يوم الخميس الماضي .. رن جرس الموبايل ليلاً و جاءني صوت صديقي الحبوب ( أنور البعيو ) :
أبو جهينة .. إنت معزوم تركين معانا على العشا عند الزول الكلس ( مامان ) ..
و رغم عشقي اللا محمدود للتركين إلا أن ظرفاً قاهراً منعني من تلبية الدعوة .. و حزنت لثلاثة أمور : أولهما بأن العشوة تركين سيء السمعة ثانيهما أن اللمة تضم مامان و البعيو و الشايقي و حمدي الطيب .. إذن الونسة كاربة ( و دخاخينا تلوي ) ..
و ثالثة الأثافي أن مامان ( إيدو طاعمة ) .. و نفسو يجيب الرايح. المهم طوال الليل و أنا أتخيل ( قطع القراصة المغموسة ) في ( لجة التركين ) و الشطة مع الليمون تزيدها ضحكات أنور البعيو ( حداقة و حرارة ) .. و البصل يصدر لحناً نشازاً مع قفشات الشايقي و حديث مامان عن شاعرنا بادي العكودابي.. تناسيت العشوة عمداً حتى لا ( أبلع ريقي ) يوم الجمعة تحسرا ثم فاجأني البعيو اليوم قبل دقائق بضحكته التي تسبق حكاويه أتحفني بنكتة كانت آخرها ( إيدو طاعمة ) ثم قال بالحرف الواحد :
في طريق العودة من عند مامان بعد عشوة التركين .. و بعد أن تعشينا و غسلنا الأيادي بالصابون ( أبو ريحة ) و ( تكلْونَّا ) يعني وضعنا كمية من ماء الكلونيا لزوم تفويت الرائحة الغتيتة .. و إتونسنا ركبنا في سيارة واحدة أنا و الشايقي و حمدي و حسن في الطريق أوقفنا عسكري و طلب هوياتنا .. ثم قال العسكري و هو يضحك : ضاربين سمك يا الأزوال ؟؟؟ عرفنا حينها أن السمك يمد لسان رائحته مهما ( تصوبنت و تكلونت ) .. و صدق الفلاتي الذي قال : حلو لاكين عفن ...
*** ملاحظة تركينية : التركين تعقب أكله تعسيلة جميلة .. هي بين الخَدَر و الغفوة ... لذا من الأفضل أن ينام آكل التركين في نفس المكان الذي أكل فيه التركين و خصوصاً إن كان البصل من مكونات المائدة.
03-31-2007, 01:52 PM
تماضر الخنساء حمزه
تماضر الخنساء حمزه
تاريخ التسجيل: 10-13-2006
مجموع المشاركات: 5215
والله يا أبو جهينة كل ما نحاول نتخلص من الجهوية والعنصرية عليكم يرجعنا ليها التركين هسة لمن أتخيل تماضر الخنساء بتمصمص فى أصابعا أتحسر خليتوا للقبطة الصعايدة شنو
03-31-2007, 02:09 PM
تماضر الخنساء حمزه
تماضر الخنساء حمزه
تاريخ التسجيل: 10-13-2006
مجموع المشاركات: 5215
Quote: التركين دا ما عنده جهويه لا عنصريه تصدقوا بموووووت فيه مووووووووت
قالوا في أسطى ( بناء ) بيبني لي واحد بخيل جدا جدا أوضة في بيتو.. أها إبتدا الشغل الصباح بدري .. و معاه الصبي بتاعو للمساعدة في نقل الطين .. لغاية الساعة 11 ظهرا الزول دة غير الموية الزرقا ما جاب ليهم شي. قام زى الساعة 12 ظهرا سأل الأسطى : ياخي ما عندنا غير تركين في البيت .. كان بتحبوه بنجيبو ليكم فطور فقال الأسطى بسرعة : أنا بحبو موووووووووووووووت .. و ال معاى دة بيشربو شرااااب .. جيبو و تعال .. فبهت الذي بخل .. و جاب التركين على عجل
04-01-2007, 08:05 AM
ابو جهينة
ابو جهينة
تاريخ التسجيل: 05-20-2003
مجموع المشاركات: 22492
يا ودعمي .. التركيين دة كان حيخليني هسع "راح بدري وهو جاهل"...لاسباب لا علم لي بها "السمك والتركيين" من محرمات الست الوالدة رغم كما تعرف انت فقريتنا التي هي الان فيشلاند عرفت بكليهما ولذا فقد حاربتهما حربا شعواء مؤزارة في البداية للوالدة وتخليت عن التركيين وفي ارزل العمر اكلت سي فوود عندما ذهبت الي بلاد ما في غيرها فود ... اما حكاية "راح بدري " دي فانا حيث كنت اعوض قصر قامتي وانا جاهل في زمن ما بطول لساني فلقد كنت في "كروور عبكة " يوما ما مع اخي تيجاني واتي عبداله ومحد حسن حامليين قفة مليئة بالملح في طريقهم الي الجزيرة وحيث ان الغرض من الملح معروف حينئذ فوجدتها فرصة لاقتص من محمد لامر سبق ذاك اليوم فصحت " يا بتاع التركيين "... وكانت تلك اخر كلمة قلتها "فوق الماء" اما الباقي فقد كان "تحت الماء" واحمد اخي يجادلهم بان " غرقتو اخوي " ...الغريبة كنت بسمع كل حاجة واكتشفت فيما بعد ان وجهي فقط هو الغارق في الماء فلقد كنت في "كروور عبكة " حيث الماء جرورة ...
