|
دعواتكم لزميلنا المفكر د.الباقر العفيف بالشفاء العاجل
|
|
 Re: يا بكري يا سيد الحوش ايرد طارق مثل عثمان بشرى؟؟ (Re: الجندرية)
|
الهجـــرة
لو هجرة في عالم الموتى
إلى موتى يعدون الحضور
على موائد من صفيح اللغو
هرجلة التفاصيل الرخيصة والهلام
لو غربة في الذات ..
عبر مسارح التاريخ … أنزل
أيها المسلول في حدق البصيرة
وأعتقد حدثاً يوازي معطيات اللحظة القصوى
وكن غيبوبة في الذات
واللغة التي بين الحمامة والنشيد صدى
والريح تصدأ كلما اتجهت حساسين الكلام
عن النبي القادم .. إتجهت شظيات الدخان إلى الشهيق
ملأٌ من الفوضى يثرثر في دمي
ويداك ترتجفان ..
إذ أمدد إليك البحر
أن غرق الذي ترعى .. غرق
هي خيبة الأشواق
أم أن الذي قد مات فيك
ولم تحرر بعد إنشاد العزاء .. ولم تجئ
كما سأذهب في بكائك ضد أحزاني ولم تأتي .. إلي
أ لأنني من فرط حزنك لم أجئ
ظلٌ لسرك .. لا تصدقه
وظلٌ لإنفصامك .. لا تصادقه
وظلك لا تأمنه قفاك
كل الذين يصادقونك في الصباح
هم الذين يوزعون الكأس ما برحت يداك من اليمين إلى اليسار
وسيرفعون السر في تقريرهم عن أمنياتك بالمساء.
لوح السراب
لوح السراب نقع محاية الشوق
لا تجيني لا نجالة الخاطر
سبيب من طيف
وقع الصقر .. أو هان
كتر البتابت عيب
لا تجيني هان في الغربة
أم سدولاً جيف
تعردي في يمنة ويسرى
أسئلة تعبر السيف
دحين ودرني .. شن خدرني
غير حيلاً غشاهو الكيف
يا تركة حشاي عنف المساسقة
والهبر والجيف
ضمة حساك .. كشنة بالي
متنخشم ضراي تبالي
جكاك المتنى رهيف
شن تبقى الرهيفة المالية
ضمة بلاك .. شايلة هلاكي
والميتة الفطيس كفكيف
صوت من نجم مقهور
ومتورط علاقة مع السماء
أو غابة في وردة مريض بلدي
معصلج في الحكيم والإسبتالية
مجنونة من غبشة زقاقات البيوت اليابسة
ماكلة ولابسة أحلام في الحضر
ثمود أو عاد وبيناتن حجر
منحل ..
غنوة بعيدة .. بعيدة
مقيات الهبوب والقرى المطرية
أو طورية
تفتق سرة في شهوة بذور
والضل كديب مأجور على حقو
مزنق في سماي
سمت المخاليق البتجبد
جوة ميدان الطحين سب دين
وزغرودات صبايا
عشم المسارقة والمجابيد الهويني
المفاتيح البلاش
والكيف مستف إحتشاد
كلاكي جيد
جيداً يجود حالكي
يا هبر القنيص الفضي
والخلا سم بهار
عفيط الشوق قميص ودران
من الصبر المحمد تار
أجيك مسك بدراوي
في ساعة نفاس بكري
أجيك عكري
أجيك من حتة الوطن المعتب ضل
ومتريق علي في نعشة مبلولة
ومطعنة بالخلو الذهني
من كدب التهم والجتة المرقشة
بالمرابيط واللحام البشري
أبنوسة في فد مرقة وقعد للريح
والهتش عريان
ومن وين أختلف عنك
يطيب ظنك
أدخلي من المغارب
ما ختاك النيل
محل قبلت أتمحن
وأشوفك في حداهو توسوسو
شن بتقولوا يا كاشفات جرفنا عروض
شن بتقولوا يا سمك الهجير والمستحي
أبنوسة طرف من براطيشي السؤال
عذبني قصر الأجوبة
ساسقت بين أمشي وتعال
عفرت هدومي الأتربة
وحل المقادير إختلال
في تكلنوجيا الأفئدة
تمشيني من أقصى التلال في الروح
إلى أشهى العذابات في الحبال
ينشل صوت الأقربة
أبنوسة جيتك برة
صوت الإجتماع
واللجنة والعرق الرهيف
طلقانة بنوت النميمة الهشة
سماك ما بتنفضح لليل
ولا بربح نجومك شوق
وبشر في السهل عفريت
وكل ما يسقطك في الدم عنت
إتجلبط هلاويس وانشتر
مين يقدر بلاك في العكرة
من شبق الطنين والفكرة
يبرد أضاني من قعدة ونسة الموية
والخمج المكركع
مين يقدر يحت إحساسي في غربال
يفرز كومو .. يسند نومو
بالإرث البتصحى من الصباح
دكان وراكوبة ونعال
تنشال على كيف
تتحدث عن الكوليرا ونهايات السباق الأجنبي
ولا هماك
مناكف في الغلط والصاح
وتتتقب براح
مين يطلع مع الضي من تحت فركة
وعصير نجمة هفيف الليل
ينقط في المسام
الهم برش . .
