|
Re: نجوم الغد .. فضل أيوب فضل .. والأمل القادم .. (Re: Salah Abdulla)
|
صلاح المهبوش ..
الولد غنااااااي يا صاحبي .. الله يسألني غناي , إتذكرت نقة مع عامر الجوهري .. قال دي غنية صعبة ( ما لي غيرك حياة ) .. ليه صعبة يا عامر .. ؟؟ لأنه الشجن الفيها عالي , يا البيغنيها يوصلو للناس زي ما الله خلقو , يا كمان يشوف ليهو شغلة يقضيها . الولد الغناي فضل إنتظرتو ينخ في المقطع ( الكسرة ) : ما شوهوك بفصادة على الخديد السادة .. و بعده طوالي الطلعة البديعة بتاعت : طبيعي خلقة ربك ( و ربك دي يا صلاح إلا زول راضع لبن أمه جد البيقدر يوصلك بيها السما الأحمر ) . الزول خزلني و كبّ كمية طرب بديع يشهد الله . الشافع ده نصيبة يا ابن امي .. حنجرة ندية و صوت تطريباتو حقتو برااااهو ..
يا صلاح ياخ .. تاني أنصاص الليل ما تلاوز لي بأي شي يدخلنا في جوع الروح .. برانا قاعدين على الهبشة .. الله يرضى عليك .
| |
|
|
|
|
|
|
Re: نجوم الغد .. فضل أيوب فضل .. والأمل القادم .. (Re: طلال عفيفي)
|
اطلال كما يناديك الحاج حجاج .. إزّيك ..
فضل ده ولد جابوه غنى في برنامج نجوم الغد .. الزول ده لمن يغني ، بيغمض عيونو .. تعرف الزول البيغمض عيونو في الغنا ده بيكون زول خطر عديييل . الود غناي يا طلال .. غناي بالجد صوت غريب غايتو أنا قريب ده ما سمعت زيّو .. عندو ثقة غريبة في نفسو ، وعارف نفسو غناي ، ما اهتّز ، ولم يرفّ له جفن عندما غنى .. أشاد بصوته الرائع ( أعضاء اللجنة ) حواء المنصوري ، وأنور ، ومحمد سليمان .. بالله أسمع الزول ده يا طلال.. وكان لقيت لي تسجيل ليهو والا أعادوا الحلقة بنزلها هنا ..
إنت المصحيك لغاية هسع شنو ؟؟
تحياتي
| |
|
|
|
|
|
|
Re: نجوم الغد .. فضل أيوب فضل .. والأمل القادم .. (Re: Emad Abdulla)
|
عماد ..
تعرف الحاجة الوحيدة الما ممكن تقبل ( المجاملة ) العمل الابداعي .. أياً كان .. الزول الغناي ظاهر أنو غناي .. والرسّام ، والكتّاب برضو .. كلهم أعمالهم منظورة ، مقروءة ، مسموعة . يعني تلامس حواسك ، فيبقى ما في مجال ( تكضب ) أحساسك ، وتغلفو بأي شئ يقلل من قيمة العمل المشاهد (بفتح الهاء ) أو المسموع أو المقروء ، أو (بالمقابل) يعظّمو، ويديه أكثر مما يستحق .. وعامة هذه الامور نسبية ، ومؤكد أذواق الناس متباينة .. ولكن في بعض الحالات يجمع الناس على رأي واحد . ارجو أن يكون فضل احدى حالات ( اجتماع الرأي ) على الرغم من علمي أننا ( السودانيين ) لا نجتمع على رأي .. الود صغير في السن ، لكنه يتعامل مع صوته بخبرة كبيرة ، واذا وجد من يأخذ بيده ، فسيكون له شأن. تصدق بعد ما سمعت هذا الشاب الصغير اطمئنيت أنو ح أسمع غنا سمح (على الاقل من فضل ده) لحدى ما أموت بعد زي تلاتين سنة كده. عليك الله هسي زي الود ده ما يخليني ألاوز ليك (نص) الليل ؟ والله ده يخلبيني ألاوز ليك (قزازة) كاملة .. الليل أليل يا أخو .. بكرة ناس تمبس يجيبوا لينا الزول ده هنا، ونشوف قصتو شنو ؟
| |
|
|
|
|
|
|
Re: نجوم الغد .. فضل أيوب فضل .. والأمل القادم .. (Re: Salah Abdulla)
|
إنتو أسه أخوان وشُنبات وبطاحين وحداثة Salah Abdulla وEmad Abdulla وفضل وسهر والنيل الأزرق وغُني وذكريات ومزيكة ! كدي تمبس ده يجيب الغُنى بتاع فضل ده ويطلع زي الشاب سعد الكعب داك ، بتاع نجوم الغد برضك ، ...، والله تلاتة ولابشتغل بعماد- صاحبي ده بجي بكتب ليك عمك شنبو ودعم شنب علي مهدي ! _________
والله لكن حواء والدة ، اسه انت يا صلاح هنا380 مُشاركة وانا ماجايب خبر ، يا سلام ياخ .