03-31-2007, 02:39 PM
doma
doma
تاريخ التسجيل: 02-04-2002
مجموع المشاركات: 15970
لدرجة انك بتاكلني حاجات غرييييبببة في البكان الانتي فيه .... مش؟ القلتي عنو داااك شبه لك انه "تركيين" بتاع اسرة مينغ لكن انا شاكي والله اعلم ______________- ابوبكر العزيز انت ما سمعت العرق دساس انا فيني عرق محس ام جدي محسيه تصدق اسه اول ما فتحت البوست دا لقيت التركين روحي اتشحتفت بس الكويس انه اليوم طبخت الفسيخ بنفس الوصفه القلتها ليك واسه صحني قدامي والعطر الفواح .
03-31-2007, 02:58 PM
رأفت ميلاد
رأفت ميلاد
تاريخ التسجيل: 04-03-2006
مجموع المشاركات: 7655
Quote: يا بتاع التركيين "... وكانت تلك اخر كلمة قلتها "فوق الماء" اما الباقي فقد كان "تحت الماء" واحمد اخي يجادلهم بان " غرقتو اخوي " ...الغريبة كنت بسمع كل حاجة واكتشفت فيما بعد ان وجهي فقط هو الغارق في الماء فلقد كنت في "كروور عبكة " حيث الماء جرورة ...
يعني الناس ديل شايلين ملح و خايضين للجزيرة عشان يملحوا سلطة ؟ زعلوا و كانوا عاوزين يغطسوك عشان ( طولة لسانك ) .. بالإضافة لأن التركين من الأمور ( المسكوت عنها ) .. و لكنه من الأمور ( الموصَّى بها ) ..
نشأت وترعرت في حي كله تركين بالقدر الذي أصبحت معه جميع بيوت الحي ذات أركان ونواصي ، وكنا وما زلنا ندمن القعاد في تلك الأركان وهي بالضرورة أكثر من خمسة ، وقد نهانا شيخ الطيب عن الجلوس في الشوارع فقلنا له هي مجالسنا فبيوتنا ضيقه فطنش ، غير أنني لم أقرب التركين وكنت في أحسن الأحوال وأقصر الطرق يكون بيني وبينه فرسخاً أو يزيد وهي ذات المسافة تقريباً التي كثيراً ما أقرأها على عربه نصف نقل محملة بالغاز وأخرى تحمل بنزيناً شديد الإشتعال على ذمة اليافطة. التركين من الطعام الذي يمكن أن تطلق عليه لقب سئ السمعة وحدود تركيني أنني آكل الفسيخ بالطريقة الخرطومية المعروفة ، هذا إذا كان الفسيخ والتركين يشتركان في الحوت بإعتبار أنه الأصل وقد كنت أكثر جراءة وجربت الفسيخ أيضاً ذات مرة بطريقة حلب بربر أو ما يعرف عندهم بالفسيخ التشه – أى أنه يشم الزيت في النار شمومه ولم يطلق عليه على الريحه شأنه في ذلك شأن القهوة لإعتبارات أن الموضوع كله ريحه بالقدر الذي أصبحنا لا نفرق بينه وبين سيد الرايحه الذي فتح خشم البقره وفي روايات أخر أغوار غير مسبوره (كما تعلمت منك). فسوف أترككم لتركينكم ، ولا أحسب أن المثل العامي "البدخل البطون ما بغسلو الصابون" له علاقة بهذه الأكلة ذائعة الصيت سيئة السمعة ، وأسمحوا لي أن أتوجه بسؤالي عديل لك أخي الكريم جلال بن داؤود: إذا كانت رائحة التركين بهذه الفظاعة أو قل القوة أى رائحة نفاذة فهل هي محرمة دولياً شأنها في ذلك شأن الأسلحة البيولوجية والكيماوية ، وماذا إذا أوفد لنا البرادعي من يردعنا وعاث تفتيشاً في جرار التركين هنا وهناك لتنقل محطات التلفزة صور مفتشي الأسلحة وهم يعثرون على مخابئ أسلحة الدمار الشامل المفترضة والتي رصدتها الأقمار الصناعية للتحرك البوارج والفرقاطات والمدرعات والمجنزرات والطائرات كل ذلك بسبب التركين. وسؤالي الآخر ربما يكون مختلفاً بعض الشئ ، فإذا كان التركين بهذه الرائحة القوية الغير حميده دخولا فماذا عن الـ output ؟
