النفاج.... مدخل إلى عوالم محجوب شريف ( ملف توثيقى أعده الأستاذ _ كمال إبراهيم خليل )
النفاج مدخل إلى عوالم محجوب شريف ..... إسم إخترته لنشر هذا البوست الذى خط كلماته والدى كمال إبراهيم خليل، ليس بوصفه المهنى أو ككاتب أو من أهل الثقافة .... بل بإحساس كل فرد يعشق حبيبات الرمل وطين الأرض الذى يشكل هذه الأرض الحبيبة الحنينة....... إحساس عن حب وتقدير وإحترام لصوت الأمة ولسان شعبها ( محجوب شريف ). وقد عدلت وأضفت للملف أسما (بتصرف)أعتقد أنه يجمع كل ما رميت إليه من نشر هذا البوست،رغم أن الكاتب أسماه : - ( ملف خاص بأعمال ضمير الإنسان السوداني الحي المتيقظ دائماً الشاعر المناضل بالفكرة والحرف الجميل الأستاذ : ........ محجوب شريف ) بدأه بالتعبير عن إنسانية محجوب وتنقل معه عبر مداخله المختلفة التى تؤدى لطريق الحرية والإرادة الحرة ، معبرا عن حالاته الإنسانية ومعيشته التى تتطابق مع واقعنا ولا تنفصل عنه... بل أصدق تعبير له. ولعل فى ذكرى الإنتفاضة المجيدة والإحتفاء بسلامة وصول محجوب شريف وشفائه مدخلاُ إلى تلك العوالم. ورأى أن هذا الملف عن الشاعر الإنسان مدخلاً إلى عوالم محجوب شريف... ولكم أن تدلفوا إليه وتعبقوه بالحب والمودة وتنتقلواإلى البقية وتضيفوا إليه لنوثق جميعا لرجل بقامة وطن .... فعوالم محجوب شريف متعددة ومتحدة فى آن واحد. عمرو الخرطوم 13 أبريل 2007. ************************************************************************** ***************************** البداية ****************************** ************************************************************************ ملف خاص بأعمال ضمير الإنسان السوداني الحي المتيقظ دائماً الشاعر المناضل بالفكرة والحرف الجميل الأستاذ : محجوب شريف 08/02/2007 النفــــــــــــــاج : هو لو تعلمون ذو فضل كبير فى إحكام وشائج الجوار والتراحم والتعاطف بين الناس إذ هو من نتاج عبقرية السودانيين اللذين وصفهم الشاعر بأنهم الشعب المعلم . منفذ صغير فى الجدار الطيني المتآكل غالباً الفاصل بين دار وأخرى من دور الحي أو الفريق أو الحلة إن شئت ، قد يجعل له باب وقد يكون منفذاً على الجدار بلا باب ، فأحيانا نعلق عليه قطعة من القماش أو من السعف ، وقد تكون من الخيش ، عبره تتواصل الأسر بعفوية وطيب خاطر من بيت لبيت ومن حوش لآخر ، فالنساء يحملن إلى بعضهن البعض آنية الطعام ، ويتجمعن لتناول الفطور معاً وشاي الضحى وربما قهوة الظهيرة ، يتبادلن الأحاديث والحكايا ويتناقلن الأخبار ، ويشاركن بعضهن البعض فى إنجاز الأعمال التي تتطلب المشاركة من حوائج البيوت أو مما هو من شأن النساء ، أما الرجال فيكفى لعابر النفاج أن يتنحنح أو يصفق بيديه ويبادر بالسلام لإشعار أهل الدار بأنه هنا حتى تعتدل النساء فى جلوسهن بما يتوجب عليهن من الإحتشام . ويتوافر للنساء قدر من حرية الحركة كثير إذ تكون حركتهن من دار لدار عبر النفاج وهن بملابسهن العادية دون كثير إعتناء بالتأنق فيتفادين ما يسببه الخروج إلى الشارع من فضول السابلة ومضايقات الجالسين تحت ظلال الأشجار والجدران يرصدون الرائح والغادي وينسجون من خيوط فراغهم أخباراً وقصص توحي لهم بها أخيلتهم الخاملة . ومن خلاله يتسرب الصغار أولاداً وبنات يتنقلون من دار لدار تقافزاً وجرياً ، يلعبون ويأكلون ما تيسر أينما تيسر فكل دار هي دارهم . وعبر النفاج تتبادل النساء أصناف ما يعددن من الطعام ، ويدعمون موائد بعضهن البعض إن حل بأي بيت ضيف فقدح من هنا وصحن من هناك بما يعمر مائدة أهل الدار وبه يحسن بالضيف الإحتفاء . ويكفى أن تدخل أول بيت فى المربوع ثم تعبر من نفاج لآخر حتى تنتهى إلى آخر البيوت فيه بدون حرج أو تحسس ، مما يجعل من دوره أشبه بوحدة واحدة . هذه الوشائج النفاجية – إن جاز التوصيف - أحدثت تآلفاً إجتماعياً وتكافلاً تلقائياً حقيقياً وصادقاً ، وانصهاراً ثقافياً ذابت معه تماماً نعرات العصبيات الإثنية والدينية والثقافية وحساسيات الفوارق الطبقية ، وكنت تجد فى الدار الواحدة أو فى الحوش الواحد وفى نفس العائلة من يختلفون فى أفكارهم وفى انتماءاتهم السياسية وفى أمزجتهم الفنية والرياضية وأبعد من ذلك فى دياناتهم ومعتقداتهم ، فيحترمون ذلك الإختلاف ولا يعدونه سبباً للإقصاء والتنافر . لم يكن إختيار الشاعر للنفاج إسماً لديوانه هذا مصادفة ، لكنه اختيار واع ومقصود فلا غرو والشاعر مسكون بثقافة أهله ومطبوع بطباعهم ونضالهم المتواصل من أجل بلورة الثقافة السودانية ورسم الشخصية السودانية بإبراز ملامحها المميزة وتفاصيلها الدقيقة من رقة وعنفوان ، من غضب وتسامح ، من حماقة وكياسة ، من صبر وتعجل ، من عض على المبادىء والمعتقدات بالنواجذ ، ومن سحنات متعددات بها يصدق قول أن السودان هو القطر القارة ،إختزن محجوب شريف كل هذه الزركشات والتفاصيل واختزلها فى براعة مدهشة فى ذلك الإسم الموحى (النفاج) , الولوج عبر النفاج يؤدى بك إلى عوالم من التفاؤل والنضرة والبسالة والتحدي السافر لكل من أو لكل ما يمس تلك التفاصيل ، ذلك التحدي السافر المباشر لطاغية مايو المتدثر بغروره وحهله وكان الشاعر ضمن آخرين من محترفي الوطنية والنقاء ومن أسطوات النضال تحت أسر الطاغية أب عاج الذي فقد صوابه وانتفخت أوداجه بالشتائم والتوعد والقول الساقط البذيء حينما سمع الغناء المر : مساجينك مساجينك مساجينك نغرد فى زنازينك عصافيراً مجرحة بى سكاكينك * نغنى ونحن فى أسرك وترجف.... وانت فى قصرك سماواتك دخاخينك مساجينك مساجينك مساجينك * برغمك نحن ما زلنا بنكبر بى زلازلنا بنعشق فى سلاسلنا ونسخر ...... من زنازينك مساجينك مساجينك مساجينك * حكايات الهوى الأول .... بنحكيها بدايات الغنا الطول.... نغنيها حكاية وليس تتأول حتخجل من عناوينك مساجينك مساجينك مساجينك * للسودان عواطفنا وبالسودان مواقفنا ولما تهب عواصفنا ما حيلة قوانينك ؟؟؟؟ مساجينك مساجينك مساجينك وهكذا تحقق حلم الشاعر المراهن على جواد كاسب إذ أثمرت بذرة التفاؤل انتفاضة شعبيةً عارمة تسلح فيها المناضلون بأغصان الأشجار ودخان الإطارات المحترقة وبعدالة قضيتهم فدكت حصون الطاغية وزلزلت الأرض تحت قدميه فولى هارباً يأكل فتات موائد من استجار بهم ، وسكن الرعب والندم قلوب زبانيته حين استفاقوا من نشوة السلطة الغاشمة وأدركوا بعد فوت الأوان أن الشعب هو السيد ، وأن دولة الظلم لا تدول ، وأن الحاكم لا تحميه أجهزة القمع وإن كثرت وتوحشت ، ولا قوانين قرقوش ومحاكم التفتيش وإن ظلمت ، ولا بطش العسس وافتراءات الملتفين حوله أشباه الرجال من فاقدي الوعى والخيال وعديمى الهمة اللذين خسروا الرهان فاسودت وجوههم ، وقصرت قاماتهم ، وانحنت هاماتهم ، فاندسوا تحت جلودهم ، كيف لا ومنهم من أسرف فى المداهنة فساقته انتهازيته سوق السوائم ليقول للمشير الغارق فى جهله حتى أنه صدَق : من وعيك وفكرك ياريس............ يا داب سودانا بقى كويس الحاكم يحميه عدله واحترامه لنفسه ولمحكوميه ، وكل حاكم يجانب العدل ولا يحترم نفسه ويزدرى محكوميه يكون مصيره – فى أحسن الحالات – مصير الإمام الأفاق . ذهب المشير الطاغية غير مأسوف عليه ، وبقى الشعب سيداً ومعلماً ، لقد ربحت الرهان على الجواد الأصيل وصدقت النبوءة يا شريف . قالت الحكمة الشعبية : ( كان أخوك حلقوا ليه ، بل راسك ) ونقول : الكلام ليك يالمنطط إضنيك ) (بللوا رؤوسكم فالموس جاهزة والنعل حاضر ) (أشوفك) أشوفك جنبي .... وأتمناك وأكذب عيني إني أراك أصدق كيف بتحكى الشوق وليل الغربة .... لى مضناك لىَ أنا ....اللى بحلم بيك ولىَ أنا.... اللى بترجاك ياحلمى البعيد.... وعزيز زمان ياحلمى ما أقصاك أعد أيامي .... وأحسب بيك ثواني العمر ....واستناك وما فكرت يوم أنساك ولو فكرت كيف أنساك ؟ وذكراك يا أعز حبيب دوام رغم الزمن ذكراك بأي مشاعر أتلقاك.... وبن أعصاب بتتحمل.... وبن أحرف بقدر هواك تعال يا ماضى من عمرى تعال .... أنا من جديد أهواك . ( ليلــة الميـلاد ) يا مشتل فرحنا الشال ويا مرسى الشراع الضال ويا واحة قليباً كان زمن رحال يفتش عن عيون إنسانة.... ينسى لديها حزناً طال ولما لقاك فرهد ياما بالفرح اللى عندو محال ولما لقاك رسلو القمر منديل وركت نجمة ضوت فى الدرب قنديل وهشت زهرة.... كانت تبكى طول الليل وجات من بعد طول الهجرة.... غنوات الحروف وكانت ليلة الميلاد أقدم نفسي ليك إنسان.... عزاى الشعر والآمال وطيبة القلب وحسن الفال وأحب كل العيون لمن تحب عينيك وأحب كل القلوب.... لمن تعاين ليك وأحب حتى البغير من حبي ليكى عليك ( الغايب ) سافر زمان .... قبال سنين لاجاب جواب لا جاب خبر أمو تسأل كل طاير وكل عايد من سفر خيالو ما فارق عيونا.... وطيفو ما غاب ليو أثر * وما زال هناك.... فى الركن داك صوتو وغناهو وضحكتو وصورو المعلقه فى الجدار وجرايدو والكتب الزمان الليله كاسيهم غبار مصباحو فى الركن الحزين ومكانو ما زال فى انتظار أصحابو أنداد الطريق قدام عيونا مشو اخضرار * ياماشى لى بلدن بعيد.... قول للمخاصم اسرتو.... قول للمفضل هجرتو : ما عاد قطار ووصل جواب اسمك تهزها ذكرتو والبيت براك لو شفنو كيف.... ضاعت مواسمو وخضرتو * ياحليلو لمن كان صغير.... تلميذ بيمشى المدرسة تشفق عليهو من الطرق وتخاف عليهو من المسا كيف ينسى عيديه وحنان وكفاح سنين كبفن نسا * سافر زمان.... قبال سنين لاجاب جواب لاجاب خبر ( يا جميلــة ومستحيلــة ) يا جميلة.... ومستحيلة إنت دايماً زى سحابة.... الريح تعجل بى رحيله عيونى فى الدمعات وحيله اسمحيلا تشوف عيونك.... أسمحيلا أنا لا الصبر قادر على.... ولا عندي حيله * يامراسى الشوق تعالى لا الليالي تمر بدونك هي الليالي من ضواحي الدنيا جيت وعلى رحالي لمداين فى عيونك يا محالى ريحينى.... أسترى حالي فرحيني عيونى فى الدمعات وحيله أنا لا الصبر قادر علىَ.... ولا عندي حيله حدثت عنك نجمة جارة وزرعت إسمك.... حاره حاره فى مناديل العذارى فى مشاوير الحيارى فى لحى الأشجار كتبتو.... نحتو فى صم الحجاره وبحت للشمس البتقدل فى مداره عيونى فى الدمعات وحيله أسمحيلا تشوف عيونك.... أسمحيلا أنا لا الصبر قادر علىَ.... ولا عندي حيله وانت منك لا بداية.... عرفت لسه ولا نهاية مرة أسرح ومرة أفرح.... ومرة تغلبني القراية ولما أكتبلك وداعاً.... قلبي ينزف فى الدواية يا صبية.... الريح ورايا خلى من حضنك ضرايا عيونى فى الدمعات وحيله أسمحيلا تشوف عيونك.... أسمحيلا.... أنا لا الصبر قادر علىَ ولا عندي حيله (محبه البينا ولا صداقه) محبه البينا ولا صداقة ؟ ولا بداية فرقه طويلة ؟ أهو بنتقابل نمشى ونضحك وياما نعدى أماسي جميلة وكم بتساءل وكم بتفاءل ومره أكون غلبان الحيلة واسارع اسارع.... أطوى الشارع وبرضو خطايا بشوفه تقيلة واساهر.... أطرز باسمك غنية وانوم والشمس مسح منديله جبين الدنيا ولف جديله واقول أكتبلك.... أنا من قبلك يمكن تبقى الخطوه عديله واقول أصبر يمكن نكبر أكبر من تغلبنا وسيله وتانى الشوق يشعلني فتيله وأفتش عنك.... وأهرب منك وسيرتك دايماً أمشى واجيله محبة البينا ولا صداقة ولا بداية فرقه طويله (ساعدتينى أحبك ليه ؟) ساعدتينى أحبك ليه ؟ خليتينى وجرحى خطير.... ولو ساعدني الزمن أنساك حأعمل إيه ؟ العمر قصير العمر قصير العمر قصير * قابلتينى وكانوا عيونك حقل نضير وكان العمر هجير الحزن إشتد عليه وفارقتينى أبارى النجمة وكانوا عيونك حقل نضير وكان العمر هجير الحزن.... إشتد عليه وفارقتينى أبارى النجمة واتارى النجمة سماها مطير !! وقلبي حمامه جناها أسير.... وجناحا كسير ساعدتينى أحبك ليه ؟ وخليتينى وجرحى خطير.... ولو ساعدني الزمن أنساك حأعمل إيه ؟ العمر قصير العمر قصير العمر قصير * أهرب منك دايماَ ليك أي طريق أمشيه عسى يخلصني.... يودى عليك أقول أنساك أفاجأ قلبي بيسأل.... بيسأل كل مكان إتعرف بيك أقول أنساك أفتش عنك.... فى اللى بعرفك وبلاقيك وأفكر فيك ساعدتينى أحبك ليه ؟ خليتينى وجرحى خطير ولو ساعدني الزمن أنساك حأعمل إيه ؟ العمر قصير العمر قصير العمر قصير * مسامحك زدتى علىَ الشيل وخليتينى أواخر الليل طاير هدم عشه السيل وفارس فاتوا جوادو الخيل ساعدتينى أحبك ليه ؟ وخليتينى وجرحى خطير ولو ساعدني الزمن أنساك حأعمل إيه ؟ العمر قصير العمر قصير العمر قصير * ( مسافر ) حصل لما القلب هم يغنى غناهو ما تم.... حليلو العمرو ما انجم رجع للحزن .. والحمى رحل من تانى لى وحشة صحاريهو خلى النخلة والهودج سموم الشوق تباريهو قليل الزاد أتاريهو غير الذكرى ما عندو البضاريهو * مسافر لا مدن قدامى غلبي القاسي ينفيني لا زاداً يكفيني ولا حضناً يدفينى أغنى وكم جرح فيني وبحلم كنت بالأيام تصالحني وتصافيني ولمن شفتك إتوهجت.... ظنيتك حتلفينى وتعافيني حليلو العمر ما انجم رجع للحزن والحمى * وداعاً.... أقولها فى أعصابي كم أعصار هدايانا الصغيرة....الصغيرة للتذكار خوفى عليها من طول الزمن.... والنار وخوفي علىَ....آه من وحشة المشوار * حليلو العمر ما انجم رجع للحزن والحمى * ( مع السلامة ) كنت عايزك للطويلة.... وللأماني المستحيلة وكنت محتاجلك معايا والليله بهرب من وسايدى من نجيمات المسا.... العنك بتسأل ومن قصايدى الليله بهرب من ملامحك حتى من فكرة أسامحك من الدروب الجينا بيها.... وأى حته مشينا ليها ومن حنيني الكان بيحلم لو أماسيك واصابحك .... قلبى كم حباك ياما.... خلى يرحل بالسلامه مع السلامه مع السلامه * ( لا مخير فيك ) لامخير فيك ولاني.... داير أبقى انا فيك مخير كم زمن منك بعاني ياتو يوم جيتك مغير ؟ * ياحنانى.... يازمانى.... يامكانى.... يا صبايا الأولانى لا أنا فلان الفلاني ولانى فوق ساس جاهي باني عندي بس حبة أماني وحزمه ولا اتنين أغاني بحترق قبال أوانى ولمن يضحكو لى عيونك تشتعل نيرانى تانى لامخير فيك ولانى داير أبقى انا فيك مخير كم زمن منك بعاني ياتو يوم جيتك مغير ؟ * باقي لسه معايا زادي دربي منتهى ولا بادي ؟ زرعى رويان ولا صادي ؟ مانى عارف .... وحتى ما بعرف مرادي وقلبي يتعب من شرادى وتاكل النيران فرادى وكم بعانى لامخير فيك ولانى داير أبقى انا فيك مخير كم زمن منك بعانى وياتو يوم جيتك مغير * (حأغنـى) حأغنى واغنى واغنى أندم ولا يوم.... ما أظني والزمن الضايع منى يرجع لى ثواني ثواني * ياضل افرح الدافى جيتك يالنبع الصافي مجروح.... ومعنى.... وحافي وأيامي منافي منافي قالو عيونك....أهلاً مهلاَ.... ياصبى عوَافى خدرت دروبي قوافي ومليتى حياتي أماني وأصبحت أنا زولاً تانى * مسحت الصدا عن بابي.... ورجعت جمعت صوابي من تانى فتحت كتابي والشمس أهي بتصحابى النيل مجراه أعصابي بالسما حسيت يادابى وبالعالم عالم تانى مليان بالفرح الدايم من فوق أكتافو حمايم والسلم عليهو حمايم والناس فى دروبو توايم الصاحى بيرعى النايم والنايم بحلم حايم فى مدن.... وحقول.... ومواني.... فى وطن أشجارو أغاني * يا سلام على حب إنساني يا سلام على وطن إنساني يا سلام على كل جميلة * (الحب جميـل) يا سلام ! الحب جميل أيام تفتق بالفرح.... وأيام سحابة هم تشيل وأحزاني لو كبرت معاى قبلك.... معاك بحزن قليل * كم مره فى لحظة خصام بينا انقطع حبل الكلام واتمد فى شاي الصباح * لو مره فى لحظة حنون هان اللى ما ممكن يهون أنا ياما حيرجعنى ليك إنك وكت بى الجراح.... كادت تميل جيتينى بالحب والحيا.... ومرح الشباب ومسحت أكتر من عذاب وفتحت شباكي الحزين على نهر شفاف المياه أمواجو شالت منى آه كانت علىَ حملاً تقيل أحزانى لو كبرت معاى قبلك معاك بحزن قليل يا سلام الحب جميل * (أنا مجنونك) أحبك أحبك أنا مجنونك ساكن فينى هواك وبريدك جوا القلب النبض يصونك * أحلى فصول العمر حنانك أجما حته لقيتها مكانك.... أجمل سكه مشيتها عيونك * معاكى معاني حياتي بتبدا وافتح باباً ياما انسد ليالي طويله.... واشوف العالم ربوه جميله عليها نسيم الصبح مخده * وبيني وبين النهر عشانك عشره بتبدا وبين عيني وخد الورده.... تبقى موده واصالح روحى وتبرا جروحى وابشر باسمك أهلل.... أغنى وأقيف أتحدى * اديتينى مشاعر حيه عوضتينى الزمن الماضي.... زمن الجرح الأكبر منى وقاسى علىَ وببك صادقني ولقى عنواني رذاذ الفرح الخلا الجيه أريت صادقني حنانك بدري ولو لاقيتك بدري شويه * أحبك.... أحبك.... أنا مجنونك ساكن فيني هواك وبريدك جوا القلب النبض يصونك * (السـنبلايه) لما عرفتك اخترتك سعيد البال وخت شبابي متيقن عليك آمال لا جيتك قبيلة.... ولا رجيتك مال ولا مسحور ويوم ما كنت فى عيني أجمل من بنات الحور جيتك عاشق أتعلم من الأيام ومن سأم الليالي البور ومن اسر الولف كتال لقيتك فى طشاشى دليل.... وفى حر الهجيرة مقيل ركزت على ضراك عصاي لقيتك فى حياتي جذور بنيه اتلفحت بالنور مهجنه من غنا الأطفال.... ومن سعف النخيل والنيل ومن وهج الشمس موال وأنا اخترتينى إنساناً عزيز النفس بتمنى.... وبسيط الحال علىً حرمت زرعاً ما سقيتو حلال وما فصد حصادو قفاي وبيني وبينك الضحكه.... ورحيق الشاي وطعم الخبز والستره.... ومساء النور وعمق الإلفه.... بين النهر والنخله وغنا الطمبور وصدق العشره بين الأرض.... والإنسان وبيني وبينك الفكره وجمال الذكرى والنسيان وحسن الظن ومشوار الحيا اليوماتى ما بين الجبل والسهل ما بين الصعب والسهل ما بين الصعب والسهل عز الليل.... وفى سكة مطر بكاى فلا هماً تشيلي براك ولا جرحاً أعانى براى ولانا على بعض نمتن * وتزعلى يوم.... وأزعل وننفعل مرات تقبلى منى واتوسد ضراعى سكات وفينا حنينه تتشابك موده.... تشابك الغابات ونحن إذا اختلفنا سوا.... بنطيع الصاح.... ولو بتنا القوا بنرتاح إذا تمن الملح والعيش.... رضا الشمات وتتكى سنبلايه على ضراعى.... وأميل كأنى غنا الطفوله العذب كأن الدنيا طي القلب والمنديل كأن الدنيا طي القلب والمنديل * (حـلم) مره شفتك فى المنام وانت بين سربين حمام نازله سكة وادى أخضر شايله سلة ورد أحمر.... وحزمتين أحلى الكلام يتبعوك طفلين حلاوة طاروا عصفورين على ركوا فى اسود عينى ورحت فى غمرة