اعلان مهم لغير المتزوجين ....مهم جدا

.......
ورد في عدد اليوم 5/7 2003م من صحيفة الخرطوم الاعلان التالي :

اعلان مهم لغير المتزوجين

يسر صحيفة الخرطوم ان تعلن عن رغبة اسرة سودانية محافظة ومستورة الحال في عقد قران ثلاثة من كريماتها وترجو الصحيفة الاتصال بأداراة الصحيفة لأتمام عقد الزواج علي تلفون (792500) الفتيات
المرشحات هن :
1/ انسة تبلغ من العمر 32 عاما..حاصلة علي بكالريوس في الاعلام واكملت تمهيدي الماجستير .
2/ انسة عمرها 28 عاما تحصلت علي دبلوم في الحاسوب ودبلوم هندسة مدنية .
3/ انسة تبلغ من العمر 25 عاما ستتحصل بمشيئة الله هذا العام علي بكالريوس الحاسوب .
عميد الاسرة علي استعداد لتقديم يد المساعدة المكنة لاكمال مراسم الزواج.
والله المستعان

انتهي الاعلان

اصبت بصدمة عند اطلاعي علي هذا الاعلان..لا اعرف ما هو سببها. ربما لاول مرة اري اعلان بهذا الشكل علي صحيفة سودانية.ربما اشفقت علي عميد الاسرة..ربما اعجبت بشجاعته...شاركوني بالتفكير بصوت عالي .. قد نصل الي فهم وتحليل او حتي ازواج لهذا الاعلان .

ولكم الود

تنقو

معقولة بس


اعلان ذي ده
في مجتمع ذي السودان
؟؟؟؟؟؟؟؟؟؟؟؟؟
!!!!!!!!!!!!!1

المشكلة بعد العرس وليس قبله

العم تنقو
نقدر نفهم من الكلام ده انك عايز زول يتقدم عشان تقدرتتقدم للصغيرة؟؟

اخوانى الاعزاء


لاتستغربوا فى الزمن دا اي حاجة ممكنه

وانا اشيد بعميد الاسرة لى الخطوة الشجاعة دي

وبعدين البنات اذا كانوا ما موافقات ما كانوا عملوا الاعلان دا ولا شنو ؟

واحتمال يكون في اسباب نحن ما عارفنها غير قطار العرس مكن يفوتن

لكن خطوة غير مسبوقة عديييييييييييييل كدا

ولى قدام

..
.
تنقو ازيك؟
انا عارفه بعض البنات بتقدمو لاعلان الزواج
لكن الاب يقدم اعلان لزواجو بناتو......
ده غريبه و جريــــــــــــــــئه شديد

تحياتي

هي خطوة غير مسبوقة في المجتمع السوداني ، ولكن لا يوجد اي غبار عليها بل أن هذا الأب جدير بالاحترام والتقدير ، لأنه أراد أن يطمئن على بناته في وجوده وأخطب لنتك ، كمان من حق الفتاة أن تخطب لنفسها ، وهذه تعتبر مبادرة من الأب ، وكثير من الآباء يخطب لبنته ويختار لها ولكن بطريقة أخرى ، وعموماً هو موضوع يدل على بعض التغيرات في عادات المجتمع السوداني ،

العزيزة HOZY
شايف 3 علامات استفهام طلعن منك...حقيقي المشكلة اكبر بعد الزواج فعلا

Zoro العزيز
بيني وبينك كدا مادام الحكاية فيها مساعدة من عميد الاسرة بتحتاج لي وقفة برضو


الاخ/ ود العباسية
والله فعلا خطوه غير مسبوقة...انا اول ما اتطلعت علي الاعلان توقف تفكيري للحظة..فكرت في السودان والحال الذي وصل اليه الناس . فكرت في شجاعة رجل اختار ان يستر حاله وستر عرضه... فكرت في كمية الشباب المهاجر خارج الوطن ونسبة تاخر سن الزواج في السودان والوضع الاقتصادي ..وجدت العذر لهذا الرجل ولكني اظل افكر في نواحي اخري..وهي اعمدة من اعمدة الزواج الناجح...التفاهم والعاطفة..والتجانس....

