لحن الخميس ..هدية لملوك البوح في البورد

Post: #1
Title: لحن الخميس ..هدية لملوك البوح في البورد
Author: 3mk-Tango
Date: 09-24-2003, 11:53 PM

لحن الخميس ... حسنك امر
تماشيا مع سياسة البوح والاندياح السائدة في البورد

حسنك امر
احمل صبابات الهوي
واحضن براي نار الجوي
لا كل قلبي ولا فتر

حسنك امر ...
وا .. لهفة القلب الحنين..
وا.. لوعتو
شايل عذاب الغربة يحلم
ومنتظر يوم رجعتو
ابكاهو في دربك سفر
لكنو حابس دمعتو
وا.. ضيعتو لو ما رجع من غربتو
وا ضيعتو
لو ما هجد بعد السهر
وارتاح علي خصل الشعر

حسنك امر
والشوق بحور ما ليها حد
ما ليها قيف
اعبر بحر
يمتد تاني بحر جديد واحتار واقيف

حسنك امر ..
قول لي كيف اقدر اصل ..قول بالله كيف
وا لهفتي ..... وا لهفة القلب الرهيف
زي قارب الليل اغرق
وما اتوسد افاقو القمر

حسنك امر
..مهما صعب درب الوصول
لازم اصل
ما بتشكي في دربك حروف
ما بتزرف الدمعات مقل
اتحدي دربك لو يطول
ومن غيرنا نحن البحتمل
وايه يعني في دربك هجير
والفرقة نيران تشتعل
وايه يعني لحظات انتظار.. للعمرو ضاع من غير عمر

ولكم الود
ملحوظة ..الداير يبوح ولا يبكي ..يدفنو هنا قبلو ويطلع بالراحه

تنقو

Post: #2
Title: Re: لحن الخميس ..هدية لملوك البوح في البورد
Author: HOPEFUL
Date: 09-25-2003, 00:05 AM
Parent: #1

قالت زات مساء
قائده ملوك البوح الجميل
البائحه عديله المتوهجه
رد الله غيبتها التى ألمتنا

يا رجل قادم من أين بالله ..قل لى من أين ..
من فواصل الجبال والخضرة ..والنخيل والبلدات
يا طالع من حمرة الفجر ..مضمخا بألعشق
مالي أرى يديك ملوثتين بالورود وعيناك مغرورقتان بالدهشة
أتيت يغزوك الحلم بالتجوال في غابات القلب
فهل أدهشتك الجداول ..وأغرتك رائحة التمر
هل فاجأك البوح ألتساب !
لاتبتعد كثيرا...فثمة بحر شاسع بحجم الحلم
لعله امتداد الروح يرنو آلي سماواتك
هل رأيت السرور مجدولا بضفائر النخيل
وسمعت وشوشة العصافيروالزرازير والقمارى
إذن ..ها قد هيأت لك القلب وفرشته بالرمل
هل أشعل النار لتبدأ القصيدة
أيها ألشاعر ..ثمة حمائم بيضاء تعيش فى شعرك
أيها المسكون بحب عزة
وهذا ألطريق المفضى ألى قلبك معبد بألاقحوان
هيا ....هيا أمطر على تربة ألروح ..كى ينبت إلزهر
أنشدنى فرحا كى ألون بالعطر
أغدقنى شعرا ..كى أتفتح سنابل
أنت الروح فى زمن أليباس
لطالما اهتديت أليك ...إذا سأرتعش بين يديك وأغنى إذدهارى
هل يبارحنى ألحزن لو سمعت عطرك أو شممت صوتك !!!!؟
يا صاحب ألجلاله وألسمو
لو كنت أنا ألسهل ..ألحقل...ألجدول فى إبتهاجى
لكنت انت ألجبل ..ألربيع وألنيل فى إحتواءك
دثرنى
أنا طائر أرعشه ألبرد

عمك تنقو .. جميل جميل ما ترسمه علي الشفاه من بسمه وعلي الروح من فرحه
لك الود... كل الود عزيزي

Post: #3
Title: Re: لحن الخميس ..هدية لملوك البوح في البورد
Author: serenader
Date: 09-25-2003, 01:22 AM
Parent: #1

