Post: #1
Title: الاداء الدرامى فى اغنيات مصطفى سيد احمد – عمنا الحاج ود عجبنا كنموذج
Author: sheba
Date: 05-02-2003, 03:59 PM
الاداء الدرامى فى اغنيات مصطفى سيد احمد – عمنا الحاج ود عجبنا كنموذج
الفرجونى شاعر مسرحي واختيار مصطفى لهذا النص يؤكد رغبته فى ادائه بشكل درامى فهو نص تراجيدي يتناول حياة شخص درامي وفيه ملامح الشخوص التراجيدية الاغريقية القديمة التى تقدم البطل النموذجى الذى يتعرض للاهوال فيخوض صراع عنيف وغالبا ما يدفع حياته ثمناً لاخطاء قدرية لا يد له فيها ..مصيره هو مصير الشخصيات النبيلة التى تطهر الاخرين بموتها .
والحاج ودعجبنا يتصف بالنبل وبالقبول الاجتماعى المتميز و يتعرض لنفس المصير فى النهاية اذ تقع عليه نازلة الظروف السياسية والاجتماعية فتبطش به بطشاً شديداً واداة البطش فى الموقف هى عربية الطوارئ والدورية والسوط والجلد ..
لننتقل الى اعماقه وكما سنرى فقد كان الحاج ود عجبنا يمتاز باصالة السودانيين والخصال والكرم
(----)
عمنا الحاج ودعجبنا
فى الفريق ياهو الركيزة
هو البشيل حمل الرباعة
وعندو كلمة على الجماعة
فى الفريق باقيلنا تاية
(----)
عمنا الحاج ودعجبنا
يقهر الكعب المعاند
للضيوف ديوانو فاتح
ديل يقومو وديل ينزلو
(---)
يا ولد ضو الرتاين
جيهو الديوان فراشو
وافرشو الفرشة الكبيرة
واضبحو الحمل المدوعل
ولنقترب اكثر من والحاج ودعجبنا ولنتعرف على حياته عن قرب وعلاقته مع زوجته رفيقة الدرب الطويل
فنجدها علاقة احترام متبادل رغم ان عمنا الحاج ودعجبنا كتم حبه لزوجته و لم يفصح بذلك صراحة
تم حكمو وراح بيوتو
نفسو مكسورة وذليلة
كيف ملاقة الحليلة
وصحوة الروح العليلة
هذا الرجل خرج (فوق راس حداشر) تعرض للضرب بالسوط لخروجه وقت حظر التجول لاحضار الرغيف من اجل الضيف
جاهو ضيف فوق راس حداشر
رحب الحاج بيهو جدا
فرشولو ونزلوهو
وكاسو للعشا ما اتلقالو
ما الرغيف ممحوق مقصر
والبلد فى حال معسر
عمنا الحاج فى مبادئو
واجبة الضيف زى فريضة
ثم ان عقله ايضا مشغول بالضيف والعادات والتقاليد
ضيفو كيف يترك عشاهو
من دى زايد اختشاهو
وجاتو فكرة
يمشى للفرن المجاور
ولى رجال العيش يشاور
بس عشا الضيف يا جماعة
وضيفى نازل ليهو ساعة
لكن دورية الطوارى داهمته واودعته الحراسة ومنها الى المحكمة وتقديمه للمحاكمة
حاكمو الول المنصب
كتفو بالدبور مقصب
الضابط يخاطب الحاج بلهجة وقحة ليس فيها شئ من الاحترام :
انت يا حاج يا مخالف
زول مخرف وعقلو تالف
انت يا زول ماكا دارى
زلة الناس فى الطوارئ
يصمت الحاج ولا يجيب لكنه ينظر الى هذا الصبى الذى هو فى مثل عمر ابنه الاصغر وكانه يعاتبه على هذه الجرأة التى
تؤدى الى عدم احترام الكبير .. لكن الود لا يلين قلبه ويامر شا خطا :-
اجلدوهو غرموهو
ونفذو الحكم البهينو
شان يفتح تانى عينو
وحوكم الحاج عجبنا بالجلد امام اسرته وناس بيتو فى منظر مؤلم
فيها فى نص الخلايق
شافو حالا ماهو لايق
عمنا الحاج بى جلالو
فوقو حس السوط مولول
فوق قفاهو وفوق رجولو
ومرة فوق فججا حشاهن
اصلو ما قايل بهونن
حتى كان نزلن هجاين
الا لكن الليالى
يوم بترخص كل غالى
تسمع السوط ليهو خاوية
وفوق قفا الحاج صيحتو داوية
كل جلدة جبل مزلة
فوق ضمير الحاج وقلبو
كل كرباج الف علة
تم جلده فى ميدان عام والكل يتفرج عليه وحتى اولاده وبناته كانو مع العامة
وفجأة .. رفع الحاج عيونو
شاف بنات ولدو .. وبناتو
كلهن واقفات يعاينن
دمعتن فى العين ترقرِق
ووجعتن فى الجوف تحرّق
والحزن ليهن مغرق
دا النجوم الفى سماهن
دا الزمان الكان حماهن
