Post: #1
Title: العزيزة الما بتسأل عن ظروفنا
Author: محمد حامد جمعه
Date: 12-17-2004, 10:34 PM
الولايات المتحدة الامريكية ......قصتها مع السودان (حيرتنا ) ..شغاله معاه بنظام (لا بدورك ولا بحمل براك ) ......... يعنى اليشوف غبينة الامريكان ديل على الانقاذ يقول الناس دى بكره بتخش الخرطوم (بالمارينز ) والماشيين وراهم (كميات ) من السودانيين من شاكلة (اعضاء الحكومات المؤقتة ) ..يعنى فى دول كدا معروفة ومافى داعى نذكر اسماء بعينها نعمل ازمة دبلوماسية .. اها امريكا علاقاتها مع السودان يوم فى الطالع و(البساط احمدى ) وكبانية القصر الجمهورى بس باول ضرب وباول اتصل وناس الاذاعة والتلفزيون يبثو الخبر باول (ولدنا ) طبعا ضرب و(نضم ) مع الرئيس والناس الكبار وشاف معاهم (صحة ) نيفاشا وبتاكل كويس ولا عندها (نزلة ) وتانى يوم الجرايد تفتح والمحللين يكتبو .. وكتاب الاعمدة ماشاء الله ..ايه الحلاوة دى .. ونمشى نحن (الشعب السودانى البطل ) ننوم مرتاحين ..السلام جاى وامريكا بقت (فردتنا ) يعنى تانى المشى لنيويورك وكدا ما عاوزة لفة (طويلة ) بالقاهرة ولا عاوز ليهو (شلخة وش ولا جواب صالح عام ) عشان تلقى ليك (تكأ ) فى البلد ديك ..بلد (ابو الجورج ) ......دولااااااااااااار .
ونمشى ننوم .. ونصحا الصباح يكون كلام امس كله حاجة و(فكت ) تلقى الجرائد مقلوبة والصفحات الاولى تلاقيك زى (العمل الردى ) الكونغرس قال (ابيييييييييييت ) وختاهو معانا قرض وقال عمل جلسة كدا وهبش شمال يمين قال نحن بلد متخلف وناس تعيسة ووهم وما ينفع معانا ومع الحكومة قبالنا الا الجز والمعط وقال شنو رشونا بقانون اسمو سلام السودان شال خيرات السلام النفط قال الكونغرس نوريهو قروشو (بالتعريفة ) جبناها من وين ومودينها وين والشركات الهاملة وشغالة فى النفط دى حقت منو وخطوط انابيب البترول دى جبتوها من وين و(اولاد اللذين ) الباعوها ليكم ديل منو .. !!!!
على (الحرم ) يا جماعة امريكا دى (حيرتنا ) طيب ما تجى تبقى شاهد معانا كمان فى (قسايم عرسنا ) دى شنو دى وساطة شنو التخليها كابسة علينا كدا ودا كوم وشمار (الارهاب والكباب ) وقصتها مع المسلمين و(الدقون ) كمان قصة تانية ..هسة فى ذمتكم من (11 سبتمبر ) ست الاسم والفيلم حصل لقيتو اسم (سودانى ) مشترك فى نسف سفارة ولا جزارة كان ما هى سلبطة خواجات ساى وبعد دا كمان ختونا فى قائمة الدول (الارهابية ) كيف وليه ما معروف يعنى هسة اسرائيل دى شنو ..غادة عبد الرازق !
اها مش حاجة تحير يا جماعة يعنى الصباح تلقى خبر امريكا ما خلت فيهو للسودان (جنبة يرقد عليها ) تجى نص النهار تلقى خبر تانى (تشم ) منو انو فى علاقات كويسة بين الخرطوم وواشنطن .... وغايتو كدى النشوف اخرتا مع (العزيزة المابتسال عن ظروفنا ) بس فالحة (ترشنا ) نحن المسلمين .
بمناسبة العزيزة الما بتسال من ظروفنا فى زول عندو الاغنية دى ينزلها لينا هنا .. شفتو الشحدة الحريفة دى ..
|
Post: #2
Title: Re: العزيزة الما بتسأل عن ظروفنا
Author: المكاشفي الخضر الطاهر
Date: 12-17-2004, 11:33 PM
Parent: #1
| Quote: بمناسبة العزيزة الما بتسال من ظروفنا فى زول عندو الاغنية دى ينزلها لينا هنا .. شفتو الشحدة الحريفة دى .. |
الاخ محمد
طاب يومك
طيب ما تقول كدا من قبيل وتريحنا ....
