|
|
 مجاملاتيه...يكون من شنو!!؟؟
|
السلام عليكم ...
الملحوظه التي لا تخفي ..علي خائنات الاعين وبطلاتها...اننا نحن كشعب سوداني ...بنجامل في الفي والمافي ..بالله عليكم ..ارجعو لي اي موضوع في البورد ده ...وطلعو لي واحد بس ..ما فيهو ..ايها الرائع ..او يا سلام عليك يا فلان ..اتحفتنا يا فرتكان ...دي علي وزن ابدعت يا استاذ ..البنقولا لي ..حسن صبره ومحمد وردي سوواا سووا كده.
الشاهد في الموضوع اننا شعب مليان بالذات اعني بالذات ..ذات الذات الجووه ...مش الاستثنائيه....عشان كده ..المريخ لما يغلب فيلا الاوغندي ...الشباب ...فووووو علي المطار ..للاستقبال..وتصوير الامر ..علي صحفنا الرياضيه ..بانه نصر من عند عزيز مقتدر ..ونحن الاسسنا الا تحاد الافريقي.مش الكاميرون الشالت كاس اممو اربع مرات.
بالله عليكم ..ايام الدراسه ..كنتو ولا هسه ..بتسمعوا ..اهلااااااااااااان يا فلان يا رائع ..دي كم مره في اليوم!؟؟؟؟
كل السودانيون ..اما رائع ..او راقي ..او حبيبنا ..او اصلي ..او فرده ..او وجيه ...حال القاء السلام ..وهو ذات الشخص ..الطاير ليهو ..او فاكيها في روحو حال ادارة الظهر.
فنحن يا سادتي ...
اروع خلق الله ..وبلادنا اتعس بلاد الله!!!!!ونحن
الساس ..ونحن الراس ..والرشوه جواز مرور معاملاتنا .....
ونحن اعف واشرف خلق الله ...وشوارعنا ونوادينا تشهد بذلك ...ونحن اوفي خلق الله ...مع اننا الذين قوضنا ثلاث ديمقراطيات ليلا...بايدينا لا بايدي عمرو وزيد ويا سادتي ... نحن اشجع الناس ..لا نملك الا ان تنتفخ اوداجنا واوداج جيراننا عندما نسمع كلمة ..ود المك ...وجدنا المك نمر ..حرق اسماعيل باشا ..غدرا ...ثم فر من امام الدفتردار هاربا ...حتي الحبشه!!!!!!!!!كأطول سكه ..بفتح السين ...في التاريخ ...بينما وفاء ادريس ..ترتدي طوعا حزاما ناسفا ..وتمضي تسابق خصلاتها ..الي حيث العدو
مناسبة الكلام ...اني قريت في البورد ده ..قصيده للاخ وليد ..اقول مجازا قصيده فقط لان البعض عقب مثمنا ومادحا القصيده .....اعزائي ..رجاءا ..لا تنفعل بالشعر ان كنت لا تحسه ...لاحظ تنفعل ب...وليس تتفاعل مع....ويا عزيزنا وليد ...وكل المواليد ...لا تنجر الكلمات ...لتلقمنا احجارا...ولا تنظم كل ما تحسه ...وما سميته قصيده ..هو في واقع الامر الذي يفترضه ..ادراكي غير القاصر ....ليس الا ...عصيده!!!!!ودمتم
|
|
 
|
|
|
|
|
|
|
 Re: مجاملاتيه...يكون من شنو!!؟؟ (Re: HighTower)
|
كلامك رائع يا راقي انت
لوووووووووووووووووول
مالضير في بعض المجاملات انها حافز لزيادة العطاء واحيانا كثيرة تكون هذه المجاملات مستحقة للشخص صاحب الابداع
وان كنت معك اننا بنزودها حبتين
لكن...هل جربت ان تمشي يوما في وسط الخرطوم في الشارع الواصل بين ابو جنزير الي مكتبة القبة الخضراء( بالمناسبة اسمه شارع المليون مغفل لا ادري لماذا ) هل جربت ان تطالع في وجوه الناس ان هذا الشارع يوجد به كل سحنات السودانين هل رايت اخي كميه العبوس والحزن علي الوجوه انه مثال علي كل شوارع السودان اذا فما الضير ان نرفع من معنويات بعضنا ببعض الكلمات اذا كان واقعنا قاسي
اني اعتقد ان هذه المجاملات هي نتاج طبيعي وترفيه مكتسب عن انفسنا لما نعانيه في واقعنا السوداني من ضياع كل جميل في حياتنا