شوف يا عمنا تنقو، بكا الرجال أصلا حار... لكن سأنوب عن بكاي أنا ببكاء عبد الله النجيب قبل زمن
عيونك كانوا فى عيونى
عيونك كانوا فى عيوني ... يصدوني وينادوني
أخاف لو قلت حبونى ... وأقول يمكن يحبوني
يعزوني ويصافونى
عيونك كانوا فى عيوني
أصبر بي هواك البال ... وأزرع قلبى بى الآمال
عشقتك وكنت عندى خيال .. مجرد حبى ليك محال
أداريه واخليه
واخاف من قلبى يحكيه
عيونك كانوا فى عيوني
ظروفنا تحرم اللقيا ... تعادى الحب ولو طاهر
يعيش فى خوف من الدنيا ... يكون مكتوم وما ظاهر
فكيف احساس ... تحسه الناس... نضيق بيهو
ونعاديه... وكل الكون يشك فيه
عيونك كانوا فى عيوني
حبيبي لانك انت عفيف ... رقيق بتخاف من الأشواق
تعال .. نتحدى حتى الخوف ... تبوح بهواى
وأقول أهواك ... نكون ظاهرين.. وما خايفين
نعيش ليه... ونذوب فيه... نجاهر للانام بيه
عيونك .. كانوا فى عيوني
نحاول نبرز الاخلاص... وزادنا البهجة والنشوة
نفتح فى قلوب الناس... مشاتل من حنان حلوه
نقول ليهم .. نوريهم
... معانيه... وأمانيه
ونفخره للجميع بيه
عيونك كانوا فى عيوني

Post: #4
Title: Re: لحن الخميس ..هدية لملوك البوح في البورد
Author: سجيمان
Date: 09-25-2003, 01:43 AM
Parent: #1

عمي تنقو.... اختيار موفق

لكن يا اخوي.... انت داير تقصر اجلنا..... الخميس وينو حسي؟....

ديل ناس البوح...........ونحن ناس يا النبي نوح

Post: #5
Title: Re: لحن الخميس ..هدية لملوك البوح في البورد
Author: Rawia
Date: 09-25-2003, 04:38 AM
Parent: #1

وطالعه براحه.........

Post: #6
Title: Re: لحن الخميس ..هدية لملوك البوح في البورد
Author: bayan
Date: 09-25-2003, 05:46 AM
Parent: #5

تنقو يا زول انا اشيل واقول انت شاب وكدا
ايه الاغانى الدقة القديمة دى
بعدين ناس البوح ديل زمان اسمهم البكاين

Post: #7
Title: Re: لحن الخميس ..هدية لملوك البوح في البورد
Author: 3mk-Tango
Date: 09-25-2003, 12:57 PM
Parent: #1

.

هوب فول
تسلم عزيزي ..لكن ما قلت لي البوح بتاع عديه المتوهجة دا ..لسان حالك ولا شنو ؟؟
يعني انت والكاشف اخوك ؟؟ ولا طلعت بالراحه منها ؟ لووول

Srenader
لك التحية... شنو يا اخوي كل واحد استعان بي بوح اخوهو... ياخي ما تبكي ..انتهد بس كفاية سلمت علي الكلمات الراقية

سجيمان
الله يخليك .. ومالك يا اخوي تشابهت عليك الايام ولا دا فرق التوقيت ..مش يوم الاربعاء الساعة 11 يعني باقي ساعة للخميس ؟ معقول الخبر بعيدة من الرياض للدرجة دي ؟ ولا بكون دا البوح اثر ؟
لووول ..سلمت يا حبيبنا ..
Rawia
قبضتك ... ابكاهو في دربو السفر ..لكنو حابس دمعتو .. نمشي وين عاد...