قُت ليك "عدلنا شيئاً " دي لذيذة ، تاني لو اتزنقت بستعملها ! والحقوق محفوظة .
| |
|
|
|
|
|
|
Re: نجوم الغد .. فضل أيوب فضل .. والأمل القادم .. (Re: Salah Abdulla)
|
يا ابراهيم .. كيف حالك
قرمبوز .. والقاهرة .. والكتابة الطاعمة .. وشنو ما عارف كده .. وبعد ده كلو ( شنب ) قدر ده ما تشوفو الا هسع ؟؟ يا حليلك .. السودان قلل ( دخلاتك ) هنا .. وين كتاباتك اللذيذة .. يا رايق ؟؟
اسمع فضل ده ، الزول غناااااااااي ، وح يعجبك .. ( أشارطك ) ..
أنتو الليلة مالكم كلكم مساهرين ؟؟؟ الحاصل شنو .. وبالمناسبة ، يومي الخميس والجمعة ، أكتر يومين بيكون هادين في (المنبر العام) .. الناس ديل شكلهم كده بيخشو ( النيت ) من المكاتب !!!!
| |
|
|
|
|
|
|
Re: نجوم الغد .. فضل أيوب فضل .. والأمل القادم .. (Re: Salah Abdulla)
|
انا ذاتي كنت من قتلى ذلك الولد فالت الإبداع فاغم الإمتاع والمؤانسة ، قتلني بها يا صلاح
Quote: وقبل أن أفيق من ( نشوة ) الغنية الأولى .. قتلني بأسمر يا أسمر يا جميل .. |
انا ماكنت في واحد بيجي بعد نيف و40 سنة ويغنيها تاني بنفس الطريقة القاتلة
لو عايز تصرع تاني يا صلاح تابع البت الإسمها عافية حسن
عفيت منها
| |
|
|
|
|
|
|
Re: نجوم الغد .. فضل أيوب فضل .. والأمل القادم .. (Re: أبو ساندرا)
|
صديقي عبدالرحمن ..
يا صاحب ( الأضان النضيفة ) .. خوفي أن لايعطى هذا الشاب الاهتمام والعناية اللازمين .. ويضيع . الغريبة الناس بتهتم بالمواهب الزي فضل ده ، ويفضلوا يتكلموا عليه زمناً .. الزول ده ما سمعنا واحد ( هبب ) ليهو ساكت .. يا ربي يكون لآنه ( شاب ) وليس ( شابة ) ؟ والا يمكن ( إسمو ) ما عاجبهم ؟؟
تصدق با بركة ، يكون الخلل في ( إضنيننا ) نحن ديل ..
هسي بقو اتنين ( عافية وفضل ) ، أنا غايتو ديل بيكفوني باقي سنيني الجاية دي ...
| |
|
|
|
|
|
|
Re: نجوم الغد .. فضل أيوب فضل .. والأمل القادم .. (Re: Elmosley)
|
أستاذنا الموصلي ..