فالكلمة الطيبة حسنة
وابتسامتك في وجه اخيك حسنة
وان لم نكن نراكم لنبتسم في وجهكم فلتبتسم لكم كلماتنا
علنا نؤجر عليها
| |
|
|
|
|
|
|
|
|
|
High tower (Re: HighTower)
|
High Tower
أنا ذكرت قبل ذلك فى معرض الرد على أحد البوستات أن عنصرى المجاملة والأجاويد هى دائما الطرف الثالث فى الحوارأيضا ..ولذلك نحن نتحدث طويلا عن الرأى والرأى الآخر..لنفاجأ بدخول طرف ثالث للتهدئة فى موضع يمكن أن يحسم بالحوار الى نهايته..هكذا نجد فرامل وكوابح لكل خطوة نحو المعرفة او تكريس واقع جديدوهذا ينسحب على كل الأصعدة.وكلمات مثل رائعة وجميلة وكويسه على طرف اللسان. والمجاملات مستمرة فى ترفيع المنحط واذلال الرفيع والشللية جاهزة للإلتفاف فاذا رد أحدهم فللبقية حذو حذوه لتقبيح الجميل وتجميل القبيح.وأنا سعيد بأنك قد طرقت بابا موصد يا هاى تاور
ومنطقة محرمة فى عرف الكثيرين وهى الثناء على مالايجب أن يثنى عليه وذم مايجب الثناء عليه...هذه المجاملات هى التى خلقت كل أجواء الحساسية تلك
وأنا وعلى مستوى التجربة الشخصية متأكد ومن ضمن تداعيات هذه المجاملات فارغة المحتوى بأن هنالك من سيتهمنى بأننى قمت بالتعقيب فقط لأنك ذكرت فلان أو علان رغم أن الأمر غير ذلك ..
وانت فقط جرب يا هاى تور ..واكتب لفلان او علان ردا منطقبا وصادقا ستجد من يتصدى لك ويحيل الأمر الى معركة ..وستكال اليك الاتهامات من كل حدب وصوب
ولكن رغم ذلك يجب أن أن تلتزم قناعاتك وصدقك
تحياتى
ودعزة
| |
|
|
|
|
|
|
|
|
|
وبعد داك (Re: HighTower)
|
الاخ الرومانسي...الزول البائس التعبان ده ....اشحذ همتو ..بدل ما تخدرها...ومعنوياتو دي ممكن ترفعها ..بانك ...تقول ليهو ...انت تعبان ..لانك بتجامل ..في حقك ..وفي وطنك .وفي دينك...قول ليهو ..حقا تكوسو ..ولا بجي ...حقك تقاوي ..وتقلعو ...امسك شباطين الصراع ..والما بتلحقو جدعو......بعد ما يعرف يقول للحق حق ..والغلط غلط ..ويفهم ..انو ما رائع ولا اي حاجه ...بيبدأ يحلم بالزمن الفلاني......ويا لسخرية القدر ..انا للتو فرغت من استلام مرسوم اول شاكوش الكتروني ..والسبب ..صدق او لا تصدق..المجامله....مختصر القصه ..اني اتعرفت علي بت من دردشتكم دي لما كان اسمي فيها فارقه معاي ..للحق هي اسرتني بسلاستها ..وانسيابية روحها ..وكل المؤشرات كانت تدل علي ان في الامر جمال مستتر ..والعلاقه بيناتنا ماشه نحو الاجمل..عشان كده سميت نفسي جمال ...المهم بداية النهايه كانت ..لما هي بدات ..تملاني بي نفسي ..وانا في صراحه بلهاء ...قلت ليها ..انا في طريقي للاستغراق فيك ..فما تدفعيني دفعا للامتلاء ..بي نفسي ..عشان علي الاقل يفضل مكان ليك ...وصراحة انا ما كنت محدد شكل علاقتي بيها ..وانا طبيعتي كده ..ما بحب اسمي الحاجات ..ولا بشير ليها بالاسم زي ما قال الصادق الرضي ..مع انحيازي التام ليهو ؟..لكن المسأله الحقتي بتفضل في النهايه حقتي....المهم ..وانا ملاحظ اني لولوت الكلام فما تقول علي براي ..كويس!!؟ ...هي حست اني جرحت كبرياء الانثي فيها ..او انا قدرت كده ...وفي النهايه رمت يمين الطلاق علي ...فقمت انا رميت يساره طوالي ...لانو اي حاجه بعد ده حا تبقي مفتعله زي عصيدة اخونا وليد ....ودمتم ...
