كتب الكاتب الفاتح جبرا المتوفرة بمعرض الدوحة
|
|
 كلام بلدى .. عن نفسى وعن بلدى
|
[1)
بين كباية قهوة .. وصرخة شافع بال على نفسه , لباسه اتبلل
اتذكرتك
والكمسارى بيهرش فينى عشان الباقى
اتذكرتك
لما النور فى الحلة بيقطع .. والكتاحة تغبر بيتنا
اتذكرتك
صوت الموية فى الحنفية زى صوت حسك
كنتا بخت السفة صغيرة دون ما تلاحظى
وانتى بتكرهى ريحة خشمى لما اسف
يعنى خلاص هاجرتى بعدتى فى امريكا !! .. ياااااه
كنتى بتكرهى فى الضهرية نمشى كتير
تزعلى مرة .. ومرة بتصرخى .. مرة تصهينى
وانا بستهبل واضغط نهدك دون ما اقصد
- طبعا قاصد يا مستهبل .
حوش جيرانا الفاضى .. فيهو حضنتك
لما بنوهو .. اتذكرتك
يوم خمسنا سيجارة بينسون .. طول اليوم قعدتى تكحى
هل تتذكرى ؟ .. انا بتذكر
كنتى قصيرة .. لمن احضن راسك كان بيكون فى بطنى
هل ما زلتى لسه بعيوة ؟ .. ولا طولتى ؟
انا قصرنى الوجع الغالب
هل تتصورى بت يا روعة ؟
رغم قطار العمر الاوغل .. لسه بمارس قلة ادبى
وبعد سنين الغيبة الطالت
هل تتخيلى ؟
لما الباب امبارح دقا
اتوقعتك
......
شاهين.
|
|
 
|
|
|
|
|
|
|
|
Re: كلام بلدى .. عن نفسى وعن بلدى (Re: shaheen shaheen)
|
(2)
تباشير الخريف هلت
تباشير انكسار لاحت
هدوم العيد .. وريحة بسكويت فاحت
طباشير فى الحيط كتبت :-
(حضرت اليوم ولم اجدك)
وامبارح ولم اجدك
واول اول امبارح
متين اجدك ؟
وتجدينى ؟
وخايف من مطر ليلك يبلل لى هدوم عيدى
مطر شكشك على راسى
صلاة العيد جوار بيتكم
اخوض فى الطين
وكيف اصلك , ولا اجدك ؟
اصوم فى العيد ؟
صيام العيد حرام شرعا .. ولم اجدك
انوم احلم عشان القاك
- يا (احلام) .. يا (احلام) .
كوابيسك بقت اضغاث
(حضرت اليوم ولم اجدك) .
..........
..........
تباشير انكسار لاحت
واعشاب الاسى الظهرت
على سرج الحصان رقدت وارتاحت
وعايز اغرق
وسامع النيل بنادينى
- تعال اغرق .
- تعال اركب على الامواج .
انا مجدوع على شاطى
طحالب خضرا فى وشى
كلاب ضخمة .. بتنهش فى لحم فخدى
ودود داخل .. ودود طالع
صقور بدات تحوم حولى
بقيت منفوخ .
..........
..........
تباشير انكسار لاحت
وريحة بسكويت فاحت
وغربان الفريق صرخت
على سلك العمود ناحت
تباشير الخريف هلت
واحلام العمر ولت
سدود قدامك اتعلت
قدود .. والدود جيوش بتصفى فى دمك
متين اجدك ؟
وتجدينى ؟
وخايف من مطر ليلك .. يبلل لى هدوم عيدى
(حضرت اليوم ولم اجدك)
(حضرت اليوم ولم اجدك)
(حضرت اليوم ولم اجدك)
وسامع النيل بنادينى .
......
شاهين.
| |
|
|
|
|
|
|
|
|
|
Re: كلام بلدى .. عن نفسى وعن بلدى (Re: shaheen shaheen)
|
(3)
سين سلام
تعظيم سلام
ويا سلام لو ينقلب هذا السلام قفة ملاح
ارضا سلاح
بارودك المعلون يكون
شارع زلط .. كبريت , وكباية لبن مع بسكويت
كفاك اقيف
كفاية دم .. هم .. وغم
مليون من الاميال براح .. تكفى الجميع وبارتياح
لو ينقلب هذا السلام فدان قطن .. فدان قمح
شفخانة فى كل القرى
وبنات مدراس متمخطرين .. حاضنين على النهد الشنط
افتح شبابيك للهواء
دايرين نعيش
ناكل سمك .. نشرب عصير .. ونخمس الشاى التقيل
تحت الشجر يحلو السمر
نقعد ونضحك , نستريح
افتح شبابيك للهواء
وطن الجميع وللجميع
للمؤمنيين والملحدين والنص دين
عايزين وظايف نشتغل
يمكن بنات كايسة العرس , تلقى العريس
صمتا رصاص .. ملعون ابوك
ملعون ابو الحرب الضروس
ملعونة يا كل الجيوش
ولتحيا نبتة حب خجول
مع طلعة الشمس الضحوك
شاقة الارض زى نبتة الفول الصبوح
وليحيا بينا الحب
ولتحيا الحياة
وليسقط الموت .. المقابر.. والدمار
وليسقط الموت .. المقابر .. والدمار
هيا انقلب , هيا انقلب
انسانة حلوة مشعة بالبهجات .. بترش على رمال الطريق افراح
صمتا عفن اتراح قبيح
نقعد ونضحك .. نستريح
مليون من الاميال براح .. تكفى الجميع وبارتياح .
......
شاهين.
| |
|
|
|
|
|
|
|
|
|
Re: كلام بلدى .. عن نفسى وعن بلدى (Re: shaheen shaheen)
|
(4)
ومظاهرات .. مظاهرات
اندلعى يا ذات العجاج
عالى الهتاف .. شاقى العنان
افتح ترابيس اعتقال
بوليسنا اب بمبان تعال
(دايرين دروس فى حب حكومتنا العروس)
اضربنا فى الراس والكراع
لعلع رصاص
اصقعنا بالخطب الرئاسية الكبار
اندلعى يا ذات العجاج
..........
..........
خوفنا انشرخ
ضرسا مسوس ينقلع
ومتى المسدس بنفعو ؟
لما الجماهير تندلع
..........
..........
اتكلمى .. وتحركى
او ارفسيهم واصهلى .. وتصهللى
اخر الطريق راح توصلى
وتوضى
قرب اذان الفجر يصدح بالخلاص
ف تخلصى من عبء رعبك
واركضى نحو انتصار
..........
..........
وضعوا اللجام شان يركبوك
يا مهرتى البرية .. يا بدر التمام
يا درس فى التاريخ سلام
يا ارم يا ذات العماد
(اتراك) سلام
يا (انجليز)
(عبود) سلام
(جعفر) امام العرش كيف ؟
ما قلتوا انتوا نهاية التاريخ !!!
يا القلتوا رب الكون خلق مهرتنا بس شان تركبوا
فلماذا يعنى ودون مؤاخذة يا شباب
لما الحثالة فى بيت ابوكم تنتفض
بتجقلبوا ؟
..........
..........
نوارة النوار سلام
يا مهرة ضد هذا اللجام
برسيم بيرسم ليك طريق نحو السحاب
اندلعى يا ذات العجاج
زهج انتظار من انتظار
لا رجعة تانى الى الوراء
ولا فرار
الشارع المفتوح ها داك .. والبحر قدامك فسيح
والحل فى الشارع صريح
فلماذا يعنى ودون مؤاخذة يا شباب
لما الحثالة , ولاد شوارع , تنتفض
بتجقلبوا ؟
..........
..........
ارفع مسدس عسكرى
اضربنا فى الراس والكراع
بس ذاكر التاريخ كويس وافهمو
هو اللى بشرح فى ذكاء
سر العلاقة بين المسدس .. والجماهير الغفيرة
كلمة السر (اندلاع)
اندلعى يا ذات العجاج .
......
شاهين.
| |
|
|
|
|
|
|
|
|
|
Re: كلام بلدى .. عن نفسى وعن بلدى (Re: shaheen shaheen)
|
(5)
يا فاطمة
فى زمن الزهايمر .. اذكرينى
والناس بتنسى الناس
ف كيف تنسينى ؟
سيبانى فى طريق مهجور براى
خطواتى ما تحصل سنينى
ف تذكرى الماضى اللى كان
يا فاطمة
ارجوك اذكرينى
..........
..........
من لوحة التذكار
ومن صورتك معاى
من بسمتك .. من توبك الابيض
ومن علبة سجايرك
والمقالات .. نشرة الاخبار
غمزة عيونك
مشيتك زى عسكرى
شلال انوثتك
رقتك
تكشيرة الوش .. يا هزارك وشدتك
..........