كل سوط نازل عليهو
من شعاع الضو .. عماهن
وبعد الانتهاء من الحكم انتقل الحاج الى منزله فى مكان منه وفى حجرة بعيدة لم يحتمل الحاج ود عجبنا الزلة والمهانة التى تضخمت بداخله فخر صريعاً تحول السوط الى اداة للقتل والاغتيال معاً
فى البوت الجوة غادى
عمنا الحاج ما اعتيادى
فوقو متلمين جماعتو
والسكيى ضرب حزاينى
وقالو ناداهو المنادى
فارق الدنيا المهينة
يقطع الزلة وسنينة
وفى فراش البكا والحزن والغضب يلفان المكان نسمع الزول الذى يوصى بكلمات
اقفلو الحوش يا جماعة
طفو انوار الرتاين
داك حرس حظر التجول
من بعيد ليكم بعاين
وانطفا ضو الرتاين التى كان الحاج ود عجبنا ينادى بانارتها
يا ولد ضوو الرتاين
انه زمن حظر التجول الذى اودنا بحياة بطلنا ود عجبنا لكن الراحل المقيم مصطفى سيد احمد اعاد اليه الحياة من جديد وكانه يطالبه بالثار لنفسه ويطالبنا ايضاً بذلك
اداء مصطفى لهذا النص بحواره المميز كان اداءاً درامياًًً قوياً ومعبراً عن مشاعر البطل وقد اختار مصطفى النص بعناية فائقة ونقله عبر صوته الشجى الى دراما مسموعة بالاذن وصور مرئية
وما زال صوت مصطفى يتردد فى الفضاءات بقوة يحذرنا من زمن حظر التجول مؤكدا ان الحاج ود عجبنا هو نحن جميعاً
يا زمن حظر التجول
يا زمن حظر التجول
يا زمن حظر التجول
****************************************************
.......................................
|
Post: #2
Title: Re: الاداء الدرامى فى اغنيات مصطفى سيد احمد – عمنا الحاج ود عجبنا كنموذج
Author: sheba
Date: 05-03-2003, 07:12 AM
Parent: #1
عمنا الحاج ود عجبنا
يا زمن حظر التجول
----------------
كلمات الفرجونى
**************
عمنا الحاج ود عجبنا ..
فى الفريق ياهو الركيزة
هو البشيل حمل الرباعة
وعندو كلمة على الجماعة
فى الطريق باقيلنا .. تاية
وكل طيب ليهو غاية
للضعيف تلقاهو ساند
يقهر الكعب المعاند
وللضيوف ديوانو فاتح ..
ديل يقوموا وديل ينزلو
*******************
يا ولد ضوو الرتياين
وجيهو الديوان فراشو
والاباريق والتباريق
وافرشو الفرشة الكبيرة
واضبحو الحمل المدوعل
***********
عمنا الحاج ود عجبنا
من سنين أيام جهلتو
ديمة فى دعوات صلاتو
بسأل المولى السلامة
وسترة الحال .. والكرامة
عمنا الحاج ود عجبنا
فى ليلة من ذات الليالى
فى زمن حظر التجول
جاهو ضيف فوق راس حداشر
رحب الحاج بيهو .. جداً
فرّشولو .. ونزلوهو ..
وكاسو للعشا .. ما أتلقالو
ما الرغيف ممحوق .. مقصّر
والبلد فى حال معسِّر
وعمنا الحاج فى مبادئو
واجبة الضيف زى فريضة
وهسة ضاقت بى العريضة
ضيفو كيف يترك عشاهو.؟
من ده زايد إختشاهو
وجاتو فكرة..!!!
يمشى للفرن المجاور
ولى رجال العيش .. يشاور
بس عشا الضيف .. يا جماعة
ضيفى نازل .. ليهو ساعة
شاكلوهو ودفروهو ونهروهو .. وجاتو دورية الطوارى
وأمسى بايت فى الحراسة
وناسو جنـّوا ..
للصباح ما عرفوا حاجة
وجاهم الخبر المأكد
ود عجبنا فى الحراسة ..
و ماشى محكمة الطوارى
*********************
ناسو .. أولادو .. وبناتو
عرفوا حالو .. وبدرى فاتوا
فاتو محكمة الطوارى
فيها فى نص الخلايق
شافوا حالاً ماهو لايق
عمنا الحاج بى جلالو ..
فوقو حس السوط مولول
فوق قفاهو .. فوق سنونو
وفوق رجولو..
ومرة فوق فِججاً حشاهن
أصلو ما قايل بهونن ..
حتى كان لو نزلن هجاين
إلاّ لكن الليالى ..
هى البترْخِص كل غالى
*************
حاكمو الولد المنصّب ..
كتفو بالدبّور .. مقصّب
إنت يا حاج يا مخالف
زول مخرّف وعقلو تالف
إنت يا زول ماكا دارى ؟
ذِلة الناس فى الطوارى؟
أجلدوهو .. وغرموهو ..
