سلامات يا زول يا رائع** ازهري عبدالرحمن - غناء الكورال

اهدتني الصديقة الشاعرة نجلاء التوم مجموعة من اغاني الكورال كان قد تم تقديمها في ذكري رحيل الفنان المبدع مصطفى سيد احمد اوائل هذا العام وكانت هي احدى المشاركين في هذا الكورال بالغناء
من بين هذه الاغنيات اغنية سلامات يا زول يا رائع او " محروقة الحشاء" للشاعر ازهري محمد علي
اقدمها لكم هدية
مع التحية لمجموعة الكورال والشاعر ازهري محمد علي


سلامات يا زول يا رائع
شعر ازهري محمد علي
الحان وتوزيع ربيع عبدالماجد
اداء مجموعة الكورال





<br style="color:black;background-color:white"><bgsound src="http://www.bayanit.com/upload/protected/salamtsimpatic55.ra" style="color:black;background-color:white"><br style="color:black;background-color:white">




سلامات يا زول يا رائع

الى انبثاق نفسى عنى - خارجى

الى"مصطفى سيد أحمد"



مدخل أول:

لمتين مِتْيمِّم شَطْر النيل

مُتوقِّى اليابسه ووْاَرد

متوكِّى الغُنيه عصا موسى

بِتْهِش فى غيم الإلفة الشارد

مهدودة القُدرة وفترانة

حَرداَن الضُل البارد

بِتْوجِّل لى يوسف فى البِير

يطْلَع من بَطن البير المارد!



مَدْخل ثانى:

فات الكان بدّينا إحساس بالإلفه

وكان راوينا،

فات الباكي جَرِحنا وناسي جُرحو

ولافّي ورانا مدينه..مدينه

فات الصاحي ونحن نَغِطْ

فى النومه السابعه

طالِق حِسِّو ولا حسيِّنا

حَتْحَتْ فينا غُناه الطاعِم

وفَاتْ قنعانْ من خيراً فينا

سلاماتْ يا زول يا رائع

سلاماتْ عواّفي!

سلاماتْ يا خُلاصة الخير الفى الناس

وترياق الزمن المُتْعافي

سلاماتْ يا زول يا رائع

سلاماتْ عَوَّافى

مُحاصَرْ فِيكْ

بسأل عن سكّه تطلِّع مِنَّك

أوسِكّه تودِّي عليكْ

بسأل عن مَخرج منّك وليكْ

زي نَهْر بينْبعُ

وما لاقي مَصَبْ

بِتْمدّد عِشقَكْ من أقصى ضواحي الروح

لي أقصى نواحي القلبْ

يتْكثّف بِسِعةْ إطلاق الرّب

وانا كنتَ بفلِّى القَلْب بسيرتَكْ

سمِّيتك حلاّب الغيم

من ضَرْع الجَدبْ

وظنيتَك مارستَ الفِعل السرِّي

وحَفّظت فحولة النيل

أيام الخِصب

ولمحتَك وانتَ بِتتْمشّى

وترقّص فى حَمَامَكْ

على حُمّة إيقاع الحرب

وتْكَلْكِلْ جِلد الكلمه الحافَّه

لَحبيبه بتفتَح مَجَرى الغُنا فى الدَّم

وتَفلِّس بيان القلب

فيا بنوت الشارع الطاعِم

قُومَن كَبْ!

قومَن للما قَصَّر

فى غناكن ضُمَّه

ولا إتْلوّم بِوراَكَن تبْ!

ولو تَبْقَى السِكّه الجايه ضهَب

وسلاماتْ يا زول يا رائع.

البارح عصفورتكْ

ركَّتْ في البال

رقَصَتْ

وادَتْ عصفور الريد شبَّال

وطارتْ من قولة كَرْ

ما الزول النَهرَ العصفوره

بِحرِّض فى كِلاب الحّر

لابسنى وداخِل فى اللَحم الحي

راصد كلّ البِسْأل عَنْ حالى

حرَّش ضُلّىعليَّ

ونتّف زَغب الخاطره التَّخْطُر على بالي

ومَنَع العصفُوره تَحومْ

إستْجوّب كل الناس البِجُو فى النوم

!ما تْقومْ

يا زول يا رائع ومهمومْ

يا مضيّع ضَيْ عيني وراكْ

واقف

حاحاى للنوم.

يا مْستّف رئةَ الدنيا شهيق

ومُشحتِف روح الخرطوم

كيف حال يا ابوي

كيف حال يا خال

وتعالْ!

إتْفَضَّل على باحة بيتنا الطّيب

ماعون الأطفال

ضمدَّ جراحاتك تعالْ!

من ضلامَاتكْ تعالْ!