| |
|
|
|
|
|
|
|
|
|
ود عزه (Re: HighTower)
|
الله يبارك فيك يا اخي ود عزه ...العباره الله يبارك فيك دي ...نبهني لي ليها صديق عزيز علي من ايام الدراسه ....ابو بكر حماد ...قال لي ..الله يبارك فيك دي تركب في اي حته ...يعني لما تتحير وما تعرف تقول للزول شنو ..طوالي قول ليهو الله يبارك فيك ...يمكن اكون نعسان ..ولا فعلا مافي شئ ممكن اقولو ردا علي كلامك عموما ...شكرا جزيلا لا حزينا ..رغم انف عاطف خيري ..الذي لا افهم ثلاثة ارباع كلامه السريالي...وده موضوع تاني ...جاييهو ...ورغم ذلك ..فربع الربع منه يكفي...واشوفكم بكره ...وبالله عليكم اكتبو ....لي ..وموضوع الشاكوش الاخدتو ده ادوهو حقو برضو...ودمتم
| |
|
|
|
|
|
|
|
|
|
Re: ود عزه (Re: HighTower)
|
high tower
صباح الخير
عندي تعليق بسيط على مقدمة العتاب بتاعك ذكرت فيها اشاء كتيره على سبيل المثال عوده المريخ وهو منتصر المك نمر وفاء ادريس وغيره ، عليقي هو ماذا تريد ان يفعل جمهور المريخ عند ماياتي فريقه منتصر من يوغندا هل تريد ان لا يذهب احد لاستقبال الفريق ؟
هل ماقام به المك نمر يلام عليه لانه قتل اسماعيل باشا غدرا وانه فر الى الحبشه ؟
هل نسيت كل السودانين الذين وقفوا في وجه الاستعمار وضحو بحياتهم امثال المهدي وانصاره مهيره بت عبود عبد الفضيل الماظ على عبد اللطيف عبد القادر ود حبوبه هل ماقام به هؤلا الشرفاء يقل عن ماقامت به الفدائيه وفاء ادريس ؟ ام ان ذنبهم كان انهم تسرعو في طرد المستعمر ولم ينتظرو حتى يتطور الاعلام ويقومون بما قامو به لكي تتصدر صورهم واخبارهم نشرات الاخبار ؟
هل ان قال لك احد ياخي ياحبيبنا يافرده فيه حرج ؟
ياخي والله السودان مليان بالعادات الحسنه اكتر من العادات السيئه ونحن فخورين بذلك اما عن الاقليه التي تظهر خلاف ماتبطن فحسابها عند الله لانك لايمكن ان تحاسب كل الناس 0
اما عن القصيده او العصيده فهذا اختلاف اراء انت تراها عصيده وغيرك يراها بيتزا هل تريد ان تجبر الناس على رايك ام ماذا تريد اختلاف الاراء لا يفسد من الود قضيه
زاتو
____________
نحن ونحن الشرف البازخ
| |
|
|
|
|
|
|
|
|
|
السيد الزول زاتو.. (Re: HighTower)
|
يسعد مساك ...بالخير..
عذرا عزيزي ...يا انت ما فهمتني ..او انا ما فهمت ...لكن استتنتاجي ..الوصلت ليهو ..انو انا وانت واضح اننا متوازيين ..عشان كده لما نجي لي نقاط التناول والفهم للحاجات ..يخيل لي انا حا امر بيها في مجال ..وانت في مجال تاني ...والمدي بين خطي افكارنا برضو واضح انو كبير ...عموما يا سيدي ..انا بحترم وجهة نظرك ..لكن بنفس القدر ..جد والله ..ما حا اقدر اجاوب علي حزمة الاسئله النتلتني بيها دي ...ماذا تريد ...وماذا تريد ....يمكن اكون عاجز ..ويمكن اكون ما فاهم ..لكن المتأكد منو ..اني ما حا اقدر اجاوب ....بس انا حسيت من كلامك مجرد احساس ...انك زعلان ..وبرضو ممكن اكون غلطان ..خلاصة الامر ....يا الزول زاتو...بارك الله فيك!!!!!ودمتم
| |
|
|
|
|
|
|
|
|
|
الاخ ود عزه (Re: HighTower)
|
اعود للتعقيب علي تعقيبك....اول اطلب من خلالك ..لجميع اهلنا الطيبين في منتدانا ده ..وطيبين دي مجامله مني ساكت ...انهم يحاولو ...يعالجو كتاباتي بالتماس روح الموضوع ..وتناولو بغض النظر عن الصياغه او الامثله البضربها كما ارجو انو بعد الانهاء من القراءه ..عدم العمد الي تصنيفي في خانتي عدو او صديق ...ثم اما بعد
