حوار بالمنطق مع الأخ أمين محمد سليمان

Quote: الحديث لما يكون موضوع أو منكر أو مجهول أو لا أصل له، معناتها قطع شك الرسول صلى الله عليه و سلم ما قالو ... يبقى الاستاذ يستشهد بيه ليه ؟! وبالذات لما ببني عليه أفكار و ينسب بيها الرسالة التانية للرسول صلى الله عليه و سلم. النسبة لاني قلت "الأحاديث البستشهد بيها الاستاذ جلها مناكير و مجاهيل و موضوعات" فانا ما زلت مصر على كلامي ده، و ده ما بسبب بوست علاء الفات الجبت منو مداخلتي، بل من بوستات كتيرة سابقة منهم اتنين استمروا شهور كتيرة مع المنصوري، زايد بوستات تانية فيها نقاشات مع اخوانا الجمهوريين، ده زايد قرايتي لكتب الاستاذ و سماعي لتسجيلاتو في موقع الفكرة و غيرها، ولاني منتبه لقصة الأحاديث الضعيفة البستخدمها في إثبات الفكرة بشوف تخريجاتها معظمها بتكون مناكير و مجاهيل و موضوعات بالظبط زي ما عملت إنت لما نقلت عنو في بوست علاء و جبت منها أنا الامثلة الفوق دي. العلماء اختلفوا هل ناخذ بالاحاديث الضعيفة في فضائل الاعمال أم لا، و حتى القالو ناخد بيها وضعوا شروط للكلام ده، لاحظ ده في فضائل الاعمال، الاستاذ بكون بتكلم في العقيدة و التوحيد و الخلق و عادي يستشهد ليك بحديث لا أصل له !! و السؤال الحقيقي لاي زول طالب حق: شنو البخلي الاستاذ - أو أي شخص - يستشهد بحديث موضوع أو منكر أو مجهول لإثبات فكرتو ؟! الاجابة المنطقية و الموضوعية إنو الزول البعمل كدا ده فكرتو ما عندها علاقة بالرسول صلى الله عليه و سلم و إلا ما إحتاج للمناكير و المجاهيل و الموضوعات من الأحاديث لاثباتها !