هديه ل(لجنة الرؤيه) ب(قطاع الشمال) مقال للدكتور الباقر العفيف!

Quote: و الله يا ناس سودانيز اونلاين.. تحيروا الما بتحير..!! ياخي الواحد يباصر و يباصر عشان الأوف بتاعوا..و اخر جزاؤه يكون سحب البوست..!! المهم من البوست الفات.. هو سقوط الأقنعة بالبونط العريض.. فليس المشكلة هي مشكلة السودان الجديد.. لأن السودان الجديد فكرة..و الحركة الشعبية اداة لتنفيذ الفكرة..و ده مش المشكلة.. اللجنة المختارة هي لجنة شبه فنية..والحزب الذي اختارها له مطلق الحرية يشكلها كيفما شاء..و ليس ذلك هو المشكلة.. هرجلة تراجي و بشاشا..مهما قالت فيها الناس ماقالت.. لكنهاها اثارت نقطة جوهرية..و هي نقطة التمثيل النسبي..و دي بتفضح شعار احترام التنوع..و ادارة التنوع.. فهل سقطت الحركة الشعبية في ذلك؟.. لم تسقط الحركة الشعبية كحزب سياسي.. لكن سقط من تصدى للدفاع عنها في ذلك الخيط.. و هم ما كنا نسعى لمناقشتهم.. كلهم ، باستثاء عبد المنعم الحاج (مش لأنو كسر تلج لكبر ولا البطيخ ..و لكن لأسباب اخرى)..جبنوا و و بصموا على انهم منافقين و منافقات و سودان قديم و معتت و اظرط من الجبهة الإسلامية كمان..!! كنت اريد أن اسأل صديقي مرتضى جعفر.. الذي يفلقنا بالتماسك الفكري..و كنت اود ان اقول له.. النوباوي أو النوباوية الذي حس بالظلم ووعي الظلم و اثاره و قرر أن يحمل بندقية .. هو اكثر تماسكا فكريا من ايتها ماركسي أو متمركس حايم في افريقيا من كيب تاون لغاية دلتا النيل..و من جيبوتي لغاية اقصى ميناء في غرب افريقيا.. و كنت اود ان اقول لصديقي حامد البدوي البشير , و صديقي كمبورة.. بطلو استهبال .. لأنو فعلا طلعتو سودان و سودان قديم كمان.. لأنو لمن تبقى المنجهة و الوجاهة بتبقى الجهوية عيب و مذمة و الشينة منكورة.. لكن لمن يبقى الدم و الموت بتجونا نحن الغبش في جبال النوبة و تقولوا لينا شيلو البندقية..اشمعنا نحن لينا شيل البندقية و الموت المجاني ..و التانيين ليهم الوجاهة من لجنة رؤية و برنامج و ما تلاها من ميسرات؟.. الحركة الشعبية غلطانة ..و ستين غلطانة.. لأنو من ما قمنا في السودان ده مافي حزب سياسي يوم واحد عبرنا و قال لينا اهو سويت لجنة فلانية..و اعلن ليكم عن امر القائمين عن اللجنة دي..و دي محمدة ، نحن كشعب اغبش بنشكر عليها الحركة الشعبية .. لكن كمان الحركة الشعبية ما تسويها درب للزرع.. تقوم تسوي الغلط..و تقول لينا اسكتوا للغلط.. و كنت داير احاسب المدافعين عن الحركة في الخيط المسحوب..جنوب كردفان و بحسب شهادة المؤتمر الوطني عندها خمس و خمسين مقاتل و مقاتلة في الجيش الشعبي..و عدد سكانها المواليين للحركة الشعبية اكتر بكتير من مو عدد سكان البحر (تحديدا الخرتوم و ما جاورها) المواليين للحركة الشعبية في الخرتوم.. اشمعني تجاهل هذا الرصيد الكمي و المفهومي..؟.. مش ياهو شغل الجبهة الإسلامية و الأحزاب الطائفية و مؤسسة النازية في السودان القاعدة تغشنا بانو في ناس في السودان ده قاصرين في مجال الروؤية و العطاء و عشان كده لازم ننتدب ليهم ولي امر يتفاوض و يتحدث نيابة عنهم؟.. و كنت اريد ان اقول.. ندى مصطفى.. قبال الحركة الشعبية و التحالف و خالد كودي.. كانت واصلة في العمل العام و دافعت عن قضايا عامة حينما كانت الغالبية لا تملك المقدرة عن الدفاع عن نفسها و عن قضاياها.. و كنت اريد ان اقول.. لو كنت اعلم و قبل خمس سنين من تأريخ اليوم أن الصديقة المهندسة سلوى السعيد حركة شعبية..