|
|
 رسالة القاهره
|
في ليله قاهريه حميمه صدح الهدهد مع شهيق الأستاذ عاطف خيري
أقام منتدى شموس الثقافي بالقاهره أمسيه نقديه حافله قدمها الأستاذ عفيف أسماعيل . تناولت الأمسيه شعر الأستاذ عاطف خيري و بالأخص مجموعته " سيناريو اليابسه " و القى فيها الشاعر روائعه من السيناريو مرات و مرات نزولا عند رغبة الحضور .
تناول الناقد عفيف اسماعيل تجربة عاطف خيري منذ البدايات و اصفا أياها بالتكمله الصحيحه لمشوار النص العامي الذي بدأه الدوش و صديق , و أن كان عاطف قد تناوله بحرفيه أكبر . مداخلات الحضور و تعليقاته جعلت الندوه أكثر حميميه . بكاء الرضيع " سمندل عاطف خيري " و كأنما هو يحس أن الناس بتحيب في سيرة أبيه أضحكت الحضور كثيرا
تحدث الشاعر عن تجربته الأخرى " الظنون " التجربه الفصحى .
و وعد جمهوره بالديوان الجديد خلال هذا الشهر
منتدى شموس منتدى ثقافي أسسه مجموعه من الشباب السوداني بالقاهره و هو ينظم ندوات و ليالي شعريه نصف شهريه بدأت تكتسب شعبيه في القاهره .
|
|
 
|
|
|
|
|
|
|
|
Re: رسالة القاهره (Re: Mandela)
|
الاخ مانديلا
لك التحيه
ومن روائع عاطف خيرى اهديك واهدى الجميع
إقتراح
نكر
صوتك صداك
غالطني
الزمن فيك
شهرت على الجفاف
وعدك، بطاقاتنا الخريفية
رجع فاضي الكلام مليان
معاكي اتبرجت غيمه
شهق جواى صوت جدول
مرقتَ علي المطر حفيان
لقيتك
والرزاز مدخل
وناديتك:-
اقيفى معاي
نشيل كتف الغناء الميّل
ونتخيل
حلم دونك بيتحقق!!
وقبلك خيل دماى واقفه على
شريانى تتشهق!
وعرف صوتك صداك،غنيتي
رشحّتَ حلقك لي إذاعات الشجر
والمنتظر من عودة المدعو
المطر
للمسادير ، والطنابير
واللسه في رحم القصيد
والدابو حسّ
وفى سوق عكاظ،
وبين مزادات الحروف
غّيبت رسمك واحتكرتك للظروف
للزمان الجايي ، واللحظة
اللى فاتت منى هسه
يا واقفة
بين جرح السحاب
وبين شهقة الأرض البكر
ما كان ده ريد
كان إحتمال
تغيير قوانين شهقتك
ما بين حديثنا ولحظة الفعل الحقيقى
وانتباهك إنتى
للشارع البيرجع تانى
لى نقطة بدايتو
وإنحيازك إنتى
للشارع البيرشح
من مسام رملو التوقع
وما إتعرف قانون نهايتو
غايتو
امشى
فى الدرب البطابق
فيهو خطوك صوت حوافرك
يا فرس
كل القبيلة تلجمو...يكسر
قناعاتها ويفر
يسكن مع البدو في الخلاء
ما يرضى غير الريح
تجادلو وتقنعوا
اقترحتك
لون اساسى
يمنح اللوحة ازواجية القراية
ويفتح الضوء
بين خطوط الريشة ، والخط
الإضافى الجايي من
شبكية الزول المشاهد
واكتشفنا الرسمك
وأنا
نفس التوارد فى الخواطر
وبرضو أرقام التذاكر
البيها سافرنا وشهدنا
انفجارك فى الأرض
يا سمراء
يا واضحه
ما غنيت
يوم جيتك صدفه
قبل ابداك كان غُصنك بشّر
ويوم ما كان احساسك مسرى
عرّج غيمك فيني ومطّر
ولحظة طار
عصفور من صدرك
رتّب فينا احساس بالإلفه
ودوزن عصب الزمن الأشتر
اتوكلت عليكى
وقلتَ:-
المارق منك داخل جرح الورده
وراسم فوقها غناوى الطل
والمارق منك
رجّع للغابات
الزنج الهاربه
وللعتمور العرب العاربه
وادى الكون
مفتاح الحل
والمارق منك
شادد عصب الورقه ، وحرفى
وراصد فى اللاوعي سكونه
مواعيد صحوه..حلمه..لونه
وشارى يقينك فى ظنى
وسارق لحظة إنى أفكر
المارق منك
مارق منك
أو
منى.!