04-01-2007, 12:35 PM
ابو جهينة
ابو جهينة
تاريخ التسجيل: 05-20-2003
مجموع المشاركات: 22492
Quote: وسؤالي الآخر ربما يكون مختلفاً بعض الشئ ، فإذا كان التركين بهذه الرائحة القوية الغير حميده دخولا فماذا عن الـ output ؟
أتى المهندس حسن من القاهرة التي ولد بها و ترعرع و درس و أتانا بالخرطوم كسوداني و لكن بلهجة مصرية لا عيب فيها .. و صادف حضوره ليلتها أن كان العشاء ( تركيناً حنيذاً ) بقراصة ( خمسة بوصة بدقيق قمح أسمر ) .. و بما أن المهندس حسن تربى في حواري القاهرة مبارياً صحون السردين و الفسيخ و ما لف لفهما .. فإنه لم يأنف من أكل التركين .. و خصوصا أن الشباب أترعوه ( بكأسين من المنكر المحلي ) .. فشرب و ضرب التركين ضرب غرائب الإبل ... ثم قال : أدخلوني غرفة لأنام .. و ذلك بعدأن وصلتْ عينيه إلى منتصف جبهته .. دخل الغرفة و ِشغلوا المروحة .. و يبدو أن ( الغازات ) إشتغلتْ تش .. فقام بتفريغها دونما تردد لأنه وحيد بالغرفة .. فظلت الغازات المهدرجة برائحة التركين تحوم في الغرفة و تجعله يتمادى في تفريغ المزيد حتى أضحتْ الغرفة كشارع مليء ( بالبنبان ) .. دخل قريبه ليوقظه و يأخذه معه لبيتهم .. و ما أن دخل و فوجيء بهذه الكتاحة غير المرئية .. قال له : إيه دة يا حسن .. إنت عملتها ولا شنو ؟ فقال حسن و هو يغالب النوم : آآه عملتها طبعا .. أُمَّال يعني ريحتي كدة؟
و يمكن أن تقيس يا عزيزي الملاعمر ال OUTPUT على هذا المنوال
03-31-2007, 03:45 PM
abubakr
abubakr
تاريخ التسجيل: 04-22-2002
مجموع المشاركات: 16044
بوست شهي ولذيذ ... والله شهيتني التركين يا أبو جهينة بوصفك الدقيق ... ذكرتني الجمعات زماااااان قبل نحو 20 عاماً في دنقلا العرضي، لا تكون الجمعة جمعة لو لم نفطر الساعة الثامنة والنصف صباحاً بتركين كما وصفه قلمك الأنيق ... جمعة مطبوخ وجمعة (جوداد) ...
بعدين الزول ده قال
Quote: حلو لاكين
أفن ... مش عفن
ودي قلبت فيها الهوبا
Quote: ملاحظة تركينية : التركين تعقب أكله تعسيلة جميلة .. هي بين الخَدَر و الغفوة ... لذا من الأفضل أن ينام آكل التركين في نفس المكان الذي أكل فيه التركين و خصوصاً إن كان البصل من مكونات المائدة.
04-02-2007, 06:46 AM
ابو جهينة
ابو جهينة
تاريخ التسجيل: 05-20-2003
مجموع المشاركات: 22492
Quote: ذكرتني الجمعات زماااااان قبل نحو 20 عاماً في دنقلا العرضي، لا تكون الجمعة جمعة لو لم نفطر الساعة الثامنة والنصف صباحاً بتركين كما وصفه قلمك الأنيق ... جمعة مطبوخ وجمعة (جوداد) ...