مش كنت بقيت حركة شعبية..و انما كنت اسعى لأن اكون رئيس الحركة شعبية..!! ياسر عرمان لم يخون السودان في لحظة انسحابه.. من الترشيح لرئاسة السودان..و انما من خان السودان هي المؤسسة التي كانت لها حسابات قاصرة الرؤي و الأهداف و المصالح..و الرجل مهما اختلفت.. معه.. و لكني كسوداني لآ انسى انه قاتل نيابة عني في لحظة لم اكن املك القدرة للدفاع عن قضاياي و مصالحي.. ياسر عرمان حينما كان في الخلا كان سوداني .. لكن بعد السلام.. التفت حوله بطانة ناس ( في الحتة دي انا عندي راي) و ( التموضع ) و ( التمحور) و ( الفضاءات اياها).. فأدى ربه العجب و الدهشة..و بقى لايص زيو و زي أي مواطن مسكين..!! الحركة الشعبية تم اختطافها .. هذه حقيقة لا تتناطح فيها عنزتان.. الحركة الشعبية جسم مفتوح للنقد و معالجة الأخطاء.. هذه حقيقة لا تتناطح فيها عنزتان.. الحركة تسمع كلام منو و تتجاهل منو.. هنا هو المحك..! دستور السودان (على علاته) كفل مسألة التمثيل النسبي..و شرع ليها تفاصيل..مهما اختلفنا مع الحركة الشعبية أو سئ الذكر المؤتمر الوطني.. الإ اننا لا نملك الإ ان نقر بانها خطوة في الإتجاه الصحيح..! طيلة عمري في هذه الحياة لم ارى اهل قريتي و فريقي .. مكتوبة اسمائهم في سجل انتخابي..و ان قال لي المؤتمر الوطني أنا سويت ذلك.. فسأقول له .. طظ فيك.. فان لم تكن هناك حركة شعبية.. ما كان سويت السويتو و حقيت لي حقوقي.. فهل المدافعين و المدافعات عن الحركة الشعبية في الخيط المسحوب يعون ذلك؟.. الوعي بتاع بناطلين الجينر المتسخة و المشرطة و تقعير الكلام ، هو وعي خاص بصوالين الخرتوم هناك بعيد.. لكنو وعي ما عندو علاقة بي انا الراعي الأغبش ده..! المدافعين عن الحركة الشعبية في الخيط المسحوب.. تجاهلو ا تماما خيط عمار عوض ( و هو المحسوب على الحركة الشعبية)..حينما تحدث عن فرية منظمة التضامن المسيحية و تحريرها لبعض من الرقيق المزعوم.. كلهم صبت فيهم المطرة..و تناسوا بديهة بسيطة أن السياسة القذرة تقول أن الحركة الشعبية تخوض انتخابات مفصلية في جنوب كردفان..و ان مصلحتها السياسية تقرر أن الا تخوض في مثل تلك الأوحال..فهل قال احدهم / احداهن البغلة في الأبريق؟.. أو قال لعمار عوض ياخي انقرع (كتر خير استاذنا فيصل عبد الله الذي قالها صراحة لعمار..و لم يعيها عمار او رفاقه و رفيقاته الحايمين في سودانيز اونلاين)..!! الناس البتردح في الحركة الشعبية .. مثل تراجي و بشاشا.. شئنا أم ام ابينا.. ناس بتردح من باب محبة..و ناس بتحاول تصقل البديل..و اكره أن اقولها و انا الذي سمعت تراجي و بشاشا مالم يقله مالك في الخمر.. لكن في الخيط داك كان عندهم نقاط وجيهة محتاجه لمعالجة و سماع بوعي ..