|
الضرائب
|
ناس هناي إتفننو في أنواع ومسميات الضرائب ، يضربهم الضريب شقاق العناقريب ، ولأنني لا أعرف الفرق بين الزكاة والضريبة والعشور والقبانة عاوز البعرف يتكرم ويتفضل بالشرح على العبد الفقير لله. يحكي أن واحد راكب عجله دبل وجاي بي شارع المعونة (الأمريكية بت الشيطان الأكبر) وهو ماشي من شمبات الأراضي إلى الشعبية أى من إتجاه الشمال حيث الجيلي والكدرو وحلفاية الملوك يا جميل الأوصفوك في إتجاه الجنوب وعند الصينية لاقاهو تفتيش أقيف يا زول ، الزول وقف الشايلو ده شنو ، ده زير يا جنابو زير شنو ، زير مويه يا جنابو وممكن يكون زير سبيل وبرضو ممكن يكون لحاجات تانيه ، حاجات تانيه زي شنو ، صمت المهم إنت الزير ده داير بيهو شنو والله داير أختو في بيتنا عشان نشرب منو خاصة وأن الصيف قرب وما عندنا تلاجه والكهربا شمومه يعني عاوز تستعمل الزير أيوه حاجه زي كده طيب عليك ضريبه ضريبة شنو ضريبة على الزير يا أخي أنا إشتريتو ما سويتو وما حفرت طين بحر ولا قطعت شجرة ولا حرقت حطب ولا لقطت بعر أنا إشتريت حاجة جاهزة الضريبة في شنو يا جنابو دي ضريبة إستهلاك يا زول (بحسب المادة 64 الباب التاني والشباك الأخدر من قانون الضرائب لسنة كم كده ما عارف فإن تحول المادة الخام من حالة كونها مادة خام إلى سلعة يتم إستهلاكها توجب علي المستهلك الدفع الثنائي ، تمن السلعة أولاً وضريبة الإستهلاك ثانيا" يا تدفع يا نصادر منك الزير صادروهو أنا أدفع مرتين كمان الحكومات من زمااان كل ما الواحد يكون داير يقدم أى طلب لجهة حكومية لإستخراج أى مستند يقولو ليك أدفع حق الدمغة ده طبعاً غير الرسوم الخاصة يعني الطلب بدون دمغه زي الشرا في القندول. أها الدمغة دي برضو شكل من أشكال الضرائب. وكم دمغه سالت من خدود الدولة مع الإعتذار للفنان. الموضوع يا جماعه ما علينا بس أوروبا المتحضرة المتحررة برضو بتعمل حاجات عجيبة يقال والعهدة على الراوي أن مارجريت تاتشر رئيس وزراء بريطانيا سابقاً فرضت ضريبة غريبة جداً وهي أن أى فرد في المجتمع يصل لسن الرشد يجب عليه دفع ضريبة – وطبعاً الوصول إلى سن الرشد بلوغها زمنياً بعيداً عن تصنيف التصرفات المسئولة أو الصبيانية أو الجنونية ، المهم الضريبة دي عملت بلبله والناس بعضهم تظاهر والبعض الآخر آثر السخرية والإنتقادات ، ضريبة على الإنسان أى واحد يصل سن الرشد يكون ملزم بدفع ضريبة للدولة إشتغل أو ما لقي شغل. برضو قالو وزير مالية الدنمارك إقترح فرض ضريبة على الرجال دون النساء حيث أن الضريبة تفرض على أى واحد يطلق مرتو ، وقال في تفسيره عندنا هنا في السنة الواحدة حوالي خمسين ألف حالة طلاق وعشان كده عاوزين نفرض خمسين دولار أمريكي على أى واحد يطلق مرتو وبعملية حسابية بسيطة حا يكون في دخل إضافي معقول للدولة. تعرفوا لو الوزير ده إنتدبوهو سوق الخضار في أمدرمان ولا دلالة العربات في الخرطوم حا يجيب في اليوم الواحد ملايين الدولارات لي خزنة الدولة من الطلاقات الفشنك والصحيحة. المشكلة الواحد لو فكر يطلق مرتو لابد أن يفكر في طريقة أخرى للتخلص منها لأنو الطلاق بي قروش. في إحدى الصحف الصادرة هذا الأسبوع خبر ضريبي جديد مفاده أن ألمانيا قررت فرض ضريبة على الناس الشحمانين بهدف الوصول إلى مجتمع معاصر رشيق معافي ، وقالو تحت تحت الكلام الحصل في ألمانيا ده تقف وراءه شركات التأمين الصحي ، لأنو تغطية عواقب البدانة مثل الجلطات والسكري والضغط – حماكم الله – تكلف تلك الشركات أموالاً طائلة. والسمين بقيف والضعيف بقع
|
|
|
|
|
|