كيفك ياZongiya
والله اكيد الراجل عندو تفويض من البنات..هل تعتقدي ان المشكلة فقط في من هو الذي يعلن الزواج ؟..ام في عمق المشكلة الناجمة عن ذلك والاسباب التي ادت اليه .


الاخ ..فيصل النعيمة
لا يستطيع احد ان يقول للرجل انت غلطان..اذا اعتبرنا انه اخد موافقة البنات.. حصل مرة في احد المساجد في السودان ان وقف رجل وقال انه يريد رجل لبنته وكانت طلباته بسيطة جدا..ان يكون مسلم وملتزم ..ويستطيع ان يحافظ عليها..وفعلا تقدم احد المصلين وفي صلاة العصر كان العقد..لا اعلم ماذا حدث بعد ذلك ..لكن كل من شهد هذا الموقف..كان علي قناعة ان هذا العقد مبارك ...
اتمني ان يوفق الرجل مادام قام بما قام به بنيه طيبة واراد سترة الحال. ولكن يظل السؤال حول الحالة التي وصل اليها المجتمع .

ولكم الود

تنقو

عمك تنقو salamat
حقيقي الواحد من الصعب يحكم على تصرفات الآخرين اذا ما كان عارف ظروفهم بالضبط شنو
لكن - من خارج الاطار- أنا بفتكر انه دي جريمة في حق البنات ومن الصعب تلقى أب مسئول يقوم بيها
لاحظ التأهيل الأكاديمي للبنات ونوعية الدراسة..برأي أنه فرص العمل ، على ضيقها في السودان، برضو حتكون متاحة ليهم. ثم انه أعمارهن نفسها يعني مش أكبر من اللازم. وكأنما الوالد بقول انا خلاص عملت العلي الباقي يعمله راجل غيري. حرام فعلا تفكير زي ده لأنه تخلي عن المسئولية...ده على اعتبار انه الأب بيعرض بناته في الجرائد لأنه (محمول) وما بقدر على الاستمرار في الوفاء بالتزاماته المادية تجاه البنات
وبعدين هو حيعمل دلالة يعني؟ كيف حيختار العرسان؟ مش ممكن يكونوا ناس في منتهى السوء؟
فعلا الاعلان غريب جدا وبستدعي التأمل

هل الأعلان فقط لغير المتزوجين؟؟؟

لا تثريب على رب الأسرة، فالزمن غير الزمن الذى كنا نعرفه وتعرفونه...
أنه زمن سوداني غيهب...
لا ضوء يمكن روءيته فى نهاية النفق...

أتمنى ان يكونن من نصيب شبابنا بالبورد..

عمك تنقو

سلام واحترام

والله الزول دا عجبني شديد .. ودا ابو داير يستر بناتو فعلاً

زمن ردي .. بس كل زمن برجالو

ويا ناس يا عزابه عليكم بهن فانهن طالبات ستره

وانا لو ما مسيك والله كنت من غير تفكير طبيت بس اتأخر الاعلان شويه

وربنا يعينو

وصدقوني بكره الصفحه الاولي حتتملي بنوع الاعلانات دي

ربنا يعينو ويستر ولايانا وولايها .. ديل البنات بقن اتقل من البطيخه

هوبليس
اليس الاسلام جعل موافقة المرأة شرط من شروط
صحة الزواج؟

جيمس


ومن قال لك بأنهن لم يدفعن من حر مالهن مصاريف الأعلان؟؟؟

السلام عليكم

يا جماعة لا تتحاملوا على رب هذه الأسرة دونما سبب

فى الإسلام حق الوالد على الولد ثلاثة: أن يسميه أسم حسن, وأن يعلمه أمور دينه ودنياه (بما فيها صنعة أو تعليم يتكسب بها لحياته), وأن يزوجه إن إستطاع إلى ذلك, ويشمل ذلك الأبناء والبنات