يا سلام .. الآن فقط أطمئنيت إنو بعد ما نسمع الشاب ده ، ح نسمع نقد علمي راقي .. والله الولد خامة خطيرة جد .. محتاج لمن يأخذ بيده .. تصدق يا موصلي فضل ده لو محظوظ تلم فيهو شهر واحد بس تمسّكو (الطريقة) .. وح يكسر الدنيا .. وكل طريقة ليها شيوخ يا (شيخ يوسف) ... بصراحة عجيتني خامة صوتو جداً ، لمن تسمعمو ، بتسمع فيهو أصوات فنانين كتار .. أتمنى نسمعو هنا ، ونسمع رأي لجنة تحكيم برنامج نجوم الغد فيهو .. أنور قال لأنه عضو لجنة ما عايز يقول هو معجب بيهو ، وحواء المنصوري لم تختلف كثيراً عن أنور ، أماأستاذ محمد سليمان فلم يستطع التعليق !!!
| |
|
|
|
|
|
|
Re: نجوم الغد .. فضل أيوب فضل .. والأمل القادم .. (Re: شهاب الفاتح عثمان)
|
السلام عليكم الأخ صلاح عبدالله لك وزوارك الكرام التحية شاهدت الحلقة حين بثها ثم أعدت مشاهدة الفنان فضل أيوب فضل بعد قراءة بوستك ويؤسفني أنني لا أتفق معك في تقييم الأخ فضل فصوته أقرب لصوت سيد خليفة وأظن أنه لو غنى له لكان أقرب عموماً حب الناس مذاهب وشكلك كدة اشتهيت الغنية وطولت منها ومن عادتي احترام اختيارات الآخرين عموما ً سجلت الحلقة وسآتيكم بالأغنية المقصودة إن لم يأت بها الأخوان تمبس وراكوبة غداً بإذن الله بعد أن أحولها من الفيديو الى فورمات قابلة للرفع على الانترنت. تحياتي
........................ وما الناس إلا هالك وأبن هالك *** وذو نسب في الهالكين عريق
| |
|
|
|
|
|
|
Re: نجوم الغد .. فضل أيوب فضل .. والأمل القادم .. (Re: Raja)
|
العزيزة جداً رجاء ..
شكراً على مرورك هنا .. أنا وعماد ( صحبان ) وبعدين أخوان .. لكن الأجمل من اكتشافك ( لخوتنا ) أنا وصاحبي الكاشف ، هو مرورك الليلة هنا .. فأهلاً بك ومرحباً .. ومنتظرين واحد يتكرم علينا وينزل أغنية للشاب الفنان الاسمو فضل ده هنا ..
شكراً تاني على مرورك ..
| |
|
|
|
|
|
|
Re: نجوم الغد .. فضل أيوب فضل .. والأمل القادم .. (Re: Salah Abdulla)
|
أخونا الزول .. شكراً جزيلاً ومقدماً على تبرعك بانزال الأغنيتين هنا ..
Quote: ويؤسفني أنني لا أتفق معك في تقييم الأخ فضل |
وأنا يفرحني أنك لا تتفق معي فيما قلته عن فضل .. وهذا هو المطلوب .. فلا داعي للاسف يا صديقي ، فالاختلاف دليل صحة ، والاستفادة دائماً تأتي من خلال الاختلاف الايجابي الذي يصب عامة في مصلحة العمل أياً كان .. ولدينا تجارب راقية هنا في هذا الموقع ، أنا شخصياً استفدت منها استفادة كبيرة جداً ، خاصة اذا أثرى المشاركات أساتذة متخصصون ، مثل استاذنا الموصلي وغيره من الموسيقيين ،والمهتمين بالشأن الموسيقي ..
عليك الله يا ( الزول ) ما تتأخر علينا بالأغنيتين ..
ولك الشكر مرة أخرى ( ومقدماً ) برضو ..
| |
|
|
|
|
|
|
Re: نجوم الغد .. فضل أيوب فضل .. والأمل القادم .. (Re: الزوول)
|
يا سلالام يا الزول .. طبعا ريحتني راحة ما عادية وكنت عايز ادخل واكتب لي صلاح .. ما إلك إلا الزول .. انا لي فترة عندي مشكلة في الطبق وفي النيل الأزرق علشان كدا كل حلقات نجوم الغد الأخيرة فاتتني .. والله ياصلاح البوست ده لقيتو امس السبت الساعة اطناشر بالليل إنت قايلني الايامات دي قاعد اعمل شنو يا اصلي ؟؟ انا برجع البوست ده .. تاني حسع جيت اقول لي الزول ده شكرا .. علشان حليتني وانا بفتش من امس ووصيت الحلة والفريق للاغنية دي .
