Post: #1
Title: ما جاء على لسان مصطفى سيد أحمد .. إلى هاشم نوريت وللتاريخ
Author: Ala Asanhory
Date: 12-17-2004, 09:35 AM
يا مراحب
البورداب الحميمون
الحميم هاشم نوريت
وعدتك بأن أسجل شهادة أستاذنا مصطفى سيد أحمد رحمة الله عليه عن عالقته بمدينة بورتسودان وهي شهاد ذكرها في تسجيل لإحدى جلسات الإستماع بمدينة الدوحة وكانت بحضور عدد من الأخوة على رأسهم الأخ بدر الدين الأمير وكنت أتمنى لو أن علاقتي بهذه التكنولوجيا أكثر حميميه لأنزلها لكم مسموعه لكنني نقلتها لكم حرفياً
وهذا بخصوص بورتسودان
أما بخصوص علاقته بالحزب الشيوعي وإنتمائه الذي كنت قد شككت فيه
راجع صحيفة التلغراف أبريل 1988 حوار أجراه الأستاذ الصحفي جمال لطفي معه كنت قد كتبت لك ما أذكره من إجابة مصطفى وربما في لاحق الأيام بعد أن يصلني الحوار من السودان الحبيب أفيدكم بها
ولك وللجميع الشكر
ولنجعل الحوار دائماً هادئاً وموضوعياً ونتحرك خطوة خطوة ونحدد هدفنا ومقصدنا ولا ( نلخبط الكيمان ) ولكم شكري
ــــــــــــــــــــــــــــــــــــــــــــــــ
مصطفى : ( الأغنية بتاعت طال الليل للمساهر وأصبح ماليهو آخر مربوطة في ذهني بي ذكرى مرحلة الثانوي ــ طبعاً في كلام كتيير بتحفّظ ما بقولو كيتاً عليك يا بدر الدين هاها شفت كيف ؟ ــ فا في بوردتسودان يعني كان في أخونا محمد خليفه من الكوّة وعبدالله سعيد اللي هو ملقّب بي عبدالله فور أو عبدالله فوغ بنقولو ليو بعد ما بدينا ناخد الفرنسي وجلال وعادل عبداللطيف كنا في الثانوي وكان في نزق يعني كده صبياني يقوم يقودنا لي إننا نخلق ليلات ظريفه كان في واحد بقومو بستغلوهو الناس يرسلوهو يمشي يجيب الحاجات وهو راجل يعني سايق ليهو عربية مش عربية يعني عربيه لااا مؤآخذه حمار وعامل فيهو عودين كده وعامل فيهو برميل بتاع موية وبورتسودان فيها مشكلة بتاعت موية وبنقل بيهو الموية ورافض تماماً إنو يرجع لي أصلو في الشمالية لأنو إنغمس في جماليات موجودة في منطقة البحر الأحمر يعني بقول إنو ما نادم أبداً إنو إستنزف كل شبابو فيها عايز حتى لحدي ما يموت يكون فيها فا كان أحياناً بتهزو نشوة .. الراجل ديّا .. فا في أثناء ونسة الناس أو أثناء غناهم يقوم بيصرخ زي الصيحة بتاعت الصوفية ويقول :
طال الليل للمسااااااااااااااهر وأصبح ما ليهو آآآآآآآآآآآآآخر .
فا الصيحة بتاعتو دي بتقوم بتسكت كل الناس شفت كيف ؟ ! فا دي واحده من الذكريات القريبة شديد يعني قريبة شديد جداً لي نفسي .
في كل التناقض الموجود في شرق السودان .. قطع المحار .. ألوان المرجان .. الصفرة الشاحبه المبلله .. تبتو .. ترماس .. أمونة .. أوشيك .. أوهاج .. الكشيب اللي كان أول حاجه أنا أكلتها في الشرق .. هو عطر محلي بصنعوهو الهدندوة
فا عالم يعني .. وااا ..العالم بتاع منطقة البحر الأحمر ديّا .. يعني يمكن أنا بدين ليهو بي إنو رتب في داخلي حاجات كتيرة جداً لأنو يعني بيئه كده تحس بيها يعني لو أوتيت إحساس بتحس بي إنك زي لما تكون مثلاً ماشي في معبد قديم كده فيهو حاجات كتيييييييييره .. حتى يعني تخيل الناس الجو خشو المعبد ده والأشياء المعلقه والأيقونات .. كل ما تحتويه القدسية والرهبة والتناقضات
ف بورتسودان بدين ليها بالكتير يعني .. بدين ليها بالكتير .. بالرغم من إنو فيها حاجات كانت تدعو للأسى كتير .. وفيها حاجات كمات ذات مذاق خاص تماماً ..
أنا ما قدرت أعيش الفترة بتاعت بورتسودان بي وجدان مسطح .. كنت أيّ شيء بحس بي وراهو شيء .. بدءاً من الكنبة الموجودة في جنجنة الشاطيء جنب الحوض .. الكنبة بتاعت بازرعه الكان بقعد فيها أيام شبابو .. ويقرض الشعر .. إلى سلات .. ديم مدينة .. زقلونا .. جبرونا .. التل الأخضر .. عالم يعني ... عالم .. ما مرحلة إنت تكون قريتها وإتعديتها بقيت منغمس وتسقط الريحة القديمة اللي هي ريحة الدمر الفيها بتحس بي إنك لسه في رئتيك جزء من الريحه بتاعت الأرض المبللة الشاحبة ديك .. والأخيلة اللي كانت بتنتاب الواحد لما يكون قاعد في الكنبة بتاعت بارزعه وبعاين مد البصر لحدي ما يلاقي السماء الأشباح بتاعت الموج البيضاء البخلقها إصطدام الموج مع الحاجز المرجاني في داخل البحر الأحمر إلى جري الشفع .. شفع العرب الفتارى .. البفنّوا الشايلا إيدهم ويجروا كايسين القطارى .. لا سراب الصحراء مويه ولا حجار سلوم موائد .. دي صور حقيقية أنا عشتها يعني .. الشفع البجروا وراء القطر عشان تجدع ليهم كيس فيهو عيشة أو فيهو قطعة جبنة وأحياناً الشافع يختفها .. والتاني يختفها منو ..
عالم يعني .... عالم فيهو حاجات عجيبة جداً .. يعني إنت ما بتقدر تتخيلو إلا تعيشو .. وصادف فينا مشاعر صبية .. متحفزة ومشحونة .
ـــــــــــــــــــــــــــــــــــــــــــــــــــــ
ثم تغنّى مصطفى بأغنية طال الليل للمساهر .
أبداً
علاء
|
Post: #2
Title: Re: ما جاء على لسان مصطفى سيد أحمد .. إلى هاشم نوريت وللتاريخ
Author: mansur ali
Date: 12-17-2004, 11:41 AM
Parent: #1
up
|
Post: #3
Title: Re: ما جاء على لسان مصطفى سيد أحمد .. إلى هاشم نوريت وللتاريخ
Author: sheba
Date: 12-17-2004, 12:44 PM
Parent: #1
ونحن نغنى ايضا معه ..طال الليل للمساهر ... واصبح ماليهو آخر
|
Post: #4
Title: Re: ما جاء على لسان مصطفى سيد أحمد .. إلى هاشم نوريت وللتاريخ
Author: Salwa Seyam
Date: 12-17-2004, 12:45 PM
Parent: #1
العزيز علاء
شكرا ليك علي التوثيق لحياة الفنان مصطفي فانه يستحق ذلك من بذل حياته وافني
عمرة من أجل قضيته.
...اليفة بالنسبة لي ذكريات مصطفي عن مدينة بورتسودان بحكم نشاتي وتعليمي في
هذه المدينة فقد كنا في ذلك الوقت ( عندما كان مصطفي طالبا بمدرسة
بورتسودان الثانوية) كنا نحن طلائع الكشافة البحرية وكنا نعرف أن هناك طالب
ذو صوت شجي عضو بجمعية الموسيقي وأكاد أذكر أننا شاهدناه كثيرا في ذلك الوقت وهو
يشارك في الإحتفالات الوطنية والقومية كطالب بمدرسة بورتسودان الثانوية.
وقد عشت انا وشاهدت الصور الحقيقية التي تحدث عنها مصطفي ... قطع المحار ...