السفير عبدالمجيد علي حسن ( أطال الله عمره ) عندما كان سفيرنا في المنظمة الدولية بجنيف .. عرف أنني قادم إلى جنيف فحدث زوجته بذلك .. فطلبت ( تركيناً ) .. و أخذته معي في ( برطمان ) في مطار جنيف عندما شاهدوا هذا الهلام الأسود بلون ( فيران الحواشات ) .. أعلنوا حالة الطواريء .. و لبسوا الكمامات و القفازات .. و حجزوني في غرفة .. و بعد إتصالات مكثفة مع السفير تم إطلاق سراحي بعد أن أعطوني البرطمان في وعاء بلاستيكي معقم
04-02-2007, 07:14 AM
abubakr
abubakr
تاريخ التسجيل: 04-22-2002
مجموع المشاركات: 16044
Quote: يا ودعمي ..هي فتحية وامجد ما كفاهم اكل السويسريين الكلهم chefs وبقو في اكل "التراث
تصدق يا باشمهندس .. دخلت مخزن ( فتحية دهب ) في منزلهم بجنيف .. لقيتو ليك مليان حاجات سودانية .. إبتداءا من الويكة و حتى القنقليز .. و قد أكمل برطمان التركين ( العقد الفريد ) و جلس هناك سيدا في مجموعته ..
دمتم
03-31-2007, 07:05 PM
abubakr
abubakr
تاريخ التسجيل: 04-22-2002
مجموع المشاركات: 16044
الأخ ابوجهينه...اريتك طيب....والله فقدناك فى تلك السهرة طبعا مامان بحر والشاعر الدكتور ودبادى بحر فلك ان تتخيل المتعه التى عشناها...لكن خيرها فى غيرها انشاء الله....اما فيما يتعلق بالعشوه(تبارك الله) فكانت ملحمة تركين شديد والقراصه فرش نار الدوكه ماطفيناها الا بعد الشبع والبصل الأخضر كيمان ونحن كما تعلم هدافين بقيادة اخونا حمدى الطيب....وفى رحاة الاياب وامام فندق اليمامه شارع المطار وقفنا فى التفتيش وطلب العسكرى الاثبات من حسن (الشايقى) وفى تلك الاثناء ابتسم العسكرى ابتاسمه كبيره وانا اراقبه من المقعد الخلفى لم افهم لها معنى الا عندما قال بغبطه متعشين سمك (لول) فانفجرنا ضاحكين لكن يابوجهينه العسكرى ده زول عنده حاسة شم رهيبه لاننا بذلنا مجهود كبير فى الغسيل لمحو أثار التركين (الأفنه)...وبالمناسبه لما نزلنا من بيت مامان كان برفقتنا فى الاسنسير سعودى لانعرف حجم الضرر الذى وقع عليه من تلك الرائحة....ولكن بالرغم من كل ذلك لن نتوقف عن اكل التركين فالتركين هو الاكله الوحيده التى لايتوقف من يأكلها لشعوره بالشبع فقط يتوقف بعد ان يلحس الحله ويكون اما الأمر الواقع..... لك تحيات شحمانات بنكهة التركين على فكره انا فقدت صديق الموج فى تلك السهره فهو من محبى ودبادى وكمان التركين له التحية
04-02-2007, 03:58 PM
مجدي عبدالرحيم فضل
مجدي عبدالرحيم فضل
تاريخ التسجيل: 03-11-2007
مجموع المشاركات: 8882
طبعا إنت عارف إنو الحقنة ال بيدوها للزول الملدوغ من الثعبان .. الحقنة دي إحدى مكوناتها الأساسية هو سم الثعبان نفسو .. بتدخل فيهو مكونات أخرى و بتبقى بلسم لعلاج سم الثعبان ال دخل جسم الإنسان .. أها في واحد أخونا مقترح يعملوا ترياق مضاد للتركين من التركين ذااااااااااااااتو .. ممكن يعملوه حقنة و يدوهو للزول في اللسان أو تحت الصرة بشوية زى حقنة عضة الكلب أو يعملوه كبسولات ، و كلما الواحد يتذكر التركين ياخد ليهو كان حبة كان حبتين .. يقوم نتح الراس بقيف .. و هكذا دواليك.
