أهل العوض .. حردان من دلالو ولا مالو ..

بكائية للزمن الجميل ..

..
..
وهذا الزمان حينما يمرر فرشاته الأنيقة على صفحة قلوبٍ ناصعة البياض .. ترتسم ملامح الوجوه المليحة .. فتأسرك إبتسامة صافية أو تربت على فؤادك كلمة حنينة .. أو هكذا ..

في هذه الصالة / الخيمة الفسيحة – البورد – تجالسنا جلوس العُشاق على دفء الشواطئ .. جلوس الحواريين في حضرة المشائخ .. نرفد من علمهم .. نتسلى بظُرفهم ..( نطرد الأحزان ) فنضحك .. كم من مداخلات تنحِتُ لها وشماً بذاكرتك .. وكم من وشائج تنبت خارج أسوار الخيمة لتنغرس عميقاً .. عميقاً .. بلقاءٍ حميم .. أو ببصمة صوت لا تتطابق وأصوات ..

كم كنا نتصيد تعليقاً لمّاحاً .. فطِناً .. فكِهاً .. مُجوّداً .. يرمي به .. كان محرضاً على الإبداع محفزاً .. مستفزاً ، فتأتي المداخلات غنية ثرة .. من منا لم ( يطرّز ) مع الجندرية ثوباً فصّله أهل العوض بسؤاله المتخم بالطرافة .. فصار أشهر موديلات العصر ذلك الثوب – توب حليمة تو – من أضحك تماضر حتى نهاية خطوات الضحك فصارت ترددها ( دجاجي ياااالقطو الحبه ) من منا لم ( يكفي الفُندك .. وعاين بالصريف ) .. من منا لم يعد قراءة الكشكول بروحٍ عصرية ..

شكّل أهل العوض ثنائيات أتحفت الزوار والأعضاء .. ما ذكر الديبة إلا وتذكرنا حمد .. من لا يذكر مساجلات أهل العوض والملا عمر .. شيخنا د. أبكر .. بت قضيم .. تماضر .. من ( دق ) وتد الخيمة الفسيحة فأتوه حفاة حُلاّق .. شنتير الفصيح .. سنجاوي شيخي .. المطر .. نزار .. سيف كلي .. شيخهم الكتيابي .. فضاقت بهم الخيمة بما رحٌبت .. ففتح لها نفاجاً ..

ما هاتر .. لا جادل ... ما خاصم ، كان مثل ضُل الضُحى .. يأتي على إستحياء فذهب كما جاء دون ضوضاء .. فازداد بذلك – حسب ظني – عدد ( المتواجدون الآن ) من الزوار .. فله ولكل من أمتعونا بهذه الدار المضيافة كل المحبة والود .. وأتمنى مع بداية الدورة الجديدة يعود الزمن الجميل ..

عذراً صديقي أحمد .. أعلم تماماً لن يُعجبك هذا البوست .. ولكنه الشوق ..

عبدالرحمن

اشتاق اهل العوض وافتقده

استبشرنا بقدومك يارحمابي خيرا ونتمنى عوده

اهل العوض

تخريمه

الوصيه بالمهله

تقول لي بدر راويه قالت ليك الماسنجر رجعوهو

الله عليك يا الرحمابي يا رايق.

أهل العوض تركني "شخسياً" في غربة بوردية مملة لأبعد حدود الملل .. لولا ومضات قليلة أراها هنا وهناك.

يا أبو حميد .. تــعــال أغــشـــانــي
شوف الحال وشوف نّـقْـد الـجَداد في لســاني
بورد الجن شنقني .. وفي الهبوب فـكّــانـــي
سّــدّ الباب عليْ .. رَبَـط الـحّـبِـل بـرّاني

عـرْضة واتفرقت.

راوية
شكرا .. اخجلتوا تواضعنا يعني ، دأئما سبّاقة

هذا رجل كذلك من زمن جميل نشتاق له كثيرا

تخريمة

وصيتك وصلت للبدري ، الزول ( ميرود ) بعد يطيب برجع للبورد

تخريمة .. وين هالة قوتا تحياتي ليها

كر علي يالبدري

عدوك انشاءالله

تبرا من الورده انت




اما يا رحامابي ناس الزمن الجميل ظاهرين واحنا بنتنشق ريحتهم ومن بعد كمين ميل وبنعرفهم

وقطعا اهل العوض زول جميل من زمن جميل

اما هاله قوته امرأه الزمن الجميل

بعد ما انتهت من السمستر

اتفلهمت علينا ومشت السودان

وخلتنا لي البرد والصقيعه

شنتير الزول الزين
تعرف الزول دا زي القهوة كدا .. تتقريف ليهو عديل دا
زول ممسوخ خلاس ..
حمدلله بي طلتك يا شنتير

اولا يالتبادي يا رحمابي..

حمد لله على سلامة الطلة لروحك دي..

أهل العوض رجل فاضل.. كنت أبدأ يومي بمداخلاته الجميلة التي تشبه روحه..

فهل ترجع تلك الأيام..؟ ويرجع أهل العوض..

آآدي قعدة في انتظار رجعتو..



تخريمة: شنتير.. انتا زاتك ليك وحشة..

ســـلام يا راوية..

رجوية صاحبتي

سعلت منك في سودانيات بي هناك ، دحن ما كلومك

وهدى سنقيرة ، بس بي صراحة ما أظنو يعود الكان ولا ..

النقيب الرحمابي .. أهذا أنت ذات نفسك .. صاحب الحضور الأنيق والنفس الشفافة والقلم الرشيق الناصع النضافة .. ياخ لاهنت وكتر خيرك ، هذا ثوب فضفاض .. حتما أكبر مني لكن لأنك موفور الكرم ، لا يكون منك إلا ما كان موفور الكرم .. الوعد بيناتنا سيظل وعد بيناتنا .. والبيجي للروح ، ما بروح .. تلك الأيام الخضراء .. حتماً ستعود .. أو قل ستعوض بأجمل منها .. تحياتي للخال

حيتوا وجلست
في حسنه اختلست
وفي سحره انغمست
وبي حديث ديبلوماسي
قال لي نوري ماسي
واحذر التماسي

قت ليه انت مالك
سحروك واللا مالك
قال عندي حمى
وبيّ صداع ألمّ
وبي أثر التماسي
تعذر نعاسي
ولي يومين أقاسي

راي وا ((Rawia وريثة ميراث الأنبياء .. الجليلة إبنة الجليل .. تحية وقومة ليك ..

شيخي وشيخ عموم العرب .. بالله اللدي لا غيرو .. أنت من محامد هذه الساحة الوهيطة التي جعلت من مثلي حواراً لمثلك .. أنا مدين لك بلحظات وساعات جميلة ومرحة وكثيرة .. أنا ما بقدر أجازيك ياكين وكما قال الذي قبلنا (بتصرف) :

كترة الطلة والجية البلا غانون (قانون)
نستني شوق لام حاجبا مقرون
قل العملة يضرس حنضلا عطرون
طنوبا صادف الرملة وختى الماعون

والله وتم بالله مازلت أردد في خشوع تام في أماكن عديدة هذا المربع الذي جعل شعر جلدي يقف كل سبيبة براها مند لحظة قراءته الأولى ، يتكرر نفس الشعور كل ما أردده .

شغل القوة يا ام قرقد عليه شداد
والسفر اب مساويكا حجر غير زاد
العطا من عدم ، ندي ونقول ما عاد
وصبارين علي الكاينات بلا ميعاد

تحيات لك من حوارك أيها الشيخ المترع فضلا وأصلا وشعوراً .

الأستاذة رجاء .. تعظيم سلام .. ، العفو يا استاذدة ، احترام لقلمك الأنيق وروحك المشرقة .. لك عظيم تحياتي واحترامي .

يا اخوانا والله لا دلال ولا أدلة .. كل ما هنالك أن المنبر مليء بالإبداع والمبدعين ، ونحن أخدنا زمننا ..

أرجو أن أذكر بالخير كل من ذكرني والعديد من أصحاب النفوس النقية الذين تشرفنا بمعرفتهم في هذا الفضاء الجميل ، أحييهم وأذكر منهم :

نزار حسين ، سيف كلي ، ياسر محجوب (ومبروك السعفة للوالد ، عجبنا والله) سنجاوي ، قيسان ، تمبس الجميل ، أساسي ، د. أبكر ، الملا عمر ، أبوقوتة ، هشام يازول ، صلاح غريبة ، العمدة قرشو ، قرجة ، كولا ، جاد ، حافظ خير – فردة ، بكري سيد اللبن ، ومن البنيات الجندرية ، دوما ، بت قضيم ، وجميع من جمعتنا بهم مداخلات أو لحظات جميلة .

أهل العوض يا عزيز..

حمد لله ألف على الطلة الباهية..

لو طلع ما دلال ولا مالو.. السبب القلتو ده غير مقبول.. وإلا كلنا نأخد القرار ده..

بركة الرجعتا..

وفي انتظار البدري..

الحمد لله الذي بنعمته تتم الصالحات
الحمد لله الذي أعاد لنا الرحمابي وأهل العوض
الحمد لله الذي قدر فهدى

الرحمابي صديقي..

ازيك..

جيت تاني عشان اتفقًد البدري الغالي..

هسع الملا عمر كتب لي في بوست انه غيابو ارتبط بغياب أهل العوض..

اها يا بدر.. لو بتقرأ في الكلام ده اعرف انه لازم ترجعو.. لأمر ضروووري..

لما تجي حاقولو ليك..

أخي الرحمابي
أنت عاصفة انطلقت من الوطن واكتسحت بلاد المهجر ولكنها لم تحمل إلينا إلا الزهور. سعدت كثيراً بعودتك وإطلالتك وأستصرخ معك كل الأشواق في إنتظار عودة الرائع المبدع أهل العوض والعضد أحمد وبقية العقد الفريد من الغائبين والمبتعدين طوعاً أو كرها.

أصدقائي الجميلين

راوية كما وصفها أهل العوض وكفى

رجاء صديقتي المشاكسة

الحبر وبحر العلم مولي .. الملا عمر

والمحتفى به وتواضعه الجم

استثني نفسي بلا تواضع .. جميعكم له أفضال على هذا البورد بالمشاركات المتميزة والمفيدة حقا فكانت سببا في اجتذاب العديد من الزوار والمريدين .. وسعدت جداً بحرص راوية ورجاء والملا عمر وشنتير على عودة أهل العوض .. فأرجو أن تزول أسباب الإحتجاب .. واتفق مع رجاء إذا كان ما تعللت به صحيحا لكنا نحن أولى بالرحيل منذ زمن ببعيد ..

عبدالرحمن

شيخنا الكبير، المؤدَّب المؤدِّب، عبد الرحمن الرحمابي، لك العافية والمعافاة من عنت الدنيا وأحابيلها. ذات ليلة من الليالي الغبراء وردت حياضي "الموالح" رسالة من الكبير الآخر أبي جهينة يعتذر فيها عن شيء لم أعدّه اساءةً ابدا. ورددت عليه بأنني من فرط احترامي لابي جهينة (يعني هو نفسه) والشيخ الرحمابي، لا أستطيع أن أفرق بينهما وكثيراً ما أخلط الرحمابي بأبي جهينة فأنْعَم بفَـتّـةٍ "رحمابية جهينية" تغنيني عن فتافت حصْرمٍ مزجاةٍ على قارعة البورد.

قبل ثلاثة أيام خلت كنت في "ونسة وضحك نامن قسمنا الليل" مع أعز عزيز في الدنا. مع رجلٍ يمُتّ لأهل العوض بصلةٍ لا يعلمها أهل العوض "ذات نفسو". وكان مثار الحديث: جواميس رفاعة!!!!. وقد كتبت محضراً عن تلك الجلسة بتصرّفٍ غير نبيه .. ورُمْتُ إضافة ذاك المحضر إلى هذا البوست .. لكن "سَكْـرَة الطربِ الغشوم" قذفت بمحضري ذاك إلى وادٍ من أودية البورد لا أعلم موقعه، ولا أدري أين ذالك الكلام الذي كتبْت!!. هذا هو مكانه لكنه تاه في "جخانين" البورد. اين هو؟ الله تعلم.

عزيزي وتاج راسي ورفيقي الأثير في الغربة "السمومها تحرِّق" أهل العوض ود الطاهر. الحمد لله الذي أرانا إياك في هذا البوست الرقيق. ليتك تعلم مرارة الغربة البوردية. لا أزال اذكر سؤالك لي عن أخينا عثمان محمد صالح وإعجابي به (وخوفي عليه أيضاَ). وقد أثبتت الأيام، لي وللآخرين، أن غربة البورد أقسى من غربة البلاد. لا أدري لماذا أقحمت عثمان محمد صالح هنا!!! ربما لأنني أكتفيت بدور المشاهد عندما أنهال الناس عليه بالنصائح .. والملامات. رد الله غربة عثمان محمد صالح.