Bayan
والله يا دكتورة انا شباب ..كلمة عمو زادتني عقدين من الزمان .. ..والله الاغنية قديمة لكن فيها ما بخليها جديدة كل يوم ... بوح ونوح ..وبكي .. وتكسير .. و ... تعددت الاسماء ..والحاله واحدة .. ربك يستر بس

ولكم الود
تنقو

Post: #8
Title: Re: لحن الخميس ..هدية لملوك البوح في البورد
Author: haneena
Date: 09-25-2003, 01:25 PM
Parent: #7

عمك تنقو
تسلم علي هداياك الخميسية

ما سامعة الاغنية لكن بعرفها كويس
اما الكلمات..كميات من الرقة واللوعة بها
منو الشاعر بالمناسبة؟
وحتي نستمع لها
لك الشكر
والمكسرين الله ليهم بس

Post: #9
Title: Re: لحن الخميس ..هدية لملوك البوح في البورد
Author: bint algazeira
Date: 09-25-2003, 05:14 PM
Parent: #8

عمو تنقو
شكرا لك
هديه رائعه
انني ليس من اميرات البوح في البورد.. لكن قلت اسمع واطلع براحه

لك تحياتي

Post: #15
Title: Re: لحن الخميس ..هدية لملوك البوح في البورد
Author: 3mk-Tango
Date: 09-26-2003, 01:49 PM
Parent: #8

hanena
تسلمي ياستي كتير وكل خميس وانتي بي خير .....قلتي لي ما سامعة ولا ما دايرة تكوني مع الجماعة... لوول.. ياستي طلعناك من المجموعة بس قولي سامعة وخلاص
ليك الف تحيه

تنقو

Post: #16
Title: Re: لحن الخميس ..هدية لملوك البوح في البورد
Author: 3mk-Tango
Date: 09-26-2003, 01:59 PM
Parent: #15

bint aljzera

كيفك ياعزيزة..وين الغيبة الطويله دي ..برضو انتي ما من النواحين ..ياناس منو طيب من النواحين..اكون غلطت في العنوان انا ياربي ..كفاية مشاركتك بس
تسلمي كتييير

تنقو

Post: #10
Title: Re: لحن الخميس ..هدية لملوك البوح في البورد
Author: بلدى يا حبوب
Date: 09-25-2003, 05:21 PM
Parent: #1

عمك تنقو
بس قالوا البوح ده فى البرود كتر مش فأل خير بينى وبينك

وايه يعني لحظات انتظار.. للعمر وضاع من غير عمر

لحن جميل وكلمات معبرة واخر الاغنية والله عنوان بوست جميل ممكن اسأذنك يكون عنوان بوست
مع تحياتى

Post: #17
Title: Re: لحن الخميس ..هدية لملوك البوح في البورد
Author: 3mk-Tango
Date: 09-26-2003, 02:15 PM
Parent: #10

بلدي حبوب الحبيب

والله بيني وبينك فعلا فأل حسن كمان ..واحسن من المعارك الدونكيشتوية دي

الكلمات فعلا جميله وصلاح اداها بطريقة معبرة جدا..والعنوان اكيد حيكون جميل
سلمت ياحبوب..

تنقو

Post: #11
Title: Re: لحن الخميس ..هدية لملوك البوح في البورد
Author: Dr. NassurEldeen
Date: 09-25-2003, 06:10 PM
Parent: #1

تنقو يا حنين

والله اختيار جميل لكن الله ينجضك كان نجضتنا الليله

لكن دكتورة بيان انتي ليه دائما ناطه
لحكاية للاعمار يا خي اولا الاعمار بيد الله
وانا سبق وقلت ليك انتي دكتورة في
مصلحة الاحصاء ولا شنو لكن ينتابني شعور
انتي زي مثلا كده يعني عايز اقول الواحد لو لقي
روحو كبير وولدو ولا بتو قدرو حقو ما يركز علي
الحتة دي لانو الشباب شباب الروح مش بمقياس
السنين عليك الله ريحينا من حكاية انت عجوز
وانت كبير ودقة قديمة لانو ما في داعي للمداعي
وخلينا نهنأ بجمال النغم وحلو الكلم

Post: #18
Title: Re: لحن الخميس ..هدية لملوك البوح في البورد
Author: 3mk-Tango
Date: 09-26-2003, 02:50 PM
Parent: #11