| |
|
|
|
|
|
|
Re: نجوم الغد .. فضل أيوب فضل .. والأمل القادم .. (Re: الزوول)
|
نشكر الزول جزيل الشكر
وضميناه الي العتاوله الاخرين
صلاح فضل خامه صوتية ممتازه وسليمة وقدرة علي التطريب جيدة بمرور الزمن سيتعتق ويكون من العتاوله اذا اتخذ طريق الجد هو يذكرني بعدة اصوات منها سيد خليفه وياسر مبيوع محبتي اهم حاجه انو متعلم وما حيجي يقول لينا راجل المره
| |
|
|
|
|
|
|
Re: نجوم الغد .. فضل أيوب فضل .. والأمل القادم .. (Re: ملكة سبأ)
|
الزول الوسيم .. في طبعو دايماً هادي.. شكراً على الهدية الجميلة دي يا راجل يا راقي .. تعرف أنا البوست ده فتحتو مخصوص ( للتاريخ ) .. عشان الفت الانتباه للشاب الاسمو فضل ده .. كل ما أتمناه هو أن يلقى هذا الشاب ركن صغير في ذاكرة الجميع ، وأنا على ثقة (تامة) انو ح تتذكروه يوما ما في المستقبل. وطبعاً يا زول ما ح أفكك ، لغاية ما تنزل لي الأغنية التانية بتاعت أسمر يا اسمر يا جميل، ولنك الحفظ بتاعهم الاتنين..
يا تمبس عذرتك والله ، ما دام ما عندك الايامات دي النيل الازرق .. بالله يا تمبس لمن تجي تنوم أقفل غرفتك عليك ، وأطفي النور ، واسترخى شديد ، وأسمع الزول ده.. لكن يا أخو شوف ليك طريقة رجع النيل الآزرق دي ، نحن معتمدين عليك وعلى الشباب الحلوين في (التوثيق).. أنت وبقية العقد الفريد من العتاولة (كما سماهم أستاذنا الموصلي) . يا ملكة شكراً على مرورك ، وعليك الله كان ما سمعتي الشاب الموهوب ده ، والله صوتو مريح بشكل .. ولوالصوت عندك فيهو إشكال ، أنا ح أتوسط ليك عند تمبس عشان ينزل ليك برنامج هنا تقدري تسمعي بيهو الغنا السمح والصوت الجميل الزي جق فضل ده .. تمبسكو الحقنا بالله بتكنولوجيا الصوت عشان الملكة دي تسمع وتستمتع.. ولأستاذي الموصلي أقول .. يكفيني جداً جداً كلامك أدناه ، والله أكتر منو ماداير عديل كده ..
Quote: فضل خامه صوتية ممتازه وسليمة وقدرة علي التطريب جيدة بمرور الزمن سيتعتق ويكون من العتاوله اذا اتخذ طريق الجد هو يذكرني بعدة اصوات منها سيد خليفه وياسر مبيوع محبتي اهم حاجه انو متعلم وما حيجي يقول لينا راجل المره |
يا أبوهديل ده معناه أن الزول ده يرجى منو الكتير .. وزي ما قلت أنو البوست ده (توثيقي وللتاريخ) .. ليه ؟؟ عشان الزول ده في رأيي صوتو (متفرد) .. كيف ؟؟ وفي نظري برضو دي لأسباب كتيرة أهمها إنو برنامج نجوم الغد من أهم البرامج حالياً لانو بيورينا الناس اللي ح يشكلو خارطة الغناء في المستقبل ، وبيعرضهم لينا من هسي ، لم يقنعني من هذا الكم الهائل من المغنيين إلا اثنان (مع الاحترام الأكيد لكل المشاركين وخاصة الذين أحرزوا مراكز متقدمة في جميع المنافسات السابقة ) والاتنين ديل هم عافية وفضل .. الاتنين بيشتركوا في عناصر اساسية كتيرة ، المهم أنو فضل ده (كما عافية) بيتميز بالآتي : أول حاجة أنه ( موهوب ) يعني ربنا اداهو صوت جميل ، كده من عندو. تاني حاجة صغير في السن ، وهذه تعني القابلية للتطوير ( والتطويع ) والتشكيل ، من خلال التدريب. ثالت حاجة إنو صوتو متفرد، ودي مهمة جداً جداً ، يعني صوتو مختلف ، خامته ما تقليدية ، يعني عنده (حقو براهو) وهو نوع الصوت البيعيد ليك بعضاً من الأمل ويبشر بإضافة انتاج ايجابي ويبشر أيضاً باستمرارية مسيرة الغنا السمح، ومعظم السمعناهم في السابق أصواتهم مكررة ، وتقليدية، ساهل أنها تتكرر ، كل اسبوع أو شهر ممكن تسمع صوت مشابه ، يعني ما في إضافة حقيقية، وزي فضل ده ما قعد يتكرر كتير. إذا كان صوتو يشبه في جزئية منه صوت فنان آخر ، فده شئ طبيعي خاصة لشاب في سنو ، لانو هو فنان لم يكتمل ، يتلمس خطاه ويبحث له عن (فَرَقَة صغيرة ) ليعلن عن وجوده، وأتمنى أن يجدها. أرجو أن تتاح لكم فرصة سماع رأي لجنة التحكيم ، وهي تضم أتنين من خريجي معهد الموسيقى وهما أنور وحواء المنصوري ، أسمعوا راي الجماعة ديل ، أنا (العنقالي ده) خلوني بس أسمعوهم وأحكموا. قناعتي أن أي صوت تقليدي عادي لن يضيف لمسيرة الغنا في السودان أي شئ ، ونحن حقيقة ما محتاجين لأصوات مكررة ، مملة ، حاجتنا هي لاصوات تضيف لينا حاجة . شوفو هسي الفنانين الشباب ، منو الماشي بخطى ثابتة ، ومنو البيكابس عشان يعمل حاجة وما قادر ؟؟ ما بتصور أنو ممكن اسمع (بقية) عمري لأصوات تنغص علي (شيخوختي الهادئة) التي أتمنى أن تكون.. الشاب ده غناي ، بالله يا جماعة عليكم الله (طبيعي خلقة ربك) دي ما كتلت ليها زول لغاية الآن؟ غايتو عماد عبدالله (ضمان) لحق أمات طه.. أدعوكم للاستماع لهذا الشاب (بهدوء) وبال رايق ، وشوفو خامة صوتو وقوتو، ومساحتو، وامكانيات التطريب العالية العندو .. أنا غايتو ده كلامي ، قلتو هنا للتاريخ ، وان شاء الله تودوني السجن زاتو ..
| |
|
|
|
|
|
|
Re: نجوم الغد .. فضل أيوب فضل .. والأمل القادم .. (Re: Salah Abdulla)
|
السلام عليكم صديقي علاء تمبس منكم تعلمنا وهو جزء من افضالكم الذي عم المنبر والمنابر المجاورة يرد اليكم وصدقني كثير ما أجد طلبات من بعض الأخوة لآعمال معينة بأسمائكم ( شلة العتاولة كما اسماكم أستاذنا الموصلي) وتكون معي وأفضّل أن تكون المبادرة من جانبكم فأنتم أحق بالفضل.. والجاتك في ( طبقك ) سامحتك.. ........... استلذنا الموصلي أنا فخور بأتفاقي معك ( وليس اتفاقك معي ) في شبه صوت الواعد فضل بطبقات صوت الفنان سيد خليفة وشكراً لضمي لشلة العتاولة.. ............... الملكة عاد البوست ده كلو زول قال ما سامع غيرك مافي اها الغلط ويييييييين يا ربي ؟؟؟ أولي انتي بأه عموما لو لسة ما سامعة فأظن انك محتاجة تنزلي برنامج اسمه : Adope Flash player وستجديه على الرابط التالي http://www.adobe.com/shockwave/download/download.cgi?P1...rsion=ShockwaveFlash .................. الأخ صلاح عبدالله عذراً على تغيير مسار البوست أول مرة أعرف أن الأعجاب ممكن ( يعادي) بعد الكلام القلته عن الزول الواعد أعدت استماعي له وفعلاً وجدت فيه الكثير مما قلت يعني حماستك للشاب ده بدأت تدي مفعولها شكراً وساعاود انزال الأغنية الثانية مع تعليق اللجنة تحياتي ........................ وما الناس إلا هالك وأبن هالك *** وذو نسب في الهالكين عريق
