سدر العين إتملاء بالعبره إتنهد نفس الكلمة المره إتاوه آه إنطفت القمره وحل ظلام

سدر العين إتملاء بالعبره إتنهد نفس الكلمة المره إتاوه آه إنطفت القمره وحل ظلام
* يا سر مكتوم * * سيف الدين محمد صالح * يا سر مكتوم في جوف أصداف فتشت عليك بقليب نزاف لا خبير يهدي لا دليل وصاف يا سر مكتوم في جوف أصداف راجياها الريح وكتين ما تطل على موجة تمرجح زهرة فل وتشيلا تروح .. والدنيا تنوح على قمراً مات في مطر الليل يتّم نجمات بكّاها السيل يا سر مكتوم في جوف أصداف الريح القاسية عنيدة تمام طفت القنديل الكان مقدوح من دمع الليل رمت القُنديل الكان نديان في جرف النيل رسمت أحزان وسؤال حيران في عيون أيتام يا عمر مكتوب في كف أقدار يا خطايا الطال بيها المشوار يا ليل مشتاق لي دفقة نور يا ظلمة تبكي سنا البلور يا موجة تعاند في التيار يا خطايا الطال بيها المشوار *** * سحابات الهموم * * عمر الطيب الدوش * سحابات الهموم يا ليل بكن بين السكات والقول وباقات النجوم الجن يعزن في المطر فاتن عزاك رجعن وشوق رؤياك مشدود على أكتاف خيول هجعن وصوت ذكراك مكان يجري يلاقي السيل وسر مدفون بصدر النيل ولولا الذكرى ما في أسف ولا كان التجني وقف وصوت ذكراك رزاز صفق على خطوات بنات سجعن وشوق رؤياك حنين لي رحلة في المجهول لو لا الذكرى ما في وصول ولو لا الذكرى ما في أصول ولو لا الذكرى ما في شجن *** * كان نفسي أقول لك من زمان * * صلاح حاج سعيد * كان نفسي أقول لك من زمان بالكاتمو في سري ومكتم في حشاي مدسوس سنين بالشايلو في عيني معزة وفي القلب ريداً يخاف الغربة والشوق والحنين زاملني زي خاطر الفرح وكتين يقاسم الهم عزا وكتين مشاعري تكون جزا وتفتح مباهج الليل ظنون كان نفسي أقول لك من زمان سطوة محاسنك عندي ما كسرة جفون وكت العيون تعبرني زي خاطر المسا سطوة محاسنك ما الرخام الفي الحرير وكت الثغير يفجعني بحرفاً قسا سطوة محاسنك عندي وكتين كبريائك ينهزم لطيبتي بي لفظة حنان وكتين مشاعرك تنسجم في عمري تنفح قلبي برعشة أمان سطوة محاسنك عندي وكتين شوقي يصبح في هواك للعزة ما بتعرف هوان كان نفسي أقول لك من زمان عينيك وحاتك غربتي وأهلي وبلادي الفيها ضايع لي زمن عينيك وحاتك شوقي لي زولاً ولوف من بعدو ساب عيني سهن وأنا كنت داير من زمان أشرح حكايتي معاك ألف أحكيها وأزيد القول ولف وأتمنى لو قلبك عرف كان من زمان من قبل ما في قلبي يتحكر زمان الفرقة في جرح الأسى ومن قبل ما حرف الحقيقة الحلوة يتبدل عسى وبصبح أماني كسيرة في خاطر الحنان كان نفسي أقول لك من زمان *** * لمحتك * * عبدالقادر الكتيابي * لمحتك .. قلت بر آمن بديت أحلم ألملم قدرتي الباقية وأشد ساعد على المجداف تلوح لي مدن عينيك وترفع لي منارة بسمتك سارية وبديت أحلم كل ما الريح تطارد الموج أزيد إصرار وأحلف بيك أغير سكة التيار وأقول يا إنتي يا أغرق ألوِّح لمدن عينيك تلوِّح لي أخاف الضفة ترجع بيك قبل ألحق أخاف غيم المنى الشايل تسوقو الريح ويتفرق وأشد ساعد على المجداف وأجيك بقدرتي الباقية حطام إنسان موسّم بشقا الدنيا ومقسم قلبو في الأحزان أجيك فنان أشد أوتاري وأحكيلك حكاية إنسان وهب لسكتك نفسو ورسم صورتك على حسو وربط ساعد على المجداف وقال يا إنتي .. يا أغرق أخاف غيم المنى الشايل تسوقو الريح ويتفرق وألاقيك يا أماني سراب مواهبي عليهو تتدفق *** * صفوة عاشقيك * * صلاح حاج سعيد* قلت ليها .. وإيدي في إيديها دمعة حزن سالت جاي منك وماشي ليك يا مداين غربة طالت لو مدارات نجمي ضلت وسكة السفر إستحالت كوني في دربي الحقيقة الديمة ليها مشاعري مالت قلت ليها وكنت راجع لي عينيها من أسى الزمن المسافر في المشاوير العصيبة من متاهات الأماسي الفي مداها الحزن مضناها وحبيبها بيني لا بينك مزار لا محطات إنتظار لا مواعيدك قريبة إنت يا الفرح الحقيقة المستحيل هدهدي الصبر الجميل