|
|
 قالت لي الحسـناء ...
|
عارفكم ح تجو طايرين ..
لكن ..
ما ح اعتزر لي زول ..
أيوه ..
حتي لو جاني تمبس ذاتو ..
بلق لي مبرر يمرقني ..
أيوة ..
فقه الضرورة .. وما فيش حد احسن من حد ..
مش أنا برضي لسع برلوم ..
طيب ..
عايز الم لي شله . حجة وللا ما حجة ..؟
بس .. بي أخوي وأخوك ..
............
.. بابا المليون فيه كم صفر ..؟
منذ أن عهدتها تلاعب بأناملها الرقيقة تلك الآلة المسماة حاسبة ..
تجنبت الجلوس الي جوارها ..
أسألتها المفاجئة أحيانا تتجاوز حدود معرفتي بتلك المادة الغميسة ..
هذه المرة .. نظرت الي عينيها الجميلتين وأجبتها بثقة ..
بل تماديت .. وزدتها كم صفرا في العشرة مئة مليون..
إبتسمت .. وإنكبت علي الحاسب ..
تأملتها برهة ..
ثم قلت ..
تعرفي يابتي .. أنا لما كنت في عمرك حد معرفتي بالحساب ما فاتت 12ْ× 12 ..
وعند محمد خمسة قروش ، إشتري كراس بقرشين وقلم بقرش فكم تبقي له ..
ده ذاتو عشان أحصلو إنضربت كم مين مرة ..
قاطعتني باستغراب ..
.. إنضربت !؟
أيوه يابتي ..
.. ليه ..
زمان في المدرسة الما حافظ جدول الضرب كان المعلم بضربوا ..
.. عشان كده سموه جدول الضرب ؟
أبدا ..
سموه عشان بنضرب رقم في رقم ..
.. طيب ما دام الناتج هو حاصل رقم في رقم ليه ما سموه جدول (في) ذي ما سمو القسمة بي (علي)؟
عليكم الله شوفوا الورطه الدخلت فيها دي .. مش قلت ليكم ..
راجع ليكم .
|
|
 
|
|
|
|
|
|
|
|
Re: قالت لي الحسـناء ... (Re: غادة عبدالعزيز خالد)
|
الكريمة غادة ..
عندما تجمع المرأة بين الحسن والفطنة ..
فقد أصبحت قادرة علي أمتلاك الدنيا ..
مشكورة علي المرور ..
ومبروك الماجستير وعقبال الدكتوراه قريبا إنشاء الله ..
تحياتي لأسرتك .
بدون مناسبة :
أنا تلميذ القانوني الضليع الإستاذ عمر .
| |
|
|
|
|
|
|
|
|
|
Re: قالت لي الحسـناء ... (Re: محمد على طه الملك)
|
قبل أن تتلبسني شخصية الأب الحازم التي الجأ اليها أحيانا لمداراة جهلي ..
بادرتني بالسؤال ..
.. طيب إنت عرفت وين المليون فيه كم صفر ؟
اول مرة أسمع فيها الرقم مليون قبل ما أعرف فيه كم صفر كان في حصة الجغرافيا ..
..قاطعتني بتعجب ..
..حصة الحغرافيا ..!؟ You mean Geography
ايوه.. مش قلنا نتكلم بالعربي ؟
.. sor أسفه بابا..
أستاذ الجغرافيا جاب خرطة السودان وقال لينا السودان مساحتة مليون ميل مربع ..
؟.. Is that true
بعدين معاك ..؟
.. خلاص بابا.. وريني وين عرفت المليون فيه كم نقطة ؟
في السوق ..
.. مدرستكم كان إسمها السوق ..؟
أبدا ..
لكن السوق عندنا إتعلموا فيه ناس كتيرين ..
ولكي لا أمنحها فرصة ترتب أفكارها وتحدفني بسؤال أخر إسترسلت في حديثي ..
سنة 79..
ثم إستدركت وقلت لها ..
طبعا إنت التاريخ يبدأ عندك بعد الألفين ..
علي كل حال زمان قبال اتزوج مامتك أنا كنت شغال بمرتب شهري خمسين جنيه..
قاطعتني ..