ونفذوا الحكم البهينو ..
شان يفتِّح تانى عينو..
************
تسمع السوط ليهو خاوية
وفوق قفا الحاج صيحتو داوية
كل جلدة جبل مزلة
فوق ضمير الحاج وقلبو
كل كرباج الف علة
وفجأة .. رفع الحاج عيونو
شاف بنات ولدو .. وبناتو
كلهن واقفات يعاينن
دمعتن فى العين ترقرِق
ووجعتن فى الجوف تحرّق
والحزن ليهن مغرق
دا النجوم الفى سماهن
دا الزمان الكان حماهن
كل سوط نازل عليهو
من شعاع الضو .. عماهن
عمك الحاج دمعو .. سرّب
وسيلو فوق أشنابو .. زرّف
تم حكمو .. وراح بيوتو
نفسو مكسورة .. وذليلة
كيف ملاقاة الحليلة
وصحوة الروح العليلة
فى البيوت الجوّة .. غادى
عمك الحاج .. ما أعتيادى
وفوقو متلمِّين جماعتو
والسكيلى ضرب .. حزاينى
وقالوا ناداهو المنادى
فارق الدنيا المهينة
يقطع الذلّة .. وسنينة
فوق فراش ودعجبنا
بسمع الزول البوصى
أقفلوا الحوش يا جماعة
وطفّوا أنوار الرتاين
داك حرس حظر التجول ..
من بعيد ليكم بعاين ...
يا زمن حظر التجول
|
Post: #3
Title: Re: الاداء الدرامى فى اغنيات مصطفى سيد احمد – عمنا الحاج ود عجبنا كنموذج
Author: hala guta
Date: 05-04-2003, 06:48 AM
Parent: #1
up
|
Post: #4
Title: Re: الاداء الدرامى فى اغنيات مصطفى سيد احمد – عمنا الحاج ود عجبنا كنموذج
Author: sheba
Date: 05-04-2003, 04:06 PM
Parent: #1
hala
كثيف الود
ونتمنى ان نسمع تعليق اهل الدراما حول ود عجبنا
وكيف انها يمكن ان تتحول اى دراما تلفزيونية رائعة
خالد
|
Post: #5
Title: Re: الاداء الدرامى فى اغنيات مصطفى سيد احمد – عمنا الحاج ود عجبنا كنموذج
Author: sheba
Date: 05-27-2003, 06:13 AM
Parent: #1
up
|
Post: #6
Title: Re: الاداء الدرامى فى اغنيات مصطفى سيد احمد – عمنا الحاج ود عجبنا كنموذج
Author: altahir_2
Date: 05-27-2003, 07:25 PM
Parent: #1
العزيز خالد شيبا
تحياتي
بالطبع هذه القصيدة القصة فيها جانب كبير الدراما ولكني اعتقد ان عم عبد الرحيم اكثر درامية علي مستوي المفردة والموسيقي ايضا. فاردو ان توعدنا بها
|
Post: #7
Title: Re: الاداء الدرامى فى اغنيات مصطفى سيد احمد – عمنا الحاج ود عجبنا كنموذج
Author: sheba
Date: 09-23-2003, 10:52 PM
Parent: #1
فوق
|
Post: #8
Title: Re: الاداء الدرامى فى اغنيات مصطفى سيد احمد – عمنا الحاج ود عجبنا كنموذج
Author: HAMZA SULIMAN
Date: 09-23-2003, 11:40 PM
Parent: #7
يا شيبه
كثيف الود ليك انت
ولى المارين هنا
كيفك
دائما ابحث عن كلمه ادقه من كلمه دراما فى اختيار الشعر
فى اغنيات المرحوم مصطفى سيد احمد
ماهى دراما
ويا ريت نفكر سويا فى اختيار كلمه ادق
ولى عوده يا حبيب
|
Post: #9
Title: Re: الاداء الدرامى فى اغنيات مصطفى سيد احمد – عمنا الحاج ود عجبنا كنموذج
Author: Yasir Elsharif
Date: 09-24-2003, 10:53 AM
Parent: #1
شيبا الزول المبروك
الله يديك الفي مرادك
والسلام على مصطفى وتغشاه ألف رحمة
وصلاة الله على المصطفى حبيب الله في ذكرى الإسراء والمعراج
Quote: والسكيلى ضرب .. حزاينى
وقالوا ناداهو المنادى
فارق الدنيا المهينة
يقطع الذلّة .. وسنينة |
أهدي هذه القصيدة إلى صديقي الدكتور أحمد المصطفى المبارك وها هي قد جاءت حسب ما تمنيت ووجدتها في البورد..
ياسر
|
Post: #10
Title: Re: الاداء الدرامى فى اغنيات مصطفى سيد احمد – عمنا الحاج ود عجبنا كنموذج
Author: sheba
Date: 09-25-2003, 07:17 AM
Parent: #1
حمزة
ياسر
مزيدا من التواصل
شكرا جميلا لكم
|
|