نداوة كنت مجهد قلبى فرهد ورش أيامي الغمام صحيت وقفت مشيت أعاين ألقى بيني وبين عيونك كم ضواحي وكم مداين وانطوت كل الجناين فى غيابك.... فى الظلام * (حنطلع للحياه أنداد) أحبـــك.... وحبك النادر بشرفنى وبي نفسي بيعرفنى وبالزمن اللى ضاع منى.... بيصادفنى وألاقيه على الحلم اللى غالى علىَ كان أحلم بيه صحانى على استسلامي عصاني ووصاني أغنى أغنى.... وصاني وخلاني أحس لوجودي فى عيونك طعم تانى وللفرح البعيد من عمري طول أيامي ودانى طلعت علىَ متحمل عذاب الأرض طالع من جرح قاني تعالى تعالى نتماسك على الروعه ونتجاسر على اللوعه ونتقاسم سوا الهجره الطويل مشوارها والهجعه ونطلع للحياه أنداد زى سيفين مساهر فيهن الحداد ونطلع من بذور الأرض زرعاً فارع الأعواد سلاماً ياضحى الميلاد ويا وطناً بدون أسياد ويا إنشاد عصافيراً ببالن ما خطر صياد * (مازلت بتذكر) أنا عارفه إسمك مين أنا عارفه شفتك وين مازلت بتذكر : مازلت بتذكر : الزمان يا شاب.... أكتوبر الأخضر المكان : شارع غضبان بيتفجر وكنا خمسه بنات.... علامات هلال أحمر نزحف مع الثوار ونضمد الجرحى وربطتو بالطرحه وقبل إنت تقيف من قبل ما تصحى لقيتو إسمك فوق مكتوب على الدفتر وعرفت إسمك مين وعرفت إنك مين وعرفت إنك شاب بتحب بلادك موت مازلت بتذكر مازلت بتذكر * (بطاقـة شخصيـة) • الإسم الكامل : إنســـان الشعب الطيب والدىَ الشعب حبيبي وشرياني أدانى بطاقة شخصيه من غيرو الدنيا وقبالو قدامى جزاير وهميه لا لون لا طعم ولا ريحه وأيام مطفيه مصابيحها زى نجمه بعيده ومنسيه • المهنــه بناضل وبتعلم تلميذ فى مدرسه الشعب • المدرســة : فاتحه على الشارع والشارع فاتح فى القلب • والقلـب : مساكن شعبيه ودينى محل ما تودينى شرد أخواتى وأخوانى فتش اصحابى وجيرانى خلينى فى سجنك وأنسانى.... فى سجنك جوه زنازينى أرمينى وكتف إيديا من أجل الشعب السودانى وعشان أطغالنا الجايين.... والطالع ماشى الورديه وحياة الشعب السودانى فى وش المدفع تلقانى قدام السونكى حتلقانى وأنا بهتف تحت السكين الثوره طريقى وأيامى معدودة ونحيا الحريــة * (مليون سلام) مليون سلام يا شعبنا ومليون حباب الإغتراب يابونا ما طول الغياب الإغتراب قال البخونك ويزدريك ونحن بين سونكيهو.... والزنزانه والسجن السميك منك قراب.... أحرار.... وحريتنا فى إيمانا بيك ثوار بنفتح للشمس فى ليلنا باب.... لى يوم جديد ابداً جذورك فينا تمتد وتجيك ما بنرمى إسمك فى التراب ونغنى ليك إنت المعلم والكتاب والبزدريك.... ياويلو من زحفك عليهو.... ومن مشيك ياويلو من أجلو الوشيك يوم ينكسر قيد الحديد السونكى.... والزنزانه والسجن السميك وخطى الشهيد من حوله تهدر والنشيد وانت الشمس من بين إيديك تطلع عليك من كل باب مليون سلام يا شعبنا ومليون حباب * عما قريب الهمبريب يفتح شبابيك الحبيب والحال يطيب يا محمد أحمد تستجم والبيت يتم تتلم تلم تفرح فرح تحلم حلم كم تطمئن حقك يجيك لافيهو شك يمكن واظن ويفوتو هم والعدل يعم وتغنى أم كادت تجن كبر الولد جوا السجن فاقداهو هى دا كلو كلو بينتهى زولاً تريدو وتشتهى تلقاهو فى لا فى السجن لا مختفى لا يقولو ليك ما تمشى ليى دا كلو كلو بينتهى دا كلو كلو بينتهى دا كلو كلو بينتهى * (وطنا) وطنا.... البى إسمك كتبنا ورطنا أحبك مكانك صميم الفؤاد وباسمك أغنى.... وتغنى السواقي خيوط الطواقى سلام التلاقي ودموع الفراق وأحبك ملاذ وناسك عزاز أحبك حقيقة.... وأحبك مجاز أحبك بتضحك وأحبك عبوس بعزة جبالك ترك الشموس وما بين ظلالك أفتش وأكوس أفتش طفولتي وملامح صباى بناتك عيونن صفاهن سماى وهيبة رجالك بتسند قفاى صحى بتملا عينى.... وتشرف غناى بحضرة جلالك يطيب الجلوس مهذب أمامك يكون الكلام لأنك.... محنك عميق الدروس مجيد المهابه ومديد القوام شبابك تشابك شديد الزحام أراهم وراهم غبار الحياه مداين.... تعاين كأم العروس تهلل تكلل جبين الإمام رزازاً يبلل أغانى الخليل أصدق كلامك حقيقه وبخاف أخاف الطريق.... اللى ما بودى ليك وأعاف الصديق.... اللى ما بهم بيك معاك إنتظارى ولو بالكفاف وعنك بعيداً أبيت الرحيل وبيك إعتزاز الصباح الجميل جميع الأغانى اتكالن عليك جميع الأغانى اتكالن عليك * (مساجينك) مساجينك مساجينك مساجينك نغرد فى زنازينك عصافيراً مجرحه بى سكاكينك * نغنى ونحن فى أسرك وترجف.... وإنت فى قصرك سماواتك دخاخينك مساجينك مساجينك مساجينك * برغمك نحن ما زلنا بنكبر بى زلازلنا بنعشق فى سلاسلنا ونسخر.... من زنازينك مساجينك مساجينك مساجينك * حكايات الهوى الأول بنحكيها بدايات الغنا الطول.... نغنيها حقيقه وليس تتأول حتخجل من عناوينك : مساجينك مساجينك مساجينك * للسودان عواطفنا وبالسودان مواقفنا ولما تهب عواصفنا ما حيلة قوانينك ؟ مساجينك مساجينك مساجينك * (يا شعباً تسامى) ياشعباً تسامى.... يا هذا الهمام تفج الدنيا ياما تطلع من زحامها زى بدر التمام تدى النخله طولها والغابات طبولها والأيام فصولها والبذرة الغمام * قدرك عالي قدرك يا سامي المقام يا ملهم رماحك سناها الصدام أم در والطوابى فى صدرك وسام ملامح كم تسامح تغضب لا تلام * همه وعبقرية ذمه وفنجريه ضد العنصريه تحلم بالسلام * فداك وفى حواك يا مدد الكلام عفوك إنت ورضاكا برنا ليك تمام وبحلم فى هواكا بى حسن الختام دينك كم علينا منك والدينا وأجمل ما لدينا من يوم السماية ومن قبل الفطام منك كل حته فى الخاطر صبابه جنبك نبته نبته نكبر نحن يابا نسألك إنت وانت ورينا الإجابه علمنا الرمايه والحجا والقرايه والمشى بى مهابه فى الضحى والظلام * (يا شعباً لهبك ثوريتك) يا شعباً لهبك ثوريتك تلقى مرادك والفى نيتك وعمق إحساسك بى حريتك يبقى ملامح فى ذريتك * على أجنحة الفجر ترفرف فوق أعلامـك ومن بينات أكمامك تطلع شمس أعراسك * ماك هوين سهل قيادك سيد نفسك.... مين اسيادك ؟ ديل أولادك وديك أمجادك ونيلك هيلك جرى قدامك تحت أقدامك رجع صداك وسجع نحاسك وانت نسيج الفدا هندامك وانت نشيد الصبح كلامك وعطر أنفاسك * أرفع صوتك هيبة وجبره خلى نشيدك عالي النبره خلى جراح أولادك تبرا كبروا.... مكان الضحكه العبره إلا يقينهم فيك أتماسك يالإصرارك سطراً سطراً ملا كراسك * (حنبنيهو) حنبنيهو البنحلم بيهو يوماتى وطن شامخ وطن عاتى وطن خير ديمقراطي * وطن مالك زمام أمرو ومتوهج لهب جمرو وطن غالى نجومو تلالى فى العالي أراده سياده حريه مكان الفرد تتقدم قيادتنا الجماعية مكان السجن مستشفى مكان المنفى كليه مكان الأسرى.... ورديه مكان الحسره أغنيه مكان الطلقه عصفوره تحلق حول نافوره تمازح شفع الروضه حنبنيهو البنحلم بيهو يوماتى * وطن للسلم أجنحتو ضد الحرب أسلحتو عدد ما فوقو ما تحتو مدد للأرضو محتله سند للإيدو ملويه حنبنيهو.... البنحلم بيهو يوماتى وطن حدادي مدادي ما بنبنيهو فرادى ولا بالضجه فى الرادى ولا الخطب الحماسيه وطن بالفيهو نتساوى نحلم.... نقرا.... نتداوى.... مساكن.... كهربا ومويه تحتنا الظلمه تتهاوى نخت الفجر طاقيه وتطلع شمس مقهوره بخط الشعب ممهوره تخلى الدنيا مبهوره إراده وحدة شعبيه * (بلا وانجـلى) جمد الله ألف على السلامه إنهد كتف المقصله والسجن ترباسو انخلع تحت إنفجار الزلزله والشعب بى أسرو اندلع حرر مساجينو وطلع قرر ختام المهزله يا شارعاً .... سوا البدع أذهلت أسماع الملا كالبحر.... داوى الجلجله فتحت شبابيكا المدن للشمس.... واتشابا الخلا * شفت البنادق فى السما الظبط والربط انتمى للشعب شعب الملحمه الصرخه كانت همهمه والهبه كانت ململه * سداً منيعاً يا وطن يا شعب وهاج الفطن للظلم يوماً ما ركع مهما جرى تباً لعهد السنسره والنهب ثم السمسره سداً منيعاً يا وطن صه يا طنين البلبله أبداً لحكم الفرد لا بالدم لحكم الفرد لا تحيا الديمقراطيه كم نفديك يا مستقبلا بلى وانجلى بلا وانجلى جمد الله ألف على السلامه إنهد كتف المقصله * (السودان الوطن الواحد) مارس حارس ليس يخون الألف اللام السين الواو الدال الألف النون السودان الوطن الواحد ما قد كان وما سيكون * مارس ماسك كتف إبريل أعظم شعب.... أعظم جيل.... نعم بنادق لاترتد لصدر الشعب.... الغدر دخيل * شعباً صمم فرداً فرد هب وحطم حكم الفرد وجاهو عديل إعصار إعصار خطوه بخطوه.... وأيد على إيد وسلم سلم ما بنسلم وشعب معلم.... قال إصرار : عصينا عصينا وشلنا عصينا على الحريه منو بوصينا ؟ نحن الشعب الما بحتار.... إختار إختار ديمقراطيه بلا أميه بأيدى قويه نحفر أعمق نرمى الساس للسودان الوطن الحر مرفوع الراس للحريه بلا دوريه ولا تفتيش ولا جق بنداس * ديمقراطيه عمود النور ولما تغطى حقول القمح الأرض البور والمكنه تدور وترفع صوتك يا مقهور وبينا وبين العالم سد ينهد.... وسور * مارس حارس ليس يخون الألف اللام السين الواو الدال الألف النون السودان الوطن الواحد ما قد كان وما سيكون * (عشه كلمينا ميرى ذكرينا) عشه....كلمينا ميرى....ذكرينا كل سونكى أحسن يبقى مسطرينا * نحن شعب أسطى يلا.... جيبو مونا نبنى....نبنى نبنى مسرحاً.... ونادى مصنعاً وبوسطه حرب لا لا لا لا كبرى,,,, إسبتالا صاله للثقافه تمرح الغزاله جنبها....الزرافه رك قمرى طار قيره قيره قيره نطط الصغار صفق الترولى طمن....القطار حلقت.... وحلقت حمامة المطار كل طلقه بينا نحن تبقى وفره سمسماً.... وبفره سكراً.... وشاى تتراسايكلين جاى وجاى وجاى ما فى حاجه ساى كلو عندو دين كلو عندو راى بور....وبورسودان بارا....والجنينه عبرى ولا واو حاجه مش كويسه كل زول براو هى سودانا بكره من سودانا ناو تكتب إنت تقرا تعرف السياسه فى محل حراسه حجرة الدراسه تمشى إنت تلقى فى الضلمه....لمبه ألف ضحكه حلوه تسندك بجنبه بى تمن طبنجه أحسن الكمنجه أحسن الحليب إيد....وإيد وإيد نزرع الجديد غابة النشيد إيد....وإيد وإيد مافى بينا سيد إيد....وإيد وإيد نلحق البعيد نحن مش مرقنا حته واحده جينا جينا لى السرقنا حقنا....وعصينا دمنا.... وعرقنا ولعو الرتينه * عشه....كلمينا ميرى....ذكرينا كل سونكى أحسن يبقى مسطرينا * (نار الحنين) فارقت كم ، كم سنه عانيت وشفت الضنا نار الحنين للجنا ما شفت زيك أنا لكنى ما بنحنى ولا سواى انحنى الشمس خلف الجبل والنبع.... فى المنحنى هب يا نسيم الزمن بالذكريات والندى برد هجير الحشا رجع خطاهم صدى الشال كتابو ومشى والدابو عمرو ابتدا واشوقى لى ضحكتهم واشوقى لى ضمتهم واشوقى لى لمتهم بلا حدود أو مدى يسهر معاى النجم يمشى ويجينى الكرى يلقانى كم منسجم واللفته بتذكرا ارسم خيالهم رسم يضحك معاى يبتسم يبقى السحاب الضرا الجنه هم سكتها والدنيا هم سكرا تسألنى إيه العمل ؟ صبر المناضل عمل إنسد باب السجن ما انسد باب الأمل ما يبقى إسمو القمر لو ما الهلال إكتمل من أجلهم نحتمل ما ليس بالمحتمل * سجن سواكن سنة 1990م. (كأنى ولد) أحبك حب شديد بالحيل كأنى ولد كبر يا دابو واتنفس هوا العشرين وشد الحيل يخربش فى الكراريس ليل وفى الخاطر بنيه جميلة اللمعان يفكر فيها ويذكر مشيها قبيل قريب من لفة وبحزن لما لا ورده بتهبهب جنبو شاييها ولا النخله القميريه بترك فيها ولا النهر أب صديريه ولا الجيها * الشارع رمت فى قلبو حنيه وزى نعسان وما نعسان وما هين عليهو النوم يغمد صاحى....