ألا ترون الآباء والأمهات فى كل الأسر السودانية تقريباً يهتمون إهتماماً خاصاً بتزويج الأبناء والبنات

وما فعله ذلك الرجل ليس بغريب فالصحابة عليهم رضوان الله كانوا لا يترددون فى سؤال الرجل المناسب لتزويج بناتهم

الراجل داك محمول يا جماعة وخير السترة ما ستر البنت, وقد جاء فى السنة أن الرجل إذا كان لديه ثلاثة بنات فرباهن وعلمهن وأدبهن أدباً حسناً ثم زوجهن دخل الجنة, وما ينطق عن الهوى إن هو إلا وحى يوحى

أشد على يد ذلك الأب وأقول له بارك الله فيك وفى بناتك وإن شاء الله سيرزقه الله رزقاً حسناً

سلام
الكريم ود البلد
مع احترامي الصحابة ما علقوا اعلانات في جدران الكعبة المشرفة
بل عرفنا أن بعضهم عرض على آخرين الزواج من بناتهن كسيدنا عمر رضي الله عنه عندما عرض زواج بنته حفصة على صاحبيه
يعني ناس بعرفهم وبعرف محاسنهم وبعرف فضلهم
أنا كنت عايزة أقول في البوست الفات انه الرجل كان ممكن يكلم امام الجامع البصلي فيه (الجمعة) وهو كامام بكون عارف أهل الحي وغيرهم وعنده فرصة اكبر في عرض زواج البنات على الآخرين
بس طبعا عزفت عن هذا الكلام لمعرفتي بنوعية التعليقات على هذا المقترح من الطعن في أئمة المساجد ....الخ
أنا متاكدة انه الوالد كان ممكن يلجأ لأسلوب أفضل وأحرص على سمعة البنات ومستقبلهن بدل الاعلان بالنيابة عنهن في الجرائد

وأرجو ألا يكون منتظر (أمير سعودي) يتقدم لخطبة البنات كما حدث مرة لما عرض والد عربي بنته للبيع (أو حاجة كدة) لأنه ما قادر يعول اسرته، فتأثر الأمير فيصل بن فهد واهتم بالقصة

هل أصبح وجود الخاطبة ضرورة في السودان الآن؟

السلام علكم ورحمة الله وبركاته
يا شباب
كيف الحال

انا اعتقد ان التصرف في حد ذاته ما غلط لكن يمكن الاسلوب ما جميل
يعني كان ممكن يكلم اي حد كبير معروف عنو الاخلاق الكويسة في عدة امكان مثلا او امام مسجد لكن كون انو يفتش عريس لبناتو عشان يسترن ابدا ما غلط بل بالعكس عين العقل لو كان غلط الصحابة ما كان عملهو

بس موقف الاب ذكرني ببرناكج ديني كان على الهوا سالت فيهو وحدة من الاخوات هل ممكن الواحدة تخطب لنفسهافقال الشيخ ممكن والسيدة / خديجة أم المؤمنين هي الكانت راغبة في زواج الرسول

فكان رد البنت السالة في التلفون طيب يا شيخ: اني اشهد اني ارغب في زواجي من مقدم البرنامج السيد(زول معروف عنه الصلاح) واني والله رفضت كثيرا من الناس لانيي ارغب به (مع العلم هي ليست في نفس البلد ولكن من مشاهدتها للبرامجة الدينية)
طبعا المذيع اتلغبط وقال ربنا يديك الاحسن مني بس انا متزوج وسعيد بزواجي
وانقطعت مكالمتها
بعد كدة قام الشيخ المستضاف للبرنامج وضح للبنت السالةانو خطبة البنت لنفسها حلال شرعا لكن حكى قصة السيدة خديجة (انها افضت لصاحبتها برغبتها في زواجها من الرسول فاخبرت هذه البنت الرسول علية الصلاة والسلام )وتم الزواج وهو وضح هنا ان الاسلوب بيلعب دور كبير في منع الحرج خاصة في بعض المجتمعات.