فيا عزيزي ..ود عزه ..طامة المجامله ..المستشريه في بلدنا السودان ...لا تقف عند ما ذكرته انت وبس ..بل في حالات كتيره..ترسم مسارات حياتنا ..انا مثلا يا اخي ..لم يترك لي المجال ابدا .لاختار ..ادرس شنو ...ولا ادخل ياتو كليه ...فابي الذي ادين له بالكثير ..لم يكن ليناقش حتي مسالة انك ما تمشي علمي ..واحياء كمان..والسبب معروف طبعا ..لم تتح لي الفرصه حتي لاكتشاف ما احبه ..وانا الان لست نادما ..لانو في اعتقادي ..انو لا توجد تجربه .تدعو للندم..فكل التجارب رصيد....لكن ما يحيرني اكتر في شعبنا السوداني الباسل ..انو في حاجات غريبه ما بتحصل في كل بقاع العالم ...بتحصل عندنا ..ودايما مبرراتنا جاهزه ...فنحن سمعنا بي بينوشيه ...وكيف لاحقته ..دماء الناس والامهم وهو يخطو الي مثواه الاخير لكي لا ينعم بنهايه هادئه ..ومع ذلك ..عاد جعفر نميري ...ابو عاج ..رئيسا لتجمع قوي الشعب العامله!!!!!!!!!!!بالله عليك ده ممكن تسمع بيهو وين غير في السودان .. لزوال الدنيا وما فيها خير عند الله من اراقة دم امرئ واحد ....ونحن نعفو عن السفاحين!!!!!ليمشو بيننا مطمئنين...!!؟؟ افيدونا افادكم الله ...يكون من شنو!!؟ ودمتم
| |
|
|
|
|
|
|
|
|
|
Re: الاخ ود عزه (Re: HighTower)
|
HIGH TOWER
صباح الخير تاني
اولا شكرا على تعليقك وبعدين ياخي انا فهمتك من نص الموضوع بتاعك وبعدين انا ما داير اجابه منك ياخي لانو ماسؤال بتاع اجابه لانو الاجابه في نفس السؤال ، وبعدين ياخي مافي مشكله انو نكون على خط متوازي لان الخط المتوازي كما تعلم لولاه لما سار القطار
والعتبى لك حتى ترضى وكل سنه وانت طيب وبارك الله فيك كما تحب ان تقول
زاتو
_____________
| |
|
|
|
|
|
|
|
|
|
المجاملة (Re: HighTower)
|
يا ناسات البرج العالي سلام
تحياتي
اتفق معك في أننا شعب يجامل كثيراً كثيراً ويضخم الأمور بأكثر مما يجب.
مجاملات يعين لدرجة العبط يعني أنا ما شاعر لكن مثلاً باعتقد إنو لدي الحد الأدني المطلوب لفهم الشعر. فقد لاحظت أنو في ناس ببيلملموا ليهم دراب كدا ويقولوا ليك دي قصيدة . ويقوموا الجماعة يشبكوهوا ليك رائع ، أبدعت وإلى آخر قاموس لتمجدي.
خليك من دا المجاملة حتى في الحياة اليومية يعني يجيك ضيف في البيت ويكون هنالك ما يكفي لإكرامه لكن تلقى البيت كلو يقوم ويقعد ويجري الراجل يتدين عشان يجيب زيادة لحمة وسلطة وإلخ.
المغتربين تلقى الواحد يشقى السنة كلها ويجي في نهاية السنة يقرض كل المبلغ الذي قام بتوفيره ويمكن كمان يستدين عشان يشتري هدايا للحلة كلها.
واحد مصري قال السوداني يشتغل السنة كله وكل ما وفره يشتري بيهو هدايا والباقي يدفعو وزن.
في مناسباتنا إذا كانت فرح أم كره تلقى الواحد يجي مسافر من كسلا مثلاً للشمالية عشان يحضر عرس - يا خي أصلو عرس الأمير شارلز . ويكون الدفعو في المواصلات دا هو محتاج ليهو لتوفير لقمة العيش لأبنائه.
أما تعظيمنا للأمور فالمثال الذي ضربته عن المريخ أعظم مثال يعين شنو الهلال ولا المريخ غلب عشان الناس تبطل شغله وتحوم الشوارع في مظاهرات وهم كلهم ضارباهم ملاريا فبدل ما يرتاحوا تلقاهم حايمين ويهتفوا ومعطلين حركة المرور .
بعدين شوف اسماعيل باشا قام فاكي البيرك من المتمة للحبشة ويجوا أسي أخوانا الجعليين يقول ليك نحن ونحن _ يا جماعة ما تزعلوا مني دي والله أنا سكت قلتها عشان أفور دمكم
لكن يا خي الشاكوش الالكتروني دا كيف حار زي الشاكوش العادي ولا بارد.
| |
|
|
|
|
|
|
| |
wadazza
ALZOLZATOO
فيس بوك
تويتر
انستقرام
يوتيوب
بنتيريست