تمدد على كيفك
تتمدد قدر فرشك
وحتى إن كان إذا نعشك
زنق أحلامك البكرة
ومين يقدر يضمك في حدث عابر
ولد في ثرثرة بنوت من الدهشة
ويضمك في حلوقن ريق
مدبرة في الخفايا قدر
بلاك ما دافقت جواي
روح نطفة ولا بلغت ظنوني بلد
ولا ناطح عرق في الروح
بكيمياء العلاقة ولد
يا شكنبة كل القوانين
وإرتفاع صقر الممارسة
في أزيز الإيدلوجيا
أحبك ..
حر من البدرة الملح
أحبك
أنتي بايوتك الكلامات المهترشة
حين يصطدم الندى بالليل
لا تتفرعي في النار
نسمتك من السليقة
أنا وين من العالم
إذا كل القوانين
ركزت طايوقة فيني
ومركزت جواي كون
ولا هامش يكون في الواطة
غير إتنين ونسمة من الدغش
تمرق على التاريخ سلام
عودين مشبكة في هدف
وتترتب صفوف الديش
أنا وين ..
وتقعدي في الهبايب ثرثرة ونتيش
محننة بالسليقة …
آآ مهبوشة قومي من الزلط
دهستني في أترك سموم اللهفة
حي عليك قومي من العباية
الفار لعب فيني … الضلمة
أمرقي يا جاموسة من تحت الأكمة
أسكتي يا قرقير ضحاوي البال هي يمة
وإتلفح ضهاري الغربة
منك أنسيك أسمي وإتنبر بلاد
من صف بطاقة وإشتباهات في الهوية
ما بفوتك …
حدثي الجايين ورا رقراق بيوتك
ما بفوتك …
بين زناة الفكرة والغلط المبيت
ما بفوتك …
جف الدبر أو شيب
ما بفوتك …
أطلقي البيبان تفك ريقا
وتصلح من بنابرا للفريق
الواطة صبحت
واللحافات في الشمس
جريها تحت الزول
بكان خت الفقر
وإنطاق فجر ضحوية
ما بفوتك …
من يفضل باقي غير قفة غناكي الفنجري
أنا منك إدليت علي
وغشيت يميني وجيت عليك
يا شكنبة كل القوانين
وإرتفاع صقر الممارسة
في أزيز الإيدلوجيا
أحبك ..
حر من البدرة الملح
أحبك
أنتي بايوتك الكلامات المهترشة
حين يصطدم الندى بالليل
الآن لا أبكي ..