من حافة البرزخ تعالْ!

من شرفةْ الملكوت –تعالْ!

أدّينا هينين من صبرُ

السكّه أبعد من مَشيِكْ

والجرح أعمق من حدود الإحتمالْ

السابله والاطفال هِناك

قداَّمك المشوار طويل

والريح وراك

كل البيوتْ

إتشرَّفت لى طَلْعَتَكْ

والوَنَسه ما كِمْلَت معاك

القَرقراب والقهْقَهه

مَينْ سمّى تِرحاَلك غياب!؟

والغيبه بتْزيدك بَهَا

لو يرِتق الحُزن المَصَابْ

كان بَعدك الموت إنتهى

يا أقصى حالات الحضور المُشتهى

يا مُنْتَهَى!

تعال قرِّحنا بس دهشة غُناك الحَي

وحَّيْ من جُرحك الدامي!

وفَتَر حيلَكْ

وحىّ من ضُلّك الرامي!

وحِمِل شيلَكْ

تموت مِتْل الشدر واقف

تموت واقف على حيلَكْ

فيا حْليلَكْ

يا حْليلَك..بِنستنَّاكْ

على صهوة جياد الريحْ

بنِستنَّاكَ!

فى الزمن اللديح القِيحْ

على باب الحلم فى غُناكْ

بِنِستنَّاك!

رحيلك شَلْهَت الدنيا:

ورتّب العالم البهِنَاك

بَستْنّاك!

وانا تانى وراك َشِنْ لاحِقْ؟

دَهَسَتْني فى بُعْدَك

حِدوَ الخوف

الداخله عليّض بالسَاحِقْ

أدِّينى القُدْره التمْنَحني

بِحجمْمَكْ سعةَ الشوف

لو أقدر أطِلْ من شاهق

لو أقْدر ألوّح لعيونك

تَلْمَحنِى

وأنا ضَعفي أمامك فاضحنى

سامحنى!

ما قدرت أطولَكْ

سامحنى!



شُفتَكْ من وجع طَالع

على برزخ ملتقى النيلين

كنتَ هناكَ وحّيدك

وكل الناس اتنين ..اتنين

براك واقف

فى حدْ السيف

براك الما وقف بينْ...بينْ

تغازل حلمك الفارع

فَتح بابين على الملكوتْ

تَسَلِّم على حضرة جلال الموتْ

وتفتح فى الأرِض نفّاج

إذا امتلأ الفراغ بالصوت

فيا باطن الأديم أفتح

براحات الحنين مُشْرَعْ

وأَنْدَهْ لى مُدن شاخت

أنْدَه لأطلال القرى الراحت

بيوتْ فى بيوتْ

تَمْرُق من شِبر مَسَرح

مدن فاضله

وعلم باتساع الحُلْم

بقامةَ يشتهى التابوت

فما لَفَظَ البحر يُونِس

ولا انسدّت

شهِية الحوتْ... ويا زول يا رائع تمشى

بالحسره وتموت؟

وسلاماتْ يازول يا رائع

شكرآ يا سمباتيكو يا زول يا رائع
وشكرآ لنجلاء التوم التى طال غيابها عن المنتدى، ارسل لها تحياتى لو اتصلت بها رجاءآ. الشاعر اسمه ازهرى محمد على وليس ازهرى عبد الرحمن، وجب التنويه يا صديقى..

الاخ الاستاذ عادل عثمان

تحياتي

شكرا كثيرا على التصحيح
لا ادري كيف كتبت اسم ازهري عبدالرحمن بدلا عن ازهري محمد علي
طبعا هناك ايضا الشاعر ازهري عبد الرحمن وله قصائد مميزة لكنه اختفى لفترة طويلة ولم نعد نرى له جديدا ولعل اهل طابت وكترانج يمدونا بجديده .

كنت قد وضعن الاغنية من قبل ولعلها الآن في قسم مكتبة الراحل مصطفى سيد احمد - لكن كان الصوت ضعيفا وغير واضح

تحياتك للأخت نجلاء ستصل باذن الله
ودعواتي معك ان تتواصل مع الاعضاء قريبا

اكرر شكري

الاخ سييمباتيكو....سلامات

شغل جميل جدا

ممكن تدينا لنك عشان نحفظه؟؟

تحياتى لى نجلاء بلغها اشواقى الشديدة و قول ليها اظهرى انشاء الله فى الماسينجر

الأخت الاستاذة بمنى

تحياتي لك وشكرا على التعليق
تحياتك ستصل للأخت نجلاء

عندي مشكلة في استخدام كود الحفظ
لذلك عليك بهذا الرابط الى ان تحل المشكلة

www.bayanit.com/upload/protected/salamtsimpatic55.ra