مش استعلاء و استكبار..و تماهي في شخصية الجبهة الإسلامية و الأحزاب الطائفية بتلك الصورة المزعجة للغاية..! اللجنة المعنية يا تراجي و بشاشا..لجنة مسكينة ساكت و ليها مانديت..و مالك عقار قالها بوضوح انها مكلفة بأن تستمع لرأي الناس و اصدقاء الحركة الشعبية ( يعني يا تراجي لو كبر صديق حركة شعبية مثلما تقولين.. فمالك عقار اتذكرو و دعاه للمشاركة)..فكيف يتعامل معاها الناس المؤمنين بفكرة السودان الجديد؟.. في اعتقادي ( و هو غير ملزم لشخص)..نقوم نعمل الآتي: نكتب كلما نتوقعه في البرنامج و الرؤي..يعني نحن كسودانيين و سودانيات دايرين شنو عشان الحركة الشعبية قطاع الشمال تتبناهو نيابة عنننا.. نكتب كلما ما نتوقعه أن تكون وسائل مناسبة لتنفيذ الرؤية و البرنامج..(لأنو من واجبنا نحمي مطالبنا و ندعم البيحمي مطالبنا).. نكتب كلما نعتقده.. يمكن أن يشكل ضمانة لتنفيذ الرؤية و البرنامج..(عشان نحاسب الحركة كمنفذ و الغيرها كمان) و نقوم نديهو للجنة..و هو من باب المشورة العامة ( و التي اوقن أن اللجنة ستتخذها كواحدة من وسائلها لصياغة البرنامج و الرؤية).. اها كن ما اشتغلوا بكلامنا يبقى عندنا رأي (و لو ندى مصطفى و انزار يوسف ما اشتغلوا بينا نمعط شعرهم و نحلق ليهم بدون موية) ..و لو مؤسسة القرار ما اشتغلت برأي لجنتها المكلفة يبقى عندنا رأي..! و كنت اريد أن اقول لصديقي خالد كودي.. اخير تاخد اجازة..و ندى مصطفى ناس كتيرة ممكن تدافعها عنها كشخصية عامة (يعني دخلتك شمال خربت علينا الرصة)..ياخي حتى عادل عبد العاطي البتتزاوغ منو ندى مصطفى في ناس ممكن تديهو راسو و ممكن يسمع ليها كويس..! بشاشا.. I hate to say that, but you have ligtmate points بس عليك الله خفف من الدخلة شمال.. و يا تراجي ..اقولها ليك بصراحة.. لو ما قومتك سداري من شاكلة انتهازية و غيرو.. زول واحد كان اشتغل بيكي مافي..!! الحركة الشعبية كتنظيم سياسي تشكل قوة دفع للكثيرين و الكثيرات..كيف نزيد قوة الدفع دي.. اعتقد هو واجب كل سوداني و سودانية يسعى لخلق بديل للمؤسسة النازية في السودان..و يمكننا جميعا بالتضامن و التناصح و العطاء الجاد ان ندفع بها الى الأمام .. الجنوب دربوا مرق.. اها نحن نسوي شنو؟.. اخير نتعامل مع الواقع و نحاول تغييروا و تغيير معطياتو..و لا نقعد نسرد مرثية الأحزان اياها؟.. الحركة الشعبية ، كمؤسسات ، ان شاء الله تختار شدرة و تقول لينا دي خياري .ز هي مخيرة.. لكن لو اتذكرتنا كرصيد ليها ( سودانيين و سودانيات).. يبقى بننصحها..و في كل الأحوال هي افضل مننا لأنها واقع يمشي على الأرض و نحن شغالين بمبدأ الصراع بيعرفوا القاعد.. تحية خصوصية للصديقة الجميلة سلوى السعيد..و الجميلات كثر يا سلوى و هن يسعين ليخلقن لهن مساحة تحت ضوء الشمس اياها.. و تحية اخص لصديقتي و زميلتي سلوى جمعة ضلمان (و هي في قائمة مرشحات الحركة الشعبية لمجلس تشريعي جنوب كردفان)..و فيك و في كل الرفيقات يا سلوى جمعة بشوف كل احلامنا المؤجلة..! و يا ناس الحركة الشعبية عليكم الله ادوا اخونا عمار عوض راسو.. دمتم جميعا كبر