|
|
 الأخ نوبا وبقية الزملاء الأعزاء -- بخصوص الأغنية الشايقية
|
الإخوان الأعزاء
نوبا وبقية الأحباب
أنا من محبى فن الشايقية، شعرا وغناء، بداية بأشعار حسونة وود الدابى، وإسماعيل (إسماعين) حسن، ووصولا لمحمد سعيد دفع الله والسر عثمان الطيب، وأؤلئك القمتين، ينبوع الإبداع محمد الحسن سالم حميد، وصنوه محمد بادى
أما حكاية أغنية أمونة بت الشيخ حمد والتى سمعناها هنا بصوت عيسى بروى العميق الدافئ، كما سمعت حكايتها، فإنه وفى منتصف السبعينات حين كتب الشاعر المرهف السر عثمان أغنية بت البلد، وغناها بلبل المقل المبدع محمد جبارة
وبلا خبر طق الخبر مالى البلد
قالو العريس قام بالأحد
الحلى جاطت والحريم يتهامسن جاى الولد
كوم من بنات للبير ورد
يتحدثن جاى الولد
يا بختها وا شوقنا نحن الليلى جمر الشوق وقد
الخ الأغنية المدهشة
وحقيقة الأمر أنها كانت نقلة فنية عملاقة ومميزة، ليس فى غناء الطمبور فقط، كما أعتقد أنا، بل فى مجمل أغنياتنا السودانية
لماذا؟؟
أولا أدخل السر عثمان نمطا جديدا يمكن بكل سهولة أن نسميه الأغنية الدرامية ذات الحبكة والبداية والنهاية، ثانيا، الموهبة الشعرية للسر أضفت أبعادا جمالية على النظم، ثم ثالثا كان أداء محمد جبارة كعادته عذبا شجيا
المهم، أخذت الأغنية حظها وسط المهتمين والمتذوقين واعتبرت كما قلت منارة جديدة فى غناء الشايقية، وتهامس البعض، أنه لن تكون هناك أغنية تصل لهذه الدرجة الرفيعة التى وصلتها بت البلد، ولن يستطيع شاعر أن ينظم وأن يأتى بمثل هذا الإبداع
ثم فجأة، وصلت للشاعر السر عثمان رسالة مغلقة وبداخلها هذه القصيدة، أمونة بت الشيخ حمد، ومعها تعليق بأن أرض القرير لم ولن تجف ابدا وسيكون فيها الإبداع ما كان الإنسان، وكان معنى الرسالة أن هناك من يستطيع أن يأتى بما هو أجمل وأعذب وأخلد فى مجال الشعر
هذا ما قاله السر عثمان شخصيا، وكان إنطباعه الشخصى، أن النفس الشعرى ربما كان لفتاة شاعرة وليس شاعر، هذا رأيه هو على العموم، ونحن ليس لدينا سوى أن نستمتع ونطرب
التحية لبنى شايق حيثما حلو وأبدعو، والتحية لجميع مبدعى بلادى
|
|
 
|
|
|
|
|
|
|
|
Re: الأخ نوبا وبقية الزملاء الأعزاء -- بخصوص الأغنية الشايقية (Re: Abamna)
|
DEAR ABAMNA
THANK YOU VERY MY FOR THIS EXPLANATION.BECAUSE I DON`T
HAVE ARABIC KEYBOARD I MAY NOT BE ABLE TO WRITE MORE BUT I PROMISE YOU TO WRITE LATER.BY THE WAY ,THERE ARE SO MANY SONGS IN FORM OF MESSAGES BETWEEN ALDABI ,MOHD SAEED,ALSIR AND ABULLAHI MOHD KHAIR ABOUT TRAVELLING AND EXACATLY ALZAHRAH,ALGALA AND KARBAKAN,COULD WRITE ABOUT THEM.