.. خمسين جنيه .. كم يرو ؟
الزمن داك يابتي ما كان في يرو .. بعدين الجنيه ده هو عملة بلدنا ..
وقبل أن تنبث بكلمة رفعت أصبعي في وجهها محزرا..
اوعك تسأليني الليلة بيساوي كم ؟ لانو لا أنا ولا الحاسب بتاعك ده ح يعرف ..
نظرت الي حاسبها بإستنكار غير أنها بلعت طعم التحزير ..
راجع ليكم .
| |
|
|
|
|
|
|
|
|
|
Re: قالت لي الحسـناء ... (Re: محمد على طه الملك)
|
سلام ليك ولحسنائك الشرك
فعلا الشرك قبض وجينا علشان نعرف الحسناء دى قالت ليك شنو
لكن مافى ندم على الجيه على الاقل عرفنا انك مابتعرف حساب
وانو مرتبك كان خمسين جينه بس والاهم من كده اتزوجت متين
تحياتى لك اخى وللاسرة
| |
|
|
|
|
|
|
|
|
|
Re: قالت لي الحسـناء ... (Re: ماجدة عوض خوجلى)
|
الكريمة ماجدة ..
أهو إنتي وغاده قلتن ..
تعرفي أنا من كترت ما كاره الحساب ..
بشتري الحاجة وما براجع البابقي الرجع لي ..
زوجتي إكتشفت العيب ده وحرمت علي إشتري حاجة في غيابها ..
مشكوره علي المرور ..
تحياتي لآسرتك الكريمة .
| |
|
|
|
|
|
|
|
|
|
Re: قالت لي الحسـناء ... (Re: محمد على طه الملك)
|
ود الملك
تعرف انا جيت جاري وقلت اشوف لي محامي!!
زماااااااااااااااان كدة وانا صغيروني في الجامعة كتبت لي قصة قروها كتيرين واتداولوها والغريبة كان اسمها(وقالت لي الحسناء ...مرة)...وبما انك ما دفعتي قلت اكيد واحد اقتبس ...ولمن لقيت القصة بتاعتك عن حسنائك حفظها الله..ابت نفسي الا ان (اهابشك),,
انت رائع في زمن قلق...واتابعك وواصل...
وقبل لي الحسناء...مرة..
لك الحب
احمد علي القاسم
| |
|
|
|
|
|
|
|
|
|
Re: قالت لي الحسـناء ... (Re: Ahmed El Gasim)
|
الأخ أحمد ..
ولا يهمك ياخوي ..
جاهزين للدفع بس بشرطين ..
الأول : الأصفار علي اليمين ما تفوت حدود معرفتي الما فاتت زمنها..
الثانية : تعيد لينا الحسناء التي ارقت قلمك من أرشيف الذاكرة الي الصفحة الأمامية ..
امرك هين ..
الخوف من ناس وادي الجن ..
مشكور علي المرور ..
| |
|
|
|
|
|
|
|
|
|
Re: قالت لي الحسـناء ... (Re: محمد على طه الملك)
|
أخي محمد
جعلها الله مصباحاً منيراً وفيروزة شطآن توشوشها الأمواج من بحار فيروزية تعانق في الأفق زرقة السماء متعكم الله بفلذاتكم وأكرمكم فيهم/ وفيهن.. براءة تخلب الألباب فما شاء الله وتبارك الله أحسن الخالقين.
| |
|
|
|
|
|
|
|
|
|
Re: قالت لي الحسـناء ... (Re: ابوبكر يوسف إبراهيم)
|
Quote: الزمن داك يابتي ما كان في يرو .. بعدين الجنيه ده هو عملة بلدنا ..
وقبل أن تنبث بكلمة رفعت أصبعي في وجهها محزرا..
اوعك تسأليني الليلة بيساوي كم ؟ لانو لا أنا ولا الحاسب بتاعك ده ح يعرف ..
