|
|
 حلــم جمــيل ،،،
|
قال حميد : ( لمت لمت ) ...
( كان ما لمت أنا جايــــــيكم وما ندمان ) ...
قنب فوق قوز رمله هناك ...
دنقر .. صنقع .. حمر .. وصنقر
شخت فوق الرمله خطــوط ..
واحدة طويلة وواحدة قصيرة ...
وواحدات تاني ما معــــروفة ...
غايتو أخــينا حكايتو حكاية ..
لتق من سلكين نعلاتو ...
خيط بي لونين سروالو ...
ورقع الجــبه ...
كان الخيط التالت أحمر ..
ما هماهو .. أحمر ... أخضر ..
أياً كان اللون العندو
همو الأول .. يستر حالو ...
وهمو التاني .. راحة بالو ..
وهمو الدايم .. هُمّ عيالو ...
سارح شيخنا ...
بحلم بالغيمات المرن
بحلم بغنيماتو الفرن
وبحلم بوليداتو الكبرو ...
وبي حاجات ما ليهن حد ..
|
|
 
|
|
|
|
|
|
|
 Re: حلــم جمــيل ،،، (Re: أبووجيدة)
|
بحلم يكبر أحمد بكرة
وبعدو بتكبر بتنا نورا ...
أحمد يمشي المدرسة أول
وتمشي وراهو البت نورتـنا ...
يكبر أحمد بين رفقاتو
وتكبر نورا مع السمحات
يكبر أحمد ... ويكبر ... ويكبر
ينجح في مدرستو الأولى
يمشي الثانوي وسط الشلة
ينجح ويدخل جامعة كبيرة ...
يدرس هندسة .. طب .. جيولوجيا
أو يتخرج بي دبورة ...
وتتبعو نورا ...
بنية سميحة وماها شليقة ..
بنية بتعرف تحفظ زوقا ...
بنية حنينة أبوها يسوقا
تفوت بنوت الحي في الروقه
ولسع شيخنا ... سارح وشارد
سارح في أحــــــلامو ...
| |
|
|
|
|
|
|
|
|
|
Re: حلــم جمــيل ،،، (Re: أبووجيدة)
|
أحمد خلص لمدرستو .. ولثانويتو .. ولجامعتو
بقى دكتور ومهندس وضابط ...
علق في إضنيهو سماعة
وفوق المكتب عندو خريطة
وفوق أكتافو تشع دبورة
وترجع نـــــــورا ...
المدرسة يابا بقت دُكان ؟؟؟
كيف آبنية ؟؟؟
قالوا يجيبو قروش المــــوية
وقالوا يجيبو قروش الحـصة
وقالوا يجيبو قروش الحيـــطة
أصلها وقعت لمن جات المطرة البارح
وقالوا يجيبو البنايين
يبنوا الحيطة عشان الناظــرة ...
وشان الشهر الجاي بجينا مفتش ...
قالت كُل الخطـــبة وفاتت ...
ما مسكينة ... صغيرة وجـــاهلة
قايلا كلاما ده وقعو شــــــوية
ما عارفهو كلاما ده مُـــر ...
ما عارفهو بسوي الويـــــــل ...
وما عارفهو كلام ما بســـــر ...
قام إتــنهد شيخنا طويــــــل ...
خت شخيت ... وجنبو شخيت
عارف أنهن آبتلمن ...
إلاّ تلم السكة حـــــــديد ...
| |
|
|
|
|
|
|
|
|
|
Re: حلــم جمــيل ،،، (Re: أبووجيدة)
|
فكر شيخنا ...
كيف الصِرفـــة ؟؟؟ وبي ياتو دبـــــارة ؟؟؟..
كيف المــوية بقت فاتــــــورة ؟
تدفعها نـــــورا مع رفقاتها ...
تدفعها نــــورا من قوت يوما ...
أو تتشرد فوق الشارع ...
زي بنوت ماشات هـــــاملات ...
يعرق شيخنا .. يجف .. يستغفر ..
يرفع إيـدو لرب الكــــــون ...
حلها يارب ... فك إيدينا ..
حق المدرسة والتموين ...
حق الحصة والكنتين ...
شان نورتنا تـــرجع تقــــــــرا ...
ويمرق أحمد من الجــــــوقة ...
يلقى الوالد سارح وشارد ...
مالك يابــــا ؟؟؟
صباح الخــــير ...
مالك سارح وشايل هم الدُنيا بـــراك ؟..
نحن كـبرنا ولازم نعرف بالهامـــيك ...
لازم نقعد قعدة مـــعاك ...
| |
|
|
|
|
|
|
|
|
|
Re: حلــم جمــيل ،،، (Re: أبووجيدة)
|
تعال يا أحمـــــــــد ...
تعرف يا أحمـــــد ... ويسكت شيخــــــنا
قول يا يابـــــا ...
تعــرف يا أحمــــــد ... ويسكت شيخـــــنا ..
قول يا يابـــــــا ...
تعرف يا أحمـــد إنو أخيتك جات مطرودة ؟؟؟
لازم تدفع حق المـــوية أو تتوكل تمشي الشارع ..
وعارف إنت .. إنو الحال ما بخفى عليك ...
أبشـــــــر يابـــــــا ...
ودخل أحمد إيدو في جيبو ...
هاك آيابا ... قروش ... وقروش ...
لازم ترجع نــــــورا المدرسة ...
لازم تقرا ... وتقرا ... وتقــــــــرا
وغصباً عن عين أي حسود ...
لازم تقــــــــــــــرا...
أحمد كان صارف ماهيتو ...
كانت أول صرفة أظـــــــن ....
قام الوالد قالد أحمــــــد ...
نزلت دمعة في الدبـــورة ...
وفي السماعة وفي التخطيط ...
دمعة حنينة ... وحارة ... وحلوة
دمع مزيج بين فــــرحة وحب ...
عاين في وش ولدو أحيمــــد ...
وبسمة عريضة تزيـــن شيخنا ...
والله كــبرت يا أحمد والله ...
وما راح تعبي وراك رمــــاد ...
الله كريم يا أحمـــــد ولدي ...
ياهو الســــيد ونحن عباد ...
| |
|
|
|
|
|
|
|
|
|
Re: حلــم جمــيل ،،، (Re: أبووجيدة)
|
فــــرحت نـــورا ... وجات تتبسم ...
مسكت بأيديها أحيــمد ...
وقالت : الله يخليك آ اخويا ...
والله يخــلي حبيبـــنا أبـــــويا ...
مرقت ديك الساعة مـــــلاك ...
يملا الدنيا سرور وضــــياء ....
مرقت مريم من ورا ضـــروة ...
كانت قمراً في يوم العـــيد ...
كانت تشرق ونورها يــــزيد ...
كانت ديك أم أحمــــد ونـــــــورا
وكان الوقت قريب المغــــــرب ...
قعدوا إيديهم في إيدين بعض ...
وتعلو وشوشهم أجمـــل بسمة ...
وأذن مغرب داك الــــــيوم ....
قاموا إتوضوا وصلوا جمـــاعة ...
وشالوا الفــــاتحة ...
الله كريم للبصــــبر ويعمل ....
والله كريم للدايـر يوصـل ....
والله كريم لأحمد ونـــــــورا ....
والله كريم لأبوهم ومــــــــريم ....
والله كريم لكـل الناس ....
والله كريم لكـل الناس ....
***
| |
|
|
|
|
|
|
|
|
|
Re: حلــم جمــيل ،،، (Re: Mohamed Abdelgaleel)
|
أستاذي محمد عبدالجليل
كنت على ثقة تامة بأن هذا النص سيجد مكانه
عندك رغم بساطة المفردة .. فإن بك أزين حرفي
جمالاً وما تكتبه لي من تعليق أو أشادة يؤكد لي
بأنني على الطريق الصحيح فأأمل الوقوف خلف كل
ما أكتبه حتى أكمل مسيرة لم تكتمل إلا بتوجيهاتكم
وآرائكم ..
| |
|
|
|
|
|
|
|
|
|
Re: حلــم جمــيل ،،، (Re: DKEEN)
|
الأخ دكين
تحياتي
نحن في زمن يصعب فيه تحقيق الأمنيات والأحلام
التي ظلت تراودنا ليلاً ونهاراً وما كتبته هو
تعبير عن واقع معاش وجذء من أوجاع هذا الزمن
المؤلم فهنالك أكثر مأكبر ..