| |
|
|
|
|
|
|
|
|
 Re: الأخ نوبا وبقية الزملاء الأعزاء -- بخصوص الأغنية الشايقية (Re: yasiko)
|
سلام أب آمنه وياسيكو
تحياتي لكم من أرض الشتات في أقصي أقاصي الأرض، من أرض الشتاء الطويل والليل الأطول حيث تسرب الذكريات وتبدو كأنهاحدثت بالأمس وليس من 30 سنة تقريبآ، طالب عمره 15 سنه لأول مره يبعد عن أهله وبيته ويجد نفسه في مكان مختلف عن أطراف المحس حيث نشأ، يجد نفسه في الدبه بعد رحلة مدة يومين في الباخرة بين دنقلا والدبة. يومين تلاته غريب وبعد كده يستكشف البلد وأهله ا وبقيةالطلبه الزملاء من حلفا حتي المقل والبركل ونوري والعفاض وكرمه كول ودبة الفقرا وجرا والجابرية والغابه وأبو عكاز أرقي والكرد تنقسي وكان كلاب وجراده ومقاصر والقولد قبلي وشبعانة والخندق وملواد وغيرها كثير لم تستحضره الذاكره الآن، ثلاث سنوات قضيناها معآ ـ معظمها إضراب عن الدراسة  ـ عرفتهم وعرفوني ، وبعد مدة إكتشفت إنني لم أبدل بالأهل إلا بأهل
أتذكر بعد يومين من وصولي الدبه ذهبت للحلاق في السوق وبعد شويه جا واحد يسرح شعره وقام قال لي إنت من وين وبتعرف شنو عن بلدنا دي، قلت ليه أنا بعرف عندكم فنان إسمو صديق أحمد، سألني قال لي بتعرف غناهو، قلت ليه عنده أغنيه بقول فيها، لو اللمبة قالت بق
تبقي اللمبه دايره الدق
وقعدنا نضحك، بعدين الحلاق قال لي ده عبد الله محمد خير الشاعر ، ونفس الحكايه حصلت بعد كم يوم مرضت ورقدت في المستشفي والعنبر فاضي في الليل تقول الناس كانت ما بتمرض، واللممرض مشغل المسجل وبيسمع فيه بإستمتاع وبي زعلة المرض قمت عمات معاه شكله كبيره ولدهشتي لم يجاريني الرجل وسكت وقفل المسجل، وتاني يوم إعتذر وعرفت من الزملاء إنه ده صديق أحمد وطبعآ بعد كده بقينا نساكك حفلاته
بعد كده عرفت الكثير عن المنطقه واهلها وأصبح لي معارف وأصدقاء حتي الآن
آسف أني لم أكتب كثيرآ لأنني أستخدم لوحة مفاتيح علي الشاشة
| |
|
|
|
|
|
|
|
|
|
Re: الأخ نوبا وبقية الزملاء الأعزاء -- بخصوص الأغنية الشايقية (Re: nuba)
|
هيْ .. أقيفِنْ ..
نورا فِيكِنْ ؟ . ؟
نورا ... نقّاحة الجِّروفْ ..
نورا ... حَلاّبة اللِّبيني ..
للصغيرين والضِّيوفْ
نورا ساعة الحَرْ يولِّعْ ..
تنقلِبْ نسمة وتطوفْ
تَدِّي للجيعان لقيمة
وتَدِّي للعطشان جغيمة
والمَخَلِّي الحال مَصَنقِرْ ..
في تَقَاة اللّيل تَندْقِرْ ..
تدِّي لي باكر بسيمة
تَكْسي للماشين عَرَايا
وفوقا ينقطّعْ هديمه
.........
ما عِرفتِنْ ... نورا إنْتِنْ .. ؟؟؟
قولِنْ إنتن شِنْ عِرفْتِنْ ؟؟؟
نورا بِتْ الواطة
أخيتي ..
نورا اخُتْ كُلّ الغلابة
نورا حاحاية الشّقاوة ..
نورا هَدّاية الضّهابة
الأراضي اليَاما أدّتْ ..
نورا ... بقّتْ من تُرابه
وماشي في الأعماق سحابه
مشتهنِّها .. والله جابه
الله جابه ... الله جابه
للجنوب طبلاً يَهَدْهِدْ ..
ليل مشاعر ناس تعابة
وللشّمال طنبور يَسَكِّتْ ..
دمعة الميتين كآبة
........