نظرت الي حاسبها بإستنكار غير أنها بلعت طعم التحزير .. |
محمد علي طه الملك
لقد سألتك الحسناء .. وأحسنت السؤال .. أما أنت فقد أحسنت بالسرد الجميل الممتع أقولها لك بدون مجاملة أو مشاكسة معتادة .. أسئلة منطقية وإجابات حائرة منطقية هي الأخرى بحكم دولاب الزمن المتسارع الذي لم يترك لنا فرصة ولو حتى للأحتجاج ولنقارن بين المجهود الذي بذلناه في حفظ جداول الضرب ليفاجئنا الزمن العجيب بالبرمجيات وأجهزة الحاسوب .. بل حتى المرحلة الجامعية التي بذلنا من أجلها الغالي والرخيص وتفننا في دراسة علم المحاسبة والأقتصاد وكيف تعد القيد المحاسبي وميزان المراجعة وحساب الأرباح والخسائر والميزانية .. عندما تخرجنا فوجئنا بوجود هذا المسمى بالكمبيوتر الذي يستخرج كافة البيانات المحاسبية دون أن يمر على أي جامعة !!
حسنا فعلت بدراستك القانون ولو درست المحاسبة والأرقام كنت ستعض على أصابع الندم طوال عمرك ...
بجيك راجع أخوي .. تسلم
| |
|
|
|
|
|
|
|
|
|
Re: قالت لي الحسـناء ... (Re: محمد على طه الملك)
|
الأخ عادل ..
ويييين ياصديق ..
| Quote: أما أنت فقد أحسنت بالسرد الجميل الممتع أقولها لك بدون مجاملة أو مشاكسة معتادة |
عارف بعد ما شفت الحبر الأخضر حتين أطمئنيت
والله مشتاقين ..
منتظرين كرامة نجاج الإبنة أمنية إنشاء الله ..
تحياتي للأسرة الكريمة .
| |
|
|
|
|
|
|
|
|
|
Re: قالت لي الحسـناء ... (Re: محمد على طه الملك)
|
نواصل السرد..
قلت لها ..
الوقت داك لسع ما عرست ..
قاطعتني ..
أيوه أنا شفت صورتك كنت تشبه مهند ..
مهند البشبهني يابنتي .. مش كده صاح ؟
طأطأت رأسها في حياء أيقنت أنه موروث ..
واصلت ..
من الخمسين جنيه البصرفها أخر الشهر..
كنت بدفع الميز والبس منها وارسل لأبوي وأوفر كمان ..
.. الميز ؟ ده شنو ؟
بقيت ساهما أحدث نفسي ..
الكلام البقول فيه ده شنو ؟
دي كلمات أظنها بقت من التراث ..
ما ظنيت الأجيال القدامنا دي ح تمارس التجربه دي ..
لانها كانت افراز تربية زرعتها نظم التعليم الداخلي ومن قبلها الخلاوي ..
و .. سرحت .. مع ذكريات تلك المرحلة بحلوها ومرها ..
ربتت علي كتفي تعيدني اليها ..
الميز ده شنو؟
الميز يابنتي عبارة عن جماعة متعارفين او يمكن مامتعارفين ..
من بلد واحده او من بلاد مختلفه ..
جمعتهم الظروف في حته بعيده عن أهلهم ..
يتفقوا مع بعض ويستأجروا بيت ويسكنوا فيه ويتشاركوا في الإيجار ومصاريف المعيشة ..
يتوزعوا المهام بينهم واحد ينظف يوم ويطبخ يوم إذا ما عندهم طباخ ..
ويختاروا واحد منهم يسلموه كل اخر شهر قروش الميز ..
وده بكون مسئول من شراء مستلزمات الميز ودفع الأيجار وفاتورة الكهربء وغيرها ..
طيب الميز ده بكونوا اولاد وبنات ؟
ابدا اولاد بس ..
طيب البنات ما ممكن يعملوا ميز ؟
طبعا يابتي نحن بلد محافظ ..
عادة البنات البكونوا بعيدين من اهلهم إما بسكنوا مع أقاربهم..
او إذا كانوا في مراحل دراسة باستاجروا ليهم بيت كداخلية..
بكون مجهز وتشرف عليه مشرفه وعنده نظام ذي نظام الداخليات زمان ..
وعشان ما تسأليني الداخليات دي شنو ..
بقول ليكي المدارس زمان كان فيها داخليات ..
عباره عن مباني كبيره فيها مطبخ وسفره وغرف مجهزة بسراير ..