يا أخوي صدقني أنا حاسي بوجعك تماماً وما عندي
غير أقول ليك ..
ردف وأصبر ..
| |
|
|
|
|
|
|
|
|
 Re: حلــم جمــيل ،،، (Re: أبووجيدة)
|
أبو وجيدة ..
قنب جنب الشاطئ هناك ..
وأكتب ..
أكتب غنيواتك للوطن ..
ولعم عبدالرحيم وجنيات التعب ..
أكتب للعرقهم بنزل يروي الأرض ..
ما أجملك حين تكتب ..
محبتي ..
| |
|
|
|
|
|
|
|
|
|
Re: حلــم جمــيل ،،، (Re: معتصم دفع الله)
|
الغالي معتصم
تحية بحجم روعتك وأنت تناشدني بالجلوس عند
الشاطيء والغناء للوطن ، وعم عبدالرحيم
وجنيات التعب .. فثق .. أخي أنا لم أكتب
إلا لأتنفس عبر هذة المفردة والتي هي جذء
من مقدار الآلم الذي يسكننا .. فأملي وأمنياتي
أن أكون بحجم تقديرك ..
| |
|
|
|
|
|
|
|
|
|
Re: حلــم جمــيل ،،، (Re: أبووجيدة)
|
الجميل ابووجيدة
ما أجملك وأنت تحكي معاناة اهلي الحنان
وكيف أهلنا عانوا في تربيتنا ..
وما نعانية نحن مع وليداتنا ..
وما في حل ..
صدقني بكيتني ..
بجي راجعة ...
| |
|
|
|
|
|
|
|
|
|
Re: حلــم جمــيل ،،، (Re: خالدة البدوي)
|
أبو وجيدة
سلام مربع
دة حلم مش جميل و بس ... دة حلم بكل ألوان قوس قزح
Quote: ويمرق أحمد من الجــــــوقة ...
يلقى الوالد سارح وشارد ...
مالك يابــــا ؟؟؟
صباح الخــــير ...
مالك سارح وشايل هم الدُنيا بـــراك ؟..
نحن كـبرنا ولازم نعرف بالهامـــيك ...
لازم نقعد قعدة مـــعاك ... |
تسلم يا زول يا زين
| |
|
|
|
|
|
|
|
|
|
Re: حلــم جمــيل ،،، (Re: خالدة البدوي)
|
المجبوله بصلصال الالفة
الاستاذة خالدة
تحية تجلا وتقدير أنا لم أكتب
إلا عن جزء بسيط من واقع أهلي الحنان ..
وما تزرفيه من دموع هو تخفيف وتعبير عن
عمق الآلم لكنها ليس الختام لهذة المواجع
فثقي بأنني أيضاً عندما أقرأ هذا النص أتوجع
كثيراً ولا استطيع إكمال ما تبقى هذا لأنني اشاهد
صورة هذا الشيخ وحوله أحمد ونورة ..
| |
|
|
|
|
|
|
|
|
|
Re: حلــم جمــيل ،،، (Re: أبووجيدة)
|
شاعرنا الجميل ابووجيدة
بقدر امنياتي
لوطن حبيب
بكل الخير
بقدر أمنياتي الجميلة
لك ..
لي عودة
اصلي ما قادرة
اتابع في كلماتك
الحنينة ,,
| |
|
|
|
|
|
|
| |
Mohamed Abdelgaleel
معتصم دفع الله
خالدة البدوي
ابو جهينة
فيس بوك
تويتر
انستقرام
يوتيوب
بنتيريست