ما عِرِفْتِنْ نورا إنتِنْ .. ؟؟؟
قولِنْ إنتن شِنْ عِرِفْتِنْ ؟؟؟
....
نورا ....
عايز تقرأ .... قالتْ
فوقا حيطة الدِّنيا مَالتْ
خَتّتْ الكرّاس وشَالتْ
منجلاً .... صَالَتْ بو جَالَتْ
لامِنْ إنجرحت بو شالَتْ
لي التراب فوق إيده كَالَتْ
..........
ومَرّة يوم في الدُّونْكَا لِدْغَتْ
جاء الفقير بالليل حَوَاهَا
ويوم ملاها الهم قطايع ..
جاء البصير بالنّار كَوَاهَا
ونورا ... ما قِدْرَتْ تمانع ..
تقنع النّاس المعاها
مرة شافت في رؤاها ...
طيرة ... تاكل في جناها
حيطة تِتمغّى وتفلّعْ ..
في قَفَا الزّول البناها
في جنينة سيدي سِمْعَتْ ..
شتلة تصقع لي الوَرَاها
الأرض ..
لابُدَّ
ترجع ...
للتِّعِب فوقا ورعاها ...
غيمة ... والنِّيل موجو لاها
والعطش شقّقْ شفاها
الشّمس طَبَقت ضُحَاهَا
الخليقة لقت إلاها
نار ....
عقاب إنسان مكسّر ..
فوق تَلَكِّيات متاهة
وضَوْ من الله .. رهاب مكتّفْ
في وتيد اللّيل معاها
بين ربوع حَضَره وخلاها
فَسّرَتْ لي النّاس رُؤاها
وقالوا .... جَنّت .... ومو براها
ونورا زادت فوق شقاها
و صَدّتْ الأيام .... تحُشْ
تبني لي عصفورة عُشْ
في السّواقي تشوف عزاها
لما شوقه يسوِّي .. أُشْ !!!
تملا ... تزرعْ
ترعى .. تقرع
للنهار في الليل تخُشْ
عِرْفَتْ الشّقَا والشّقَاوة
إلاّ ....
ما عرفت تغُشْ !!!
........
شايلة طولة البال من الله ..
ومن أراضينا الإثارة
وماشي تكدح طول نهاره
وترجى لما الليل يَفلِّلْ ..
تسرِق ألمي عشان خداره
عشان صغاره ..
عشان خداره
عشان صغاره ..
ولما ترجع لي دياره
تنزف أحلام الفقارى
من عويناته الحيارى
..........
لي غُبار الحال تقُشْ
فوقو لي الآمال ترُشْ
نورا ....
تقعد
صاحيي تحلم ..
بي بيوت بي نور ودُشْ
وبالمحبة تشُق دروبه ..
ولي قلوب الكل تخُشْ
نورا ...
تحلم بي وجود
ما مشت بينو القيود
أفضل أفضل بي الكتير ..
بي وطن من غير حدود
........
نورا تحلم بي عوالم
زي رؤى الأطفال حوالم
لا درادر ..
لا عساكر ..
لا مظاليم
لا مظالم
.............
نورا تحلم ..
ولما تحلم ..... نورا ترجِفْ
ولما ترجف .... نورا تحلم ..
ولما ريح الواقع المُرْ ..
لي عشيش أحلاما ينسِفْ
نورا ..... تنزِفْ
وفي الوجود .. وجدانه يهتفْ
حالة .. تقرِفْ ..
حالة تكسِفْ ..
حالة تكسِفْ ..
حالة تقرِفْ ..
وتبدا تقضِفْ ..
ولما تقضِفْ
بالا يهتِفْ ..
وتملا باله أحلام بتلصِفْ
يوم حا تنصِفْ
يوم حا تنصِفْ
نورا ..
لسّه بعيد ..
هناكَ ..
وتبدأ تحلم ..
ولما تحلم نورا ترجِفْ
ولما ترجف نورا تحلم
صاحيي تحلم..
وصَاحْ بتحلَمْ
صاح بتحلَمْ
بتحلم صاحْ ..
| |
|
|
|
|
|
|
| |
yasiko
فيس بوك
تويتر
انستقرام
يوتيوب
بنتيريست