تفتكر بيكون اتعلم العود متين ..؟؟
|
ذكرتني واحد فنان كبير وعازف طمبور متمكن بإعتراف الفطاحلة ، مرة سألتو قلت ليهو إنت إتعلمت الطمبور متين ؟ قال لي والله ما اكذب عليك .. أنا ما حا اقدر أجاوبك لاني مما مرقت للدنيادي لقيت نفسي بعزف طمبور وأصلو ما قعدت عشان إتعلموا !!
يكون عوض أحمودي يا ربي (نفس الشي ) !!
Quote: و بذكر اليوم داك المفروض احمودى يغنى اغنيتين ، لكن معلم الاحياء ( ابراهيم خلف الله ) طلع المسرح و حلف طلاق انو احمودى يجر الحفلة لامن تجيهو توجيهات منو هو شخصيا .. اها بعد ده تعال شوف العجب ,, عليك امان الله المدرسين كلهم بى ناظرم ( الهادى ) فقدوا وقارم لمن الزول ده خلى العود يتكلم براهو ساعة كاملة تقريبابدون ما يدى فرصة للتاس ياخدو نفسم ..
|
ذاكرتك ما شاء الله عليها يا الطاهر
Quote: و نبل الجوف ونواصل نحكى ليك حاجات تانية عن احمودى
|
يا ريت يا الطاهر .. راجينك بل جوفك تاني وتعال بس ما تنسى العيزومة
| |
|
|
|
|
|
|
Re: عوض أحمودي !! عَلِمَنَا كيف نجعل اعوادنا تغني وتبكي وتجادل !! (Re: ناذر محمد الخليفة)
|
دكين سلامات ..
الله أكرم وشرفتنا كتير ..
Quote: رمضان كريم يا ناذر
يا ناذر برعي العود لامن يمسكو مابكون عارف عايز يعزف شنو.. بقعد ليهو كم دقيقة كده وبتمرق مقطوعة يتنادى بها الركبان.. برعي الله يرحمو كان الوتر ده خليلو مو مجرد عازف..
|
والله يا دكين أي زول طبعا عندو رايو في المسائل دي وانا ما نكرت عبقرية برعي بس كلام من شاكلة (لم وان ينجب مثل برعي) الإستعملوها ناس جيل برعي وختمو بيها الاجيال البعدو بالشمع الاحمر دي أنا ضدها تماماً ..
وعلى كل حال القصة عبارة عن تواصل مستمر وتسلم رايات لا بد منو ، والراية هسي مستلما عوض احمودي بدون منازع وبكل القياسات لحدي ما يسلما لي واحد بعدو !!
تسلم يا دكين ..
| |
|
|
|
|
|
|
|