الخطــــاط مامون احمد محي الدين بيننا؟؟ ولا ندري؟؟؟؟؟

الخطــــاط المامون احمد بيننا؟؟ ولا ندري؟؟؟؟؟

تفاجأت بوجود اسمه و صورته في بوست التشكيلي طيفور : ذكريات من الزمن الجميل ..
إنه مامون احمد محي الدين ..خريج قسم الخطوط العربية بكلية الفنون الجميلة ..
الخطاط الى جانب كونه رساماً وملوناً ..كان أحد الذين يجملون صحافتنا اليومية بالعناوين المخطوطة يدوياً..
ثم أخذته الغربة (القريبة)..
ليكون واحداً من مئات التشكيليين الذين ينتجون للآخرين (الفكرة الإبداعية)..
ويا لها من فكرة عندما تأخذ من الحرف العربي والزخرفة الاسلامية شكلاً جمالياً..ورمزاً قرافيكياً مجوداً..
فالحرف عند المامون أراه يشبه تماماً مدينته الدويم في بعديها (شبشة الصوفية وبخت الرضا مركز التربية والتعليم )..

المامون ..لم يكف عن تطوير الحرف العربي والتلاعب به أحياناً محاولاً الوصول به الى حدود اكثر جمالاً ..لم يكف عن التطوير والبحث ليتخذ من برامج الكمبيوتر وسيلة ليدخل عبرها حرفه المصمم..


**اختارته لجنة متخصصة لتزيّن حروفه المصممة عناوين "كتاب في جريدة" الذي تصدره منظمة اليونسكو مع مؤسسات اخرى وهو يتناول المؤلفات الإبداعية العربية ، فكان مامون الى جانب صديقه التشكيلي المصري محي الدين اللباد وآخرين
دوراً في إخراج الاصدارة بشكل مميز..
إذن هذا هو المامون الذي بيننا ..وكما تعرفه الاوساط الفنية والثقافية في مدينة جدة التي تحتضنه ومجموعة من التشكيليين بحضوره المتميز..ايضاً تمثل المؤسسة التي ينتمي اليها
إحدى المؤسسات القرافيكية الراقية ليس في المنطقة الغربية فحسب وانما في المملكة بكاملها وبالطبع للمجموعة التي هناك الدور الاساسي في ذلك التميز ..
كيف لا تتميز تلك المؤسسة وافكارها الابداعية ينتجها فريق على قمته التشكيليين عبد الرحيم فؤاد (طيفور في البورد) وعمر صبير ومامون احمد ؟؟؟؟



- من اسكتشات المؤسسة ..


فمرحباً بك صديقنا المامون ..في هذه المساحة ..
ومرحباً بحروفك وخطوطك ..
دعماً للحلم ..
دعماً للحضور الجمالي ..
ولمسح القبح الذي استشرى ..
-----------------

-----------------------

------------------------


لم احتمل هذه المفاجأة ..
لذلك كتبت في عجالة ما كتبت ..مع علمي بأن الحديث عن حروف مامون حديث لا تطوله كلماتي..
ولكن فلتكن تحية عبرك الى كل الخطاطين السودانيين ..اينما كانوا ..

وألف مرحب يا مامون ..


--------------------------تنويه:
** اغلب الاعمال التي اتيت بها هنا ..هي من موقع المحترف السعودي المؤسسةالتي ينتمي اليها مامون وعبد الرحيم فؤاد ..
حتى لا يقع لبس ما..فموقع المؤسسة هو الوحيد الذي يتيح لي ( اون لاين)اعمالاً فيها اثر ولمسات مامون وعبد الرحيم وصبير..إن لم تكن كاملة لهم..لذلك وجب التنويه ..



قيسان

يا مراحب بالفنان مأمون احمد

نتمنى لك اقامة سعيدة..

اكيد حتكون علامة فارقة..

وشكرا للدفعة قيسان على هذا التقديم المفوه


وكل سنة وأنتما بخير.. محققى الامانى

شكراً بيان..
على ترحيبك معي بمامون ..
رغم تحفظي على كلمة "دفعة" دي ..
لاكين ..بالله شوفي الافكار القرافيكية المكتملةالجمال لما يكون وراها فنانين :


-------

----


شكرا بيان ..

وتاني مرحب يا مامون ..

قيسان

يا سلام يا قيسان والله اسعدتنا الرؤية الجميلة وكحلت الاعين بالجمال والابداع

وشكرا ليك شديد. دائما مثري حاستنا الجمالية....


دفعة هو انا صغرتك مجاملة وعملتك دفعتى
تذكر لما جينا البندر لقيناك ناقش اى حاجة
وديتنا تفسحنا فى جنينة الحيوانات .. ووقلنا ليك عايزين ايس كريم
قمت قلت لينا.. يا وهم ايسكريم شنو لو انتو
اكلتو ايس كريم البياكل الدوم والنبق واللبة منو؟
ونحنا لعنا ميتين شناتنا وتجغمنا الشاى؟
























يا جماعة الزول دا اتجرس شديد من دفعة دى لزوم انه فى السوق وكدا ما نطفش الجكس
قيسان دا صغير شديد.. واتخرج 10 دفعات بعدنا

الجميل قيســــان

ألف مرحب بالصديق مامون ..
وأكيد موعودين بكل رائع وجميل ..

تحياتي وودي

حقيقة الزول البشوف "حرف زولك ده" بلقى روحو بشوف الحرف العربى بمنظور جديد..وغريب..وطبعا جديد دى ما بتاعة السوق..بتاعة زول شواف تربية كل اصدقاء الفنون الجميلة من ضمتهم حسن موسى صاحب الحرف المتحدث..ورسام سابقا ومليون معرض تشكيلى..و..و "وما تحلينا ننفصم هههههه"

له التحية..لقد لفت نظرى حقا..بتجاربه القليلة المعروضة هنا..

ولك التحية على البر بالاصدقاء..يا قيسان

"عندو لى حرف كسرة؟ مريووووووقة"

التحية للا خ والصديق والدفعة مامون،
مامون واحد من اقدر الخطاطين الذين تخرجوا فى كلية الفنون فاذا تحدثنا عن خطاطى الكلية المتميزين فلابد ان نذكر الاستاذ عثمان وقيع الله واستاذنا احمد عبدالرحمن واستاذنا السر حسن سيداحمد
ومامون احمد محى الدين وعمر درمة ضمن آخرين ، لا استحضرهم جميعا فى هذا المقام.
شكرا قيسان

العزيز قيسان

حــروف اسـمك ..
عـقـد منضوم بخــيط النور...

التحية لك ومرحباً بصديقك الخطاط مامون احمد محي الدين اضافة جديدة
حقيقة نفتقد لهذا الفن وهذه الاعمال الجميلة في هذا المنبر الذي يكاد يخلو تماماً من الاعمال التشكلية..
اذا دعني احـط رحالي عند فيحاء واحتكم الخضراء واستزيد من هذه الظلال الوارفة الاغصان .. عزيزي

اضغط هنـــا لمشاهدة روائع الفن التشكيلي اهداء لقيسان ومامون وكل المهتمين
ولــــيـــد

حسناً ..
(دي كلمة افتتاحية بس ..)..
-------------------------------------
د. بيان ..سـلامين
شكراً لرجعتك والمرور من تاني ..

** بعدين انتي متأكدة بيناتنا عشرة دفعات بس؟؟؟؟؟؟؟؟؟؟؟
فيكي الخير .. لووووووووول
تحـــــايا
---------------------------------

صديقي معتصم دفع الله ..تحايا
شكراً لمرورك وتوقفك مرحباً بمامون ..
نعم انا ايضاً اظن اننا موعودون بما هو رائع وجميل من مامون وطيفور ..
ومنك برضو ..يا معتصم ..
شكراً ليك..