..........
يا فاطمة
فى زمن الزهايمر .. والخلعة من وسخ الزمان
عبث الكتابات والكلام
ضجر السياسة
اليأس من هذا الزحام
الهاوية .. والا مكان
فطومة يا زاد الطريق
فطومة يا كتف الرفيق
فطومة يا قشة غريق
ف تذكرى المحروق على نار الحريق
..........
..........
يا فاطمة
فى زمن الزهايمر
اذكر ويتعبنى التذكر والحنين
فى غابة النسيان اتوه واتذكرك
على صوت تذكر ذكرتك , بتذكرك
ريحة سجايرك .. ضحكتك
الله عليك .. مشتاق شديد ل قهوتك
احضن اغازل شفتك
الله عليك .
......
شاهين.
| |
|
|
|
|
|
|
|
|
|
Re: كلام بلدى .. عن نفسى وعن بلدى (Re: shaheen shaheen)
|
(6)
عام جديد .. جرح قديم
ذكريات .. غبار كثيف
كل عام وانتى بخير
وكل عام وانا فى انتظار
فى محطات خالية من ركاب جداد
نفس الملامح والشوش
نفس الكلام
نفس احتياجى اليكى .. نفس الاشتهاء
عام جديد والهجر طال
العمر راح .. والشعر شاب
ضيعنى فيكى سراب لقاء .. ولا لقاء
فى كل عام نفس الوداع
اتسرسبت قدرة صمودك يا احتمال
حتى الهزايم والضياع , زى كل عام
الفرق ايه ؟
بين بكرة , وبعد بكرة .. وبعد بعده
الفرق ايه ؟
تكرار لئيم
نفس السؤال السرمدى
ولا جواب
ف متى الرحيل ؟
لمتين تأجل فى قرار الانتحار ؟
فى اى عام ؟
ود يا جبان
......
شاهين.
| |
|
|
|
|
|
|
|
|
|
Re: كلام بلدى .. عن نفسى وعن بلدى (Re: shaheen shaheen)
|
(7)
سنة واحدة بس
والاربعين ح يدق على ابواب مدينتك .. افتح الباب الكبير
سنة واحدة بس
شمسك خلاص .. بدات تميل نحو المغيب
سنة واحدة بس
اكوام قزاز مكسور .. وبحثك عن بصير يجبر كسور
يا (دون كيشوت) العظيم
ضيعتا عمرك يا غبى
- انا بعتقد .. انا بفتكر .
- الم الكتابة المؤلمة .. وعى الجماهير لو تعى .
امشى اتلهى
شوف ليك فكى
يمكن حجابو يرجع العمر اللى ضاع
وتبداء صاح
وتنتهى
مثل الجميع ما بيشتهى
والاربعين جايك جرى
ود يا غبى .
......
شاهين.
| |
|
|
|
|
|
|
|
|
|
Re: كلام بلدى .. عن نفسى وعن بلدى (Re: shaheen shaheen)
|
(8)
بتسكر , والشمس تضحك على حالك
بعد سكرك بتطرش فى حطام ذاتك
وبين كتبك تدس المك
وتبكى على الرصيف وطنك
بتدفع فى فواتيرو
منو البدفع تمن كفنك ؟
وتبكى على الرصيف ماشى
تدوس الحسكنيت ماشى
مكسر فى عضم ركبك
كسر عضم الحلم قاسى .
......
شاهين.
| |
|
|
|
|
|
|
|
|
|
Re: كلام بلدى .. عن نفسى وعن بلدى (Re: shaheen shaheen)
|
(8)
اشمعنى من كل البنات اخترتا فاطمة ؟
وعلى الرصيف بتعدى الاف البنات
اشمعنى انتا على الرصيف مستنى فاطمة ؟
خبطك زمانك فى قفاك
اشمعنى لما صرختا منه .. صرختا فاااااطمة ؟
وكتار خلاص الفارقوك .. خلوك بدون قشة غريق
اشمعنى فى حرق الحشاء ؟
حرقت حشاءك .. ست البنات , الست فاطمة
ما الحكمة من سفرك براك ؟
من غير كتب .. وبدون شنط
دون زاد .. ودون الست فاطمة
ما المعنى من عبث الحياة ؟
وكتار خلاص على صدرهم ياما بكيت
اشمعنى لما بتبكى هسع ؟
اشمعنى بس بتحن لفاطمة ؟
......