عشان كدة ومن القصة الانا شفتها وشهدة ملايين الناس ان التصرف ممكن يوكن بصورة تمنع الحرج وتحقق الغرض اتمنى ما اكون طولت عليكم

مع احترامي ليك يا رمانه
اتمنى انك تحاولي تتخلصي من دور الشريك المخالف
وتنظري للامور بصوره موضوعيه شويه
وشكرا

hey it is the right thing.

am also looking for a wife......................

خطوة شجاعة من أب شجاع يخاف ان تلجأ فتياته لطريق آخر.. وهذا حق طبيعي لأي بشر في ان يطلب الزواج.. رجل كان أو امرأة.. لو كنت رجلا لتقدمت فورا

----
البورداب غير المتزوجين..
يالله دقوا صدوركم واستجيبوا للدعوة وها هو سينتمينتال قبل العرض.. فليتقدم الخطى

عمك تنقو الديمه ظريف شاف اعلان قال يالطيف

يازول ولسع كمان انشاء الله بعد سنة ح تلاقي في نفس الجريدة
عرس بتي واخد بت عمها مجاني ههههههههه يكه

وربنا يستر الجميع

زاتوووووو

..
.
لي نحن علقنا على الموضوع ده بان المجمتع بقي ردئ او غيرو
البنات كلهم راشدات و متخرجات....واكيد ما كان الاب حيقدم على خطوه زي دي الا بموافقه البنات...
وبعدين زي ما هو مكتوب...انو الاب ممكن اساعد العريس في التجزهيزات اذا خالتو ميسوره.مامحتاج لاعانه من شخص تاني...كل ما في الامر انو الحكايه جديده علينا كمجتمع سوداني.....وجريئه جدا جدا في عاداتنا
الوحده مننا لو صرحت بنواياها تجاه الشخص العايزاهو بنظر ليها المجتمع بنظره دونيه او قالت انا عايزه فلان الفلاني و لو انو حــــــــــــــــلال.....شرعا
هو جايز الموضوع حسينا بيهو كانو سلعه... وعايز ابيعها..
لكن اذا البنات كانو موافقات فهم ادري...
يعني موقف الاب محير و في نفس الوقت...ما تقدري تحكمي عليهو
شجاعه + جراه و في نفس الوقت.....استفهامات كتيره
ومش في المجلات ناس بقدمو للزواج...كذا مره افتح المجله الاقي سودانيه طالبه شخص فيهو كذا و كذا وكذا....

كيفك تمامrummana
بس حبيت اعلق على موضوع الخاطبه و بقي ضروري لدرجه......خيااااااليه...وبالذات في دول الخليج
فما بالكم في السودان

تحياتي

بصراحة الموضوع دا انا محتار فيهو هل هو صحيح او غلط او عادي او فوق العادة علي العموم في اشياء الليلة بتكون غريبة ومستهجنة جدا لكن بعد سنة سنتين وخاصة في مجتمع يتحرك بدفع النفاثات بيكون موضع عادي زبادي والناس بتستغرب في الزمن داك انه في ناس استهجنت الحاجة دي في وقت من الاوقات لانه بيكون في مواضيع تطرح في ذاك الزمان اي القادم لو طرحت الان لما استوعبها عقل ولكن حينها ستكون عادية دا كوم
الكوم التاني ليك يا رمانة
المفروض انك ما تكتبي رايك ابدا في البورد دا في اي موضوع ولو دخلتي موضوع لقيتي الناس ماشة في اتجاه واحد كلها ( ولو كان خطأ ) برضو مفروض تحتفظي برايك وما تقوليهو وتبلعي كلامك عشان ما كله مرة تكوني لينا الزول المخالف الراي ولازم تجتهدي في انك ( تكوني امعة ) عشان نقبل كلامك وتشوفي الناس بتقول في شنو وتقلديها وتقولي زيها لانك ضايقتي (ناس) بي كلامك المشاتر المافي محله ومفروض تاني قبل ما تعلقي علي اي موضوع في البورد ترسلي ماسنجر وتعرضي فيه رايك لاولي الامر الذين يحددون الاتجاه العام للموضوع ومدي صلاحية رايك لهذا الموضوع
والله قصة واخرها لسة