وأمسحي الألم المخيم في المدارات الرحيبة قلت ليها الحقيقة الضايعة بين قلبي وعيونك إني لا قادر أفوتك لا أجيك إني ما عارف بدونك ابقى كلمة حـب تزف البشرى في ساعة مجيك وإنت عارفة وقلت ليك ياني أكتر زول بريدك وياني صفوة عاشقيك ياني أكتر زو ل بريدك ياني راكز الحيل عليك ياني أكتر زول بريدك ولسة بحبك متيم ومبتلي إلا ريدك زادني حيرة على العلي لا مراكب القدرة ختن قلبي عندك وإنتي لا قلبك نساني ولا خلي *** * الحاج ود عجبنا * * أحمد الفرجوني * عمنا الحاج ود عجبنا في الفريق ياهو الركيزة هو البشيل حمل الرباعة وعندو كلمة على الجماعة في الفريق باقيلنا تاية كل طيب وليهو غاية للضعيف تلقاهو ساند ويقهر الكعب المعاند للضيوف ديوانو فاتح ديل يقوموا وديل ينزلوا يا ولد جيب الرتاين جيهو الديوان و فرشو وأفرشوا الفرشة الكبيرة والأباريق والتباريق وأضبحو الحمل المدوعل عمنا الحاج ود عجبنا من سنين أيام جهلتو ديمة في دعوات صلاتو بسأل المولى السلامة وسترة الحال والكرامة وعمنا الحاج ود عجبنا في ليلة من ذات الليالي في زمن حظر التجول جاهو ضيف فوق راس حداشر رحب الحاج بيهو جداً فرشولو ونزلوهو وكاسو للعشا ما اتلقالو ما الرغيف ممحوق مقصر والبلد في حال معسر وعمنا الحاج في مبادئو وجبة الضيف زي فريضة وهسى ضاقت بي العريضة وضيفوا كيف يترك عشاهو ومن دي زايد إختشاهو وجاتو فكرة يمشي للفرن المجاور لي لجان العيش يشاور بس عشا الضيف يا جماعة ضيفي نازل ليهو ساعة شاكلوهو .. ودفروهو .. ونهروهو وجاتو دورية الطوارئ وأمسى بايت في الحراسة وناسو جنو للصباح ما عرفو حاجة وين دة روح ؟؟ وجاهم الخبر المؤكد ود عجبنا في الحراسة وماشي دورية الطوارئ ناسو .. أولادو .. وبناتو عرفوا حالو وبدري فاتو راحو محكمة الطواري فيها في نص الخلايق شافو حالاً ما هو لايق عمنا الحاج بي جلالو فوقو حس السوط يولول فوق قفاهو .. فوق زنودو فوق رجولو ومرة فوق فججاً حشايم إصلو ما قايل بهونن حتى كان نزلن هجايم إلا لكن الليالي يوم بترخص كل غالي حاكمو الولد المنصب كتفو بالدبور مقصب إنت يا حاج يا مخالف زول مخرف وعقلو تالف إنت يا زول ما كا داري ذلة الناس في الطواري أجلدوهو .. غرموهو ونفذوا الحكم البيهينو شان يفتح تاني عينو تسمع السوط ليهو خاوية فوق قفا الشيخ صيحتو داوية وفجأة رفع الحاج عيونو شاف بنات ولدو وبناتو كلهن واقفات يعاينن دمعتن في العين ترقرق وجعتن في الجوف تحرق والحزن ليهن مغرق دي النجوم الفي سماهن دا الزمان الكان حماهن كل سوط نازل عليهو زي شعاع الضو عماهن عمك الحاج دمعو سرّف سيلو فوق أشنابو سرب تم حكمو وراح بيوتو نفسو مكسورة وذليلة كيف ملاقاة الحليلة وصحوة الروح العليلة في البيوت الجوة غادي عمك الحاج ما إعتيادي فوقو متلمين جماعتو وثكيلي ضرب حزايني قالوا ناداهو المنادي فارق الدنيا المهينة يقطع الذلة وسنينا فوق فراش حاج ود عجبنا تسمع الزول البوصي أقفلو الحوش يا جماعة وطفو أنوار الرتاين داك حرس حظر التجول من بعيد ليكم بعاين يا زمن حظر التجول يا زمن حظر التجول . *** * طوريتك * * مصطفى سيد أحمد * * محمد المهدي عبدالوهاب * * صلاح حاج سعيد * حتى الفصول صابها الجفاف لا غيمة لا زفة هرع والسنبر البفرح صفيرو غشانا وإتقاطر رجع وشجرنا من لفح السموم غصنو الرقص رويان وقع لا شابا لي ريحة دعاش لا هش لي برقاً لمع طوريتك في الطين مرمية كوريتك يابسة ومجدوعة لا غيبتك كانت مرضية ولا فوتك كانت مبلوعة اللهب الضوّ الليل قناديل في عيون النجمة القطبية والتعب المدّ ضراع النيل سجادة فقرا مزاورية سائلين عنك يوماتي رحيل لموانئ المدن النفطية وشقيش ما تقبل يا ابو الحيل في قلوبنا مواجعك متكية وأبعت لك شال الحب مرسال تايهين في بحرو مراكبية وبكتب على صدر الموج آمال أطفال عمال ومزارعية كيف حال يا أبوي كيف حال يا خال بتمسي بيوتنا الكاكية حزنانة بتبكي ماآل الحال والزمن الساقكم إيدية طوريتك في الطين مرمية وكوريتك فاضية ومجدوعة *** * حاجة فيك * * هاشم صديق * حاجة فيك تقطع نفس خيل القصايد تشده أجراس المعابد توهتني .. عذبتني .. جننتني جننت حرف الكلام وبرضو أدتني السلام حاجة في شرف المداين وفي غرف كل السفاين جوة في عمق المناجم والعيون حاجة زي ما تكون محلق في العواصف وفجأة تهبط لي السكون حاجة زي نقر الأصابع لما ترتاح للموسيقى حاجة زي أخبار تناغم من جريدة حاجة زي وتر المواني لما يصدح لي سفينة حاجة فيك .. لا بتبدي .. لا بتنتهي خلتني أرجع للقلم وأتحدى بالحرف الألم وأضحك مع الزمن العريض وأنسف متاريس الطريق وأعرف متين أبقى المطر وأفهم متين أصبح حريق حاجة فيك *** * البت الحديقة * * خطاب حسن أحمد * حاتجي البت الحديقة فاردة أنسام في طريقا .. وشايلة ألوان حاتجي البحدث بريقا ضجة الضو في المكان حاتجي المن بدري جات من ضلامات السكات شايلة قمرين في عيونا وفاتحة ليلين بي جنونا ضاوية ساحات إنتمت لفجر فات وبتنتمي لعصور جديدة حاتجي البت البريدا ضاحكة منتصرة وعنيدة آمنة مزدهرة وجديدة ناقشة في الزول أغنيات حاتجي المن بدري جات ناسفة أزمان الثبات واصفة للناس الطريقة وللعصافير الجهات حاتجي البت الحديقة *** * أجراس العودة * * نزار قباني* * محمود درويش * بكيت حتى أنتهت الدموع صليت حتى أنطفت الشموع ركعت حتى ملني الركوع سالت فيك عن محمدٍ طلع البدر علينا من ثنيات الوداع وجب الشكر علينا ما دعى لله داع ايها المبعوث فينا جيتا بالأمر المطاع جبتا شرفت المدينة مرحباً يا خير داع سالت فيك عن محمدٍ وعن يسوع مهما هم تأخروا فإنهم يأتون من درب رام الله أو من جبل الزيتون يأتون كالرياح والأشجار والغصون يأتون في كلامنا يأتون في أصواتنا يأتون من دموع أمهاتنا في أعين الغالين من أمواتنا لكتهم يأتون يأتون .. مثل المن والسلوى من السماء ومن دمى الأطفال من أساور النساء يسكنون الصخر والأشجار والأشياء من حزننا الكبير ينبتون ومن شقوق الصخر يولدون باقة أنبياء ليست لهم هوية ليست لهم أسماء لكنهم يأتون *** * الشجن الأليم * * صلاح حاج سعيد* ببقى بعدك في الأسى وتبقى إنت الظالم القاسي النسى وغصب عني أزيح ظنوني وأقول عليك إنت المسامح فوق شجوني أعيش زمان بالفرقة جارح في احتمالي وبالي أنك وانت سايق فيني ظنك رغم أنك انت عارف انو منك لا الزمن يقدر يحوّل قلبي عنك لا الماسفة ولا الخيال يشغلني عنك عارفني منك لا الزمن بقدر يحول قلبي عنك لا المسافة ولا الخيال يشغلني منك عارفني منك .. تحرمني منك .. والمواعيد لا بتجيب منك تودي لا الشجن قادر يجيبني عليك أعدي لا رسالة تجيني منك لا خبر طمني عنك وإنت سايق فيني ظنك رغم إنك إنت عارف إنو منك لا الزمن يقدر يحول قلبي عنك لا المسافة ولا الخيال يشغلني عنك يا هوى الألم النعيم خليك على الوعد القديم وخليني في الشجن الأليم وابقى في كل المداين سكتي وسفري الجحيم تبقى إيه الدنيا من بعد تكون وأبقى إيه بعدك أكون في إحتمالي وبالي .. إنك إنت سايق فيني ظنك لا رسالة تجيني منك .. و لاخبر طمني عنك وإنت سايق فيني ظنك *** * يا ضـلنــا * * يحي فضل الله * يا ضلنا المرسوم على رمل المسافة وشاكي من طول الطريق قول للبنية الخايفة من نار الحروف تحرق بويتات الفريق قول ليها ما تتخوفي دي النسمة بتجيب الأمل والأمل بصبح رفيق والأصلو في الجوف إندفن لا بتنسي .. لا بنمحي لا بنتهي منو الحريق والفينا من آهات أليمة في حكاوينا القديمة لا بيرحل من عيونا ..لا بتغشاهو الهزيمة والقبيل راجينو نحنا .. يوم تبشر بيهو غيمة لما تمطر يوم علينا .. الفرح يملا المدينة والبلودات الحزينة يا ضلنـــــــــــــا *** * رعشة شوق * * محجوب الحاج * مرة بقصد أحكي عنك وقولي من طابعو الإشارة شوفي ديك القمرة بانت والنجوم حاطت مدارها غيبوا إتلاشو في عيونا وغوصوا في أعماق بحارا وأبقوا أعرفوا من صفاها كيف صبحت أسير هواها وراسي في أبعاد قرارا إلا لو مرات سرحت وقمت لمحت وقروني وعرفوا كل البينا عامرة أصلو باين في عيوني أعرف إنو بحسن نية باحت الأعين شوية أفشو للسر وغافلوني وإتعرف ريدك متاعي وإنو فكري وإقتناعي والسعادة الضالة كوني وبسألك يا ذاتي عنك والبراءة الفي عيونك والرزانة الفي انفعالك والضجيج الفي سكوتك إنتي أبعد من خيالي ورعشة الشوق في سؤالي بتحكي عن إبداع محاسنك وعفة الطبع البصونك *** * الزمن الفلاني * * نجاة عثمان * لمن يجي الزمن الفلاني سمانا بتقطر مطر دري وتمازج برتكاني نسطر إسمك يا حبيبنا في رموش غيم أرجواني ندمن الضحك المعافى نحيا في الفرح المورد ياسميني وأقحواني يا حبيبنا جوة عينيك عايشة ناس بتسجل الأيام أغاني والطريق ما ببقى ساهل ليك بالمعنى المكاني لما يتحقق زماني بمسح الحزن المعشعش في عيونك أسمراني يا حبيبنا بتحيا في حلم الترابلة والعلاقات المعاني وفي البقاسي شقا المسافة وعايشة في داخلو ... وبعاني لما يتحقق زماني بشرق الفجر الحقيقة والصباح الأبيضاني *** * أظنك عرفتي * * جمال حسن سعيد * أظنك عرفتي .. عواصفك مهبي أباري في خيالك .. يسوقني ويودي ونهرك يعدي .. ويجهل مصبي هواجسي البتزرع .. وظني البيربي هديتك خواطر .. بتصحى وتساور وطيفك يزاور .. وروحك تحاور تجيبني في زمانك .. موشح أساور أقول بس نسيتك .. وجرحك يتاور أظنك عرفتي عذاب المغني .. وطبلو المجدع .. شظايا التمني حروفو البتجزع .. في لحظة تجني خطاهو البتهرع .. متين تطمئني مسرج خيالك .. حصاني القبيل معربد غبارو .. وخلا الصهيل مسافر مسافر .. وفاقد دليل أظنك عرفتي .. هموم الرحيل *** ( تعالي نعلم الشفع ) * يحي فضل الله * حبالنا الجوة ما تخنت حبال السما الممدود حبال الصوت وكت يرجع يجيب الخاطر المردود تعالي نشوف غنيواتنا البقت في الدنيا ما بتشوف تعالي نشوف حروف البكا الجواها مافي حروف تعالي نشوف .. تعالي نطوف على المدن البقت أشباح على الجوع القعد مرتاح على الكلمة البقت في الجوف تفتش سكة الأفراح منو البقدر يخاصم طفلة .. صبحت هازلة فوق مد الأسى الحراق يا غنوتنا ما تفوتي يا كلمتنا ما تموتي وفتشي فوق ضمير الكلمة عن وتراً رحل فراق وعن بلداً رحل فراق وعن ولداً رحل فراق وعن علماً رحل فراق غنانا الفينا ما بشفع حديثنا الجوة ما بنفع تعالي نشوف تعالي نطوف تعالي نعلم الشفع تعالي نعلم اليفع ( جمعنا قدر ) تقول لي الفراق مكتوب وزي أول جمعنا قدر وترحل يا حبيب العين تخلي صباحي ليل وسهر أقاسمك في سفر بالروح سعيد إنت وشقاني سفر لما كتمت دمع الشوق بكيت من غير دموع أكتر زمان ماكنت قايلك أنا ربيعك منو تحرمني وألاقي الليل طويل عمرو وعمري الباقي من حزني طريتك قلبو علمتو عشان ما أنسى علمني لا كان الفراق منك ولا يا روحي كان مني وتقول لي الفراق مكتوب زي أول جمعنا قدر وترحل يا حبيب العين تخلي صباحي ليل وسهر ( غدار دموعك ) * مصطفى سيدأحمد المقبول * لا تنبش الماضي البعيد ألم تكن يـومـاً لـقـلـبي واقعــــــاً مجهولا لا تنكئ الجرح القديم فإنني ودعــتُ ليــــلاً مظلماً وثقيلا وحملت روحي في فؤادٍ نازفٍ ما زال يحمل نصفه مشلولا وخلعت أثواب الحداد أما كفى إذ صار قلبك في الهوى ضليلا فالليل ينزل في الدروب مباطلا حـتــى يجرجر ثوبه مخزولا والبدر يبسم للغدير تألقاً ومداه يضمر حلكةً وأفولا وكذا الشباب وإن كساك جماله يـومــاً سيلبس صفـــرةً وذبولا هفوات روحي فيك أنت قتلتها مـن سـاذج بغــروره مشغولا وأنا الذي مني ملكتَ حُشاشتي فغــدوتُ أرقب بارقاً مأمولا عذراً لشعري إن تفجر مرةً قـد كـان قـلبـــاً بـابــه مقفولا من كل قلبي أن أراك مسعداً وجرح قلبك في الهوى مدمولا أما فؤادي فقد أسوت جراحه بالكبرياء وإن صبرتُ طويلا الماء إن أخرجت منه شعيرةً هـل يستجيب بوجهه مصقولا غدار دموعك ما بتفيد في زول حواسو اتحجرت جرّب معاك كل السبل إيديهو ليك ما قصرت حطمت في قلبو الأمل كل الأماني الخدرت كلماتو ليك ضاعت عبث لاقدمت لا أخرت ما كنا وكت الليل يطول تشرق نجومو وتنكتم ... ويطل شعاع يكسر قناع والظلمة ترحل تنهزم ... وجفونا من طول السهر تلبس وشاح حرقة وألم نستبشر اليوم الجديد ونقول تعود إنت العشم كيف العشم وكتين يموت والغصة تطعن في الحلق كيف الحنين وكتين يهل لي زول بعيد ما بتلحق كيف الرجوع لي زول قنع شايل رفات قلبو الحرق سيب الندم وأنسى الدموع ما فات زمان ما بتلحق غدار دموعك ما بتفيد في ظلمة ما بتعرف شعاع أشباحها زي موج العدم كسر المجاديف والقلاع ونزلنا في طوف الفشل وأبحرنا في بحر الضياع ونسينا ذكراك الزمان عشناها في زيف القناع ( السمحة ) * المقبول سيد أحمد المقبول * السمحة قالوا مرحلة بعدك الفريق أصبح خلا جاني الخبر جاني البلا والسمحة قالوا مرحلة قول يا لسان في الراحلة صوغ المعاني وجملها نافر وما عارف العلي .. حالي العلي حال الخلا يا عيني جافيتي المنام وخدودي دمعك بللا وين بعدك ألقى عطوف يلم أفكاري بعد البهدلة روح يا نسيم روح قابلا تلقاها نايمة وغافلة داعب لي خصلات شعرها وألثم ضفايراً مسدلة وأرفع كتيفها الهادلا وبلل خدودها وقبلا وقول ليها من بعدك خلاص شفت الفريق أصبح خلا ويا ربي لحظات الوداع أمثالي كيف يتحملا الليلة بوصيك يا الحبيب عندك أمانة تحملا وتدوم على الخير والهناء وكل يوم تضاعفلو الحلا قلبي الحنين من قام صغير طول عمره لا جفا لا سلا ( طيبة ) * محمد الحسن سالم حميد * كل ما تباعد بينا عوارض كلما هواك يا طيبة مكني تلد الغربة القرب الواحد بيك أسمي الشوق وأكني لما أفوتك من دون خاطر أو دون خاطر مني تفوتي بلقى حبايب في كل حتة وكل بيوت الفقرا بيوتي لا غيرت وراك الجتة لا بدلت ملامح صوتي لاغافلني وهادن فني غامل المدن الما عرفتني تبن الشوق الصبرو مصوبر للأرياف الكم وفتني وللأطفال الناشفة ضلوعا ونازفة بغني أطمن روعها وأهدّي دموعها بي بسمة بكرة اللاها تمني ولا مصنوعة أغني لشعبي ومين يمنعني أغني لقلبي إذا لوعني مخير دربي الما رجعني إذا طلعني نخلة القرب ولا الغربة الكدروبية تنزل غنوتي بي قمرية أو وقعني في بطن الجب بطلع يوسف بالأغنية أغني الناس الما بتسمعني المنى بعيدة .. المبعدة عني النادى نشيدها .. وكنت المعني الإيدي في إيدا .. وإيدها بتبنى في دنيا جديدة .. اليوم راح تدني وأريت غنواتي في ناس شغالة تكون سندالة وعود طورية ضراع رجالة .. كتاب أطفالها وجملة فالا .. الما مكرية بَقة فالا .. وسدة مالا في ليلة الدخلة على أسمى قضية حبيبة قلبي يا سودانية يا أسمى معاني .. في زول بيعاني يا ود ضكران .. يا بت دغرية وأنا إن سامعاني فضلت أغاني غبش فقرية وروح غانياني حويتك مني يا دافعاني براحة إيديا كما الأشواق ويا جابداني برفق عليا وما بتحير بين الفوق .. وبين الناس التحتانية إلا مغير ولا عقوق ولا كفيف الإنسانية ومنك وين يا كاشفة عيني بنور الإلفة ضيا الحنية وحلم العالم ناس تتسالم والبني آدم صافي النية والأطفال الناشفة ضلوعها أطمن روعها .. وتبدأ تغني غناوي البكرة .. الكم مسموعة حسيس طمبارة .. مع نقارة صفِقةً حارة .. ودارة تغني فيا حلتنا عليك ترابك وإنت شبابك زينة الجنة أحلى عروس البلد اللتنا والا الغبش الرابة تهني والا هدير المدن التصحى وتمحى ظلام الحاصل عني ( علمي عيوني السفر ) * مصطفي سيد أحمد * * مدني النخلي * علمي عيوني السفر ما البسافر في عيونك سكته بتبقى السلامة بنسى أحزانه ويعرف الدنيا جـنبك إبتسامة ضللي الناس بي حنانك أبقي ليهم ضل غمامة الشقا اللازمني مدة يوم يفوت الفرحة تبدأ ما بقول فارقني عدا عشان بخاف ترحل عيونك وتنهزم فيني الأماني وبي أساهو وبي شقاهو تاني إتوشح زماني أصله غيرعينيك وحاتك ما في للأفراح معاني جينا ليك شوق في عيونا وفي عيونك شوق يناغم الشجون باكر بترحل والزمن يصحى ويسالم الحلم يصبح حقيقة وتنسجم في الحب ظروفه والحنين تزهر غصونه والعشم دانيات قطوفه شوفي كيف يوم بكرة عامر هاتي إيديك شان نشوفه ( حليوة ليلة المولد ) * محمد طه القدال * بقول غنوات وأقول غنوات في البلد البسير جنياتها لي قدام ولي الولد البتل ضرعاتو في العرضة ويطير في الدارة صقرية ولو السمحة تلت إيد .. ومدت جيد يقوم شايلاهو هاشمية ويشيل شبالو ختفة ريد .. وفرحة عيد وريدة روح .. وحمرة عين .. وإيدية ويالولد البشيل مدقاقو قولة خير على القمرة يقابل الجاية متحزم يدارك الجاية متلزم كلام فاسك على أرضك يبقى عديلة يا بيضا ويبقى زفاف تزغرد ليه قمرية وقبال حول تغيم غيمة قبلية ترش الدارة والحدبة الصعيد الحلة ويافرحة مضارب الصفقة في النسمة الصعيدية ويا جهرة نهار الليلة بدرية فحيح جنياتنا في الحدبة الصعيد الحلة يا سمحاتنا .. هو لبلب يا قمحاتنا .. هو لبلب ويا اللوز الفتق في الوادي .. هو لبلب ويا سمحاتنا .. هو لبلب ويا البحر الطمح مدادي .. هو لبلب سألتك بالذي ركز الأرض معبد وسوى الفاس عليها مقام سألتك بي حشا الأمات .. ودمعاتنا سألتك بي كبيداتن .. ودعواتنا شليل وين راح يكون ضل الخريف فاتنا شليل وين راح وزي برق السماك الجاتنا دغشية وزي زغرودة البطن الكبارية مرق من شامة القمرة مهيتـق بي وداعة الله ومقدم بالعديل يبرا تعالوا تعالوا أبشروا آآ جنيات شليل ما راح .. شليل ما فات شليل عند المسورو حِرق .. .. بقالوا حصاد شليل فوق التقانت قام خدار وبلاد شليل مسدار .. شليل مشوار شليلنا أرضنا يا جنيات شليل قايم نصاصي الليل يتمتم ليلو وردية حرازنا شليل .. شليلنا دليب شليلنا دليل على البلدات بعد درب التبلدية شليل ما راح .. شليل ما فات شليلنا ونحن همابتة ومهاجرية مزارع بات على عشقين تراب بلدو وسماح فوق بت .. مزارعية ( حلوة عينيك ) * بشرى الفاضل * نفسي في داخلك أعاين أروي روحي وأشوف منابعك الصحرة في عيني تتوثب جناين ماخدة صوتك من جداول وماخدة صورتك من كهارب مولداً ميدانه حافل كل ما يصبح تجيه الناس جحافل يا سلام .. لما تعبري في الشوارع شوفي كيف الناس تصارع ناس تطفر .. ناس تدفر في البشابي على نجومك وفي البخب كايس تخومك وكل زول من عن سلافك لالا قال دايرلو كاس مرة طربان شلت صوتك شان أغني وقلت آه يا ليل .. وآه إنتي أول .. وإنتي تاني .. وإنتي تالت .. وإنتي رابع نافرة زي صيد الخلا وساقية زي نبع المنابع وقلتي لي غناي خلاص يا سلام .. حلوة عينيك زي صحابي عنيدة كيف تشبه شريحتين من شبابي وزي عنب طول معتق في الخوابي وسمحة زي ما تقول ضيوفاً دقوا بابي فرحي بيهم سال ملا حتى الكبابي يا سلام .. يا سلام ( قمر الزمان ) * صلاح حاج سعيد * كتبت ليك لا بيني بينك ريدة لاقصة غرام إخترت ليك أجمل حروف وأصدق فواصل نادرة في لغة الكلام لاقصدي ألهو معاكي بي كلمات غناي لا شعري ليك مرجيحة من شعر الغمام كتبت ليك والله يا قمر الزمان شان جيتي بي زمن المحنة وشفت في عينيك حس أهلي القدام كتبت ليك وأنا جاي من زمن الشقا المرسوم على وش الثواني مظللها تتمدد الساعات سنين تتفتح الأحزان غريبة ومذهلة وأشتاق أفتش نسمة في الزمن العذاب وأيامي من كتر الأسى وكتر العزوف والإغتراب صارت حروف مترهلة لحظات أسيفة ومهملة كتبت ليك ووقفت ليك لمن لقيتك جاية من قلب الطريق ولمحت فيك راحة المشاوير البعيدة ونفحة النسمة الحبيبة الجاية من جوف المضيق حسيت عجايب الدنيا إتلمت بقت جاياني من عصراً سحيق عينيك حس أطفال بنادو القمرة للغايب يعود وجبينك الضواي حجا الحبوبة في الزمن السعيد يا قمرة أقلبي السنسنة الحمراء شوفي شليلنا ليه ما جا وأنا في قساوة الموحش الزمن المكهرب بالحريق أنا حيلتي أيه قولي لي يا قمر الزمان غير أتكي وأحلم معاك وأحضن أماسي الصحو والأمل البريق ( علي بابك ) * عبدالقادر الكتيابي * على بابك نهارات الصبر واقفات بداية الدنيا هن واقفات وكم ولهان وكم طائر بعد ركب جناحو وراك لملم حر ندامتو وفات قطع شامة هواك من قلبو إلا هواك نبت تاني وعلى بابك وقف تاني غمايم شاقي غصن الليل مسافر فيها وحداني بدون جنحين يغنيك الهنا المافي ويغنيلك رهافة حسه يفني على جديد آماله يحلم بالشتاء الدافئ وقدر ما يمشي في سور الزمن خطوات يلاقي خطا السنين واقفات يلاقي هواك نبت تاني على بابك وقف تاني .. وملا الساحات ( يا بت يا نيل ) * مصطفى سيد أحمد * رسمت في وجيها بسيمة ضوء بتغالط في الزمن القاسي وتعاتب في الغنوة الصعبة وفي لحن حزين .. ووتر موجوع يحكي إحساسي تسـأل عن شدو الأفراح يمكن بجراحنا يكون آسي ما بشبع روحنا فرح زايف لو كان تتناسى وتتناسى يا بت يا نيل العاشقك عاشق كل الفيك غنايك في كل ظروفك في الفرح البدفق وعد وفال والحزن الودر ضي شوفك في سجون القهرك في خوفك في النبض الصامد .. في البركان السامعو يدمدم في جوفك جرّحنا عتابك يا باكية وعايزانا نغني غني الأفراح ما الغنوة الناشفة لبن ضرعك والفرح الفيك خلانا وراح ولقينا فرحنا وإنتي حزينة بكون أشتر ويزيدنا جراح خلينا من الفرح الزايف بتعود أفراحنا وتلقى براح ( الرحيل في الليل ) * عبدالرحيم أبو الذكرى * أيها الراحل في الليل وحيدا ضائعاً منفردا أمس زارتني بواكير الخريف غسلتني بالثلوج وبإشراق المروج حين عادتني بواكير الخريف كان صيفي جامدا وجبيني باردا وسكوتي ضائعاً بين البيوت الخشبية ناثراً حيرته في الشجر وغروب الأنهر وانحسار البصر لوحت لي ساعةً حين انصرفنا ساعةً حين انصرفنا ثم عادتني بواكير الخريف حين عادت ... هجم الريح على أشرعتي المنفعلة سطعت شمس الفراديس على أروقتي المنعزلة وغدت تحضنني شمسٌ ندية التي ما حضنتني والتي ما عانقتني في الزمان الأول في الزمان الغارب المرتحل إنتظرني في الدهاليز القصيات .. إنتظرني في العتامير وفي البحر .. إنتظرني إنتظرني .. في حفيف الأجنحة وسماوات الطيور النازحة حين تنهد المدارات وتسوّد سماء البارحة ( إذا عادت بنا الأيام ) * عوض مالك * إذا عادت بنا الأيام .. للماضي كتبت على ثواني العمر شعراً لا يدانيه .. غناء الطير ..وهمس الماء ووشوشة الضياء فيه ركبت زوارقي أبحرت في شعرٍ لها مجدول جعلت مشاعري جندول إذا عادت بنا الأيام يوماً أيها الأحباب ولو في زورقٍ يمضي على الصحراء عبر سراب أنا ملاحه الفرحان يطرق مغلق الأبواب أدق ليس يعنيني لأني قادمٌ من حاضر اللحظات .. للماضي ولي شوقٌ سيشعل صمت هذا الزورق الهادي فيدفعه إلى الوادي إلى أفقٍ أنيق النجم .. صداح البساتين وأشدو حين تأتيني فتاة لثغة العصفور أنفاس الرياحين .. بكفيها ولي في عمق هدبيها حكايات وأشعار ولي في شعرها المعطار أخبار إذا سالت على ودينها الخضراء أمطار ( سافر ) * قاسم أبو زيد * سافـــــــــــــــــــــــر .. مطارات الوداع ضجت قدامك وارك .. بيضاء وسماك غناي مساحات الأسى الفي عيونا تتفجر مدينة وناي بطاقات دعوة الرجعة تساب عينين من الفرحة دموع في للحاضرين فجت زغاريد غطت الدنيا وعاد فرح الرجوع منية صداك الريف ومن السنبل الغناي كتير بنعاتب الحاضر ولا أسفاً على الماضي وصدق الرؤيا من قلبك بين الشوق وإنسالت نغم فنان يعيش راضي مداك إتعدى حد الشوف مرقت على الشعر إنسان هواك إتخت جوة الجوف وإنتحر النهار هسة نغنيك لمدن شاخت معاك أحلامي ما تنسى تغنيك القرى الراحت خلاص يا غربة ما ترسى غنيناك وبنغني وبتحدى الزمن فنان ( أسئلة ليست للإجابة ) * يحي فضل الله * ما معنى أن نحيا ولا ندرِ بأن العشق قد يبقى سجيناً في الخلايا ؟ ما معنى أن نشهد موات الأغنيات ؟ ما معنى هذا الصمت الذي لا ينتهي وبرغم حوجتنا الصراخ ؟ هل يختفي الظل الذي لا ينتمي إلا لمعرفتي وجهلي ؟ وهل نودع بعضنا ثم نذهب في سراب الذكريات ؟ كيف تبدو الذكريات ؟ كيف يبدو طعم أيام الشجن ؟ من يعلم ذكرياتي كل أشكال التداعي والرحيل المر دوماً حين يصطدم المدى بالمآسي والمخاوف .. واحتضار الأمنيات ؟ تعبٌ هو البرق الذي لا يضئ أقبية الخفايا لا ينتمي للسحب والعشب الذي لا يرتوي إلا بطعمك يا عصيراً من خليط الدهشة الأولى وأحترافي الأغنيات ( يا سلام عليك ) * عبدالوهاب هلاوي * لومني مستني الملام يا سلام عليك يا سلام يا حلو دا السكوت مرات كلام وعدم الملام .. هو كمان ملام يا سلام عليك يا سلام أنا يا غرامي وصلت بيك في الدنيا لي حد الغرام ولقيت ملامي على عينيك يا سيدي زي الما ملام الوردة لو فاتا الفراش ما أظن تلومو مع الندى وما بتجرح إحساسو الجميل والريدة يا حنين كدة يا سلام عليك يا سلام ( شيل حقايبك ) * بشرى الفاضل * الجبال قالت غروب لا المزامير راح تغني ولا الفجايع راح تدوب الحزن غطى المسالك والدروب ما في غير تلكع تسافر شيل حقايبك وأمشي بينات الشعوب وينك الوحشة بتزازيك ... يا صباح مسخوا الليل بي مزازيك ... كالنباح مافي غير تسرح تسافر وينك الصحرا .. بتحجيك .. بأم بعلو الشجر فارد يباسو وضامي ضلو السموم تتحمىتشويك والعقارب حتى كان غطيت وشيك إيدك المنحولة ما بتكفيهو كلو في الضلام حيران وحيد من غير جناح غنت القمرية في قلبي الخلي قوقي قوقي ليش تكون يا ليل صباح قلت نان كيفن نسوي وصرخت فيك .. يا مسيكين شيل سلاحك أرضي أرضي وجوي جوي ( يا بكرة ) * يحي فضل الله * مساماتك بتشقق عشان تشرق صباحاتك صباحاتك بتتعانق مع الفكرة وتاخد من جراحاتك نضيف إحساسنا لي بكرة يا بكرة .. يا بكرة يا بكرة الغصن ناشف يا بكرة الفرح يوماتي بكاتل حزن أطفال بتتشابى عشان تعرف شنو الفي إيدنا لي بكرة شنو الداخرنو للسكة عشان تشرق صباحاتك عشان تقصر مسافاتك عشان تبرق غماماتك عشان تخضر مساحاتك عشان بكرة وبعد بكرة ( هردت لهاتي ) * محمد الحسن سالم حميد * سني علىالنضال إيدي سوكي بالهتاف فمي شوراعك لي دويها علي إذا ما آخر العلاج الكي مراويدك حمر حمي هردت لهاتي بالغنوات وقت يبرد حشاك يمي من التعب البلا صالح تفيقي تروقي تنجمي تسوي مكانسك المطرة تضوي البيت وتنحمي تمرقي صبوحة للجيران قدح في إيد وفي إيد ألمي يلاقوك شفع الكتاب نضاف وظراف بلا النسمي يغنولك غناوي الساب وفي بيوضة مافي سراب جبال كجبي ..وفيافي الكاب تميد بالخضرة منقسمي فيافي الصي وبيوضة البراسيم فيها مفروضة خدار يراري شوف عيني .. على الأبواب قماريها وطواريها وحواريها بقت روضة بقت تشرب من الحامداب تشوفي رهاب بعد نجمي وأشوفو قريب قرب نضمي أشوف العالم التحتاني .. هيلا هوب وقف ناهض هد عمايد الفوقاني .. جوة الجب رمى العارض وفي السابو الدمارة فراق .. عريق الحب نبض قابض متل قبض الحروف في إسمي وغناوينا القبيل رقراق علينا تصب برد قارس وأجر نمي وادودي لهاتي بالغنوات عقب يبرد حشاك يمة وطني ولا ملي بطني سكاتي ولا الكلام الني بليلتي ولاضبايح طي قليلتي ولا كتر سمي سلام ياامي .. سلام يا امي سلام لا هكمي لا دكمي

[رد على الموضوع]

صفحة 1 „‰ 1: << 1 >>

احدث عناوين سودانيز اون لاين الان

اراء حرة و مقالات	Latest Posts in English Forum
Articles and Views	اخر المواضيع فى المنبر العام
News and Press Releases	اخبار و بيانات

الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة

About Us
Contact Us
About Sudanese Online

اخبار و بيانات
اراء حرة و مقالات
صور سودانيزاونلاين
فيديوهات سودانيزاونلاين
ويكيبيديا سودانيز اون لاين
منتديات سودانيزاونلاين

News and Press Releases
Articles and Views
SudaneseOnline Images
Sudanese Online Videos
Sudanese Online Wikipedia
Sudanese Online Forums

If you're looking to submit News,Video,a Press Release or or Article please feel free to send it to [email protected]