شاهين.
| |
|
|
|
|
|
|
|
|
|
Re: كلام بلدى .. عن نفسى وعن بلدى (Re: shaheen shaheen)
|
(10)
لورى الشمالية .. اوعك من الرملة
ما بين هذا .. وذاك
بين ضحكة والدمعة
محبوبتى شايقية
مروية .. نيلية
ك الطفلة فى الروضة
ترضع صباع ايدها
سيدى (الحسن) سيدها
تصطاد سمك فى الليل
اصطاد فساتينها
وثمار بساتينها
وتعوم على جسمى
اغرق اناديها
تغسل مناديلها .. واشوف قناديلها
تخجل تضاريها
افتح , اغوص فيها
اغسل عليك شبقى
- ضيعتا لى شبطى .
- شكلك ح تفضحنى .
- ود عمى بضبحنى .
بين لا .. كفاية .. خلاص
الليل بيسترنا
بس من عيون الناس .. يا ربى استرنا
والذنب ما ذنبى
عسلك وما بيكمل
لما الشمس تطلع
بتمنى لو ترحل
شان ليل جديد يظهر
تصطاد سمك فى الليل .. اصطاد فساتينها .
......
شاهين.
| |
|
|
|
|
|
|
|
|
|
Re: كلام بلدى .. عن نفسى وعن بلدى (Re: shaheen shaheen)
|
(11)
داود نبى
موسى نبى
عيسى نبى
ومحمد المعصوم نبى
وكل من ليهو نبى .. يقراء صلاتو على النبى
بوذا حكيم .. (محمود) حكيم
(محمود) رضى الله عنه وعن بنيه
ما الفرق ما بين الصعود الى السماء بمشنقة , او بالصليب ؟
عيسى نبى .. (محمود) حكيم
(جمهورى) يا الطالع السماء
جيب لى معاك شجرة
فى ضلها اتكلم .. اقنع واتدقا
او جيب معاك نبقة .. الفقرا بارونى
احسن تجيب بقرة .. تحلب وتسقينى .. لبن الحكم يا حكيم
الجهلاء خذلونى
(محمودنا) شن القول
دين الله دين محمول
حمال وجوه ووجوه
من اسمو كان الزين
من اسمو كان الشين
دهب السكوت لمتين ؟
فضة كلامك ماس
تمن الكلام الراس
يا الفة فى الكراس .. اكتبنى هرجلتا
سكك الكلام خطرة
والزول ده راجل جد .. هو الجرجر السلبة
ما السلبة هى البتجر
سلبة مشانقكم وهبت حياتو الجد .. والزول ده راجل جد
تعظيم سلام يا بوم
قاضى السجم والشؤم
والعسكرى السكران .. اصبح امام مختوم
سلخانة الجبهة
صمت الرجال مذموم
لما الرجال بتنوم
(محمود) بيصرخ لا .. شان الرجالة تقوم
جزار بنى خيبان
تشريعك التعبان
كرسى الحكم هلكان .. شوف ليك صمغ ولبان
يا قاضى يا فاضى
دم البشر غالى
دين مين يا ود يا ظريف ؟ .. شافع يدين عالم
دين كيف يا قاضى ضليع ؟ .. قطع اليدين ووعيد
معذور رئيسكم جد .. دخل الديانة جديد
داير العبيد تخضع لحكم نار وحديد
سبتمبر الملعون .. نص كم قوانينك
خيم الطؤرى وين ؟ .. ملعون ابو سنينك
هذا الطوفان
ذل الرجال .. ذلة
قطع الفقير .. خسة
الاخذ بالشبهات , قلة عقل , بدعة
عيسى ولد مريم
(محمود) ولد فاطنة
عيسى نبى
(محمود) حكيم
(محمود) رضى الله عنه وعن بنيه
ويهوذا لعنة الله فيو
يا سيدى .. ومعلمى
عاشق جمال فكرك .. كتب عقلك
نهايتك
لما تنزل من سماء الله , لتبداء من جديد
ما الفرق ما بين الصعود الى السماء بمشنقة , او بالصليب ؟
بوذا حكيم .
......
شاهين.
| |
|
|
|
|
|
|
| |
shaheen shaheen
سلمى الشيخ سلامة
فيصل محمد خليل
اسعد الريفى
ولياب
abubakr
ود العجمى
فيس بوك
تويتر
انستقرام
يوتيوب
بنتيريست