دمتم مجدي
04-03-2007, 08:48 AM
ابو جهينة
ابو جهينة
تاريخ التسجيل: 05-20-2003
مجموع المشاركات: 22492
قريبنا دة القاعد في هونولولو (اتصور..! براك لحدي ما اتريح واجي) متعذب بشان التركيين ...يعني الواحد كان مسك ليك ناس المجلس العسكري بتاع عبود وشحننم تركيين كانو نايميين وعلي طول الي الاخره عندما جا اجلم وكنا هسع قاعديين في بيوتنا في عبكة البقت "اغرق تحت الماء"( يعني بدل ما نسوي من السمك تركيين اهو السمك سو بيوتناموتيلات )..رسل لقريبنا الفي هونولولو شوية تركيين بواسطة البرادعي لانو ما اظن ممكن تفوت ناس التفتيش النووي ....
طقوس تركينية حجم القراصة: 5 بوصة وما يزيد الكمية: غير محدودة عدد المشاركين: يجب أن لا يقل عن 6 أشخاص بطينيين ليس لديهم اتصال بين العقل والمعدة التركين: حبيب قلبي وعذاب عمري البصل: لازم يكون بصل أبيض مقطع مغموس في شطة الشطة: شطة بالدكوة والليمون ويا حبذا لو تم خلط شطة خضراء وإضافتها درجة حرارة الغرفة: بين 35 -55 (لكي يزداد تصبب العرق وتزداد اللهفة في تناول المزيد
أشياء ضرورية:
تمر:يجب تناول حبات من التمر مباشرة بعد تناول وجبة التركين وذلك لخلق توازن لن يحدث أبدا شاي: يجب أن يكون الشاي تقيل أحمر حتى يبدأ في القضاء على الرائحة البديعة قهوة: القهوة معروفة بقوة رائحتها لا بأس من تعاطيها بعد شرب الشاي
تحذير مهم
أحذر شرب الماء أو المشروبات الغازية أو الكحولية بعد تناول الوجبة مباشرة وإلا سوف تظل (تشرب ما تروى) لبقية اليوم ويفضل شرب الماء بعد مرور نصف ساعة على الأقل (إن كنت لا تزال مستيقظا)
والله أنا خرمت خلااااص.
أبو جهينة جهجتنا !!!
أمير أوية
04-05-2007, 07:18 AM
tmbis
tmbis
تاريخ التسجيل: 10-19-2002
مجموع المشاركات: 24862
بلاي يا ريس ألبعيــو طلع ( تركوازي ) برضو.. وانا أقول الزول ده كلما الاقيهو بيكون .. ( مغنطس ) كدا مالو.. ( الشايقي .. ومامان ) والله دي خيانات منكم .. تحضروني محاضرات .. وفي التركين اطلع بي ( قــد القفة ) .. الجمعة الفاتت .. حمد فتح الرحمن وهيثم وتنقو كانو معانا .. حمد وهيثم لما الواطه مغربت قعدو ( يتململو) .. وظهرت عليهم آثار الإدمان .. حمد قال لي ها يا شباب بعد كدا متخارجين .. قلت ليهو على وين ؟ قال لي والله ماشين .. الجماعة ديل جهزوا التركين في نفس اللحظة كنت معزوم نظام عشوة لطيفه كدا .. قلت ليهو طيب يا حمد ما تشوفني ياخ .. وحات الخــوة يا ريس .. قال لي كلام كان جمعتو مع بعض ما تطلع بيهو بي جملة واحده مفيدة .. لكن القدرت اعرفوا منو .. مالك ومال اسلحة الدمار الشامل مش احسن ليك جاتوهاتك وفطائرك الملفوفة والبرستيدج الماشي ليهو .. .. بلاي من العام 2002 كلما ( امد قرعتي ) وإجتهد في تجويد اللغة مرة بالدنقلاوي ومرة بالمحسي ومرة بالحلفاوي .. ما لقيت لي واحد عبرني .. وجاب لي برطمانية صغيرة إن شاء الله للذكرى والتاريخ بس .. الدنقلاوي يكون صاحبك للطيش .. ويمشي يتعشى معاك .. واي حاجة يعمله معاك بلاي لما يرسلو ليهو التركين .. ينكرك زي الترتيب..
يا ريس .. والله ما عارف لكن عندي احساس كدا .. أنو الاهرامات الكلمتني عنها المرة الفاتت ديك . والمدافن .. عندي احساس انو كان الجماعة ديل نقبو كويس ..إحتمال كبير يلقو ليهم ( تصبينه ) بتاعت ملك يا أمير .. مش البتاع ده طويل الأجل والا كيف ؟
04-05-2007, 07:32 AM
أحمد الشايقي
أحمد الشايقي
تاريخ التسجيل: 08-08-2004
مجموع المشاركات: 14611
Quote: بلاي من العام 2002 كلما ( امد قرعتي ) وإجتهد في تجويد اللغة مرة بالدنقلاوي ومرة بالمحسي ومرة بالحلفاوي .. ما لقيت لي واحد عبرني .. وجاب لي برطمانية صغيرة إن شاء الله للذكرى والتاريخ بس ..
