|
|
 نكتـة بمناسبة زواج نـاذر الخليــفة !
|
طبعا من ما قالوا ناذر نوى يعرس , خطب , عقد, صافح إلخ .. نزلوا حوالي كمية من البوستات كده غايتو.. الكلام ده بدأ قبل تمنية شهور تقريبا و كل أسبوعين تلاتة بينزل بوست إعلان عن زواج ناذر و نحن نشيل و نبارك و العرس ما عايز يكتمل و (يريح ناذر منناو من تبريكاتنا الكتيرة) !!!
غايتو ناذر أكتر عريس نبارك ليه في الدنيا دي, و لسه ! النشوف آخرتا .. قالوا 5 يوليو, ذكرني موضوع مشروع عرس واحد صاحبنا بيعلن عنه من نهاية التمانينات و لي هسة عزابي !
إتذكرت النكتة الواقعية دي (حسب الراوي, و هو من الموسيقيين) و ناذر كذلك من أهل الفن يعني (وقعت لينا) و ليهو في جرح:
قال أنه الفنان صاحب الصوت الجميل مجزوب أونسة ولدو ليهو ولد و جاء داخل دار الفنانين فرحان طبعا فرح شديد و لقى مجموعة من الفنانين و العازفين قاعدين يتونسوا مع بعض و من ضمنهم محمد الأمين..
أها مجذوب أونسة يمشي على كل واحد فيهم يقول ليه: بارك لي يا فلان جابو لي ولد.. يقوم فلان ده يبارك ليهو, مر كذلك على محمد الأمين و كلمو و محمد الأمين بارك ليهو, مجذوب أونسة مع الفرحة و اللخمة مر على بعض الناس ديل من جديد و كلمهم و باركوا ليهو و جاء لافي على محمد الأمين للمرة التانية و قال ليه: بارك لي يا أستاذ جابو لي ولد, محمد الأمين بي صوتو الفخيم داك قال ليه: تااااني ?! (يعني تاني جابو ليك ولد ?)..
أها يا اخوانا وضحوا لينا: عرس ناذر ده الأول ولا التاني ?!..
و .. [مبروك] يا ناذر و (بيت مال) و (عيال) مع أنو الإتنين مشكلة !
|
|
 
|
|
|
|
ناذر محمد الخليفة
فيس بوك
تويتر
انستقرام
يوتيوب
بنتيريست