بقية أغاني ألبوم المبدع أباذر عبد الباقي !.. دعوة للموسيقيين و للجميع.

Quote: أنا ما كنت ناوي أناقش الموضوع لأنو وجهة نظري وزاوية رؤيتي للأمر مختلفة شوية، فيها جانب آخر غير مرئي بالنسبة لكل من يتبنى وجهة نظركم دي، نحن بنقول فننا أحسن فن، ونحن أعرق ناس في الكورة، وعندنا علماء سودانيين في كل التخصصات ونحنه ونحنه ونحنه، قادين الناس وقادين نفسنا بأوهام زي دي وفي النهاية الواقع شيء مخالف تماماً، ما عندنا مقدرة نسوّق حاجاتنا في زمن التسويق لثقافتك بقة عملة صعبة وبيلعب دور أساسي في الحياة بكل أوجهها الاقتصادية والاجتماعية والسياسية، كون نغني غنانا وكمان نعرف نغني غنا وكمان نغني غنا غيرنا دي ميزة مش منقصة زي ما بتفترضو، وليكن ده مدخل لتسويق ثقافتنا اينما وجد سوداني وحتماً سيصب ذلك في مصلحتنا إن وعيتم للأمر بشكل جيّد و(حسبتوها صاح) ثقافة الخليج دي حاجة في جزء كبير منها مربوطة بالبيئة العاشو فيها وده ما ضعف في الثقافة السودانية بالنسبة للذين يتأثروا بالمفردات والعادات دي فطرة انسانية و(الانسان إبن بيئته) أنت حسه حتجي من غربتك دي مثقل بثقافة المكان الذي أنت فيه بصورة واضحة، وأستبدل مفردات (السيارة) (أدق ليك) ولبس العباية بالمقابل في الثقافة التي تعيشها الآن وستجد الأمر ما إلا فرط تحييز واضح لتك الثقافة وتمييز للثقافة الآخرى، هسة لو فكيت ليك سعودي في العيكورة حتجي بعد سنتين تلقاهو لابس عقال وبتكلم سعودي؟ والله تلقاهو ممعن في اللهجة السودانية وسفتو دقار لوري ولابس ليهو عراقي وسروال واتسودن زي الترتيب .. هذا والله أعلم .. يعني حسه يا نصورات فكيت أخوك عكس الهوا في الموضوع ده؟؟ ندورات الشبندر

مشكلتنا هي مشكلة (ادارة) ..ما بنعرف ندير اي شيء و لا حتي انفسنا. لما نكون ما قادرين نسوق ما عندنا دي ما مشكلة كبيرة زي لما العندنا يتمسخ و يبقي ما معروف انو بنتمي لينا او لي ثقافة تانية بنعبر عنها و ما بنحسها.. ضربت مثل قبل كده بـ (معلومةبنت الميداح) يا نادر .. معروفة في اوروبا و امريكا و هي بتغني اغاني من الصحراء حتي لما عرفوها العرب عرفوها بعد ما انتشرت في العالم كلو و اصبحت تطاردها الفضائيات العربية بعداك .. انا قصدت التغيير الحصل علي الغناء السوداني في الفترة الاخيرة و اثره . زي اغنية كده غناها معتز صباحي و اغاني تانية لآخرين.

شي طبيعي انو اي زول يتأثر بالمكان القضي فيهو سنين . لكن الماشيء طبيعي انو ملاين تمرق من البلد اكيد تأثيرهم ح يكون قوي جدا لما يرجعو. و معروف في كل العالم انو الناس البتسافر من بلادها للعمل او الدراسة في دول تانية ما بكونوا بالملاين.

(عدل بواسطة ناصر الحاج on 05-29-2007, 10:32 PM)