------------------------------
استاذة تماضر ..
الترحيب بمامون محاولة عشان نكبّر كوم الجمال في البورد ..وبالذات الشوف ..
بعدين زولي دا حروفو مش (تفك الريقة) وبس ..حتى (طرقة) واحدة تقعد المريوق لحدي العشا..
(عليكي الله لو لاقاكي اي عدد من "كتاب في جريدة " عايني لحروف مامون في العناوين عاملة كيف)..
البر بالاصدقاء التشكيليين يا تماضر واجب وبعداك عشان ..و..و..وعشان ما ننفصم برضو ..
تحــــايا ..

-------------------------------
الاستاذ احمد المرضي ..
سلامين عليك وعلى المعاك ..
مرحباً بك مُرّحباً بصديقك ودفعتك مامون ..
وبالطبع هي تحية خاصة للخطاطين السودانيين ..اينما ما كانوا وهم يهدون
للناس آيات بيِّنات عبر الحرف الجميل واللوحة المكتملة .."حتى وإن كان الناس اهل فرنجة" ..
نعم ..لهم التحايا اينما ما كانوا ..
سعيد بمداخلتك ..

--------------------------
وليد (تلاتة تسعتين)..
يا الف مرحب بيك ..
نعم موقع المؤسسة التي ينتمي اليها مامون والتشكيلي ود فؤاد (في البورد طيفور) وآخرين ..
لها اعمالاً مميزة ..
وليد ثِق تماماً ان المحاولات في الحضور الجمالي تشكيلياً في البورد لن تتوقف ..
شكراً وليد ..



اقعدوا عافية

قيسان

.

نحن مع الشوف، والبيجي منك كله زين يا أستاذ قيسان
أسرتني تصاميم أغلفة كتاب في جريدة، فبها خطوط مميزة فعلاً.
أهلاً بالخطاط مأمون محي الدين
وشكراً لمن أنطق الموسيقي، قيسان
تحية
إيمان

شكرا يا قيسان لتقديمك لمحات من سيرة الفنان المبدع مامون أحمد محيي اليدن الدي يواظب باستمرار على تقديم الجديد في الخط ويتعمق قي معارف الكليجرافي باستمرار وقد قدم عصارة تجربته في منتدى جدة الإبداعي في مادة مسجلة في غرشيف ذلك المنتدى الذي توقف منذ سنتين. آمل ان تستفيد عضوية المنبر وقرائه من قدرات مامون الإبداعية التشكيلية وما يجود به من معارف وخبرات.

الإسكتش الذي يظهر فيه شخص أعلاه هو طيفور الخالق الناطق وقد أبدع فيه طيفور رسم نفسه وهذه الزاوية الإستغراقية التي ينظر بها طيفور يقدر على التقاطها رسام بارع فهي تمثه تماماً لكن قبل سنوات قبل زحف التصحر على الراس .

اهلا بيك العزيزة ايمان احمد..
وانتي ترحبين بمامون ..
اتمنى ان يجد مامون وقتاً ..
حتى يتحفنا ببعض اعماله ..
فالحرف عند مامون يا إيمان له موسيقاه الداخلية الخاصة ..
محاولاً اعطاءه اكبر قدر من الحرية ..
التي تتيح له "الرقص" ..واي رقص؟؟
رقصاً ملتزماً ..يحفظ للحرف هيبته ..
شكراً ايمان احمد..

*********************
استاذنا بشرى الفاضل..
تحايا ..
بالطبع لن اعلق على حديثك عن مامون ..
أعلم انك تعرفه اكثر مني ..
ولكني اردد معك :
آمل ان تستفيد عضوية المنبر وقرائه من قدرات مامون الإبداعية التشكيلية وما يجود به من معارف وخبرات.
----------
* نعم..بخصوص الاسكتش يحمل ملامح اخونا طيفور .. اخترته اول عمل من موقع المحترف "لانو قطع لي الشك" ..

أتمنى ان يكون هذا البوست بمثابة دعوة لطيفور ..كي يظهر لنا "عبد الرحيم" التشكيلي الخزاف ..
ولمامون ايضاً كي يدعم حضور التشكيل في البورد..

فلهم التحية جميعاً..
ولك استاذنا بشرى ..

قيسان

اهلاً مامون الفنّان .. وشكراً قيسان الفنّان .