بما انو انا نادر الكتابة في البورد وبقرا كتير وبعرف انك من الشخصيات المحبوبة ليك عندي برطمانية من نوع ابوشريط ومعاها كتلوج لغير الناطقين بها حتي لو با DHL بس خت لي عنوانك هنا
Quote: ليك عندي برطمانية من نوع ابوشريط ومعاها كتلوج لغير الناطقين بها
التركين حتى للناطقين بها عاوز كتالوج. لأنو بعض ( الحناكيش ) و من لف لفهم لا يعرفون الطريقة المثلى لأكل التركين فهو يؤكل إما في الصباح الباكر ( حد أقصى الساعة 9 ص في الصيف و 10 ص في الشتاء ). و يحبذ معه شطة معطونة في ليمون و بصل أخضر و لو مافي بصل كسلا أو بصل البطانة الأبيض داك. أكل أي شيء حلو مباشرة بعد مصمصة الأصابع و عدم شرب الماء مباشرة بعد الأكل. شرب الماء بعد مرور 10 دقائق كحد أقصى. و يا حبذا لو كان ماءا من الزير .. مسح اليدين بالليمون حتى تذهب الريحة نهائيا. ثم الغسل بالصابون. كباية شاى بالزنجبيل أو القرفة أو النعناع. ثم و أنت جالس أرضاً تتكي على العنقريب مع إغفاءة بسيطة .. و يا حبذا لو أرخى الرجل طاقيته حتى منتصف جبهته .. و للمرأة ربط الطرحة بطريقة الفنان المصري ( كاريكا ). و هنيئا مريئا .. و محل ما يسري ...
04-08-2007, 06:35 AM
ابو جهينة
ابو جهينة
تاريخ التسجيل: 05-20-2003
مجموع المشاركات: 22492
Quote: بلاي يا ريس ألبعيــو طلع ( تركوازي ) برضو.. وانا أقول الزول ده كلما الاقيهو بيكون .. ( مغنطس ) كدا مالو..
من تغنطس فهو ( متتركن ) أو في قول آخر تركوازي.
Quote: الجمعة الفاتت .. حمد فتح الرحمن وهيثم وتنقو كانو معانا .. حمد وهيثم لما الواطه مغربت قعدو ( يتململو) .. وظهرت عليهم آثار الإدمان .. حمد قال لي ها يا شباب بعد كدا متخارجين .. قلت ليهو على وين ؟ قال لي والله ماشين .. الجماعة ديل جهزوا التركين في نفس اللحظة كنت معزوم نظام عشوة لطيفه كدا .. قلت ليهو طيب يا حمد ما تشوفني ياخ .. وحات الخــوة يا ريس .. قال لي كلام كان جمعتو مع بعض ما تطلع بيهو بي جملة واحده مفيدة .. لكن القدرت اعرفوا منو .. مالك ومال اسلحة الدمار الشامل مش احسن ليك جاتوهاتك وفطائرك الملفوفة والبرستيدج الماشي ليهو ..
..
Quote: بلاي من العام 2002 كلما ( امد قرعتي ) وإجتهد في تجويد اللغة مرة بالدنقلاوي ومرة بالمحسي ومرة بالحلفاوي .. ما لقيت لي واحد عبرني .. وجاب لي برطمانية صغيرة إن شاء الله للذكرى والتاريخ بس .. الدنقلاوي يكون صاحبك للطيش .. ويمشي يتعشى معاك .. واي حاجة يعمله معاك بلاي لما يرسلو ليهو التركين .. ينكرك زي الترتيب..
شوف يا علاء .. الحكاية إنو الدخول في عالم التركين زى الدخول في عالم ( عصابات المافيا ) .. عندها دساتير و تعهدات .. و الخروج من هذه المجموعة بتعتبر خيانة تستحق ( عقوبة أكل التركين في الثلاث وجبات ). لذا أملا الفورم و خش.