دي الا تشوف ليها لؤي ولا الموصلي ... لكن انا طلبت منهم مديح ولى كمين يوم بكورك ليهم ما في زول اشتغل بي
|
Post: #3
Title: Re: العزيزة الما بتسأل عن ظروفنا
Author: محمد حامد جمعه
Date: 12-18-2004, 00:32 AM
Parent: #2
يا جماااااااااعة شوفو طلب المكاشفى وشوفو طلبى انا (الكاشف ) والعزيزة الما بتسال عن ظروف ..والا امشى لسعد الدين ابراهيم
|
Post: #5
Title: Re: العزيزة الما بتسأل عن ظروفنا
Author: الكيك
Date: 12-18-2004, 01:50 AM
Parent: #2
للصادق المهدى راى يقول ان الغلاة ياتون بالطغاة الذين يجلبون الغزاة ..
قبل الانقاذ لو سالت اى امريكى عن السودان اكيد حيستغرب اين هو وفى اى القارات يقع ..ولكن بعد الانقاذ التى جلبت كارلوس واسامة بن لادن والقرضاوى والزندانى والغنوشى والظواهرى ومصطفى حمزة وعباس مدنى وكافة المجرمين والقتلة من كل حدب وصوب وبعد ان تم اعلان الجهاد من الخرطوم ضد امريكا وروسيا التى دنا عذابها عرف الغزاة الى اين يتجهون..
ويا محمد حامد لو انت نسيت او تحاول التناسى عن سبب اهتمام الامريكان بالاخوان المسلمين وما يفعلونه مع الجماعات الاسلامية الاخرى فى المنطقة تكون قاصد التعمية وعمل غشاوة رمادية لما يحدث الان واسبابه ..ولن ينطلى ذلك على احد ..
|
Post: #4
Title: محمد جمعة
Author: mohmmed said ahmed
Date: 12-18-2004, 01:31 AM
Parent: #1
رشاقة الكوز
ثقالا
|
Post: #6
Title: Re: محمد جمعة
Author: محمد حامد جمعه
Date: 12-18-2004, 01:59 AM
Parent: #4
شكرا
..بعدين البعرفو انو الزول لو عندو موقف من فكرة زول معين ورايه وما (قد ) يستبطن كتاباته فاما الا تدخل اصلا عن بوسته وهذا عين ما افعله انا شخصيا فثمة اشخاص لا اهتم بما يكتبون ويرون ويعتقدون ولا اجشم نفسى مشقة الغيظ من الذى يرد منهم وحيث ان التعبير الحرية فان فى تلك الحرية متسع للترك والتجنب ، اما ثقالة الكيزان .. نحمد الله عليها ما جبرنا زول هنا يقيم لينا . اما امريكا والانقاذ او الاسلاميين فهى لن تكون بدعا من علاقة بعض الاخوة الذين قام فكرهم على مناهضة الراسمالمالية والامبرليالية ثم ها هم اليوم يشدون اليها الرحال لتكون ارضا لنضالهم وكذا غالب اراض الغرب كلها .
بالمناسبة البوست اصلا لم يكن يناقش جزئية علاقة الاسلاميين بالامريكان من حيث الابعاد والخفايا والواقع والمستقبل البوست كان دردشة لكن ماذا نفعل للذين يظنون كل صحية عليهم
|
Post: #7
Title: Re: العزيزة الما بتسأل عن ظروفنا
Author: المكاشفي الخضر الطاهر
Date: 12-18-2004, 03:02 AM
Parent: #1
| Quote: واسامة بن لادن والقرضاوى والزندانى والغنوشى والظواهرى ومصطفى حمزة وعباس مدنى وكافة المجرمين والقتلة |
الكيك
مجرمين وقتله ؟؟ ....... بالغت يا اخي قول مجتهدين مخطئين بدلا من مجرمين
الله وحده الذي يعلم من هم المجرمين القتلة
|
|