دكتور نصر الدين...وينك يا امير الشباب

قلت لي نجاض عديل كدا...لوووول .الصبر بس يا الحبيب

روحك شباب وسمعك شباب..وصبرك زاتو صبر شباب
دمت ملئ بهذا الشعور

ولك الود

تنقو

Post: #12
Title: Re: لحن الخميس ..هدية لملوك البوح في البورد
Author: THE RAIN
Date: 09-25-2003, 07:57 PM
Parent: #1

تنقو الفنان

أول شى بالله أوعى تحسبونى مع البكايين

نحن قاعد نقطعو ساى فى المصارين ما بنبكى

لكين على بالإيمان حسنك أمر دى اتقطعت فيها، قميص عامر والله مع البكايين، بكا جد جد

دى حقت محمد يوسف موسى، ولو يوم كمان جبت للجماعة البكايين، كلمة، اللى هى اعيش ظلمة وانت صباحى، برضه بتاعة محمد يوسف وبن البادية، عاد اليوم داك فراش عديل

اها الفاتحة مقدما

شكرا يا مبدع

Post: #19
Title: Re: لحن الخميس ..هدية لملوك البوح في البورد
Author: 3mk-Tango
Date: 09-26-2003, 02:57 PM
Parent: #12

THE RAIN

كيفك عزيز ..يا سيدي فطيناك في الحساب..لكن خدها وصية من عمك دا ..فضفض احسن ليك ..ما تخفيهو شعورك عشان ما يحصل ليك حاجة ,ولا تجي مرحلة الانفجار وما تقدر تسيطر علي روحك
انا كلمة بجيبها..وبختها وبهديها ليك عدييييييل شن قولك ..حتفضفض بعد كدا ولا لسة حتكون كاتموا..لووول بس انت قول وانا جاهز

لك الود

تنقو

Post: #13
Title: Re: لحن الخميس ..هدية لملوك البوح في البورد
Author: خضر حسين
Date: 09-25-2003, 11:41 PM
Parent: #1

عمنا تنقو

شكرا كثيرا على اتحافنا بهذا العمل الراقى .. والأغنية دى ـ على وجه الخصوص ـ من أجمل أغانى ودالبادية.
غايتو أنا بكاى لو البكا بفيد .. خصوصا لما أسمع أغنية صلاح مصطفى البقول فى واحد من مقاطعها

لوانت زهو الحسن فى عيونك بدا
خليك أمين فى العشرة لى آخر مدى

الأخ .. سرندر
دحين يا أخوى أغنية عيونك كانو فى عيونى .. دى ما حقت الشاعر كباشى حسونة .. ولا الواحد كبر وذاكرتو خربت

ـ.ـ.ـ.ـ.ـ.ـ.ـ.ـ.ـ.ـ.ـ.ـ.ـ
البلاد التى ضيعت خاتما، البلاد التى دائما
ستظل محنية، فوق الجثث
ونحن سنبقى هنا، هناك، سوف نعلو
بالذنوب الخفيفة فوق هذا العبث

Post: #20
Title: Re: لحن الخميس ..هدية لملوك البوح في البورد
Author: 3mk-Tango
Date: 09-26-2003, 03:01 PM
Parent: #13

خضر حسين..الشجاع

والله انت شجاعتك شجاعة بطل.. البكا عندو فايدة واحدة يا اخوي..انك بتخفف عن نفسك
انزل ليك اغنية صلاح مصطفي لكن بي صوت حنان النيل رايك شنو ..ودي هدية علي شجاعتك دي

تنقو

Post: #14
Title: Re: لحن الخميس ..هدية لملوك البوح في البورد
Author: sentimental
Date: 09-26-2003, 01:29 AM
Parent: #1

جنى وجن البت لما تكون شينة وتجيك ناطة فى كل مكان

Post: #21
Title: Re: لحن الخميس ..هدية لملوك البوح في البورد
Author: 3mk-Tango
Date: 09-26-2003, 03:05 PM
Parent: #14

sentimetal

الجن بداوه كعب الاندراوه...بالمناسبة الاندراوة دي شنو ؟

Post: #22
Title: Re: لحن الخميس ..هدية لملوك البوح في البورد
Author: THE RAIN
Date: 09-26-2003, 03:07 PM
Parent: #1