يسكنوا فيها التلاميذ الجايين من مناطق بعيدة ..
وكل داخلية عندها مشرف من المدرسين .. بكون مسئول عن إدارتها ومراقبة التلاميذ وحل مشاكلهم ..
نرجع لموضوعنا الاول ..
لحد الزمن داك مافي زول كان بتعامل برقم المليون ده او حتى يسمع به ..
أغني الأغنياء في البلد كانوا بسموه مليونير ..
وديل كانوا بسيطين أي زول عارف اسماءهم ..
او كيف ومن وين جاب قروشه دي ..
اصغر واحد فيهم كان عمره فوق الخمسين سنة ..
يعني جمع قروشه خلال المده دي بتعب وكفاح طويل ..
قاطعتني ..
إنت حسع ما عندك مليون ؟
مليون شنو ؟
يورو ؟
تقصدي جنيه؟
أيوه جنيه ..
ارخيت جسدي علي المقعد ..
كيف ما عندي يابت ؟
أنا عندي اكتر من مليون ..
إنفرجت اساريرها ..
نهضت وطبعت قبله فوق جبيني ..
تصبح علي خير ..
إنتى من أهل الخير ..
صلي ..
حاضر ..
وانسربت من تحت بصري ..
تركتها تمضي غارقة في حلم سعادتها بأبيها المليونير ..
غير أنها توقفت فجأة واستدارت لجهتي كمن يريد أن يقول شيئا ..
ثم عدلت ومضت وتركتني أقلب في ذهني ..
تري ماذا كانت تريد قوله ؟ ولما عدلت عنه ؟
اترككم بدوري تفكرون معي ماذا كانت تريد قوله ..
واوزع عليكم قبلتها مرددا لكم معها ..
تصبحون علي خير .
راجع ليكم
| |
|
|
|
|
|
|
|
|
|
Re: قالت لي الحسـناء ... (Re: محمد على طه الملك)
|
في اليوم التالي عند عودتي للمنزل وجدتها جالسه تتبادل الرسائل مع إحدي صديقاتها ..
قبل أن ارفع أميتي وامارس التلاعب بأزرار الكي بورد وادخل عوالم الإنتر نت ..
كان يصيبني الضيق او ربما الغيرة عندها أشاهد هؤلاء الصبية يجوسون حول البرامج بخفة ورشاقة..
أذهب بدوري والتقط كتابا من الحجم الكبير ..
واتعمد الجلوس علي مقربة منهم..
أتظاهر بالقراءة وفي خاطري يدور حوار أخر ..
حسع الشفع ديل بدل يضيعوا يومهم في السواطة طق طرق .. طق طق طق طق .. طرق دي ..
مش كان أفضل ليهم يقروا ليهم كتاب ينفعهم؟
ثم أبتسم لوحدي ..
تلقاهم هم ذاتهم حسع شغالين لي ..
ابونا ده العاجبه شنو في اللابتوب الفاتحه وما عنده شاشه ولا صور ده ..
مش كان أحسن ليه يخش معانا ؟
أخوها وهي ينظران الي بعضهما ويبتسمان ..
والله كنا قدلنا بيه قدله ..
طبعا ده تعبيري انا ما أطنهم يعرفوه ..
المهم ..
مضت فترة بعدها رأيتها تركت الكي بورد لشقيقها ونهضت ..
عندما مرت امامي استوقفتها بالسؤال ..
إنتي امبارح بعد ما ودعتيني وقفتي كأنك عايزه تسألي عن حاجة بعدين غيرتي رأيك ؟
أطرقت برهة ثم أجابت ..
ايوه كنت عايزه اسألك لكن قلت ما صاح بعد قلت ليك تصبح علي خير ارجع تاني ..
سؤالك كان شنو ؟
هل تصدقوا ..
سألتني عن شيئ لم يكن ليخطر ببالي يوما ..
ولا أطن أن أحدكم قد عرض عليه مثل هذا السؤال من قبل إبنه او إبنته ..
لن أقول لكم ما هو السؤال ..
سوف اترككم تشاركوني بتخميناتكم ..