04-07-2007, 11:08 AM
ابو جهينة
ابو جهينة
تاريخ التسجيل: 05-20-2003
مجموع المشاركات: 22492
احذر شرب الماء أو المشروبات الغازية أو الكحولية بعد تناول الوجبة مباشرة وإلا سوف تظل (تشرب ما تروى) لبقية اليوم ويفضل شرب الماء بعد مرور نصف ساعة على الأقل (إن كنت لا تزال مستيقظا)
آكل التركين لا ينام .. و لكنه شيء أشبه بالنوم ( ما بين اليقظة و الأحلام ..) ألم تلاحظ أن آكل التركين و البصل تدلدل شفته السفلى ,, و عشان يرفعها .. يقوم يغرف من تحت الحجاب الحاجز ظنا منه أن لسانه قد وصل ذاك الحد .. يعاين للناس بعيونو ساكت .. و الكلام جواهو بحر بس ما قادر يطلعو ..
04-05-2007, 10:12 AM
ايوب عبدالرحيم
ايوب عبدالرحيم
تاريخ التسجيل: 10-10-2005
مجموع المشاركات: 1441
Quote: تصدق احنا لينا اكثر من 30 سنة لازم الفطور يوم الجمعة في البيت تركين
وتصدق حاجة اغرب : انا مابحب التركين ؟؟؟؟؟؟ ولا باكلو خالص
إنت بينطبق عليك المثل يا أيوب : ( ما بريدك و ما بحمل بلاك ) .. يعني التركين ما بتحبو .. لكنو ضروري جدا لإستكمال مزاج الوالدين .. عدم حب .. و في نفس الوقت ضرورة
كدة جربو يا أيوب مرة واحدة .. إما حتدعيلي أو حتدعي عليْ و أنا قابل بيهم الإتنين
04-05-2007, 10:20 AM
ماجدة عوض خوجلى
ماجدة عوض خوجلى
تاريخ التسجيل: 12-25-2006
مجموع المشاركات: 7279
Quote: و رغم عشقي اللا محمدود للتركين إلا أن ظرفاً قاهراً منعني من تلبية الدعوة .. و حزنت لثلاثة أمور :
انا برضو جابنى الاسم لانو محفور فى ذاكرتى وبحروف من نور انا بقى على العكس منك تمام بخاف منو وبمرض لوشفتو ساكت لانو عندى معاه تجربه مؤلمه للغايه اول مرة فى حياتى اخت يدى فى التركين واكلو كان بدعوة من حسن ساتى اناماعارفه هو جابو من وين لكن المهم انو عزمنا انا وكمال السر وشاديه حامد زوجته فى بيت شاديه وكمال انا حاولت افرفر بعتبار انى ماحصل اكلته لكن ماادانى اى فرصه عملو هو بنفسه وعمل معاه قراصه ويلا بعد بدا مسابقه لقمه منو اكبر بين حسن وكمال وبامانه الطريقه البياكلو بيها شجعتنى انا وشاديه نخش معاهم السياق ضربنا فيه لغايه ماحسيناانوروحنا هتطلع من نخرتنا انا ياالله ياالله قدرت اقوم من مكانى علشان اقعد فى اقرب كرسى وبمجرد قعادى فى الكرسى نمت نومه طويله جدا واول ماصحيت حسيت انى مورمه كلى وطوالى ضربو للاسعاف ولمن جو وشافو منظرى اخدونى للمستشفى وهناك تعالو شوفو الزرره العملوها لى وليهم اكلت شنو وين ولا كنت مسافرة فى افريقيا وجيت وبيقينا كده شكلنا معاهم كاننا جايين من الفضاء وكل شويه يعملو تحليل وماقادرين يعرفو الحاصل شنو والله قربو يختونى فى ديتنشن المهم ربكم رب الخير رحمنى بجيه دكتور سودانى بيعرف كمال قام طوالى اعترف ليه بالتركين بعدده اتعمل لى غسيل للمعدة وطبظونى حقنه يعنى بسبب الفطاسه و دناوتى مع التركين حصل ده كله عديل هسه عندى منه عقدة
04-09-2007, 07:30 AM
ابو جهينة
ابو جهينة
تاريخ التسجيل: 05-20-2003
مجموع المشاركات: 22492
التركين يا أختي العزيزة ممكن تشبيهه بعدة أشياء إستناداً لما حدث لك جراء التركين سيء السمعةة : فهو كماء الدش البارد في الشتاء .. أو ما ينزل على الجسم ليهو خوفة .. و بعدين عااااادي .. ( و كذلك التركين ) أول أكلة بيتعب الواحد .. و لكن تاني أكلة بتتعودي. أو هو كرشفة شاى ساخن .. يلسع اللسان .. ثم بعد ذلك يتعود اللسان بعد أن يتخدر من السخانة الأولى .. و ما دام قلتي :
Quote: انا برضو جابنى الاسم لانو محفور فى ذاكرتى وبحروف من نور
يبقى إذن ما إختلفنا .. مادام الإسم محفور بحروف من نور .. معنى ذلك أن عقلك الباطن ينتظر الجرعة الثانية بفروغ الصبر ... و منور الحتة عشان عارف التركين بيجي و يضلم البكان.