يتخيل بأنو معاها فى طرف الأمل قيل نزل جيها ما بهدم منامها السيل إذا هدم ولا بجيها بتتوسد ضراع النهر صافى القلب والنيه.... ويصحا على الشمس شرت على كتف المدن شالا ونعست فى ضواحيهن فوانيس المزارعيه وبحزن لما لا ورده بتهبهب جنبو شاييها ولا النخله القميريه بترك فيها ولا النهر أب صديريه ولا الجيها * (جيناك) جيناك وكنا طلعنا منك نحن مرفوعى الرؤوس جيناك مرفوعى الرؤوس أفتح زنازينك أهو بنفتح صدوراً ما بتكوس الرحمه تب ما فينا مرقاً فوقه سوس بل فينا عرقاً من جذور الشعب عشقاً لا يداس نحن بندوس على كل من عايز يدوس نحن بندوس جيناك وكنا طلعنا منك عنوه كداً واقتدار تشهد ترابيسك هديك وهدا الجدار نهر الجماهير العميق جلجل شديد الإنحدار زلزل حديد الإنكسار إمتد حولك واستدار وملا الطريق فإذا بأسوارك ضفاف وسواعد الناس النخيل حملتنا أمواج الهتاف فى ذلك الصبح الجميل حملتنا أفواج الكفاف ومدامع الفرح النبيل الغدر ما ببقى انتصار والإنكسار المستحيل المستحيل.... المستحيل.... أسمعنا ياليل السجون نحن بنحب شاى الصباح والمغربيه مع الولاد والزوجه والأم الحنون والأصدقاء وألى اللقاء واللمه عند الأمسيات والتكيه جنب الأغنيات والقدله فى السوق الكبير نتمشى نغرق فى الزحام ملء العيون بنحب كده ونعشق تمام إلا بنكون قدر الثبات ضد السكات ضد السكون ضد التسكع والجنون جنباً إلى جنب التماسك والحنين أفتح زنازينك أهو بنفتح شبابيك اليقين * كوبر قسم المديريه أغسطس 1989م. (لا) لا كريت أنا لا انكريت لا بعت ذمه ولا اشتريت سنيت قلم صدقى وبريت وبى نعم نعم السلاطين إزدريت وبى طعم سأم الزنازين المرير وانت المشير تلمع بكتفينك نجوم لكنو ليك.... ضرير * (يا قلبى .... ما تعتاد) يا قلبى ما تعتاد تسرح بعيد وبعيد يا قلبى ما تعتاد واشواقى ما فى الليد منى الأحبه هناك خلف الليالي بعاد كم فى خيالي أراك يا قلبى وانت سعيد بينهم قعدت قعاد أنا مد دخلت عراك ما عندي ليهو وريد ما عندي ليهو جياد فى كل نبره نشيد فى كل عبره مداد مداد يجيك راجيك من آخر الأجداد الصحبه والأنداد قاماتهم الأسياف أجسادهم الأغماد كتر البتابت عيب من تلكم الأوتاد ياما ادخرنا غناو ومسكنا فى يمناو فى لجة الأحزان وسلاسل الإبعاد يا قلبى ما تعتاد تسرح بعيد وبعيد يا قلبى ما تعتاد بيك إستبد حنين هل ما كفى استبداد ؟ أريتو لو فى الليد أركب بساط الريح أمسك ضراع الموج أطويها أرض البين طياً كما السجاد ما عندي ليك أرجوك لى شوفتهم ميعاد البيني بينهم سور ولربما استشهاد جواي خيط النور أمتن من الأصفاد تتوهج النيران يتفنن الحداد الما بحب ما بحن والما بحن جلاد عمر المناضل شوق زى الجمر وقاد لكنو ما بنقاد ما عندي ليك أرجوك لى شوفتهم ميعاد * سجن بورتسودان 1990م. (نظـره) كل الجروح بتروح إلا التى فى الروح خلى القلب شباك نحو الأمل مفتوح سرج الأمانى حنون مهر الليالى جموح * (ست البنات) ست البنات إتمالكت أعصابها بيبانها إتكت بكت الشبابيك التى نورها إنطفا فقدت حنان الهمبريب والإلفه والشمس البتضحك وانسياب الدردشه نار الكوانين إنطفت إلا البتوقد فى الحشا حق الفطور....يمه.... العشا حق الفطور....يمه.... العشا ما بابا ليكم يا جناى أصبر كفى أدت رضيع الأشهر الأولى القفا ثم انكفت غرقت غرق فى دمعتها عشم العشم نقطة حليبا يسكتو ولا حتى حتة كسرة تسند من مشى ما أهون الدمع الجسور إذا جرى من عين والدة سعت وبكل ما ملكت يداها وصحتا صحت همومها الصحتا مرقت تفتش فى الشغل كم مهنة حامت كاستا نكتت شهادات الزمن ما كان تخلى دراستا رمت اللقيمات الدغش والكسرة قامت عاستا كم حاجه عندها باعتا كل الأواني بتاعتا دبلة زواجها وساعتا ترخص حياتا وكل شيىء بس سمعتا.... بس سمعتا.... يا الله ما أطول خميسا وجمعتا أحد"....أحد أحد"....أحد جسر السبت حبل الأحد أحد"....أحد أحد"....أحد اليوم يجر التانى والتالت....كما ود اللحد أحد"....أحد أحد"....أحد حيلا انتهى حيلا انتهى حيلا انتهى يا منتهى الصبر البخلى الستره غاب قوسين وأدنى من الذى ما بشبها * (وداع) الوداع يالمشتهنك قبل ما نتحسسك نضحك معاك ونبتهج ما سمعنا منك تركب قطار الموت ، وترحل يا ولد ما تخلى جنك أنزل تعال.... يمكن تغير رايك السما والسحابه والنجم والنهر والرسم الملون والكتابه والعصافير اللي صحت جفن غابه والغنا السمح المخزن فى شرايين الربابه واللا حتى على الأقل لو قلنا-يمكن- ماما....بابا.... * (يابا مع السلامه) يابا مع السلامه مع السلامه مع السلامه ياسكة سلامه فى الحزن المطير يا كالنخله هامه قامه وإستقامه هيبه مع البساطه وأصدق ما يكون راحة إيديك تماماً مثل الضفتين ضلك كم ترامى حضناً لليتامى وخبزاً للذين هم لا يملكون بى نفس البساطه والهمس الحنون ترحل يا حبيبى من باب الحياة لى باب المنون * روحك كالحمامه بترفرف هناك كم سيره وسريره من حولك ضراك الناس اللذين خليتم وراك وعيونهم حزينه بتبلل ثراك أبوب المدينة بتسلم عليك والشارع يتاوق يتنفس هواك * يا حليلك حليلك ياحليل الحكاوى نتونس كأنك يوم ما كنت ناوى تجمه لم تفرق بين الناس تساوى نارك ما بتحرق.... من جيبك تداوى ما بتحب تفرق....ما بتشد تلاوى الحلم الجماعى والعدل إجتماعى والروح السماوى والحب الكبير * فى الزمن المكندك والحزن الإضافى جينا نقول نفرق.... نجى نلقاه مافى لا سافر مشرق...لافتران وغافى وين عمى البطرق جواى القوافى يا كرسى وسريرو هل ما زلت دافى ؟ يا مرتبتو.... يمكن.... فى مكتبتو قاعد يقرا وذهنه صافى * يا تلك الترامس وين الصوتو هامس كالمترار يساسق ويمشى كما الحفيف وكم فى الذهن عالق ثرثرة المعالق والشاى اللطيف وتصطف الكبابى اجمل من صبايا بينات الروابى والظل الوريف أحمر زاهى باهى ويلفت إنتباهى هل سكر زياده أم سكر خفيف ؟ * ينده للبنيه يديها الحلاوه والخاطر بطيب يدخل جنو منو محبوب الشقاوه يستنى النصيب الدفو والنداوه والسنا والعبير كالغزلان هنالك فى الوادى الخصيب حيث المويه عذبه والغصن الرطيب وكم تحت المخده.... أكتر من موده للجنا والغريب عشه وعشب أخضر وجدول من حليب * الشمس البتطلع بلت منو ريقا والنجمه البتسطع فيهو تشوف بريقا والندى من بركتو يطفيها الحريقه ننهل من بركتو زى شيخ الطريقه يلا نسد فرقتو حب الناس درقتو ياموت لو تركتو مننا قد سرقتو كنا نقول دا وكتو لكنك حقيقه * النفاجو فاتح ما بين دين ودين نفحه محمديه ودفئاً كالضريح ميضنه كم تلالى جيداً فى الليالى مجداً فى الأعالى مريم والمسيح * نبضاً قلبو واصل ما بين جيل وجيل ما بين كان وحاصل أو ما قد يكون وما بتشوف فواصل إلا الذكريات وآلام المفاصل وبعضاً من شجون * إنتهى ..... كمال إبراهيم خليل الخرطوم مارس 2007م. (عدل بواسطة AmroKamal on 04-13-2007, 04:29 PM) (عدل بواسطة AmroKamal on 04-13-2007, 04:35 PM)