الوان المرجان ...أمونة ... أوشيك .. اوهاج ... السلات ... ديم مدينة... حي
الشاطئ ... وشفع العرب الفتاري البفنوا الشاياه ايدهم ويجروا بارين القطاري ...
وبائع الماء صاحب العربة المجرورة بالحمار...والكثير الكثير فهذه هي مدينة
بورتسودان المتفردة والمتميزة تظل ذكراها عالقة بالأذهان علي مر السنين.
الشكر ليك مرة أخري ياأخ علاء ... وواصل
|
Post: #5
Title: Re: ما جاء على لسان مصطفى سيد أحمد .. إلى هاشم نوريت وللتاريخ
Author: rani
Date: 12-17-2004, 01:04 PM
Parent: #4
سلام الصديق علاء،
شكرا ليك كتير علي التوثيق..ولقدام لقدام..
| Quote: مصطفى : ( الأغنية بتاعت طال الليل للمساهر وأصبح ماليهو آخر مربوطة في ذهني بي ذكرى مرحلة الثانوي ــ طبعاً في كلام كتيير بتحفّظ ما بقولو كيتاً عليك يا بدر الدين هاها شفت كيف ؟ ــ فا في بوردتسودان يعني كان في أخونا |
.
.
انا عندي الكلام دا مسجل بصوت مصطفي سيد احمد..بس داير تفتيش
لكن.. موجود وحا انزلو ليك هنا لاحقا..
فائق ودي وكل ما تيسر من قرأن (المصطفي)..
|
Post: #6
Title: Re: ما جاء على لسان مصطفى سيد أحمد .. إلى هاشم نوريت وللتاريخ
Author: Ala Asanhory
Date: 12-19-2004, 10:06 AM
Parent: #1
يا مراحب
ــــــــــــــــــــــــــــــــــ
الحميم منصور
تشكر على جهدك
ــــــــــــــــــــــــــــــــــ
الحميم شيبا
وهكذا تظل تدلق علينا أغنيات مصطفى
وكفى
ـــــــــــــــــــــــــــــــ
الحميمه سلوى صيام
يا سلام
وأهو جات شهادة جديدة للتاريخ
لك شكري على إضافتك الثرة
ــــــــــــــــــــــــــــــــ
الحميم راني
ويييييين يا حميم ؟
أها ورطت روحك مع مصطفى
منتظرين التسجيل
ـــــــــــــــ
أبداً
علاء
|
Post: #7
Title: Re: ما جاء على لسان مصطفى سيد أحمد .. إلى هاشم نوريت وللتاريخ
Author: معتز تروتسكى
Date: 12-19-2004, 10:14 AM
Parent: #1
الحميم علاء00
رانى ورطتك انت00
تحياتى ياصديق00
وكل شى ولا ابو السيد 00
ولى قدام 000
لحن الجمعة-علاء السنهوري- فيديو
|
Post: #8
Title: Re: ما جاء على لسان مصطفى سيد أحمد .. إلى هاشم نوريت وللتاريخ
Author: هاشم نوريت
Date: 12-19-2004, 10:20 AM
Parent: #7
الاخ السنهورى
دبايوا
وطبعا انا ما ناسى وعدك بس قلت الراجل شغلتو الدنيا
وحا احتاج لقراء متانية اخرى واتمنى من الاخوة المشاركة
فى التوثيق.
واكرر شكرى اخى السنهورى
|
Post: #9
Title: Re: ما جاء على لسان مصطفى سيد أحمد .. إلى هاشم نوريت وللتاريخ
Author: Ala Asanhory
Date: 12-19-2004, 10:32 AM
Parent: #1
الحميم معتز
ياااااااااااااااااه
مفاجأة
البوست ده ما مر علي
ياسلام عليك وعلي راني
ما عارف أقول شنو
تشكرات يا أصدقاء
ـــــــــــــــــــــــــــــــــ
الحميم هاشم نوريت
دبايوا
إيتانينا
يا حميم
فقط الزمن
عموماً قلت ألحق البوست وما لميت فيهو
أها نزلتها هنا
منتظر ردك
ـــــــــ
ابداً
علاء
|
|