بت عمى عوض خوجلى تغمده الله برحمته الحصل ليك بعد اكلة التركين والبهدله دى الركين برىء منها والحكايه دى عين اصابتك ومايهمك اى تركين تلقى قدامك دوسيه طبعا بعد التحصين والاذكار اللازمه وكان عملتى حجاب سحرة التركين عديل بتكونى ريحتى نفسك وممكن ابوجهينه يساعدك فى الحصول على حجاب ابو جهينه ده بتاع كله زول مليان الله يحفظكم وفى امان الله
أنور الشيخ
04-06-2007, 00:01 AM
الفاتح يسن
الفاتح يسن
تاريخ التسجيل: 06-07-2003
مجموع المشاركات: 1060
يا ريس بوستك دا طاعم .. بس ما عارف التركين ح يكون طاعم زيو ولا لا عشان ما جربتو .. المهم التركين دا بذكرني إتفاقية البغط ليه ما عرف .. من الحكاوي زي ما قال تمبس حمد وهيثم ديل كل خميس يجو ناطين الرياض تسألهم وين إنتو ما جايننا نحن يقول لي آي آي وأنا عارف ما وراها أقوم أشاكله ليك وأقول ليهو تاني لما نجي الشرقية ما ح نجيكم ولا بنوريكم وشنا دا المهم يجي يتم باقي اليوم معانا ونحس بيهو يتململ أتاريهو لابدلو فوق رأي الحكاية فيها تركين وكده .. أها مره من الزعل قلت ليهو ياخي كرهتونا زاتو ياخي هسي كان ما عملتو لينا إتفاقية البغط دي حالنا يكون غير ودا كلو بسبب التركين ..
كل تركين وإنتو طيبين ..
04-10-2007, 08:15 AM
ابو جهينة
ابو جهينة
تاريخ التسجيل: 05-20-2003
مجموع المشاركات: 22492
Quote: يجي يتم باقي اليوم معانا ونحس بيهو يتململ أتاريهو لابدلو فوق رأي الحكاية فيها تركين وكده .. أها مره من الزعل قلت ليهو ياخي كرهتونا زاتو ياخي هسي كان ما عملتو لينا إتفاقية البغط دي حالنا يكون غير ودا كلو بسبب التركين ..
براءة التركين من إتفاقية البقط ( كبراءة الذئب من دم إبن يعقوب ) .. فالتركين هو الذي جعل أهلنا ( رماة حدق ) .. لأن من خصائص التركين أن يجعل حواسك تستيقظ فقط إذا طرأ طاريء ... أما في الأحوال العادية فإنه يفعل مفعول البنج
04-08-2007, 12:33 PM
حمد فتح الرحمن
حمد فتح الرحمن
تاريخ التسجيل: 06-01-2005
مجموع المشاركات: 1996
والله يا ابو جهينة انا لي زمن ازازي بهنااااك من بوستك بتاع التركين.. عمري ما جربت اكل التركين.. والسبب معرفتي بكيفية صناعته و(تكرفي) ريحتو العينة. كمان قصة ماجدة عوض دي طممت لي بطني منو شديد.. انا كنت زولة فسيخ بس لحدي قبل شوية.. والشوية دي بجيهابعد شوية.. انا من منطقة مشهورة باستغلال الخيرات البحرية في كسب العيش.. ومن بيها صناعة التركين والفسيخ التي اجتذبت اليها الرجال والنساء معا.. والله حقو الزول هسع يقوم ينزل فايل التركين دا ويشرح طريقة عملو والازيار الفاتحة والريحة الظربانية التي لم ينزل الله بها من ريحة شبيهة.. المهم استمتعوا باكل التركين دا.. لكن والله انتو ناس اسيا ما يلحقوكم في الشئ البتاكلوا فيهو دا ووالله كوليرا ما ظنيتها تنتحر وتهوب ناحية الواحد فيكم.. افتوني : انا في اتنين شهيرات ما جربتهن: التركين والكول ياتو فيهم الافظع؟ سبق وقلت اني من هواة اكل الفسيخ الذي لا يدخل في الثقافة الغذائية البسيطة لي.. فاكتشفت اليوم ان هناك انواع مغشوشة منه ايضا.. الرابط التالي: http://moheet.com
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة