Post: #1
Title: كراكــــة ... شنــــدي؟؟؟
Author: فريد ودالمسيد
Date: 12-25-2004, 00:01 AM
Parent: #0
طبعاً ما في زول فيكم ما بعرف الكرَاكة بتشديد الراء ، وناس ولاية الخرطوم تفضلاً منهم وعملاً بفضل الظهر عندهم كراكة زايدة قالوا نتبرع ليها لي ناس شندي وكلفوا واحد من السواقين ومعاهو مساعد عشان يوصل الكراكة لي شندي ، قومي إنتي يا كراكة السجم أتعطلي في نص الطريق ، لا بقت في الخرطوم ولا في شندي ، السواق رسَل المساعد للخرطوم عشان يبلغ وناس الخرطوم ما قصروا بعد شهر رسلوا مهندس عشان يعرف الحاصل شنو ولقى إنو الكراكة محتاجة لي إسبير والإسبير مافي في السودان ، المهم إنو السواق قال ليهم أنا مهمتي إنتهت وجيبوا ليكم زول يحرس الكراكة لأنو دا ما شغلي ، وعينوا غفير للكراكة البين شندي والخرطوم والغفير بعد ما قعد ليهو إسبوع رسل لي ناس الخرطوم وقال ليهم أنا ساعات عملي تمانية ساعات بس وباقي اليوم أنا ما مسئول عن الكراكة ، وعيَنوا معاهو إتنين يعني بقوا تلاتة غفراء على الكراكة بشتغلوا تلاتة ورديات والغريبة اليوم كلوا تلقاهم التلاتة قاعدين مقاشرين كراكة الجن دي والإسبير قالوا رسلوا ليهوا في ألمانيا وما وصل .
المشكلة الجديدة بقت في الخرطوم لأنو المحاسب في الولاية عمل تقرير وقال الغفراء التلاتة الحارسين الكراكة ديل وما بصرف ليهم رواتب لأنو ما تابعين ليهو.
إتخيلوا الحل كان شنو .... فتحوا مكتب جديد بالولاية وعينوا فيهوا محاسب وركبوا يافطة مكتوب فيها (محاسب كراكة شندي) ولي يوم الليلة الإسبير ما جاء من ألمانيا.......................
|
Post: #2
Title: Re: كراكــــة ... شنــــدي؟؟؟
Author: وليد محمد المبارك
Date: 12-25-2004, 04:03 AM
Parent: #1
بالله شوف
|
Post: #3
Title: Re: كراكــــة ... شنــــدي؟؟؟
Author: nazar hussien
Date: 12-25-2004, 05:22 AM
Parent: #2
| Quote: فتحوا مكتب جديد بالولاية وعينوا فيهوا محاسب وركبوا يافطة مكتوب فيها (محاسب كراكة شندي) ولي يوم الليلة الإسبير ما جاء من ألمانيا....................... |
هو ما بركة الما عينو عليها والي...ومهندس مقيم لكراكة شندي...
انت دايرا تموت ميتة حمار في سفّاية...استني يا اخي لامن يجي الاسبير
وبعدين الالمان زاتهم ان ما فحصوه اسبير كراكة والله اسبير مصنع انت قايل
برسلوه؟ وبعد ما يصل السودان...ناس الجمارك...ان ما مشي الكشّيف وناس التعريفة
والمخلص...انت قايل بفكوه....والمخلص كان ما قفل عليه شباك الدمغة اسبوع اسبوعين
انت قايلو بخلص الاسبير....وبعد داك كلو...ان ما عرفو قروش التخليص تندفع من وين انت قايل المخلص بلقي حق الدمغة....خليها علي الله ساكت...الكرّاكة دي بعد دا الا يحركها سيل
كان واقفة جهة العواتيب الله اداها وكان مقطوعة في جبل جاري ياها المصدية قبلها...وبعد شوية تلاقي ليك عرب عملوا ليهم راكوبة هناك وسموها حلة الكراكة...وسللوا منها حديدة حديدتين للراكوبة...وتعمر الرواكيب شوية شوية بي حديد الكراكة.
|
Post: #4
Title: Re: كراكــــة ... شنــــدي؟؟؟
Author: Adil Ali
Date: 12-25-2004, 02:02 PM
Parent: #3
| Quote: انت دايرا تموت ميتة حمار في سفّاية |
الله يجازي محنَك يا نزار.... انت قاعد تنكُت الكلام دا من وين؟
فريد يا أخوي هسع خلي الكراكات والإسبيرات... بس أشرح لي "ميتة الحمار في السفاية" القالها ليك نزار دي يعني شنو، ولك جائزة.
