لا ادري لماذا عندما أحس بفراق احد أحبتي يتبادر إلى ذهني هذا البيت
فهو خير تعبير عن خفايا وآلام النفس بفراق من يحب
الفراق هو أكثر أحاسيس الدنيا إيلاما
فابسط أنواع الفراق هو السفر وهو فراق الى حين لو كتب اللقاء من جديد
والأصعب أن يكون السفر لخارج السودان
فهنا تموج بالنفس أحاسيس مزعجة
عندما تعانق والدتك وأنت مسافر
لن تتمكن من أن تحبس دموعك
وتطوف بمخيلتك مشاهد متنوعة وانت صغير وهي تبكي اذا مرضت وهي تفرح اذا نجحت واحساس انك لا تعرف ان كنت ستراها مجددا ام لا
فهذه الأم الغالية هي اعز ما تملك
وهي أغلى ما في الوجود
وفراقها هو أكثر أحاسيس البسيطة إيلاما
عافي منك ... وراضي عنك... سو رضايا عافي منك وراضي عنك سو رضايا .. ما بيخيب الرضى والدك يا جنايا .. أنت من يا دوب صغير من زمان دائماً معايا .. أنت ديمة أمامي ساير ما بخليك بي قفايا .. ما بتغيب من عيني لحظة ولا حصل سبتك وراي .. لامن الله يشيل أمانتو أنا ببقى خصاك بالرعايا .. يرعاك البيرعى وليا بيل يبرد حشايا .. أصلك انت هدية منو بيك اجزل عطاي .. انت واحد مالو تاني رحمة في آخر صبايا .. أنت لما خلاص كبرت دار تسيبني أعيش براي.. ا دار تفارقني تهاجر والحزن يصبح جزايا .. كيف يهون لك تحزن أمك عشان تحقق ليك غاية .. كان مهاجر عشان علاجي بلقى في شوفتك دوايا .. لو كان عشان تسقينا مالك نحن بي حنك روايا .. لو عشان كرعينا راحل نحن بي بعدك حفايا .. لو كان مهاجر عشان تعرس خير أبوك مالي التكايا .. خيرو وافر أبوك يحمدو مراحو مليان بالسعايا .. وبالقروش الجيب مجكن و لسه برضو الجايه جايا .. أصلي منك ما بقصر بحفر أديك المعايا .. إن كان دا كلو كمان شوية بتلقى في دهبي الكفاية .. أصلي من سويتها ناذراها تبقى لي أيام قسايا .. داخرها للزمن البعاكس لسعادتك يا حشايا .. إنت من شبيت صغير راسي ما بتحتاج وصايا .. ما حصل خيبت ظني وما فشل بين غنايا .. لا تسيب أمك تهاجر يمه محتاجة الحماية ... لا تسيبني وراك ترحل انت ياهو ضلي ضرايا .. انت فوق الحوبة مقنع أنت للمكشوف غطايا .. دايرك تبقى جنبي في فرحي وبلايا .. إن كان كحيت اتبنك وأقسم لك غطايا .. داير أقضي عميري جنبك أصلو قارب للنهاية .. خايفه كان تسافر ترجع تلقى فاضي البيت بلايا .. حينها ما تنفع قروشك وما تجيب لك أم سوايا .. ماني عارفه سبب رحيل يا وليدي شنو الحكايا .. إلا تبقى براك شايف في فراق الوالدة غاية .. ما بعاتبك ما بلومك ولو رحلت بلقى في قساك عزايا .. على حجر دايماً قليبك وقلبي كلو عليك جنايا ... عافي منك راضي عنك ســـــو رضـايا ..
لاشيء يؤلمني في غربتي سوا سماع هذه الاغنية الحنينة
ما جعلني اكتب هذا البوست اني تذكرت والدتي صباحا وماجت بنفسي احاسيس وذكريات والمني اكثر انني لم استطع ان انحني واقبل يدها وان اطيب خاطرها بكلمة طيبة وان امنحها قدرا يسيرا من السعادة
فاليكي يا امي تحياتي واشواقي
واسال الاله ان يحفظكي ويمد في ايامك وان يمتعكي بالصحة والعافية
الا لعن الله الفراق
05-05-2007, 09:20 AM
أبو الحسين
أبو الحسين
تاريخ التسجيل: 11-07-2006
مجموع المشاركات: 7948
واسال الاله ان يحفظكي ويمد في ايامك وان يمتعكي بالصحة والعافية
اللهم آمييييييييييييييين... وأُمي كمان وكل الأُمهات ياااااااااارب...
ونسأله تعالى أن يتقبل كل أُم سبقتنا إلى دار الخلود وأن يجعل مثواها مع أُمهاتنا السيدة خديجة وأخواتها...
تعرف يا أخي أيوب...
قبل كم يوم كدة مشغل شريط كشكول بتاع فيديو وفيهو أُغنية محمد جبارة الحنينة بحر المودة (يا يمة رسلي لي عفوك ينجيني من جور الزمان)... فلم أستطع إكمالها... وجريت الشريط لما بعدها...
لك كميات مودتي... وأهديك والجميع عافي منك وراضي عنك سو رضايا...
والرائع دوماً عبد الرحيم أرقي...
05-05-2007, 09:22 AM
ايوب عبدالرحيم
ايوب عبدالرحيم
تاريخ التسجيل: 10-10-2005
مجموع المشاركات: 1441
أمى .. الله يسلمك ويديكى لى طول العمر.. وفى الدنيا يوم ما يألمك .. امى .. الله يسلمك ..
* * * أمى يا دار السلام يا حصنى لو جار الزمان ، ختيتى فى قلبى اليقين يا مطمنانى .. بطمنك أمى .. الله يسلمك
*** خيرك على بالحيل كتير ، يا مرضعانى الطيبة بالصبر الجميل ، سا سعد أيامى وهناى لو درتى قلبى ، أسلمك. أمى .. الله يسلمك
*** أنا مهما أفصح عن مشاعرى برضو بيخونى الكلام وقولة ( بحبك ) ما بتكفى وكل كلمات الغرام يا منتهى الريد ومبتداه .. يا الليا .. الله يسلمك .. ويديكى لى طول العمر وفى الدنيا يوم ما يألمك .. أمى .. الله يسلمك ..
05-06-2007, 09:48 AM
ايوب عبدالرحيم
ايوب عبدالرحيم
تاريخ التسجيل: 10-10-2005
مجموع المشاركات: 1441
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة