|
|
 كل الطيور تدري ..البومه والقمري..اللسع موجودة والهاجرت بدري....<تأبين مصطفي >
|
كنت معانا تشيل وتخت
ترص وتقص
تفج السهلة وتحكي
الغنوة اللسع بصوتك وشالت حسك
وصوتك ونفسك وروحك وصبحت ذي..
انت معانا بقيت جوانا
وماك بتفوت
حتلت حنينا جوه القلب
رسمت عليهو جود موجود
برغم الموت وسفر الجسد الما محدود غلبت تفوت
كسرت الحاجز الراكن جذور علي المسجود
رقعت الهدم الراسي خيوطو على المقدود
مسحت مسحت البعد الارضي الما محدود
نسفت مسافة الزمن الروح وما معدود
سكنت مسامة النغمة المن ايقاع الرب
بقيت الدم والروح والقلب هزمت الموت غلبت تفوت
تفوت بي وين انت الزول الباقي وحي
انت النور الوجب ضي وانت البحر الدفق ري
تفوت على وين ونحن زرعنا لسع ني
كيف بتفوت وديمه نحسك ترشرش فوق واطاتنا الحب
وباقي علينا الضرا والضل
يا الفكيت جوانا عيون النيل والليل
ياالغيبت احساسنا وغبنا عديل
كتلت الحيل هديت الروح بالحيل بالحيل
طفرت دمعة وبلت عين الشمس
سالت رسمت شلخا فوق الافق
ساحت سوت شرخا بين النجم
خرت كرت شرت حبل النار
اتعلق فينا ونقط طق طق طق
نور القمره وضي الشمس اتقلدن
وبين احضانٍ انشلعنا برقا رج قلبنا
ومحا براق الشوق
سكناً هزاً ود العين إضارى وراهو الخوف
كبكب دمعو واوقد جمرو
وردحن سواً هو
النيل الابيض لاقى وعانق حضن الأزرق
بات الأبيض خد الزنجي
إتقلدوا إتوحدوا وفاتو
مات العنصر ذاب الفارس من بيناتم
وجنو وماتو بنات الحور اجيضن إرجن متل النور
لمن ناس النيل بي جوا اتعصرن قعدن فوق واطاتو
وفرشو برشاً على موجاتو
اتقالد سمكو وعزة وناح تمساحو واتهزت شعرة جلدو
وشال ونزلت دمعتو تف
سدر العين اتملأ بالعبره
اتنهد نفس الكلمة المرة
إتاوه آآه فانطفت القمره ونفخت قل الجمرة
واتملا فينا ظلام
يا انسان يا فنان يا القاومت الذاكرة والنسيان
دخلت بي وين سكنت الدم الجاري على الشريان
لوليت جوانا اصالة الكلمة الشرف العز
العائش فينا في كل زمان
جرجرت علينا حروف النغمة الطرب يهز يفرح كل مكان
ختيت الراي صريح قولاً وفعلاً وفكراً
سجل اكتب يا تاريخ
يا استاذ يا ممتاز
ختيت الدرس مفيد وصريح
درساً ما دايرلو وسائلاً للتوضيح
ونحن فهمنا كتبنا درسنا على الكراس
انتهت الحصة وناحن سكلبن الأجراس
مرقت صحيح
مرقت بني وين
وكيف خليتنا بدون تصحيح
نصحح وين شلنا الهم
نصحح وين جينا الكم
نصحح وين وكل أقلامنا تقطر دم
كمل الأحمر دفق لونها فحم
ونحن كبرنا وعينا وذدنا فهم
عرفنا أهداف الدرس تمام
ختينا النقطة الشوله الهمزة الاستفهام
خلصنا خلاص جمعنا كتبنا مع الكراس
يا الوحدت بسفرك كل الناس
يا مقياس ويا ميراث وأساس
المعنى الحب المبدأ والإحساس
نِعم الإرث الباقي وأعظم ساس
يا موجود بيناتنا ماك مفقود
جرب فوت وأغشى مدنا بيوت وبيوت
تسمعو صوتك شق بيوت
تشوف الصورة عيان وشهود
مسجل اسمك وماك بتفوت
وكيف بتفوت
افتش ليك انا جاي بي جاي
أهلك وناسك مرقو يكوسو عليك معاي
وأنا ادعو ليك ارتع لي
تفوت بي وشك
ارجع جاي
وفجأة بتطلع من جواي
متل النور الضوا حداي
وموج النيل الرايح جاي
وهج العين الفكر الرأي
زمن الشمس بريق ضواي
وصدر ألام الليك غطاي
حديثها يناغم
فيك لولاي
وصوتها يهدهد فيك هداي
هوها يا هوهها واحد تنين تلاته
ابرتي الخياطة فيها ما وفيها صاء
وفيها طا وفيها جميع المصطفى
سلبت الدرب القابض فينا ولي جوانا
ركزت الباب وسندتو وما ليك منو تاني مروق
البد جوه الكبد اتوسد فيهو عروق
اشرب من شريان الروح الما ممحوق
اشرب واروى وماك مريوق
مد كئرعينك فوق لحظات القلب اتمهل
اغمض عينك أرقد فوق النبض الشهل
وشال القمه وطعم ريقو مقود اتسايل سكر وعسلاً
نقط فوق في خشيمو
شرقو وعشرق
كح اتنحنح
جنو بنات الحور
تاكن حنكو رفعن وشو
ونفخن نسمه فوق في جبينو
خمخم نفسو
اتردت روحو
وقف القلب اتنفض قام بي توبو
اتلفح مرق اتلقى الضيف
المن الروح مقطوع
فرحان بيك يرحب بيك
اهلاً بيك يا مرحب
رشرش ليك واطاتو ورشرش
وخابر ليك السهله وفرش ليك بي مهله
فراشاً يكفي ويفوت وارقد روق
بنيت جوانا قصوراً فوق
ملاها الشوق ارقد روق
بنيت جوانا بيوت وبيوت
هزمت الموت غلبت تفوت
هزمت الموت غلبت تفوت
|
|
 
|
|
|
|
فيس بوك
تويتر
انستقرام
يوتيوب
بنتيريست