| |
|
|
|
|
|
|
Re: نجوم الغد .. فضل أيوب فضل .. والأمل القادم .. (Re: الزوول)
|
الزول .. الزول يا صديقي ، لا أجد كلمات أشكرك بها على إنزالك لهذه الأغنية القاتلة .. أكتب هذه المداخلة وخلفيتي ( السماعية ) فضل وأسمر .. وأسبح علي كيفي في دنيا (غير العايش فيها).. هذا الولد ، ليس كبقية الأولاد ، إن فيه شيئاً لا يشبه (أشياء) أقرانه .. وأنني اعلنها هنا ( تحدياً) عدييييييييل كده .. جيبوا لي مغني شاب ، ما معروف ، يماثل صوته صوت هذا الشاب الموهوب .. والفرصة عندكم ، لفوا ، ودوّروا ، وفتشوا .. وفي الآخر ح ترجعوا ( هنـــــــا) .. لأن الجمال لا يخفى ، فهو أوضح من الشمس ، وهو كالحق ، أبلج ، ناصع .. تمنيت أن أسمع فضل يقول (طالب بمعهد الموسيقي والمسرح) كلية الموسيقي والدراما (حالياً).. فمكانه الطبيعي هناك .. تصدق ممكن الزول ده يكون (كان) عايش في فترة الستينات من القرن الماضي ، مع العمالقة ، وغشانا ، وقال أنو ولد صغير وبيقرأ (يادوب) في الجامعة ،،غايتو مرة مرة كده بفكر فيها ..
اها يا جماعة بعد ما صاحبي الجديد ( الزووووول) جاب ليكم الغناء السمح ده ، وجاب ليكم رأي اللجنة .. اتوهطوا في و ا ط ة الله دي واسمعوا الزول ده كويس ،، وبعد داك تعالوا هنا ( وأمرقوا الزمة ) .. وقولوا كلامكم ،، الزول ده غناي والا ما غناي ؟؟ والله (بوستيني ) ده زي ما بيقولوا ما بخليه ، يعني ما بخليه ، ح اتلّحوا ، واتلّحكم لحدي ما (تمرقوا الزمة) .. بجيكم راجع ..
| |
|
|
|
|
|
|
Re: نجوم الغد .. فضل أيوب فضل .. والأمل القادم .. (Re: Salah Abdulla)
|
صلاح الرجل المستمع الجيد والجاد بلا مجاملة انت استمعت الى شاب فنان ذكى بحق فنان يتبارى مع نفسه اظن أن هذا الفنان ينظر الى المستقبل بثقه. يغنى ويستمع الى نفسه بوجه ودود . لو كان لدينا امكانيات فى السودان أمثال هذا الشاب يعطى الكثير لك التحية أخى صلاح ونتابع معك
| |
|
|
|
|
|
|
Re: نجوم الغد .. فضل أيوب فضل .. والأمل القادم .. (Re: Salah Abdulla)
|
أنا بعيد 11 سنه من السودان _ لكن يا أستاذ صلاح الشاب غناى قاطع مافى شك . الزول حرقان ومليان طرب لامن ما قادر يفتح ( ودى من اهم علامات الغناء الحركى) اندماج كامل يعنى ارمى نفسك فى بحر الغناء لا تطفوعلى السطح __ اظن أ ن الشاب جا من اصول فنيه عريقة _الصوت والطريقة فيه تمدن طلاب الجامعات فى السبعينات ( ايام كان الهم التعليم) لكن الشاب فى حوالى العشرين. على كل حال يا أستاذ صلاح الشاب والله فنان وقدم راسخ وعقليه تدرى مافى ( الجراب) ارجو ان تكتب عنه اظن انك تفهم فى شقلات الفن دى كتير نحنا ناس طولنا شويه لكن لا نحب للبلاد الا الخير اكرر ارجو الاهتمام بالكتابه عنه تحياتى وبعدين الكتابه فى سودانيز اونلاين اصبحت حاجه مهمة والرجل يستحق تحياتى أخ صلاح
| |
|
|
|
|
|
|
|