رجل يستحق الاحترام والتقدير
ونتمنا من يجد نفسه قادر على الزواج
التوجه فورا لانه رجل يستحق النسب

الأعزاء تغريد وأساسي
شكرا على النصائح كتير وحيتم النظر فيها
ولو اني عارفة في النهاية حأختار ما يمليه عقلي وربنا يرحمك يا الربيتني على كده
تحياتي

زنجية
الخاطبة موجودة في كتير من البلاد خاصة العربية
وليها دور فعال في المجتمع
بتهيأ لي وجودها أحسن من اعلانات الزواج في الصحف

سلام لكم جميعاً

أساسى

يشهد البورد أن الأخت رمانة موضوعية فى كل ما تكتب وهى كسب كبير لهذا البورد, وفى الحقيقة إن الهدف الأساسى من هذا البورد هو تلاقح الآراء أى قياس الرأى مع الرأى المخالف ولو كان الناس كلهم على رأى واحد لما كان هناك داعى للنقاش

المهم, نحن كسودانيين ظللنا نستغرب كثير من الحكايات والأخبار العجيبة التى تصدر من المجتمع المصرى وهى لا تشبه عاداتنا السودانية البتة وأمثلة على ذلك حوادث الإجرام العنيف, ولكن فى الحقيقة لا نقوم بربط تلك الحوادث بالمتغيرات العنيفة التى مر بها المجتمع المصرى والضائقة الإقتصادية المريرة التى تعيشها كثيراً من الأسر هنالك وهى الدافع الأساسى لتلك الحوادث

اليوم, ونتيجة للمتغيرات العنيفة التى ضربت المجتمع السودانى فى عهد الإنقاذ أصبحنا نشاهد بعض من تلك الحوادث المصرية نهاراً جهاراً فى مجتمعنا السودانى وسوف لن نتمكن من وقفها لأنها ببساطة جزء من تطور المجتمعات الإنسانية ولا بد من أن يمر بها كل مجتمع, ولذلك أصبح وجود الخاطبة ضرورة, وهى وإن كانت موجودة فى الماضى تحت شكل ما إلا أنها أصبحت الآن ضرورة نسبة لتعقد الحياة والعلاقات الإجتماعية

المجتمع السودانى لا يزال فى طور التشكل بينما بدأ المجتمع المصرى يتجاوز نفص المرحلة بالإنتقال إلى مرحلة الأمة وإضمحلال عنصر القبيلة, أما نحن ففى بداية الطريق ولا تستغربوا إن رأيتم كل يوم شيئاً تعتبرونه منكراً, قد يكون منكراً اليوم لكن عادياً غداً

ودمتم

I think the current circumstances we are undergoing led to such behaviours....it is not wrong...if we considered many points :-
1- every family want to have their daughters married specially under the current situation :- tremendous number of girls in comparison to men, financial circumstances, men who used to go abroad, abandonment of men to marrige for the high cost and expenses of marrige, hard living condition that each family seeks to reduce number of family members if possible to take control...that can be through marrige for girls, the disintegration covered youth sector specially currently and the fear of families for their daughters push them to marry them as fast as possible ....etc..
this are only parts of the factors laid there...so, we just can't blame those who issued such declartion for marrige...and may be they will succeed to find the better men for their daughters.....who know