ودي لكم جميعاً،
ع ع
|
Post: #5
Title: Re: كراكــــة ... شنــــدي؟؟؟
Author: فريد ودالمسيد
Date: 12-27-2004, 11:04 PM
Parent: #1
الأخ نذار
مشكور علي المداخلة الرائعة والتي أعتبرها
إمتداد أنيق يصب في نفس المجرى وتوقعاتي أكبر من والي
أتوقع إنك تسمع برئيس جمهوريةالكراكة البيروقراطية
الأخ عادل علي
تحياتي ...........
ميتة حمار في سفاية
دي قريبة من زرة كلب في طاحونة
|
Post: #6
Title: Re: كراكــــة ... شنــــدي؟؟؟
Author: فريد ودالمسيد
Date: 12-28-2004, 03:57 AM
Parent: #1
يا أخوي الوليد ود امحمد ودالمبارك ...أشوف شنو؟؟؟؟
|
Post: #7
Title: Re: كراكــــة ... شنــــدي؟؟؟
Author: Shalabi
Date: 12-28-2004, 04:16 AM
Parent: #1
الحبيب فريد والمسيد,,
(على وزن الأغاني لابو الفرج الاصفهاني)
تحياتي،،
كراكة شندي قصتها قصة وطن كامل يقبع تحت دورة البيروقراطية الموغلة في اعماق الخدمة المدنية وسلوك العمل العام في وطن المليون ميل .
تخيل لو في كراكة دي خلوها في مكانها بعد سنة حتلقى ليك محطة اسمها محطة الكراكة ابت تقوم (على وزن الطيارة قامت)، وبعد سنتين تبقي فريق الكراكة وبعد تلاتة سنين تبقي حلة الكراكة وبعد خمس سنوات مدينة الكراكة وبعد عشرة سنوات محلية الكراكة وبعد خمسة عشر سنة ولاية الكراكة وبعد خمسة وعشرين سنة تسمع بحركة تحرير الكراكة والمناطق المهمشة بقيادة فريد ود المسيد،، أمانة ما ميتة وخراب ديار ..
لك الله ياوطن الجراح والله يصلح حال البلد ..
|
Post: #8
Title: Re: كراكــــة ... شنــــدي؟؟؟
Author: saifkeli
Date: 12-28-2004, 04:24 AM
Parent: #7
يا ود المسيد .. يا ود حسين .. يا أخواني الاتنين
مودتي لكم ..
لكن الوجعة في إنه كل ولاية نهر النيل التي لا تشرب من النيل تجسدت في هذه الكراكة .. كل الولاية تسكن تحت رمال الزحف الصحراوي .. والقهر الاداري والتعميش الديموغرافي .. يعني أيه ..
نحن شايفين كل التشوفوا الناس .. سكان ولاية بحالها أقل من 150000 نسمة (مائة وخمسون ألف نسمة) وسكان محلية أم بدة (750000) سبعمائة وخمسون (خمسة أضعاف)
الكراكة ديك آ ود حسين يمكن يجيها اسبير .. لكن كراكتنا الولاية دي الطريقة معاها كيف
بجيكم راجع
|
Post: #9
Title: Re: كراكــــة ... شنــــدي؟؟؟
Author: nazar hussien
Date: 12-28-2004, 07:12 AM
Parent: #8
الكراكه سيده سيد الاراكا
الله ليل ليل ليل ليل
الكراكه سيدي سيد الاراكا
غفيره يتسلي
ينضم خيت في المسلة
وجنبو العرب السمر
اكلو الروب بالتمر
مشتهي ليه شية جمر
والكراكة ما حرتت جسر
وحرنت حلفت نضر
غفيرها كان ياكل حديده
ويبيعو في سوق ام شديدة
الكراكه سيده سيد الاراكا
الله ليل ليل ليل
|
Post: #10
Title: Re: كراكــــة ... شنــــدي؟؟؟
Author: فريد ودالمسيد
Date: 12-28-2004, 09:32 PM
Parent: #1
الإخوة شلبي ..سيف..نذار
لكم الشكر للمداخلات التي تصب في نفس الإتجاه
أنتخبوا رمز الكراكة
جمعية حماية الكراكة
الخيل تجقلب والإسبير لي الكراكة
|
Post: #11
Title: Re: كراكــــة ... شنــــدي؟؟؟
Author: saifkeli
Date: 12-30-2004, 02:38 AM
ود المسيد .. تحية ومودة
تسلم يا أخي .. وقالوا
آخر المداواة الكي .. وما ظنيتو ينفع في
|
|