راجع ليكم
| |
|
|
|
|
|
|
|
|
|
Re: قالت لي الحسـناء ... (Re: محمد على طه الملك)
|
من اكثر النصوص التى اضحكتنى ويقولوا ليك السودانيين ما بهظروا دا اخف دم الاقيهو مؤخرا ادام الله عليك وعلى اسرتك كل العافية( لكن الحكومة ما ظاهرة )مافى حوار خاص حول اليرو ومقارنته بالسودانى ؟
| |
|
|
|
|
|
|
|
|
|
Re: قالت لي الحسـناء ... (Re: سلمى الشيخ سلامة)
|
بت الشيخ .. سلمي .. الله يسلمك ..
مشكوره..
يعني ينفع نكتب في مجال الحكي وباعك فيه طويل وقدراتك لا تنافس ؟
اهو قنا نتونس ..
ما دام فات عليها وما رجعت حسبت الفرق بين مليوناتي السودانية واليرو مالك مذكراها؟
دامت لك العافية .
| |
|
|
|
|
|
|
|
|
|
Re: قالت لي الحسـناء ... (Re: محمد على طه الملك)
|
ود الملك تحياتي
وللاميرة واخوها كمان... تعرف نحن الاتعلمناه من
اولادنا والجاي في التعليم اظن حيكون اكثر من
معرفتنا السابقة كلها ربنا يحفظهم ويديهم العافية
بس اوع تكون قالت ليك انت المقعدك هنا شنو لمن انت
مليونييييييييييييييييييييير .. تكون بالغت ورجعتك
للمقارنة بين الجنة واليورو الشارد منها ده
مودتي
| |
|
|
|
|
|
|
|
|
|
Re: قالت لي الحسـناء ... (Re: kabaros)
|
الأخ كبروس ..
يعني كبرتني عدييييل كده ..
إنشاء الله إن ما معرس تعرس وتجي بنيتك تكبرك ( بالمناسبه كبر بفتح الكاف والباء مع تشديد الباء بالهولندية حلاق )..
مشكور علي المرور ..
| |
|
|
|
|
|
|
|
|
|
Re: قالت لي الحسـناء ... (Re: محمد على طه الملك)
|
مادام كلكم هربانين ..
نواصل ..
أيوه .. انا كنت عايزه اسألك ..
فضلي ..
مش ربنا خلق الناس ديل كلهم ..؟
نعم ..
طيب ليه ما خلقهم كلهم يتكلموا لغة واحده ..؟
..
التوي عنقي الي الجانب الأيمن دون إرادتي ..
ووجدت نفسي أنادي ..
يا حسام .. حسام ..
نعم بابا ..
عملت شنو مع عجلتك ؟
ماقدرت استعدلها ..
امشي جيبها عشان اساعدك ..
..
معليش يابتي ..
خليني حسع أصلح عجلة حسام عشان عنده تمرين ..
بعدين بجي بوريك ليه ربنا ما خلقنا كلنا نتكلم لغة واحده ..
حاضر ..
..
أها..
أجمعوا هنا كلكم ..
انا صرفتها ليكم ..
عايزكم تعملوا لي كنسلت ..
توروني اجواب عليها كيف ..
مش قالوا ماخاب من إستشار ؟
اوعوا تزوغوا ..
..
سامعين ..
سامع ياكبروس ..
| |
|
|
|
|
|
|
|
|
|
Re: قالت لي الحسـناء ... (Re: محمد على طه الملك)
|
Quote: عايزكم تعملوا لي كنسلت ..
|
و الله يا محمد يا أخوى
حسناءك دى صعبة خلاس
قول ليها الإختلاف مهم ى الدنيا
حسة لو إنتى أكلت فول كلو يوم
موش بتزهجى؟
و لو شربتى موية كل يوم
برضو بتزهى؟
مرات الواحد بيكون عاوز يشرب عصير
أو بيبسى أو شاى
علشان كدة التنوع مهم
.
.
و صية أخيرة
أستخدم الحلاوة كتير فى الأمثلة
يمكن تقتنع أسرع
اها ورينا البحصل شنو, منتظرين
.
.
غادة
| |
|
|
|
|
|
|
|
|
|
Re: قالت لي الحسـناء ... (Re: غادة عبدالعزيز خالد)
|
الكريمة غادة ..