04-13-2007, 04:39 PM

AmroKamal

AmroKamal
تاريخ التسجيل: 11-21-2006
مجموع المشاركات: 795

للتواصل معنا

FaceBook
تويتر Twitter
YouTube

20 عاما من العطاء و الصمود
مكتبة سودانيزاونلاين

Re: النفاج.... مدخل إلى عوالم محجوب شريف ( ملف توثيقى أعده الأستاذ _ كمال إبراهيم خليل ) (Re: AmroKamal)
مدخل :- الى الثوثيق لحياة الرجل الوطن محجوب شريف

04-14-2007, 02:40 AM

wesamm

wesamm
تاريخ التسجيل: 05-02-2006
مجموع المشاركات: 5128

للتواصل معنا

FaceBook
تويتر Twitter
YouTube

20 عاما من العطاء و الصمود
مكتبة سودانيزاونلاين

Re: النفاج.... مدخل إلى عوالم محجوب شريف ( ملف توثيقى أعده الأستاذ _ كمال إبراهيم خليل ) (Re: AmroKamal)
التحية لشاعر الشعب المناضل محجوب شريف والتحية لك اخي عمرو ومبروك يااستاذ محجوب شريف الخطوبة للأميرة مي

04-14-2007, 02:38 PM

AmroKamal

AmroKamal
تاريخ التسجيل: 11-21-2006
مجموع المشاركات: 795

للتواصل معنا

FaceBook
تويتر Twitter
YouTube

20 عاما من العطاء و الصمود
مكتبة سودانيزاونلاين

Re: النفاج.... مدخل إلى عوالم محجوب شريف ( ملف توثيقى أعده الأستاذ _ كمال إبراهيم خليل ) (Re: wesamm)
شكراً يا وسام والتحية لإبنة محجوب وهى فرحة شعبية ، كيف لا ونحن نرى الرجل يفرح وقد بعث فينا الأمل مرارا ومرارا عبر كلماته... والأجمل فى الأمر أنه قبل تزويجها بمهر إسمى لوحات فنية ...... وهذا مضمون عميق يؤكد صدق الرجل ... يتطابق سلوكه مع المعرفة... يتعايش واقعه كما يحدثنا عنه. هل يجرؤ أحد غير هذا البطل على الوقوف أمام المجتمع ليزوج إبنته بلوحات وألوان وبعض الخشب!!!! إنها قيمة أخرى يغرسها فى نفس هذا الشعب الكريم. هنيئا للعروس مى وأسعدها وزوجها ومتع الله شاعرنا بالصحة والعافية ليرى أحفاده يرددون ما تغنى به للوطن.