ولكني أحدد قدرتي في الإتساع
على مدى عينيك
رب طريقة أخرى تحملني الأمانة
وفق إيماني بها
وفظاعتي في العشق
إبان الهزيمة فيما يخص البحر
للبحر الذي
فيما يخص البحر
الليل يسوق القمرة لحفلة ضلام
نقريش كلام
أو حتى فى لحظة غباش تريان
لو يقدر يجي الزول من هناك
أو بكرة لو نطفي الشمس في ذوقة
ما نضفنا غير الشوق
عشان نسهر يجونا الإلفة والليل والسلام الإنتقالي
وفي سفر عادي .. عادي جداً
ومشقق بالحنين والحْركة
من أقصى السهر .. أقصد سكر
صحي بنسأل عليك يا ماشي
كانت وريقانك سهن في الريح
رمن عقل المدائن في البلل
شتر البلل أطفال وعدمني اللباس
عريان .. ووارم من خلاف
في فوضى مطلقة .. منتبه عفواً
ومن عذراً أليف
طبقت حيشان البلاد في خف
وضليت السبيل
سهران مربيني السكات بالثرثرة
مهبوش رفست قفاي أسف
وفيني لسة من المجابيد الملحة
ومن خرير الأمنيات
مزنوق ويا الله إحتملني عشان أجيك
عشان أجيك من مافي أو من خافي
أو من سكتك مستور كدحاً ودرءاً
مستند على فكرتك في الشلهتة
وفي أي باب علقت أبواب للبنات
من طينك الأخدر
أحب دينك
إذا فرقت سطر أو حتى صفحة من البياض
بيناتنا ما في حساب
أنحنا علمنا الصبر يستنى أغلب إحتمالات من كدا
يمكن تجي الريح من كدا أو من كدا أو ما تجي
بس برضو يا صبر الصبر
أصبر .. وصابر .. وثابر وأتقي شرك
عوينك دقسنك بالقلق والسكلبة
ومحريبك إتحرق بريحة الصيد
وشيحك ضرضرنو جهاتك العليا
وسهواً نحن شاهدنا البحر في الصحرا
خففنا إتساع الرؤيا شان نطفش شوية شوية
في سكرة .. أو في بنقو .. أو حتى صلوات بلا وضو
أو حبة من الحبيبة المرة
وكانت غايتو أيام مخجلة
وكانت لحظة من دهراً عصير
في ضلمة أكبر من تلاوينك
كشحنا اللوحة بالموية وقعدنا هناك
وإنت منو الهبشك وما ضراك
منو الحرسك تجي تنقر قفاك
في قلب مفتوح بالبلاش لألف معجزة أو خرافة
وما وراك غير ألحقك في صف مرجرج بالعرق
آسف إذا ختيت عناوينك طلق
آسف إذا ما قدرت أقدمك للأغنية الوطنية والكلمات
وتحصلك كدا ..
وآسف إذا كانت كدا
أهو محتمل جداً أخونك .. أو أكونك
ومش مهم بالضبط أعنف ما بظنك فيهو بحتملك
إذا غابت عن الأخلاق أرض
عجِلٌ .. وفي قدميّ رملٌ شاسعٌ
لكنما أجِلٌ وفي كفي رملٌ للهوى
للعشق .. للصلوات
للموت المؤسس .. للتجسس
والقتال البارد الدموي
غياباً عن تضاريس الوطن
بكري ده بستاذنو ليهو . ؟؟ ده بسـاذنوهو يجي هنا...!!!
| |
 
|
|
|
|
|
|
|
|
Re: يا بكري يا سيد الحوش ايرد طارق مثل عثمان بشرى؟؟ (Re: الجندرية)
|
الاخت الجندرية
لك الشكر
حتما بوجود ود البشري سيخضر المنبر
وخاصة ان له نصوص جديدة لم تر النور
اخر نص كتبه عثمان بشري امس
انا استاذنه واستاذن الصديقة الحميمة عرفة
ماذا كنت أسميك
الي الانسانة عرفة
كدعاش
تدخلك الضحكة حين تغرد
رغم الاوجاع ورغم فداحة واقعها
فهي بصمت النبلاء مواقف مختلفة
تذهب فيك كظل يعرش فوقك دون تحس
وتحلب غيما مزدلفا
يسكنها الحب الانساني وتسكنه
امراة تخضر بحقل الروح
وتفتح شرفتها في كل فصول العمر
لتبهج هذا العالم هذا الانسان
ولا اسفا
ان لها نهر يجري فوق سهول
اجدبها التاريخ
فسالت بعذوبتها شغفا
لازالت تتقدم في الانسان
حياة لا يهزمها الالم المافون
وتمضي فوق الاشواك
بكل طموح المهمومين
جبالا\صحراء\ اودية
عطفا
ماذا كنت اسميها
لولا الاسما اكتملت
والاصقاع جميع الاصقاع
تنادي : عرفة
عرفة
عرفة
| |
|
|
|
|
|
|
| |
الجندرية
Giwey
محمد عبدالرحمن
فرح
طلال عفيفي
ايهاب
Ibrahim Algrefwi
فيس بوك
تويتر
انستقرام
يوتيوب
بنتيريست