إن بقت علي الحلاوة بردمها ردم ..
أصلها مجنونة شكولاته ..
بس بعدين ما تجي تقولي لي .. ليه بالله حرام عليكم تخلوها لمن تبقي كده ..
عارفه أنا لو ماخائف من ناس حقوق الإنسان ديل يجو ناطين لي ..
كنت إتبنيت كلامها ورفعت شعار ( وحدوا لغات العالم ) ..
تسلمي ..
| |
|
|
|
|
|
|
|
|
|
Re: قالت لي الحسـناء ... (Re: محمد على طه الملك)
|
عارفه يابنتي ربنا ماخلقنا كلنا نتكلم لغة واحده ليه لآنوا خلق لينا عقل ولسان ..
وخلانا علي كده عشان كل ناس يعيشوا مع بعض يخترعوا الكلام البخليهم يتواصلوا مع بعضهم ..
وربنا لو كان عايزنا نتكلم لغة واحده كان الطفل من يتولد يتكلم طوالي ..
طبعا كل طفل بتعلم الكلام من أهله عشان كده اللغات بقت كتيره ..
بعدين ربنا لو خلقنا نتكلم لغة واحده كان الغي مننا صفة العقل البتميزنا من بقية الحيوانات ..
غشان كده الإنسان بعرفوه بأنه زول عاقل ..
يعني عنده قدره يفكر ويبني تصرفاته وافعاله حسب الحاجة البفكر فيها ..
يعني إنتي حسع لما عايزه تعملي حاجة بتلقي نفسك طوالي مشيتي عملتيها واللا قبل ما تعمليها بتكوني فكرتي فيها ..؟
بكون فكرت فيها ..
أهو تفكيرك العملتي قبل ما تمشي تعملي الشيئ العايزه تعملي ده هو البميز بينك وبين الحيوان ..
ربنا وهبنا العقل عشان نفكر بيه ونخترع بيه الحاجات النافعة زي الحاسب بتاعك ده و الكميوتر والعربية وكل الحاجات الحلوه واللعب السمعة الشايفاها دي ..
ده كله عمل ناس فكرو فيه ونفذه ..
قاطعتني ..
يعني لو ما كان عندنا عقل كلنا كنا إتكلمنا لغة واحده ؟
طبعا لو ما عندك عقل ما كنتي قدرتي إتعلمت لغات الناس ..
إنت لما كنت طفلة صغيرة كنت عارفه اللغات الحسع بتتكلمي بيها ؟
لا ..
ليه ..؟
ماعارفه ..
لأنو عقلك كان لسع صغير وما مكتمل عشان يتعلم ويفهم الحاجات الحوله ..
ولما كبرتي وعقلك إكتمل إتعلمتي الكلام ذى ما إتعلمتي المشى بعد ما رجلينك كبرو وبقو قويين يشيلو جسمك ..
سألتني ..
يعني اللغات دي عملوها الناس بعد كبرو ما ربنا ؟
بالظبط كده ..
جلست شاردة لبرهة وانا أنظر اليها في حزر ..
ثم عادت ورمتني بإبتسامتها الحببة لدي دليل قناعتها بما قلته ..
نهضت من أمامي وهي تقول ..
أنا ذاتي لما اكبر ح اعمل لي لغة ..
قلت في نفسي ما بعيد يابنتي بالشايفه أنا ..
ما هو حسع شايفهم خلقوا من حروف الكي بورد الأنجليزية لغة يتخاطبوا بيها مع بنات واولاد أهلهم في السودان .
فاليحفظهم الله .
..
الحكاية إنتهت ..
لكن البوست مفتوح لتعليقاتكم وتصويباتكم وبرضوا تجاربكم مع اسئلة أولادكم ..
دمتم .
| |
|
|
|
|
|
|
| |
محمد على طه الملك
غادة عبدالعزيز خالد
ماجدة عوض خوجلى
Ahmed El Gasim
هاشم أحمد خلف الله
ابو جهينة
سلمى الشيخ سلامة
شهاب الفاتح عثمان
الشيخ إبراهيم الشيخ
kabaros
فيس بوك
تويتر
انستقرام
يوتيوب
بنتيريست