أهل العوض، أؤيدك تأييداً تاماً على قرارك الابتعاد عن البورد ما استطعت. اما انقطاع المراسلات الخاصة فهذا ما لا أفهمه يا شيخ الإسلام. تعلم أن لك في القلوب منازل، مداخلُها شتى، فادخل ببوابة الخاص، تجدنا مهللين.

شغل القوة يا أم قرقد عليه شداد!!! تلك أيام خلت .. وسنعيدها سيرتها الاولى بإذن من أبدى وأعاد. يا سلام على الكلام الصليبة المو مغشوش بيموية.

ولك وللرحمابي آلاف التحايا وحزم من الريحان والنال والمحريب: محريبهن طَـلَـق نَـفَـس الفِـرير والباتْرا.


وكيف أنسى رجاء وراوية .. والتخريمة الواجبة. بنات العباسي وأولاد العباسي؛ لكم الود وما ترك العباسي من دَيْنٍ على الحناتِـبة؛ ديْنٌ عالقٌ إلى يوم يبعثون. طبعاً أنا برّة الدَّيْن ده

وفي وداعة الله

التحية للجميع هنا!
شكراً يا رحمابي على هذه الإلتفاتة الصادقة الصدوقة...

ويا أهل العوض، إني لأفتقد حضورك في هذا المكان كثيراً...
أملي أن تعود إليه.
حافظ خير

Quote: قمّز بي اربعاتو وعام مسدّر طامِح رحل الكوعو لي زورو السغير مو ملامِح جنيب المِدْرعات العاض لجامو ورامِح ناخد دور حظوظنا معاه .. والله يسامح

موية سكّر من نزار حسين لأهل العوض. لزوم المدودرا .. دودر يدودر مدودراةً أو مدودرةً أو دردرة أو درادر. شوفوا ليها حل.

العزيز شانتير..

عارفاها شنتير..

وانتا زاتك حمد لله على السلامة.. وبركة في الشوفة..



حافظ خير تحايا من هنا لغاية بوستك الاسفيري..




البدري لسة ما بان..

النقيب رحمابي

ملك التواصل اللطيف

تحياتي لك ولزهراتك الجميلات وكل سنة وانت بخير



وللحبيب الغالي احمد

عد لديارك فهي مشتاقة

وبطل حركات العريبي لمن يحنسو دي

الناس الزينين اهل الكلام الزين
و القلوب الراكزة و تريانه محبة
المجلس المحضور دا بالله ما تفرتقو
نمارض فيهو حبيبنا البدر لمان
يشم العافية و يرجع لينا سالم

سوا النضم السمح و نحن نتقهوج
و نتم الكيف بكلامك السمح الموزون

يديكم العافية و يا عبد الرحمن بلغ البدر تمنياتنا له بعاجل الشفاء

ودي قعدة

اصدقائي الحلوين
شنتير شخي

يا زول أنا اتبلمت تب من النضم الجميل والعميق دا ، والله غلبني الكلام تب ، دا كلام كبار والله ما بقدر أجاريهو .. بس ترك بالنفس فرحة طفولة لأني حاسس إنو من القلب ، فلك الف محبة وشكر

رواية ورجاء .. المحبة بلا قيود ربنا يخدر ربكما

فردة .. مناشدة جميلة منك لأخونا ابو حميد ولكل الغائبين فلك الشكر

قرجة الظريف

هل سيرجع البورد لأيامه الجميلة فعلا .. أظنو دا زي كلام الكورة العصر الذهبي
ليتو يعود ..

الملا عمر أبو فاطنة .. البجيب د. أبكر ليهو هدية بالجد بالجد

نصار .. أيها الصديق الحبيب .. كلما ارى هرجا ومرجا بالبورد أنظر لحكماء البورد وأجد حاضرا .. فلك مني المحبة الصادقة

الععذرة يا اهلنا .. أنا بعافر مع الزمن معافرة شديدة خلاس

عبدالرحمن

دحين ما اخير نديك رفعة شوية كدي؟. هووووووووب أها. زهجة بس ساقتني ليك.