تنقو الفنان

يعنى البكا ده الا يكون بالدموع ولا شنو

خلاص انا فى انتظار كلمة، ومجهز شوال بتاع مناديل، وبحيرة بتاعة دموع

Post: #24
Title: Re: لحن الخميس ..هدية لملوك البوح في البورد
Author: 3mk-Tango
Date: 09-27-2003, 12:14 PM
Parent: #22

THE RAIN

اها يا اخوي ليك كلمة
اعيش في ظلمة وانت صباحي ..انت طبيبي واموت بي جراحي
بي شعري رفعتك اسمي مكانه..يا الجازيتني بي كسر جناحي

اها الفاتحة يا اخوي

دمت يا حبيب ولك الود

تنقو

Post: #23
Title: Re: لحن الخميس ..هدية لملوك البوح في البورد
Author: خضر حسين
Date: 09-26-2003, 10:35 PM
Parent: #1

عمنا تنقو

شكرا كثيرا ـ مقدما ـ على أغنية صلاح مصطفى .. غايتو الواحد حاول "بعض البوح" .. وأخلى الباقى لملوك البوح والتفرد أمثال المطر The Rainوبقية العقد الفريد .. انت عارف يا عزيزى الفرق بين البكا والبوح شنو؟ الفرق بيناتم زى الفرق بين الكتبتوا أنا "بكاء" وبين الكتبو المرهف الراقى المطر "بوح"

شكرا مجددا

ـ.ـ.ـ.ـ.ـ.ـ.ـ.ـ.ـ.ـ.ـ.ـ.ـ
البلاد التى ضيعت خاتما، البلاد التى دائما
ستظل محنية، فوق الجثث
ونحن سنبقى هنا، هناك، سوف نعلو
بالذنوب الخفيفة فوق هذا العبث

Post: #25
Title: Re: لحن الخميس ..هدية لملوك البوح في البورد
Author: 3mk-Tango
Date: 09-27-2003, 12:22 PM
Parent: #23

عزيزنا خضر حسين

بكا وبوح ونواح ..تعددت الاسباب والموت واحد
كنت اعتقد ان البكي هو اصدار صوت عالي ملئ بالوحيح والنويح..اما البوح فهو البكي لكن بصوت منخفض فيه محاوله للتغطية بجلباب انيق

اعتقد ان كلاهما حاله انسانية مسوحو بها خصوصا للرجال

اها حتكتب شنو بعد ما تسمع الاغنية دي ؟؟

ودي لك
تنقو

Post: #26
Title: Re: لحن الخميس ..هدية لملوك البوح في البورد
Author: فتحي الصديق
Date: 09-27-2003, 12:39 PM
Parent: #1

عمنا تنقو
لك التحية يا رائع
غايتو كتلتنا عديل بي (اتحدى دربك لو يطول) بديعة بديعة بديعة..
لك الشكر سيدي

Post: #27
Title: Re: لحن الخميس ..هدية لملوك البوح في البورد
Author: 3mk-Tango
Date: 09-28-2003, 12:49 PM
Parent: #1

تسلم عزيزي... فتحي الصديق
ومشكور علي الطله

تنقو

Post: #28
Title: Re: لحن الخميس ..هدية لملوك البوح في البورد
Author: الجندرية
Date: 09-28-2003, 12:56 PM
Parent: #1

يا اخوني انتو ما بتخافوا من الله
ما حرام عليكم
اقعد ابراي انا من بوست لي بوست
اشحد في لنك الحفظ دا

Post: #29
Title: Re: لحن الخميس ..هدية لملوك البوح في البورد
Author: 3mk-Tango
Date: 09-29-2003, 00:12 AM
Parent: #28

الجندرية الغاليه ..ولا تزعلي ياستي

دا لنك حسنك امر للحفظ

Save @ PC

ودا لنك غلطان بعتذر وانا زاتي بعتذر

Save @ PC

اغنية كلمة فيها مشكلة وجاري علاجها

وتسلمي

تنقو

Post: #30
Title: Re: لحن الخميس ..هدية لملوك البوح في البورد
Author: الجندرية
Date: 09-29-2003, 10:17 AM
Parent: #29

يديك لمن يرضيك يا تنقو
حفظتهن وسمعت وكيفت