04-14-2007, 06:53 AM

Shawgi Sulaiman

Shawgi Sulaiman
تاريخ التسجيل: 12-25-2006
مجموع المشاركات: 2536

للتواصل معنا

FaceBook
تويتر Twitter
YouTube

20 عاما من العطاء و الصمود
مكتبة سودانيزاونلاين

Re: النفاج.... مدخل إلى عوالم محجوب شريف ( ملف توثيقى أعده الأستاذ _ كمال إبراهيم خليل ) (Re: AmroKamal)
شكرا لكم جميعا وما أروعك محجوب شريف ، على فكرة قصيدة الوداع هي كانت مرثية للراحل الوالد عبد الكريم ميرغني طيب الله ثراه.

04-15-2007, 06:51 PM

AmroKamal

AmroKamal
تاريخ التسجيل: 11-21-2006
مجموع المشاركات: 795

للتواصل معنا

FaceBook
تويتر Twitter
YouTube

20 عاما من العطاء و الصمود
مكتبة سودانيزاونلاين

Re: النفاج.... مدخل إلى عوالم محجوب شريف ( ملف توثيقى أعده الأستاذ _ كمال إبراهيم خليل ) (Re: Shawgi Sulaiman)
الذكرى العطرة للراحل عبدالكريم ميرغنى... طيب الله ثراه الإحترام والإجلال للمبدع محجوب وهل لك أن تأتى بمذيد من الإضافات والمواد التوثيقية لإثراء الملف ؟؟ تحياتى

04-15-2007, 07:16 PM

AmroKamal

AmroKamal
تاريخ التسجيل: 11-21-2006
مجموع المشاركات: 795

للتواصل معنا

FaceBook
تويتر Twitter
YouTube

20 عاما من العطاء و الصمود
مكتبة سودانيزاونلاين

Re: النفاج.... مدخل إلى عوالم محجوب شريف ( ملف توثيقى أعده الأستاذ _ كمال إبراهيم خليل ) (Re: Shawgi Sulaiman)
الذكرى العطرة للراحل عبدالكريم ميرغنى... طيب الله ثراه الإحترام والإجلال للمبدع محجوب وهل لك أن تأتى بمذيد من الإضافات والمواد التوثيقية لإثراء الملف ؟؟ تحياتى

04-14-2007, 09:13 AM

ALI KHAIR

ALI KHAIR
تاريخ التسجيل: 02-15-2007
مجموع المشاركات: 139

للتواصل معنا

FaceBook
تويتر Twitter
YouTube

20 عاما من العطاء و الصمود
مكتبة سودانيزاونلاين

Re: النفاج.... مدخل إلى عوالم محجوب شريف ( ملف توثيقى أعده الأستاذ _ كمال إبراهيم خليل ) (Re: AmroKamal)
شكرا لك عورو على هذا الجهد كسرة زى ما بقول البونى وتانين حصل انك وجيت ورشة عمل الهوية فى العمارة السودانية مع دكتور هاشم خليفة

04-19-2007, 01:00 PM

AmroKamal

AmroKamal
تاريخ التسجيل: 11-21-2006
مجموع المشاركات: 795

للتواصل معنا

FaceBook
تويتر Twitter
YouTube

20 عاما من العطاء و الصمود
مكتبة سودانيزاونلاين

Re: النفاج.... مدخل إلى عوالم محجوب شريف ( ملف توثيقى أعده الأستاذ _ كمال إبراهيم خليل ) (Re: ALI KHAIR)
العفو ده محاولة لإعادة الحياة بعض الأمل **** ياهو ذاته.... وموضوع الهوية ده حنعمل به بوست كامل ياريت تساعدنى فى جمع الصور للتوثيق تحياتى ****** إلى البوردراب يا شباب دايرين إضافة فى البوست ده عشان نحقق هدفنا ارجو المساعدة

04-19-2007, 03:13 PM

ALI KHAIR

ALI KHAIR
تاريخ التسجيل: 02-15-2007
مجموع المشاركات: 139

للتواصل معنا

FaceBook
تويتر Twitter
YouTube

20 عاما من العطاء و الصمود
مكتبة سودانيزاونلاين

Re: النفاج.... مدخل إلى عوالم محجوب شريف ( ملف توثيقى أعده الأستاذ _ كمال إبراهيم خليل ) (Re: AmroKamal)
السيد عمرو شكرا على الرد عموما ما عندك اى مشكلة فى كمية من الصور بالذات بتاعت الرحلة يوم الجمعة ..... دا اى ميلى لو ممكن تتضيفنى عندك عشان السكة تبقى اقرب ولك منى كل الود ALIKHAIR82@HOT ALIKHAIR82@GMAIL

04-19-2007, 04:16 PM

hanadi yousif

hanadi yousif
تاريخ التسجيل: 06-03-2005
مجموع المشاركات: 2743

للتواصل معنا

FaceBook
تويتر Twitter
YouTube

20 عاما من العطاء و الصمود
مكتبة سودانيزاونلاين

Re: النفاج.... مدخل إلى عوالم محجوب شريف ( ملف توثيقى أعده الأستاذ _ كمال إبراهيم خليل ) (Re: ALI KHAIR)
عمرو تشكر يا زول يا رائع على النفاج الممتع

04-21-2007, 03:56 PM

shaheed gadora

تاريخ التسجيل: 11-08-2006
مجموع المشاركات: 0

للتواصل معنا

FaceBook
تويتر Twitter
YouTube

20 عاما من العطاء و الصمود
مكتبة سودانيزاونلاين

Re: النفاج.... مدخل إلى عوالم محجوب شريف ( ملف توثيقى أعده الأستاذ _ كمال إبراهيم خليل ) (Re: hanadi yousif)
UP للاستفادة

[رد على الموضوع]

صفحة 1 „‰ 1: << 1 >>

احدث عناوين سودانيز اون لاين الان

اراء حرة و مقالات	Latest Posts in English Forum
Articles and Views	اخر المواضيع فى المنبر العام
News and Press Releases	اخبار و بيانات

الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة

About Us
Contact Us
About Sudanese Online

اخبار و بيانات
اراء حرة و مقالات
صور سودانيزاونلاين
فيديوهات سودانيزاونلاين
ويكيبيديا سودانيز اون لاين
منتديات سودانيزاونلاين

News and Press Releases
Articles and Views
SudaneseOnline Images
Sudanese Online Videos
Sudanese Online Wikipedia
Sudanese Online Forums

If you're looking to submit News,Video,a Press Release or or Article please feel free to send it to [email protected]