حـــــــوار
- تانى النهارات عاودتني
وكان الخاطر ماطر ، وشهوة صحو
من وين عرفتني وضارتنى
فى ضو
لا منى ولا منو. والورطني فى الموت لااذكر
غير شارع وحمى الكاكاو
ومشيت
- أترك في النهر كما هو
يتفاءل بيك الموج ويشيلوا يدسو بعيد
فى شاطىء من عين الموت شان ترجع
- موزع بين شاطىء
وقوز رمله
زى قريه
- والطيور الداخلة في دمك
تنقّد بأرتياح باقى الصباح!!
- ياتونى لا كالعاصفة.
يأتونى زي صَقَر المواعين والتسوس
- أرجاك ؟
- إتاخرت قافلة خريفك والرياح
وأنا في رصيفك
ومن قطارات تطل من كل شباك أمسيه
وتدهسنى شجرة حناء
وأدخل في أضافرين الغناوى
وإنتى ماشه يعترِّ جواي أسف
- تعال
- ما بجيكي وفى حضن كل المسافات سكتين
وفى ضهر كل المشاوير خنجرين
وفى خيال خيلك وتد
بلقاك
محل داهمني السماء
وانا في طريقي الي الغياب
صارى الرياح في طرحتك ، وفى طرفي
جمر المستحيل.فوقى من دوخة الأرض
أنا هسه مديون للسحاب
- والمتعرج في جسد الحله
دا زقاق والا وريدك أريدك
أدينى صوابعك ضارينى من الغربة
شان أرقص حبه ، وأهش نحلك
حولي يتفتح توبى نوافذ
واتساقط يتلقاني سماء
يا محبوب
كم عام من رغبه وأنت تأجل بيناتنا تساب
كم عام إتعلّق في كتف السكه
وصلنا! شجر الحناء
نلقاك نيزك في رحم الكون مبذول
للحمي والدوران
وصلنا !! شجر الحناء
نلقاكَ قطار يخدش صمت القريه
بالضجه وريحة الغربه
كم عام من رغبه وإنت تأجل بيناتنا تساب
عكّر سكر قهوتنا
و أشربى ودخن
- الدنيا كانت مراهقه وبتغمر
إذا فوقها حلّق طفل الفراش
وانجبت انبياء بحجم الهواء
وناس للرحيل
- يا عاق
نهرين في دمك للصحراء !
وبلدين في نهرك يا ولدي !!
أحزانك جواك لبلاب
وافراحك في كفي تبلدى
شقيش تتكسر لقطتك
دسيتك منك لي بكره
هدهدتك حجيتك
بت في عيونك ، معاكَ وبدونك
خوفك عليها يشيلها ويغتغت ،فوقها
ويحتحت دواخلك صفق. تنوم تشتهيها
تقوم تلقى فيها منامك صِدق
ونمتَ...خلاص إتمطقتِ بُهار القُدره
وقمتَ !!
- بيناتك وشجر الحناء الجواك
سكه تفّوت جنازة الليل الفيني
دفنتك إتلفّتَ لقيتني براى
صحيتك ..
إتونسنا عن الموت
والفرقه الفى الغيب
وتعيش يا كتفتنى بالخيالات الجموحه
ندهتَ علىّ نفضت إيدى من القصيده
وجيت ، لقيتك والملاحم في الوريد
للقلب مشوار كن
بابين وشباك مرحلي وهامش
حضرتَ ولن أعود للخلف
-ما تْسافر
هدّت فيك السكه وشجر الشوك
الموت أداك بس اسمه
بتفتش ليه عنوانو
مسكونه أنا ... بيك
وعرقانه عتبة البيت
خطواتك وإنت معاى
منديل ، منديل
فانوسك نومنى وساهر
أطفى النور.
| |
|
|
|
|
|
|
| |
waleed500
فيس بوك
تويتر
انستقرام
يوتيوب
بنتيريست